Veiliutaki Na Kawa I Dawide (Dawid’s Descendants Will Rule).

Thought: If Day And Night Do Not Happen, Then, Dawid’s Kin Will Not Rule!

 .............................

Serving For Yom Rishon, [Fifth Month] Av 21, 5773

 MAI NA NEVI’IMI AKARONIMI (FROM THE NEVI’IM ACHRONIM)

Baleta qo na ka e kaya o Yahuwe (YHWH), E na sega vakadua ni muduki laivi mai vei Dawide e dua na tamata me tawana [tiko] na idabedabe vakatui i Yisira'yili; 18 E na sega talega ni muduki laivi vakadua mai vei ira na kohanimi era L'vi'im, e dua na tagane me dau mai tu e mataqu, me cabora na isorokama, vakama na isoro laukana kei na isoro tale eso e veiveisiga. 19 Na vosa oqo i Yahuwe (YHWH) a lako mai vei Yiremeyahu: 20 Oqo na ka e kaya o Yahuwe (YHWH); Kevaka oni rawa ni voroka na noqu lewa me baleta na bogi, se na noqu lewa me baleta na siga; me rau sa kakua ni basika mai na lomanisiga se na lomanibogi [e na kena gauna lokuci]. 21 Ia na noqu veiyalayalati vata kei [koya] na noqu dauniveiqaravi o Dawide sa na rawa talega ni voroki, oya me  kakua ni dua na [nona] kawa e veiliutaki tiko vakatui mai na nona idabedabe vakatui, se dua na Li'vi'imi era kohanimi me mai veiqaravi vei au. 22 Me yaco i na kena iyacoyaco, ni ra na sega ni wili rawa o ira na lewe ni mataivalu mai lomalagi, ka sega ni vakarautaki rawa na mataninuku e waitui, o au, au na vakalevutaka na kedra iwiliwili na nona kawa na noqu dauniveiqaravi o Dawide, kei ira na  Li'vi'imi me ra na dau veiqaravi vei au. 23 Na vosa i Yahuwe (YHWH) oqo a yaco mai vei Yiremeyahu, 24 Oni se sega beka ni vakasamataka na vosa era kaya tiko na tamata oqo, ni o Yahuwe (YHWH) sa vakanadakui rau na matavuvale e rua, a digitaki rau taumada? Qori era sa sevaki ira kina na noqu tamata, ka sega ni wiliki ira ni ra dua na matanitu. 25 Oqo na ka e kaya o Yahuwe (YHWH); Kevaka au a sega ni vakadeitaka na noqu lewa me baleta na siga kei na bogi, ka tekia dei na lawa me vauca  na lomalagi kei na vuravura,   26 Ia [qori ga] au na qai vakanadakui ira kina na kawa i Ya'akove kei ira era kawa i Dawide na dauniveiqaravi, oya meu sa sega ni digidigi mai vei ira na nona kawa, o ira na tamata me ra na vakavulewa vei ira na kawa i Avarahama, Yi'sake kei Ya'akove. Baleta au na vakavuna na nodra kau lesu mai o ira era a kau vakavesu, au na qai vakaraitaka vei ira na yalololoma.

Yiremeyahu (Jeremaia) 33:17-26

NA IVAQA NI BULA (FOOD FOR THE SOUL)

Na tamata yalododonu e na bulataka e dua na bula e kune ga kina na ivalavala vinaka (integrity); era na kalougata kina o ira na luvedra era muri i ira mai.

Mishlei (Vosa Vakaibalebale) 20:7

LOMANI YAHUWE NA NOMU KALOU (LOVE YHWH YOUR MIGHTY ONE

Ia me baleta na Kalou (Mighty One), na nona sala e daumaka vakaoti, na vosa i Yahuwe (YHWH) sa vakatovolei oti e na bukawaqa; e taqomaki ira kece era kunea na nodra vakarurugi mai vua. 32(31) Se o cei tale na Kalou (Mighty One) vakavo ga o Yahuwe (YHWH)?  O cei na uluvatu, vakavo ga na noda Kalou (Mighty One). 33(32) O Yahuwe (Yah) sara ga a vauca na toloqu e na kaukaua, e cakava me dodonu na noqu sala. 34(33) E cakava meu totolo, yava dei me vaka na dia, e rawa kina vei au meu tu e na noqu tikina cecere. 35(34) E vakatavulica na ligaqu e na ivalu me yacova ni sa rawa ni loveca e dua na dakaititi barasa na ligaqu. 36(35) Oni solia vei au na nomuni isasabai, oqori na veivueti; na ligamuni imatau e tabei i au cake, na nomuni yalomalumu e vakavuna vei au meu vakaitamera. 37(36) Oni vakabalavutaka na ikalawa au rawa ni lakova, ia e sega ni tamoi na noqu qurulasawa. 38(37) Au na cemuri ira na kequ meca, au qai toboki ira; au sega ni vuki lesu me yacova ni ra sa vakarusai. 39(38) Au na vakadasilataki ira, me ra kakua ni tucake rawa tale; era bale sobu e ruku ni yavaqu. 40(39) Baleta oni a tokoni au e na kaukaua, me baleta na ivalu, ka vakacuvari ira era saqati au e rukuqu. 41(40) Oni cakavi ira na kequ meca me ra vuki vakanadaku me ra qai dro, au qai vakarusai ira era dau cati au.

Tehillim (Same) 18:31-41

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No.309in 5773 (Total 2036)	July 28, 2013
Reading	Hebrew Date
Yesha’yahu (Isaiah) 43-44	M #5: Av 21 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26.

May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Dreve Na iNaki Ni Tui Ashuru (King Ashur’s Wishes Foiled)

Thought: YHWH Protected Y’hudah Because Of His Servant Dawid

 ........................

Serving For Yom Shlishi, Tevet 5, 5773

MAI NA NEVI’IMI RISHONIMI (FROM THE NEVI’IM RESHONIM)

