Na iVakatakilakila. (The Sign)

Thought: YHWH Will Always Protect Those Who Rely On Him For Protection.

................... 

Serving For Yom Shlishi, Shevat 4, 5773

MAI NA NEVI’IMI AKARONIMI (FROM THE NEVI’IM ACHARONIM)

A qai yaco e na gauna i Akaza, na luvetagane i Yotame, na luvetagane i Uzaiyahu, na tui Ya'huda, ni rau a lako cake i Yerushalayimi, o Rezina na tui Arama, kei Pekaki na luvetagane i Remalayaa, na tui Yisira'yili, me rau lai valuta, ia rau qai sega ni rawata. 2 E a qai kainaki vei ira na lewe ni mataqali i Dawide, O Arama rau sa tovata mai kei Ifirayimi. Na vuniyalona a qai yavalati, kei na vuniyalodra na nona tamata, me vaka ni yavavala na vunikau ni veikau ni liwava na cagi. 3 Oti qai kaya o Yahuwe (YHWH) vei Yesha'yahu, Lako mada e na gauna qo mo lai sota vata kei Akaza, o iko vata kei She'a-Yashuva na luvemu tagane, mai na salisali ni drano mai cake, e koto mai na salatu e na nodratou vanua na dausavaisulu; 4 Oti qai kaya vua, Qaqarauni, ia vakacegu ga; kakua ni taqaya, kakua talega ni vakatara na vuniyalomu me yalolailai, e na vukudrau na tolo ni buka waqawaqa; na cudru vakadomobula i Rezina kei Arama, vata kei na luvetagane i Remalaya. 5 Se baleta o Arama kei Ifirayimi, vata kei na luvetagane i Remalaya, rau sa tauri ivakasala tawakilikili tiko me ra saqati iko ni tukuni, 6 Laiva medatou lako cake mada me tou lai kabakoro mai Ya'huda me tou qai vakarusa, ka laiva medatou basuka oti tou qai vakatikora e loma e dua na tui, oya na luvetagane i Tava'yili; 7 E a kaya vakaoqori o Yahuwe (YHWH) na Kalou (Mighty One);  Ia (qori) e na sega ni rawa ni tu se me yaco. 8 Baleta na ulu i Arama o Dameseke, ia na ulu i Dameseke ga o Rezina; ia e na loma ni onosagavulukalima na yabaki o Ifirayimi  sa na kamusu, me sa sega ni dua na kawatamata. 9 Na ulu i Ifirayimi ga o Shomorono ia na ulu i Shomorono ga na luvetagane i   Remalaya. Kevaka o sega ni vakadinata, ia o na sega ga ni vakataudeitaki.

10 ¶ Oti qai kuria ni vosa tale o Yahuwe (YHWH) vei Akaza ni kaya, 11 Kerea e na vukumu e dua na ivakatakilakila  maivei Yahuwe (YHWH) na nomu Kalou (Mighty One); kerea e dua na ka mai na tikina titobu mai She'ola se mai na tikina cecere e cake. 12 Ia qai kaya o Akaza, Au na sega ni kerea se vakatovolei Yahuwe (YHWH). 13 Oti qai kaya na parofita (o Yesha'yahu), Rogoca mada oqo o iko na vale i Dawide; E ka lailai beka na nomuni vakaocaocataki ira tiko na tamata, moni vakaocaocataka talega na noqu Kalou (Mighty One)? 14 Oqori sa na solia sara ga kina vei iko o  Yahuwe (YHWH) vakataki koya e dua na ivakatakilakila; e dua na gone yalewa (almah) e na kunekune me vakasucuma e dua na luvena tagane, o iko o na qai vakatoka me yacana o Imanu’yili (Sa tiko kei keda na Kalou).15 E na gauna sa na kila kina o koya me besetaka na ca ka digitaka na vinaka, o koya sa na vinakata me kania na bata kei na hani (ni veikau).16 Io, ni se bera ni kila e levu toka na  ka na gone me rawa ni cata na ca, ka digitaka na vinaka, na nodrau vanua na tui e rua o taqayataki rau tiko, sa na biu laladidi tu.

Yeshayahu (Aisea) 7:1-16

NA IVAQA NI BULA (FOOD FOR THE SOUL)

Na bula balavu e tiko e ligana imatau; ia na vutuniyau kei na dokai e na ligana imawi. 17 Na nona ivalavala era ivalavala ni lomavinaka, kei na nona veisala kece era veivakacegui. 18 O koya e dua na vunikau ni bula vei ira era tatakube tu vua; o koya e tatakube matua to vua e na mamarau.

Mishlei (Vosa Vakaibalebale) 3:16-18

LOMANI YAHUWE NA NOMU KALOU (LOVE YHWH YOUR MIGHTY ONE

E na vukuna na iliuliu, E dua na same i Dawide. 2(1) E na vakacava na kena dede, i Yahuwe (YHWH)? Oni na guilecavi au beka me tawamudu? E na vakacava na kena dede na nomuni tabonaka tiko na matamuni mai vei au? 3(2) E na vakaevei na kena dede na noqu na tarogi au tiko vakataki au, se cava meu cakava, ni sa tu ga na vutugu e vuniyaloqu e veiveisiga taucoko? E na vakacava na kena dede na nona rawai au tiko na kequ meca? 4(3) Raica, qai sauma mai vei au i Yahuwe (YHWH) na noqu Kalou (the Mighty One)! Vakararamataka na yaloka ni mataqu, deu na qai moce e na moce ni mate; 5(4) De lakolako era qai kaya na kequ meca, Sa rawa vei au meu rawai koya; o ira na kequ meca era na qai mamarau baleta na noqu lutu. 6(5) Ia o au, au nuitaka tu ga na nomuni yalololoma, na vuniyaloqu e na mamarau ni oni sa kauti au meu lai taqomaki. 6 Au na lagasere vei Yahuwe (YHWH), baleta o koya e solia vei au vakayauyau, na veika e sivia na noqu gadreva.

Tehillim (Same) 13:1-6

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 121 in 5773 (Total 1857)	January 15, 2013
Reading	Hebrew Date
Divrei HaYamim Bet ( 2 Chronicles) 27-28	M #11: Shevat 4, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Na Tui O Yoshaiyahu (King Yoshiyahu)

Thought: The King Who Followed YHWH After Most Kings Went Astray

................... 

