Sa Lako Tiko Mai Na Mesaia (The Messiah is Coming) .

This is the last of the 2008 series of Bible readings. Tomorrow I begin the new 2009 series. I hope you have a Prosperous New Year.

---------------------------------------------------------------------------

Serving for the 31st December, 2008

“Raica, au na lako yani vakatotolo; e kalougata o koya e galeleta na vosa ni parofisai e na ivola oqo.”
Vakatakila 22: 7

“Raica, Au sa lako yani, ka sa tiko vei Au na Noqu icovi, meu lai veisoliyaka vei ira kece, ia me veiraurau kei na nodra dui cakacaka. 13 “O au na Alefa kei na Tau, na ivakatekivu kei na ivakataotioti, na imatai kei na imurimuri. 14 “Me ra kalougata o ira era vakayacora tiko na Nona ivakaro, me rawa ni ra taura na nodra dodonu i na vunikau ni bula, ka me ra curu talega e na veimatamata ni korolevu. 15 “Baleta e tuba, era na vo tu kina na koli, na dauvakatevoro, na dauveidauci, na daulaba, na daulotutaki matakau kei koya e taleitaka me dau lasulasu.
16 ¶ O Au, o Jisu (Yahshua), Au a talai ira yani na Noqu agilosi me ra lai vakadinadinataka na veika oqo vei kemuni na lewe ni isoqo­soqo. O Au na waka kei na kawa i Tevita, na rarama cecekia ni kalokalo volasiga.” 17 Ia na Yalo vata kei na yalewavou rau qai kaya, “Lako mai.” Ia laivi koya e rogoca me kaya, “Lako mai!” Ka laivi koya e karamaca me lako mai. Ia o koya ga e gadreva, laivi koya me mai taura wale na wai ni bula.
Vakatakila 22:12-17

Ia o koya e ivakadinadina ni veika oqo e kaya, “E dina au sa lako tiko yani.” Emeni. Lako mai Turaga Jisu (Sovereign Yahshua)!
21 ¶ Na yalololoma ni noda Turaga o Jisu (Master Yahshua) na Mesaia me tiko kei kemuni kecekece, o kemuni oni savasava. Emeni.
Vakatakila 22: 20-21









Also Read If Possible (Wilika Talega Ke Rawa)
Psalms 1:37; Matthew 16:24-27; Luke 12:35-40; 1 Thesalonians 4:13-5:11;

Revelation 1:1-3.

Na Siga Ni Lewa (The Day of Judgment).

Serving for the 30th December, 2008

Au qai raica na idabedabe vakatui vulavula vakaitamera, vata kei Koya e dabe toka kina; mai na kena iserau ga, rau a dro kina na vuravura kei na lomalagi; qai sega ni kune tale e dua na tikina me nodrau. 12 Au qai raici ira na mate, lelevu kei na lalai, ni ra duri tu e na mata ni idabedabe vakatui; na ivola kece era a dola tu; oti qai dola e dua tale na ivola, oya na ivola ni bula; o ira na mate era qai veilewaitaki e na veika e volai tu e na ivola me veirauraua kei na nodra cakacaka. 13 Na wasawasa a qai sereki ira mai era mate tu kina; o mate kei na ibulubulu a sereki ira mai era mate tu kina. Era qai veilewaitaki yadudua me veiraurau kei na nodra dui cakacaka. 14 Ia o mate kei na ibulubulu rau a qai vakalutumi i na drano buka­waqa. Oqo na ikarua ni mate oya na drano bukawaqa. 15 O koya ga e sega ni kune ni volai tu e na ivola ni bula, era na vakalutumi i na drano bukawaqa.
Vakatakila 20:11-15;

Au qai raica e dua na lomalagi vou kei na dua na vuravura vou; na imatai ni lomalagi kei na imatai ni vuravura rau sa takali oti; ka sa sega vakadua na wasawasa. 02 Oti, au qai raica na korolevu tabu o Jerusalemi Vou, ni sobu tiko mai lomalagi mai Vua na Kalou (Elohim), sa vakarau tu mai me vaka e dua na yalewavou, sa uku tu e na vukui watinatagane. 03 Au qai rogoca e dua na domo rogo levu mai lomalagi ni kaya, “Raica, na itikotiko ni Kalou (Elohim) sa kau vei ira na tamata, o Koya sa na lai vakaitikotiko kei ira, me ra sa Nona tamata; ia na Kalou (Elohim) vakataki Koya sa na lai vakaitikotiko vata kei ira, me nodra Kalou (Elohim). 04 “Ia o Koya, e na qai qusia laivi na wainimata kece mai matadra, sa na sega tale vakadua na mate, se na rarawa, se na tagi; ka sa oti vakadua na vutugu baleta na veika makawa era sa takali vakadua.”
Vakatakila 21:1-4

Also Read If Possible (Wilika Talega Ke Rawa)
Isaiah 65:17-25; 66:22-24; Daniel 12:1-3;
John 1:14-18; 2 Peter 3:1-14

O Ira Na Digitaki Kei Setani. (The Called and Satan)

Serving For The 29th December, 2008

Oti au qai raica e dua na agilosi ni sobu mai lomalagi, ka taura tiko mai e ligana na idola ni qara sega ni vakabotona, vata kei na dua na senicodo vakai­tamera. 02 O koya a qai vesuka na gata damu vakadomobula, o koya vata ga na gata mai na gauna makawa, na Dauveitemaki o Setani, o koya e a vakacalai vuravura raraba, qai vesuki koya me duanaudolu na yabaki; 03 oti qai kolotaki koya i loma ni qara sega ni vakabotona, ka sogoti koya laivi yani, oti qai vakabita e dua na idregati vua, me kakua ni vakacalai ira tale na matanitu, me yacova ni sa sivi e dua na udolu na yabaki; oti me qai sere me dua na gauna vakalekaleka.
04 ¶ Au qai raica na idabedabe vakatui, vata kei ira era dabeca toka, ni a nuitaki vei ira na vakatulewa; vata kei ira, na nodra bula o ira era a kuna baleta na nodra a vakadinadinataki Jisu (Yahshua) vata kei na vosa ni Kalou (Elohim), oya o ira era a sega ni qarava na manumanu kila se na kena ivakatakarakara, ka sega ni ciqoma na nona ivakatakilakila e yadredra se e ligadra, ni ra a bula ka veiliutaki tiko vata kei na nodra Mesaia me duanaudolu na yabaki; 05 Oqo na imatai ni veivakaturi mai na mate. 06 E kalougata ka yalosavasava o koya e vakaitavi e na imatai ni veivakaturi mai na mate. Vei ira oqori, na ikarua ni mate e na sega ni kaukaua vei ira, ia era sa na bete vua na Kalou (Elohim) vata kei na Nona Mesaia, me ra veiliutaki kei Koya me duanaudolu na yabaki. 07 Ia ni sa cava na duanaudolu na yabaki, o Setani e na qai sere mai na nona valeniveivesu, 08 ka na lako sara me lai vakacalai ira na veimatanitu e na tutu ni vuravura va va, bau kina o Qoqo kei Moqoqo, me soqoni ira vata i na ivalu; na kedra iwiliwili e vaka na mataninuku mai waitui. 09 Era tayabe kosova na bucabuca kei vuravura, era qai lai tuva vakavolivolita na nodra keba na digitaki kei na korolevu daulomani; ia qai lidiki ira na yameyame ni bukawaqa mai Vua na Kalou (Elohim), mai lomalagi ka tilomi ira. 10 Ia na tevoro, o koya e a vakacalai ira, a qai vakalutumi i loma ni drano bukawaqa kei na salafa, na vanua rau sa tiko kina na manumanu kila kei na parofita vakailasu. Eratou na qai vakararawataki kina, e na siga kei na bogi, me tawamudu ka sega ni mudu.
Vakatakila 20:1-10





Also Read IF Possible (Wilika Talega Ke Rawa)
Genesis 3:1-15; Ezekiel 38-39; 1 Corinthians 6:1-6; Revelation 12-13; 17-19

Na Matana E Vaka Na Matanisiga. (His Face is Like the Sun)

