Oti Na iValu (Confrontation Ended)

                           Thought: Misunderstanding Develop Through Miscommunication

Serving For Yom Chamishi, Sivan 10, 5772.

MAI NA NEVI’IMI RISHONIMI (FROM THE NEVI’IM RESHONIM)

OTI sa qai kacivi ira na Ru'veni, na Qoda, kei na veimama ni mataqali i  Ma'nashe, o Ye'hoshua,  2 Qai kaya vei ira, Oni sa muria vinaka na veika a kaya vei kemuni o Moshe na dauniveqaravi i Yahuwe (YHWH), oni a talairawarawa talega i na domoqu e na veika kece au a vakarota vei kemuni. 3 Oni a sega ni vakanadakui ira na tacimuni e veisiga sa oti qo, me yacova sara mai na siga oqo; oni se muria vinaka tiko ga na ivakaro i Yahuwe (YHWH) na nomuni Kalou (Mighty One). 4 Ia qo, sa qai vakacegui ira na tacimuni o Yahuwe (YHWH) na nomuni Kalou (Mighty One), me vaka a yalataka vei ira; o koya oya moni tu kina moni lesu tale i na nomuni tauni kei na vanua sa soli oti moni taukena, me vaka a solia vei kemuni o Moshe na italai i Yahuwe (YHWH) mai na tai kadua ni Yaradani e na vuaicake. 5 Ia moni nanuma tiko vakayalomatua moni bula muria tikoga na ivakaro kei na Toraa e a tautaunaka vei kemuni o Moshe na italai i Yahuwe (YHWH), moni lomani Yahuwe (YHWH) na nomuni Kalou (Mighty One), moni kabiti koya, ka qaravi koya e vuniyalomuni taucoko, kei na nomuni bula (soul) taucoko. 6 A mani vosa vakalougatataki ira o Ye'hoshua, qai talaci ira yani; era sa qai lesu i na nodra dui tauni. 7 Vei ira na veimama ni mataqali i  Ma'nashe, o Moshe a solia na kedra ivotavota (ni vanua) mai Bashani: ia vei ira na veimama kadua o Ye'hoshua a vota vei ira na kedra iwasewase e na kedra maliwa na tacina e na yasa ni Yaradani e na vuaira. Ni sa talaci ira laivi me ra lako i na nodra tauni, o koya a qai vosa vakalougatataki ira; 8 A vosa vei ira o koya ni kaya, Ni lesu i na nomuni tauni kei na vanua e kemuni ivotavota, ka moni qai vutuniyau tiko, ka me levu na nomuni manumanu, siliva,  koula, barasa, kaukamea, ka me levu talega na nomuni isulu; ni vota vinaka na nomuni itoki ni ivalu mai vei ira na kemuni meca vata kei ira na tacimuni. 9 Era sa mani lesu o ira na kawa i Ru'veni, na kawa i Qoda, kei ira na kawa ni dua na veimama ni mataqali i Ma'nashe, me ra sa biuti ira na luve i Yisira'yili mai Shailo, e tiko e na nodra vanua na Kena'ani, me ra lako i na vanua o Qili'ade, na vanua era taukena baleta ni tiko kina na kedra ivotavota, me vaka a vakarota o Yahuwe (YHWH) e na gusu i Moshe.

10 ¶ la ni ra sa yaco yani i Qiliqali, e toka e na bati ni Yaradani e na kedra vanua na Kena'ani o ira na kawa i  Ru'veni, i Qoda, kei na veimama na mataqali i  Ma'nashe, era a qai tara e keya e dua na icabocabo ni soro levu ka rairai totoka vakaoti. 11 Ia o ira na luve i Yisira'yili, era qai lai rogoca ni kainaki, Raica, o ira na kawa i Ru'veni, Qoda kei na veimama na mataqali i Ma'nashe era sa tara e dua na icabocabo ni soro, e na iyalayala ni vanua o Kena'ani, mai Qiliqali e na bati ni Yaradani, e na loma ni vanua e kedra na luve i Yisira'yili. 12 Era mani sosoqoni vata o ira na nodra isoqosoqo taucoko na luve i Yisira'yili, mai Shailo, me ra sa lai valuti ira.

Josua (Ye’hoshua) 22:1-12

NA IVAQA NI BULA (FOOD FOR THE SOUL)

O ira na tui era vakayacora na itovo ca era vakasisila; baleta na itutu vakatui e vakayavutaki e na yalododonu; 13 ¶ Na tebenigusudra na tamata yalododonu era ka ni reki  vua na tui; o koya e taleitaka na vosa ni yalododonu;

Vosa Vakaibalebale (Mishlei) 16:12-13

LOMANI YAHUWE NA NOMU KALOU (LOVE YHWH YOUR MIGHTY ONE)

PEI

129 ¶ Na nomuni vosa era veivakurabuitaki; o koya oya e bula muria tiko kina na noqu bula (soul). 130 ¶ Vakarawarawataka me matata na nomuni vosa qai vakararamataki ira ka solia na kilaka vei ira era yalorawarawa. 131 ¶ Au dalaga, au qai ceguoca; baleta niu gadreva vakalevu na nomuni ivakaro. 132 ¶ Raici au mai ka lomani au mai baleta niu taleitaka na yacamuni. 133 ¶ Tubera na noqu ikalawa me muria  na nomuni sala; kakua ni vakalaivi ira na vakasisila me ra mai vakatulewa vei au. 134 ¶ Vueti au mai na nona ivalavala kaukaua na tamata: meu rawa ni bula muria na nomuni ivunau. 135 ¶ Cakava na matamuni me ramase vua na nomuni dauniveiqaravi; vakatavulica vei au na nomuni lawa. 136 ¶ Na wai ni veiuciwai era dave sobu mai mataqu, baleta ni ra sega ni bula muria na nomuni Toraa.

TZADE

137 ¶ O kemuni oni yalododonu i Yahuwe (YHWH), ka dodonu vakaoti na na nomuni lewa. 138 Oni vakarota na nomuni vosa e na yalododonu kei na yalodina. 139 ¶ Na lomakatakata sa curumi au, baleta o ira na kemu meca era guilecava na nomuni vosa. 140 ¶ Na nomuni vosa e savasava vakaoti; oqori e taleitaka kina vakalevu na nomuni dauniveiqaravi. 141 ¶ O au, au lailai wale ka dau beci: ia au segasega ga ni guilecava na nomuni ivunau. 142 ¶ Na nomuni yalododonu, e yalododonu tawamudu, baleta na nomuni Toraa e dina taucoko. 143 ¶ Na leqa kei na yaluma sa mai tarai au; ia au vakananuya tiko ga na nomuni ivakaro. 144 Na kena dodonu na nomuni vosa e na sega ni mudu rawa: Solia vei au na kilaka au na qai bula.

