Na Mate I Samisoni (Shimshon’s Death)

Thought: No Matter How Bitter, What We Meet Due To Our Sins, We Will Outgrow It.

................... 

Serving For Yom Chamishi, Tammuz 15, 5772

MAI NA NEVI’IMI RISHONIMI (FROM THE NEVI’IM RESHONIM)

Era vesuki koya na Pi'lishitimi era qai leuta laivi na yaloka ni matana, era vauci koya e na ivesu barasa, era qai kauti koya sobu i 'Azaa; me lai qaqi witi tu kina, e loma ni vale veivesu.

22 ¶ Ia na drauniuluna a qai tekivu tubu tale mai na gauna a tasivori oti kina. 23 O ira na nodra turaga na Pi'lishitimi, era a qai sosoqoni me ra cabora e dua na nodra imadrali levu vei Deiqona na nodra kalou (elohim), me nodra soqo talega ni mamarau; baleta era kaya, Na neimami kalou (elohim) sa soli i Shimishoni na keda meca i ligada. 24 Ni ra sa raici koya o ira na tamata, era qai vakacaucautaka na nodra kalou (elohim) ni ra kaya, Na noda kalou (elohim) sa solia i ligada na keda meca  o koya e dau vakacacana na noda vanua, ka dau vakamatea e le levu vei keda. 25 A qai yaco ni sa tubu sara tu ga na reki ni vuniyalodra, ni ra a qai kaya, Me kacivi mai o Shimishoni me mai vakalasalasa mada vei keda. Era qai lai kacivi Shimishoni mai vale ni veivesu; qai mai vakalasai ira o koya; era a qai vakaduri i koya tu e na maliwa ni duru (lelevu) ni vale. 26 Kaya o Shimishoni vua na gonetagane  e dau tubera na ligana, Tuberi au mada meu lai vakayamoca tu na duru e tabeya cake tu na vale oqo, meu rawa ni ravi tu mada kina. 27 Na vale era sa osota tu na tagane kei na yalewa; o ira kece na nodra iliuliu na Pi'lishitimi era tiko kina; e na dela ni vale era tu mai kina e rauta e tolunaudolu na tagane kei na yalewa, me ra saravi Shimishoni ni vakalasalasa tiko vei ira. 28 Oti qai kacivi Yahuwe (YHWH) o Shimishoni, ni kaya, I Yahuwe (YHWH) na Kalou (Mighty One), nanumi au mai, au masuti kemuni, vakaukauataki au tale  vakadua e na gauna qo, kemuni na Kalou (Mighty One), meu sauma lesu vei ira na Pi'lishitimi na yali ni (yaloka ni) mataqu ruarua. 29 Oti sa qai tara o Shimishoni, na duru rau tabeya cake tu na vale, mai loma donu, me raviti rau, qai taura e dua e na  ligana i matau, ka dua e na ligana i mawi. 30 Kaya o Shimishoni, Laiva meu mate vata kei ira na Pi'lishitimi. Sa qai dre e na nona i gu taucoko; a qai kabasu kina na vale ka ovaci ira vakadua na iliuliu kei ira na tamata kecekece era a tiko e keya. O ira e a vakamatei ira o Shimishoni, e na gauna a mate kina, era lewe levu cake mai na iwiliwili a vakamatei ira o koya e na gauna a bula voli kina. 31 Era qai lako sobu mai o ira na tacina kei ira kece na weka i tamana, era qai mai colati koya ka kauta me ra lai  buluti koya e na kedrau tadrua o Zora’a vata kei Eshita’ola, e na ibulubulu nei Manoaka na tamana. E a daunilewa tu mai Yisira'yili o koya me ruasagavulu na yabaki.

Dauniveilewai (Shof’tim) 16:21-31

NA IVAQA NI BULA (FOOD FOR THE SOUL)

Na yalo ni tamata e na vorata na nona bula dre dre; ia na yalodadatuvu; o cei e na vosota rawa? 15 ¶ Na vuniyalodra na dauvakasama e na rawata na vuku; ia na daligadra na vuku e vakatudaliga i na kilaka;

Vosa Vakaibalebale (Mishlei) 18:14-15

LOMANI YAHUWE NA NOMU KALOU (LOVE YHWH YOUR MIGHTY ONE)

E dua na Same i Dawide e na gauna a dro kina mai vei Avishalome na luvena tagane.  2(1) I Yahuwe (YHWH), sa tubu na kedra iwiliwili o ira era dau vakararawataki au. Era lewe levu era tubu mai era dausaqati au. 3(2) E levu era kaya vua na noqu bula, O iko o na sega ni vakabulai mai vua na nomu Kalou (Mighty One). 4(3) Ia o kemuni, i Yahuwe (YHWH) oni noqu isasabai, oni noqu dokai, oni dau tabea cake na uluqu.

5(4) ¶ Au a tagi vei Yahuwe (YHWH) e na domoqu, qai rogoci au mai o koya mai na nona ulunivanua tabu (kodesh). 6(5) Au koto sobu au qai moce; oti au qai yadra cake tale; baleta o Yahuwe (YHWH) a maroroi au. 7(6) Au na sega ni domobulataki ira na udolu vakaudolu na tamata era mai tu vakavolivoliti au me ra valuti au. 8(7) Tucake, i Yahuwe (YHWH) noqu Kalou (Mighty One); moni vakabulai au; baleta o kemuni oni na ravuti ira kece na kequ meca e kesudra; Oni qai vorolaka na batidra o ira era dau valavala ca. 9(8) Baleta na veivakabulai e nei Yahuwe (YHWH); kei na nomuni kalougata e toka ga vei ira na nomuni tamata.

Same (Tehellim) 3:1-8

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 186 o/o 1646	July 5, 2012
Reading	Hebrew Date
Yechezk’yl (Isikeli) 1-3	Tammuz 15, 5772
Click The Bible Text To Read It In Gateway In Another Language Or Version

     

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Yali Na Kaukaua I Samisoni (Shimshon’s Strength Left)

Thought: Our Personal Weaknesses, Can Diminish Our Personal Strengths

................ 