Serving For The 28th December, 2008

O au o Joni, na tacimuni ka nomuni itokani e na veivakararawataki kei na inuinui vei Jisu (Yahshua) na Mesaia; au a tiko mai na yanuyanu o Patimo, e na vukuni vosa ni Kalou (Elohim) kei na ivakadinadina nei Jisu (Yahshua) na Mesaia. 10 Na Yalo ni parofisai a lako mai vei au e na siga ni Turaga (Master); au qai rogoca mai dakuqu e dua na domo rogo levu, me vaka e dua na davui ni kaya 11 “Na ka o raica, mo vola e na dua na ivola, qai vakauta vei ira na isoqosoqo e vitu; i Efeso kei Sumuena, ka vaka kina i Peqamosi kei Tayataira kei Sadisi, kei Filatelifia vata kei Leiodisia.” 12 Au qai vuki meu raici koya e vosa tiko mai vei au. Ia niu sa vuki, au qai raica e vitu na itutu ni kadrala koula, 13 ia e kedra maliwa na itutu ni kadrala koula e vitu, au raica e Dua, e vakataka na Luve ni tamata, e vakaisulu tu e na isulu balavu qai oro toka na serena e na ioro koula. 14 Na uluna kei na drauniuluna o Koya e vulavula me vaka na vutinisipi, ka vulavula kata me vaka na uca cevata; na matana e vaka na yameyame ni bukawaqa; 15 Na yavana e vaka na parasa totoka ni Lepanoni, me vaka e vakamai e na lovo bukawaqa; ia na domona e vaka na rorogo ni wai drodro e vuqa. 16 E a taura toka e Ligana imatau e vitu na kalokalo; mai gusuna e dodo tiko mai kina e dua na iseleiwau batirua gagata, ia na kena irairai taucoko o Koya e vaka na matanisiga ni todra kaukaua tu. 17 Niu sa raici Koya, au qai dokoulu yani i yavana, me vaka au sa ciba. Ia qai vakotora mai vei au na Ligana imatau, qai kaya, “Kakua ni domobula; o Au na imatai vata kei na iotioti. 18 “O Au ga o Koya e a bula tu, Au qai mate, ia raica, Au sa bula tu oqo me sega ni mudu, Emeni. E tiko vei Au na idola ni mate kei na ibulubulu (Sheol). 19 “Vola na veika kece o sa raica, na veika era sa tu kei na veika era na yaco ni oti oqo.
Vakatakila 1:9-19






Also Read If Possible (Wilika Talega Ke Rawa)
Psalms 149; Daniel 7; 2 Timoci 3; Hebrews 4:12-13;
Revelation 2-11; 19:11-21.

Raica Ni Lesu I Jerusalemi Na Lagilagi, O Isikeli. (Ezekiel Saw The Glory Return to Israel)

Serving for the 27th December, 2008

Sa qai kauti au i na matamata ni koro e vakanamata tu vaka i na natuicake. 02 Ia raica, na lagilagi no Kalou (Elohim) i Isireli e a rairai tiko mai na yasana i Natuicake, na domona a vaka na domo ni waidrodro e vuqa, ka ramase tu na vuravura e na kena iserau ni nona lagilagi. 03 Na raivotu au raica e tautavata kei na raivotu au a raica e na gauna au a lako mai kina meu mai kacivaka na vakarusai ni korolevu, ka tautauvata kei na raivotu a raica e na bati ni uciwai Kipa; au qai lutu sobu vakatoboicu. 04 Ia na lagialgi i Jiova (Yahweh) a qai cila basika i loma ni Valenisoro, mai na na matamata. 05 Sa qai tuberi au cake na yalo qai kauti au i loma ni loqi tabu dredre, ia raica ni sa vakasinaita tu na loma ni valenisoro na lagilagi i Jiova (Yahweh) 06 Au qai rogoca e dua ni vosa tiko mai vei mai loma ni valenisoro, ia na tamata; sa duri tu e yasaqu.
07 ¶ Sa qai kaya mai vei au, “Luve ni Tamata, oqo na vanua ni noqu i dabedabe vakatui, kei na vanua ni qeteqete ni yavaqu, na vanua au na vakaitikotiko kina e na kedra maliwa na luve i Isireli me tawamudu; ia na vanua o Isireli sa na sega ni vakacacani tale vakadua; o ira se o ira na nodra tui; e na vukuni ni nodra dauveidauci se e na yagodramate na nodra tui vata kei na nodra dui matakau. 08 Baleta era a dau tara na nodra matamata e na yasa ni noqu matamata, na ilago ni nodra katuba e na yasa ni ilago ni noqu katuba, sa qai dua ga na lalaga e duri tu e na keirau maliwa, o au vata kei ira; ia era qai vakacacana ga na Yacaqu tabu, e na valavala vakasisila era dau vakayacora: qori au qai vakarusai ira kina e na noqu leva cecekia. 09 Ia laiva me ra biuta tani mada na nodra dauveidauci kei na yagomate ni nodra tui me kau yawa mai mataqu, Au na qai tiko vata kei ira me tawa mudu.
Isikeli 43:1-9







Also Read If Possible (Wilika Talega Ke Rawa)
Ezekiel 1; 3; 8-11; Zachariah 14; Revelation 21:1-4.

Na Lomalagi Vou kei na Vuravura Vou (A New Heaven and A New World).

Serving For The 26th December, 2008

Raica, Au na bulia na lomalagi vou kei na vuravura vou; ia na veika makawa sa na sega ni nanumi lesu, se vure mai na vakasama. 18 O ira na noqu tamata era na reki ka marau me sega ni mudu, baleta au sa bulibuli tiko; baleta raica, Au na buli i Jerusalemi me taleitaki, kau na mamarau e loma. 19 Au na dau marau mai Jerusale­mi, ka rekitaki ira na noqu tamata; na domo ni tagitagi sa na sega ni rogo e loma, ka vaka kina na domo ni qoqolou. 20 “Sa na sega vakadua ni kune tale mai keya, me dua na gone me mate ni se dramidrami, se dua na qase me sega ni otiva na nona yabaki ni bula; baleta na gone e na qai mate ni sa yabaki duanadrau; ia o koya e dau valavala ca, ni sa yabaki duanadrau, e na kainaki ni tamata kalouca.
Aisea 65:17-20

Era na sega ni mate wale e na cakacaka, se vakasucu gone era qai mai sotava na ka rarawa; baleta era kawatamata sa vakalougatataki oti tu mai Vua na TURAGA (Yahweh), ruarua o ira vata kei ira na luvedra. 24 E na qai yaco, ni ra sebera ni kaci, Au sa na tama; ni ra sebera ni vosa, Au sa na rogoci ira. 25 Na wolifa kei na lami, rau na kanakana vata; kei na laione e na kana co me vaka na bulumakau ia na kuvu ni soso e na kena kakana na gata. Era sa na sega ni veivakamavoataki se veivakarusai e na noqu uluni­vanua tabu kece sara,” e kaya na TURAGA (Yahweh) .
Aisea 65:23-25





Also Read If Possible (Wilika Talega Ke Rawa)
Genesis 3:1-14; Isaiah 66:22-24; 2 Peter 3:1-14;
Revelation 21:1-5.

Na Nodra iLoloma Soliwale Na Vuku. (The Gifts of the Wise Men)

Serving For The 25th December, 2008

Ia e na gauna sa sucu oti kina o Jisu (Yahshua) mai Peceliema e Jiutia, e na gauna nei Eroti na Rokotui, eso na vuku mai na tokalau e cake era a lako mai i Jerusalemi, 02 era qai vakataroga, “E tiko beka evei na nodra tui na Jiu, e se qai sucu ga oqo? Baleta keimami a raica na Nona kalokalo mai na tokalau, keitou lako mai kina qo, me keitou mai vakarokoroko Vua.” 03 Ia o Eroti na Rokotui ni rogoca na veika oqori e a kidroa kina, o koya ka vaka kina o Jerusalemi taucoko. 04 A qai vakasoqoni ira vata na tamata, qai vakatarogi ira se na sucu beka evei na Mesaia. 05 Era kaya, “Mai Peceliema e Jiutia; baleta qori era volai tu e na nodra ivola o ira na Parofita; 06 ‘Ia o iko Peceliema e na qele vaka Jiuta, o sega ni lolovira e na kedra maliwa na tui e Jiutia, baleta mai vei iko e na lako mai e dua na Daunivakavulewa, me mai nodra ivakatawa o ira na Noqu tamata o Isireli’”. 07 Ia o Eroti, a qai kacivi ira vakavuni na vuku, qai vaqaqa vei ira na gauna a laurai kina na kalokalo. 08 Oti qai talai ira i Peceliema, ka tataunaka, “Lako lai vaqara vakavinaka na Gone lailai, ia ni oni sa kunei Koya, lesu mai vei au, mai vakatakila vei au, meu rawa ni lako, meu lai vakarokoroko Vua. 09 Ni ratou sa rogoca oti na tui, eratou qai toso; ia raica, na kalokalo era a raica mai na tokalau e cake, a qai liu tiko vei iratou, me yacova ni sa lai tu donuya na tikina e tiko kina na Gone dramidrami. 10 Ni ratou raica na kalokalo, eratou a marau dina vakalevu. 11 Eratou curu i lomanivale, eratou qai raica na Gone vata kei Meri (Miriam) na tinana, eratou qai dui kolotaki ratou sobu me ratou vakarokoroko Vua; eratou dolava na nodratou kato iyau, ka vakacabo iloloma Vua: na koula kei na dreganifereqisede kei na dreganimuru. 12 Ia, ratou a raica e na dua na tadra, me ratou kakua ni lesu vei Eroti, eratou mani dui lesu i nodratou dui vanua, e na dua tale na gaunisala.
Maciu 2:1-12.

