Na Yalo E Sega Ni Dauveivosoti (Unforgiving Spirit)

Thought: An Unforgiving Heart Is Detrimental To Spiritual Growth

.........................................

Serving for the 21^st October, 2008

Ia ni ratou sa lako cake na tacina, sa qai lako cake tale ga o Koya i na solevu, ia sega ga ni vakarairai; e rawa ni tukuni ni a lako vakavuni. 11 O ira na Jiu era a vaqarai Koya tiko e na solevu, era qai kaya, “Evei mada o Koya? 12 E a levu na vosavosa e na kedra maliwa na tamata, me baleti Koya. Eso era kaya, O Koya e vinaka; eso tale era kaya, Sega, baleta o Koya e vakacalai ira tiko ga na tamata. 13 Ia, e sega ga ni dua e vosa vakararama me baleti koya, baleta ni ra ravataki ira tiko na Jiu.

Joni 7:10-13

Na cava mada na ibalebale ni vosa e kaya tiko o Koya, Oni na vaqarai Au, ia oni na sega ni kunei Au, kei na vanua Au lako kina, oni na sega ni lako rawa kina?

37 ¶ E na iotioti ni siga, oya na siga cecere ni solevu, a qai tu kina o Jisu (Yahshua) qai kacivaka, Ke dua e karamaca, laivi koya me lako mai vei Au, me mai gunu. 38 O koya e vakabauti Au, me vaka e kaya na ivola tabu, mai vuniyalona e na drodro mai kina na veiuciwai ni wai bula. 39 Ia qo a vakamacalataka tiko kina o Koya, na Yalo Tabu, e dodonu me ra na ciqoma o ira era vakabauti Koya; baleta na Yalo Tabu a sebera tiko ni veisoliyaki baleta o Jisu (Yahshua) a sebera tiko ni vakalagilagitaki.

Joni 7:36-39;

Ia moni veilomani vakataki kemuni, yalomalumalumu ka dau veivosovosoti vakataki kemuni, me vaka sa vosoti kemuni oti tu na Kalou (Elohim) e na vukuna na Mesaia.

Efeso 4: 32

Read The Bible in a Year (Wilika Na iVola Tabu E Na Dua na Yabaki).
Siga (Day)	Tikinisiga (Date)	Mataka (Morning)	Yakavi (Evening)
294	October 21	Jeremiah 5-6	1 Timothy 1

May the Names of Yahweh Elohim of Avraham, Yitzach and Ya'akov be freely published in the world today, so that people will learn that there is only one Elohim called Yahweh (YHWH).

Totogimate O Jisu (Yahshua Sentence to Death.)

Serving for the 8th November, 2008

O Saimoni a vakamuri i Koya toka ga vakayawa mai muri, me yaco sara i na lomanibai na bete levu-liu; qai lai dabe toka vata kei ira na dauniveiqaravi, me vakatakatai koya tiko e na mata ni bukawaqa. 55 O ira na bete levu, kei ira na lewe ni matabose era a vaqara tiko eso na ivakadinadina me beitaki kina o Jisu (Yahshua), me rawa ni ra totogimatetaki Koya kina, ia era qai sega ni kunea e dua. 56 E dina ni levu era a mai beitaki koya tiko, na nodra ivakadinadina a tawayaga. 57 Eso na tagane, qo era ivakadinadina lasulasu, era qai tucake me ra beitaki Koya ni ra kaya 58 “Keimami a rogoci Koya ni kaya, ‘Au na basuraka na valenisoro oqo e bulia na liga, ia e na loma ni tolu na siga Au na tara e dua tale e sega ni bulia na liga!”’ 59 Na ivakadinadina mada ga oqo e tawayaga talega. 60 Sa qai tucake na bete levu-liu e na kedra maliwa, qai tarogi Jisu (Yahshua) ni kaya, “E vakaevei, o na sega beka ni sauma rawa? Na cava mada era beitaki iko tiko kina o ira na tamata qo?” 61 Ia o Jisu (Yahshua) a tu vakanomodi tu ga, ka sega ni kaya e dua na ka. E baci tarogi Koya tale na bete levu-liu “O iko beka na Mesaia, na Luvena o Koya e dau Rokovi?” 62 Sauma o Jisu (Yahshua), “O Au ga; ia qo oni sa vakarau raica na Luve ni Tamata ni dabe toka e na ligana imatau o Koya na Kaukaua, kei na nona lako mai e na dela ni o ni lomalagi.” 63 E qai basuraka na nona isulu na bete levu-liu qai kaya, “Na ivakadinadina cava tale eda vinakata? 64 “Oni sa rogoca na veivakacacani mai gusuna sara ga o Koya; Na cava oni sa lewa?” Era qai lewa kece ni cala o Koya, ka dodonu me totogimate. 65 Eso vei ira na tamata era qai tekivu kasivita na matana, era ubia na Matana, ka mokuta na uluna, me ra qai kaya Vua, “Parofisai”; o ira na sotia era qai sabalaka na kesuna.
Marika 14: 55-65





Also Read If Possible (Wilika Talega Ke Rawa)
Exodus 20:16; Daniel 7:13-14; Mathew 26:59-67; Luke 23:63-71;

John 18:19-24.

Cakitaki O Jisu E Na Dua Na iRegu (Yahshua Betrayed With A Kiss).

Serving For the 7th November, 2008

Ia ni se vosa tikoga o Koya, raica, era sa tu e dua na ibinibini tamata levu; o koya e vakatokai o Jiuta, e dua vei iratou na le tinikarua e a liutaki ira tiko mai; e toso volekati Jisu (Yahshua) sara o koya qai reguci Koya. Qo na ivakatakilakila a solia vei ira, “O koya au reguca, qori o Koya. 48 Kaya vua o Jisu (Yahshua), “Jiuta, o mai solia laivi na Luve ni Tamata e na dua na iregu?”
Luke 22:47-48

