Kama Yavu Ka Rusa O Yerushalayimi (Yerushalayim Burnt Down And In Ruin).

Thought: YHWH’s Pronouncement Through His Prophets Never Fail!

 ........................

Serving For Yom Chamishi, [Seventh Month] Tishri 1, 5774

[Rosh Chodesh: First Day of the Year 5774]

 MAI NA NEVI’IMI AKARONIMI (FROM THE NEVI’IM ACHRONIM)

Ia e na ikalima ni vula, e na ikatini ni siga ni vula, oya talega na ikatinikaciwa ni yabaki ni veiliutaki vakatui i Ne'vukadreza, na tui Bavela, o Ne'vuza'adani na nodra iliuliu na matayadra, ka icaba voleka ni tui Bavela, e a qai curu yani i Yerushalayimi,13 E a vakama yavu na vale i Yahuwe (YHWH), na nona vale na tui Ye'huda, kei na veivale kece mai Yerushalayimi,  na nodra veivale na tamata rogo kece e a vakama vakadua i na dela ni qele o koya.14 O ira kece na lewe ni mataivalu ni  Kasidimi, era a tiko vata kei na nodra komada na matayadra, era a basuraka sobu na lalaga e na veiyasa kece i Yerushalayimi. 15 O Ne'vuza'adani na nodra komada na matayadra, a qai kauti ira vakabobula eso vei ira na tamata dravudravua, oya mai vei ira na vo ni tamata era se tiko e loma ni korolevu, o ira na liumuri era a tavuki vua na tui Bavela kei na vo ni tamata tawavanua. 16 Ia o Ne'vuza'adani na nodra komada  na matayadra, a qai biuti ira tu mai eso vei ira na dravudravua e loma ni vanua, me ra dau ni sasamaki e na loga ni veivaini ka me ra dau teitei talega. 17 O ira na Kasidimi era voroka na duru barasa ni vale i Yahuwe (YHWH), ka vaka kina na qiqi, kei na wasawasa  boroze (bronze) era a dau tu e loma ni vale i Yahuwe (YHWH), era qai kauta na boroze vakadua i  Bavela. 18 Era a yauta laivi talega na kuro, na na isivi, na ikoti ni matanicina, na itakitaki ni wai, na itaki eso kei na iyaya barasa kece e dau vakayagataki e na veiqaravi. 19 Na komada ni matayadra a kauta na bilo, na itutu ni vakama sede,  na beseni, na sedre ni dravusa, na kuro, na menoraa, na itaki, na veika kece era buli mai na koula kei na siliva. 20 Na boroze (bronze) e na duru ruarua,  na wasawasa iloiloi e dua kei na tinikarua na bulumakau tagane boroze era dau toka e ruku ni wasawasa iloilo,  e a bulia o tui Sholomo  e na vuku ni vale i Yahuwe (YHWH); na bibi taucoko ni barasa mai na iyaya kece oqori e a sega ni vakarau rawa. 21 Ia na duru; na cere ni dua na duru e  tolusagavulu ka dua veimama na fiti; e taura e rusagavulukadua na ivakavakarau tauya dua na fiti, me dodo wavokita, ia na kena vavaku e va na iqaqalo ni liga, qo e vakalomana.  22 Na uluna e buli mai na barasa; na cere ni uluna e walu, tolu na ivakava na fiti na kena cere, qai vakalawalawa ceuti wavolivolita tu na lawalawa kei na vua ni pomeqaraneti wavokita na uluna, kece qori era boroze; na ikarua ni duru e tautauvata na kena pomeqaraneti. 23 E a ciwasagavulu ka ono taucoko na na vua ni pomeqaraneti e yasana [mai tuba]; ia na kena ilevu taucoko na vua ni pomeqaraneti e na daku ni lawalawa e duanadrau wavolivolita.24 Na nodra komada na matayadra a qai kauti ratou vakavesu o Sa'raya na kohena haqadola, o Za'fanaya na ikarua ni kohena vata kei iratou tolutolu na ivakatawa ni katuba; 25 Mai na korolevu e a kauta tale ga o koya e dua vakailesilesi, o koya e a dau veiqaravi tu vei ira na sotia kei na vitu na tagane era icaba voleka sara  ni tui, era a kune e loma ni korolevu, bau kina na vunivola tudei vua na komada levu ni mataivalu, e dau qarava na veilesiyaki e na mataivalu, kei na onosagavulu na tagane mai vei ira na lewenivanua era a kune e loma ni korolevu. 26 O Ne'vuza'adani na komada ni matayadra a qai tauri ira ka kauti ira vua na tui Bavela i Rivilaa. 27 E keya, e Rivilaa, e na vanua o Hamata, na tui Bavela a qai cakava me ra  vakamatei. E vakaoqori na nodra a kau vakabobula mai na nodra vanua, o ira na Ye'hudimi. 28 Na iwiliwili ni tamata era a vakau vakabobula [e na liga i] Ne'vukadreza oqo: e na ikavitu ni yabaki; e 3,023 na tamata mai Ya'huda;  29 E na ikatinikawalu ni yabaki ni nona veiliutaki vakatui o Ne'vukadreza, e 832 na tamata mai Yerushalayimi; 30 E na ikaruasagavulukatolu ni yabaki nei Ne'vukadreza, o  Ne'vuza'adani na nodra iliuliu na matayadra e a vakauta kina e 745 na bobula mai vei ira na Ye'hudimi; na ilevu kece ni tamata e 4,600 na tamata.

31 ¶ E na ikatolusagavulu ka vitu ni nona vesu tu vakabobula o Yo'hoyakini  na tui Ye'huda, e na ikatinikarua ni vula, e na ikaruasagavulu ka lima ni siga ni vula; o Iviy'ili-Me'rodaka na tui Bavela, e a tekivu na nona veiliutaki vakatui mai Bavela; ia e na imatai ni nona yabaki a qai vakalekalekataka na itotogi kei Yo'hoyakini na tui Ye'huda, qai sereki koya mai valeniveivesu. 32 E a cakava vakavinaka vua, oti qai vakatikora na nona idabedabe vakatui me cecere cake mai na nodra  idabedabe vakatui o ira na tui era tiko vata kei koya mai Bavela,  33 O Yo'hoyakini sa qai oti na nona dara tiko na isulu vakaivesu; kena ikuri ni a vakarautaki vua na kena kakana e na gauna kece a bula tiko kina. 34 A qai soli talega vua e dua na nona ilavo e na veisiga yadua, mai vua na   tui Bavela, me dau volia kina na veika kece tale e gadreva e na gauna kece a bula voli kina e veiveisiga, me yacova na siga ni nona mate, e na vo ni siga ni nona bula.