QOF

145 ¶ Au tagitagi e na vuniyaloqu taucoko; rogoci au i Yahuwe (YHWH); au na bula muria na nomuni ilesilesi.

146 Au tagi yani vei kemuni, au tagi vei kemuni; vakabulai au, au na bula muria na nomuni vosa. 147 ¶ Au matacake ni kida na mataka au qai tagi; Au vakanuinui tiko e na nomuni vosa. 148 Na mataqu sa tadola ni se bera na gauna ni matayadra ni bogi, meu rawa ni vakananuya na nomuni vosa. 149 ¶ Rogoca na domoqu, e na nomuni loloma kei na veikauwaitaki i Yahuwe (YHWH), vakaukauataki au me vaka na nomuni lewa. 150 ¶ Era toro voleka mai o ira era bula vakalawaki ca: o ira era yawa kalia mai na nomuni Toraa. 151 Oni voleka, i Yahuwe (YHWH); na nomuni lawa (mitzvot) kecekece era dina. Na mataqu e tadola ni sebera na gauna ni matayadra ni bogi, meu vakananuya na nomuni vosa. 152 ¶ Me baleta na nomuni ilesilesi, au se kila makawa mai ni oni a vakataudeitaka me ra tawamudu.

Same (Tehellim) 119:129-152

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 151 o/o 1611	May 31, 2012
Reading	Hebrew Date
Yesha’yahu (Aisea) 35-36	Sivan 10, 5772
Click The Bible Text To Read It In Gateway In Another Language Or Version

 YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Vakawirimadigitaki Na Vanua (Land Divided By Lot).

Thought: Yisra’yl Was Showing A Lack Of Faith In YHWH

........... 

Serving For Yom R’vi’i, Sivan 9, 5772.

MAI NA NEVI’IMI RISHONIMI (FROM THE NEVI’IM RESHONIM)

OTI era qai soqoni vata mai Shailo, o ira kece vakadua na lewe ni isoqosoqo i Yisira'yili, era qai vakaduria mai keya na valelaca ni veitavaki. Na vanua sa rawai oti sa tu e matadra.

2 ¶ Sa vo tiko e vitu vei ira na nodra mataqali na luve i Yisira'yili, me ra ciqoma na nodra ivotavota ni vanua. 3 Kaya o Ye'hoshua vei ira na luve i Yisira'yili, E na vakaevei soti na dede ni nomuni na tu vakasuka, moni qai toso moni lai taukena na vanua sa solia oti vei kemuni, o Yahuwe (YHWH) na noda Kalou (Mighty One) moni taukena? 4 Lesia mai e tauya tolu na tagane mai na  nomuni mataqali yadua; au na qai talai ira, me ra cavu tu, me ra lai butu vanua, vakadikeva ka vakamatatataka na ituvaki ni vanua me kedra dui ivotavota, oti me ra qai lesu tale mai vei au. 5 O ira me ra qai wasea na vanua  me vitu na kedra iwasewase; o Ya'huda me ra tiko ga e na nodra yasayasa vata i na ceva vata kei na vale i Yosefa me ra tiko ga e na nodra yasayasa e na vualiku. 6 O kemuni moni qai droinitaka e dua na mape ni vanua ni sa wase tu vakavitu, oti moni qai kauta mai ke na mape; au na qai vakawirimadigitaka   eke, e na vukumuni, e na mata i Yahuwe (YHWH) na noda Kalou (Mighty One). 7 Ia o ira na Li'vi'imi, e na sega na nodra ivotavota vata kei kemuni; baleta e nodra ivotavota me ra cakava na  cakacaka ni kohena vei Yahuwe (YHWH); o Qoda, o Ru'veni, kei na dua na veimama ni mataqali i Ma'nashe, era sa ciqoma oti na kedra ivotavota e na tai kadua ni Yaradani, e na Vuaicake, me vaka a vota vei ira o Moshe na italai i Yahuwe (YHWH). 8 Era mani cavutu na tagane ka toso yani; o Ye'hoshua, a vakaroti ira era lako me ra na lai dronitaka mai e dua na mape ni vanua, ni kaya, Lako lai butuka mai na vanua, qai vakarautaka mai na kena mape, qai lesu tale mai vei au, me mai vakawirimadigitaki e na vukumuni, eke, e Shailo, e na mata i Yahuwe (YHWH). 9 Era mani lako na tagane, era lai butuka mai vakaoti na vanua, era qai vakarautaka na mape ni veikorolevu kei na kena iwasewase me vitu na tikina e na dua na ivivivi (kuli ni kau), era qai lesu mai vei Ye'hoshua e na korolevu o Shailo. 10 O Ye'hoshua a vakawirimadigitaka  e na vukudra  mai Shailo, e na mata i Yahuwe (YHWH): e keya o  Ye'hoshua a qai vota na vanua vakatikina vei ira na luve i Yisira'yili.

Josua (Ye’hoshua) 18:1-10

NA IVAQA NI BULA (FOOD FOR THE SOUL)

Na lewa nei Yahuwe (YHWH) ni toka e na tebenigusu ni tui: na gusuna e na sega ni cala ni vakatulewa. 11 ¶ Na tautauvata kei na ivakarau ni vakatulewa dodonu e vu vakatabakidua mai na lewa i Yahuwe (YHWH); na bibi taucoko e na dua na taga, era nona  cakacaka.

Vosa Vakaibalebale (Mishlei) 16:10-11

LOMANI YAHUWE NA NOMU KALOU (LOVE YHWH YOUR MIGHTY ONE)

SAMEKH

113 ¶ Au cati ira era dau lomaloma rua: ia na nomuni Toraa au taleitaka. 114 ¶ O kemuni oni noqu ivakaruru  ka noqu ivunivuni: au dau vakanuinui i na  nomuni vosa. 115 ¶ Lako tani mai vei au, o kemuni na dau valavala ca; meu rawa ni bula muria na nona ivakaro (mitzvot) na noqu Kalou (Mighty One). 116 ¶ Tabei i au tiko me vaka na nomuni vosa, qori au na qai bula kina; kakua ni vakabiuta meu madualaka na noqu inuinui. 117 Vukei au tiko, au na qai yalodei, au na dau vakananuya e veiveigauna na nomuni ilesilesi. 118 ¶ O kemuni oni sa cemuri ira kece era lako sese mai vei kemuni, baleta na nodra vakasama e dau veivakacalai vakalevu. 119 Tabei au, au na qai yalodei, au na dau vakananuya e veiveigauna na nomuni ivakaro. 120 Sa dau kino na lewe ni yagoqu e na noqu dokai kemuni; au dau rerevaka na nomuni lewa.