Era sa qai vesuki Koya, era qai kauti Koya i nona vale na bete levu-liu. O Saimoni e a vakamumuri tikoga mai muri. 55 Era a vakatubura e dua na bukawaqa e na lomadonu ni rara ni matanivale, era qai dabe wavokita toka; o Saimoni a lai dabe toka e na kedra maliwa. 56 Ia e dua na goneyalewa, ni raici koya ni dabe toka e yasa ni bukawaqa, e a dikevi koya qai kaya, “Na tamata qo a dau tiko talega kei Koya.” 57 Ia qai cakitaka o koya ni kaya, “Yalewa, Au sega ni kilai Koya.” 58 Ni oti tale vakalailai, e a raici koya yani e dua tale qai kaya vua, “O iko o dua talega vei ira!” Ia qai kaya o Pita, “Tagane, au sega ni dua vei ira.” 59 Ni sa sivi oti e dua na aua, e dua tale a qai ba mai ni kaya, “E dina ga, o koya qo e dua talega vei ira, baleta o koya e kai Kaleli!” 60 Ia qai kaya o Pita, “Tagane, au sega ni kila na ka o kaya tiko!” E na gauna vata oqori, ni se vosa tiko o koya, ni a tagi na tamatama ni toa. 61 Vuki sara na Turaga (Master) me raici Pita. Ia o Pita sa qai nanuma na vosa ni noda Turaga (Master) ni a kaya vua o Koya, “Ni sebera ni tagi na tama ni toa, o sa na cakitaki Au vakatolu.” 62 E curu ga i tuba o Saimoni, qai lai rubica na tagi ni vutugu.
Luke 22:54-62







Also Read If Possible (Wilika Talega Ke Rawa)
Psalms 42; Matthew 26:47-56, 69-75; Mark 14:43-53, 66-72;

John 18:2-12, 25-27.

Na iCaba Tawa Vakabauta (The Friends Who Did Not Believe)

Congratulations to Barak Obama, Joe Biden and the U.S. Democratic Party for winning the US Presidential Election

Serving for the 6th November, 2008

Kaya vei iratou o Jisu (Yahshua) “O kemudou kece dou na cakitaki au e na bogi nikua; ka ni volai tu, ‘Au na mokuta na i vakatawa ni sipi, era na qai veidroyaki na nona sipi.’ 28 “Ia Niu sa vakaturi oti, Au na liu vei kemudou i Kaleli ”. 29 Kaya Vua o Pita, “Kevaka me ra drovaki Kemuni kece o ira qo, o au ga, au na sega ni dro.’ 30 Kaya vua o Jisu (Yahshua), “Na ka dina Au kaya vei iko, nikua e na bogi ga oqo, ni sebera ni tagi vakarua na tamanitoa, o sa na cakitaki Au oti vakatolu.” 31 Ia qai kaya eso tale na ka o koya, “Kevaka mada ga meu vaka­matei vata kei Kemuni, au na sega ga ni cakitaki Kemuni, o Kemuni na noqu Turaga (Master).” O ratou kece na tisaipeli a tautauvata, na vosa eratou dui kaya. 32 Oti eratou qai yaco i na vanua e vakatokai o Kecisimani; sa qai kaya o Koya vei iratou na Nona tisaipeli, “Dou toka eke Meu lai masu!” 33 E qai kauti ratou o Pita, o Jemesa vata kei Joni, oti sa qai tekivu me tuburi Koya na lomabibi kei na yaluma. 34 E kaya sara vei iratou o Koya, “Na vuniyaloqu sa lomabibi dina vakalevu e na yaluma, kau sa rawa ni mate kina. Waraki au, dou kua ni moce.” 35 Sa qai toso vakalailai i liu o Koya, lutu sobu i dela ni qele, qai masulaka kevaka e rawa, me kau laivi mai Vua na tikinigauna sa roro tiko mai. 36 A kaya o Koya, “Aba, Ave I Tamada na Tamaqu, oni rawa ni cakava na veika kece; cakava me kau laivi mai vei au na bilo oqo; ia me kua ni yaco na noqu gagadre, me yaco ga na Nomuni.” 37 Ni lako mai o Koya, qai raici iratou ni ratou sa dui moce no, qai kaya vei Pita, “Saimoni, o sa moce talega? O sega ni rawa ni yadra tiko me dua na aua? 38 “Yadra, masulaka mo kakua ni temaki. Na yalo e dina ni vinakata ka sa vakarau, ia na yago ga sa gogo.”
Marika 14:27-38




Also Read If Possible (Wilika Talega Ke Rawa)
Zechariah13:7; Mark 14:26-42; Luke 22:31-46; John 13:36-38

Na iVakayakavi Ni Turaga (The Last Supper)

Dedicated to the People of the United States of American who

have been voting for a New President

Serving for the 5th November, 2008

E dua vei iratou na le tinikarua, oya o Jiuta mai Isikarioti, a qai lako vei ira na bete levu, 15 qai kaya, “Na cava oni na solia vei au meu rawa ni soli i Koya kina vei kemuni?” Era qai yalataka vua e tolusaga­vulu na tikitikini siliva. 16 Me tekivu mai keya, sa vaqaqara sala tiko o koya, me soli i Koya laivi kina. 17 Ia e na imatai ni siga ni Solevu ni Madrai Sega ni Vakaleveni, e ratou a lako mai vei Jisu (Yahshua) na tisaipeli, eratou qai kaya Vua “Evei beka Oni vinakata me keitou lai vakarautaka­, Moni na lai kania kina na Lakosivia.” 18 Kaya o koya, “Lako i na korolevu, vua e dua na tagane, qai kaya vua, ‘Na neitou Turaga (Master) e kaya, “Na noqu gauna sa roro mai, Au na vakananuma na Lakosivia kei ratou na Noqu tisaipeli, e nomu vale”’” 19 Rau mani vakayacora na tisaipeli na ka e vakarota vei rau o Jisu (Yahshua), rau qai vakarautaka na Lakosivia. 20 Ni sa yakavi, sa dabe sobu o Koya kei iratou na le tinikarua. 21 Ia ni ratou sa kana tiko sa qai kaya, “Na ka dina Au kaya vei kemudou, e dua ga vei kemudou e na soli i Au laivi.” 22 Eratou a rarawataka vakalevu qori, ka ratou mani tekivu tarogi Koya yadu­dua, “Noqu Turaga (Master), e vakaevei, o au beka?” 23 Sauma o Koya ni kaya, “O koya e a tonia vata kei Au na ligana e loma ni dari e na soli i Au laivi. 24 “Na Luve ni Tamata, e na lako ga, me vaka e volai tu me baleti Koya, ia na leqa levu e na colata na tamata, e na solia laivi na Luve ni Tamata. A vinaka cake vua na tamata oqori, me a kua ga ni sucu.” 25 Ia o Jiuta na daunica, o koya e na qai soli i Koya laivi, a qai sauma ni kaya “Turaga (Master), De o au beka?” tukuna vua o Jisu (Yahshua), “O iko o kaya mai.”
Maciu 26:14-25

Also Read If Possible (Wilika Talega Ke Rawa)
Psalm 41:9; Proverbs 11:13; Mark 14:10-25; Luke 22:3-23; John 13-17.