Yiremeyahu (Jeremaia) 52:12-34

NA IVAQA NI BULA (FOOD FOR THE SOUL)

Au vinakata na nomu inuinui me toka dei toka vei Yahuwe (YHWH), qori na vuna au vakatavulica tiko kina [oqo] vei iko edaidai. 20 Au sa vola oti tu qo vei iko e levu na veika yaga e sinai vutuvutu tu e na  ivakasala kei na kilaka?  21 Me rawa kina ni o kila ni veivosa oqo era ka dina ka ra na kauta lesu mai na itukutuku dina vei koya e a talai iko.

Mishlei (Vosa Vakaibalebale) 22:20-21

LOMANI YAHUWE NA NOMU KALOU (LOVE YHWH YOUR MIGHTY ONE

E na vukuna na iliuliu. Maivei ira na kawa i Kora'aka. E na ivakatagi rogo memela (alamont). E dua na sere. 2(1) Na Kalou (Mighty One) e noda   itataqomaki ka noda kaukaua; na dauniveivuke e dau tu voleka tu e na veiveigauna ni leqaleqa. 3(2) O koya keimami na sega kina ni taqaya, kevaka mada ga e uneune na vuravura, se qiqi sobu i na boto ni wasaliwa na veiulunivanua, 4(3) Kevaka talega me seuseua vakaukaua na wai me vusovusoa, qai sautaninini  na ulunivanua e na kaukaua ni kena dobui. 5(4) E tiko e dua na uciwai, na kena soniwai e vakamarautaka na itikotiko tabu nei koya e Cecere taudua (YHWH Ylyon), 6(5) Na Kalou (Mighty One) e tiko e na loma ni korolevu. E na sega ni yavalati ni kida na mataka, na Kalou (Mighty One) e na vukea.

7(6) ¶ Na veivanua era na yavavala, na veimatanitu era sa na toso; na domona o koya e na vadugu tiko, ia na vuravura e na waicala yani. 8(7) O Yahuwe ni lewevuqa (YHWH Tzva'ot) e na tiko kei keda; na Kalou (Mighty One) i Ya'akove e noda ivunivuni. (Selaa, Selaa) 9(8) Lako mai, mai raica na cakacaka ni Kalou (Mighty One), na veicakacaka  veivakurabuitaki sa cakava oti e vuravura. 10(9) Me yacova na vakataotioti kei vuravura, o koya e na cakava na veivaluvaluti me tini, o koya e na musuka na dakaititi ka musuka na moto, ka vakama na isasabai e na bukawaqa. 11(10) Taroga [ka] vulica ni o au na Kalou (Mighty One); au cecere e dela ni veimatanitu kecekece, ka cecere e dela i vuravura. 12(11) O Yahuwe ni lewevuqa (YHWH Tzva'ot) e tiko kei keda, na nodra valecere ni sasabai, na Kalou (Mighty One) i Ya'akove. (Selaa)

Tehillim (Same) 46:1-12

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No.1 in 5774 (Total 2075)	September 5, 2013
Reading	Hebrew Date
Yechezk’yl (Ezekiel) 3-4	M #7: Tishri 1, 5774
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26.

May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Bavela: Na Bilo Koula (Bavel: The Golden Cup!)

Thought: The Golden Cup, In A Turn Of Events Was Destroyed Utterly!

..................... 

Serving For Yom HaShishi, [Sixth Month] Elul 24, 5773

 MAI NA NEVI’IMI AKARONIMI (FROM THE NEVI’IM ACHRONIM)

O Yahuwe (YHWH) e kaya oqo, Meu saqati Bavela kei ira era vakaitikotiko mai Levi-Kamai, au na vakauqeta [me liwa] e dua na cagilaba e veivakarusai. 2 Meu saqati Bavela, au na talai ira yani na kaitani (zarim), me ra lai taviraki (zeruha) koya, me ra qai biuta tu na nodra vanua me laladidi. Era na tuvaivalutaka vakavolivoliti koya e na siga ni leqaleqa. 3 Laivi ira na daunivana dakaititi me  ra loveca na nona dakaititi, laivi koya me dokadokataka na nona itataqomaki ni saresare; kakua ni vakavotaki ira na nona cauravou; vakarusai ira vakadua na nona mataivalu taucoko. 4 E na nodra vanua na Kasidimi, o ira na vuetaki era na bale, oya o ira era lausua basikati [e na seleiwau] e na kena veisaqata. 5 O Yisira'yili kei Ye'huda era sega ni biu tani mai vua na nodra Kalou (Mighty One) o Yahuwe ni lewevuqa (YHWH-Tzva'ot); ia na nodra vanua [na Kasidimi] e sinai vutuvutu e na nodra cala e na mata i  Koya na Yalosavasava Ledua i Yisira'yili. 6 Dro laivi mai Bavela, laiva na tamata yadua me vueta na nona bula [o koya vakataki koya]! Kakua ni vakarusai baleta na nona cala. Baleta na gauna sa tu oqo, me yaco kina na veisausaumi i Yahuwe (YHWH); o koya e na sausaumi lesu vua, me veirauti vinaka kei koya. 7 O Bavela e a dua na bilo koula e na liga i Yahuwe (YHWH); a qai vakavuna me mateni o vuravura raraba, o ira na veimatanitu era a gunuva na mena waini; qori na vuna era a vakayalia kina na nodra vakasama na veimatanitu. 8 O Bavela sa bale vakasauri. O koya e sa kamusu; qolouvaki koya. Kauta mai na wainimate (balm) me iwali ni nona mavoa; de dua e na rawa ni vakabulai kina. 9 Keimami a segata me vakabulai o Bavela, ia o koya e sa sega ni bula rawa. O koya me sa biu tu ga kina o koya, ia o keda yadua me da dui lesu tale i na noda dui vanua. Baleta na nona vakatulewataki sa yaco i lomalagi (skies), ka yaco sara yani na i o (clouds). 10 O Yahuwe (YHWH) sa kauta mai na noda qaqa. Lako mai meda lai tusanaki i Zaiyoni na veicakacaka i Yahuwe (YHWH) na noda Kalou (Mighty One)! 11 Vagata na gasau [ni dakaititi]!  Vakalewena na bolanigasau! O Yahuwe (YHWH) sa vakauqeta cake na yalona na nodra tui na Midi, baleta o koya e sa nakita me vakarusai Bavela. Oqori na veisausaumi i Yahuwe (YHWH), na nona veisausaumi e na vuku ni nona valetabu.