Serving For Yom R’vi’i, Tammuz 14, 5772

MAI NA NEVI’IMI RISHONIMI (FROM THE NEVI’IM RESHONIM)

Oti a qai lako i 'Azaa o Shimishoni, qai  a raica mai keya e dua na saqamua-saumi, qai curu vua me lai veiyacovi kei koya. 2 Qori a qai tukuni vei ira na tamata mai 'Azaa, ni kainaki, O Shimishoni e tiko qo eke. Era mani lai waraki koya tiko e na matamata e na bogi taucoko oya, ka vakasolokakana voli e na bogi taucoko me ra koya tiko,  Ni na qai cabe mai na matanisiga, o keda eda sa na vakamatei koya (oti). 3 Ia o Shimishoni a moce lutu tu ga me yacova na bogi levu tutu; a qai yadra e na bogilevu tutu, cavuta na duru ruarua ni matamata levu ni koro, laveta cake kei na kena samugakagaka, biuti rau e usouso ni tabana,qai colata laivi i na ulunivanua e toka donui Hevaroni. 4 A qai yaco e muri ni a domona e dua na yalewa, e na buca o Soreki, na yacana o Dilaila. 5 O ira na nodra turaga na Pi'lishitimi, era qai lako vua era qai kaya vua,  vakayarayarataki koya mo kila mai se tiko evei na nona kaukaua vakaitamera, mo kila talega se da na rawa vakacava ni rawai koya meda vesuki koya, me da vakamaduataki koya; keimami na qai solia vei iko, oya o keimami kece, e tinikatolu na udolu na tiki ni siliva. 6 Kaya o Dilaila vei Shimishoni, Tukuna mada vei au se tiko evei na nomu kaukaua vakaitamera, (ka tukuna talega vei au) se cava mo vesu kina mo na qai rawa vakamalumalumutaki. 7 Kaya vua o Shimishoni, Kevaka era vesuki au e na vitu na dali vau drokadroka, e se sega vakadua ni sigani, qori au na qai yaco kina meu malumalumu, meu tautauvata kei  ira na vo ni tagane. 8 O ira na nodra turaga ni Pi'lishitimi era qai kauta mai vua e vitu na dali vaudrokadroka, e se bera ni sigani, qori qai vakayagataka o koya me vesuki koya kina. 9 Ia o koya a sa vakacuruli ira oti mai eso na tagane, me ra mai vuni rawa toka e loma ni nona loqi.  Kaya vua o koya, O ira na Pi'lishitimi era sa mai vesuki iko, Shimishoni. E qai drutia o koya na dali vau, me vaka ni drutilaki na wavulovulo ni coroga na yameyame ni bukawaqa. A mani sega ni vakatakilai na nona kaukaua. 10 Kaya o Dilalaila vei Shimishoni, Raica, o iko o vakacalai au, o iko o lasutaki au; tukuna mada mai vei au qo se cava o na vesu rawa kina. 11 Kaya vua o koya, Kevaka era vesuki au vakaukaua e na dua na dali vou e sebera ni bau vakayagataki vakadua, qori au sa na qai malumalumu kina meu tautauvata kei ira na vo ni tagane. 12 A mani taura na dali vou o Dilaila,  qai vakayagataka me vesuki koya kina, oti qai kaya vua, O ira na Pi'lishitimi era sa mai vesuki iko, Shimishoni. O ira na tagane era a sa wawa kece tu e na loma ni loqi. Ia a drutia ga o koya (na dali) mai gauniligana, me vaka (e dua na) wa ni culacula.13 Kaya o Dilaila vei Shimishoni, Raica o se baci vakacalai au tale ka lasutaki au. Tukuna mada vei au se cava o rawa ni vesu kina. Kaya vua o koya, Kevaka mo talia vata kei na vulovulo na tobe vituvitu ni uluqu.  14 A mani talia o koya kei na vulovulo qai vakataudeitaka o koya e na ivakadei, oti qai kaya vua, O ira na  Pi'lishitimi era sa mai vesuki iko Shimishoni. E yadra ga mai na nona moce o koya, ka dreta laivi na ivakadei ni vulovulo. 15 Kaya na yalewa vua, E rawa vakacava vei iko mo kaya vei au, au domoni iko, ni sega mada ni tiko vata kei au na vakasama e tiko e  vuniyalomu? Raica o iko o sa vakacalai au qo vakatolu, o iko o se bera tiko ga ni vakatakila vei au se tiko evei na  nomu kaukaua vakaitamera. 16 A qai yaco ni sa vakasosataki koya tiko e  veiveisiga e na nona vosa kei na nona cike tiko, ni a vakalekalekataka na nona bula (soul) ka rawa sara ga ni vakamatei koya. 17 Sa mani talaucaka vua na vuniyalona  taucoko ni kaya vua, E se bera vakadua ni tara na uluqu e dua na itoro; baleta o au, au dua na Naziri vua na Kalou (Mighty One) me tekivu sara mai na katonigone i tinaqu; kevaka meu tasivori, qori e na kauta laivi na noqu kaukaua mai vei au, au na qai yaco meu malumalumu me vakataki ira na vo ni tagane.18 E na gauna e raica kina o Dilaila, ni sa talaucaka vua na vuniyalona taucoko,  sa qai talatala o koya vei ira na nodra iliuliu na Pi'lishitimi, ni kaya, Lako cake mai e na gauna oqo, baleta o koya e sa talaucaka vei au na vuniyalona taucoko. O ira na nodra iliuliu na Pi'lishitimi, era sa qai lako cake mai vua ka ligaligadra tiko mai na ilavo.19 A cakava o koya me moce no e duruna; qai kaciva mai na dauniveikoti me mai toroya laivi na  tobe vituvitu ni uluna; qori sa qai tekivu kina vua na yalewa me vakamalumalumutaki koya,  me sa biuti koya na nona kaukaua. 20 Sa qai kaya vua o koya, o ira na   Pi'lishitimi era sa mai vesuki iko Shimishoni. Ni yadra mai na nona moce o koya, qai kaya, Au na curu yani me vaka e na veigauna e liu, au na vakadomobulataki ira. A sega ni kila o koya ni sa biubiu mai vua o Yahuwe (YHWH).