AYIN

121 ¶ Isa o kemuni oni dau vakataulewa ka daulewa dodonu, kakua ni biuti au tu e ligadra na dau veivakasaurarataki. 122 ¶ Vakaceguya na nomuni dauniveiqaravi e na veika vivinaka; kakua ni vakalaivi ira na qaciqacia me ra vakaucacataki au.123 ¶ Na mataqu e gadreva na nomuni veivakabulai vata kei na vosa ni nomuni yalododonu. 124 ¶ Vakayacora vua na nomuni dauniveiqaravi me veiraurau kei na nomuni yalololoma, vakatavulica vei au na nomuni lawa.125 O au, au nomuni dauniveiqaravi; solia vei au na kilaka, meu rawa ni kila na nomuni ilesilesi. 126 ¶ Sa kena gauna oqo me qaravi kina o Yahuwe (YHWH); baleta o ira era sa vakatawayagataka na nomuni ivunau. 127 ¶ O koya oya au taleitaka kina vakalevu cake na nomuni ivakaro (mitzvot) mai na koula; io, vakalevu cake mai na veivatutalei. 128 O koya oya au taleitaka kina na nomuni ivakaro; kau cata na ivalavala kece sara na vakasisila.

Same (Tehellim) 119:113-128

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 150 o/o 1610	May 30, 2012
Reading	Hebrew Date
Yesha’yahu (Aisea) 32-34	Sivan 9, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Wasewase Na Vanua Yalataki (Distribution Of The Promised Land)

Thought: Kalev Received According To The Promise Given By Moshe

........................ 

Serving For Yom Shlishi, Sivan 8, 5772.

MAI NA NEVI’IMI RISHONIMI (FROM THE NEVI’IM RESHONIM)

OQO na veivanua era a taura na luve I Yisira'yili me ra taukena vakaivotavota e na vanua o Kena'ani, eratou a wasea vei ira me ra taukena, o Yili'eza na kohena, o Ye'hoshua na luve i Nani, kei ira na iliuliu na nodra  veimataqali na  luve i na Yisira'yili. 2 Na kedra dui ivotavota a votal e na madigi, me vaka a vakarota o Yahuwe (YHWH) e na liga i Moshe, me soli kina vei ira na mataqali ciwaciwa kei na veimama ni dua na mataqali. 3 Baleta o Moshe a sa solia oti na kedra ivotavota e rua na mataqali kei na veimama ni dua na mataqali, mai na  tai kadua ni Yaradani; ia vei ira na Li’vi’imi e a sega ni solia e dua na kedra ivotavota. 4 Baleta na mataqali i Yosefa e a wili me rua na mataqali, o Ma'nashe kei Ifira'yimi, qori a sega kina ni soli e dua na kedra ivotavota ni vanua na L'vi'im, e a soli ga vei ira na veikoro me ra tiko kina kei na vanua veico wavolivolita me ra susu manumanu kina ka me nodra iyau talega. 5 Me vaka a vakarota vei Moshe o Yahuwe (YHWH), qori era a cakava  vakakina o ira na luve i Yisira'yili, e na nodra vota na vanua.

6 ¶ Oti era qai lako mai vei Ye'hoshua e Qiliqali o ira na luve i Ya'huda; oya o  Kelevi na luve I Ye'fune, na Ke'nizi qai kaya vei Ye'hoshua, O kemuni oni kila na vosa a kaya o Yahuwe (YHWH) vei Moshe na nona dauniveiqaravi me baleti kedaru, o au vata kei iko, mai Kadesha-Bania.  7 Au a sa yabaki vasagavulu e na gauna a talai au kina mai Kadesha-Bania o Moshe, na italai ni Kalou (Mighty One), meu lai dikeva mai vakavuni na vanua; au qai mai vakasavuya tale vua na vosa ga me vaka e tiko e vuniyaloqu. 8 Ia o ira na tacida era a lako vata kei kedaru era a mai vakadatuvutaka na yalodra na tamata; ia o au, au a muri I Yahuwe (YHWH) ga na noqu Kalou (Mighty One) e na yaloqu taucoko. 9 O Moshe a qai  bubului e na gauna oya ni kaya, E na yaco dina ga ni ona  na taukena vata kei ira na nomu kawa me tawamudu, na vanua kece sa butuka oti mai na yavamu, baleta ni o a vakamuri i Yahuwe (YHWH) na nomu Kalou (Mighty One) vakatabakidua. 10 Ia raica, o Yahuwe (YHWH sa solia vei keda na vakiacegu, me vaka a kaya; ka sa oti oqo e vasagavulukalima na yabaki na nona a kaya o Yahuwe (YHWH) na vosa oqo vei Moshe, e na gauna era veilakoyaki voli kina o ira na Yisira'yili e na loma ni vanua liwa; ia  nanuma toka niu sa yabaki walusagavulukawalu e na siga oqo. 11 Ia e na siga oqo, au se kaukaua vinaka tu ga me vaka na siga a talai au kina o Moshe; na noqu kaukaua e na siga oya e tautauvata tu ga kei na noqu kaukaua e na gauna oqo, meu lai vala; ruarua meu lako yani se meu lako mai. 12 Nikua, mo  solia vei au na ulunivanua, e a  vosa kina o Yahuwe (YHWH) e na siga oya; me vaka o a rogoca e na siga oya ni ra tiko kina na kawa ni tuwawa (na luve i Anaki), na nodra korolevu era vakavakaitamera ka vakalalagabai;  de dua e na sala vata kei au o Yahuwe (YHWH), au na qai rawa kina ni ravuti ira, me vaka sa kaya oti o Yahuwe (YHWH). 13 O Ye'hoshua a qai vakalougatataki  Kelevi na luve i Ye'fune. oti qai soli i Hevaroni kei na veivanua wavolivolita me sa taukena vakaivotavota o koya. 14 O Hevaroni kei na vanua wavolivolita  a qai yaco me taukena o Kelevi na luve i Ye'fune, na Ke'nizi, me yacova mai na siga oqo; baleta o koya e a muri i Yahuwe (YHWH) na Kalou (Mighty One) i Yisira'yili vakatabakidua. 15 O Hevaroni a dau yacana tu eliu o Kiriyate-Araba, (e na gauna) a se nodra tu kina na kawa ni tuwawa (Anaki). Na vanua sa qai cegu mai na veivaluvaluti.