Na Vosa Vakatautauvata Me Baleta Na Veivaini. (The Parable of the Vineyard)

The Serving for the 4th November, 2008

Oti qai tekivu me tukuna vei ira na tamata, na vosa vakatautauvata oqo: “E dua na tamata e a tea e dua na loganivaini, lisitaka vei ira na na tamata cakacaka, qai lako e na dua na ilakolako, me dua na gauna balavu. 10 “Ia e na gauna ni tata­musuki, a qai tala e dua na nona dauniveiqaravi vei ira na tamata cakacaka me ra solia mai vua na vuata mai na loganivaini. Ia o ira na tamata cakacaka era qai mokulaki koya, oti era qai vakatalai koya me lesu lala. 11 “Oti a baci tala e dua tale na nona daunivei­qaravi; ia era qai mokulaki koya talega, vakamadualaki koya, era qai vakatalai koya me lesu lala. 12 “E baci tala yani e dua tale me kena ikatolu; ia era vakamavoataki koya, oti era qai talaci koya laivi. 13 “Sa qai kaya na itaukei ni vei­vaini, ‘Na cava beka meu cakava? Au na tala na luvequtagane daulomani. De dua era na raici koya era qai madua.’ 14 “Ia ni ra raici koya o ira na tamata cakacaka, era qai veinaki vakataki ira, ni ra kaya, ‘O koya qo na itaukei vakaiwasewase. Mai, meda vakamatei koya, me rawa ni noda na nona iwasewase vakaitaukei.’ 15 “Era qai kauti koya laivi mai na loganivaini ka vakamatei koya. Na cava beka sa na cakava na itaukei ni loganivaini vei ira qo? 16 “E na lako mai o koya, vakamatei ira na tamata cakacaka qai solia na vei logavaini vei ira tale eso”. Ia ni ra rogoca oti qori, era qai kaya vata kece, “Qo e na sega vakadua ni yaco!” 17 Sa qai raici ira tu o Koya, qai kaya, “Ia na cava ga oqo e volai tu: ‘Na vatu era a besetaka na dautara vale, a qai yaco me ulu ni ivakadei e na tutu ni vale’? 18 “O koya e lutu i na dela ni vatu oqori, e na kavoro, ia o koya e lutuki koya na vatu oqori e na kavurumemea.” 19 O ira na bete levu kei ira na vunivola, era a vinakata sara ga me ra tarai koya e na gauna vata qori, ia era a rerevaki ira na tamata; era a kila vinaka ni a kaya na vosa vakatautauvata oqo o koya, me baleti ira.
Luke 20:9-19




Also Read If Possible (Wilika Talega Ke Rawa)
Psalms 118; Matthew 21:33-46; Mark 12:1-12

Curu Vakatui O Jisu. (Yahshua’s Royal Entrance)

Serving for the 3rd November, 2008

Ni sa yaco yani i Pecivaiqi kei Pecani, e na yasa ni ulunivanua e vakatokai Na Vanua ni Veiolive, a qai tala o Koya e rua vei iratou na Nona tisaipeli, 30 ni kaya vei rau, “Lako i na koro e tu donui kedatou tu mai oya; ia ni drau curu yani, drau na raica e dua na luveni asa ni vesu tu kina, e sebera ni dua na tamata sa bau vodoka; drau sereka, drau tuiya mai i ke. 31 “Ia ke dua e tarogi kemudrau, ‘Na cava drau sereka tiko kina?’ drau qai kaya ga vaka oqo, ‘Na Turaga (Sovereign) e e vinakata’.” 32 O rau na talai, rau a qai raica na ka kece, me vaka a tukuni vei rau. 33 E na gauna rau sereka tiko kina na luveni asa, a qai tarogi rau o kena itaukei, “Na cava drau sereka tiko kina na luveni asa?” 34 Rau kaya, “Na neirau Turaga (Sovereign) e vinakata.” 35 Rau qai kauta vei Jisu (Yahshua); rau kolo na nodrau isulu e na dakuni luveni asa, rau qai vakavodoki Jisu (Yahshua) kina. 36 Ia ni sa toso tiko yani o Koya, era qai tevuka tiko na nodra isulu e dela ni gaunisala. 37 E na gauna eratou sa volekata kina na baba ni Vanua ni Veiolive, o ira kece na ibinibini tisaipeli era qai kaikaila tiko e na mamarau kei na vakavinavinaka Vua na Kalou (Elohim), e na domo levu, e na vuku ni cakacaka lelevu era sa raica, 38 ni ra kaya, “‘Me kalougata na Tui e lako mai e na yaca ni TURAGA (Yahweh)’ Na sautu me yaco mai lomalagi ka me lagilagi e na cecere cecekia.” 39 Eso na Farisi era tiko e na kedra maliwa na le vuqa era qai kaya Vua, “Vakavuvuli vosataki ira na Nomu tisai­peli.” 40 Ia qai sauma o Koya ni kaya vei ira “Au kaya vei kemuni, kevaka me ra vagalui o ira qo, na veivatu era na kaila cake.”
Luke 19:29-40




Also Read If Possible (Wilika Talega Ke Rawa)
Psalm 118; Matthew 21:1-9; Mark 11:1-10

Lumuti O Jisu Ni Voleka Na Nona Veibulu. (Yahshua Anointed Prior To His Death)