Dauniveilewai (Shof’tim) 16:1-20

NA IVAQA NI BULA (FOOD FOR THE SOUL)

O koya e solia na isau ni taro ni se bera ni rogoca, e lialia ka na madua kina.

Vosa Vakaibalebale (Mishlei) 18:13

LOMANI YAHUWE NA NOMU KALOU (LOVE YHWH YOUR MIGHTY ONE)

NA cava era sa cudru tiko kina na Veimatanitu ka vakananuya tiko kina na veika tawayaga? 2 Era sa veibuku na tui kei vuravura kei ira na daunivakavulewa ka ra sa bose vata me ra saqati Yahuwe (YHWH) ka saqati ira na nona lumuti ni ra kaya, 3 Laiva meda drutia na kedra ivau, ka kolo laivi mai vei keda na nodra dali. 4 O koya e vakaitikotiko mai lomalagi  e na dredre; o Yahuwe (YHWH) e na vakalialiai ira; 5 E na qai vosa vei ira o koya e na nona leva, ka vakarerei ira e na nona leva waromisa; ni kaya, 6 Au sa lesia na noqu tui, e na noqu ulunivanua tabu;

7 ¶ Me vakatusa na noqu yalayala; e kaya vei au o Yahuwe (YHWH), O iko na luvequtagane, e na siga oqo, au sa vakatuburi iko; 8 Kerea maivei au, au na solia vei iko na veimatanitu tani me ra nomu ivotavota, kei na iyalayala kei vuravura mo vakavulewa kina. 9 O na liutaki ira e na ititoko kaukamea: o na voroki ira me ra matailailai me vaka na nona bilo na dautuli kuro.

10 ¶ Moni yalomatua e na gauna oqo, kemuni na tui; ni vuli o kemuni na daunilewa e vuravura; 11 Qaravi Yahuwe (YHWH) e na vakarokoroko, tokoni koya cake e na sautaninini; 12 Vakarokoroko vua e na yalo savasava, de qai cudru o koya, oni qai vakarusai mai na nona sala, ni se waqawaqa tiko ga vakalailai na nona cudru. Era na vakacegui o ira kece era vakararavi vua.

Same (Tehellim) 2:1-12

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 185 o/o 1645	July 4 2012
Reading	Hebrew Date
Yirmeyahu (Jeremaia) 52	Tammuz 14, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Na Sui Mai Na Kesuni Asa. (The Jaw Bone Of An Ass)

Thought: Shimshon Acted When The Spirit Of Yahweh Was Upon Him

 .....................

Serving For Yom Shlishi, Tammuz 13, 5772

MAI NA NEVI’IMI RISHONIMI (FROM THE NEVI’IM RESHONIM)

Ia a qai yaco ni oti e dua na gauna lekaleka, e na gauna me dau tamusuki kina na witi, ni a lai raici watina o Shimishoni, ka kauta voli yani e dua na luve ni me, me nona isevusevu; qai kaya sara, Au se lako mada vei watiqu e na loma loqi. A sega ni solia vua o tamana me lako i loma o koya. 2 Kaya o tama i yalewa, Au nauma sara ga ni o sa sevaki koya sara ga vakaukaua; qori au a soli i koya kina vua e dua vei ira na nomu icaba vakataganevou; raici tacina gone mada, o koya e  matavinaka cake vei tuakana, tauri koya me isosomi kei watimu. 3 Kaya o Shimishoni vei ira, Qo au sa na qai sega ni beitaki rawa mai vei ira  na  Pi'lishitimi, e dina ga niu sa na cakava vei ira, meu vakacacani ira. 4 A mani lako o Shimishoni, lai toboka e tolunadrau na fokisi, taura mai eso na icina barawa, vesuka vata na buidra na fokisi, me ra yarurua; vesuka na icina barawa e na kedra maliwa na fokisi, oya e na maliwa ni buidra. 5 Oti sa qai waqaca na icina, qai laivi ira na fokisi me ra cici i na maliwa ni nodra veiwiti na Pi'lishitimi era se duri tu, qori qai vakama kina na witi era sa tamusuki oti, na witi era se duri tu, ka vaka kina na veivaini kei na veiolive. 6 Era mani vakatataro o ira na  Pi'lishitimi, O cei a cakava na ka oqo?  Era sauma, O Shimishoni, na vugona na kai Timinaa, baleta o koya e a kauti watina qai solia i koya vua e dua vei ira na nona icaba vakataganevou. Era mani cavutu mai na Pi'lishitimi, era qai lai vakamai (yalewa) vata kei (na matavuvale) i tamana e na bukawaqa. 7 Kaya vei ira o Shimisoni, Baleta ni oni cakava na ka oqo, o au, au na sausaumi lesu vei kemuni, ia ni oti oya au na qai vakacegu. 8 E a samuti ira o koya, dibidra kei na sagadra, e na dua na veivakamatei vakaitamera; oti qai dro me lai vakaitiko e na loma ni dua na qaravatu mai Eitami.