Serving For Yom Sheini Tevet 11, 5773

MAI NA NEVI’IMI RISHONIMI (FROM THE NEVI’IM RESHONIM)

O Yoshaiyahu a yabaki walu tiko e na gauna a tekivu kina me veilitaki vakatui, a qai veiliutaki tiko vakatui me tolusagavulukadua na yabaki mai Yerushalayimi; na yaca i tinana o Yi'dida, na luveyalewa i 'Adayaa mai Bozokata. 2 E a cakava o koya na veika e donu e na mata i Yahuwe (YHWH), ka dau lako  muria na ivalavala kecekece i Dawide na nona qase, ka ni a sega ni vuki tani i na imatau se i na imawi. 3 A qai yaco e na ikatiniwalu ni yabaki i Tui Yoshaiyahu, na tui a qai talai Safana na luvetagane i Azalayahu, na luvetagane  i Meshulame, na vunivola, i na vale i Yahuwe (YHWHI ni kaya, 4 Lako cake vei Hilikiyahu na kohena haqadola, me wilika na ilevu ni siliva e sa kau oti mai i na vale i Yahuwe (YHWH), era sa soqona oti mai vei ira na tamata o ira na ivakatawa ni katuba; 5 Laivi ira me ra solia oqori vei ira era qarava tiko na cakacaka e na vale i Yahuwe (YHWH); ia laivi ira me ra qai solia oqori vei ira na tamata cakacaka era cakacaka tiko e na vale i Yahuwe, me ra vakavinakataka na veitiki ni vale era kabasu tu, 6 Vei ira na matai ni kau, vei ira na  dautara vale kei  ira na matai ni vatu; ka me voli talega kina na kauvaro kei na vatu sivirawa me vakavinakataki kina na vale i Yahuwe (YHWH). 7 Ia a sega na veitarotarogi vata kei ira me baleta na ilavo e dau soli i ligadra, baleta ni ra dau caka na nodra cakacaka vakayalododonu.8 Kaya o Hilikiyahu na kohena haqadola vei Shafani na vunivola, Au sa kunea na ivola ni Toraa e na vale i Yahuwe (YHWH). O Hilikiyahu a qai solia na ivola ni Toraa vei Shafani, o koya a qai wilika. 9 O Shafani na vunivola, a qai lako mai vua na tui, me vakasuka vua na  itukutuku, e na nona mai kaya,  Na nomuni dauniveiqaravi sa kumuna na ilavo a kune e loma ni vale,  ka sa solia sara i ligadra na tamata cakacaka era qarava tiko na cakacaka e na vale i Yahuwe (YHWH). 10 O Shafani na vunivola a qai kuria ni tukuna vua na tui, O Hilikiyahu na kohena e a solia vei au e dua na ivola. Oti qai wilika sara vua na tui.

M’lakhim Bet (2 Tui) 22:1-10

NA IVAQA NI BULA (FOOD FOR THE SOUL)

E va na ka; era somidi e dela ni vuravura, ia era vuku vakaoti sara mai vei ira na tamata vuku; 25 Na qasikaloaloa e sega tu na nodra kaukaua, ia era na vakarautaka ga na kedra kakana e na vula i katakata; 26 Na koni e lailai wale tu na nodra kaukaua, ia era tara rawa ga na nodra itikotiko e na veivatu; 27 Na vodre, o ira e sega na nodra tui, ia era dau sosoqoni vata kece; 28 Na  tina ni viritalawalawa eda sega ni taura rawa e ligada, ia era na kune e loma ni nodra vale na tui.

Mishlei (Vosa Vakaibalebale) 30:24-28

LOMANI YAHUWE NA NOMU KALOU (LOVE YHWH YOUR MIGHTY ONE

E dua na Same i Dawide. Ni rogoca na noqu masu, i Yahuwe (YHWH), ni vakatudaliga i na noqu vakatakekere: e na nomuni vosamatua, tama mai vei au e na nomuni yalododonu. 2 Kakua ni vakalaiva na nomuni dauniveiqaravi me veilewaitaki; baleta e matamuni e sega ni dua na tamata bula e vakadonui. 3 Baleta o ira na meca era sa vakacacana tiko na noqu bula (soul), era sa buturaka sobu na noqu bula i na dela ni soso; ka sa vakavuna meu lai vakaitikotiko e na butobuto, me vakataki ira era a se mate makawa. 4 Qori sa veilecayaki kina na yaloqu e lomaqu; na vuniyaloqu e lomaqu sa nuiqawaqawa. 5 Au nanumi kemuni, mai na veisiga sa sivi makawa; au qai vakananuya na vatuka ni nomuni cakacaka kecekece; qai vakauqeti au vakalevu na cakacaka ni ligamuni. 6 Au dodoka yani na ligaqu vei kemuni; na noqu bula e viagunu maivei kemuni  me vaka na vanua dravuisiga karamaca.

7 ¶ Tama maivei au vakatotolo, i Yahuwe (YHWH) na noqu bula (soul) sa leqa tiko; kakua ni vunia na matamuni maivei au, deu na qai tautauvata kei ira era sa siro sobu tiko i na ibulubulu. 8 Vakavuna vei au meu rogoca na nomuni yalololoma e na mataka; baleta vei kemuni ga au dau vakararavi; vakavuna vei au meu kila na sala e dodonu meu muria, baleta au sa laveta cake yani na noqu bula (soul) vei kemuni, 9 Vueti au, i Yahuwe (YHWH), maivei ira na kequ meca: vakatavulici au meu cakava na nomuni lewa.10 Baleta ni o kemuni oni noqu Kalou (Mighty One), na yalomuni daumalumu  e na tuberi au i na sala ni bula (life). 11 Vakacegui i au, i Yahuwe (YHWH) e na vuku ni yacamuni; e na vuku ni nomuni yalododonu kauta laivi na yaloqu mai na itutu ni leqa.12 E na nomuni yalo ni veikauwaitaki vagalui ira era cati au; ka vakarusai ira kece na meca ni noqu bula (soul); baleta o au, au nomuni dauniveiqaravi.

Tehellim (Same) 143:1-12

 

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 358 o/o 1818	December 24, 2012
Reading	Hebrew Date
Divrei HaYamim Alef 11-12	M #9: Tevet 11, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Tui ‘Emoni (King ‘Amon)

Thought: Idol Worship Proved To Be The Downfall of Y’hudah.

 ..................