Oti qai talatala o Yesha'yahu na luvetagane i Amozi vei Hizikiyahu me kaya, Na veika o a masulaka mai vei au me baleti Sanikerive na tui Ashuru, au sa rogoca. 21 Oqo na vosa e kaya o Yahuwe (YHWH) me baleti koya, Na luveyalewa tabutagane i Zaiyoni, e sevaki iko, ka dredrevaki iko vakaveibeci; na luveyalewa i Yerushalayimi e kurea tu mai na uluna mai dakumu. 22 O cei sara mada o vosavakacacataka tiko ka vosa beca tiko?  O kailavaki cei sara tiko mada e na domolevu mo qai vakalevulevuya tiko kina na nomu rai? Vei koya beka na Yalosavasava Ledua i Yisira'yili. 23 E gusudra na nomu dau kauitukutuku o iko o sa vakaucacataki Yahuwe (YHWH), ni o kaya, E na iwiliwili levu ni noqu qiqi ni ivalu, au sa lai yacova rawa kina na veiulunivanua cecere, i  na lomadonu i Li'vanoni, kau sa taya sobu na kena veisitari babalavu; kei na veisaipurusi digitaki mai keya; au sa lai yaco sara e na veitutu ni vanua mai colo sara, kei na kena veikau totoka vakaoti. 24 Au sa kelia ka gunuva na wai tawakilai, e na qeteqete ni yavaqu au vakamamacataka na vei uciwai kece, na veiuciwai mai Ijipita. 25  O se sega beka ni rogoca? E na gauna balava sara au a bulia kina; e na gauna makawa au cakava kina na kena ibulibuli. Ia qo au sa cakava me yaco, io sa yaco oti; na korolevu vakabai oya e na biu laladidi tu, me dua ga na  bukebuke. 26 Qori era sa gogo kina o ira na kena ivakatawa, era a vakadrukai era qai veilecayaki, era qai vaka na co ni veivanua, ka vaka na kaudraudrau drokadroka, ka vaka na co e na delavuvu ni vale, ka vaka na sila era sa malai tale, ni ra se bera ni tubu cake. 27 Ia au kila na vanua o vakaitikotiko kina, ka vaka kina na nomu curu mai se na nomu curu yani kei na nomu yalo katakatataki au tiko. 28 Baleta ni o sa bolei au, au sa mai rogoca e daligaqu na nomu vosa ni veibeci, o koya oya au na vakacuruma kina e dua na batinisiwa i ucumu, ka vakaciqiri e dua na itubetube (bit) e na tebenigusumu, au na qai saumaki iko lesu, mo lesutale e na gaunisala ga o a muria mai. 29 Qo me ivakatakilakila vei kemuni; e na yabaki oqo oni na kania na veika era tubu ga vakataki ira; e na ikarua ni yabaki oni na kania na veika era kedra me vaka eliu; ia e na ikatolu ni yabaki oni na teivaka, ka tamusuka na veivaini oni qai kania na kena vuata. 30 Na vovo ni kawa Ya'huda e na qai tubu na kedra iwiliwili, era na vakawakadra sobu tale, ka vuataka na vuadra e cake. 31 Baleta era lako mai Yerushalayimi e dua na kedra vo vo, oya o ira era dro bula mai na ulunivanua o Zaioni: na yalogugumatua i Yahuwe ni lewevuqa  (YHWH Tzva'ot) e na cakava oqo. 32 O koya oqo na ka e kaya o Yahuwe (YHWH) me baleta na tui Ashuru: O koya e na sega ni curuma na korolevu oqo, ka na sega talega ni vanataka kina e dua na gasau ni dakaititi, ka sega ni toro volekata na kena isasabai ka sega talega ni tuvaivalutaka. 33 Ia e na sala ga e muria mai, e na sala vata sara ga oya e na muria lesu, ka na sega ni curuma na korolevu oqo, e kaya o Yahuwe (YHWH). 34 Baleta au na taqomaka na korolevu oqo meu vueta, e na vukuqu o au vakataki au, ka vaka kina e na vukuna na noqu dauniveiqaravi o Dawide.M’lakhim Bet (2 Tui) 19:20-34

NA IVAQA NI BULA (FOOD FOR THE SOUL)

Kakua ni beitaka e dua na bobula vua na nona turaga (master) de qai vatonaki (curse) iko o koya, o qai  vakacalai.

Mishlei (Vosa Vakaibalebale) 30:10

LOMANI YAHUWE NA NOMU KALOU (LOVE YHWH YOUR MIGHTY ONE

E NA bati ni veiuciwal mai Bavela, e keya eda a toka sobu. Io, eda a tagi, ni da vakanananu i Zaiyoni. 2 Eda a vakaliliga na noda hapi e na veiwilou mai keya. 3 Baleta e keya, o ira era a kauti keda mai vakabobula, era a vinakata mai vei keda e dua na sere; o ira era a vesuki keda era a kaya vei keda, Lagata vei keimami  e dua na sere mai Zaiyoni. 4 E rawa vakacava vei keimami me keimami lagata e dua na sere i Yahuwe (YHWH), e na loma ni vanua tawakilai? 5 Kevaka meu guilecavi iko i Yerushalayimi, laiva na ligaqu imatau me guilecavi au. 6 Kevaka au sega ni nanumi iko, laiva na yamequ me kabita na gadroqu, kevaka au sega ni digitaki Yerushalayimi vakalevu cake mai na veika au dau taleitaka  vakalevu.

7 ¶ Nanumi ira, i Yahuwe (YHWH), na luve i Idomi e na siga i Yerushalayimi; o ira era a kaya, Vakama yavu, vakama yavu vakadua i na kena yavu. 8 I luveyalewa i Bavela, dau tauri itoki ni ivalu, me kalougata o koya e na vakarautaka vei iko na ka vata o a vakayacora vei keimami 9 Me kalougata o koya e tarai ira qai botolaki ira na nomu lalai (e na dela ni) vatu.

Tehellim (Same) 137:1-9

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 352 o/o 1812	December 18, 2012
Reading	Hebrew Date
Nechmeyah ( Niemaia) 11-13	M #9: Tevet 5, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Mate O Dawide (Dawid Dies).

Thought: Live By YHWH’s Mitz’vot and Be Strong: Dawid’s Last Words.

 .......................

Serving For Yom HaShishi, Tishrei 5, 5773

MAI NA NEVI’IMI RISHONIMI (FROM THE NEVI’IM RESHONIM)