Yiremeyahu (Jeremaia) 51:1-11

NA IVAQA NI BULA (FOOD FOR THE SOUL)

Kolotaka laivi na dau veibeci, na veiba talega e na kolotaki laivi; na veileti kei na veivakacacana talega e na tinidole. 11 ¶ O  koya e dau lomani ira na  yalosavasava ka dau yalololoma na itautau ni nona vosa mai gusuna, e na yaco me nona icaba na tui. 12 ¶ Na mata i Yahuwe (YHWH) e dau taqomaka [na tamata e levu] na nona  kilaka; ia e na vukica vakaitoboicu na nona inaki e dua e dau veivakaisini;

Mishlei (Vosa Vakaibalebale) 22:10-12

LOMANI YAHUWE NA NOMU KALOU (LOVE YHWH YOUR MIGHTY ONE

E na vukuna na iliuliu. E dua na same i Dawide. 2(1) E wacava na nodra kalougata o ira  era dau lomani ira era dravudravua! Ni yaco mai na [gauna ni] leqa lelevu, o Yahuwe (YHWH) e na vueti ira. 3(2) O Yahuwe (YHWH) e na taqomaki ira, e na vakabulai ira tiko, ka cakava me ra marau tiko e loma ni vanua. Oni na sega ni soli i ira laivi i na nodra lewa na kedra meca. 4(3) O Yahuwe (YHWH) e na tabei ira tiko e na nodra loga ni tauvimate; e na gauna era koto sobu kina ni ra tauvimate, o koya e na cakava me ra bula [tale mai na kedra mate]. 5(4) Au tukuna, i Yahuwe (YHWH), lomani au! Vakabulai au, baleta au a valavala ca saqati kemuni. 6(5) Na kequ meca e kaya tiko na vosa rogorogo ca me baleti au! E na gauna cava beka e na mate kina o koya, me tababokoci vakadua na yacana? 7(6) Ni ra mai sikovi au, era mai kaya ga na vosa ni veivakalaboci; na  vuniyalodra e na gauna vata oya, e vakasoqona tiko na itukutuku lasu; oti era na qai lako yani me ra lai vakatetea na itukutuku ca. 8(7) O ira kece era sevaki au, era   vakasolokakana vata tiko me baleti au, me ra vakasamataka na veika ca kecega me baleti au. 9(8) E dua na matedewa, e rawa ni kauta mai na mate, sa kabiti koya tu qo, o koya sa na sega tale ni mata cake. 10(9) O koya mada ga na noqu icaba voleka, o koya au dau vakanuinui vua, o koya keirau dau kanakana vata, sa vuki tani me saqati au. 11(10) Ia o kemuni i Yahuwe (YHWH), ni lomani au mai, vakaduri i au tale e yavaqu, meu rawa ni sausaumi lesu vei ira. 12(11) Au na kila ni oni sa marautaki au, kevaka e sega ni mai vakadrukai au na kequ meca. 13(12) Oni tabei au cake, baleta niu tawacala, oni vakataudeitaki au tiko e matamuni me tawamudu. 14(13) Me vakavinavinakataki o Yahuwe (YHWH) na Kalou (Mighty One) i Yisira'yili, mai na gauna makawa tawamudu, i na gauna tawamudu mai muri. Omaini. Omaini.

Tehillim (Same) 41:1-14

 

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No.342 in 5773 (Total 2067)	August 30, 2013
Reading	Hebrew Date
Yirmeyahu (Jeremiah) 43-44	M #6: Elul 24, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26.
May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Tini Dole Na Bolei YHWH (Challenging YHWH Came To Nothing)

Thought: YHWH Saw To The Utter Destruction Of Bavel

 ......................

Serving For Yom Chamishi, [Sixth Month] Elul 23, 5773

 MAI NA NEVI’IMI AKARONIMI (FROM THE NEVI’IM ACHRONIM)

Oqori e kaya kina o Yahuwe ni lewevuqa (YHWH-Tzva'ot): O ira na tamata ni Yisira'yili era sa vakararawataki tu, ka vakakina o ira na tamata ni Ye'huda. O ira era a vesuki ira era se tauri ira matua tikoga; era sega ni via laivi ira me ra lako. 34 Ia na nodra ivakabula e kaukaua; o Yahuwe ni lewevuqa (YHWH-Tzva'ot) na yacana. O koya e na valataka vakavinaka na nodra ile, me rawa ni solia na vakacegu i na vanua, ia na tiko yavavala vei ira era tiko mai Bavela. 35 O Yahuwe e kaya, E dua na seleiwau sa lili toka e deladra na Kasidimi, ka  vaka kina vei ira era vakaitikotiko mai Bavela, e deladra na nodra iliuliu kei ira na nodra qaeqase (sage). 36 E dua na seleiwau sa lili toka e deladra na dau rai matanilagi lasulasu, o ira era na  yaco me ra lialia. E dua na seleiwau sa lili toka e deladra na nona bati; o ira era na vakarogocataki 37 E dua na seleiwau e lili toka e deladra na nodra ose, kei na nodra qiqinivala, kei ira kece na yasa era tu e na kedra maliwa; o ira era na yaco me ra vaka na yalewa. E dua na seleiwau e lili toka e na dela ni nodra iyau, qori era na butakoci. 38 E dua na lauqa e lili toka e dela ni nona wai, qori era na maca vakadua. Baleta qo e dua na vanua ni kalou matakau; era dau lialia vei ira na nodra ka vakadomobula oqo era [taukena]. 39 O koya oqo era na mai vakaitikotiko kina e keya na pusikila (wildcats) kei na jakele (jackals), na ositiriki tale ga era na mai vakaitikotiko kina. Sa na sega tale vakadua ni tawani vei ira na tamata. E na sega talega ni tawani mai na dua na itabatamata i na dua tale na itabatamata;  40 Me vaka na gauna a vuaviritaki rau kina o So'doma kei 'Amora kei na veikoro wavolivolita na Kalou (Mighty One), e kaya o Yahuwe (YHWH). E sega ni dua e na lai vakacokotaki tale e keya, e sega ni dua na tamata e na lai bula  tale vakadua e keya. 41 Raica! E dua na matatamata era na  lako mai na vualiku; e dua na matanitu levu, ka le levu na tui era na yavalati mai na iyalayala yawa duadua kei vuravura: 42 Era na vakaiyaragi mai e na dakaititi kei na moto; era veivakalolomataki, ka sega vei ira na loloma; na kedra rorogo e vaka na vavakurukuru ni wasawasa, ni ra sa vodoka tiko mai na nodra ose. O ira na nodra tagane [qaqa] era na mai tuvaivalutaki kemuni, kemuni na luveyalewa i Bavela. 43 Na tui Bavela sa rogoca oti na kedra itukutuku; sa lili damele sobu na ligana e na nuiqawaqawa. Na yaluma sa tarai koya, kei na vutugu, me vaka e dua na yalewa sa taratara tiko.  44 E na tautauvata kei na dua na laione sa yaqa cake tiko mai na veikau era tutubu tu e na batini Yaradani me mai saqata e dua na itikotiko kaukaua; e na dua na tikinigauna totolo, au na cemuri koya laivi, ka lesia me mai vakavulewa kina, o koya ga au digitaka.  Baleta o cei tale e vakataki au? O cei e na rawa ni mai cakava meu vakamacala [e na ka au sa cakava]? O cei na ivakatawa ni sipi e na rawa ni mai tucake e mataqu? 45 Oqo moni rogoca kina na inakinaki i   Yahuwe (YHWH), e sa navuca tu me saqati Bavela kina, kei na itinitini ni ka e na rawata o koya ni sa saqata oti na nodra vanua na Kasidimi; na qelenisipi lailai duadua era na yarataki ira laivi; na nodra bai ni sipi o ira vakataki ira era na kidroa e na vukudra. 46 E na irogo ni kena sa rawai o  Bavela na vuravura e na uneune; na nodra tagi e na lai voqa e na loma ni veimatanitu kece sara.