Serving For Yom Rishon Tevet 10, 5773

MAI NA NEVI’IMI RISHONIMI (FROM THE NEVI’IM RESHONIM)

Au na dodoka e delai Yerushalayimi na dali ni vakavakarau mai Shomorono, kei na i vakavakarau ni dodonu ni vale i 'Aka'ava; au na qai quaraki  Yerushalayimi, me vaka ni quaraka e dua na veleti e dua tamata, me qusia oti qai vukica sobu vakatoboicu. 14 Au sa na vakanadakui ira na vo vo ni noqu ivotavota, ka soli i ira i ligadra na kedra meca; era na qai yaco me ra vakasasataki, ka itoki ni ivalu vei ira na kedra meca.15 Baleta era sa cakava na veika e tawakilikili i na noqu rai, ka ra vakacudrui au,  (era) caka ca e mataqu, ka vakacudrui au, mai na siga sara era a biubiu kina o ira na tamadra mai Ijipita, me yacova mai na siga oqo.16 O Ma'nashe talega e sa vakadavea vakalevu na dra e sega ni cala, me yacova ni sa vakasinaiti Yerushalayimi; oya me ikuri ni nona ivalavala ca e cakava me valavala ca kina o Ya'huda, e na nona vakayacora na veika tawakilikili e na rai nei Yahuwe (YHWH). 17 Ia na vo ni cakacaka i Ma'nashe, kei na veika kece a cakava o koya, kei na nona ivalavala ca e a valavala ca kina o koya, raica era sa volai kece tu e na ivola ni nodra veigauna  na  tui Ya'huda? 18 O Ma'nashe a qai mocelutu kei ira na tamana qai bulu ga e na were ni nona vale, e na loma ni were i Uza; ia o Emoni na luvenatagane a qai veiliutaki vakatui me kena isosomi.

19 ¶ O Emoni a sa yabaki ruasagavulukarua tiko e na gauna e tekivu me veiliutaki kina vakatui, e a qai veiliutaki tiko vakatui me rua na yabaki e Yerushalayimi. Na yaca i tinana o Meshulemeta, na luveyalewa i Haruzi mai Yotavaa. 20 O koya a vakayacora ga na veika e tawakilikili e na mata i Yahuwe (YHWH), me vaka sara ga a dau cakava o Ma'nashe na tamana. 21 O koya a lako muria na ivalavala kecekece a muria o tamana, qai dau qarava na veikaloumatakau a qarava o tamana, me sokaloutaki ira. 22 O koya a vakanadakui Yahuwe (YHWH) na nodra Kalou (Mighty One) na nona qase, ka sega ni lako muria na sala i Yahuwe (YHWH). 23 O ira na dauniveiqaravi i Emoni era a bukiveretaki koya era qai vakamatei koya e loma ni nona vale. 24 O ira na lewenivanua era a qai vakamatei ira kece era a bukiverataki Tui ‘Emoni; o ira ga na tamata era a qai buli i Yoshaiyahu na luvenatagane me tui;  me kena isosomi. 25 Na vo ni cakacaka i ‘Emoni kei na itukutuku ni veika kece a vakayacora, raica, qori era sa volai tu e na ivola ni nodra veigauna na tui Ya'huda?  26 Era a buluti koya e na nona ibulubulu e na loma ni were i Uza; o Yoshaiyahu na luvenatagane a qai veiliutaki vakatui me kena isosomi.

M’lakhim Bet (2 Tui) 21:13-26

NA IVAQA NI BULA (FOOD FOR THE SOUL)

E na ruku ni tolu na ka e na uneune kina na vuravura, io, e va e na sega ni vosoti rawa. 22 E na ruku ni dauniveiqaravi e yaco me daunivakavulewa; ka vaka kina e na ruku ni lialia e sa mamau e na madrai; 23 E na ruku ni yalewa dau vakatubunini  ni sa vakawati; vata kei na ruku ni vada e vuaviritaka na nona marama (mistress).

Mishlei (Vosa Vakaibalebale) 30:21-23

LOMANI YAHUWE NA NOMU KALOU (LOVE YHWH YOUR MIGHTY ONE

E dua na vucu ni veivakatavulici i Dawide e na gauna a tiko kina e na loma ni qara. E dua na masu. 2(1) Au a tagi vei Yahuwe (YHWH) e na domoqu; e na domoqu au cabora na noqu vakamamasu vei Yahuwe (YHWH). 3(2) Au sovaraka na noqu kudru e matana; au vakatakila vua na noqu veileqa. 4(3) Ni sa luvuci na yaloqu e lomaqu, oni qai kila na noqu i lakolako. E na gaunisala, meu a muria era sa birika vunitu kina na vere me baleti au.

5(4) ¶ Au rai vaka i na ligaqu imatau, e sega ni tu kina e dua me vakasalataki au; e sega na noqu itataqomaki; e sega ni dua na tamata me kauwaitaki au. 6(5) Au tagi vei kemuni i Yahuwe (YHWH); au kaya, O kemuni na noqu inuinui, ka noqu ivotavota e na nodra vanua na kabula. 7(6) Rogoca na noqu tagi; baleta au sa vakalolovirataki vakaca; vueti au mai vei ira era vakaucacataki au, baleta era kaukaua cake vakalevu mai vei au. 8(7) Kauta tani mai na noqu bula (soul) mai na valeniveivesu, meu rawa ni  vakavinavinakataka na yacamuni; o ira na nomu yalododonu era na waraki au me yacova ni oni sa vakaicovitaki au.

Tehellim (Same) 142:1-7

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 357 o/o 1817	December 23, 2012
Reading	Hebrew Date
Divrei HaYamim Alef ( I Chronicles) 9-10	M #9: Tevet 10, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Marau O Hizikiyahu. (Hizkiyahu Was Joyful)

Thought: YHWH Was Preparing Yisra’yl To Be Taken Captive By Ashur

..................... 