E na gauna qo, na siga me mate kina o Dawide a sa roro voleka sara mai; a qai tatau kina vei Sholomo na luvena tagane ni kaya, 2 Au sa na lako e na sala e dau muria  o vuravura taucoko; o koya oya o iko mo kaukaua tiko kina, ka vakaraitaki iko vakataki iko ni o tagane. 3 Taqomaka vinaka tiko na ivakaro i Yahuwe (YHWH) na nomu Kalou (Mighty One) mo bula muria na nona ivalavala ka mo taqomaka na nona ilesilesi, na nona lawa, na nona lewa kei na nona ivakadinadina me vaka era volai tu e na Toraa i Moshe, me rawa ni o na rawaka vakalevu e na veika kece o cakava ka mo rawa ni tini vinaka e na vanua cava ga o goleva. 4 Me qai rawa kina vei Yahuwe (YHWH) me vakataudeitaka na nona vosa a kaya me baleti au, ni a kaya, Kevaka era qarauna vinaka na nodra ivalavala o ira na luvemu, me ra toso tiko e mataqu e na yalodina, e vuniyalodra taucoko kei na nodra bula (soul) taucoko, e na sega vakadua ni cala ni na dua na nomu tamata e na dau dabeca tiko na idabedabe vakatui e Yisira'yili. 5 E na gauna oqo, o iko o sa na kila vinaka tiko kina na ka a cakava vei au o Yo'ave na luvetagane i Ze'ruyaa, vata kei na ka a cakava vei rau na komada ni mataivalu ni Yisira'yili; vei Avenaa na luvetagane i Neri kei 'Amasa na luvetagane i Yeta, ni a vakamatei rau  o koya, qai vakadave dra kina me vaka e na gauna ni ivalu, ia e (cakava tiko e) na gauna ni sautu, qai tauva mai kina na nona ioro e vau tiko e tolona kei  na ivava e dara tiko e yavana, na dra (me vaka) e dave mai na i valu. 6 Cakava vua na ka e donu e na nomu vuku, ia kakua ni laiva me na bulu o koya e na vakacegu, e na gauna sa sikoa kina na drau ni uluna. 7 Vakaraitaka na yalololoma vei ira na luvetagane i Barazilai na Qili'adi, qai cakava me ra wili vata kei ira era dau kana e na nomu teveli; baleta qori era a cakava e na nodra a qaravi au e na veika kece, e na gauna au dro kina mai vei Avishalome na tuakamu. 8 Raica, sa tiko vata kei iko o Shimi'i na luvetagane i Qera, na Biniyamini e na matavuvale i Bakurimi, o koya e a rukaki au vakaca sara e na siga au a lako kina i Makanayimi; ia o koya a lako mai me mai tavaki au e na Yaradani, au qai bubului kina vua e na yaca i Yahuwe (YHWH), niu kaya, Au na sega ni vakamatei iko e na iseleiwau. 9 O koya oya mo kakua kina ni vakadonui koya ni tawacala; baleta o iko o tamata vuku, o na kila na ka mo na cakava vua, mo tauca kina e uluna (na itotogi) ni nona cakaca; o iko mo na qai biuta na uluna sikoa ni sa dradra tu i She'ola. 10 Oti sa qai mocelutu o Dawide vata kei ira na tamana, a qai lai bulu e na loma ni korolevu i Dawide. 11 Na dede ni gauna a veiliutaki tiko kina vakatui vei ira na Yisira'yili o Dawide, e vasagavulu na yabaki; e vitu na yabaki a veiliutaki kina vakatui mai Hevaroni, qai tolusagavulukatolu na yabaki na nona veiliutaki tiko kina vakatui mai Yerushalayimi. 12 Oti sa qai dabeca o Sholomo na idabedabe vakatui nei Dawide na tamana; na nona matanitu a qai vakataudeitaki matua.

M’lakhim Alef (1 Tui) 2:1-12

NA IVAQA NI BULA (FOOD FOR THE SOUL)

I luvequ tagane, kevaka e matua na vuniyalomu, na vuniyaloqu talega e na marau.16 Io e na marau na vuniyaloqu, ni kaya na veika dodonu na tebenigusumu.

Mishlei (Vosa Vakaibalebale) 23:15-16

LOMANI YAHUWE NA NOMU KALOU (LOVE YHWH YOUR MIGHTY ONE

E na vukuna na iliuliu. E na ilagalaga ni Senilili ni Veidinadinati (Lily Of testimony). E dua na vucu (Mikhtam) i Dawide e na nona veivakatavulici wavoki,  2 E na gauna a valuti Arama-Naharayimi  kina vata kei Arama-Sovaa, kei na gauna a lesu mai kina o Yo’ave qai vakamatea e 12,000 mai Idomi e na bucabuca masima. 3(1) Kemuni na Kalou (Mighty One) oni sa vakalecalecavi keimami, oni sa cemuri keimami, ka yaloca vei keimami; ni bau vuki mai vei keimami. 4(2) Oni sa cakava me sakure na vuravura; oni musuka: vakavinakataka na veitikina era sa ca; baleta sa gogo. 5(3) Oni sa vakaraitaka vei ira na nomuni tamata na dre dre; oni sa cakava me keimami gunuva na kosakosa ni waini. 6(4) Oni sa cakacakataka e dua na mana vei ira era rokovi kemuni, me ra kakua kina ni dro mai na dakaititi. 7(5) Me rawa vei ira na nomuni daulomani me ra vakavakarau, veivueti e na ligamuni imatau, ka rogoci au.

8(6)¶ O Yahuwe (YHWH)  sa vosa oti e na nona yalosavasava; au na kaukaua, au na wasewasei She’kehema kau na vakatulewataka na iwasewase ni bucabuca mai Sukota. 9(7) O Qi’ladi e noqu, o Ma’nashe e noqu, o Ifira'yimi na kaukaua ni uluqu; ia o Yahuda na noqu tui; 10(8) O Mo’avi na kuro ni vuivui; vei Idomi au na lavaka na ivakacavacava, o Pe’leshete au na rawaa e na qaqa. 11(9) O cei e na liutaki Idomi? O cei e na kauti au i na korolevu qaqa?  12(10) Baleta raica, kemuni na Kalou (Mighty One) o kemuni oni a ceburaki keimami laivi, oni qai sega ni mai liutaki keimami kei ira na neimami mataivalu. 13(11) Solia vei keimami na kaukaua me keimami saqati ira na keimami meca; baleta e tawayaga na veivuke ni tamata. 14(12) Vei Yahuwe (YHWH) ga keimami na cakava rawa e na gumatua; baleta o koya ga e na butuki ira sobu na keimami meca.

Tehellim (Same) 60:1(0)-14(12)

 

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 265 o/o 1725	September 21, 2012
Reading	Hebrew Date
Tehellim (Same) 106	Tishrei 5, 5773 (7th month)
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

O Ira Na Qaqa. (The Brave)

Thought: Being Brave Involves Sacrifice And Devotion.

.................... 

Serving For Yom Shabbat, Elul 28, 5772

MAI NA NEVI’IMI RISHONIMI (FROM THE NEVI’IM RESHONIM)