Yiremeyahu (Jeremaia) 50:33-46

NA IVAQA NI BULA (FOOD FOR THE SOUL)

O koya e tea na ivalavala tawadodonu e na tamusuka na leqa, ia na ititoko ni nona leva e na sega ni yaga. 9 ¶ O koya e dauloma soli vakayauyau e na kalougata; baleta ni wasea na kena [kakana] vata kei ira na dravudravua.

Mishlei (Vosa Vakaibalebale) 22:8-9

LOMANI YAHUWE NA NOMU KALOU (LOVE YHWH YOUR MIGHTY ONE

E na vukuna na iliuliu, E dua na same i Dawide. 2(1) Au waraki Yahuwe (YHWH) tiko e na yalovosota; me yacova ni vuki maivei au o koya, me rogoca na noqu tagitagi. 3(2) A vueti au cake mai na ikeli vakadomobula, ka vaka kina mai na veidabibi ni rusa, qai vakaduria na yavaqu e na dela ni uluvatu, me vakadeitaka na itutu ni yavaqu. 4(3) E biuta e dua na serevou e gusuqu o koya, e dua na sere ni vakavinavinaka vua na noda Kalou (Mighty One). E le levu era na raica yani, era qai kurabui, era qai biuta na nodra inuinui vei Yahuwe (YHWH). 5(4) E wacava na nona kalougata na tamata e vakanuinui vei Yahuwe (YHWH), qai sega [kina] ni rai vei koya e qaciqacia; se vei ira era vakanuinui i na veika lasutaki. 6(5) E vakaitamera na cakacaka oni sa vakayacora tiko vei keimami i Yahuwe (YHWH) neimami Kalou (Mighty One)!  Na nomuni mana kei na nomuni vakasama me baleti keimami; e sega ni dua e rawa ni vakatautauvatataki kina vata kei kemuni! Au na tusanaki ira kece; ia sa rui levu tale na ka me tusanaki! 7(6) ¶ Na isoro kei na imadrali oni sega ni vinakata; na isorokama kei na isoro ni valavala ca oni sega ni vakarota; 8(7) Ia oti au qai kaya, Qo o au! O au au sa lako tiko mai! E na ivola vivigi, e volai tu kina [na veika] me baleti au. 9(8) Na vakayacori ni nomuni gagadre, kemuni na Kalou (Mighty One), e ka ni noqu marau; na nomuni Toraa e toka sara ga mai na vuniyaloqu sara e loma. 10(9) Au sa tusanaka tiko na veika e dodonu e na loma ni isoqosoqo levu; au sega ni tarova na tebenigusuqu i Yahuwe (YHWH), me vaka oni kila [vinaka]. 11(10) Au a sega ni vunitaka na nomuni yalododonu e vuniyaloqu; ia au tusanaka na nomuni yalodina kei na nomuni veivakabulai; au sega ni tabonaka na nomuni loloma kei na nomuni dina mai vei ira na lewe ni  isoqosoqo levu.

12(11) ¶ I Yahuwe (YHWH) kakua ni bureitaka vei au na nomuni yalovinaka [tau malumu]. Laiva na nomuni yalovinaka kei na nomuni dina me maroroi i au tikotikoga. 13(12) Baleta na ca era vakavolivoliti au tu, e sega ni wili rawa; na noqu ivalavala ca e kovuti i au, au sa sega mada ga ni rai rawa; era levu cake mai na wiliwili ni drauniuluqu e uluqu, qori sa vakavuna meu yalo lailai. 14(13) Ni yalovinaka, i Yahuwe (YHWH), ni mai vueti au! I Yahuwe (YHWH) vakatotolo mada, moni vukei au. 15(14) Me yaco mada ga, vei ira era via taviraki i au tani, me ra rogo ca ka vakalolovirataki. 16(15) Me yaco mada ga vei ira era dau vakalialiai i au ni ra kaya Aha! Aha, na kidroa ni ra sa vakamaduataki. 17(16) Ia, me yaco mada ga vei ira kece era vaqarai kemuni tiko, na mamarau, me ra kunea na reki vei kemuni. Me yaco mada ga vei ira era taleitaka na nomuni veivueti me ra dau kaya e veigauna kece,  O Yahuwe (YHWH) e vakaitamera ka lagilagi! 18(17) Ia o au, au dravudravua ka levu na noqu gagadre; me nanumi au mada ga o Yahuwe (YHWH)! O kemuni na noqu dauniveivukei ka noqu dauniveivueti; noqu Kalou (Mighty One) kakua ni  vakaberabera.

Tehillim (Same) 40:1-18

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No.341 in 5773 (Total 2066)	August 29, 2013
Reading	Hebrew Date
Yirmeyahu (Jeremiah) 41-42	M #6: Elul 23, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26.

May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Kakua Ni Qaciqacia Vei Yahuwe (Don’t Be Arrogant To YHWH).

Thought: Thinking Evil Of Yisra’yl And Y’hudah Is A Form Of Arrogance.

....................... 

