Vakadonui Jope na Kalou. (Yahweh Accepts Job)

Serving for the 4th February, 2008

Sa qai sauma o Jope vua na TURAGA (Yahweh): 02 “Au kila ni oni rawa ni cakava na ka kecekece; e sega ni dua na nomuni vakananavu, me na tarovi rawa.” 03 ‘O cei qo e vakabutobutotaka na noqu lewa, ka sega ni kune vua na vuku,’ Qori au qai kaya kina ni sega ni kila e dua na ka; na veika totoka vakaoti e sega ni yacova na noqu kilaka. 04 ‘Vakatudaliga niu sa na vosa vei iko; Au na vakatarogi iko, mo na sauma mai vei au’
05 A sa rogoci kemuni oti na daligaqu ia qo sa qai raici kemuni na mataqu. 06 O koya oqo au sa sevaki au kina vakataki au, kau na veivutuni e na kuvu ni soso kei na dravusa.” 07 Ia ni sa vosa oti vei Jope na TURAGA (Yahweh), sa qai vosa vei Elifasi na kai Temani, “Au sa bau cudruvi kemudou sara ga vakalevu, o iko vata kei rau na nomu i tau, baleta ni dou a sega ni kaya tiko na ka dina me baleti Au, me vaka e a cakava o Jope na noqu dauniveiqaravi. 08 Au vinakata mo dou kauta e vitu na bulumakau kei na vitu na sipi tagane, dou qai lako vua na noqu dauniveiqaravi o Jope, mo dou lai vakacabora e dua na i soro kama e na vukumudou. E na qai masulaki kemudou o Jope na noqu dauniveiqaravi, kau na vakadonuya na nona vakatamamasu; au na qai sega kina ni vakayacora vei kemudou na ka e veiraurau kei na nomudou lialia. Dou a sega ni kaya tiko na ka dina me baleti Au, me vaka e a cakava o Jope na noqu dauniveiqaravi.” 09 Eratou sa mani lako o Elifasi na kai Temani kei Pilitati na luve i Sua, kei Sofa na kai Neama, me ratou lai cakava na veika sa vakarota vei iratou na TURAGA (Yahweh), e a qai vakadonuya na vakatamamasu nei Jope na TURAGA. 10 Ni sa masulaki ratou oti na nona i tau o Jope, sa qai vakavutuniyautaki koya tale na TURAGA (Yahweh), ka solia vua me vakaruataki na veika a dau taukena tu eliu.
- Jope 42:1-10

Also Read If Possible
Psalm 17, 37, Matthew 5:1-6, James (Yakub) 5:11

Vosa vei Jope na Kalou. (Yahweh Speaks To Job)

Serving for the 3rd February, 2008

Sa qai sauma vei Jope na TURAGA (Yahweh) mai na covulaca, ni kaya; 02 “O cei qo e vakabutobutotaka tiko na noqu lewa, e na vosa e sega ni kune kina na vuku? 03 Vakavakarau mo tu mai vakatagane baleta au sa na vakarau vakatarogi iko, ia mo na sauma mai vei au. 04 “O a tu mai vei e na gauna au a vakotora kina na yavu kei vuravura? Tukuna mai vei Au kevaka o kila? 05 O cei e a virikotora na kena i vakarau, kevaka o kila! O cei e a vakadreta tu na kena dali ni vakavakarau? 06 E dabe toka e na cava na kena yavu? O cei e a vakotora na kena tutu; 07 ni ra laga sere vata tiko na kalokalo volasiga, ka ra kaila tiko e na reki o ira kece na luve ni Kalou (Elohim)?
- Jope 38:1-7


E vosa tale vei Jope na TURAGA (Yahweh) ni kaya, 02 “E rawa beka vei koya e veileti tiko kei Koya sa Kaukauwa, me na vakadodonutaki koya? Laivi koya e vunauca tiko na Kalou (Eloah) me vosa cake.” 03 Sa qai vosa cake vua na TURAGA (Yahweh) o Jope, 04 “Raica Au sega, sega sara ga ni dua na ka, e na rawa vakacava meu saumi kemuni? Au sa na tabonaka na gusuqu e na ligaqu, 05 Au sa vosa oti vakadua, ia e sega vei au na i sau ni taro. io sa vakarua, au sa na sega ni vosa tale. 06 Sa qai vosa tale vei Jope na TURAGA (Yahweh), mai na covulaca, ka kaya, 07 “Vakavakarau mo tu mai vakatagane, Au sa na vakatarogi iko mada ia mo na sauma mai vei au, 08 “O via vakatawayagataka beka na noqu lewa? O na vakacalai Au beka, mo dodonu kina o iko?”
- Jope 40:1-8