Serving for the 2nd November, 2008

Ni vo sara e ono na siga me yaco na Lakosivia, a qai lako o Jisu (Yahshua) i Pecani, i na korolevu nei Lasa (Lazar) na turaga a vakatura o Koya mai na mate. 02 Era a qai vakayacora Vua e dua na kana magiti e keya; a vakarau kakana o Maca, ia o Lasa a bau dua vei ira na kana tiko vata kei Koya. 03 O Meri (Miriam), e a taura mai e dua na kuro sa tawa tiko mai loma na waiwai narita makare sau levu, qai mai lumuta kina na yava i Jisu (Yahshua), oti qai qua e na drauniuluna; e a kuvuraki tu e lomanivale taucoko na iboi totoka ni waiwai. 04 O Jiuta mai Isikarioti, e dua vei iratou na nona tisaipeli, a sa vakarau tiko me na soli i Koya laivi, a qai kaya, 05 “Na cava a sega ni volitaki kina na waiwai boi totoka qo, e na isau e tolu na drau na peni, me qai soli vei ira na dravu­dravua?” 06 Qori a kaya o koya, sega baleta ni galeleti ira na dravudravua, ia baleta ga ni tamata butabutako, ka dau tiko vua na kato ni ilavo; ka dau kauta na cava ga e biu kina. 07 Kaya vua o Jisu (Yahshua), “Laivi koya tu ga; e a maroroya tiko mai oqori o koya, me baleta na Noqu veibulu. 08 “O ira na dravudravua era na dau tiko vata voli ga kei kemuni e veigauna, ia o Au, oni na sega ni tiko vata kei Au e veigauna.” 09 E levu vei ira na Jiu era rogoca ni sa tiko e keya o Koya, era qai lako yani, sega walega e na vuku i Jisu (Yahshua), ia me rawa talega ni ra raici Lasa, o koya e a vakatura o Koya mai na mate. 10 O ira na bete levu era sa nanuma tiko me na vakamatei talega o Lasa, 11 baleta e na vukuna sara ga, e levu na Jiu era sa toso tiko yani kina me ra vakabauti Jisu (Yahshua).
Joni 12:1-11








Also Read If Possible (Wilika Talega Ke Rawa)
Psalms 16:9-11; Matthew 26:6-13; Mark 14:3-9; Luke 7:36-50; John 11

Sikova E Dua Na Tamata iValavala Ca O Jisu (Yahweh Visits a Sinner).

Serving for the 1st November, 2008

Ia ni sa curu yani i Jeriko o Jisu (Yahshua), me takosova na lomanikoro. 02 E dua na tamata a tiko mai keya, na yacana o Sakai, e vutuniyau ka iliuliu vei ira na dau kumuni ivakacavacava; 03 A segata tiko o koya me raica se o cei o Jisu (Yahshua), ia qai sega ni rawa baleta na osodrigi ni tamata, baleta o Sakai a bulicaki lailai toka ga. 04 Sa mani cici o koya, me liu vei Jisu (Yahshua), qai lai kaba toka mai e na dua na vunilolo e sega na drauna, me rawa ni raici Koya, ka ni na taubale sivia na vanua oya o Koya. 05 Ia o Jisu (Yahshua), ni yaco yani e na vanua oya qai rai cake, raici koya, qai kaya vua, “Sakai, vakatotolo siro sobu mai, baleta nikua e vinakati meu na lai tiko e nomu vale.” 06 E totolo sara na nona siro mai i ra o koya, qai kidavaki Koya e na yalomarau. 07 Ia ni ra raica kece qori, era qai vosa kudru­kudru ni ra kaya, “Sa curu o koya me lai tiko e na nona vale e dua na tamata ivalavala ca.” 08 Tu sara o Sakai qai kaya vei Jisu (Yahshua), “Raica, noqu Turaga (Master), na veimama ni noqu iyau au na solia vei ira na dravudravua; kau na sausaumi lesu vei ira kece na tamata au a taura mai vei ira vakalawaki ca na nodra iyau.” 09 Kaya vua o Jisu (Yahshua), “Nikua na bula sa lako mai i na vale oqo, baleta o koya talega e dua na luvei Eparayama; 10 baleta na Luve ni Tamata a lako mai me mai vaqarai ira ka vueti ira era se yali tu.”
Luke 19:1-10

Ia me vaka ni kena ituvatuva, na tamata e na mate taumada vakadua, oti e na qai muri mai na siga ni lewa, 28 na Mesaia talega, e a vakacabori cake vakadua ga me colata na ivalavala ca ni lewe vuqa; me qai rawa kina e na ikarua ni Nona lako mai, me lako mai, sega e na vuku ni noda ivalavala ca, ia me mai veivakabulai ga vei ira era vakasaqarai koya tiko.
Iperiu 9:27-28






Read Also If Possible (Wilika Talega Ke Rawa)
Ezekiel 34:7-16; Mark 2:14-17; Luke 7:36-47

NB: Sakai na ivakavakadewa ni yaca vakaIperiu. E na vosa vaKirisi e vakayagataki na yaca Sakaraia.

Na iYau Mai Lomalagi (The Treasure in Heaven)

Serving For the 31st October, 2008

Ia, e dua na iliuliu a qai tarogi Koya ni kaya, “Vakavuvuli vinaka, na cava beka meu cakava, meu rawata kina vakaitaukei na bula tawamudu?” 19 Kaya vua o Jisu (Yahshua), “Na cava o vakatokai Au kina Niu vinaka? E sega ni dua e vinaka, vakavo ga e Dua, oya na Kalou (Elohim)!” 20 O iko o sa kila na ivakaro; ‘Kakua ni laba’, ‘ Kakua ni veidauci’, ‘Kakua ni butako’, ‘Kakua ni veibeitaki vakailasu’, ‘Dokai rau o tamamu kei tinamu?’ 21 Kaya vua o koya, “Na ka kece oqori au a dau vakamuria, mai na gauna au se gone lailai kina.” 22 Ia o Jisu (Yahshua) ni rogoca qori, e qai kaya vua, “E se leqa tiko vei iko e dua na ka. Volitaka na ka kece e nomu, veivotayaka vei ira na dravu­dravua me tu na nomu iyau mai lomalagi; oti qai lako mai, mo mai muri i Au.
23 Ni rogoca qori o koya, e a yalorarawa kina vakalevu, baleta o koya e dua na tamata vutuniyau. 24 Ia ni raica o Jisu (Yahshua) ni sa bikai koya na rarawa, a qai kaya tale, “Sa dredre dina ga vei ira era vakaiyau, me ra curu i na matanitu ni Kalou (Elohim)! 25 “E na rawarawa cake me vakacurumi na dali vuti ni kameli i na mata ni icula, e na dredre vua e dua na tamata vutuniyau me curu i na matanitu ni Kalou (Elohim).” 26 O ira era rogoca qori era qai taroga, “O cei ga e na rawa ni vakabulai?” 27 Sauma o Jisu (Yahshua), “Na ka kece e sega ni rawa vua na tamata, e rawa vua na Kalou (Elohim).” 28 Kaya o Pita, “Raica, keitou sa biuta tu yani na ka kece, me keitou muri i Kemuni.” 29 Sauma vua Jisu (Yahshua), “Na ka dina, Au kaya vei kemudou, e sega ni dua e biuta tu yani na nona vale, se nona itubutubu, se tacina, se watina, se o ira na luvena e na vuku ni matanitu ni Kalou (Elohim), 30 “e na sega ni ciqoma vakalevu e na gauna oqo vata kei na itabagauna e sebera mai na bula tawamudu.”
Luke 18:18-30.