Serving For Yom Chamishi, [Sixth Month] Elul 16, 5773

 MAI NA NEVI’IMI AKARONIMI (FROM THE NEVI’IM ACHRONIM)

O iko o bula tiko e Mo'ave, biubiu mai na veikorolelevu, lai vakaitikotiko e na delana veivatu [tonidromuca]; ni vakamurimuri i ira na ruve era dau viria na nodra sova e na veiqaraqara e na gusu ni qaravatu. 29 Keimami sa rogoca oti na qaciqacia nei Mo'ave: o koya e sa bau qaciqacia vakaoti! E viavialevu, e dokadoka ka dau viaviakila; na vuniyalona e [dau]  qaciqacia ga! 30 Au kila na  kena lailai wale na ile e iusutu tiko mai ni nona qaciqacia, e kaya o Yahuwe (YHWH). Na nona dokadoka e sega ni dua na ka e tokona tiko mai dakuna, ka sebera vakadua ni bau rawata e dua na ka. 31 O koya oqori au qolou tiko kina e na vuku i Mo'ave; e na vuku i Mo'ave taucoko au na tagi; e na vukudra na tamata mai Kiri-Heresi au tagilagalaga. 32 Au na tagicaki iko, o iko na loga ni vaini mai Shivimaa, vakalevu cake mai na noqu tagi e na vuku i Ya'ze. Na veitabamu era lele yani vaka e dela ni  wasawasa; me yacova sara na wasawasa kei Ya'ze. E na nomu vuata ni vula ikatakata kei na nomu [vuanivaini], na dauvakacaca sa lutuka. 33 Na reki kei na mamarau sa kau laivi  mai na were vuavuaivinaka vata kei na qele vaka Mo'ave; Au sa tarova na drodro ni waini mai na kena saqa, kei na nodra kaikaila era butuqaqia tiko na vuanivaini, na kaikaila oya sa vagalui. 34 E na tagitagi mai Heshaboni, me yaco i Yili'ale e lai rogo sara mai na vanua yawa [me vakataki] Yakataza; na kena mai Zo'a [vakadua] i Horonayimi era lai rogo sara i na korolevu o 'Eqalati-Shilishiyaa; baleta na wai mada ga o Nimirimi sa yaco me dua na vanua mamaca tawayaga. 35 Kena ikuri, e kaya o Yahuwe (YHWH),  mai Mo'ave, au na tarovi koya e vakacabo isoro tiko e na veivanua cecere, se vakacabo imadrali boi kamica tiko vei ira na nona veikalou (elohim). 36 O koya oqo, na vuna e vutugu tiko kina na vuniyaloqu e na vuku i  Mo'ave me vaka [na rorogo] ni ivakatagi bitu ni veibulu, na vuna e luluvu tiko kina na vuniyaloqu e na vukudra na tagane ni Ki-Heresi me vaka na ivakatagi bitu ni veibulu; baleta na iyau era a rawata era sa yali. 37 Na uludra kece era sa tasi laivi vakadua [me ra sa cou], na kumidra kece era sa koti vakalekaleka, na liga taucoko era sa tavatava, ka daramaki na isulu taga e tolodra. 38 E na veidelavuvu e Mo'ave ka vaka kina e na lomanibai kecekece; era sa voqa tu kina na lele [ni vakaloloku]!  Baleta au sa vorolaki Mo'ave me vaka e dua na kuro e sega ni dua e vinakata,  e kaya o Yahuwe (YHWH). 39 Qolou, sa vakaevei sara beka na vorolaki i Mo'ave? E vakamadua ni sa toso vakasuka tiko! Qori e na yaco kina vei Mo'ave me dau dredrevaki ka vakaleqai mai vei ira kece era tiko vakavolivoliti koya. 40 Baleta oqo na ka e kaya o Yahuwe (YHWH); Raica! E na vuka sobu mai vakaukaua me vaka na ikeli-valatia, na tabana me vakatetaba tu e delai Mo'ave, 41 Na veikoro lelevu era sa vesu, na  bainivalu kaukaua era sa na rawai. E na siga oya, na vuniyalodra na tagane qaqa ni Mo'ave e na vaka na vuniyalodra na yalewa era taratara tiko. 42 O Mo'ave e na vakarusai vaka kawatamata baleta ni a bolebole  saqati Yahuwe (YHWH). 43 Na domobula, na qara kei na tudai, sa yacovi kemuni, i Mo'ave, e kaya o Yahuwe (YHWH). 44 O koya e drovaka mai na domobula e na lutu i loma ni qara; ia o koya e kaba laivi mai na loma ni qara, e na tacori e na tudai. Baleta au na kauta mai vua na veika kece oqo, [oya] vei Mo'ave, na yabaki ni nona totogitaki, e kaya o Yahuwe (YHWH). 45 E na iyaloyalo kei Heshaboni na kaivesu e dro tiko sa na tu vakadua baleta sa ceguoca. Baleta na yame ni bukawaqa e tete mai Heshaboni, e dua na yameyame mai loma i  Sikoni, me vakama na yasa kei na dela ni uludra na dau vosavosa vaqaciqacia mai Mo'ave.  =46 Na leqa levu [e na tau vei] iko Mo'ave! O ira na tamata i Ki'moshi era sa na vakarusai! Baleta o ira na luvemuni tagane era sa kau vakavesu, kei ira na  luvemuni yalewa era kau laivi vakabobula. 47 Ia au na tinia na nona kau vakavesu o Mo'ave e na veisiga mai muri (acharit-hayamimi), e kaya o Yahuwe (YHWH). Oqori na vakataulewataki nei Mo'ave

Yiremeyahu (Jeremaia) 48:28-47

NA IVAQA NI BULA (FOOD FOR THE SOUL)

Na nodra isoro na tamata ca e dua na ka vakasisila; e na qai vakasisila vakalevu cake sara, ni kauta mai e na [yalo ni] inaki ca.

Mishlei (Vosa Vakaibalebale) 21:27

LOMANI YAHUWE NA NOMU KALOU (LOVE YHWH YOUR MIGHTY ONE

Baleta o ira era sega ni cavuta na vosa ni sautu, ia era dau navuca ga na veisala me ra vakacalai ira kina era vakaitikotiko e lomanivanua e na sautu. 21 Era kaila me ra vakasewasewani au, A tu, a tu, keimami a raici iko e na mata i keimami.  22 Oni a raici ira i Yahuwe (YHWH); kakua ni toka vagagalu. I Yahuwe, kakua ni tu vakayawa mai vei au. 23 Yadra mai, tu mai, kemuni na noqu Kalou (Mighty One), na noqu Sau (Sovereign), Sabai i au kei na noqu ile. 24 Vakatulewataki au, i Yahuwe (YHWH) noqu Kalou (Mighty One) e na yavu ni nomuni yalododonu. Kakua ni laiva me cegu na yalodra e na vukuqu. 25 Kakua ni laivi ira me ra kaya e vuniyalodra, Qori! Eda sa rawata na veika eda a vinakata! Se me ra kaya, Eda sa tilomi ira rawa! 26 Me yaco mada ga vei ira e vakacegui na yalodra e na vuku ni noqu leqa, me ra vakarogocataki ka vakamaduataki.