Also Read If Possible (Wilika Talega Ke Rawa)
Genesis 30:22-33; Micah 5:2-5; Luke 1-2;
Mark 15:16-24; John 12:1-7; Hebrews 13:15-21

Sucu Na Mesaia (The Messiah is Born).

Serving For The 24th December, 2008.

O Josefa a lako cake mai Nasareci e dua na korolevu mai Kaleli, i Jiutia, i na korolevu nei Tevita e vakatokai o Peceliema, baleta o koya e lewe ni mataqali ka kawa mai vei Tevita; 05 vata kei na watina-musuki o Meri (Miriam), ni sa buketetaka tiko na gone, me rau lai tabayaca e keya. 06 A qai yaco, ni rau tiko voli mai keya, ni a yaco mai na siga me vakasucu kina o koya. 07 Qai vakasucuma na luvena ulu­matua tagane; ologi Koya e na isulu ni gone ka vakotori Koya e na tavu ni vakanamanumanu baleta a sega ni dua na nodrau loqi e na vanua rau tiko kina.
08 ¶ Era a tiko eso na ivakatawa ni sipi e na yasayasa rau tiko kina, ka ra vakatawa sipi tiko e na bogi. 09 Ia raica ni dua na agilosi ni Turaga (Yahweh) a lako mai vei ira, qai cila wavolivoliti ira na lagilagi ni Turaga (Yahweh); a mani curumi ira na domobula vakaitamera. 10 Kaya na agilosi vei ira, “Kakua ni domobula, baleta raica au kauta tiko mai vei kemuni na itukutuku vinaka ni marau levu, e na rekitaka o vuravura taucoko. 11 “Baleta e na siga edai sa sucu kina vei kemuni, e na koro nei Tevita, e dua na iVakabula, na Mesaia ni Turaga (Yahweh). 12 Ia qo na kena ivakatakilakila vei kemuni; oni na raica na Gone dramidrami ni olo tiko e na itutuvi ni gone, ka koto no e na tavu ni vakana manu­manu.” 13 Qai vakasauri na nodra basika e yasana na agilosi oqo, e dua na ilawalawa levu na daunivei­qaravi mai lomalagi, ni ra mai vakacere­cerea na Kalou (Elohim) e na nodra kaya: 14 “Me lagilagi na Kalou (Elohim), e na itikotiko sa cecere sara, ia e vuravura na tiko veisaututaki, kei na yalovinaka e na kedra maliwa na tamata.”
Luke 2:4-14.






Also Read If Possible (Wilika Talega Ke Rawa)
2 Samuel 7:8-17; Psalms 89:20-37; Isaiah 9:6-7;
Matthew 1:18-25; Luke 1-2

Na Luve I Tevita Ka Nona Turaga Talega (Son and Lord of David).

Serving for the 23rd December, 2008.

Kaya o Jiova (Yahweh) vua a noqu Turaga (Sovereign), “Dabe toka e na ligaqu imatau me yacova niu sa cakavi ira na kemu meca me ra itavatava ni yavamu. 02 O Jiova (Yahweh) e na dodoka yani na ititoko ni Nona kaukaua mai Saioni, me lai vakavulewa e na kedra maliwa na kemuni meca. 03 O ira na nomuni tamata era na lagilagi e na siga ni nomuni qaqa; ka ukutaki e na totoka ni yalosavasava mai na katonigone, Au sa vakatuburi iko mo gone ni veitabagauna. 04 Sa bubului oti o Jiova (Yahweh), e na sega ni lasu, o iko o na bete tawamudu e na ivakatagedegede nei Melikiseteki.
05 ¶ Na Turaga (Yahweh), e na ligamu imatau, e na ravuti ira na tui e na siga ni Nona leva. 06 E na qai vakatulewa e na kedra maliwa na veimatanitu o koya, e na wilika na kedra iwiliwili o ira era moku; e na gutuva laiva na uludra e le levu e vuravura. 07 E na gunu o Koya mai na wai drodro e na sala: oqori e na laveta cake kina na uluna.
Same 110:1-7

O ira na bete levu qo era le levu, baleta era bula vakaiyalayala, ka vakatabui me ra cakacaka tikoga ke sa tini na nodra bula. 24 O Koya oqo, baleta ni bula tawamudu, e tiko vua e dua na ivakatagedegede ni bete e na sega ni muduki rawa. 25 O koya oya, e rawa kina Vua me veivakabulai tiko me tawamudu, vei ira era lako yani Vua na Kalou (Elohim) e na vukuna, baleta ni bula tiko me tawamudu o Koya, qai rawa kina ni vakatutusa tiko ga e na vukudra.
26 ¶ Na mataqali bete levu vaka oqori e ganiti keda; e yalosavasava, e sega ni dauveivakacacani, e tawacala, e tu vakayawa sara mai na ivalavala ca, ka sa yaco tu oqo me cecere cake mai na veilomalagi;
Iperiu 7:23-26.

Also Read If Possible (Wilika Talega Ke Rawa)
Genesis 14:18-20; Matthew 22:41-46;
Hebrew 5:1-10; 7.

Na Bula Tawa Mudu Eda Na Wasea (Sharing Eternal Life).

Serving for the 22nd December, 2008

Na cava era cudru tiko kina na kai Veimatanitu, ka vakananuya tiko na veika tawayaga? 02 Era sa veibuku tiko na tui kei vuravura kei ira na daunivakavulewa, ka ra bosea vata me ra saqati Jiova (Yahweh) ka saqati ira na nona lumuti ni ra kaya, 03 Laiva meda drutia na kedra ivau, ka kolo laivi mai vei keda na kedra isema. 04 O koya e vakaitikotiko mai lomalagi e na dredre: Na Turaga (Yahweh) e na vakalialiai ira: 05 E na qai vosa vei ira o koya e na nona leva: ka vakarererei ira e na nona leva waromisa; ni kaya, 06 Au sa lesia na Noqu tui e na noqu ulunivanua tabu;
07 ¶ me vakatusa na noqu yalayala; e kaya vei au o Jiova (Yahweh), “O iko na luvequtagane: e na siga oqo, Au sa vakatuburi iko: 08 Kerea maivei au, Au na solia vei iko na Veimatanitu tani me ra nomu ivotavota, kei na iyalayala kei vuravura mo vakavulewa kina: 09 O na liutaki ira e na ititoko kaukamea: o na voroki ira me ra matailailai me vaka na nona bilo na dautuli kuro.
10 ¶ Mo yalomatua e na gauna oqo, kemuni na tui; Moni vuli o kemuni na daunilewa e vuravura: 11 Qaravi Jiova (Yahweh) e na vakarokoroko, tokoni Koya cake e na sautaninini:12 Reguca na Luvenatagane, de qai leva o koya, dou qai vakarusai mai na Nona sala, ni se waqawaqa tu ga vakalailai na nona cudru. Era na vakacegui o ira kece era vakararavi Vua.
Same 2:1-12.






Also Read If Possible (Wilika Talega Ke Rawa)
2 Samuel 7; 1 Chronicles 17; Mark 1:1-11; Revelations 2:18-29.

Na Bula Tawa Mudu Eda Na Wasea. (The Eternal Life We Will Share).

Serving for the 21st December, 2008

Na noqu daulomani, au volavola yani oqo vei kemuni e na yalomatua, me baleta na veivueti vakayalo eda sa namaka kece tiko; ia au qai nanuma ni bibi cake vei au meu volavola yani, meu vakauqeti kemuni moni taqomaka matua na noda vakabauta, e na kena inono a soli kina vei ira na digitaki, e na vukuda. 04 Baleta eso na tamata era sa curu butako yani e na kemuni maliwa, oya o ira era se nakiti makawa tu mai me ra na mai veivakacacani, era tamata sega ni vakalou, era sa vukica na yalololoma ni noda Kalou (Elohim) me ivakarawa ni talatalaidredre, era qai cakitaka na Kalou (Sovereign) e duabau kei na noda Turaga o Jisu (Master Yahshua) na Mesaia.
Jiuta 3-4.

Ia o kemuni, na noqu dau­lomani, nanuma na vosa era dau kaya mai liu o ira na apositolo ni noda Turaga (Master) o Jisu (Yahshua) na Mesaia; 18 e na nodra a kaya ni ra na tu o ira era dauveivakacalai e na nodra mai vakamuria voli ga na gagano vakasisila e sega ni vakalou. 19 O ira qo era dau taleitaka ga me ra ilawalawa vata kei ira na tamata kocokoco baleta e sega vei ira na Yalo Tabu. 20 Ia o kemuni, na noqu daulomani, moni vakavoutaki kemuni cake tikoga e na vakabauta ni Yalo Tabu, e na nomuni masumasu. 21 Laiva meda maroroi keda tiko e na loloma ni Kalou (Yahweh), ni da vakasaqara tiko na yalololoma ni noda Turaga o Jisu (Master Yahshua) na Mesaia, vata kei na bula sa na noda me tawamudu. 22 Ia eso vei ira, veitalia se o cei o ira, binia cake na buka koala; 23 Ia ke ra veivutuni, lomani ira e na yalololoma; ia e na yalo ga e qaqarauni, ka moni sevaka mada ga na isulu e vakadukadukalitaki tu e na gagano vakayago. 24 Ia vei Koya e rawa ni taqomaki kemuni moni kakua ni tarabe ka cabori kemuni ni oni tawacala e matana o Koya e lagilagi, e na marau vakaitamera, 25 Vua na Kalou (Yahweh) duabau na noda iVakabula e na vuku i Jisu (Yahshua) na Mesaia, Me Nona na lagilagi vata kei na lewa, na matanitu kei na kaukaua, ruarua e na gauna oqo kei na itabagauna tawamudu, Emeni.

