Rairai vei Mosese na TURAGA (Yahweh Appears to Moses)

Serving for the 18th February, 2008

Ia o Mosese ni qarava tiko na qelenisipi nei Jacoro, na vugona (na tamai watina), o koya e bete tiko mai Mitiani, a mani kauta na qelenisipi i na yasa ni lekutu dravuisiga kadua, i na ulunivanua ni Kalou (Elohim) mai Orepi. 02 E keya, a qai rairai vua na agilosi ni TURAGA (Yahweh) e na yameyame ni bukawaqa mai na loma ni dua na vunikau. A raica rawa o Mosese ni kama tiko na vunikau e na bukawaqa, ia a sega ga ni kamayavu tiko. 03 A mani vakasama o Mosese, “Au na lako mada meu lai dikeva na ka rairai dua tani qo, se cava beka e sega ni kamayavu tiko kina na vunikau? 04 Ia ni raica na TURAGA (Yahweh) ni sa lako tiko o koya me lai dikeva, sa kacivi koya sara mai na loma ni vunikau na Kalou (Elohim), “I Mosese, i Mosese”. Sauma o koya, “O au saka qo.” 05 Kaya tale mai o Koya, “Kakua ni toro vakavoleka tale mai, luvata laivi na nomu i vavabeleti, baleta na vanua o duri tu kina qori, e qele vakatabui.” 06 Oti qai kaya tale, “O Au oqo na nodra Kalou (Elohim) na nomu qase, au Kalou (Elohim) nei Eparayama, Kalou (Elohim) nei Aisake, kau Kalou (Elohim) talega nei Jekope.” Ni rogoca qori o Mosese, sa tabonaka sara na matana, baleta a rere de qai raica na Kalou (Elohim). 07 E kaya sara na TURAGA (Yahweh) “Au sa raica mai na vakaloloma era sa tu kina na noqu tamata era tiko mai Ijipita. Au sa rogoca talega na nodra tagi, baleti ira era vakabobulataki ira tiko, kau sa kauwaitaka sara vakalevu na rarawa sa bikai ira tu. 08 Au sa sobu mai kina qo, meu mai vueti ira mai ligadra na kai Ijipita, meu kauti ira cake tani mai na vanua oya, i na vanua vinaka ka vakacurugalala, na vanua e dave kina na sucu kei na oni....”
- Lako Yani 3:1-8a.


“O koya mo tu kina ka lako, au sa talai iko tiko vei Fero, mo lai kauti ira tani mai na noqu tamata na kai Isireli, mai Ijipita.”
- Lako Yani 3:10.


Also Read If Possible (Wilika Talega Ke Rawa)
Isaiah 6; Acts 7:39-35, Revelation 15:2-4

Dro mai Ijipita o Mosese (Moses Flees Egypt)

Serving for the 17th February, 2008

A qai yaco e na veisiga oya, ni sa tubu levu o Mosese, ni a lako i na vanua era tiko kina na kai nona, qai lai dikeva kina na nodra cakacaka kaukaua. A qai raica kina o koya e dua na kai Ijipita ni mokuta tiko e dua vei ira na kainona. 12 E a veiraiyaki o koya qai sega ni raica e dua, a mani mokuta na kai Ijipita oya, oti qai buluti koya tu e veinuku. 13 Ni lako yani e na siga tarava e a raica tale ni rau veivala tiko e rua na Iperiu; e tarogi koya e cala tiko vei rau, “Na cava o mokuta tiko kina e dua tale na wekamu? 14 Sauma vua o koya, “ O cei mada a lesi iko mo mai neimami iliuliu, mo mai lewai keimami? O nanuma tiko beka mo na vakamatei au talega me vaka na nomu a vakamatea na kai Ijipita? A qai tuburi Mosese na domobula qai vakasamataka, “Sa rairai kilai raraba na ka au a cakava.” 15 Ni rogoca na itukutuku oqo o Fero, a qai segata me vakamatei Moses, ia a drotaki Fero o Mosese, qai lai vakaitikotiko mai Mitiani.
- Lako Yani 2:11-15a)


E a qai yaco, e na toso ni gauna ni a qai mate na tui Ijipita; Era a vutugu tiko na kai Isireli e na vuku ni nodra tu vakabobula, era qai tagi lagalaga, qai lai rogo sara Vua na Kalou (Elohim) na nodra tagi lagalaga ni veivuke e na vuku ni nodra sa tiko vakabobula. 24 A qai rogoca na nodra vutugu na Kalou (Elohim), qai mani vakananuma na Kalou (Elohim) na Nona vosa ni yalayala vei Eparayama, vei Aisake kei Jekope. 25 Sa mani raici ira na Isireli na Kalou (Elohim), qai kauwaitaka vakalevu na ka sa yaco tu vei ira.
Lako Yani 2: 23-25


E a vakauta o Koya na Nona veivueti vei ira na nona tamata;
E a lesia o Koya na nona veiyalayalati me tawamudu
E savasava vakaoti ka cecekia na Yacana.
- Same 111:9