Me yaco mada ga vei ira era vakalevulevui ira vakataki ira  e na vukuqu, me ra kovuti e na madua kei na veilecayaki. 27 Ia me yaco mada ga vei ira era marautaka na noqu yalododonu, me ra kaikaila e na reki kei na mamarau. Laivi ira me ra dau kaya e veiveigauna, E wacava na vakaitamera i Yahuwe (YHWH) o koya e dau marautaka ni ra tiko sautu na nona dauniveiqaravi! Na yamequ e na tusanaka na nomuni yalododonu ka vakacaucautaki kemuni e na loma ni siga taucoko.

Tehillim (Same) 35:20-27

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No.334 in 5773 (Total 2061)	August 22, 2013
Reading	Hebrew Date
Yirmeyahu (Jeremiah) 27-28	M #6: Elul 16, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26.

May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Leqa Vakadua o Mo’ave. (Mo’av Destroyed Completely)

Thought: The Harm Done To Yisra’yl Will Be Repaid In Full!

...................... 

Serving For Yom R’vi’ii, [Sixth Month] Elul 15, 5773

 MAI NA NEVI’IMI AKARONIMI (FROM THE NEVI’IM ACHRONIM)

Lomani koya, o kemuni kece oni toka volekati koya, o kemuni kece oni kila na yacana; kaya, E rawa vakacava ni ramusu na ititoko (scepter) kaukaua, na ititoko totoka oya. 18 Sobu mai na nomuni lagilagi, moni mai dabe karamaca toka, kemuni na itaukei luveyalewa i Daivoni; baleta o ira era mai vakacacani Mo'ave, era sa toso tiko yani vei iko; o koya e sa vakarusa oti na nomu bainivalu kaukaua. 19 Tu vakatikitiki e yasa ni gaunisala, mo raica, kemuni na ivakatawa kei 'Aro'eri; taroga na tagane e gutuwa tiko, kei na yalewa e dro tiko, Na cava sa yaco tiko? 20 O Mo'ave sa vakamaduataki; e dina, ka sa basuraki sobu; qoqolou. Tagi e na domolevu! Qolou! Tusanaka oqori mai Aranoni, ni o Mo'ave sa biu laladidi.  21 Na vakatulewa sa yaco yani i na bucabuca, mai Holona, mai Yakaza kei Mefa'ati, 22 Mai Daivoni kei Ni'vo kei Beiti-Dibilatayimi, 23 Mai Kiriyatayimi, Beiti-Qamule kei Beiti-Mo'ne, 24 Mai Ki'rioti, Bozaraa, kei na veikoro kece ni vanua vaka Mo'ave, yawa se voleka. 25 Na kaukaua i Mo'ave sa musu sobu, na gauniligana sa gutu laivi, e kaya o Yahuwe (YHWH). 26 Baleta ni o Mo'ave a vakalevulevui koya me saqati Yahuwe (YHWH); cakavi koya me mateni sivia me qai qiluci koya e na nona lua o koya vakataki koya, me qai yaco me dua e vakadredrevaki. 27 A sega beka ni a dau vakadredrevaki tu vei kemuni o Yisira'yili? O koya a sega ni ilala vata kei ira na daubutako; ia e sega ga, e na veigauna kece ga oni dau talanoataki koya kina, oni dau kurea na ulumuni.

Yiremeyahu (Jeremaia) 48:17-27

NA IVAQA NI BULA (FOOD FOR THE SOUL)

Na nona gagadre na vucesa e na vakamatei koya; baleta na ligana e sega ni via tara na cakacaka, 26 O koya e na gagano tiko e na yalo ni kocokoco e na loma ni siga taucoko; ia na tamata yalododonu e na yalosoli  ka sega ni cegu.

Mishlei (Vosa Vakaibalebale) 21:25-26

LOMANI YAHUWE NA NOMU KALOU (LOVE YHWH YOUR MIGHTY ONE

Na dauveibeitaki lasu era toso mai; era qai vakataroga vei au na veika au se sega ni bau kila. 12 Era veisausaumitaka vei au na ca me isau ni vinaka, era vakararawataki au me vaka na tama e vakalolokutaka [tiko na nona mate]. 13 Ia o au, e na gauna era a tauvimate kina, au a dara na isulutaga; au vakamalumalumutaka na noqu bula e na lolo; au rawa ni masulaka me yaco talega vei au na veika au masulaka me baleti ira. 14 Au cakava sara ga na ka me vaka au na cakava me baleta na noqu icaba se na taciqu; au  cuva sobu vakalolovira e na  vutugu me vaka au lolositaka tiko na tinaqu. 15 Ia e na gauna au tacaqe kina, era qai sosoqoni vata e na mamarau; era sosoqoni vata me ra saqati au, era qai samuti au niu sega tu ni vakavakarau; era veidretaki au meu kabasu me sega ni mudu. 16 E na nodra veivakaisini kei na veivakalialiai, era vakasequruquru bati mai vei au. 17 I Yahuwe (YHWH), e na vakacava soti na kena dede na nomuni vakaraica toka ga mai kina? Vueti au mai na nodra saqati au tiko, vakabula na bula duabau e tiko qo vei au, mai vei ira na laione. 18 Au na vakavinavinaka vei kemuni e  na loma ni isoqosoqo levu; au na vakamuduo vei kemuni e na kedra maliwa na tamata e lewe vuqa. 19 Kakua ni laivi ira e sega ni dodonu me ra kequ meca, me ra veidredrevaki e na vukuqu; kei ira era sevaki au ni sega na vuna, kakua ni laivi  ira me ra beci au.

Tehillim (Same) 35:1-10

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No.333 in 5773 (Total 2060)	August 21, 2013
Reading	Hebrew Date
Yirmeyahu (Jeremiah) 25-26	M #6: Elul 15, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26.

May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Dro Tale I Ijipita (Escape Again To Egypt)

Thought: YHWH Saved Yisra’yl From Egypt, Yet They Still Want To Escape To Egypt!