Oqo na yacadra na tamata qaqa era a tiko vata kei Dawide; e dabe tiko e na imatai ni idabedabe, e na ikatolu ni iyatu o 'Adina, na tagane a lako sobu qai lai vakamatea e walunadrau na tamata e na dua na aua. 9 Taravi koya o Yilai'eza na tavalei 'Adina; o koya e a lako vata kei Dawide vata kei na tolu tale na tagane, e na gauna era a bolei ira kina o ira na  Pi'lisitimi ka ra vakarau tu me ra vala; ia ni ra sa vakasuka na Yisira'yili, 10 A qai tu o koya, ka ravuti ira na  Pi'lisitimi, me yacova ni sa dadaga na ligana ka sa kabita na nona iseleiwau; O Yahuwe (YHWH) a qai cakacakataka e dua na qaqa vakaitamera e na siga oya; era qai lesu ga mai vata kei koya na tamata me ra mai kauta na itoki ni valu. 11 Tarava yani o Shama na luve i Aqii, mai na nona ulunivanua na tui. Ni ra soqo yani na Pi'lisitimi me ra lai butakoca na bulumakau e na dua na loga ni lenitili, era qai veidroyaki na tamata mai vei ira na Pi'lisitimi. 12 A qai tu mai o koya e na lomadonu ni iteitei me vueti ira na bulumakau, ka ravuti ira na Pi'lisitimi; o Yahuwe (YHWH) a qai cakacakataka e dua na qaqa vakaitamera e ligana. 13 E tolu na tagane qaqa, mai vei ira na turaga bale, era lako sobu mai ka lako mai vei Dawide, e na gauna ni tatamusuki, i na loma ni qara vatu (cave) mai Adulami; ia o ira na nodra mataivalu na Pi'lisitimi era a keba tiko vakaivalu e na nodra buca na kawa ni tuwawa mai Refeimi. 14 O Dawide e na gauna vata oqori a tiko kina mai na valecere taqomaki, ia e na gauna vata oya, o ira na nodra ravouvou na Pi'lisitimi era a keba tiko mai Beiti-Lekema. 15 O Dawide a mateca tiko me gunu wai, oti qai kaya, Isa ke dua mada ga e solia vei au meu gunuva na wai mai na ikeliwai levu mai na loma ni korolevu o Beiti-Lekema! 16 O ratou na le tolu na tamata qaqa, eratou qai curu botea na nodra keba na Pi'lisitimi, taki wai mai na ikeli levu e tiko e loma ni korolevu o Beiti-Lekema, kauta mai, eratou qai kauta sara vei Dawide; ia o koya a qai sega ni via gunuva, ni a sovara laivi e na mata i  Yahuwe (YHWH). 17 Kaya o koya, E yawa kalia vei au, meu cakava na ka oqo, e na vuku i Yahuwe (YHWH); baleta o ratou na tagane qo, eratou a rawa ni vakaleqa na nodratou bula, ni ratou lakova. O koya oya a sega kina ni via gunuva o koya. Na ka vakaoqo eratou a dau cakava na tagane qaqa oqo. 18 O Avishai na taci i Yo'ave, na luvetagane i Ze'ruyaa, a nodra iliuliu e tolusagavulu na tagane. O koya a dulaka cake na nona moto me saqata e le tolunadrau qai vakamatei ira. 19 O koya a dokai vakalevu cake vei iratou na tagane e le tolusagavulu; qori a qai lesi kina o koya me nodra iliuiliu, o koya tale ga e dau vakayacora na veika vakasakiti, e tautauvata kei na ka era rawa ni cakava o ira na le tolusagavulu. 20 O Be'nayahu na luvetagane i Yo'hoyada, e dua na tagane qaqa ni Kavuze'yili, e dau vakayacora na veika vakasakiti; a vakamatea e rua na tagane qaqa vei ira na Mo'avi, qai lako sobu qai lai mokuta mate e dua na laione e loma ni veikau ni lutu tu na uca cevata vulavula. 21 A vakamatea talega e dua na kai Ijipita, e dua na tamata rairai vinaka; na kai Ijipita a taura tiko mai e dua na moto, ia o koya a lako sobu vua vata kei na nona itoko balavu, qai kaliraka  me kovea na moto mai ligana na kai Ijipita, oti qai vakamatei koya, e na nona moto ga o koya. 22 Na veimataqali ka vakaoqo e dau cakava o Be'nayahu na luve i Yo'hoyada, o koya e dau kilai levu e na kedra maliwa na tagane le tolusagavulu. 23 O koya e dau vakayacora na veika qaqa e tautauvata kei na kena era rawa ni cakava e tolusagavulu na tagane. O Dawide a qai lesi i koya me nodra iliuliu na nona matayadra. 24 O 'Asha'yili na taci i Yo'ave e a dua vei ira na le tolusagavulu; o Yilikanana na luvetagane i Dodo na Beiti-Lekemi; 25 O Shama na Harodi, 26 O Heleza na Harodi, o ira na luvetagane 'Ikesha mai Ti'koa; 27 O Avi'eza mai Anatoti, o Me'vunai na luvetagane Hishati; 28 O Zalimoni na luvetagane i Akoki, o Maharai na Ni'tofati; 29 Helevi na luvetagane i Ba'anaa, e dua na Ni'tofati, o Aitai na luvetagane i Rivai mai Qiva'a mai vei ira na kawa Biniyamini; 30 Be'nayahu na luvetagane i Pira'toni mai Qiva'a o Hidai  mai na uciwai o Qa'asha; 31 O Avi-'Alavoni na luvetagane i Aravati mai Qili'ade, o 'Azamaveta mai Bakurimi; 32 O Yiliyakaba na Sha'alavoni, o Yo'honatani e dua vei ira na luvetagane  i Yasheni; 33 O Shama, mai na ulunivanua (ni veiolive), o Aki'ami na luvetagane i Sharara na luvetagane i Aki’ama mai Arari, 34 O Elifeleti na luvetagane i Akashibai, na Ma'akati, o Yili'ami na luvetagane i  Akitofela mai Qilo; 35 Hezarai mai Karameli, o Pa'arai na Arabi; 36 Yi'qali na luvetagane i Yo'honatani  mai Zovaa, o Bani na luvetagane i Qoda; 37 Zeleki na 'Amoni, o Nakarai na  Bi'eroti, o koya e icolacola ni iyaragi i  Yo'ave na luve i Ze'ruyaa; 38 O ‘Ira na Yitiri, o Qareva mai Lakishi. 39 O Uraiya na Hiti; qo o ira na dauniveiqaravi i Dawide, era le tolusagavukavitu taucoko.

Samuela (Sh’mu’yl Bet) 22:17-37

NA IVAQA NI BULA (FOOD FOR THE SOUL)

Kakua ni tarova na veivakadodonutaki mai vua e dua na  gone lailai; baleta kevaka o kuitataki koya, o koya e na sega ni mate. 14 Ia e na gauna o kuitataki koya kina e na kuita, o iko o vueta tiko na nona bula (soul) mai na ibulubulu (Sh'ol).

Vosa Vakaibalebale (Mishlei) 23:13-14

LOMANI YAHUWE NA NOMU KALOU (LOVE YHWH YOUR MIGHTY ONE

E NA vukuna na iliuliu. E na ilagalaga ni Kakua ni Vakarusa (Do not destroy). Maivei Dawide, Na nona vakabauta vuni (Mikhtam) e na gauna a talai ira mai kina tamata o Sha’ula me ra mai yadrava na nona vale, me ra vakamatei i koya. 2(1) Vueti au mai vei ira na kequ meca, kemuni na Kalou (Mighty One), Sabai au maivei ira era tu me ra saqati au. 3(2) Vueti au maivei ira era cakacakataka na ca ka vakabulai au mai vei ira na tamata dauvakadavedra. 4(3) Baleta raica, era waraka tiko na noqu bula, na vere era sa vakalevutaka meu saqati kina; sega baleta niu talatalai dredre se baleta niu valavala ca i Yahuwe (YHWH). 5(4) Era cici me ra lai vakavakarau vakataki ira me ra mai saqati au, ka sega ni bau vakasamataka se o au, au a cala dina; 6(5) Yadra mai moni vukei au, raica i Yahuwe ni lewevuqa (YHWH Tzva’ot) na Kalou (Mighty One) i Yisira'yili, yadra moni sikovi ira na veimatanitu, kakua ni vakavotaka e dua e dau talatalai dredre ka vakasisila. 7(6) Era lesu mai e na yakavi, era veivakasosataki e na domodra me vaka na koli, era qai veitosoyaki tiko e loma ni korolevu. 8(7) Raica, era karakivosa mai gusudra; na seleiwau e toka e tebenigusudra; Baleta era kaya O cei e bau galeleta?