Jiuta 17-25.

Also Read If Possible (Wilika Talega Ke Rawa)
Amos 4:11; Zechariah 3; Acts 20:28-31;
2 Peter 3.

Meca ni Mesaia (The Anti-Messiah).

Serving For The 20th December, 2008.

Kemuni na noqu gone lalai, sa tu oqo na ivakataotioti ni gauna; ia me vaka oni sa rogoca, na meca ni Mesaia e na lako mai; e na gauna mada ga oqo era sa bini tu na meca ni Mesaia, ia oqori eda kila kina ni oqo na ivakataotioti ni gauna. 19 Era a lako ga yani mai vei keda, ia era a sega ga ni dua vei keda; baleta kevaka era a dua kei keda, ke ra a toso tikoga vata kei keda; ia era sa biuti keda, me rawa ni vakatakilai kina ni ra a sega ga ni dua kei keda.
20 ¶ Ia o kemuni, oni sa lumuti mai vei Koya na Yalosavasava, oya oni sa rawa kina vakaduiduitaki ira na tamata. 21 Au volavola yani vei kemuni sega baleta ni oni sega ni kila na dina, ia baleta ga ni oni sa kila, oni sa kila talega ni sega ni dua na ka lasu, e rawa ni vure mai na dina. 22 O cei beka e dau ni lasulasu? O koya ga e cakitaka ni o Jisu (Yahshua) na Mesaia. Ia e meca ni Mesaia o koya e cakitaka na Tamada ka cakitaka talega na Luvena 23 O koya e cakitaka na Luvena, o koya e sega ni vakabauta na Tamada; ia o koya e vakadinadinataka na Luvena, e vakadinadinataka talega na Tamada. 24 Ia o kemuni, laiva me dei tikoga
I Joni 2:18-23.

Baleta e levu na dau veivakacalai era sa basika mai e vuravura, o ira era sega ni tusanaka ni o Jisu (Yahshua) na Mesaia sa liatamata oti mai. Na tamata vakaoqo e dauniveivakacalai, ka meca ni Mesaia. 08 Qarauni iko vinaka, mo kakua ni vakayalia wale tu na veika eda sa cakacakataka oti, ia mo rawata ga na kena icovi taucoko. 09 O koya e dau talatalaidredre, ka sega ni bula e na ivakavuvuli ni Turaga (Master), e sega ni tiko kei koya na Kalou (Yahweh). Ia o koya e muria vinaka na Nona ivakavuvuli, sa tiko ruarua vua na Tamada vata kei na Luvena.
10 ¶ Ke dua e sikovi iko yani; qai sega ni kauta yani na ivakavuvuli oqo, kakua ni ciqomi koya i loma ni nomu vale se sureti koya me kana; 11 baleta o koya e sureti koya me kana, e wili vata kei koya e na nona cakacaka ca.
2 Joni 7-11.







Also Read If Possible (Wilika Talega Ke Rawa)
Proverbs 13:5; Isaiah 44:240-25; Jeremiah 14:14-15; 2 Timothy 3;

2 Peter 2-3.

Na Loloma Ni Tamada (The Father’s Love).

Serving for the 19th December, 2008

Kakua ni domona na vura­vura, se na veika e tu e vuravura. O koya e domona na vuravura, na loloma nei Tamada e sega ni tiko vua. 16 Na veika ga e kune e vuravura, oya na gagano ni leweniyago, na dodomo ni yalokanimata, kei na dokadokataki ni veika vakayago; na veika oqo era sega ni soli mai Vua na Tamada, ka ni ra vure ga mai vura­vura. 17 Na vuravura e na seyavu yani vata kei na kena veidodomo kecekece, ia o koya e cakava na inakinaki ni Kalou (Elohim), e na bula tiko me tawa mudu.
1 Joni 2:15-17

Raica mada na vakaitamera ni loloma e vakaraitaka vei keda o Tamada, baleta sa vakatokai keda ni da luvena, ka sa buli i keda; qori qai sega kina ni kilai keda o vuravura, baleta ni a sega ni kilai Koya..
I Joni 3:1

O koya e vakabauta ni Mesaia o Jisu (Yahshua), e vakatuburi mai Vua na Kalou (Elohim); ia o ira yadua era lomani koya e veivakatuburi, era na lomani Koya talega e a vakatuburi. 02 E na ka oqo eda na kila kina ni da lomani ira na luve ni Kalou (Elohim); oya ni da lomana na Kalou (Elohim) ka muria na Nona ivakaro. 03 Baleta oqori na loloma ni Kalou, ni da muria na Nona ivakaro. Na Nona ivakaro e sega ni dre dre. 04 O koya ga e vakatubura na Kalou (Elohim), e na dau rawai vuravura; ia oqo na kaukaua e rawai kina na vuravura, oya na noda vakabauta. 05 O cei beka o koya e rawa na vuravura? O koya ga e vakabauta ni Luve ni Kalou (Elohim) o Jisu (Yahshua)?
I Joni 5:1-5.








Wilika Talega Ke Rawa
Deuteronomy 30:11-16; John 15:17-25; 1John 4 :7-21.

Ni dau Veilomalomani Vakataki Kemuni. (Always Love One Another)

Serving For The 18th December, 2008

Kemuni na noqu gone lalai, na veika oqo au vola yani vei kemuni me rawa ni oni kakua ni valavala ca. Ia ke dua e mani valavala ca, sa tiko e dua na noda mata vata kei Tamada, o Jisu (Yahshua) na Mesaia yalododonu. 02 O Koya e imadrali ni noda ivalavala ca; ia e sega ni noda ga, ia baleta talega na ivalavala ca e vuravura raraba.
03 ¶ Ia oqo na veika eda kila kina ni da kilai Koya, kevaka eda bulataka tiko na Nona iVakaro. 04 O koya e kaya, ‘Au kilai Koya,’ ia qai sega ni bulataka tiko na nona iVakaro, e lasulasu, baleta na dina e sega ni tiko vua. 05 Ia o koya e bulataka na Nona vosa, e dina, ni sa bula vinaka vakaoti tiko e lomana na loloma ni Kalou (Elohim). Qori eda kila kina ni da sa duavata tiko kei Koya. 06 O koya e kaya ni vakaitikotiko vata kei Koya, e dodonu vua me lako muria tiko, na Nona ilakolako.
07 ¶ Kemuni na noqu daulomani, au sega ni volavola tiko yani me baleta e dua na ivakaro vou, ia me baleta ga na ivakaro makawa a se tiko vata kei kemuni mai na ivakatekivu. Na ivakaro makawa, oqori na vosa oni sa rogoca oti. 08 Ia e dua na ivakaro vou au vola tiko yani vei kemuni, e dua na ka e dina vua, ka dina talega vei kemuni, baleta na botubuto sa seyavu yani, ia na rarama dina sa cila tiko oqo.
1 Joni 2:1-8.

“E dua na ivakaro vou Au na solia vei kemudou, oya mo dou dau vei­lomalomani vakataki kemudou; me vaka Au dau lomani kemudou, o kemudou talega mo dou dau veilomalomani vakataki kemudou. 35 “E na ka oqo, e na kilai raraba kina ni dou Noqu tisaipeli, kevaka dou dau veilomalomani o kemudou vakataki kemudou.
Joni 13:34-35





Also Read If Possible (Wilika Talega Ke Rawa)
1 King 8:46-51; Psalm 119:9-11; John 14:15; Hebrew 2:17-18;

Hebrew 4:14-16; 7-9; 1 John 3:11-24.

Na Kalokalo Volasiga (The Morning Star).