Also Read If Possible (Wilika Talega Ke Rawa)
Exodus 20:12-16; Deuteronomy 5:16-20; Matthew 19:16-30;
Mark 10:17-31; 1 Corinthians 13:3.

Na iVakavuvuli Nei Jisu Me Baleta Na Vakamau Kei Na Veibiu (Yahshua’s Teaching About Marriage)

Serving for the 30th October, 2008

O ira talega na Farisi era qai lako yani vua me ra lai vakatovolei Koya, era qai tarogi Koya, “E dodonu beka vakalawa vua e dua na tagane me biuti watina, e na dua ga na iulubale e rawa?” 04 Sauma qori o Koya ni kaya vei ira, “Oni se sega beka ni wilika ni o Koya e a buli i rau mai na ivakatekivu, ‘a buli rau me dua e tagane, ka dua e yalewa,’ 05 qai kaya, ‘Oqo na vuna, me biuti tamana kina kei tinana e dua na tagane me lai vakaduavatataki vei watina yalewa, me rau sa ledua ga vakayago’? 06 “Me tekivu mai na gauna oya, rau sa sega ni lerua tale tiko, rau sa duavata vakayago; ia na ka sa semata vata na Kalou (Elohim), na tamata me kakua ni tawasea” 07 Era baci tarogi Koya tale, “Ia na cava ga qai vakarota kina o Mosese, me solia ga e dua na ivolasui ni sere, oti qai biuti watina laivi?” 08 Sauma o koya vei ira, “O Mosese, ni nanuma na babamatua ni vuniyalomuni, a vakadonuya vei kemuni moni sere mai vei watimuni, ia mai na ivakatekivu, qori a sega ni dau vaka kina. 09 “Au kaya vei kemuni, ni o koya e biuti watina me rau sere, vakavo ke tiko na veibeitaki ni veidauci, me lai vakamau kei na dua tale e cala e na veidauci; ia o koya e vakamautaki koya e veibiu mai, e cala talega e na veidauci.” 10 O ratou na Nona tisaipeli e ratou qai kaya Vua, “Kevaka e vereverea tu vaqori na leqa e na kedra maliwa na tagane kei na yalewa, sa na vinaka ga me kua na vakamau!” 11 Kaya vei iratou o Koya, “Na vosa qo e sega ni kovuta na tamata kece, ia vei ira ga era coko tiko e loma. 12 “Era tu o ira era iunuku (eunuch) mai ketei tinadra; ka tu eso era iunuku baleta a caka vakatamata me ra iunuku, ka tiko eso era na sega ni vakamau, ka tu o ira na iunuku era nakita vakataki ira me ra iunuku e na vuku ni matanitu vakalomalagi. O koya e rawa ni ciqoma, qori sa rauta.”
Maciu 19:3-12.

Also Read If Possible (Wilika Talega Ke Rawa)
Genesis 1:27; 2:24; Deuteronomy 24:1-4; Malachi2:13-16;

Mark 10:2-12; Luke 16:18.

Veivakabulai E Na Siga Ni Vakacecegu O Jisu (Yahshua Heals During The Shabbat)

Serving For the 29th October, 2008

Ni veivakatavulici tiko o Jisu (Yahshua) e na dua na valenisoro e na siga ni vakacecegu; 11 raica, e dua na marama a tiko kina, sa tinikawalu na yabaki na kena tiko vua e dua na mate ni sui, ka sa kalobi tu vakaca na yagona, sa sega tu kina ni duri cake rawa vakadodonu. 12 Ia ni raici koya o Jisu (Yahshua), e a kacivi koya qai kaya vua, “Yalewa o sa vakabulai mai na kemu mate!” 13 E tabaki koya e na Ligana, qai duri cake vakadodonu e na gauna vata oya, ka vakavinavinaka vua na Kalou (Elohim). 14 Ia na ivakatawa ni valenisoro a leva­taka na ka a yaco qo, baleta ni a veivakabulai e na siga ni vakacecegu o Jisu (Yahshua); qai kaya vei ira na le vuqa, “E ono na siga e dodonu me cakacaka kina na tamata; e dodonu ga moni lako mai e na veisiga oqori moni mai vakabulai, ia me kakua ga e na siga ni vakacecegu.” 15 Sauma vua o Jisu (Yahshua) ni kaya, “Oilei na dauveivakaisini! O kemuni yadudua, oni sega beka ni dau sereka na nomuni bulumakau se asa mai na nodra vanua ni kana, e na siga ni vakacecegu, moni tuiyi ira me ra lai gunu? 16 “O koya oqo na luvei Eparayama yalewa, ia raica na dauniveisaqa sa vesuki koya tu me tinikawalu na yabaki; e sega beka ni dodonu ga me sereki mai na ivau oqo e na siga ni vakacecegu?” 17 Ia ni kaya oti na veika oqori, o ira kece era dau saqati Koya era qai tini madua; ia o ira na tamata era a marautaka vakalevu na veika lagilagi sa vakayacora tiko e ligana.
Luke 13:10-17.

Also Read If Posible (Wilika Talega Ke Rawa)
Exodus 20:8-11; Matthew 12:1-14; John 5:1-18 Luke 6:1-11; 14:1-6;

Mark 2: 23-3:3.

Taleitaki Ira na Lalai O Jisu (Yahshua Loves Little Children)

Serving for the 28th October, 2008

Oti, qai tubu e dua na veileti e na kedratou maliwa se o cei e cecere duadua e na kedratou maliwa. 47 Ia o Jisu (Yahshua) a siqema na vakasama ni vuniyalodratou qai kauta mai e dua na gone lailai, cakava me duri tu e Yasana, 48 qai kaya vei iratou, “O ira kece era ciqoma e dua na gone lailai vakaoqo e na vukuni Yacaqu, e ciqomi Au; ia o koya e ciqomi Au, e ciqomi Koya e a talai Au mai. Baleta o koya e lolovira duadua e na kemudou maliwa, e na yaco me cecere duadua.”
Luke 9:46-48.