Josua (Ye’hoshua) 14:1-15

NA IVAQA NI BULA (FOOD FOR THE SOUL)

E vinaka cake ni lailai wale ia  e na yalododonu, mai na tatamusuki vakaitamera e caka vakatawadodonu. 9 ¶ Na vuniyalo ni tamata e navuca na nona sala, ia o Yahuwe (YHWH) e na dusimaka na nona itosotoso.

Vosa Vakaibalebale (Mishlei) 16:8-9

LOMANI YAHUWE NA NOMU KALOU (LOVE YHWH YOUR MIGHTY ONE)

MEM

97 ¶ Olei au rui taleitaka na nomuni Toraa. E dau we we ni noqu vakanananu e veisiga taucoko. 98 ¶ E vakavuna meu vuku cake mai vei ira na kequ meca, baleta niu dau bula muria na nomuni lawa (mitzvot). 99 E solia vei au meu yalomatua cake vei ira na noqu ivakavuvuli; baleta na nomuni ilesilesi e iusutu tiko ni noqu vakanananu. 100 Au kila e levu cake na ka, mai vei ira na qase, baleta niu bula muria tiko na nomuni ivakaro. 101 ¶ Au dau tarova na yavaqu mai na veisala vakasisila kece, me rawa niu bula muria ga na nomuni lewa. 102 ¶ Au na sega ni lako vakatikitiki mai na nomuni lewa; baleta ni oni a vakatavulica vei au. 103 ¶ Oilei na kamikamica ni nomuni vosa ni tovolei, io, e kamikamica vakalevu cake mai na hani e loma ni gusu; 104 Au sa vakananuya vinaka tu na nomuni ivakaro; o koya qori au dau cata kina na nodra ivalavala ni veidabui o ira era itovo vakasisila.

NUN

105 ¶ Nomuni vosa e dua na icina i yavaqu, ka dua na rarama i na noqu sala. 106 ¶ Niu sa bubuluitaka oti, au na vakayacora tikoga, niu na bula muria na nomuni lewadodonu. 107 ¶ Niu sa rarawa dina vakalevu: vakaukauataki au, i Yahuwe (YHWH), me vaka na nomuni vosa. 108 ¶ Ni bau dau marautaka i Yahuwe (YHWH), na vosa ni gusuqu, i Yahuwe (YHWH) vakatavulica vei au na nomuni lewa. 109 ¶ Na noqu bula (soul) e na tiko ga e ligamuni; au na sega ni guilecava na nomuni Toraa 110 Na dau ni valavala ca era birika na tudai meu coko kina; ia au a sega mada ga lako sese mai na nomuni ilesilesi. 111 ¶ Na nomuni ilesilesi au sa taura me noqu ivotavota me tawamudu; baleta era ka ni reki e vuniyaloqu. 112 Na vuniyaloqu sa nakita me vakayacora vakayalomatua na nomuni ilesilesi, me yacova na ivakataotioti.

Same (Tehellim) 119:97-112

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 149 o/o 1609	May 29, 2012
Reading	Hebrew Date
Yesha’yahu (Aisea) 30-31	Sivan 8, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Vakarusai o Yeriko (Yericho Devastated)

Thought: Oath Uttered In YHWH’s Name Must Be Kept, To Prevent Negative Consequences

.................. 

Serving For Yom Rishon, Iyar 28, 5772.

(NB. In Counting Days Toward Shavu’ot (Gr:Pentecost), Today Is Day 43 out of 50)

MAI NA NEVI’IMI RISHONIMI (FROM THE NEVI’IM RESHONIM)

Na korolevu kei na veika kece era tu e loma, era sa vakatabui oti me ra nei  Yahuwe (YHWH); o Rekava duadua ga na yalewa saqamua-saumi, me na vakabulai, oya o koya kei ira kece era tiko vata kei koya e loma ni nona vale, baleta o koya e a taqomaki rau na noda yamata vuni eda a talai rau mai. 18 Ia o kemuni, moni qarauna na veika vakatabui, de oni vakadukadukalitaki kemuni e na nomuni taura vakailowa na veika vakatabui, oni qai cakava me vatovatotaki na nodra keba na Yisira'yili, (moni) qai vakatubuleqa. 19 Na siliva taucoko, kei na koula kei na iyaya barasa se kaukamea era sa vakatabui tu me nei Yahuwe (YHWH): qori me ra na kau mai i na vale ni iyau i Yahuwe (YHWH). 20 Era qai kaila na tamata, ni ra uvuca tiko na biukila o ira na kohanimi; a qai yaco, ni ra rogoca ga na rorogo ni biukila o ira na tamata, ni ra a qai kaila e na dua na kaila (rogo) levu, qori a qai caqera kina vakadua i ra na bailalaga, era mani curuma vakadodonu kina na loma ni korolevu na tamata yadua, era qai taura na korolevu. 21 Era a vakarusa na veika kece era tiko e loma ni koro, ruarua na tagane kei na yalewa, na itabagone kei na itabaqase, na okisi, na sipi kei na asa, e na bati ni seleiwau. 22 Ia o Ye'hoshua a qai kaya vei rau na tagane, rau a mai dikeva vakavuni na vanua, Lako i na nona vale na saqamua-saumi, drau lai kauta mai keya na yalewa, kei na ka kece e nona me vaka drau a bubuluitaka vua. 23 Rau mani lako i loma na yamata vuni, rau qai lai kauti Rekava mai i tautuba, vata kei tamana, tinana, o ratou na ganena, kei na veika kece e nona; era kauti ira kece talega mai na wekana, me ra mai toka vakatikitiki e na taudaku ni nodra keba na Yisira’yili. 24 Era vakama na korolevu e na buka waqa, me wili kina na ka kece era kune kina; ia na siliva ga kei na koula kei na iyaya barasa e nei Yahuwe (YHWH). 25 Ia o Rekava na saqamua-saumi vata kei na matavuvale i tamana kei na ka kece e taukena, e a vueta o Ye'hoshua; o koya a qai mai vakaitikotiko e na kedra maliwa na luve i Yisira'yili me yacova mai na siga oqo; baleta ga ni a taqomaki rau na yamata vuni a talai rau o Ye'hoshua, me rau lai dikeva mai vakavuni na vanua o Yeriko. 26 O Ye'hoshua a qai bubuluitaka e na gauna oya, ni kaya, E na vatonaki e na mata i Yahuwe (YHWH) na tamata e na tu cake mai me tara cake tale na korolevu oqo, o Yeriko; e na mate ga ni luvena ulumatua e na rawa ni tara cake tale kina, kei na mate na luvena tagane gone duadua e na vakatura cake rawa kina na kena matamata. 27 (Qori a kune votu kina) ni o Yahuwe (YHWH) a sa tiko vata kei Ye'hoshua; na kena irogorogo a qai kuruseta na vanua taucoko.