Serving For The 17th December, 2008

Baleta keitou a sega ni muria tiko mai e dua na itukuni buli vakalawaki ca, e na gauna keitou a vunautaka kina vei kemuni na Nona kaukaua kei na Nona na lako mai na noda Turaga o Jisu (Master Yahshua) na Mesaia, baleta keitou ivakadinadina ni Nona itutu vakatui (majesty). 17 Baleta o Koya, e sa ciqoma mai Vua na Kalou (Yahweh) na Tamada na vakarokoroko kei na lagilagi, ni rogo Vua e dua na domo mai na lagilagi e daumaka vakaoti, “Oqo na Luvequ tagane daulomani, au dau talei­taka vakalevu.” 18 Ia na domo vata oqori, e a rogo mai lomalagi, keitou a rogoca talega e na gauna keitou a tiko kina vata kei Koya e na ulunivanua tabu.
19 ¶ Sa tiko talega vei keitou e dua na vosa dina ni parofisai; e na vinaka kina vei kemuni moni dau raica oqori me ka ni veituberi, me vaka ni oni dau rai i na icina e rama tiko e na butobuto, me yacova ni sa kida na mataka, me sa cila na matanisiga e vuniyalomuni; 20 ia moni kila taumada, ni sega ni dau vakamatatataki kece sara e na kedra ivola na vosa ni parofisai. 21 Baleta na parofisai a sega ga ni vu mai na inaki ni tamata, ia mai vei ira ga na tamata vakatabui ni Kalou (Yahweh) era dau vosa ga ni tosoi ira na Yalo Tabu.
2 Pita 1:16-21

Na Nomuni vosa e icina e yavaqu, ka rarama ni noqu sala
Same 119:105.

O Au, o Jisu (Yahshua), Au a talai ira yani na Noqu agilosi me ra lai vakadinadinataka na veika oqo vei kemuni na lewe ni isoqo­soqo. O Au na waka kei na kawa i Tevita, na rarama cecekia ni kalokalo volasiga.”
Vakatakila 22:16.





Also Read If Possible (Wilika Talega Ke Rawa)
Jeremiah 26; Amos 3:1-8; Isaiah 61; Mark 9:2-9; Luke 1:1-4

Na Vatu Vakaitamera ni Bula. (The Huge Rock Of Life)

Serving For The 16th December, 2008

O koya oya e dodonu kina moni biuta laivi vaka­dua na yalo ca kece, na veidaubui, na yalovuvu, na yaloca ni veibeitaki, 02 Moni vaka na gone sucu vou, moni gadreva na vosa, me vaka na sucu savasava vakaoti vakayalo, moni qai tubu bulabula tiko i na veivueti, 03 kevaka oni sa tovolea oti, ka kunea ni vinaka na Turaga (Yahweh).
04 ¶ O koya oni lako tiko Vua, e vatu bula, era sa besetaki koya oti na tamata, ia a digitaki ka vakamareqeti Vua na Kalou (Yahweh); 05 O kemuni talega, me vaka na vatu bula, moni buli i kemuni cake moni yaco moni dua na valenisoro vakayalo, ka matabete yalosavasava, moni dau cabora na imadrali vakayalo, e vakadonui Vua na Kalou (Yahweh) e na yaca i Jisu (Yahshua) na Mesaia. 06 Qori e a tukuni tale ga kina e na ivola tabu “Raica au sa vakotora no mai Saioni na ulu ni ivakadei ni tutu ni vale, digitaki, ka vakamareqeti ia o koya e vakabauti Koya e na sega na sala me na madua kina.” 07 Vei kemuni oni vakabauta, e sa soli vei kemuni na ka talei oqo; ia vei ira era dau talatalaidredre, o koya e dua na vatu ni itatacaqe, ka vatu ni leqa; 08 Era na tarabe kina, baleta na nodra talaidredre i na vosa, e a lesi me nodra iwasewase. 09 Ia o kemuni oni itabatamata digitaki, na italai ni matanitu, e dua na kawatamata tabu, e dua na ivavakoso oni a vueti moni mai kacivaka na Nona lagilagi o Koya e kacivi kemuni laivi mai na butobuto, i na Nona rarama veivakurabuitaki; 10 o Kemuni oni a sega ni dau vakatokai ni dua na kawatamata, ia nikua oni sa dua na kawatamata ni Kalou (Yahweh); oni a sega ni rawata mai na veivosoti, ia oqo e sa sovaraki sara tiko ga na veivosoti vei kemuni.
1 Pita 2:1-10.


Also Read If Possible (Wilika Talega Ke Rawa)
Psalms 34; 118:22-29; Isaiah 28:16-17; Matthew 16:13-19;

Luke 20:9-19; Hebrews 5:11-14

Na Yalayala Ni Veivueti. (The Promise of Salvation)

Serving For the 15th December, 2008

Me vakavinavinakataki na Kalou (Elohim) na Tama ni noda Turaga (Master) o Jisu (Yahshua) na Mesaia, o Koya, baleta na ilevu ni Nona loloma, e sa vakatubura oqo vei keda e dua tale na inuinui vou ni bula, mai na Nona a vakaturi Jisu (Yahshua) na Mesaia mai na mate, 04 ki na dua na ivotavota, e sega ni vakarusai rawa se vakadukadukalitaki rawa, ka na sega tale ga ni seyavu rawa, e sa maroroi tu mai Lomalagi me nomuni: 05 Ia o kemuni, oni sa qai taqomaki tu e na kaukaua ni Kalou (Yahweh), e na vakabauta ni veivakabulai sa vakarau tu me na vakatakilai e na ivakataotioti ni gauna.
06 ¶ Oni na qai marau dina kina, ia walega qo, vakalekaleka ga, kevaka e gadrevi, oni na vakararawataki e na vica na ka ni veivakatovolei, 07 me vakadinadinataki kina na nomuni vakabauta, ka ni talei cake mai na koula sa vakasavasavataki oti e na bukawaqa, me qai rawa kina ni kune ni dodonu me vakacaucautaki, me vakavina­vinakataki ka vakarokorokotaki e na gauna e basika mai kina o Jisu (Yahshua) na Mesaia; 08 o koya, oni se bera ni raica, ia oni sa dau lomana. E dina beka e na gauna oqo, ni oni sebera ni raici Koya, ia e na nomuni vakabauta ga, oni sa dau marautaki Koya kina e na mataqali reki kei na veivakarokorokotaki e sega na vosa me vakamacalataka rawa, 09 oni na qai ciqoma na icovi ni nomuni vakabauta; oya na vueti ni nomuni bula.
10 ¶ Na veika me baleta na veivueti oqo, era a vaqaqa ka vaqara vakayalomatua o ira na Parofita, era qai parofisai­taka na kena na tadu mai vei kemuni na ka ni loloma soliwale oqo. 11 Era vaqara me ra kunea na gauna e na vakaraitaki mai kina, ia na Yalo ni Mesaia e vakaitikotiko e lomadra a qai vakamacalataka taumada vei ira na veika me baleta na vaka­rarawataki ni Mesaia kei na lagilagi e na muria mai. 12 Na ka kece era a vaqara tiko a qai vakaraitaki vei ira, baleta era a sega ni vaqara na ka era na vinaka ga kina o ira, ia era parofisaitaka ga na veika me baleti keda, era mai qarava tiko kina na veika sa tukuni oti vei kemuni, na veika sa vakatakilai oti vei kemuni, maivei ira era sa vunautaka oti na itukutuku vinaka vei kemuni e na kaukaua ni Yalo Tabu, ni a vakau sobu mai Lomalagi na veika era dau mateca na agilosi me ra kila.
I Pita 1:3-12.

Also Read If Possible (Wilika Talega Ke Rawa)
Isaiah 52:13-53; 12; Zachariah 13:7-9; Hebrews 1-2; James 1

Qarauna Vinaka Na Yame Ni Tamata (Keep a Watch on Human Tongue).

Serving For The 14th December, 2008

Laiva me kakua so ni levu na ivakavuvuli e na kemuni maliwa, kemuni na taciqu, ia moni kila ga ni na waromisa cake na ivakatagedegede ni veilewai eda na sotava. 02 Baleta e na levu sara na ka eda na tarabe kina e matadra na tani. Ke dua e sebera ni tarabe e na vosa, o koya oqori e tamata dodonu vakaoti, e na rawarawa vua me lewa matua na yagona taucoko. 03 Raica eda ciqimaka na paraile e na gusu ni ose, me rawa ni ra talai rawarawa vei keda, eda qai veigoleyaka na yagona taucoko. 04 Raica talega na waqa; e dina ni ra vakavakaitamera era qai dau veiciriyaki tu e na kaukaua ni cagi, ia e na veigoleyaka rawa e dua na iuli lailai, mai na nona gagadre o koya na kavetani. 05 E vakakina na yame, ni dua ga na tiki ni yago lailai wale, ia e rawa ni dokadokataka na ka vakavakaitamera. E vakakina e dua na yame ni buka lailai, ni rawa ni vakama yavu e dua na veikau vakaitamera 06 Na yame e dua na bukawaqa, na vuravura ni ivalavala ca e tautauvata kei na dua na veikau. Ia na yame oqo e dina ni dua ga na tikiniyagoda; e na rawa ni vakavelavelataka vakadua na yagoda taucoko; qai vakama na itosotoso ni noda kawa, a se tekivu qiqi sara mai na ivakatekivu; me qai tini vakamai yavu vakadua e na bukawaqa. 07 Na veimataqali manumanu kila kece, na manumanu daudolo, na manumanu vuka, kei na kabuli kece e wasawasa kei na vanua era lewai e na lewa vakatamata. 08 Ia na yame, e sega ni dua na tamata e na rawa ni vakamanoataka; e vunica tawavakacegui rawa ka sinai vutuvutu e na gaga e veivakamatei. 09 E na yame eda vakamolimolitaka kina na noda Kalou (Elohim) na Tamada, ia e na yame talega eda rukaka kina na tamata, e buli me veiucui kei na Kalou (Yahweh). 10 Mai na gusuda e duabulu, e rogo mai kina na veivakacerecerei kei na veivaka­cacani. Kemuni na taciqu na ka oqo e sega ni dodonu me yaco. 11 E dua beka na mataniwai e rawa ni vakavurea na wai kamikamica kei na wai velavela? 12 E rawa beka ni dua na vunilolo, kemuni na taciqu, e vuataka na vua ni olive? Se na vunivaini na vua ni lolo? E vaka kina na waitui, e sega ni vaka kamikamicataki rawa.
Jemesa: 3:1-12.