9(8) ¶ Ia o kemuni, i Yahuwe (YHWH) oni na dredrevaki ira; Oni na cakava na veimatanitu me ra vakalialiai. 10(9) Vei kemuni au na solia na noqu vakamuduo, kemuni na Kalou (Mighty One) baleta o kemuni na noqu isasabai. 11(10) O kemuni na Kalou (Mighty One) e na nomuni yalololoma oni na lako mai vei au, O kemuni na Kalou (Mighty One) oni na vakatara vei au meu raici ira na kequ meca e na qaqa.12(11) Kakua mada ni vakamatei ira, me ra ivakaraitaki mada vei ira na bula, de ra qai guilecava o ira na noqu tamata; cemuri ira ga e na nomuni kaukaua; ka vakamalumalumutaki ira sobu; i Yahuwe (YHWH) o kemuni na noqu inuinui. 13(12) Baleta na ivalavala ca ni gusudra kei na vosa ni tebenigusudra, laiva me ra kau laivi e na nodra qaciqacia; baleta na veirukaki kei na lasulasu e dau cavuta na gusudra. 14(13) Tilomi ira e na nomuni leva waromisa, tilomi ira, me rawa ni ra oti vakadua, me rawa ni ra kila ni o Yahuwe (YHWH) e vakavulewa tiko vei Ya’akove ka vaka kina e na iyalayala kei vuravura. 15(14) E na yakavi bogi laivi ira mera lesu mai; laivi ira me ra mai veivakasosataki tiko me vaka na koli, era qai veitosoyaki tiko e loma ni korolevu.16(15) Laivi ira me ra walokai, ia era qai sega ni vakasinaiti, ka laiva talega me ra veiciciyaki e na bogi baleta ni sega na ka me tawana na ketedra.17(16) Ia o au, au na seretaka na nomuni kaukaua; io au na seretaka vakadomoilevu na nomuni loloma, e na veimataka: baleta o kemuni oni noqu isasabai ka noqu ivunivuni e na siga ni noqu leqa. 18(17) Vei kemuni na Kalou (Mighty One) au na lagasere, baleta o kemuni na Kalou (Mighty One) ni noqu taqomaki, ka Kalou (Mighty One) ni noqu lomani.

Same (Tehellim) 59:1(0)-18(17)

 

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 259 o/o 1720	September 16, 2012
Reading	Hebrew Date
Tehellim (Same) 86-89	Elul 28, 5772 (6th month)
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Na Sere I Dawide (A Song of Dawid).

Thought: Dawid Was Always Full Of Praise For YHWH Mighty One.

........................ 

Serving For Yom Chamishi, Elul 26, 5772

MAI NA NEVI’IMI RISHONIMI (FROM THE NEVI’IM RESHONIM)

E talatala mai cake o koya qai vueti au; e vueti au cake mai na wai e vuqa. 18 E vueti au mai vei ira na kequ meca kaukaua kei ira era sevaki au; baleta era rui kaukaua cake vei au. 19 Era sosovi au mai e na siga ni noqu vakararawataki; ia o Yahuwe (YHWH) a qai yaco me noqu isasabai. 20 Qai vakacegui au mai na noqu leqaleqa; e vueti au baleta ni taleitaki au. 21 O Yahuwe (YHWH) a vakaicovitaki au me veiraurau kei na noqu yalododonu, me veiraurau kei na savasava ni ligaqu, e a veisausaumitaka vei au. 22 Baleta niu bula muria tiko na sala i Yahuwe (YHWH), kau sega ni vakavunene saqata na noqu Kalou (Mighty One). 23 Baleta na nona veivakatulewataki era sa tu e mataqu; ia na nona ilesilesi au sega ni biuta vakatikitiki mai vei au. 24 Au a tawacala e matana, kau maroroi au vakataki au mai na ivalavala ca; 25 Qori a qai sauma kina vei au o Yahuwe (YHWH), me veiraurau kei na noqu yalododonu, vata kei na savasava ni ligaqu e matana. 26 Vua e dauloloma o iko o na laurai vua ni o dauloloma; vua e daudodonu, o iko o na laurai vua ni o daudodonu; 27 Vua e dau yalosavasava, o iko o na laurai vua ni o dau yalosavasava; ia vua e dau yalotakelo, o iko o na laurai vua ni o dau lawaki ca. 28 O ira era dau vakararawataki, o iko o na vueti ira, ia ni sa mau toka na matamu vei ira era dau qaciqacia, o iko o na vakayalomalumalumutaki koya. 29 Baleta o kemuni oni noqu icina i Yahuwe (YHWH), o Yahuwe (YHWH) e dau vakararamataka na noqu butobuto. 30 Baleti kemuni au rawa ni cici saqati ira kina e dua na ilawalawa dau butako; e na veivuke ni noqu Kalou (Mighty One) au a ladeva rawa kina na bailalaga. 31 Ia o Yahuwe (YHWH), na nona ivalavala e daumaka vakaoti, na vosa i Yahuwe sa vakatovolei oti, e dau taqomaki ira kece era dau vakanuinui vua. 32 Baleta e sega tale ni dua na Kalou (Mighty One), vakavo ga o Yahuwe (YHWH). E sega tale ni dua e vakaitamera, vakavo ga na noda Kalou (Mighty One). 33 Na Kalou (Mighty One) o koya e vauci tu e na kaukaua, e cakava me daumaka vakaoti na noqu ivalavala. 34 E cakava na yavaqu me tautauvata kei na yava ni mekila, qai vakaturi au e na noqu tikina cecere. 35 E vakatavulica na ligaqu e na ivalu, ka vakaukauataka na gauniligaqu me vaka e dua na dakaititi barasa. 36 Oni sa solia talega vei au na isasabai ni nomuni veivueti, kei na ligamuni imatau sa vukei i au; na nomuni yaloyalovinaka sa cakava meu vakaitamera. 37 Oni sa vakabalavutaka na noqu ikalawa e rukuqu, me kakua kina ni jidara na yavaqu.