Josua (Ye’hoshua) 6:17-27

NA IVAQA NI BULA (FOOD FOR THE SOUL)

O ira era sega ni doka na veivakasalataki era na sega ni kilakasamataka na inakinaki, ia ni levu o ira na dau ni vakasala, na veivakasalataki e na dei. 23 ¶ Na nona marau e dua na tamata e kune votu mai na vosa ni gusuna; ia o koya e vosa e na kena gauna dodonu, e ka levu na kena vinaka vua.

Vosa Vakaibalebale (Mishlei) 15:22-23

LOMANI YAHUWE NA NOMU KALOU (LOVE YHWH YOUR MIGHTY ONE)

VAKAVINAVINAKATAKI Yahuwe (YHWH), kemuni na veimatanitu; vakavinavinaka vua kemuni na veimatamata. 2 Baleta na yalololoma kei na nona yalovinaka e vakaitamera vei keda; kei na dina i Yahuwe (YHWH) e na tudei tawamudu. Haleluya.

Same (Tehellim) 117:1-2

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 140 o/o 1600	May 20, 2012
Reading	Hebrew Date
Yesha’yahu (Aisea) 1-4	Iyar 28, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Tayabe Wavokiti Yeriko (March Around Yericho)

Thought: YHWH Handed Yericho To The Children of Yisra’yl After A Seven-Day March

 ........................

Serving For Shabbat, Iyar 27, 5772.

(NB. In Counting Days Toward Shavu’ot (Gr:Pentecost), Today Is Day 42 out of 50)

MAI NA NEVI’IMI RISHONIMI (FROM THE NEVI’IM RESHONIM)

IA o Yeriko a sa sogolaki tu vakadua baleta ni ra sa tiko voli kina na luve i Yisira'yili; e sega tale ni dua me curu i tuba, se curu i loma. 2 Kaya o Yahuwe (YHWH) vei Ye'hoshua, Raica, au sa soli i Yeriko i na qeteqete ni ligamu, wili kina na nodra tui kei na nodra mataivalu. 3 O kemuni moni na wavokita na korolevu, oya o ira kece na tamata ni ivalu, moni qai taubale wavokita na korolevu, vaka dua e na dua na siga. Qori moni cakava tiko me ono na siga.  4 E vitu na kohena me ra na tauri biukila  tiko, me ra qai uvuca tiko e na mata ni kato; ia e na ikavitu ni siga, moni na qai tayabe wavokita na korolevu vakavitu, ia me ra qai uvuca na biukila o ira na kohena.  5 E na qai yaco, ni ra uvuca na biukila, ni oni sa rogoca na voqa ni biukila, me ra kaila vata na tamata kece e na dua na kaila levu; qori era na qai bale kina vakadua i ra na bailalaga ni korolevu, me ra qai lako cake vakadodonu na tamata yadua mai na vanua era tu kina.

6 ¶ Oti a qai kacivi ira na kohena o Ye'hoshua na luve i Nani, qai kaya vei ira, Ni laveta cake na kato ni veiyalayalati nei Yahuwe (YHWH), qai lesia e vitu na kohena me ra kauta tiko e vitu na biukila, me ra na uvuca tiko e na mata ni kato nei Yahuwe (YHWH). 7 E kaya vei ira na tamata o koya, Ni lako yani moni lai tayabe vokita na koro, o ira era vakaiyaragi me ra liutaka (na tayabe) e na mata ni kato i Yahuwe (YHWH). 8 Me vaka a kaya vei ira na tamata o  Ye'hoshua, o ratou na kohanimi le vitu  era taura tiko na biukila e vitu, era a tekivu tayabe yani e mata ni kato i  Yahuwe (YHWH), ka ra uvuca yarayara tiko yani na biukila; (o ira era laveta tiko) na kato ni veiyalayalayalati i Yahuwe (YHWH) era a qai muria tiko  yani. 9 O ira na lewe ni mataivalu vakaiyaragi era liu tiko vei ira na uvuca tiko na biukila, ia o ira na vo ni tamata era soqoni yani era qai muri i ira era (lave tiko) na kato; era a tayabe yani ka uvuca tiko na biukila. 10 Ia o Ye'hoshua, e a qai vakaroti ira na tamata e na nona kaya, Me kakua na kaikaila, me kakua mada ga ni rogo na domomuni, se me rogo mai gusumuni e dua na vosa, me yacova sara na siga au vinakata moni qai kaila kina; e na siga oqori moni qai kaikaila kina. 11 Qori a qai kau wavokita kina na korolevu na kato i Yahuwe (YHWH); me kau wavoki vakadua e na dua na siga; oti era qai lesu mai na keba me ra mai vakaicili tiko e na keba. 12 O Ye'hoshua e na sou vakamataka e veisiga, era qai cola cake na kato ni veiyalayalati i Yahuwe (YHWH) o ira na kohanimi. 13 Era le vitu na kohanimi eratou kau biukila tiko era toso tiko e na mata ni kato i Yahuwe (YHWH), era toso tiko ga ka uvuca tiko ga na biukila; ia era liu tiko vei ira o ira na lewe ni mataivalu vakaiyaragi; o ira na vo ni le vuqa era qai muria kece tiko na kato i Yahuwe (YHWH), ni ra uvu biukila tiko o ira na kohanimi. 14 E na ikarua ni siga era (taubale) wavokita tale vakadua na korolevu, oti era qai lesu i na nodra keba; qo era cakava tiko me ono na siga. 15 E na ikavitu ni siga, era a yadra sara vakamataka era qai taubale wavokita na koro levu e na kena ivalavala vata ga oya ia me vakavitu; e na siga duadua ga oya era a taubale wavokita kina vakavitu na korolevu. 16 E na ikavitu ni wavoki ni ra uvuca yarayara tiko yani na biukila o ira na kohanimi, sa qai kaya mai o Ye'hoshua vei ira na tamata, Ni kaila; o Yahuwe (YHWH) sa solia e ligamuni na korolevu.