Oti era qai kauti ira mai na gone lalai Vua, me mai tabaki ira o koya; ia o ratou na tisaipeli, ratou qai vosataki ira era kauti ira tiko mai. 14 Ni raica qori o Jisu (Yahshua), e a sega ni taleitaka, qai kaya vei ira, “Laivi ira na gone lalai me ra lako mai vei Au, kakua ni tarovi ira; baleta na matanitu ni Kalou (Elohim) e nodra o ira na mataqali vaka oqo. 15 Na ka dina Au kaya vei kemudou, o koya e sega ni ciqoma na matanitu ni Kalou (Elohim) me vaka e dua na gone lailai, e na sega ni curu kina.” 16 E qai keveti ira o Koya, tabaki ira e na Ligana, qai vakalougatataki ira.
Marika 10:13-16.


E na tikinigauna oqori, e a curumi Jisu (Yahshua) kina e dua na marau e na Yalo Tabu qai kaya, “Au vakavinavinaka vei Kemuni Tamaqu, Kalou (Sovereign) kei lomalagi kei vuravura, ni Oni vunitaka na veika oqo mai vei ira na vuku kei ira na qaseqase, Oni qai vakaraitaka ga vei ira na gone dramidrami; io, Tamaqu, baleta ni talei e Matamuni! 22 Oti qai vuki vei iratou na nona tisaipeli qai kaya, “Na ka kecekece sa nuitaki oti tu vei Au, maivei Tamaqu, ka sega ni dua e kila se o cei na Luvena, vakavo ga o Tamana; e sega talega ni dua e kilai Tamana vakavo ga o Luvena, vata kei koya e digitaka o Luvena me vakatakilai Koya vua.”
-Luke 10:21-22.

Also Read If Possible (Wilika Talega Ke Rawa)
Psalms 127:3-5; Matthew 18:1-14; 19:13-15;
Mark 9:33-37; Luke 18:15-17.

Vakatavulica Na iWalewale Ni Masu O Jisu (Yahshua Teaches A Prayer Methodology

Serving for the 27th October, 2008.

A qai yaco ni a masu tiko o Koya e na dua na vanua, e na gauna me tinia kina na Nona masu, ni dua vei iratou na nona tisaipeli a qai mai kaya Vua, “Neitou Turaga (Master), vakatavulica vei keitou na masu, me vaka a cakava o Joni vei ira na nona tisaipeli.” 02 Kaya vei iratou o Jisu (Yahshua), ‘Ni dou sa masu, masu vaqo: Tamai keimami mai lomalagi, Me vakarokorokotaki na Yacamuni. Na nomuni matanitu me yaco mai. Na Nomuni lewa, me yaco e vuravura me vaka ni dau yaco mai lomalagi. 03 Solia mai na madrai e yaga vei keimami e na veiveisiga. 04 Vosoti keimami e na vuku ni neimami ivalavala ca, baleta keimami dau vosoti ira kecekece era caka ca vei keimami. Kakua ni laiva me keimami curu i na vere, ia vueti keimami ga mai na veika e tawadodonu. 05 Oti sa qai kaya vei ira, “O cei vei kemuni e dua tiko na nona itau, e rawa ni lako vua e na lomaloma ni bogi me lai kerea vua, ‘Noqu itau, solia mada mai vei au e tolu na ibuli, 06 ‘baleta e dua na noqu vulagi e se qai yaco ga mai oqo, mai na nona ilakolako, qai sega ni dua na ka e tu vei au meu vakarautaka vua’; 07 “e na sega beka ni sauma mai loma o koya, ‘Kakua ni vakaogai au; na katuba levu sa sogo, o ratou na luvequ eratou sa tiko qo vata kei au, me keitou moce. Au na sega ni duri rawa tale yani meu lai soli madrai vei iko.’ 08 “Au kaya vei kemudou, e dina ga ni na sega ni duri cake me lai solia vua e dua na ka baleta ni nona itau o koya, ia e na nona cikecike ga e na duri cake mai kina me lai solia na veika cava ga e gadreva. 09 “Au kaya vei kemudou, ‘Kerea e na soli vei iko; vaqara o na kunea, tukituki e na dola vei iko.’
Luke 11:1-9.







Also Read If Possible (Wilika Talega Ke Rawa)
Psalms 89:19-29; Isaiah 9:6-7; Mathew 6:6-13; 7:7-11; Revelation 3:14-22.

Na Vakabauta Lailai Kei Na Cakacaka Levu (Little Faith and Huge Work)

Serving for the 26th October, 2008

Ni ratou yaco yani vei ira na tamata, a qai toro mai Vua e dua na tagane, tekiduru Vua qai kaya,
15 “Noqu Turaga (Master), ni bau lomani au; na luvequ tagane e tauvi koya tiko na manu­manu soni ia sa qai cacalaivi tikoga; sa vakawasoma na nona dau lutu i loma ni buka­waqa ka vakawasoma talega i loma ni wai. 16 “Au mani kauti koya mai vei iratou na Nomu tisaipeli, ia eratou qai sega ni vakabulai koya rawa.” 17 Sauma o Jisu (Yahshua) ni kaya, “Oilei, na itabatamata vaka­bauta lalai, sakasakavakatani; e na vakacava soti na dede ni Noqu tiko vata kei kemuni; e na vakacava na dede ni Noqu vunau tiko vei kemuni? Kauti koya mai ke vei Au.” 18 A qai vosataka o Jisu (Yahshua), qai curu tani mai vua na jimoni; sa qai bula na gone mai na tikinigauna oya. 19 Oti eratou qai lako vei Jisu (Yahshua) ni toka duadua, o ratou na tisaipeli, ratou qai kaya, “Na cava beka keitou a sega ni vakabulai koya rawa kina?” 20 Kaya vei iratou o Jisu (Yahshua), “Baleta ni sega na nomudou vakabauta; na ka dina Au kaya vei kemudou, ke tautauvata kei na sore ni musita na nomudou vakabauta, dou na tukuna vua na ulunivanua oqo, ‘Toso laivi mai keri, e na qai toso; ka na sega ni dua na ka e na rawai kemudou. 21 “Ia na kena mataqali vakaoqo, e sega ni talaci rawa, vakavo ga e na masumasu kei na lolo.” 22 ¶ Ia, e na gauna eratou lesu tiko kina ni ratou takosovi Kaleli tiko, a qai kaya vei iratou o Jisu (Yahshua), “Na Luve ni Tamata sa vakarau volitaki i ligadra na tamata, 23 “era na qai vakamatei Koya, ia e na ikatolu ni siga e na qai vakaturi.” Eratou a rarawa dina kina vakalevu.
Maciu 17:14-23


“E dina e dina na ka Au kaya vei kemudou, o koya e vakabauti Au; na cakacaka Au cakava, e na cakava talega o koya; ia e na cakacaka lelevu cake sara mai na kena sa yaco tiko, baleta Au na lesu tale vei Tamaqu.13 “Na veika cava ga oni kerea e na Yacaqu, qori Au na cakava, me vakalagilagitaki kina o Tamada, e na vukuni Luvena tagane”.
Joni 14:12-13.