Samuela (Sh’mu’yl Bet) 22:17-37

NA IVAQA NI BULA (FOOD FOR THE SOUL)

Kakua ni vosa e daligana na lialia; baleta o koya e na cata na vuku e kune e na nomu vosa.10 Kakua ni tosoya na iyalayala makawa ni vanua; se lai suguta na kedra vanua na luveniyali; 11 Baleta na nodra ivakabula e kaukaua; o koya e na tokona na nodra veileti me saqati iko.

Vosa Vakaibalebale (Mishlei) 23:9-11

LOMANI YAHUWE NA NOMU KALOU (LOVE YHWH YOUR MIGHTY ONE

E na vukuna na iliuliu. Laga e na ilagalaga ni “Kakua ni veivakarusai.” Maivei Dawide, Na nona vakabauta vuni (Miktam) e na gauna a dro kina mai vei Sha’ula i loma ni qaravatu. 2(1) Ni lomani au kemuni na Kalou (Mighty One), ni yalololoma mai vei au: baleta na noqu bula (soul) e vakanuinui tu vei kemuni: io, e ruku ni yaloyalo ni tabamuni au na viria na noqu ivunivuni me yacova ni sa sivi na veileqaleqa oqo. 3(2) Au na tagi vei Yahuwe (YHWH) o koya e cecere sara, vua na Kalou (Mighty One) na noqu ivakabula. 4(3) Baleta o koya e talatala mai lomalagi me vueti au; o koya e vakamaduataki ira na kequ meca. O Yahuwe (YHWH) e na vakauta mai na nona yalololoma kei na nona dina. 5(4) E vueta na noqu bula mai vei ira na vakadomobula, niu moce lutu no e na nuiqawaqawa, ka vaka kina mai vei ira na luve ni tamata, e vaka tu na moto kei na gasau ni dakaititi na batidra, ia na yamedra e vaka na seleiwau gagata. 6(5) O kemuni moni vakacerecerei cake sara, kemuni na Kalou (Mighty One) me sivia na lomalagi; laiva na nomuni dokai me cecere cake mai vuravura. 7(6) Era viria e dua na lawalawa me coko kina na yavaqu; ka kelia e dua na qara me lutu kina na noqu bula (soul), ia era na lutu ga kina o ira vakataki ira.

8(7) ¶ Na vuniyaloqu sa vakarau, kemuni na Kalou (Mighty One), na vuniyaloqu sa vakarau; Au na lagasere ka solia na vakavinavinaka e na vuku ni noqu dokai. 9(8) Yadra tiko, noqu hapi, yadra tiko noqu soliteri kei na hapi; o au vakataki au, au na yadra vakatotolo. 10(9) Au na vakamolimolitaki kemuni i Yahuwe (YHWH) e na kedra maliwa na tamata; Au na seretaka na yacamuni e kedra maliwa na veimatanitu; 11(10) Baleta na nomuni yalololoma e vakacerei tu i lomalagi (sky) kei na nomuni yalodina i lomalagi (heavens). 12(11) Moni vakacerecerei, kemuni na Kalou (Mighty One) me sivia na lomalagi, laiva na nomuni dokai me cecere tiko ga e vuravura.

Same (Tehellim) 57:1(0)-12(11)

 

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 256 o/o 1717	September 13, 2012
Reading	Hebrew Date
Tehellim (Same) 79-81	Elul 26, 5772 (6th month)
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Veivalataki O Dawide (Fight Over Dawid).

Thought: YHWH Had Dawid Annointed, But It Took Long For This To Sink In

 ......................

Serving For Yom R’vi’i, Elul 25, 5772

MAI NA NEVI’IMI RISHONIMI (FROM THE NEVI’IM RESHONIM)

Ia o Barazilai mai ‘Qili'ade a lako sobu mai Roqelimi me mai tomana na tui ni takosova na Yaradani. 33(32) Ia o Barazilai e tamata yabaki bibi sara, ka ni sa yabaki walusagavulu; ia o koya ga a dau vakania na tui e na gauna a tiko voli kina mai Makanayimi; baleta o koya e dua na tamata vutuniyau.34(33) Kaya na tui vei Barazilai, Lako mai vata kei au, au qai lai qaravi iko ni daru lai tiko mai Yerushalayimi. 35(34) Kaya o Barazilai vua na tui, Sa na vo tale beka e vica na yabaki ni noqu bula, e dodonu kina vei au meu lako vata kei na tui i Yerushalayimi? 36(35) Au sa yabaki walusagavulu e na siga oqo; au sa sega ni vakaduiduitaka rawa na bula maleka kei na bula rawarawa; Na nomuni dauniveiqaravi sa sega ni kila na ikanakana ni ka e kania se igunugunu ni ka e gunuva. Sa  sega mada ga ni rogoca na domodra na tagane ni ra lagasere se na domo ni yalewa ni ra lagasere. Na cava na vuna meu lako kina meu lai icolacola wale tu ga vua na noqu turaga na tui? 37(36) Na nomuni dauniveiqaravi e vinakata ga me takosova na Yaradani vata kei na tui;  laiva na tui me kakua sara ni sausaumi lesu vei au e na dua na icovi vaka oqori. 38(37) Laiva na nomuni dauniveiqaravi me lesu tale eke, meu rawa ni qai lai mate ga e na noqu vanua meu qai bulu e na yasa ni ibulubulu nei tamaqu kei tinaqu. Raica na nomuni dauniveiqaravi o Kimihami, qo na luvequ tagane; laivi koya me lako vata kei na noqu turaga na tui, moni qai cakava vua na ka ga oni nanuma ni vinaka e matamuni. 39(38) Kaya na tui; O Kimihami, sa na lako vata kei au, au na qai lai cakava vua na ka e rairai vinaka vei iko; na ka o kerea vei au, au na cakava e na vukumu. 40(39) E na gauna era sa takosova kece kina na Yaradani o ira na tamata, ka sa takoso tale ga na tui; na tui a qai reguci Barazilai qai vakalougatataki koya; sa qai lesu o koya i na nona itikotiko o koya vakataki koya. 41(40) Oti qai lako na tui i Qiliqali, ka lako vata kei koya o Kimihami; ka ra lako vata kei na tui o ira kece na tamata  kawa Ya'huda kei na veimama vei ira era kawa vaka Yisira'yili; 42(41) Ia raica, era a qai lako vua na tui, o ira na tagane ni Yisira'yili, era qai kaya vua na tui, Na cava beka era a butakoci  kemuni kina o ira na weka i keimami era kawa Ya'huda, era qai kauti kemuni kina mai na Yaradani vata kei ira kece na lewe ni nomuni matavuvale vata kei ira na tamata kece era kawa Ya'huda? 43(42) Era sauma qori o ira na tagane ni Ya'huda vei ira na Yisira'yili, Baleta na tui e weka i keimami voleka; na cava e ca kina vei keimuni na ka qo? Keimami sa bau kania beka e dua na ka e sauma na tui? A solia beka vei keimami o koya e dua na iloloma soliwale? 44(43) Era sauma lesu o ira na tagane ni  Yisira'yili vei ira na tagane ni Ya'huda, ni ra kaya, E tini na neimami ivotavota vua na tui ka levu cake na neimami dodonu e lailai na nomuni dodonu vei Dawide; na cava oni a liu kina vei keimami? A dodonu ga me keimami a liu e na nona lai kau mai na tui. Sa qai kaukaua cake na nodra vosa na Ya'huda, mai na nodra vosa na Yisira'yili.