Josua (Ye’hoshua) 5:1-15

NA IVAQA NI BULA (FOOD FOR THE SOUL)

Na gonetagane vuku e vakamarautaki tamana; ia na gonetagane lialia e vakarogorogocataki tinana. 21 ¶ Na tamata lialia e lailai vua na yalomatua; ia na tamata yalomatua e lako tu ga vakayalododonu,

Vosa Vakaibalebale (Mishlei) 15:20-21

LOMANI YAHUWE NA NOMU KALOU (LOVE YHWH YOUR MIGHTY ONE)

AU taleitaki Yahuwe (YHWH), baleta ni na rogoca o koya na domo ni noqu vakatamamasu. 2 E na vakala mai vei au o koya na daligana e na siga au kaci yani kina vua. 3 Na vutugu ni mate sa waviviraki au, kei na mosimosi ni ibulubulu sa kunei i au; Au sotava na leqa kei na rarawa. 4 Au masumasu e na yaca i Yahuwe (YHWH); I Yahuwe (YHWH) vueta na noqu bula (soul). 5 O kemuni oni vuable e na yalololoma i Yahuwe (YHWH) ka yalododonu; 6 I Yahuwe (YHWH) taqomaki ira na lalai, a qai vakayalomalumutaki au ka vueti au. 7 Lesu i na nomu ivakavakacegu, o iko noqu bula (soul), baleta o Yahuwe (YHWH) sa caka vinaka vakayauyau vei iko. 8 Baleta o koya e sa vueta na noqu bula mai na mate, kei na yavaqu, meu kakua ni tacaqe. 9 Au sa na vakadonui vei kemuni i Yahuwe (YHWH) e na nodra vanua na bula.

10 ¶ Au a vakabauta, qori au qai vosa kina; au sa vakamalumutaki vakalevu dina; 11 Au kaya e na noqu lecaika, Na tamata kecekece era dau lasulasu. 12 Na cava meu solia vei Yahuwe (YHWH) me idole ni veika yaga mai vua, e vakarautaki mai e na vukuqu? 13 Au na taura na bilo ni veivakabulai au na qai dau masumasu e na yaca i Yahuwe (YHWH). 14 Au na vakayacora e na gauna oqo na noqu bubului vei Yahuwe (YHWH), e na kedra maliwa na tamata kecekece. 15 E vakamareqeti e na mata i Yahuwe (YHWH) na nodra mate o ira na nona digitaki. 16 I Yahuwe (YHWH), e ka dina ni o au, au nomuni dauniveiqaravi; au nomuni tamata, na luvenatagane na nomuni vada: oni sa sereka na kequ ivesu. 17 Au na cabora vei kemuni, na isoro ni vakavinavinaka, au na qai masumasu e na yaca i Yahuwe (YHWH). 18 Au na vakayacora oqo, na noqu bubului vei Yahuwe (YHWH) e na kedra maliwa na tamata kecekece, 19 E na lomanibai ni vale i Yahuwe (YHWH) e na loma i Yerushalayimi. Haleluya (Vakavinavinaka vei Yahuwe (YHWH).

Same (Tehellim) 116:1-19

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 139 o/o 1599	May 19, 2012
Reading	Hebrew Date
M’lakhim Bet (2 Tui) 23-25	Iyar 27, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Oti Na Kana Mana Mai Qiliqali (Eating Manah Came To An End In Gilgal)

Thought: The Commander Of YHWH’s Army In HeavenJoins Y’hoshua In Yericho

.................... 

Serving For Yom HaShishi, Iyar 26, 5772.

(NB. In Counting Days Toward Shavu’ot (Gr:Pentecost), Today Is Day 41 out of 50)

MAI NA NEVI’IMI RISHONIMI (FROM THE NEVI’IM RESHONIM)

E na gauna era rogoca kina, o ira kece na nodra tui na Emori era tiko e na tai kadua ni Yaradani vaka i na vuaira, kei ira kece na nodra tui na Kena'ani era tiko voleka i na waitui, ni a vakamamacataka o Yahuwe (YHWH) na wai mai na Yaradani e matadra na luve i Yisira'yili, me yacova ni ra sa takosova kece, e a sautaninini na vuniyalodra ka yali vakadua na kaukaua e dau tiko vei ira, baleti ira na luve i Yisira'yili. 2 E na gauna oya a qai kaya kina o Yahuwe (YHWH) vei Ye'hoshua, Bulia e dua na nomu isele vatu, mo tevei ira tale na luve i Yisira'yili e na ikarua ni gauna. 3 A mani bulia e dua na nona isele vatu o Ye'hoshua, oti qai tevei ira tale na  luve i Yisira'yili e na ikarua ni gauna mai Qiva'ata-Ha'Araloti (na delana ni vusona).  4 O ira na tagane qo e a tevei ira o Ye'hoshua; o ira kece na gone tagane era a qai sucu ni ra sa biubiu oti mai Ijipita, baleta o ira kece na tagane ni vala era a sa mate oti e na vanualiwa e na ilakolako mai Ijipita. 5 Oya baleta o ira kece na tamata era a biubiu (mai Ijipita) era sa tevei oti, ia o ira kece na tagane era a qai sucu e na vanua liwa e na era sa toso tiko kina , ni ra biubiu oti mai Ijipita era se bera tiko ni teve. 6 O ira na luve i Yisira'yili era a toso tiko e na nodra ilakolako e loma ni vanua liwa, me vasagavulu na yabaki,  me yacova ni ra sa mate oti kece o ira na tagane ni vala era a biubiu mai Ijipita   baleta era a sega ni bula muria na vosa ni nodra Kalou (Mighty One); oya o ira e a bubuluitaka vei ira o Yahuwe (YHWH) ni na sega ni vakaraitaka vei ira na  vanua a bubuluitaka vei ira na tamadra ni na solia vei ira, na vanua e dave tu kina na sucu kei na hani. 7 O ira na luvedra era a qai sucu muri i ira mai, e a tevei ira o  Ye'hoshua; baleta era a se bera tiko ni teve e na nodra ilakolako. 8 E na gauna era sa tevei oti kece kina o ira na tamata, era a qai tiko ga e na nodra dui itikotiko me yacova ni ra sa mavo. 9 Kaya o Yahuwe (YHWH) vei Ye'hoshua, E na siga e dai au sa kauta laivi kina mai vei kemuni na nodra veivakalialia na kai Ijipita. Qori a vakatokai kina na yaca ni vanua oya me o Qiliqali me yacova mai na siga oqo.