Also Read These If Possible
Psalm 30, Job 38-41, Habakuk 1: 1-2:1, Romans 9-10

Ba o Jope ni Sega ni Cala (Job Argued That He Has Not Sinned)

Serving for the 2nd February, 2008

Sa qai sauma o Jope, 02 “E na vakacava na dede ni gauna, dou na vakararawataki au tiko kina, ka qaqilaki au tiko e na nomudou vosa. 03 Sa vakatini na nomudou vosa vakacacataki au tiko, dou sega ni bau madualaka na nomudou saqati au tiko mo dou tamata vulagi vei au? 04 Ia ke mani dina niu butu cala tiko, ia laiva na noqu cala me noqu ga o au vakataki au. 05 Ke dina ni dou via vakalevulevui kemudou cake mai vei au, e na nomudou vakaraitaka vei au na noqu cala, 06 Ia mo dou kila qo ni sa vakacalai au tiko na Kalou (Eloah), ka sa viribaiti au tu e na Nona lawa. 07 Raica, e dina niu sa qolouvaka tiko, ‘E sega na noqu cala,’ ia au sega ga ni rogoca me dua e tama mai; au sa kaci veivuke tiko, ia e sega ni tau mai e dua na lewa.”
- Jope 19:1-7


E baci tosoya tale na nona i vakamacala o Jope, 02 “Me vaka ni bula dina tiko na Kalou (El), o Koya e sega ni via vakatauca na nona lewa e na vukuqu, O Koya e Kaukauwa, ka sa mai vakavuna qo meu tovolea mada na rarawa vakayago; 03 Na dede ga ni kena tiko e lomaqu na i cegu ni bula, ka to tiko e qara ni ucuqu na i cegu ni Kalou (Eloah), 04 E na sega ni rogo mai tebenigusuqu e dua na vosa ca, ka na sega ni cavuta na yamequ na vosa veivakaisini. 05 Au na sega vakadua ni vakadinata ni dou a dina; me yacova na siga au na mate kina, kau na sega vakadua ni cakitaka na i vakarau vinaka, 06 au na taura matua tiko na noqu yalododonu, kau na sega vakadua ni kolo laivi E na sega vakadua ni lomaleqaleqa na lomaqu, e na veisiga kece ni noqu bula.
- Jope 27:1-6


Also Read If Possible

Job 3:6-7, 9-10, 12-14, 16-17, 19, 23, 23-24, 26-31,

Psalm 7, Luke 18:1-8.

Na Veivakararawataki kei na i Totogi (Hurting and Punishment)

Serving For The 1st February, 2008

Ia o ratou na icaba nei Jope, ni ratou sa rogoca na leqa levu sa yaco tu vua, eratou sa mani dui biuta mai na nodratou dui vale, oya o Elifasi na kai Temani, o Pilitati na kai Sua, kei Sofa na kai Neama, me ratou lai sota me vaka na nodratou lokuloku, me ratou lai sikovi koya, ka lai duavata kei koya e na nona rarawa me vakacegui koya. 12 Ni ratou matacake me ratou raici koya, ni ratou se tu yani vakayawa, ratou qai sega ni bau kilai koya, ratou sa mani rubica na tagitagi yaso e na domolevu, ratou qai dui dresulaka na nodratou dui i sulu, ka kaburaka na kuvu ni soso e na dui uludratou ni ratou rai cake tu i Lomalagi. 13 E ratou sa qai dabe toka ga vagagalu kei koya e na vanua e toka mai kina o koya, me vitu na siga, ka vitu na bogi. Eratou a sega ni vosa rawa vua; baleta eratou a vakila talega na vakaitamera ni rarawa sa bikai koya toka.
- Jope 2:11-13

Sa qai vosa o Elifasi na kai Temani.
Jope 4:1

“Nanuma lesu mada, au vakamasuti iko, se o cei sa bau vakarusai ni sega ni cala, se evei era au dau muduki laivi kina o ira era yalododonu?
08 Na ka mada au dau raica, ni ra na dau tamusuka ga na ca, o ira era teivaka na caka ca, ka kaburaka na sore ni i valavala ca. 09 Ni uvuci ira ga na i cegu ni Kalou (Eloah) era sa rusa sara ga, ia ni liwavi ira na Nona leva, era sa na oti vakadua.
- Jope 4:7-9

“Ia ke yaco vei au qo, au sa na vuki ga vua na Kalou (El);
au qai talaucaka Vua na Kalou (Elohim), na veika kece me baleti au.
- Jope 5:8