Serving For Shabbat, [Sixth Month] Elul 4, 5773

 MAI NA NEVI’IMI AKARONIMI (FROM THE NEVI’IM ACHRONIM)

Oti oya, o Yisima'yili a qai kauti ira vakavesu na vo ni tamata era tiko mai Mizipaa, bau kina na luvena yalewa na tui, kei ira kece na vo ni tamata mai Mizipaa; o ira na tamata a soli ira o Ne'vuza'adani na nodra komada na matayadra, vei Qa'dalayahu na luvetagane i Akikami, me qaravi ira. O Yisima'yili na luvetagane i Ne'taniyahu, a sa kauti ira vakavesu, qai biubiu me takoso vei ira na luve i 'Amoni

11 ¶ E na gauna e rogoca kina o Yokanana na luvetagane i Kariaka vata kei ira kece na komada ni mataivalu era tiko vata kei koya, na vere a vakayacora o Yisima'yili na luvetagane i Ne'taniyahu, 12 Era qai vakasoqoni ira na tagane kece, era qai lako me ra sa lai valuti Yisima'yili na luvetagane i Ne'taniyahu. Era kunei koya e na yasa ni wai levu e tiko mai Qivi'oni. 13 E na gauna era raici Yokanana kina, na luvetagane i Kariaka vata kei ira na komada ni mataivalu era lako tiko mai vata kei koya, era qai luvuci e na mamarau.14 Era mani vuki, o ira na tamata e a kauti ira vakavesu mai Mizipaa o Yisima'yili, me ra lai to mai kei Yokanana na luve i Kariaka. 15 Ia o Yisima'yili na luvetagane i Ne'taniyahu a qai drobula mai vei Yokanana, vata kei na walu na tagane, era qai lako sara vei ira na luve i 'Amoni. 16 O Yokanana na luvetagane i Kariaka, kei ira kece na komada ni mataivalu era tiko vata kei koya, era a qai kauti ira na vo ni tamata a vueti ira mai vei Yisima'yili na luvetagane i Ne'taniyahu, oya o ira e a kauti ira mai Mizipaa o Yisima’yili, ni vakamatei Qa'dalayahu oti, na luvetagane i Akikami, bau kina o ira na tagane qaqa, na sotia, na yalewa, o ira na lalai kei ira na vakailesilesi, o ira kece e a kauti ira  lesu mai i Qivi'oni; 17 Era qai biubiu mai keya, me ra lai vakaicili e na Burenivulagi nei  Kimihami e toka e na yasa i Beiti-Lekema, ni ra nakita tiko me ra na lako sara i Ijipita,  18 Qori me ra qai dro kina mai vei ira na Kasidimi. Era a domobulataki ira baleta o Yisima'yili na luvetagane i Ne'taniyahu, e a labati Qa'dalayahu na luvetagane i Akikami, o koya e a lesi mai vua na tui Bavela me kovana tiko e na vanua.

Yiremeyahu (Jeremaia) 41:1-9

http://www.biblegateway.com/passage/?search=Jeremiah%2041:1-9&version=CJB;

NA IVAQA NI BULA (FOOD FOR THE SOUL)

Ni vakayacori na ka e donu kei na lewa vakatautauvata, [qori] e gadrevi vakalevu cake sara vei Yahuwe (YHWH), mai na isoro.

Mishlei (Vosa Vakaibalebale) 21:3

Mishlei (Vosa Vakaibalebale) 21:3

http://www.biblegateway.com/passage/?search=Proverbs%2021:3&version=CJB

LOMANI YAHUWE NA NOMU KALOU (LOVE YHWH YOUR MIGHTY ONE

MAIVEI Dawide: I Yahuwe (YHWH) au kacivi kemuni tiko yani; noqu uluvatu kakua ni vakadigagalu i na noqu tagi. Baleta kevaka oni tama mai vei au e na vakadirorogo, au sa na tautauvata ga kei ira era lutu i loma ni qara. 2 Rogoca na domo ni noqu masu,  niu tagici kemuni yani; niu dulaka cake na ligaqu vaka i na nomuni valenisoro tabu. 3 Kakua ni dretaki au laivi vata kei ira e dau ca na nodra ivalavala kei ira era dau cakacakataka na ca; o ira era dau vunautaka na sautu vei ira na wekadra vakaitikotiko; ia na inaki ca e toka sara ga e vuniyalodra. 4 Vakaicovitaki ira me veiraurau kei na nodra valavala, me veiganiti ga kei na veika e dodonu me sauti ira. 5. Baleta ni ra sega ni kila na cakacaka i Yahuwe (YHWH) se na veika sa cakava oti. O koya e na muduki ira sobu, o koya e na sega ni tara i ira cake.

6 ¶ Me vakavinavinakataki o Yahuwe (YHWH), baleta o koya sa rogoca na domo ni noqu vakatamamasu, meu kerea na nona yalololoma. 7 O Yahuwe (YHWH) e noqu kaukaua ka noqu isasabai; vua, na vuniyaloqu e vakanuinui, kau sa dau vukei, o koya e vakasinaiti kina na vuniyaloqu e na mamarau; kau na lagata na vakacaucau vua. 8 O Yahuwe (YHWH) na (vu ni) kaukaua vei ira na nona tamata, o koya na isasabai ni nodra vueti na nona lumuti.9 Vakabulai ira na nomuni tamata! Vakalougatataki ira na nomuni ivotavota! Tuberi ira ka colati ira tiko me tawa mudu!

Tehillim (Same) 28:1-9

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No.322 in 5773 (Total 2049)	August 10, 2013
Reading	Hebrew Date
Yirmeyahu (Jeremiah) 3-4	M #6: Elul 4, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26.

May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Babamatua Nei Yisira’yili (Yisra’yl’s Arrogance).

Thought: Yisra’yl Refused To Be Subjected To YHWH, Who Brought Them Up From Egypt

 ..........................