10 ¶ O ira na luve i  Yisira'yili era a qai keba toka mai Qiliqali ka ra qarava e keya na Lakosivia e na ikatinikava ni siga ni vula, e na kena yakavi, e na bucabuca mai Yeriko. 11 Era a kana ga mai na vuata ni vanua oya, e na mataka ni siga e tarava na Lakosivia, na madrai e sega ni vakaleveni kei na witi tavu era a kania e na siga vata oya. 12 Na mana a qai muduki e na mataka ni siga era a kania kina na vuata ni vanua; me tekivu mai na gauna oya o ira na luve i Yisira'yili  era a sega ni kania tale vakadua na mana; ia era a sa kana sara ga mai na vuata ni ni vanua  Kena'ani e na yabaki oya.

13 ¶ A qai yaco, e na gauna a duri tu kina mai na buca o Yeriko o Ye'hoshua, ni a matacake me rai, qai raica ni duri basai koya tu mai e dua na tagane ka sa ucuna tu mai na nona seleiwau e ligana; a mani toro yani vua o Ye'hoshua, qai tarogi koya, O iko o dua vei keimami se o dua vei ira na neimami meca? 14 Sauma mai vua o koya, O au na komada ni mataivalu i Yahuwe (YHWH), ia qo au sa lako mai i ke. A mani lutu sobu e matana me tara na dela ni qele o Ye'hoshua, me vakarokoroko vua qai kaya vua, Na cava beka e via tukuna na noqu turaga vua na nona dauniveiqaravi?  15 E kaya na komada ni mataivalu i Yahuwe (YHWH) vei Ye'hoshua, Luvata laivi na nomu ivava mai yavamu, baleta na vanua e tucake tu kina e tabu (qodesh); a vakayacora sara vaka kina o Ye'hoshua.

Josua (Ye’hoshua) 5:1-15

NA IVAQA NI BULA (FOOD FOR THE SOUL)

Na tamata cudrucudru e na dau vakatubura na veileti ia o koya e berabera na nona vakacudrui e na vakamalumutaka na veisei. 19 ¶ Na nodra sala na vucesa e levu kina na votonikau; ia na gaunisala ni yalododonu e rawarawa.

Vosa Vakaibalebale (Mishlei) 15:18-19

LOMANI YAHUWE NA NOMU KALOU (LOVE YHWH YOUR MIGHTY ONE)

Sega ni vei keimami i Yahuwe (YHWH), sega ni vei keimami, ia i na yacamuni ga, solia na dokai e na vuku ni nomuni loloma kei na dina; 2 Me kakua ni dua na vuna me ra na kaya rawa kina na veimatanitu, Evei sara na nomuni Kalou (Mighty One)? 3 Baleta na neimami Kalou (Mighty One) e tiko mai lomalagi; o koya e dau cakava na cava ga e gadreva. 4 Ia na nodra kaloumatakau na veimatanitu na siliva kei na koula, era cakacaka ni liga ni tamata 5 Era vakagusu, ia era sega ni vosa rawa; era vakamata, ia ra sega ni rai; 6 Era vakadaliga, ia era sega ni rogo: era vakaucu, ia era sega ni boi; 7 Era vakaliga, ia era sega ni vakila e dua na ka; era vakayava, ia era sega ni taubale; ka ra sega talega ni cavuta rawa na vosa mai na nodra itagitagi. 8 Laivi ira era buli i ira me ra tautauvata kei ira; ka vaka kina vei ira kece era vakararavi vei ira.

9 ¶ Na vale i Yisira'yili e vakararavi vei Yahuwe (YHWH): o koya e nodra dau ni veivuke ka nodra isasabai. 10  Na vale i Aharoni, e vakararavi vei Yahuwe (YHWH): o koya e nodra dau ni veivuke ka nodra isasabai.11 O kemuni oni rokovi Yahuwe (YHWH), ni vakararavi ga vei Yahuwe (YHWH); o  koya e nodra dau ni veivuke ka nodra isasabai. 12 O Yahuwe (YHWH) e dau kauwaitaki keda, o koya e na vakalougatataki keda; o koya e na vakalougatataka na vale i Yisira'yili; ka vakalougatataka na vale i Aharoni. 13 O Yahuwe (YHWH) e na vakalougatataki ira era sokalou vua, se ra lelevu se ra lalai. 14 O Yahuwe (YHWH) e na vakalevutaka na kemuni iwiliwili, moni le levu ka moni le levu o kemuni kei ira na nomuni lalai. 15 O kemuni na digidigi i Yahuwe (YHWH) o koya e a buli i lomalagi kei vuravura. 16 Na lomalagi, io na veilomalagi era nei Yahuwe (YHWH); ia na vuravura e  solia vei ira na luve ni tamata. 17 O ira na mate era na sega ni  vakavinavinaka rawa vei Yahuwe (YHWH), se o ira era lako sobu i na butobuto. 18 Ia o keda eda na vakavinavinaka vei Yahuwe (YHWH) mai na gauna oqo kauta yani me tawamudu. Haleluya.

Same (Tehellim) 115:1-18

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 138 o/o 1598	May 18, 2012
Reading	Hebrew Date
M’lakhim Bet (2 Tui) 20-22	Iyar 26, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Lesu Na Yaradani Ni Oti Na Takoso (The Yarden Returned After The Crossing.)

                Thought: The Yarden Crossing Shows The World That YHWH is All-Supreme

...................... 

Serving For Yom Chamishi, Iyar 25, 5772.