“Raica e kalougata na tamata e vakadodonutaka na Kalou (Eloah),
o koya mo kakua kina ni sevaka na nona veivakavulici o Koya sa cecere sara. 18 Baleta e na veivakamavoataki beka, ia e na veivakavadreti talega.
e na vakavu leqa ca beka, ia na ligana e na veivakabulai.
- Jope 5:17-18

“Qo keitou sa vakadikeva oti vakavinaka, ka keitou kila ni dina, O koya oya mo rogoca vinaka kina qai vakayacora.
- Jope 5: 27

Also Read If Possible

Job 4-5, 8, 11, 15, 18, 20, 22, 25, 32-37.
Hebrews 12:5-11

Tauvimate Bibi o Jope. (Job Got Very Sick)

Serving For The 31st January, 2008

A qai yaco e na dua tale na siga, ni ra baci mai vakaraitaki ira e mata ni TURAGA (Elohim) o ira na Agilosi, ni baci lako tale tu ga mai kei ira o Setani me mai vakaraitaki koya e na mata ni TURAGA (Yahweh). 02 E tarogi Setani sara na TURAGA (Yahweh), “O baci lako tu mai vei? Sauma o Setani, “Au a veilakoyaki voli e delai vuravura kau a gade voli kina.” 03 E tarogi Setani tale na TURAGA (Yahweh), “Na cava beka sa qai nomu vakasama qo me baleta na noqu dauniveiqaravi o Jope? E se sega tikoga ni dua me tautauvata kei koya e vuravura; e sega ni vakamelei rawa, e tamata yalododonu, e dau rerevaka na Kalou (Elohim) ka dau sesevaka na i valavala ca? E se taura matua tu ga na nona yalododonu, e dina ga ni o a mai vakatalatalataki au meu vakarusai koya wale tu.” 04 “Kuli ki na kuli” e kaya Vua na TURAGA (Yahweh) o Setani. “E dua na tamata e na solia na ka kece e taukena, e na vuku ni nona bula. 05 Ia ni dodoka mada na ligamuni, moni samuta na sui kei na lewe ni yagona, e na qai rukaki kemuni e matamuni.” 06 E kaya sara vei Setani na TURAGA (Yahweh), “Sa vinaka, sa tu i ligamu o koya; ia na nona bula me taqomaki.” 07 Sa biuta sara mai na mata ni TURAGA (Yahweh) o Setani, qai lai vakararawataki Jope, e na nona vakavuna me tauvi koya na vidikoso, me tekivu mai na qeteqete ni yavana, me yaco sara i na doka ni nona qavokavoka. 08 E kauta sara mai e dua na i vorovoro ni kuro-qele, qai lai karilaki koya vakataki koya, ni dabe toka e na dela ni dua na ibinibini dravusa. 09 E kaya sara mai vua o watina, “O se taura matua tikoga na nomu yalododonu? Rukaka yani na Kalou (Elohim) mo mate.” 10 Sauma vua o koya, “O sa vosa dina tiko me vaka e dua na yalewa lialia. E vakaevei, meda sa ciqoma tiko ga mai Vua na Kalou (Elohim) na veika vivinaka, ka da sega ni ciqoma na veika ca? E na veika kece sa mai yaco qo, e a sega vakadua ga ni vakayacora e dua na ivalavala ca o Jope, mai na veika e cavuta mai gusuna.
- Jope 2:1-10



Read These Text If Possible
Job 19:25-27, Proverb 11:2-6
Phillipians 3:7-11.

Yali na i Yau nei Jope (Job Losses All)