Serving For Yom R’vi’ii, [Fourth Month] Tammuz 18, 5773

 MAI NA NEVI’IMI AKARONIMI FROM THE NEVI’IM ACHARONIM)

Ia era na sauma mai, E sega ni dua na betena! Keimami sa na cakava ga na  veika keimami sa navuca oti tu; o keimami yadua, keimami na muria ga vakababamatua na neimami inakinaki  tawakilikili! 13 Qori a qai kaya kina oqo o Yahuwe (YHWH); vakataroga mada vei ira na veimatanitu se o cei sa bau rogoca e dua na ka vakaoqo! O Yisira'yili tabutagane sa vakayacora oti e dua na ka vakadomobula vakaoti.14 Na ucacevata vulavula beka mai  Li'vanoni e na yali e na maliwa ni veiqakilo ni ulunuvanua?  Na wai liliwa beka mai na veivanua tani era bau tini mamaca? 15 E sega, ia o ira na noqu tamata era sa gulecavi au, era qai vakacabo isoro   vei ira era sega ni dua na ka. Qori e vakavuna na nodra tacaqe ni ra lako muria tiko na veisala makawa;  era sa biubiu mai gaunisalalevu, me ra muri vakatikitiki e na gaunisala ta vakavo;  16 Qori era cakava kina na nodra vanua me dua na ka e veivakadomobulataki, ka na dau vakasiusiutakia tu ga. O ira era tavali sivita era na kurea na uludra, o ira kece era na kurabui. 17 Me vaka e dua na cagi kaukaua mai na tokalau, au na ceburaki ira e  matadra na kedra meca. Au na raica na dakudra, [au na sega ni raica] na matadra e na siga ni leqa levu. 18 Era qai kaya, Laiva meda navuca e dua na ituvatuva me baleti Yiremeyahu. Na Toraa era na sega ni yali mai vei ira na kohanimi, se na ivakasala mai vua na vuku, se na vosa mai vei ira na parofita. Mai, laiva meda vakarusai koya e na vosa lasu; ia e na gauna vata oqori, o keda meda kakua ni rogoca e dua na ka e kaya [tiko] o koya. 19 Golevi au mai, i Yahuwe (YHWH)! Rogoca mada na veika era kaya tiko o ira era veisaqasaqa tiko vata kei au! 20 Na vinaka beka, me saumi e na ca? Baleta o ira era sa kelia e dua na qara [me ra tudaitaki] au kina. Nanuma na noqu a tu e matamuni, au qai cavuta na vosa vinaka me baleti ira, me rawa ni oni vukica laivi na nomuni leva mai vei ira? 21 O koya oya moni soli i ira laivi kina na luvedra tagane i na dravuisiga, kolotaki ira i na kaukaua ni seleiwau, laiva na watidra yalewa me ra yava ka  yada talega, laiva na watidra tagane me ra vakarusai e na matedewa, laiva na nodra cauravou me ra vakamatei e na seleiwau e na veivaluvaluti. 22 Laiva me rogo na qoqolou  mai loma ni nodra veivale, ni oni sa kauti ira mai kina [o ira] na dau kabavanua,  ni oni a sega ni tuvakarautaki. Baleta o ira era sa kelia tu e dua na qara me ra na vesuki au kina, ka ra sa birika tu na tudai me coko kina na yavaqu. 23 Ia veitalia sara ga, i Yahuwe (YHWH), o kemuni oni kila vinaka tu na veika era sa navuca oti tu me ra saqati au kina, me tarovi au. Kakua ni vosota na nodra caka ca, kakua ni bokoca laivi na nodra ivalavala ca mai matamuni; ia laiva ga me ra vakatacaqetaki e matamuni; cakava sara vei ira, e na gauna oni cudru tu kina.

Yiremeyahu (Jeremaia) 18:12-23

NA IVAQA NI BULA (FOOD FOR THE SOUL)

Na tamata vuli vinaka e na qarauna matua na yamena;  na tamata vakasama e na qarauna na vuniyalona. 28 E dua mada ga na lialia, ke vagagalu toka ga e na nanumi ni [tamata] vuku; ia o koya e qamuta tiko na gusuna e rawa ni kainaki ni tamata yalomatua.

Mishlei (Vosa Vakaibalebale) 17:27-28

LOMANI YAHUWE NA NOMU KALOU (LOVE YHWH YOUR MIGHTY ONE

E na vukuna na iliuliu. E dua na same maivei Dawide.  2(1) Vueti au i Yahuwe (YHWH) mai vei ira na tamata ca; taqomaki au mai vei ira na tamata ivalavala kaukaua; 3(2) Era dau navuca na veika e vakasisila e vuni yalodra; era dau vakatubu ca tu ga e veiveigauna. 4(3) Era sa cakava na yamedra me gagata me vaka na gata; na weli gaga ni vaipa e toka e ruku ni tebenigusudra. (Selaa) 5(4) Maroroi au, i Yahuwe (YHWH), mai ligadra na daucaka ca; taqomaki au mai vei ira na tamata ivalavala kaukaua; o ira era nakita tiko me ra na vakatacaqetaki au. 6(5) O ira na viavialevu era sa birika vuni tu na dai me rawai au; era sa dedeka tu na lawalawa e na bati ni sala, ka ra nuitaka ni ra na tudaitaki au kina.  (Selaa) 7(6) Au kaya vei Yahuwe (YHWH), O kemuni oni noqu Kalou (Mighty One); vakarogoca i Yahuwe (YHWH) na noqu  vakamamasu meu lomani. 8(7) I Yahuwe (YHWH), i Yahuwe (YHWH) na noqu kaukaua ni veivueti, na noqu isala e sabaya tiko na uluqu e na gauna ni vala.

9(8) ¶ I Yahuwe (YHWH) kakua ni vakadonuya na nodra gagadre; cakava na nodra vere me cala, me kakua kina ni tubu na nodra qaciqacia. (Selaa) 10(9) Laiva na uludra o ira era tu wavolivoliti au me ra luvuci tale [o ira vakataki ira] e na ca sara ga era navuca tiko. 11(10) Laiva me tauci ira sobu mai na qilaiso waqawaqa; me ra qai caroba mada ga i loma ni bukawaqa, ka caroba i loma ni qara titobu, oti me ra qai kakua ni mata cake tale. 12(11) Laivi ira na dau ni vakaucaca me ra kakua ni kunea e dua na vanua; laivi ira era dau ivalavala kaukaua  ka dau ivalavala vakasisila me ra na vakasasataki tawacegu. 13(12) Au kila ni o Yahuwe (YHWH) e na solia na lewa dodonu vei ira na dravudravua ka tokona na nodra dodonu o ira era dau [vakalolomataki] ka dau gadreva na veivuke. 14(13) O ira na yalododonu era na solia dina na vakavinavinaka i na yacamuni; o ira na yalododonu, era na bula tiko e  matamuni.

Tehillim (Same) 140:1-14

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 277 in 5773 (Total 2004)	June 26, 2013
Reading	Hebrew Date
M’lakhim Bet (2 Kings) 3-4	M #4: Tammuz 18, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26

May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.