9 ¶ Era mani toso na Pi'lishitimi, era qai lai keba vakaivalu toka mai Ya'huda, ka ra wasewase vakalalai me ra kovuta na vanua kece me yaco sara i Leki. 10 Era vakatataro o ira na tagane ni Ya'huda, Na cava oni lako mai kina, moni mai saqati keimami? Era sauma, Keimami lako mai me keimami mai vesuki Shimishoni, me keimami cakava lesu vua na ka a cakava vei keimami o koya. 11 Era mani lako e tolunaudolu na tagane ni Ya'huda, i na qaravatu mai  Eitami, era qai kaya vei Shimishoni, O sega beka ni kila ni ra noda iliuliu o ira na Pi'lishitimi? Na cava o sa cakava qo vei keimami? Kaya o koya vei ira, Na ka ga era a cakava vei au, au a cakava lesu tale vei ira. 12 Era kaya sara vua, Ia keimami sa lako tiko mai oqo me keimami mai vesuki iko, me keimami soli i iko i ligadra na Pi'lishitimi. Kaya vei ira o Shimishoni, Bubului mada vei au ni oni na sega ni vakamavoataki au o kemuni vakataki kemuni. 13 Era kaya vua, Sega; ia keimami na vesuki iko ga, ka soli i iko i ligadra; keimami na sega vakadua ni vakamatei iko. Era mani vesuki koya e na rua na na dali vovou, era qai kauti koya cake mai na loma ni qaravatu. 14 Ni sa yaco mai i Leki o koya, era qai kaikaila na Pi'lishitimi era qai tu me ra sa vakamatei koya, ia qai sobuti koya vakaukaua na yalo i Yahuwe (YHWH), qai vuki na dali e vesu tu kina na gauniligana me vaka na wa (flax), ni kama e na bukawaqa, qai tasere na kena ivesu mai ligana. 15 Qai raica o koya e dua na sui vou kaukaua ni kesuni (dua na) asa, a mani dodoka na ligana, tomika cake, qai vakayagataka qori me mokuta mate kina e duanaudolu na tagane. 16 Kaya o Shimishoni, E na sui ni kesuni dua na asa, au binia cake kina e dua na ibinibini; e na sui ni kesuni dua na asa au mokuta mate kina e duanaudolu na tagane. 17 A qai yaco, ni vosa oti, ni a kolo laivi o koya na sui ni kesuni asa mai ligana, qai vakatoka me yaca ni vanua oya o Ramati-Leki (Jawbone Height).18 Oti qai yaco vua e dua na karamaca vakaitamera, qai mani kacivi Yahuwe (YHWH), ni kaya, Oni sa solia e dua na veivueti levu vua na nomuni dau ni veiqaravi; ia qo au sa na qai mate beka e na ilevu ni karamaca; meu lutu i ligadra na tawateve? 19 O Yahuwe (YHWH) a qai dolava e dua na vanua lolovira mai Leki me vure mai kina na wai; ia ni sa gunu oti o koya sa qai lesu tale mai na yalona, me vakabulabulataki koya tale; qori qai vakatoka kina me yacana o Eini-HaKorei (na nona toevu o koya e a kaci) me yacova mai na siga nikua. 20 O koya a daunilewa tiko e Yisira'yili me ruasagavulu na yabaki, e na nodra gauna na Pi'lishitimi.

Dauniveilewai (Shof’tim) 15:1-20

NA IVAQA NI BULA (FOOD FOR THE SOUL)

Na iyau ni tamata vutuniyau e nona korolevu qaqa; ia na nona itikotiko e viribaiti e na lalaga kaukaua. 12 ¶ Ni se bera ni yaco na rusa, na vuniyalo ni dua na tamata e na qaciqacia; ia ni se bera na qoroi, e na kune ga na yalomalumu;

Vosa Vakaibalebale (Mishlei) 18:11-12

LOMANI YAHUWE NA NOMU KALOU (LOVE YHWH YOUR MIGHTY ONE)

E KALOUGATA na tamata e sega ni dau muria na nodra ivakavuvuli na tamata ca se bulamuria na nodra ivakasala na valavala ca se dau toka vata kei na nodra ilala o ira era dau veivakasewasewani. 2 Baleta na nona reki e teki toka ga e na lawa i Yahuwe (YHWH), ia e na nona lawa oya, na vuniyalona e na dau vakasamataka tiko e na siga kei na bogi. 3 E na qai tautauvata kei na vunikau e tei e na bati ni wai drodro, na drauna e na sega ni mimira; ia na cava ga e tekivu me vakayacora, e na rawata.

4 ¶ O ira era valavala ca era sega ni vakakina, baleta ni ra vaka na qaniwiti, e dau vukataka laivi na cagi ni liwava. 5 O koya oqo era na sega ni vakadonui kina o ira na tamata itovo vakasisila ni sa tau na lewa se o ira na tamata ivalavala ca e na nodra isoqosoqo na yalododonu; 6 Baleta o Yahuwe (YHWH) e kila na nodra ivalavala na yalododonu; ia na nodra ivalavala na vakasisila e na rusa.

Same (Tehellim) 1:1-6

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 184 o/o 1644	July 3, 2012
Reading	Hebrew Date
Yirmeyahu (Jeremaia) 51	Tammuz 13, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Na Laione Kei Na Hani (The Lion and The Honey)

Thought: YHWH’s Will, Cannot Be Avoided; It Will Come To Pass Eventually

.................... 

Serving For Yom Sheini, Tammuz 12, 5772

MAI NA NEVI’IMI RISHONIMI (FROM THE NEVI’IM RESHONIM)

O Shimishoni a qai lako sobu i Timinaa, qai raica kina e dua na yalewa mai Timinaa vei ira na luvedra yalewa na  Pi'lishitimi. 2 A mani lesu cake tale, qai lai vosa vei tamana kei tinana ni kaya, Au a raica e dua na goneyalewa mai Timinaa vei ira na luvedra yalewa na Pi'lishitimi; drau lai kauti koya mai i ke, me mai watiqu. 3 Rau kaya vua o tamana kei tinana, Sa sega sara beka ga na yalewa vei ira na luvedra yalewa na weka i tamamu se vei ira kece na nomu tamata, mo lai vinakata kina mo taura mai e dua na watimu mai vei ira na Pi'lishitimi tabuteve? Kaya o Shimishoni vei tamana, Kauti koya mai vei au, baleta e talei sara ga vakalevu vei au o koya. 4 Ia o rau o tamana kei tinana rau a sega ni kila ni vakavuna tiko qo o Yahuwe (YHWH), me rawa ni sausaumi lesu kina vei ira na Pi'lishitimi; baleta e na gauna oya o ira na Pi'lishitimi era lewai ira tu na Yisira'yili. 5 A mani lako sobu o Shimishoni, vata kei rau o tamana kei tinana i Timinaa; ia ni ratou yaco i na loga ni vaini mai  Timinaa; raica, ni kudruvi koya mai e dua na laione gone. 6 Na Yalo i Yahuwe (YHWH) a sobuti koya mai, qai basuraka kina na laione o koya, me vaka ni basuraka e dua na luve ni me, ia a sega ni dua na ka a tiko e ligana: ia qai sega ni tukuna vei tamana se vei tinana na ka a cakava. 7 Ratou lako sobu sara ratou qai vosa vua na yalewa; sa qai domoni koya ga vakalevu o Shimishoni. 8 Ni oti e dua na gauna lekaleka sa qai lesu o koya me lai tauri koya, ia qai   lako vakatikitiki me raica na yago ni laioni; ia raica, ni dua na isoso pi, era sa tiko e na yago ni Iaioni. 9 E a yakuta mai e ligana eso na hani, qai toso sara tiko ka kania colacola tiko yani; ia ni sa yaco yani vei tamana kei tinana a qai solia vei rau eso na hani, rau qai kania; ia a sega ga ni tukuna vei rau  o koya ni a kauta mai, mai na loma ni yago ni laione.