Serving For Yom HaShishi Tevet 8, 5773

MAI NA NEVI’IMI RISHONIMI (FROM THE NEVI’IM RESHONIM)

E na gauna oya, o Be’rodaka-Bala’dani na luve i Bala’dani a vakauta e dua na ivola kei na dua na iloloma vei Hizikiyahu, baleta ni rogoca ni a tauvi mate tu o Hizikiyahu.13 O Hizikiyahu a mamarau vata kei ira, qai vakaraitaka vei ira na nona vale ni iyau talei, na siliva, na koula, na ivakaboi vinaka (spices) kei na ilumu vakamareqeti, na vale ni nona iyaragi, na veika kece era tu vata kei na nona iyau; e sega tale ni dua na ka e tiko e na loma ni nona vale, kei na nona matanitu taucoko, a sega ni vakaraitaka vei ira o Hizikiyahu.14 Oti qai lako mai o Yesha'yahu na parofita vei Tui Hizikiyahu qai kaya vua, Na cava soti era kaya vei iko o ira na tamata qo, o ira era a lako mai vei iko? Kaya o Hizikiyahu, Era lako mai vei au mai na dua na vanua yawa, oya mai Bavela. 15 Kaya o koya, Na cava so era sa raica e loma ni nomu vale? Sauma o Hizikiyahu, Era a raica na veika kece era tu e loma ni noqu vale; au sega ni vakavotaka e dua na ka mai loma ni noqu vale ni iyau, au a sega ni vakaraitaka vei ira. 16 Kaya o Yesha'yahu vei Hizikiyahu, Rogoca na vosa i Yahuwe (YHWH). 17 Raica, sa roro mai na siga, e na colati kece kina i Bavela, na veika kece era tu e loma ni nomu vale, kei na veika kece era a maroroya tu mai vakaiyau o ira na qase; e sega tale ni dua na ka e vakavotaki vei iko, e kaya o Yahuwe (YHWH): 18 O ira na luvemu tagane era na tubu mai vei iko, o ira o na vakatuburi ira, era na kau laivi kece; era na qai lai cakacaka vaka iunuku e na nona vale vakatui na tui Bavela. 19 Vosa o Hizikiyahu me kaya vei  Yesha'yahu, E vinaka na vosa i Yahuwe (YHWH) o mai vakasavuya tiko qo. E daumaka ni na tiko ga na sautu kei na dina e na dela ni noqu gauna. 20 Na vo ni cakacaka i Hizikiyahu vata kei na nona kaukaua kecekece, kei na nona cakava na drano kei na kena sala ni wai, me kauta mai na wai i loma ni korolevu, raica, qori era volai kece tu e na ivola ni nodra veigauna na  tui Ya'huda. 21 O Hizikiyahu a qai moce lutu vata kei ira na tamana; o Ma'nashe na luvena tagane a qai veiliutaki vakatui me sosomitaki koya.

M’lakhim Bet (2 Tui) 20:1-11

NA IVAQA NI BULA (FOOD FOR THE SOUL)

Na yalokanimata e dau vakalialiai tamana, ka cata me talairawarawa vei tinana; na reveni ni veibucabuca e na covuta tani mai, ia na luve ni ikeli valatia (vulture) e na qai kania.

Mishlei (Vosa Vakaibalebale) 30:17

LOMANI YAHUWE NA NOMU KALOU (LOVE YHWH YOUR MIGHTY ONE

E na vukuna na iliuliu. E dua na Same maivei Dawide. 2(1) Vueti au i Yahuwe (YHWH) mai vua na tamata ca; taqomaki au mai na tamata ivalavala kaukaua; 3(2) Era dau vakavurea na vakacaca e vuni yalodra; era dau vakatubu ca e veiveigauna. 4(3) Era sa vagatara tu na yamedra me vaka na gata; na weli gaga ni ada e toka e daku ni tebenigusudra. 5(4) Maroroi au, i Yahuwe (YHWH), mai ligadra na daucakaca; taqomaki au mai vei ira na tamata ivalavala kaukaua; era sa nakita tiko me ra vakadaroya na noqu ilakolako. 6(5) O ira na viavialevu era sa birika vuni tu na dai me rawai au; na dali ni nodra lawalawa era sa vakotora tu e na noqu gaunisala; era sa birika tu na kequ tudai. 7(6) Au kaya vei Yahuwe (YHWH), O kemuni oni noqu Kalou (Mighty One), rogoca na domo ni noqu vakamamasu, i Yahuwe (YHWH). 8(7) I Yahuwe (YHWH) na noqu ivakabula vakaitamera, o kemuni na isasabai ni uluqu e na siga ni vala. 9(8) ¶ Kakua ni vakadonuya, i Yahuwe (YHWH), na nodra gagadre o ira na ca; kakua ni bukana na nodra vere; kakua ni laivi ira me ra rawata na nodra inakinaki.10(9) Laiva na inaki duka ni tebenigusudra me sauti ira tale. 11(10) Laiva na qilaiso waqawaqa me lutuki ira; laivi ira me ra caroba i loma ni bukawaqa, me ra kakua ni mata cake tale. 12(11) Kakua ni laiva e dua na daunivosaca me tauyavu e vuravura; na ca me na vakasasataki ira na tamata ivakarau kaukaua me vakarusai ira.13(12) Au kila ni o Yahuwe (YHWH) e na taqomaka na nodra sasaga na vakalolomataki kei ira na dravudravua. 14(13) E na dina ni o ira na yalododonu era na solia na vakavinavinaka i na yacamuni; o ira na yalododonu, era na vakaitikotiko e matamuni.

Tehellim (Same) 140:1-13

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 355 o/o 1815	December 21, 2012
Reading	Hebrew Date
Divrei HaYamim Alef ( I Chronicles) 5-6	M #9: Tevet 8, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Hizikiyahu E Vakaleqai (Hizikiyahu Troubled)

Thought: Hizkiyahu Took His Problems To YHWH And His Prophets.

.................. 

Serving For Yom Rishon, Tevet 3, 5773

MAI NA NEVI’IMI RISHONIMI (FROM THE NEVI’IM RESHONIM)

E na gauna e rogoca kina qori o Tui Hizikiyahu, e a qai dresulaka na nona isulu, tutuvitaki koya e na isulu taga, qai lako me lai curu i na vale i Yahuwe (YHWH). 2 Oti qai talai Yilaiyakimi, na dauniveiqaravi e vale, vata kei Shevana na vunivola, vata kei ira na nodra iliuliu na kohanimi, ni ra sa tutuvi tu e na isulu taga, vei Yesha'yahu na parofita, na luvetagane (son) i Amozi. 3 Era qai kaya vua, Oqo na veika e  kaya o Hizikiyahu, Na siga qo e dua na siga ni rarawa kei na veitotogitaki kei na veivosavakacacataki; ni ra sa voleka ni vakasucumi na gone, ia qai sega na kaukaua vei tinadra me ra vakasucu. 4 De dua, o Yahuwe (YHWH) na nomuni Kalou (Mighty One), e na rogoca na vosa nei Rava-Shake, o koya e talai koya mai na nona turaga (master), oya o tui Ashuru me mai vosavakacacataka na Kalou (Mighty One) bula; oti qai cudruvi koya e na vuku ni vosa sa mai rogoca o Yahuwe (YHWH) na Kalou (Mighty One); o koya oya moni vakatakekere kina ka masulaki keda na vo vo eda se vo tiko. 5 Era qai lako na dauniveiqaravi nei Tui Hizikiyahu vei Yesha'yahu na Parofita. 6 Kaya o Yesha'yahu vei ira, Oqo na veika moni kaya vua na nomuni turaga (master); Oqo na ka e kaya o Yahuwe (YHWH), Kakua ni taqayataka na vosa oni sa rogoca, ni ra vakayagataka tiko na mata nei tui Ashuru me ra vakasewasewani au kina. 7 Raica, au na vakauta vua e dua na yalo, e na qai rogoca o koya e dua na itukutuku vuka, e na vakavuna na nona lesu i na nona vanua;  au na qai vakavuna me bale e na seleiwau e loma ni nona vanua.