Serving For The 29th January, 2008

E na dua na siga ni ratou vakatakakana ka gunu waini tiko o ratou na luvei Jope tagane kei na luvena yalewa, e na vale nei tuakadratou, 14 e a lai raici Jope yani e dua na dau ni vakau itukutuku, qai kaya “Era a siviyara tiko na bulumakau, ka ra kana voleka tu na asa, 15 ni ra sa kabavanua mai na kai Sipa, era qai mai yauta vakadua na manumanu kecekece, ka sualaki ira me ra mate na dauniveiqaravi e na iseleiwau, ia o au duadua ga au qai drobula mai, meu mai tukutuku vei kemuni.” 16 Ni se vosa tikoga o koya, sa curu tale yani e dua tale na dau ni vakau itukutuku qai kaya, “E lutu mai lomalagi na bukawaqa ni Kalou (Elohim), qai vakamai ira kece na qele ni sipi kei ira na dauniveiqaravi ka ra sa qeyavu vakadua. O au duadua ga au qai drobula mai, meu mai tukutuku vei kemuni.” 17 Ia ni se vosa tikoga sa baci curu tale yani e dua tale na dau ni vakau i tukutuku qai kaya, “E tolu vakadua na i lala vakaivalu mai Papiloni (Kalitia), era a kabavanua mai era qai mai yauta vakadua na qeleni nomuni kameli, era qai sualaki ira me ra mate na dauniveiqaravi e na iseleiwau, ia o au duadua ga au qai drobula rawa mai meu mai tukutuku vei kemuni.” 18 Ni se vosa tikoga o koya sa baci curu tale yani e dua tale na dau ni vakau i tukutuku qai kaya, “Eratou a vakatakakana ka gunu waini tiko o ratou na luvemu tagane kei ratou na luvemu yalewa, e na vale nei tuakadratou ulumatua, 19 ni sa liwa vakasauri mai na vanua dravuisiga e dua na cagilaba kaukaua ka waromisa, qai robalaka vakaukaua na tutu ni vale va va. A mani baleti ratou taucoko na vale, ka vakamatei ratou kecekece, ia o au duadua ga au qai drobula rawa mai meu tukutuku vei kemuni. 20 E keri sa qai tucake kina vakamalua o Jope, dresudresulaka na nona i sulu, qai toroya laivi vakadua na drauniuluna. Oti sa qai lai tekicuva sobu tu e na dela ni qele me vakatamamasu, qai kaya, 21 “Au a lako luvawale mai na kete i tinaqu, au na lesu luvawale talega. E a solia na TURAGA (Yahweh), ia sa mai kauta laivi talega na TURAGA (Yahweh), ia me vakacaucautaki tiko ga na yaca ni TURAGA (Yahweh).” 22 E na veika kece sa mai yaco oqo, e a sega vakadua ni bau valavala ca o Jope, se me beitaka na Kalou, ni caka cala.
- Jope 1:13-22


Read Also If Possible

Habakuk 3:17-19, I Thessalonians 5:16-18,
Revelation 7:13-17

Jope: Vinaka ka Kalougata(Job: Good and Blessed)

Serving for the 29th January, 2008

E dua na tamata e a bula voli mai na vanua o Usi, na yacana o Jope. Ia na tamata oya e a dau yalododonu, dau cakacaka vakadodonu, ka dua e dau rerevaka na Kalou, ka dau vakanadakuya na i valavala ca.
- Jope 1:1

Ia na tamata oqo e a uasivi duadua vei ira kece na lewe ni vanua mai na yasayasa vakanatuicake.
- Jope 1:3b

E na dua na siga era a lako mai kina na luve ni Kalou (Elohim) me ra mai vakaraitaki ira e mata ni TURAGA (Yahweh), ia qai bau lako tale tu ga mai kei ira o Setani. 07 E tarogi Setani sara na TURAGA (Yahweh), “O lako tu mai vei?” Sauma Vua na TURAGA (Yahweh) o Setani ni kaya, “Au veilakoyaki voli e delai vuravura ka veigadeyaki voli kina.” 08 Vosa tale vei Setani na TURAGA (Yahweh), “Sa bau dua beka na nomu vakasama me baleta na noqu dauniveiqaravi o Jope? E sega sara ga ni dua e tautauvata kei koya e vuravura; e sega ni vakamelei rawa, e tamata yalododonu, e dau rerevaka na Kalou (Elohim) ka dau sesevaka na i valavala ca?” 09 Sauma Vua na Kalou (Yahweh) o Setani, “E ka wale beka na nona rerevaka na Kalou (Elohim) o Jope? 10 Oni sega beka ni viribaiti koya vinaka tu, o koya kei na nona matavuvale kei na veika kece e taukena? Oni dau vakalougatataka na cakacaka ni ligana, ka sa vakaitamera tu kina qori na nona iyau. 11 Ia dodoka mada na ligamuni e na gauna qo, mo samuta na ka kece e tu vua, e na qai rukaki kemuni dina, e matamuni.” 12 E kaya sara vei Setani o Jiova (Yahweh), “Raica, na ka kece e taukena au sa na solia i nomu kaukaua, ia mo kakua ga ni dodoka na ligamu mo tarai koya vakataki koya.” Oti sa biuta sara mai na mata ni TURAGA (Yahweh) o Setani.
- Jope 1:6-12



If Possible Read These Texts
Job 28, Proverbs 1:7, 8:13, 9:10,

Phillipians 1:14-15, I Peter 5:8-11.

Note: Cyclone Gene Hit the Fiji Islands during the night of the 28th January through to the 29th January. Electricity (6.15pm) and Piped Water (6.35pm) has just come back on. I seek prayers from around the world for the people of Fiji who have been affected by the Cyclone, and thanksgiving for the protection afforded to the majority.