10 ¶ A mani lako sobu o tamana vua na goneyalewa; o Shimishoni a qai vakayacora e dua na solevu ni vakamau me vitu na siga, baleta qori na kena ivalavala vei ira na cauravou e na gauna oya. 11 Ni ra sa raici koya, era qai lako mai e tolusagavulu na tagane me ra mai nona  icaba vakataganevou (groomsmen). 12 Kaya o Shimishoni vei ira, E na gauna qo, au na cavuta kina vei kemuni e dua na icavucavuti tawamacala; kevaka oni rawa ni walia vei au e na loma ni siga vitu ni solevu, moni kunea mai na kena ibalebale, ia o au, au na solia vei kemuni e tolusagavulu na kote tiyara cula mai na isulu vavaku, kei na tolusagavulu na nomuni veisau. 13 Ia kevaka oni sega ni walia rawa vei au, ia o kemuni moni solia vei au e tolusagavulu na kote tiyara cula mai na isulu vavaku kei na tolusagavulu na isulu ni veisau. Era kaya sara mai vua, Solia mai vei keimami na icavuti tawamacala, me keimami rogoca. 14 Kaya vei ira o koya, Mai vua na dauveikana, e lako mai e dua na ka e rawa ni laukana, mai na ka e gaga, e lako mai e dua na ka kamikamica. Ni sa lai oti e tolu na siga era se bera tiko ga ni kunea na iwali ni icavucavuti tawakilai. 15 Ia e na ikava ni siga, era qai lai tukuna vua na wati i Shimishoni, Vakasagai watimu, me rawa vua me vakatakila mai vei keimami na iwali ni icavucavuti tawamacala, baleta ke sega keimami na vakamai iko kei na lewe ni matavuvale i tamamu e na bukawaqa, keimami na qai kovea na veika dou taukena. 16 A qai lai tagitagi vei Shimishoni o  watina, ni kaya, O iko o cati sara ga vakaidina, o sega ni domoni au; o sa mai cavuta sara tu e dua na icavucavuti vei ira na kainoqu, ia o se bera vakadua ni tukuna vei au. Kaya vua o koya, Au se sega talega ni tukuna vei tamaqu se vei tinaqu, na cava meu tukuna kina vei iko? 17 E tagitagi tu ga o koya (e na vo ni) vitu na siga oya, ni nodrau solevu; a qai yaco e na ikavitu ni siga ni a qai tukuna vua o koya, baleta na nona vakasosataki koya tiko; o koya a qai lai tukuna vei ira na kainona.18 O ira na tagane ni korolevu era qai tukuna vua e na ikavitu ni siga, ni sebera ni dromu na siga (me tekivu na kana magiti), Na cava e kamikamica cake mai na hani? Na cava e kaukaua cake mai na laione? Kaya o Shimishoni vei ira, kevaka oni a sega ni siviyara vata kei na noqu bulumakau yalewa gone, ke oni a sega ni walia rawa na noqu icavucavuti tawamacala.19 A qai baci sobuti koya na yalo i  Yahuwe (YHWH), a qai lako sobu o koya i Ashekaloni, lai vesuka e tolusagavulu vei ira na nodra tagane, vakamatei ira, taura na nodra isulu, qai solia vei ira era a walia ni nona icavucavuti tawakilai, A tubu na nona yalokatakata qai lesu i na vale i tamana. 20 Na wati i Shimishoni, o koya e domona dina o koya, a qai soli me watina e dua vei ira na nona icaba vakataganevou

Dauniveilewai (Shof’tim) 14:1-20

NA IVAQA NI BULA (FOOD FOR THE SOUL)

O koya talega e yaloberabera e na nona cakacaka e veitacini kei koya e dau veivakarusai. 10 ¶ Na yaca i Yahuwe (YHWH) e dua na valecere kaukaua; o ira na yalododonu kei ira na qaqa era dau dro kina.

Vosa Vakaibalebale (Mishlei) 18:9-10

LOMANI YAHUWE NA NOMU KALOU (LOVE YHWH YOUR MIGHTY ONE)

HALELUYA. Vakavinavinakataka na Kalou (Mighty One) e na loma ni nona itikotiko tabu; Vakavinavinakataki koya e na macawa ni nona kaukaua. 2 Vakavinavinakataki koya e na vukuni cakacaka lelevu sa cakava oti; Vakavinavinakataki koya e na daumaka ni nona cecekia. 3 Vakavinavinakataki koya e na voqa ni domo ni biukila: vakavinavinakataki koya e na soliteri kei na hapi. 4 Vakavinavinakataki koya e na tibereli kei na ivakatagibitu vata kei na rogo kamica ni ivakatagi vakawa ni qiriqiri. 5 Vakavinavinakataki koya e na simibali rogo levu; vakavinavinakataki koya e na lagalagasere ni lewevuqa. 6  Laiva na veika kece vakaicegu me ra vakavinavinakataki Yahuwe (YHWH). Haleluya!

Same (Tehellim) 150:1-6

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 183 o/o 1643	July 2, 2012
Reading	Hebrew Date
Yirmeyahu (Jeremaia) 45-48	Tammuz 12, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Sucu O Samisoni (Shimshon Is Born).