8 ¶ A mani lesu tale na Ravi-Shake, qai  kunea na tui Ashuru ni valuti Livinaa tiko;  baleta o koya a rogoca ni sa biubiu oti mai Lakishi. 9 Ia ni qai rogoca o koya ni kainaki me baleti Tiraka, na tui Iciopea, ni tukuni, Raica, o koya e sa lako tiko mai me mai valuti iko; o koya a qai tala tale eso na dau kauituktuku vei Hizikiyahu me kaya, 10 Oqo moni na lai tukuna vei Hizikiyahu na tui Ya'huda; Kakua ni laiva na Kalou (Mighty One) o vakabauta me vakaisini iko, e na kena tukuni ni o Yerushalayimi e na sega ni soli i ligana na tui Ashuru. 11 Raica, o iko o sa rogoca oti na veika  a cakava na tui Ashuru i na veivanua kecekece, e na nona a vakarusai ira kece vakadua, o cei tale me na qai vueti iko? 12 O ira beka na kalou (elohim) ni veimatanitu era sa vueti ira rawa, na veivanua sa vakarusai ira oti o ira na tamaqu, me vakataki Qosani, Harani, kei Rezefa, kei ira na luve i Ideni era tiko mai Tela'asa? 13 Evei beka na tui Hamata, na tui Arapadi, na tui ni koro o Si'favayimi, kei Hena kei 'Ivaa? 14 O Hizikiyahu a ciqoma na ivola mai ligadratou na dau kauitukutuku qai wilika;  o Hizikiyahu a qai lako cake i na vale i Yahuwe (YHWH), qai lai dedeki ira e na mata i Yahuwe (YHWH).

M’lakhim Bet (2 Tui) 19:1-14

NA IVAQA NI BULA (FOOD FOR THE SOUL)

Na vosa kece i Yahuwe (YHWH) e savasava vakaoti; o koya e dua na isasabai vei ira kece era biuta na nodra inuinui vua. 6 Kakua ni vakaikuritaka na nona vosa, de na qai tarogi iko kina o koya, o qai kune ni o dua e dau lasulasu;

Mishlei (Vosa Vakaibalebale) 30:5-6

LOMANI YAHUWE NA NOMU KALOU (LOVE YHWH YOUR MIGHTY ONE

HALELUYA. Vakacaucautaka na yaca i Yahuwe (YHWH); vakavinavinakataki koya, o iko na dauniveiqaravi nei Yahuwe (YHWH). 2 O kemuni oni tucake tu e na loma ni vale nei Yahuwe (YHWH, e na loma ni bai ni nona vale na noda Kalou (Mighty One). 3 Vakacaucautaki Yahuwe (YHWH); baleta o Yahuwe (YHWH) e vinaka; lagata na vakamuduo e na vuku ni yacana baleta o koya e dau talei. 4 Baleta talega ni o Yahu (Yah) sa digitaki Ya'akove me nona kei Yisira'yili me nona iyau talei.

5 ¶ Baleta au kila ni o Yahuwe (YHWH) e vakaitamera baleta na noda Kalou (Mighty One) e cecere cake mai vei ira na kalou (elohim) kecekece. 6 Na cava ga e marautaka o Yahuwe (YHWH), qori e na vakayacora mai lomalagi vata kei vuravura, e wasawasa kei na veiyasana titobu kece sara. 7 E vakavuna na o me tubu cake mai na iyalayala kei vuravura; e cakava na yaseyase e na vuku ni uca; e yauta mai  na cagi mai na nona (vale ni) iyau. 8 A vakamatea na ulumatua mai Ijipita, ruarua na tamata kei na manumanu. 9 O koya a tala yani na nona ivakatakilakila kei na veika veivakurabuitaki i na kemuni maliwa, i Ijipita vei Fero kei ira kece na nona dauniveiqaravi. 10  O koya e a samuta e levu na veimatanitu qai vakamatei ira na tui kaukaua;  11 O Sikoni na nodra tui na Emori kei Oqa na tui Bashani kei na veimatanitu kece sara mai vei ira na Kena'ani; 12 Qai solia na nodra vanua me ivotavota, me nodra ivotavota na Yisira'yili o ira na nona tamata. 13 Na yacamuni, i Yahuwe (YHWH), e na tudei me tawamudu; na kemuni ivakananumi i Yahuwe (YHWH), e na veitabatamata kecekece sara.14 Baleta o Yahuwe e na vakatulewa vei ira na nona tamata, e na marautaki ira na nona dauniveiqaravi.

15 ¶ Na nodra kalou matakau na veimatanitu, na siliva kei na koula, na cakacaka ni liga ni tamata. 16 Era vakagusu, ia era sega ni vosa; e tu na matadra ia era sega ni rai; 17 Era vakadaliga ia era sega ni vakarorogo kina; ka sega talega na icegu e loma ni gusudra. 18 Laivi ira era a buli i ira me ra tautauvata kei ira, ka vakakina o ira kece era vakanuinui vei ira. 19 Vakavinavinaka vei Yahuwe (YHWH), kemuni e na vale i Yisira'yili; vakavinavinaka vei Yahuwe (YHWH) kemuni e na vale i Aharoni: 20 Vakavinavinaka vei Yahuwe (YHWH), kemuni e na vale i Livai; o kemuni oni dokai Yahuwe (YHWH) vakavinavinaka vei Yahuwe (YHWH). 21 Me vakavinavinakataki o Yahuwe (YHWH) mai Zaiyoni, o koya e vakaitikotiko mai Yerushalayimi. Haleluya.