(NB. In Counting Days Toward Shavu’ot (Gr:Pentecost), Today Is Day 40 out of 50)

MAI NA NEVI’IMI RISHONIMI (FROM THE NEVI’IM RESHONIM)

O ira na kohanimi era a colata tiko na kato era duri tu ga e na lomadonu ni Yaradani me yacova ni caka oti kece na veika a vakarota o Yahuwe (YHWH) me tukuna vei ira na tamata, me vaka a vakarota o Moshe vei Ye'hoshua; era sa qai toso vakatotolo o ira na tamata me ra takoso. 11 Ni ra sa takoso oti kece na tamata, era sa qai takoso o ira na kohanimi kei na kato ni veiyalayalati i Yahuwe (YHWH), e matadra na tamata. 12 Oti era sa qai takoso na lewe ni mataqali i Ru'veni, o ira na lewe ni mataqali i Qoda, kei ira na lewe ni veimama na  mataqali i Ma'nashe, ni ra sa vakaiyaragi kece tu, e matadra na luve i Yisira'yili, me vaka a kaya vei ira o Moshe; 13 E rauta e le vasagavulunaudolu na tagane vakaiyaragi era vakaiyaragi ni vala, era a takoso e na mata i  Yahuwe (YHWH) me ra lai vala e na veibucabuca mai Yeriko. 14 E na siga sara ga oya, O Yahuwe (YHWH) a qai vakacerecerei Ye'hoshua  e matadra na Yisira'yili; era sa qai dokai koya kina, me vaka na nodra a dau dokai Moshe tu mai e na veisiga kece ni nona bula. 15 Kaya o Yahuwe (YHWH) vei Ye'hoshua 16 Vakaroti ira na kohanimi era colata tiko na kato ni veiyalayalayati, me ra cabe cake mai na Yaradani. 17 A qai vakaroti ira na kohanimi o Ye'hoshua, ni kaya, Cabe cake mai na Yaradani. 18 E na gauna era sa cabe cake mai kina o ira na kohanimi era a colata tiko na kato ni veiyalayalati, mai na lomadonu ni Yaradani, me sa butu dei na qeteqete ni yavadra e na vanua kaukaua ka mamaca, sa qai kui lesu na wai ni Yaradani e na kena i nono, me baci drodro vuabale e na batibati (ni uciwai) me vaka ga e liu. 19 O ira na tamata era a cabe mai na Yaradani e na ikatini ni siga ni imatai ni vula, era qai lai keba sara toka mai Qiliqali, e na iyalayala kei Yeriko vaka i na vuaicake. 20 Na vatu e tinikarua era a colata mai na Yaradani, o Ye'hoshua a qai lai tuvana cake mai Qiliqali. 21 Kaya o koya vei ira na Yisira'yili, E na gauna era na tarogi kemuni kina o ira na luvemuni e na veigauna mai muri, ni ra kaya, Na cava beka na ibalebale ni veivatu oqo? 22 Moni na qai vakamacalataka vei ira na luvemuni, e na nomuni kaya, O ira na luve i Yisira'yili era a kosova na Yaradani oqo ni sa vakamamacataki. 23 Baleta o Yahuwe (YHWH) na nomuni Kalou (Mighty One) a vakamamacataka na wai ni Yaradani e matadra, me yacova ni ra sa takoso oti kece, me vaka a vakayacora o Yahuwe (YHWH) na nomuni Kalou (Mighty One) e na Wasa Sufa, ni a vakamamacataka e mata i keimami, me yacova ni keimami sa takoso oti kece i tai kadua. 24 Me rawa ni ra  kila o ira na kai vuravura taucoko ni qaqa na liga i Yahuwe (YHWH), ka me rawa ni oni qaravi Yahuwe (YHWH) kina na nomuni Kalou (Mighty One) e veigauna kecekece me tawa mudu.

Josua (Ye’hoshua) 4:10-24

NA IVAQA NI BULA (FOOD FOR THE SOUL)

Na nodra veisiga kece na dravudravua e vakasinaiti e na bula dredre, ia o ira era dau yalo mamarau era na dau sotava tu ga na vakacegu. 16 ¶ E vinaka cake na lailai vata kei na rokovi nei Yahuwe (YHWH), mai na nodra iyau vakaitamera na vakasisila. 17 ¶ E vinaka cake na vakayakavi kakana draudrau e na tikina e kune kina loloma, ka cacalaivi na kana bulumakau uro kei na (yalo ni) veisevaki.

Vosa Vakaibalebale (Mishlei) 15:15-17

LOMANI YAHUWE NA NOMU KALOU (LOVE YHWH YOUR MIGHTY ONE)

HALELUYA (se Vakamuduo vei Yahuwe (YHWH)). Ni vakamuduo, o kemuni na dauniveiqaravi i Yahuwe (YHWH), vakalagilagitaka na yaca i Yahuwe (YHWH). 2 Laiva na yaca i Yahuwe (YHWH) me vakarokorokotaki, e na gauna oqo kei na veigauna kece mai muri. 3 Mai na cadra ni  siga,  i na vanua e na lai dromu kina, na yaca i Yahuwe (YHWH) e vakaitamera. 4 O Yahuwe (YHWH) e cecere cake vei ira na veimatanitu, na nona dokai e cecere cake tale yani i dela ni lomalagi. 5 O cei e tautauvata kei Yahuwe (YHWH) na noda Kalou (Mighty One), o Koya e vakaitikotiko mai cake,  6 Ia o cei e raica na veika era tu mai na  soqulu titobu, mai lomalagi ka vaka kina e vuravura! 7 O koya e vueti ira na dravudravua mai na kuvu ni soso, ka laveti ira era gadreva na veivuke mai na isovasova ni benu; 8 Me vakatikori ira e na kedra maliwa na turaga, io, vata kei ira na nodra ravouvou na Nona tamata. 9 E vakatikora na yalewa yava, o koya, me ra veiqaravi e vale, me ra qai yaco me ra tina mamarau vei ira na luvena. Haleluya (se Vakavinavinaka vei Yahuwe (YHWH))!

Same (Tehellim) 113:1-9

Ni ra sa toso tani mai Ijipita o ira na Yisira'yili, kei na mataqali i Ya'akove maivei ira na tamata e duidui na nodra vosa, 2 O Ya'huda, a nona ivunivuni kei Isira’yili a nona dokai. 3 Na wasawasa a raica qai dro: Na Yaradani a vakalesui. 4 Kemuni na veiulunivanua oni na veiladeyaki me vaka na sipi tagane, kei kemuni na veidelana me vaka na luve ni sipi e na qelenisipi. 5 Na cava e manati iko, o iko na wasawasa, o qai dro kina? Se o iko, Yaradani o a qai vakasukai lesu kina? 6 Se o kemuni na ulunivanua, oni ladelade kina vaka na sipi tagane; kei kemuni na veidelana, me vaka na luve ni sipi? 7 Sautaninini i vuravura, e na mata i Yahuwe (YHWH), e na mata ni Kalou (Mighty One) i Ya'akove;  8 O koya e a vukica na vatu me ra tobu wai, kei na vatu gagata me ra ivurevure ni wai.

Same (Tehellim) 114:1-8

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 137 o/o 1597	May 17, 2012
Reading	Hebrew Date
M’lakhim Bet (2 Tui) 18-19	Iyar 25, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.