Thought: YHWH Keeps His Words for Good Or Evil, Thus We Need To Fear Him

.................... 

Serving For Yom Rishon, Tammuz 11, 5772

MAI NA NEVI’IMI RISHONIMI (FROM THE NEVI’IM RESHONIM)

Oti sa qai kaya o Manoaka vua na mala'aka i Yahuwe (YHWH), laivi keirau, me keirau tarovi iko me rawa ni keirau lai vakarautaka mai vei iko e dua na luve ni me. 16 Kaya na mala'aka i Yahuwe (YHWH) vei Manoaka, E rawa ni drau tarovi au, ia au na sega ga ni kania na kemudrau kakana; ia kevaka drau via cabora e dua na isorokama, ia mo drau cabora ga vei Yahuwe (YHWH). O Manoaka  a sega ni kila ni o koya (e dua) mala'aka i Yahuwe (YHWH). 17 Kaya o Manoaka vua na mala'aka i Yahuwe (YHWH), O cei beka na yacamuni, me rawa ni keirau (kaciva ka)vakarokorokotaka na yacamuni e na gauna sa yaco kina na nomuni vosa? 18 Sauma na mala'aka i Yahuwe (YHWH) vua, Na cava o vakataroga kina na yacaqu; qori na ka vunitaki.19 A mani kauta o Manoaka na luve ni me kei na kena isoro laukana qai lai cabora e na dela ni vatu vei Yahuwe (YHWH). Na mala'aka a qai vakacaucautaki Yahuwe (YHWH) ni rau rai tu yani o Manoaka vata kei watina. 20 Ni sa caudre cake i lomalagi na  yame ni bukawaqa mai na dela ni vatu, na mala'aka i Yahuwe (YHWH) a qai cabe lesu e na yameyame ni bukawaqa mai na icabocabo ni soro. O Manoaka kei watina ni rau sa raica qori, rau qai lutu sobu e matadrau, i na dela ni qele, me rau vakarokoroko. 21 Na mala'aka i Yahuwe (YHWH) a sega tale vakadua ni rairai vei Manoaka se vua na watina. Oti qori, rau sa qai (vakadinadinataka) ni o koya e dua na  mala'aka i Yahuwe (YHWH). 22 Kaya o Manoaka vua na watina, O kedaru, daru na mate dina, baleta daru sa raica na Kalou (Mighty One). 23 Ia qai kaya vua o watina, Kevaka a a lomana na Kalou (Mighty One) me vakamatei kedaru, ke a sega ni ciqoma na nodrau isorokama kei na kena isoro laukana mai vei kedaru, ke a sega talega ni vakaraitaka vei kedaru na vei ka kece oqo, e na gauna oqo, ka sega talega ni tukuna vei kedaru na mataqali vosa vakaoqo. 24 Na yalewa a qai vakasucuma e dua na luvena tagane, qai vakatokara me   yacana o Shimishoni; a qai tubu na gone, ka vakalougatataki koya o Yahuwe (YHWH). 25 Na Yalo i Yahuwe (YHWH) a qai tekivu me vakavuna na nona dau lako o Shimishoni vata kei ira na mataivalu ni Dani (Mahane-Dani), e na maliwa kei  Zoraa vata kei Eshata'ola.

Dauniveilewai (Shof’tim) 13:15-24

NA IVAQA NI BULA (FOOD FOR THE SOUL)

Na vosa ni tamata yalobalavu e na kauta mai vua na leqa, ka na vakavuna me siro sobu i na loqi e loma mai She’ola.

Vosa Vakaibalebale (Mishlei) 18:8

LOMANI YAHUWE NA NOMU KALOU (LOVE YHWH YOUR MIGHTY ONE)

HALELUYA. Lagata vei Yahuwe (YHWH) e dua na sere vou kei na veivakacaucautaki e na loma ni nodra isoqosoqo na digitaki. 2 Laivi Yisira'yili me reki e na vukuna o koya e a buli i koya; laivi ira na lalai ni Saiyoni me ra mamarau vua na nodra Tui. 3 Laivi ira me ra vakacaucautaka na yacana e na tibareli kei na soliteri; laivi ira me ra lagata na nodra veivakacaucautaki vua e na hapi; 4 O Yahuwe (YHWH) e dau marautaki ira na nona tamata; e sa solia na veivueti vei ira na dravudravua. 5 Laivi ira na yalododonu me ra vakaitamera e na dokai; laivi ira me ra vakavinavinakataki koya e na nodra loga.

6 ¶ Laiva me ra vakacerecerei Yahuwe (YHWH) mai gusudra, ni ra qumia tu e ligadra na seleiwau batirua, 7 Me ra vakayacora na veisausaumi vei ira na tawalotu (heathen) ka veitotogitaki vei ira na tamata, 8 Me ra vesuki ira na nodra tui e na ivesu ni yava kei ira na nodra turaga (nobles) e na sinucodo kaukamea; 9 Me ra vakayacora vei ira itotogi volai; ka vakarokorokotaki irakece na digitaki. Haleluya!

Same (Tehellim) 149:1-9

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 182 o/o 1642	July 1, 2012
Reading	Hebrew Date
Yirmeyahu (Jeremaia) 42-44	Tammuz 11, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Kunekunetaki E Dua Na Naziri (A Nazir Is Conceived)

Thought: YHWH Intervenes To Save A Stiff-Necked Yisra’yl, That Never Learn!

................... 