Tehellim (Same) 135:1-21

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 350 o/o 1810	December 16, 2012
Reading	Hebrew Date
Nechmeyah ( Niemaia) 7-8	M #9: Tevet 3, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Vakaluluqataki Na Vakararavi Vei Yahuwe (Reliance On YHWH Dampen)

Thought: Hizkiyahu Relied On YHWH Fairly Heavily.

..................... 

Serving For Shabbat, Tevet 2, 5773

MAI NA NEVI’IMI RISHONIMI (FROM THE NEVI’IM RESHONIM)

Ni oti oya, na tui Ashuru a qai talai Tatani, Ravi-Sarisi kei Ravi-Shake mai Lakishi, i Yerushalayimi, vei Tui Hizikiyahu vata kei na dua na mataivalu levu. Era lako cake mai, era qai lako me ra lako i Yerushalayimi. Ia ni ra sa lako cake yani, era qai lai tu voleka i na cabecabe ni paipo vaka i na tobu e cake, e toka e na gaunisala levu e na rara era dau raki kina na isulu (ni sava oti). 18 E na gauna eratou sa kaciva kina na tui, a qai lako mai vei iratou o Yilaiyakimi na luvetagane i Hilikiyahu, o koya e veiqaravi liu e  loma ni vale,  o Shevanaa na vunivola, o Yoaka na luvetagane i Asafa na dauvola itukutuku ni matanitu. 19 Oti qai kaya vei iratou o Ravi-Shake, Dou vosa mada vei Hizikiyahu, Oqo na veika e taroga na tui levu, na tui Ashuru; Na mataqali inuinui vakacava oqo oni vakararavi tiko kina? 20 O iko o kaya, e dua ga na malanivosa lailai mai na tebenigusu e wili me ivakasala e na vakaukauataki kina na ivalu; Kaya mada mai se o vakanuinui tiko vei cei o saqati au tiko kina? 21 Ia qo, raica, o iko o vakararavi tiko i na ititoko gasau sa kakaseisei tu, oya i Ijipita; ia ke dua e ravita, e na curu basikata na ligana me suaka; qori e na yaco vaka kina mai vei Fero na tui Ijipita  vei ira kece era vakararavi vua. 22 Ia kevaka oni kaya mai vei au; Keimami vakanuinui ga vei Yahuwe (YHWH) na neimami Kalou (Mighty One); e sega beka ni o koya oqori sa basuka laivi na nona tikina cecere kei na nona icabocabo ni isoro a basuka laivi o Hizikiyahu; oti qai kaya vei ira na Ya'huda kei ira mai Yerushalayimi, O kemuni moni na dau mai sokalou ga  e na vakacabo ni soro e Yerushalayimi. 23 O koya oya, moni cakava kina moni mai to kei na noqu turaga na tui Ashuru, au na qai solia vei kemuni e ruanaudolu na ose, kevaka era tu na nomuni dau ni vodo ose me ra vodoka. 24 E na rawa vakacava vei kemuni moni cata na kerekere ni dua na turaganivalu lailai wale, vei ira na dauniveiqaravi ni noqu turaga moni biuta na nomuni inuinui vei Ijipita me na solia vei kemuni na qiqi ni ivalu kei na tamata dauvodo ose?  25 De dua oni nanuma tiko ni sega ni dua na veivakadonui mai vei Yahuwe (YHWH) e tiko, au lako tu mai kina qo meu mai saqata na vanua oqo, meu vakarusa? O Yahuwe (YHWH) sara ga a kaya vei au, Lako cake mo lai saqata na vanua qo, mo vakarusa. 26 Kaya o Yilaiyakimi na luvetagane i Hilikiyahu, o Shevanaa, kei Yoaka, vua na Ravi-Shake, Vosa mai, keitou kerea, vei iratou na nomuni dauniveiqaravi e na vosa vaka Arameani; baleta keitou kila vinaka; kakua ni vosa mai vei keitou e na vosa vaka Iviriu, me rogoca na daligadra na tamata era yatuni tu e na dela ni lalagabai. 27 Ia na Ravi-Shake qai sauma vei iratou, Na vosa au mai cavuta tiko oqo mai vua na noqu turaga, e sega ni nakiti  mo (dou rogoca) o kemudou kei koya na nomudou turaga; ia e nakiti sara ga me ra rogoca o ira na tagane era dadabe tu qori e na bailalaga, me ra na kakua kina ni kania na dedra ka gunuva na nodra suasua vata kei kemudou. 28 Oti sa qai tu na Ravi-Shake qai vosa  me rogo levu e na vosa vaka Iviriu,  ni kaya, Moni rogoca na vosa ni tui levu, na tui Ashuru. 29 Oqo na veika e kaya na tui, Kakua ni laivi Hizikiyahu me vakacalai kemuni, baleta o koya e na sega ni vueti kemuni rawa mai ligaqu; 30 Kakua talega ni laivi Hizikiyahu  me cakava moni vakanuinui vei Yahuwe (YHWH) e na nona kaya, O Yahuwe (YHWH) e na vueti keda vakaidina, kei na korolevu oqo e na sega ni soli i ligana na tui Ashuru. 31 Moni kakua ni galeleti Hizikiyahu; baleta e kaya vakaoqo na tui Ashuru;   Ni cakava e dua na veiyalayalati ni tiko veisautautaki vata kei au, ka muri i au mai; o kemuni kece sara oni na qai kana mai na nomuni dui veivaini kei na nomuni dui vei vunilolo ka gunu wai na tamata yadua mai na nomuni dui toevu ni wai, 32 Me yacova niu sa lako mai meu mai kauti kemuni laivi i na dua na vanua e tautauvata kei na nomuni vanua, na vanua ni sila kei na waini,  na vanua ni madrai kei na veivaini, na vanua ni veiolive; me rawa ni oni bula ka kakua ni mate; ni kakua ni vakarogoci Hizikiyahu ni vakayarayarataki kemuni ni kaya, O Yahuwe (YHWH) e na vueti keda. 33 Sa bau dua beka na kalou (elohim) ni veimatanitu sa bau vueta na nona vanua mai na ligana na tui Ashuru? 34 Evei o ira na nodra kalou (elohim) na Hamata vata kei Arapadi? Evei o ira na kalou (elohim) ni Si'favayimi, Hena vata kei 'Ivaa? Era sa vueti Shomorono beka mai ligaqu? 35 O cei vei ira kecekece na kalou (elohim) ni veivanua oqo, sa bau vueta na nodra vanua mai ligaqu, e na rawa kina vei Yahuwe (YHWH) me vueti Yerushalayimi mai na ligaqu? 36 Era galu tu ga na tamata, ka sega ni sauma vua e dua na malanivosa; baleta na tui a vakarota ni kaya; Kakua ni veisau vosa kei koya. 37 Oti qai lako mai o Yilaiakimi na luve tagane i Hilikiyahu, na dauveiqaravi liu e loma ni vale, o Shevanaa na vunivola, kei Yoaka na luvetagane  i Asafa, o koya e dauvola na itukutuku vei Hizikiyahu,  na nodratou isulu a sa kakabasubasu tu, eratou qai vakasavuya vua na nona vosa na Ravi-Shake.