Samuela (Sh’mu’yl Bet) 19:32(31)-44(43)

NA IVAQA NI BULA (FOOD FOR THE SOUL)

Kakua ni kania na kena kakana e dua e dau veivakaisini, se garova na kena kakana; 7 Baleta o koya e sa cakacakata oti tu e yalona na veika kece; o koya e na kaya vei iko, Kana ka gunu, ia na vuniyalona e sega ni tiko vata kei iko. 8 Na tiki ni kakana o kania o na luaraka tale, o na qai vakayalia na nomu vosa kamica.

Vosa Vakaibalebale (Mishlei) 23:6-8

LOMANI YAHUWE NA NOMU KALOU (LOVE YHWH YOUR MIGHTY ONE

E na vukuna na iliuliu. Laga e na ilagalaga ni “The Silent Dove In The Distance.” Maivei Dawide, Na nona vakabauta vuni (Miktam) e na gauna era a vesuki koya kina na Pi'lishitimi mai Qata. 2(1) Ni bau lomani au kemuni na Kalou (Mighty One); baleta o ira na tamata era sa butuki au sobu e ruku ni yavadra, e na loma ni siga; na veivaluvaluti e vakalolomataki au. 3(2) O ira na kequ meca era butuki au sobu tiko e yavadra e na veiveisiga; sa le levu na dauniveivala era mata cake mai me ra saqati au. 4(3) Au sega ni domobula e na loma ni siga baleta niu vakararavi tiko vei kemuni; 5(4) E na vuku i Yahuwe (YHWH) au na dokai; vei Yahuwe (YHWH) au sa vakataqara na noqu inuinui, au na sega ni nuiqawaqawataka na ka e rawa ni cakava vei au na tamata. 6(5) E na loma ni siga taucoko era veibuku me ra saqati au ka bukiveretaki au.  7(6) Era na waraki au vakavuni, era qai dikeva na noqu ilakolako, baleta ni ra gadreva tiko meu mate. 8(7) E sega ni dua na nona ivakabula, era kaya. Vakarusai ira e na veivakarusai ni veimatanitu.

9(8) ¶ Kemuni na Kalou (Mighty One) au sa vakatusa na noqu vakabauti kemuni; vola na itukutuku ni wai ni mataqu e na nomuni ivola. 10(9) Era na saumaki lesu na kequ meca; au na qai kila ni tiko na noqu Kalou (Mighty One). 11(10) Vua na Kalou (Mighty One) au na vakamuduo e na vukuni nona vosa; Vei Yahuwe (YHWH) au vakavinavinaka e na vukuni nona vosa. 12(11) Vei Yahuwe (YHWH) au sa biuta na noqu inuinui; au na sega ni taqayataka na ka e rawa ni cakava vei au na tamata.13(12) Vei kemuni au na vakayacora na noqu itavi, i Yahuwe (YHWH); Au na cabori ira vei kemuni e na vakamuduo. 14(13) Baleta oni sa vueta na noqu bula (soul) mai na mate, kei na yavaqu me kakua ni tarabe, meu rawa ni qai taleitaki e matamuni, kemuni na Kalou (Mighty One) e na nodra vanua na bula.

Same (Tehellim) 56:1(0)-14(13)

 

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 255 o/o 1716	September 12, 2012
Reading	Hebrew Date
Tehellim (Same) 78	Elul 25, 5772 (6th month)
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Lesu I Yerushalayimi O Dawide (Dawid Returns To Yerushalayim)

Thought: Dawid Showed Tolerance To His Obvious Enemies

Serving For Yom Shlishi, Elul 24, 5772

MAI NA NEVI’IMI RISHONIMI (FROM THE NEVI’IM RESHONIM)

O Shimi'i na luvetagane (son) i Qera, na Biniyamini, mai Bakurimi, a qai lako sobu vakatotolo o koya me lai lako vata kei ira na tagane ni Ya'huda, era lako tiko me ra lai tavaki Tui Dawide. 18(17) E udolu na tagane ni Biniyamini era a lako mai kei koya, vata kei Ziva na dauniveiqaravi i Sha'ula kei ira na luvena tagane le tinikalima kei ira kece na nona dauniveiqaravi le ruasagavulu era tiko vata kei koya. O ira era a qai kosova vakatotolo na Yaradani vua na tui. 19(18) Era qai vakaleletaki ira na lewe ni matavuvale ni tui, e na boto ni vakalele vakavica vata, ka ra colacola na nodratou iyaya me vaka e vinakata o koya. O Shimi'i na luvetagane i Qera e a lutu sobu, me cuva e matana na tui, e na gauna ga e takosova oti kina na Yaradani o koya. 20(19) Kaya o koya vua na tui, Laiva na tui me kakua ni beitaka vei au e dua na ivalavala ca se nanuma na caka ca a vakayacora e na lecaika na nomuni dauniveiqaravi, e na siga oni a biubiu kina mai Yerushalayimi na noqu turaga na tui; laiva na noqu turaga na tui me kakua ni katona na veika oqori e vuniyalona; 21(20) Baleta na nomuni dauniveiqaravi  sa kila vinaka tu niu a valavala ca; o koya oya, raica, au lako mai kina e na siga oqo, meu imatai vei ira kece na lewe ni mataqali i Yosefa, meu lako sobu mai meu mai tavaka na noqu turaga na tui. 22(21) Ia qai kaya cake mai o Avishai na luve i Ze'ruyaa, ni kaya, E sega beka ni dodonu me vakamatei o Shimi'i e na vuku ni ka oqo, baleta ni a rukaka na lumuti i Yahuwe (YHWH)? 23(22) Kaya o Dawide, Na cava beka o au vei kemudrau na luvetagane i Ze'ruyaa, mo drau mai itatacaqe tiko kina vei au e na siga edai?  E gadrevi beka me vakamatei e dua na tamata e Yisira'yili edaidai? E sega beka ni sa matata tu qo vei au, ni o au, au tui kei Yisira'yili?  24(23) Oti qai kaya na tui vei Shimi'i, O iko o na sega ni mate. Na tui a bubuluitaka vua. 25(24) O Me'fivosheta na maku tagane i  Sha'ula, (na luvetagane i Yo'honatani) a sobu tale ga mai me mai tavaka na tui, ia o koya a sega ni kotiva na kumina se veisautaka na nona isulu, mai na siga sara a biubiu kina na tui, me yacova na siga sa lesu tale mai kina na tui e na vakacegu. 26(25) Ia ni lako yani i Yerushalayimi  o koya, me lai sotava na tui, a qai taro na tui, I  Me'fivosheta, na cava na vuna o sega ni lako kina vata kei au? 27(26) Sauma o Me'fivosheta, Noqu turaga, kemuni na tui, na noqu dauniveiqaravi a vakacalai au; baleta au a kaya vua me vakaidabedabetaka na noqu asa meu rawa ni vodoka, meu lako vata kei na noqu turaga na tui; baleta na nomuni dauniveiqaravi e lokiloki. 28(27) Na noqu dauniveiqaravi e lai lasu me baleti au, kemuni na noqu turaga na tui, ia o kemuni oni tautauvata kei na dua na mala'aka ni Kalou (Mighty One); cakava ga na ka e rairai donu e matamuni. 29(28) O ira kece na lewe ni matavuvale i tamaqu e dodonu me ra vakamatei e na matamuni noqu turaga na tui, ia oni a qai wilika na nomuni dauniveqaravi vata kei ira era dau kana e na nomuni teveli. Ia qo na dodonu cava tale e se vo vei au? E na rawa vakacava meu mai tagitagi e matamuni na noqu turaga na tui? 30(29) Kaya vua na tui; Sa rauta vinaka na veika o vakamacalataka tiko, ia o au, au sa vakarota oti mo drau wase na kemu vanua vata kei Ziva. 31(30) Kaya o Me'fivosheta vua na tui, Io laiva me taura kece vakadua o koya, baleta o au sa vo levu vei au ni sa lesu tale mai na tui i na loma ni nona vale e na vakacegu.