Also Read If Possible (Wilika Talega Ke Rawa)
Psalms 12; Proverbs 6:16-19, 10:18-2, 31-32, 12:17-19, 22.

Na Yalomatua E Kune E Na Veivakatovolei. (Wisdom Found in Enduring Trials)

Serving For The 13th December, 2008

Kemuni na taciqu, moni okata me ka ni reki, ni oni sa sotava e levu na veimataqali veivakatovolei, 03 baleta oni kila, ni kena vakatovolei na nomuni vakabauta, e na vaqaqacotaka na vosota. 04 Laiva na vosota me vakavatukana e na cakacaka vinaka vakaoti, me rawa ni oni vinaka vakaoti ka taucoko, me kakua kina ni sega vei kemuni e dua na ka. 05 Ke dua vei kemuni e lailai vua na vuku, laiva me kerea Vua na Kalou, (Elohim) o Koya e dau solia vakayauyau vei ira na tamata e na yalololoma; e na qai soli mai vua. 06 Ia laiva me kerekere ga e na vakabauta, ka me kakua na vakatitiqa. Baleta o koya e vakatitiqa e vaka na biau ni wasawasa, e veitosoyaka tu ga na cagi ka veibiliyaka. 07 Na tamata oqori me kakua ni nanuma ni na ciqoma e dua na ka mai Vua na Turaga (Sovereign); 08 na tamata dau lomaloma rua, e sega ni dei na nona ivakarau kece.
Jemesa: 1: 2-8

E kalougata na tamata e vorata na veitemaki; baleta ni sa vakatovolei, e na ciqoma na isala­vakatui ni bula, sa yalataka tu na Turaga (Yahweh) vei ira era lomani Koya.
13 ¶ Laiva me kakua ni dua e kaya ni temaki tiko, “E temaki au tiko na Kalou (Yahweh)”; baleta na Kalou (Elohim) e sega ni rawa ni temaki e na ca, ka na sega talega ni temaka e dua na tamata o Koya. 14 Ia na tamata yadudua, e na temaki koya ga na nona gagano; na nona kocokoco e vakavuna me temaki. 15 Ni sa kunekune na gagano oqori, e na qai vakasucuma na ivalavala ca; ia na ivalavala ca ni sa matua, e na kauta mai na mate.
Jemesa: 1:12-15.






Also Read If Possible (Wilika Talega Ke Rawa)
Job 1-42; Matthew 6:9-13; Matthew 21:18-22;
1 Corinthians 10:12-13.

O Ira Na Dau Ni Vakabauta – Wase E Rua. (The Faithful : Part Two)

Serving For The 12th December, 2008

E na vakabauta talega, o Sera e dua na marama yava, a ciqoma na kaukaua me kunekunetaka e dua na nona kawa, qai vakasucuma e dua na gone, ni sa sivi makawa na Nona yabaki ni vakaluveni, baleta ni a kila matua tiko o koya, ni o koya a vosa bubului vua e yalodina. 12 Eda raica eke, ni a tubu maivua e dua e sa voleka tu ni mate, e le vuqa me vaka na kalokalo mai lomalagi na kedra iwiliwili kei na mataninuku e matasawa, e sega ni wili rawa.
Iperiu 11:11-12.

E na vakabauta, o Eparayama, ni sa vakatovolei, e a vakacabori Aisake cake; e a laveta e dela ni icabocabo ni isoro na luvenatagane duabau a vakatubura, o koya sara ga e a ciqomi e na yalayala, 18 oya o koya e a tukuni kina vua, “Mai vei Aisake na nomu kawa era na kacivi”; 19 ia a vakasamataka e lomana, ni rawa Vua na Kalou (Elohim) me vakabula na mate; qori na vuna, e a soli kina vua o Aisake me kena vakatautauvata.
Iperiu 11: 17-19.

E na vakabauta, o Mosese e na gauna sa cauravou kina, e a sega ni vinakata me vakatokai ni luvena tagane na luvei Fero yalewa, 25 a qai digitaka cake me vosota na veivakararawataki vata kei ira na tamata ni Kalou (Elohim), mai na bula maleka ni ivalavala ca e na dua na gauna lekaleka wale. 26 E a vakabibitaka ni iyau levu cake na veivakacacani e yaco e na vuku ni Mesaia, mai na iyau e kune vakalevu mai Ijipita; baleta a vakanamata tikoga o koya ni na ciqoma e dua na icovi. 27 E na vakabauta; a biuti Ijipita kina o koya, ni sega ni ravataka na leva ni tui; a qai bula tiko me yacova ni sa raica na Kalou (Elohim) o Koya e tabogo.
Iperiu 11: 24-27.

Ia o ira kece qo, era a taura toka na ivakadinadina ni ivalavala vinaka, ia era a sebera ga ni ciqoma na veika a yalataki, 40 baleta na Kalou (Elohim) e a vakarautaka na veika ni veivuke mai na ivakatekivu, de ra qai vakadaumakataki o ira oqo ni sebera mada o keda.
Iperiu 11: 39-40.

Also Read If Possible (Wilika Talega Ke Rawa)
Revelation 21-22; Exodus 2-3; Hebrews 10:36-39

O Ira Na Dau Ni Vakabauta: Wase E Dua (Those Who Have Faith: Part One).

Serving For The 11th December, 2008

Na vakabauta; oqori na vakavatukanataki ni veika eda nuitaka tiko, me vaka beka ni sa yaco oti; ka ivakadinadina ni veika e sebera ni laurai. 02 E na sala qo, e vakadinadinataki kina na kedra irogorogo na noda qase. 03 E na vakabauta, eda kila kina ni a buli na vuravura e na vosa ni Kalou (Yahweh), me qai rawa kina vei ira na veika era laurai votu, me ra a buli mai na veika e sega ni laurai. 04 E na vakabauta, o Epeli a cabora Vua na Kalou (Elohim), na isoro e daumaka vakaoti, mai na kena a cabora o Keni, a qai vakadinadinataki kina na nona yalododonu, ni a ciqoma na nona iloloma na Kalou (Elohim); na vuna oqori, e dina ga ni sa mate oti, e se talanoataki tikoga kina. 05 E na vakabauta e a tokitaki kina o Inoke ka sega ni tovolea na mate, “a qai sega kina ni kune, baleta a tokitaki koya na Kalou (Elohim)”; ia ni sebera ni tokitaki koya, e a tiko na ivakadinadina baleti koya ni a dau vakayalovinakataka na Kalou (Elohim): 06 Ke sega na vakabauta, na tamata e na sega ni vakayalovinakataka rawa na Kalou (Elohim), baleta o koya e toro volekata na Kalou (Elohim), e dodonu me vakabauti Koya, ka vakabauta ni o Koya e vakaicovitaki ira era vaqarai Koya. 07 E na vakabauta o Noa, ni sa vakarogoya oti vua na Kalou (Yahweh) na itukutuku ni veika e sebera ni laurai, e a qai yavala e na rere, taya e dua na waqa ni usa manumanu, me vueti ratou kina na nona matavuvale; qai vakarusai vuravura kina o koya, me rawata na Nona iwasewase ni yalododonu e vakayavutaki e na vaka­bauta. 08 E na vakabauta, o Epaprayama, ni sa kacivi me cavutu ka lako i na qele e na ciqoma tiko me kena iwasewase vakaitaukei, e a talairawarawa; a qai lako yani, ni sega tu mada ga ni kila na vanua a lako tiko kina.

Iperiu 11:1-8








Also Read If Possible (Wilika Talega Ke Rawa)
Revelation 1; Revelation 4:1-16; Revelation 5:23-24;

Revelation 6-8; Jude 14-15

Jisu Na Noda Bete Levu (Yahshua the High Priest).