M’lakhim Bet (2 Tui) 18:17-37

NA IVAQA NI BULA (FOOD FOR THE SOUL)

Oqo na veivosa nei Aqu na luvetagane i Yake, o koya e a parofisai qai ciqoma na kaukaua, e kaya vei Iti'liyili; 2 E ka dina niu ulu malumalumu, ka sega vei au na yalomatua vaka tamata. 3 Au sega ni kila na vuku, kau se sega talega ni vulica na nodra kilaka na tamata yalosavasava. 4 Kaya mai vei au, o cei e sa cabe oti i lomalagi, ka sa lesu sobu mai? O cei e sa bau qumia na cagi e ligana? O cei sa bau bukia na wai e na nona itavoi?  O cei e a tekia na iyalayala kece kei vuravura? O cei na yacana; o cei na yaca i luvenatagane, kevaka o rawa ni tukuna mai?

Mishlei (Vosa Vakaibalebale) 30:1-4

LOMANI YAHUWE NA NOMU KALOU (LOVE YHWH YOUR MIGHTY ONE

E dua na sere ni cabecabe. Raica moni vakavinavinaka vei Yahuwe (YHWH), o kemuni kecekece na dauniveiqaravi nei Yahuwe (YHWH), era dau tu e na veibogi, e na vale i Yahuwe (YHWH). 2 Laveta cake na ligamuni vaka i na yasana tabu, vakavinavinaka vei Yahuwe (YHWH). 3 O Yahuwe (YHWH) e na vakalougatataki iko mai Zaiyoni, oya sara ga o koya e a buli i lomalagi kei vuravura.

Tehellim (Same) 134:1-3

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 349 o/o 1809	December 15, 2012
Reading	Hebrew Date
Nechmeyah ( Niemaia) 5-6	M #9: Tevet 2, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Oti Na Veiliutaki Ni Kawa I Yehu (End Of The Yehu Dynasty)

Thought: Assasination Of Kings Became A Norm Resulting In Short Reigns

................ 

Serving For Yom Shlishi, Kislev 27, 5773

MAI NA NEVI’IMI RISHONIMI (FROM THE NEVI’IM RESHONIM)

E na ikatolusagavulukawalu ni yabaki nei 'Azarayaa na tui Ya'huda, o Za'karayaa na luvetagane i Yerova'ama  e a veiliutaki kina vakatui vei ira na Yisira'yili, mai Shomorono, ia me ono ga na vula; 9 E a dau cakava na veika e sega ni kilikili e na mata i Yahuwe (YHWH) o koya, me vaka ga a dau cakava o tamana; e a sega ni saumaki laivi mai na ivalavala ca nei Yerova'ama na luvetagane i Ne'vati, o koya e a vakavuna taumada me ra valavala ca o ira na Yisira'yili. 10 O Shalumi na luvetagane i Yavesha a qai bukiveretaki koya, mokuti koya e matadra na tamata ka vakamatei koya; oti qai taura na itutu ni veiliutaki vakatui, me sosomitaki koya. 11 Na vo ni veika a cakava o Za'karayaa, raica, era volai kece tu e na iVola ni nodra veigauna na tui e Yisira'yili.12 Qori a vakayacori kina na vosa i Yahuwe (YHWH) e a tukuna vei Yehu, ni kaya, O ira na luvemu tagane era na dabeca na idabedabe vakatui e Yisira'yili me yacova ga na ikava ni itabatamata. A qai yaco dina vakakina. 13 O Shalumi na luvetagane i Yavesha e a tekivu me veiliutaki vakatui e na ikatolusagavulu ka ciwa ni yabaki i 'Azarayaa na tui Ya'huda; e a veiliutaki vakatui me dua taucoko na vula mai Shomorono. 14 Baleta o Menakema na luvetagane i Qadi, a lako cake mai Tirizaa, lako i Shomorono qai lai samuti Shalumi na luvetagane i Yavesha mai Shomorono, qai vakamatei koya, oti qai veiliutaki sara vakatui me sosomitaki koya. 15 Na vo ni cakacaka i Shalumi, kei na vere a bukia o koya, raica, era volai kece tu e na ivola ni nodra veigauna na Tui Yisira'yili. 16 Oti oya, o Menakema a qai lako cake mai Tirizaa, qai mai mokuti Tifisake, kei ira kece era tiko kina, kei ira kecekece e na yasayasa oya, baleta era a sega ni via dolava vua na matamata; oti qai tunaki ira na yalewa kecekece mai keya era buketetaki gone tu. 17 E na ikatolusagavulukaciwa ni yabaki i 'Azarayaa na tui Ya'huda, o Menakema na luvetagane o Qadi, a qai tekivu veiliutaki kina vakatui mai Shomorono vei ira na Yisira'yili ka veiliutaki tiko vakatui me tini na yabaki.18 O koya e a vakayacora na veika a sega ni kilikili e na mata i Yahuwe (YHWH); a sega talega, e na nona dela ni gauna taucoko, me saumaki laivi mai na ivalavala ca kecekece i Yerovo'ama na luvetagane i Ne'vati, o koya e a vakavuna me ra valavala ca o ira na Yisira'yili. 19 O Pulu na tui Ashuru a qai kaba vanua mai, ia o Menakema a sauma vei Pulu e dua na udolu na taledi na siliva, me rawa ni totaki koya mai, me qai rawa kina ni vakataudeitaka e ligana na matanitu. 20 O Menakema a qai lavaka e dua na ivakacavacava vei ira na Yisira'yili, bau kina o ira kece na tagane vutuniyau e na loma ni vanua, na tagane yadua me ra tauyalimasagavulu na shekele na  siliva, qori me solia vua na tui Ashuru. Qori a qai vuki lesu kina na tui Ashuru, ka sega ni mai vakaitikotiko e loma ni vanua. 21 Na vo ni cakacaka i Menakema, kei na veika kece a cakava o koya, raica era volai kece tu e na ivola ni nodra veigauna na tui Yisira'yili. 22 O Menakema a qai mocelutu vata kei ira na tamana; o Pi'kakaya na luvena tagane a qai veiliutaki vakatui me kena isosomi.