Samuela (Sh’mu’yl Bet) 19:18(17)-31(30)

http://www.biblegateway.com/passage/?search=2%20Samuel%2019:18-16&version=CJB;

NA IVAQA NI BULA (FOOD FOR THE SOUL)

Kakua ni vakaceguocataki iko (vakatabakidua) mo vutuniyau; kakua ni vakararavi i na nomu vuku. 5 Baleta kevaka o wanonova tiko, o na sega ni raica rawa tale; baleta na iyau e dau bulia vakataki koya na tabana, me vaka na ikeli, e na vuka sara vakayawa i lomalagi.

	Vosa Vakaibalebale (Mishlei) 23:4-5
http://www.biblegateway.com/passage/?search=Proverbs%2023:4-5&version=CJB

LOMANI YAHUWE NA NOMU KALOU (LOVE YHWH YOUR MIGHTY ONE)

E na vukuna na iliuliu. Vata kei na ivakatagi wa. E dua na vucu ni vuli (Maskil) nei Dawide. 2(1) Vakatudaliga i na noqu masu kemuni na Kalou (Mighty One); kakua ni vakanadakuya na noqu kerekere. 3(2) Rogoci au, sauma mai vei au, lesuva na noqu tagi, ka galeleti au; 4(3) Baleti ira na kequ meca, baleta na nodra veivakararawataki o ira na dau cakaca: era sa bukiveretaka me ra saqati au me ra qai vakalialiai au. 5(4) Na vuniyaloqu sa rarawa vakalevu sara e lomaqu; na domobulataki ni mate sa lutuki au. 6(5) Na nuiqawaqawa kei na sautaninini sa kovuti au mai, na iyaloyalo ni mate sa lutuki au mai. 7(6) Au kaya, Oilei me a tu na tabaqu me vaka na ruve. Ke vakaoqori, au na vuka laivi yani meu lai vakacegu. 8(7) Raica, ke vakaoqori, au na vuka sara vakayawa meu lai vakaitikotiko e na loma ni veikauloa. 9(8) Au na qai waraki koya e na mai vueti au mai na cagi laba kei na cava.

10(9) ¶ Veivakarusai i Yahuwe (YHWH), cakava na yamedra me sega na betena; baleta au sa raica na itovo kaukaua kei na tiko yavavala e na loma ni korolevu. 11(10) E na siga kei na bogi era veitosoyaki, wavokita na bailalaga, na tawadodonu kei na vakacaca sa kune e loma; 12(11) Na veidabui sa kune e loma; na lawaki ca kei na veivakaisini sa sega ni  kau laivi rawa mai na kena vei saqata. 13(12) Kevaka me a vakacacani au na kequ meca; keu a rawa ni vorata; ke a dua e cati au, e vakaraitaki koya cake mai ni saqati au tiko, keu a rawa ni vunitaki au mai vua; 14(13) Ia qo, o iko ga, e dua na tamata keirau tautauvata, e dua e wekaqu ka noqu itokani.15(14) Keirau a kanavata e na loma ni vale ni Kalou (Mighty One) ka keirau dau taubale vata e na yalo veimanati. 16(15) Kauta mai na mate vei ira; buluti ira bulabula e na ibulubulu, baleta e tiko e na kedra maliwa na ivalavala kaukaua.

17(16) ¶ Ia o au, au na kaci vua na Kalou (Mighty One); O Yahuwe (YHWH) e na vueti au.18(17) E na yakavi, mataka kei na sigalevu au na masu ka tagi e na domolevu; o koya e na rogoca na domoqu. 19(18) Vueta na noqu bula (soul) mai vei ira era sa dau vuku vakasivia vei au, kei ira era dau saqati au tiko vakawasoma. 20(19) Na Kalou (Mighty One) o kaya na tawamudu, e na rogo mai e na qai veivakamalumalumutaki. Ia o ira e sega ni kune vei ira na veisau, e kena ibalebale ni sega vei ira me ra rerevaki Yahuwe (YHWH). 21(20) Era sa dodoka na ligadra me ra saqati ira na wekadra vakaitikotiko, ka voroka na nona veiyalayalati. 22(21) Era a taqaya baleta na cudru e kune e matana, kei na leva waromisa e vuniyalona; na nona vosa e dravia cake mai na bata, ia e momoto me vaka na bati ni dua na moto. 23(22) Biuta na nomu veileqa vei Yahuwe (YHWH), o koya e na tabei iko; e na sega vakadua ni laivi ira na yalododonu me ra yavalati e na domobula. 24(23) Ia o kemuni Yahuwe (YHWH) oni na dreti ira sobu i loma ni qara ni rusa; o ira na tamata era dau vakadavedra ka dau veivakacalai, era na sega ni bula tiko me ra vakaotia na nodra gauna; ia o au, au na vakararavi ga vei kemuni.

	Same (Tehellim) 55:1(0)-24(23)
http://www.biblegateway.com/passage/?search=Psalms%2055:1-25&version=CJB;

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 254 o/o 1715	September 11, 2012
Reading	Hebrew Date
Tehellim (Same) 76-77	Elul 24, 5772 (6th month)
Click The Bible Text To Read It In Gateway In Another Language Or Version

http://www.biblegateway.com/passage/?search=Psalms%2076-77&version=CJB

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.