Serving For Shabbat, Tammuz 10, 5772

MAI NA NEVI’IMI RISHONIMI (FROM THE NEVI’IM RESHONIM)

O ira na luve i  Yisira'yili era baci tekivu tale me ra vakarautaka na ivalavala vakasisila e na mata i Yahuwe (YHWH); a mani soli ira laivi o Yahuwe (YHWH) i na ligadra na Pi'lishitimi, me vasagavulu na yabaki. 2 Ia e a tiko voli (e na gauna oya) e dua na tagane mai Zoraa, e na mataqali i Dani, na yacana o Manoaka; o watina a yava tu, ka se bera (kina) vakadua ni vakaluvea. 3 E dua na mala'aka i Yahuwe (YHWH), a qai rairai vua na yalewa qai kaya vua, Raica o iko o yava, o se bera kina ni vakaluvea vei ira na lalai; ia qo o sa na kunekune mo vakasucuma e dua na luvemu tagane. 4 O koya oya mo qaqarauni vinaka kina; de lakolako o na qai gunuva na waini se gunu kaukaua; o iko mo kakua vakadua ni kania e dua ga na ka e sega ni savasava. 5 Baleta raica, o iko o sa kunekune, o na qai vakasucuma e dua na luvemu tagane; ka me kakua ni dua na itoro me tara na uluna; baleta na gone e na dua na Naziri vua na Kalou (Mighty One) mai na loma ni katonigone; o koya e na qai tekivu me vueti ira na luve i Yisira'yili  mai ligadra na Pi'lishitimi. 6 Oti qai lako na yalewa me lai tukuna vei watina, ni kaya, E dua na tagane mai vua na Kalou (Mighty One) a lako mai vei au; na kena irarai e vaka na irairai ni dua na mala'aka ni Kalou (Mighty One); au a domobula sara ga kina vakalevu. Au a sega ni taroga vua se lako mai vei, o koya talega a sega ni tukuna vei au na yacana. 7 Ia o koya ga e kaya vei au, Raica, o iko o sa kunekune tiko, o iko o na qai vakasucuma e dua na luvemu tagane; ia mai na gauna sara ga qo kauta yani, o iko mo kakua ni gunuva na waini se na gunu kaukaua, ka mo kakua talega ni kania na cava ga e sega ni savasava; baleta na gone e na dua na Naziri vua na Kalou (Mighty One), mai loma ni katonigone me yacova sara na siga ni nona mate. Oti sa qai vakamamasu o Manoaka vei Yahuwe (YHWH) ni kaya, Au kerei kemuni i Yahuwe (YHWH), moni laiva na tamata ni Kalou (Mighty One), o koya oni a tala mai, me lako tale mada mai  me mai vakatavulici keirau e na veika me keirau na cakava vua na gone e vakarau sucu. 9 O Yahuwe (YHWH) a rogoca na domo i Manoaka; qai lako tale mai kina na  mala'aka ni Kalou (Mighty One) vua na yalewa ni dabe tiko mai na were. Ia o Manoaka na watina a sega ni tiko vata kei koya (e na gauna oya.) 10 A mani cici vakatotolo sara na yalewa  me lai tukuna vei watina; e kaya vua o koya, Raica na tagane sa rairai tale mai vei au, o koya e a lako mai vei au e na siga oya. 11 E tu sara mai o Manoaka, qai lako vata kei watina, ia ni rau sa lako yani vua na tagane, qai tarogi koya,  O iko beka na tagane o a vosa vua na yalewa oqo? Sauma o koya, Io o au. 12 Kaya o Manoaka, Laiva na nomu vosa me na yaco; ia (vakamacalataka mada) na ivalavala me na tuberi cake mai kina, me keirau kila se cava me keirau na cakava vua? 13 Kaya na mala'aka i Yahuwe (YHWH) vei Manoaka, Na ka kecega au a tukuna vua na yalewa, laivi koya me qarauna vinaka. 14 O koya me kakua ni kania e dua na ka e tubu mai na vaini, ka me kakua talega ni gunu waini se gunu kaukaua, se kania e dua na ka e sega ni savasava; na ka kece au a vakarota vua, laivi koya me vakamuria.

Dauniveilewai (Shof’tim) 13:1-14

NA IVAQA NI BULA (FOOD FOR THE SOUL)

Na tebenigusu ni lialia e goleva na veileti; na gusuna e na kauta mai vua na mate. 7 Na gusu ni lialia e nona irusarusa, na tebenigusuna e na corita na nona bula (soul).

Vosa Vakaibalebale (Mishlei) 18:6-7

LOMANI YAHUWE NA NOMU KALOU (LOVE YHWH YOUR MIGHTY ONE)

HALELUYA. Vakavinavinaka vei Yahuwe (YHWH) mai lomalagi; vakavinavinaka vua mai na veivanua cecere. 2 Vakavinavinaka vua, kemuni kece na nona mala’akimi; vakavinavinaka vua, kemuni na nona mataivalu. 3 Vakavinavinaka vua, matanisiga kei na vula: vakavinavinaka vua, kemuni na kalokalo kecekece kei na rarama. 4 Vakavinavinaka vua, na lomalagi ni lomalagi e cake kei na wai e dela ni lomalagi. 5 Laivi ira me ra vakavinavinakataka na yaca i Yahuwe (YHWH); baleta ni a vosa era qai buli. 6 O koya talega e sa vakataudeitaki ira me tawamudu ka tawamudu; e sa vakaduria e dua na lewa e na sega ni tini.

7 ¶ Vakavinavinaka vei Yahuwe (YHWH) mai vuravura, o kemuni na gata lelevu, kei na veika kece e na butoni titobu: 8 Na bukawaqa kei na uca-qereqeqere; na uca cevata kei na waicevata, na cagilaba era vakayacora tiko na nona lewa; 9 Na ulunivanua kei na veidelana kecekece; na kauvuata vuavua i vinaka kei na sitari kecekece:10 Na manumanu kila kei na manumanu manoa kei na manumanu vakatabana; 11 Na tui kei vuravura kei na tamata kecekece; na turaga kei na turaga ni lewa kecekece kei vuravura; na ravouvou kei ira kece na daunilewa e vuravura; 12 Ruarua na gonetagane kei na goneyalewa; na tagane qase kei ira na cauravou; laivi ira me ra vakacaucautaka na yaca i Yahuwe (YHWH). 13 Baleta na yacana duadua (ga) e vinaka vakaoti; na nona dokai e toka e vuravura ka vaka kina mai lomalagi. 14 O koya e vakacerecerea talega na   nodra totoka na nona tamata, na nodra vakavinavinakataki na nona tamata digitaki kecekece; io, bau kina o ira na luve i Yisira'yili, e dua na matatamata era voleka vua. Haleluya.