Also Read If Possible (Wilika Talega Ke Rawa)
1 Samuel 16:14-23; Mark 9:14-32; Luke 9:37-45; Romans 4:18-21;

Romans 11:1-23; Hebrews 3:16-19

Na Veivakamataliataki (The Transformation)

Serving for the 25th October, 2008

Ni oti e ono na siga, o Jisu (Yahshua) a qai kauti ratou o Pita, o Jemesa kei Joni i na dua na ulunivanua cere, me ratou lai tu vakatikitiki tu kina vakataki ratou; oti qai veisautaka na kena irairai e matadratou. 03 Na Nona isulu e caliva, ka vulavula me vaka na uca cevata, oya na vulavula e sega ni dua na tamata e vuravura e rawa ni cakava. 04 Oti rau qai rairai o Ilaiya vata kei Mosese, ni rau vosa tiko vei Jisu (Yahshua). 05 Kaya o Pita Vua, “Vakavuvuli, e vinaka dina vei keitou ni keitou tiko talega eke; laiva me keitou tara e tolu na vale tabatabanikau, me dua e Nomuni, me dua na nei Mosese, ka dua na nei Ilaiya.” 06 Qo a sega ni kila se cava a kaya tiko, e na ilevu ni nodratou domobula. 07 Oti, qai kovuti ratou e dua na o; qai rogo mai na o oya e dua na domo ni kaya, “Oqo na Luvequ daulomani. Rogoci Koya!” 08 E vakasauri, ni ratou qai veiraiyaki, eratou sa sega ni raica e dua tale, vakavo ga o Jisu (Yahshua), ni tu vata kei iratou. 09 Ia, ni ratou siro tiko mai na ulunivanua, a qai vakaroti ratou o Koya, me ratou kakua ni tukuna vua e dua, na veika ratou a raica, me yacova ni sa vakaturi mai na mate, na Luve ni tamata. 10 Eratou a mani dau vakamuria tiko vakataki ratou na vosa oqo, ia ratou a via kila ga se cava na ibalebale ni vakaturi mai na mate.
Marika 9:2-10

Ia na Vosa a qai yaco me yago, qai mai vakaitikotiko e na keda maliwa, (keitou qai raica na Nona lagilagi, na lagilagi e kune duadua ga Vua e vakatubura na Tamada), ka levu tu Vua na loloma kei na dina.
Joni 1:14



Also Read If Possible (Wilika Talega Ke Rawa)
Exodus 40:33-35; Matthew 17:1-9; Luke 9:28-36; Romans 16: 25-27;

1 Timothy 1:17; Jiuta 24:25

O Cei O Jisu? (Who Is Yahshua?)

Serving for the 24th October, 2008

Ia o Jisu (Yahshua) ni sa yaco i na yasayasa o Sisaria mai Filipai, a qai tarogi ratou na Nona tisaipeli ni kaya, “O cei beka o Au, na Luve ni Tamata, e na nodra nanuma na tamata.” 14 Eratou kaya, “Eso era kaya o Joni na dauveipapitaisotaki, eso o Ilaiya, kei na kena vo o Jeremaia se dua vei ira na parofita.” 15 E kaya tale vei iratou, “Ia vakacava o kemudou, o cei dou kaya ni o Au?” 16 Sauma qori o Saimoni Pita ni kaya, “O Kemuni saka na Mesaia, na Luve ni Kalou (Elohim) bula.” 17 Sauma o Jisu (Yahshua) ni kaya vua, “Me nomu na kalougata Saimoni Para-Jona; baleta na lewe kei na dra a sega ni vakatakila oqori vei iko, ia o Tamaqu ga e vakai­tikotiko mai lomalagi.” 18 “Au na kaya talega vei iko, ni o iko o dua na vatu, ia e na dela ni vatu oqo, Au na tara kina na Noqu lotu; na matamata mai Sheola (Sheol) e na sega ni kinoca rawa. 19 “Au sa na solia vei iko na idola ni matanitu vakalomalagi; na cava ga o vauca e vuravura, e na vauci mai lomalagi, kei na cava ga o sereka e vuravura e na sereki mai lomalagi. 20 Oti, qai vakaroti ratou na Nona tisaipeli, me ratou kakua ni tukuna vua e dua, ni o Koya na Mesaia. 21 Me tekivu mai na gauna oya, o Jisu (Yahshua) sa tekivu me vakaraitaka vei iratou na Nona tisaipeli, ni sa voleka ni lako i Jerusalemi, me lai vakararawataki vaka­levu e ligadra na qase, na bete levu, kei na vunivola, oti me qai vakamatei, ia me na tucake tale e na ikatolu ni siga.
Maciu 16:13-21





Also Read If Possible (Wilika Talega Ke Rawa)
Isaiah 52:14-15; Mark 8:27-33; Luke 9:18-22;
John 6:67-71.

Vakania E Le Limanaudolu O Jisu (Yahshua Feeds Five Thousands)

Dedicated to Diana Whippy and Gabriel Naigulevu who are getting married today.

Serving for the 23rd October, 2008

Ia ni matacake o Jisu (Yahshua), a qai raica na ibinibini tamata levu era sa toso tiko mai Vua, qai kaya vei Filipe o Koya, “Evei beka tou na voli madrai kina me ra na kania o ira qo?” 06 Qo a kaya o Koya me vakatovolei koya kina, baleta o Koya vakataki Koya sa kila tu na ka me na cakava. 07 Sauma Vua o Filipe, “Ke tou volia mada ga ruanadrau na peni (NKJV $50.00) na ibuli madrai, e na sega tikoga ni rauta, ke vinakati me ra wase vakalalai sara o ira kece qo!” 08 E dua vei ratou na tisaipeli; o Adriu na taci i Saimoni Pita, a qai kaya Vua, 09 “E dua na gone tagane lailai e tiko qo, e tiko vua e lima na ibuli madrai-parile, kei na rua na ika lalai ia e na sega na betena e na kedra maliwa na le vuqa. 10 Kaya vei ira o Jisu (Yahshua), “Cakava me ra dabe kece e ra na tamata.” E veico vinaka tu na vanua oya. Era mani dabe kece na tamata, e rauta e limanaudolu na kedra iwiliwili. 11 Taura na ibuli madrai o Jisu (Yahshua), vakavinavinakataka, qai veivotayaka vei ira era sa dabe tu. E vaka kina na ika, e na kena ilevu ga era vinakata. 12 Ia ni ra sa mamau, a qai kaya o Koya vei iratou na Nona tisaipeli, “Soqona mai na meme ni kakana era sa vo tu, me kakua ni dua na tikina e yali.” 13 Eratou mani tomitomi, ratou qai vakasinaita e tinikarua na sova sisinai na vovo ni lima na ibuli madrai-parile, era a vo tu, maivei ira era a kana. 14 Ia o ira na tamata era raica na cakacaka mana a cakava qo o Jisu (Yahshua), era a kaya, “Oqo dina ga na Parofita e kainaki ni na lako mai i vuravura.
Joni 6: 5-14