Serving For The 10th December, 2008

Qo sa tiko e dua na noda bete levu cecere, e sa cabe i lomalagi; o Jisu (Yahshua) na Mesaia na luve ni Kalou (Elohim); laiva meda tudei tiko e na noda vakabauta. 15 Baleta o keda e tiko na noda bete levu e rawa ni tarai koya na noda nuiqawaqawa; e dua e sa sotava na veimataqali veivakatovolei me tautauvata kei keda, ia e sega na Nona ivalavala ca. 16 Laiva sara meda toro voleka vakadoudou i na itikotiko vakatui ni loloma, meda lai kunea na veivosoti vata kei na yalololoma, me vukei keda e na noda veigauna ni leqa­leqa.
Iperiu 4:14-16

E na gauna e se vakasulumi tu kina e na leweniyago, e a dau vakacabo masu e na tagitagi ni vutugu kei na wainimata, vei Koya e rawa ni vakabulai Koya mai na mate; e qai dau rogoci, 08 e dina ni a dua na Luvena vinaka o Koya, ia e na vuku ni nona rere kei na sota rarawa, e a vulica na talatalai rawa­rawa. 09 E a qai tubu me daumaka vakaoti, qai yaco kina me itini ni bula tawamudu vei ira kece era dau talai rawarawa Vua, 10 a qai kacivi kina mai Vua na Kalou (Elohim) me dua na bete levu, e na ivakatagedegede nei Melekisiteki.
Iperiu 5:7-10

Sa dodonu ga kina, e na veika kece, me tautauvata vakaoti o Koya vata kei ira na veitacini, me rawa kina ni yaco me bete levu yalololoma ka yalodina e na veika me baleta na Kalou (Elohim), me yaco me dau ni veivakaduavataki e na vukuni nodra ivalavala ca na tamata. 18 Baleta ni o Koya vakataki Koya e a vakararawataki ni vakatovolei, e qai rawarawa kina Vua me vukei ira era vakatovolei.
Iperiu 2:17-18





Also Read If Possible (Wilika Talega Ke Rawa)
Genesi 14:18-20; Psalms110; Matthew 4:1-11

Sa na Toro Sobu Tikoga na iTovo ni Tamata (Human Behavior will Continue To Plunge.)

Serving For The 9th December, 2008

Kila vinaka tiko qo, ni na yaco mai na gauna dredre vakaoti e na ivakataotioti. 02 Baleta na tamata era na dau lomalomani ira vakataki ira, dau matamata ilavo, dokadoka, qaciqacia, veivakaisini talatalai dredre vei ira na wekadra, sega ni dau vakavinavinaka ka dukadukali, 03 dau veibeitaki lasu, dau mateca na gagano ca, dau veivakararawataki ka dau sesevaka na veika vinaka, 04 dau veitoyaki, dau yalokatakata, dau yalolevu, ka dau vinakata vakalevu cake na lasa vakavuravura mai na taleitaki ni Kalou (Yahweh), 05 ka kune vakarairai vei ira e dua na mataqali ivukivuki vakalou, ia era dau cakitaka ga na kaukaua ni Kalou (Yahweh). Mai vei ira vaka oqori, dro yawa.
2 Timoci 3:1-5

Ia o sa muria tiko vakavinaka na noqu ivakavuvuli, na itovo ni noqu bula, na yalomatua, na vakabauta, na vosovosota vakadede, na loloma kei na gugumatua, 11 na vakacacani, na vakararawataki; o sa kila na veika a yaco vei au mai Anitioki, mai Aikoniema kei Lisitira; niu a vakacacani, ia mai na veika kece oqori, na Turaga (Sovereign) e a vueti au. 12 E vaka kina o ira kece era gadreva me ra bula e na itovo vakalou (Gr Asebos: qaravi ni siga ni vakacecegu), e na vuku i Jisu (Yahshua) na Mesaia, era na sotava na veivakararawataki. 13 Ia o ira na tamata dau veivakacalai sa na toro sobu ga na nodra veivakacalai kei na nodra vakacalai. 14 Ia mo tatakube matua toka e na veika o sa vulica oti, ka sa vakadeitaki oti tu, ka mo kilai koya e a vakata­vulici iko kina, 15 baleta talega ni o se vulica, mai na gauna o se gone lailai kina, na vosa ni ivola tabu e rawa ni kauta mai vei iko na vuku, o na rawata kina na bula e vu mai na vakabauta e kune vei Jisu (Yahshua) na Mesaia.16 Na vosa ni ivola tabu era a volai e na veivakauqeti ni Kalou (Yahweh); era yaga e na veivakatavulici, e na veivosataki, e na veivakadodonutaki, kei na veituberi ni yalododonu, 17 me vakataucokotaki kina na tamata ni Kalou (Elohim), ka vakarautaki ira me ra daumaka vakaoti, e na vukuni cakacaka vinaka kecekece.
2 Timoci 3:10-17






Also Read If Possible (Wilika Talega Ke Rawa)
Isaiah 40:6-8; Matthew 5:10-12; Act 14;
2 Corinthians 4; 12:1-10; 1 Peter 1:23-2:3

Na iTovo Vakalou Kei Na Vakacegu

Serving For The 8th December, 2008

Ke dua na tamata e vakatavulica e duatani tale na ivakavuvuli, ka sega ni vakatusa na veivosa momona ni noda Turaga o Jisu (Master Yahshua) kei na ivakavuvuli ni itovo vakalou (Gr eusebian: qaravi ni siga ni vakacecegu) vua na Kalou (Yahweh), 04 o koya e viavialevu, e sega ni kila e dua na ka, ka ni malekata cake na veileti kei na veisa vosa, ka dau vakavurea na yalovuvu, na veilecayaki, na veicacati kei na veiqati ca, 05 kei na veisei e na kedra maliwa na tamata e sa vakacacani tu na nodra vakasama, o ira era sa musuki laivi oti mai na dina, baleta era nanuma ni itovo vakalou (Gr: eusebeian; qaravi ni siga ni vakacecegu) e sala ni vakatubu iyau vakavuravura: Yawaki iko mai na tamata vakaoqori.
06 ¶ Na noda tubu, qori na vakaitamera ni yalovakacegu mai na qaravi ni Kalou (Yahweh). 07 Baleta ni da a sega ni kauta mai i vuravura e dua na ka, sa matata vinaka ni da na sega ni kauta laivi e dua na ka. 08 Laiva kina me da vakacegu ga e na keda kakana kei na noda isulu; 09 O ira era kocova me ra vutuniyau, era na lutu i na veitemaki kei na vere, kei na veimataqali gagadre lialia ka mosimosi e dau lomoci ira na tamata, era qai vakamalumalumutaki ka rusa. 10 Baleta na domoni ni ilavo e dua na ivuvu ni ca; eso na tamata e na nodra kocova, era qai tini lutu kina mai na vakabauta, era qai kauta mai vei ira vakataki ira na veimataqali leqa.
I Timoci 6:3-10

Vakarota vei ira era vutuniyau me ra kakua ni qaciqacia se vakanuinui i na iyau tawadei ia Vua ga na Kalou bula (living Yahweh), o Koya e solia vakayauyau tiko mai vei keda na veika meda vakacegu kina, 18 ia me ra vakaitavi ga e na cakacaka vinaka, ka yaco me ra vutuniyau e na cakacaka vinaka, ka dau tu vakarau tu me ra solika ka veiwasei, 19 me ra qai vakotora e na vukudra e dua na yavu vinaka vakaoti e na vuku ni itabagauna se tu mai, me rawa ni ra qai tatakube toka kina e na bula e tawamudu.
I Timoci 6:17-19






Also Read If Possible (Wilika Talega Ke Rawa)
Psalms 112:4, Proverbs 11:24-26; 14:31; 19:17; 22:9; 28:8;

Luke 13:34; 16:1-15; Phillipians4:10-14.

Na Cakacaka E Vinaka. (Good Work)

Serving For The 7th December, 2008

Ia na Turaga (Yahweh) e yalodina; o Koya e na tuberi kemuni, ka vueti kemuni mai na ca. 04 Keitou sa nuitaki kemuni, e na yaca ni Turaga (Yahweh), ni veika keitou a vakarota vei kemuni moni cakava, oni sa cakava tiko ka na cakava tikoga. 05 Me qai tubera na vuniyalomuni, na Turaga (Master), i na loloma ni Kalou (Elohim) vata kei na nona yalovosota na Mesaia.
06 ¶ Ia keitou vakaroti kemuni tiko yani, kemuni na mataveitacini e na yaca ni noda Turaga o Jisu (Master Yahshua), moni kakua ni veitokani kei ira na tacida era lako tu vakaveitalia ni ra sega ni muria na itovo era a ciqoma mai vei keitou. 07 Baleta oni sa kila vinaka tu ni dodonu moni vakatotomuri i keitou; baleta keitou a sega ni tu vakaveitalia e na kemuni maliwa; 08 ka keitou sega ni kana madrai wale tu ga, mai vua e dua vei kemuni, ka ni keitou dau cakacaka vakaukaua, ka ogaoga e na bogi kei na siga, me rawa ni keitou kakua ni icolacola vua e dua vei kemuni. 09 Sega baleta ni sega vei keitou na kena dodonu, ia keitou cakava ga me keitou ivakaraitaki ni itovo oni na rawa ni vakatotomuria. 10 E na gauna mada ga keitou a tiko kina vata kei kemuni, keitou a vakarota na ka vata oqo vei kemuni; ni o koya e sega ni via cakacaka, me kakua ni kana. 11 Keitou sa mai rogoca, ni tiko eso vei kemuni, era dau mokusiga voli ga, baleta era sega ni via cakacaka, era qai dau veivakasosataki wavoki voli. 12 Vei ira qori, keitou vakarota tiko yani qo, ka masuti ira e na yaca ni noda Turaga o Jisu (Master Yahshua), me ra dui cakacaka vakanomodi tu ga, me ra qai kania ga na kedra dui madrai. 13 Ia o kemuni, na mataveitacini, ni kakua ni vakacauoca e na cakacaka vinaka. 14 O koya e sega ni via muria na neitou ivakaro e na neitou ivola oqo, raica matua na tamata oya, moni kakua ni veitokani vata kei koya, me rawa ni yaco vua na madua.
2 Cesalonaika 3:6-15