Same (Tehellim) 148:1-14

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 181 o/o 1641	June 30, 2012
Reading	Hebrew Date
Yirmeyahu (Jeremaia) 39-41	Tammuz 10, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Qeyavu O ira na Midiyani (The Midyani Was Devastated)

Thought: YHWH Fights Our Wars If We Follow Him

 .....................

Serving For Yom R’vi’i, Sivan 30, 5772 (Rosh Chodesh)

MAI NA NEVI’IMI RISHONIMI (FROM THE NEVI’IM RESHONIM)

E wasei ira na tolunadrau na tamata me tolu na kabani, qai solia i ligadra me ra yadua na davui; me ra yadua tale ga na saqaqele (pitcher) lala, kei na icina barawa e loma ni saqaqele. 17 Kaya vei ira o koya, Vakaraici au matua, ka vakatotomuria na ka kece au cakava; raica niu sa lako i daku ni keba,  vakatotomuria na veika kece au na cakava. 18 Niu sa uvuca na davui (shofar), o au kei ira kece na tamata era tiko vata kei au,  o kemuni talega moni uvuca na nomuni davui, mai na veiyasa ni keba taucoko, moni qai kailavaka, Na seleiwau i Yahuwe (YHWH) vata kei Qidi'oni. 19 A mani lako o Qidi'oni, kei na tamata le duanadrau era tiko vata koya, i na ibili ni nodra keba, donuya na gauna me tekivu kina o ira era vakatawa e na lomadonu ni bogi; oya ni ra se qai tekivu sara ga e dua na matayadra vou,  e na gauna qori era uvuca kina na davui ka voroka na saqaqele. 20 Na kabani tolutolu era qai uvuca vata na davui ka vorolaka na saqaqele, era sa qai taura tu na icinabarawa e ligadra imawi, kei na davui e ligadra imatau era qai kailavaka, Na seleiwau i Yahuwe (YHWH) vata kei Qidi'oni. 21 Era sa qai mai duri tu yani e na nodra dui tikina wavolita na keba o ira na tamata; era qai dui cici na lewe ni mataivalu, era uvuca na davui era qai dui dro. 22 Ni ra sa uvuca tiko na davui o ira na le tolunadrau, o Yahweh a qai vakauqeti ira na tamata yadua me ra ravuta na dui kai nodra e na iseleiwau; qori a yaco vei ira na lewe ni mataivalu taucoko; na mataivalu taucoko era qai dro me yaco sara i Beiti-Shitaa mai Ze'reraa, ka yaco talega i na iyalayala i 'Aveli-Me'kolaa, e toka e na yasa i Tabata. 23 O ira na tagane ni Yisira'yili era sosoqoni mai Nafitalai, mai Asheri, ka vaka kina mai Ma'nashe, era qai cemuri ira na Midiyani. 24 O Qidi'oni a qai talai ira na dau ni kauitukutuku  i na ulunivanua taucoko o Ifira'yimi, ni kaya, Ni lako sobu mai moni mai saqati ira na Midiyani, moni kovea na veitoevu wai me yaco sara i Beiti-Baraa e toka e na bati ni Yaradani. Era qai mani sosoqoni mai o ira kece na tagane ni  Ifirayimi, era qai kovea na veitoevu wai kece me yaco sara i Beiti-Baraa e na bati ni Yaradani. 25 Era qai vesuka e rua na ravouvou ni Midiyani, o Oreva kei Ze'evi; era qai vakamatei Oreva mai Zora, ia o Ze'evi era a vakamatea mai Beiti-Kabaraba; ka cemuri ira tiko na Midiyani; era qai kauta lesu mai na qavokavoka i Oreva kei Ze'evi vei Qidi'oni e na tai kadua ni Yaradani.

Dauniveilewai (Shof’tim) 7:16-25

NA IVAQA NI BULA (FOOD FOR THE SOUL)

E dua na icaba e dauloloma e veigauna kece; ia e dua na tacida e sucu mai me baleta na veigauna ni tu leqaleqa; 18 ¶ Na tamata lialia e bubuluitaki koya vakataki koya, ka na yaco me ivakadei vei ira na nona icaba.

Vosa Vakaibalebale (Mishlei) 17:17-18

LOMANI YAHUWE NA NOMU KALOU (LOVE YHWH YOUR MIGHTY ONE)

MAIVEI Davide. Au na vakavinavinaka vei kemuni Yahuwe (YHWH) e vuniyaloqu taucoko; e matadra na tui au na lagasere ni vakavinavinaka vei kemuni. 2 Au na sokalou e na loma ni nomuni valenisoro tabu, au vakacerecerea na yacamuni e na vuku ni nomuni yalololoma kei na nomuni dina; baleta oni sa vakamatataka vakalevu na nomuni vosa, me uasivia cake na yacamuni mai na veiyaca kece tale eso. 3 E na siga au a tagici kemuni kina oni a rogoci au, vakalevutaka na kaukaua ni noqu bula (soul). 4 O ira kece na tui e vuravura era na vakamuduo vei kemuni i Yahuwe (YHWH), baleta era sa rogoca na vosa ni gusumuni. 5 Io, era na vakacerecerea na ivalavala i Yahuwe (YHWH); baleta ni ka levu na dokai nei Yahuwe (YHWH).

6 ¶ E dina ga ni cecere o Yahuwe (YHWH), ia e rawa ga vua me raici ira era a vakalolovirataki; o ira era qaciqacia e kilai ira tu yani vakayawa. 7 E dina ga niu taubale tiko e na maliwa ni leqaleqa, o kemuni oni na vueti au, oni na dodoka yani na ligamuni moni saqata na nodra leva na kequ meca, na ligamuni imatau e na vueti au. 8 I Yahuwe (YHWH), vakotora na ligamuni imatau vei au; na nomuni yalololoma i Yahuwe (YHWH) e na tudei tu me tawamudu; kakua ni vakanadakuya na cakacaka ni ligamuni.

Same (Tehellim) 138:1-8

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
Blog No. 171 o/o 1631	June 20, 2012
Reading	Hebrew Date
Yirmeyahu (Jeremaia) 17-18	Sivan 30, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.