Also Read If Possible (Wilika Talega Ke Rawa)
Deuteronomy 8:2-3; Matthew 14:13-21; Mark 6:32-44; Luke 9:10-17.

Na Tatawasewase Kei Na iValavala Ca Tabubokoci (Divisions And The Unpardonable Sin)

Serving for the 22nd October, 2008

Era baci sosoqoni tale yani na le vuqa, qai vakavuna qori na nodratou sa sega mada ga ni kana madrai rawa. 21 Ia o ratou na wekana eratou qai rogoca na veika oqo, ratou qai via lai vesuki Koya mai, baleta eratou kaya, ‘O Koya, sa rairai leqa na uluna!” 22 Ia o ira na vunivola era lako sobu mai Jerusalemi era qai kaya, “E tiko Vua o Pielisipapa”; era kuria “E na nodra ravouvou na jimoni, e cemuri ira tiko kina na jimoni o Koya.” 23 Sa mani kacivi ira vata mai Vua, qai vosa vei ira e na vosa vakatautauvata, “E rawa vakacava vei Setani me cemuri Setani?” 24 “Ke dua na matanitu sa tawase tiko vakataki koya, na matanitu oya e na sega ni tudei rawa. 25 “Ke dua na matavuvale e tawase vakataki koya, na matavuvale oya e na sega ni tudei rawa. 26 Ia kevaka e tu o Setani me valuti koya tale vakataki koya, me sa tawase, e na sega ga ni tudei rawa o koya, baleta sa yacova na nona itinitini. 27 “E sega ni dua e curuma rawa na nona vale e dua na tamata qaqa, me lai kovea na nona iyau, vakavo ke vesuka rawa mada na tamata qaqa oya; oti sa na qai rawa ni vakayayana e loma ni nona vale. 28 “Na ka dina Au kaya vei kemuni, na ivalavala ca kece e na vosoti vei ira na luve ni tamata, ka vaka kina na vosa ni veivakacacani cava ga era kaya; 29 ia o koya e vosa vakacacataka na Yalo Tabu, e na sega ni vosoti rawa, baleta sa coko tu e na itotogi e tawamudu o koya; ia qori a kaya o Koya, 30 qori baleta ni ra kaya Vua, “Sa curumi Koya tu e dua na yalo velavela.”
Marika 3:20-30



Also Read If Possible (Wilika Talega Ke Rawa)
Exodus 22:28; Psalms 106:1-37; Matthew 12:22-37; Matthew 13:53-58;

Mark 6:1-6; Luke 11:14-23; Luke 12:10.

Na Vakabauta Kei Na Veivakabulai (Faith and Healing)

Serving for the 21st October, 2008

Ia ni se vosa tiko e na veika oqori vei ira, raica ni a lako yani e dua na iliuliu ni valenisoro, tama vakarokoroko yani Vua qai kaya, “Na luvequ yalewa e se qai ciba wale toka ga qo, ia Moni lako ga mai, Moni mai tabaka na Ligamuni vua, e na qai bula o koya!” 19 E tu sara o Jisu (Yahshua) vata kei ratou na Nona tisaipeli, me ratou lako vata kei Koya. 20 Ia raica ni a lako mai dakuna e dua na yalewa, sa tinikarua na yabaki na nona tauvi turudra balavu tu, qai tara na bele ni Nona kote balavu; 21 baleta a dau kaya voli e lomana, “Kevaka au tara ga na Nona isulu, au na vakabulai vakadua.” 22 A vuki lesu o Jisu (Yahshua), raici koya, qai kaya vua, “Mo yaloqaqa tiko ga Luvequ yalewa; na nomu vakabauta sa vakabulai iko”; e a bula na yalewa oya mai na tikinigauna oqori. 23 Ia ni yaco yani i nona vale na iliuliu ni valenisoro, o Jisu (Yahshua), qai raici ira na matasere kei ira na tamata ni ra kosakosa tiko, 24 qai kaya vei ira o Koya, “Sa bau rauta mada, baleta na goneyalewa e sega ni mate, o koya e moce lutu no ga”; ia era qai dredrevaki Koya. 25 Ia ni sa vagalalataki ira na tamata me ra lako i tuba, sa qai curu i loma o Koya, taura na ligana, a qai tucake na goneyalewa lailai. 26 Na irogo ni ka oqo, a qai tete i na veivanua kece.
- Maciu 9: 18-26;

Ke dua e na kemuni maliwa e rarawa tiko, laivi koya me masu. Ke dua e mamarau tiko, laivi koya me laga same.14 Ke dua e tauvi mate tiko, laivi koya me kacivi ira na qase ni lotu, qai laivi ira me ra masulaki koya, ni ra lumuti koya tiko e na waiwai, e na yaca ni noda Turaga (Master). 15 Na masu ni vakabauta e na vakabulai ira na tauvi mate, ia na Turaga (Yahweh) e na qai vakaturi koya cake; ia ke a vakayacora na ivalavala ca o koya, qori era na vosoti vua. 16 Vakatusa na nomuni caka ca e na kemuni maliwa, ka dau veimasulaki vakataki kemuni, me rawa ni oni vakabulai. Na mana ni nona masu vagumatua na tamata yalododonu e vakaitamera.
- Jemesa 5: 13-16

Also Read If Possible (Wilika Talega Ke Rawa)
Habakuk 2:4; Matthew 9:27-30; Mark 5:21-43; Luke 7:1-10, 36-50, 40-56;

Luke 17:11-19; Luke 18:35-43.