Also Read If Possible (Wilika Talega Ke Rawa)
Numbers 32:23; Acts 7:23-29, Hebrews 11:24-27

Sucu o Mosese (The Birth Of Moses)

Serving for the 16th February, 2008

E a lako e dua na turaga e na Yavusa Livai, qai vakawatitaka e dua na marama e na Yavusa Livai, 02 oti a qai kunekune na yalewa oya ka vakasucuma e dua na luvedrau tagane. Ia ni raica o koya ni gone mata vinaka, a mani vunitaki koya tiko me tolu na vula. 03 Ia ni sa sega ni vunitaki koya rawa tikoga, sa talia sara e dua na bola kuta qai boroya vinaka e na kuluta. Oti qai vakotora na gone e loma ni bola; qai lai vakacirima e loma ni vei kuta e na bati ni uciwai. 04 Ia o ganena a qai lai vakaraici koya tu mai vakayawa, me raica se cava e na yaco vua. 05 Na luve i Fero yalewa a lako tiko me lai sili e na uciwai, ka ratou a taubale tiko e na bati ni uciwai vata kei ratou na nona vada. A mani raica na bola kuta qai tala na nona vada me lai kauta mai. 06 Ia e na gauna sa cega kina, a qai raica e dua na gone; ia qai rubica na tagi na gone, ka mani tubu na nona lomani koya. “Oqo e dua na gone ni Iperiu” e kaya o koya. 07 E taroga sara na luve i Fero o ganena, “E vakaevei o vinakata beka meu lai kauta mai e dua na yalewa ni Iperiu daunisusugone me mai susuga vei iko na gone?” 08 “Io lako” e sauma na luvei Fero yalewa. A lako sara na goneyalewa qai lai kaciva ga mai na tinani gone. 09 E kaya vua na luve i Fero, “Kauta na gone qo, lai susugi koya e na vukuqu, au na qai saumi iko”. Sa mani kauti koya na yalewa, me lai susugi koya. 10 E na gauna sa tubu levu kina na gone, sa qai kau lesu vua na luvei Fero yalewa me sa lai wili me luvena. A qai vakatokai koya me yacana o Mosese, ni kaya “Baleta au a vueta mai na wai.”
- Lako Yani 2:1-10




Also Read If Possible (Wilika Talega Ke Rawa)
Isaiah 49:13-19; Acts 7:20-22, Hebrew 11:23

Vakalolomataki mai Ijipita o ira na Isireli (Pitiful Treatment of Israel in Egypt)

Serving for the 15th February, 2008

Oqo na yacadratou na luvei i Isireli, ratou a lako vata kei Jekope i Ijipita, oya o ratou vata kei ira na nodratou dui matavuvale: 02 o Rupeni, o Simione, o Livai kei Jiuta; 03 o Isaka, o Sevuloni kei Penijamini; 04 o Tani kei Nafitalai, o Kata kei Aseri. 05 Era a le vitusagavulu vakadua na kawa i Isireli era a lako vata kei koya; o Josefa a sa tu oti mai Ijipita. 06 Ni sa mate oti o Josefa vata kei iratou na tuakana kei iratou na tacina vata kei na itabatamata kece oya, 07 era sa qai vakaluvea ga vakalevu o ira na lewe ni yavusa Isireli, ka sa tubu cake tiko ga na kedra i wiliwili, me yacova ni ra sa tawana mai vakalewe levu na vanua.
08 Oti a mani buli e dua na Tui Ijipita vou, e dua e a sega ni bau kilai Josefa. “Raica” e kaya o koya vei ira na nona tamata, “O ira na lewe ni yavusa Isireli era sa lewe levu cake mai vei keda. 09 Mai meda sa vakataulewa mada vaqaseqasea, e na veika kece me baleti ira, de qai tubu tikoga na kedra iwiliwili, era qai lai to mai kei ira na keda meca me ra valuti keda, ke mani yaco e dua na i valu, oti era qai biuta na vanua oqo.”
10 Era sa mani lesi eso na dau ni veivakabobulataki, me ra vakasaurarataki ira me ra cakacaka vakaukaua, era qai tara na koro o Picomi kei Reamisese, me rau koro ni maroroi i yau nei Fero. 11 Ni toso cake tikoga na bibi ni nodra vakacakacakataki, e toso cake vata tale tikoga kei na kedra i wiliwili vata kei na nodra tawa vanua. Qori sa qai vakavuna na nodra sa domobulataki ira tale na kai Isireli, 13 o ira na kai Ijipita, era qai lai vakavuna me tosoi cake tale na bibi ni nodra vakacakacakataki.
- Lako Yani 1:1-13.


Oti sa qai vakataulewa tale o Fero vei ira na nona tamata, “Na gone tagane kece era se qai sucu vou, mo ni kolotaki ira i na uciwai na Naile; me ra bula ga na goneyalewa.”
- Lako Yani 1: 22.

Also Read If Possible
Psalms 105:23-25, Acts 7:9-34; I Corinthians 7:21-23;

Galatians 3:26-28