M’lakhim Bet (2 Tui) 15:8-22

NA IVAQA NI BULA (FOOD FOR THE SOUL)

O koya e dau taleitaka vakalevu cake na mamarau mai na nona itabagauna ni gone, e na yaco me dauniveiqaravi ka dau vosakudrukudru. 22 ¶ E dua na tamata cudrucudru e na vakatubura na veileti, ia na tamata dau yalokatakata e vakaitamera na nona caka cala.

Mishlei (Vosa Vakaibalebale) 29:21-22

LOMANI YAHUWE NA NOMU KALOU (LOVE YHWH YOUR MIGHTY ONE

E dua na sere ni cabecabe. Maivei Dawide. Ia mai na botoni titobu, au a tagici kemuni, i Yahuwe (YHWH) oni a qai rogoca na domoqu. 2 Oni qai laiva na daligamuni me vakatudaliga i na qaqani noqu vakatamamasu. 3 Kevaka, i Yahuwe (YHWH), moni kudruvaka na ivalavala ca, i Yahuwe (YHWH) o cei tale beka e na vo bula, 4 Baleta na veivosoti e lako ga mai vei kemuni, sa dodonu ga kina  moni dokai.

5 ¶ Au vakanuinui vei Yahuwe (YHWH), na noqu bula (soul) e waraka ga na nona vosa. 6 Au dau waraki Yahuwe (YHWH) mai na gauna ni matayadra e na mataka ca ca, me yacova na gauna ni matayadra e na bogilevu tu tu.  7 Laivi Yisira'yili me vakanuinui vei Yahuwe (YHWH); mai vua e lako mai na yalololoma, ka ni vakaitamera vua na yalo ni veivueti. 8 O Koya ga e na vueti Isira’yili, mai na nona ivalavala ca kecekece.

Tehellim (Same) 130:1-8

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 345o/o 1805	December 11, 2012
Reading	Hebrew Date
‘Ezra ( Ezera) 7-8	M #9: Kislev 27, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

O Tui Azarayaa (King Azaryah)

Thought: Azaryah Did Right But Was Punished For Not Removing Idol Worship

......................... 

Serving For Yom Sheini, Kislev 26, 5773

MAI NA NEVI’IMI RISHONIMI (FROM THE NEVI’IM RESHONIM)

E na ikaruasagavulu ka vitu ni yabaki i Yerovo'ama na tui Yisira'yili, o 'Azarayaa na luvetagane i Amazayaa, na tui  Ya'huda, a qai tekivu kina me veiliutaki vakatui. 2 E a se qai yabaki tinikaono e na gauna a tekivu kina me veiliutaki vakatui, ka veiliutaki vakatui me limasagavulu ka rua na yabaki mai Yerushalayimi. Na yaca i tinana o Yo'kohoiyahu na marama ni Yerushalayimi. 3 O koya e a vakayacora na ka e donu e na mata i Yahuwe (YHWH), me vaka na ka kece a dau  cakava o Amazayaa na tamana; 4 Ia na burekalou ga ni sokaloutaki matakau e na veivanua cecere, a sega ni kauta laivi  o koya; o ira na tamata era a se dau lai vakacabo isoro ka vakama ka boi kamica tikoga e na veitikina  cecere. 5 O Yahuwe (YHWH), a qai mokuta na tui, qai tauvi koya kina na vukavuka (tzara'at) me yacova na siga a mate kina, e a mani tiko voli ga kina e na loma ni vale ni tu vagalala. O Yotame na luvetagane ni tui, a vakavulewa tiko e vale ka dau vakataulewataki ira na lewe ni vanua. 6 Na vo ni cakacaka i 'Azarayaa, kei na veika kece a cakava o koya, raica era volai kece tu e na ivola ni nodra veigauna na tui Ya'huda? 7 A mani mocelutu o  'Azarayaa vata kei ira na nona qase; era a qai buluti koya vata kei ira na nona qase e na korolevu i Dawide; o Yotame na luvena tagane a qai veiliutaki vakatui me kena isosomi.

M’lakhim Bet (2 Tui) 15:1-7

NA IVAQA NI BULA (FOOD FOR THE SOUL)

E dua na dauniveiqaravi e na sega ni vakadodonutaki rawa e na vosa; baleta ni kila deivaki tu (o koya) ni na sega ni kuitataki. 20 ¶ Ni o raica e dua na tamata e dau gusutotolo e na veika e kaya; kila sara tiko ni vinaka cake sara mai vua, e dua na lialia.

Mishlei (Vosa Vakaibalebale) 29:19-20

LOMANI YAHUWE NA NOMU KALOU (LOVE YHWH YOUR MIGHTY ONE

E dua na sere ni cabecabe. Era a bau lewe levu o ira era dau vakasaurarataki au mai na noqu gauna ni gone, laivi Yisira'yili me kaya oqo; 2 O ira era a dau vakasaurarataki au era bau lewe levu dina mai na noqu gauna ni gone, ia era sega ga ni rawa ni vakagucetaki au. 3 Era warolaki au e dakuqu; era qai cakava me dede vinaka na nodra  veivakararawataki. 4 O Yahuwe (YHWH) e yalododonu: o koya e na cebedrutia laivi na nodra dali na vakasisila.

5 ¶ Laivi ira me ra veilecayaki ka me ra vakasukai lesu o ira era cati Shaiyoni. 6 Laivi ira me ra vaka na veico e na delavuvu ni vale, ni ra na tacavu ka malai vakadua ni labata na cagi; 7 Era na sega ni tawana rawa na ligana o koya e dautatamusuki ke qumia; se me laveta i lomaserena o koya e dau vesuki ira vakaivau. 8 Era na sega talega ni kaya rawa o ira era tavali, Na veivakalogatataki i Yahuwe (YHWH) me sobuti iko; keimami vosa vakalougatataki iko e na yaca i Yahuwe (YHWH).

Tehellim (Same) 129:1-8

 

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 344 o/o 1804	December 10, 2012
Reading	Hebrew Date
‘Ezra ( Ezera) 5-6	M #9: Kislev 26, 5773
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.