Also Read If Possible (Wilika Talega Ke Rawa)
Genesis 1:26-30; 2:15; 1 Corinthians 9; 2 Corinthians 12:12-18;

1 Thessalonians 2:1-12

Na Siga ni TURAGA. (Yahweh’s Day)

Serving For The 6th December, 2008

Ia, au vinakata moni kila, kemuni na taciqu, ni sega ni dodonu moni dau lolositaki ira era sa mate, me vaka era dau cakava o ira e sega na nodra inuinui. 14 Baleta kevaka eda vakabauta ni a mate o Jisu (Yahshua) oti qai vakaturi, e na vaka talega kina, ni o ira era mate e na vuku i Jisu (Yahshua), na Kalou (Elohim) e na kauti ira vata mai kei Koya, 15 Oqo keitou via kaya yani vei kemuni, ni keitou a rogoca mai na Nona vosa na Turaga (Yahweh), ni o keda eda se bula tiko ka se tiko voli ni lako mai na Turaga (Master), eda na sega ni liu vei ira era sa mate. 16 Baleta na noda Turaga (Master) vakataki Koya, e na siro mai lomalagi e na dua na kaila, kei na domo ni agilosi-liu, vata kei na davui ni Kalou (Yahweh); ia o ira era a mate e na vukuna na Mesaia era na vakaturi sara ga e liu. 17 Oti, o keda eda se bula tiko ka se vo voli, eda na qai soqoni yani vata kei ira e na o, meda lai sota kei Jisu (Master) e macawa lala; meda qai tiko tawamudu kei na Turaga (Yahweh). 18 Oqori e dodonu kina moni dau veivakacegui vakataki kemuni e na veivosa oqori.
1 Cesalonaika 4:13-18

E na itabagauna kei na iwasewase ni gauna, e sega tale ni dua na kena yaga vei kemuni, meu volavola yani kina. 02 Baleta o kemuni vakataki kemuni oni sa kila vinaka sara tu ga, ni na yaco mai na nona siga na Turaga (Yahweh), me vaka e dua na daubutako e na bogi buto. 03 Baleta e na gauna era na kaya kina, “Sa yaco mai na veimaliwai vinaka kei na bula sautu!” qori na gauna e na yaco vakasauri kina vei ira na veivakacacani, me vaka ni yaco vakasauri na vutu ni taratara vua e dua na yalewa bukete; era na sega ni drotaka rawa. 04 Ia o kemuni, kemuni na taciqu, oni sega ni tiko e na butobuto, me na vakidacalataki kemuni kina na siga oqo, me vaka e dua na daubutako.
1 Cesalonaika 5:1-4



Also Read If Possible (Wilika Talega Ke Rawa)
Daniel 12:1-3; Matthew 24:2; 2 Pita 3;
Revelation 3:1-6

Na Mesaia E Liu Tikoga. (The Messiah Leads)

Serving For The 5th December, 2008

O Koya e veiucui vakaoti kei na Kalou (Elohim) sa tabogo, ka ulumatua vei ira na veika buli kece.16 Baleta, e na vukuna o Koya, era a buli kina na veika kece e lomalagi, kei na veika kece era tiko e vuravura, laurai se sega ni laurai, se ra itutu vakatui, se o ira era daunivakavulewa, se o ira era daulewa. Na veika kece era a tiko e ligana ka buli e na vukuna. 17 O Koya, e liu duadua e na veika kece, ka vakataudeitaka tiko na veika kece. 18 O Koya e ulu ni yagona, oya na isoqo­soqo, o koya na ivakatekivu ka isevu vei ira na vakaturi mai na mate, me rawa ni liu tikoga o Koya e na veika kece. 19 Baleta ni talei Vua na Kalou (Yahweh) me mai tinia na veika kece Vua; 20 e na ligana o koya me na vakalesuya Vua na veivakaduavatataki; mai na nona dra a dave e na kauveilatai, qai yaco kina na veisaututaki e na Vukuna, ruarua vei ira era tiko e vuravura kei lomalagi.
21 ¶ O kemuni mada ga, oni a dau tu yawa ka dau sevaki e na uto ni nomuni vakasama baleta na nomuni cakacaka ca, na veisaututaki sa soli mai, 22 mai na imadrali ni lewe ni Yagona, kei na Nona mate, me rawa ni qai vakaturi kemuni, moni vakatabui, tawacala ka sega ni vakamelei rawa, 23 kevaka oni toso tikoga e na vaka­bauta, ka tudei na nomuni yavu moni kakua ni toso laivi mai na inuinui ni itukutuku vinaka oni sa rogoca oti, ni a vunautaki vei ira na veika buli kece e ruku ni lomalagi, kau sa mai kena italatala tu oqo, o au, o Paula.
Kolosa 1:15-23








Also Read If Possible (Wilika Talega Ke Rawa)
Genesis 1:26; John 1:1-18; Romans 5:9-11; 2 Corinthians 5:17-21;

Colossians 2:9-10; Hebrews 1:1-13.

Mo Kila Na Mesaia (Know the Messiah)

Serving for the 4th December, 2008

O au mada, au a dau vakanuinui tu e na veika vakatamata. Ia ke dua na tamata e nanuma ni nona inuinui e no e na veika vakatamata, o au e levu cake sara na noqu inuinui mai vua; 05 baleta o au, au a teve e na gauna e se qai siga walu kina na noqu bula, au kai Isireli vakatamata, kau lewe ni yavusa Penijamini, au Iperiu botoboto, ia e na veika me baleta na lawa, au Farisi: 06 E na gugumatua, au dau beitaka vakaca na lotu; ia e na ivakatagedegede ni yalododonu e na yavu ni lawa, o au, au tabucala. 07 Ia na veika oqo era a dau bibi tu vei au, au sa qai tini wilika qo, ni ra noqu yali, e na vuku ni Mesaia. 08 Io, au se wilika tiko ga ni ra noqu yali, e na vakaitamera ni noqu kilai Jisu (Yahshua) na Mesaia na noqu Turaga (Master), baleta e na vukuna, au sa mai vakayalia kina na veika kece, ia qori au wilika ni ka ni qaqa Vua na Mesaia,
09 ¶ meu qai kune Vua, baleta ni a sega ga ni dua na noqu yalododonu au a rawata mai na lawa, ia na yalododonu ga e vakayavutaki e na Nona vaka­bauti na Mesaia; oya na yalododonu e soli mai Vua na Kalou (Yahweh); 10 meu rawa ni kilai Koya, kei na kaukaua ni Nona vakaturi, ka wasea vata kei Koya na veika voravora a sotava, kevaka mada ga meu qai tini mate kina me vakataki koya, 11 meu qai rawata kina e dua na sala, meu na vakaturi kina mai na mate. 12 E sega ni kena ibalebale oqori niu sa rawata oti na veika oqori, se me kainaki niu sa yalosavasava vakaoti; au se segata tikoga meu yacova yani na inaki a qisi i au kina o Jisu (Yahshua) na Mesaia. 13 Kemuni na noqu mataveitacini, au sega ni nanuma niu sa yacova na cere; ia e duabulu na ka oqo au kila, au sa guilecava na veika kece sa sivi, kau sa tadolova tiko yani na veika era tu e mataqu, 14 kau sa sasaga tiko vakaukaua, meu rawata na cere, meu qai taura na icovi ni veikacivi cecere ni Kalou (Elohim), e na vukui Jisu (Yahshua) na Mesaia.
Filipai 3:4-14








Also Read If Possible (Wilika Talega Ke Rawa)
Psalms 1:30-33; Matthew 5:43-48; Mark 8:34-37; Acts 22:1-21;

Colossians 1:24; Hebrews 12:1-3

Na Yalomalumu Kei Na Lagilagi. ( Meekness and Glory)

Serving For The 3rd December, 2008

Ia kevaka oni sa kunea na veivakacegui mai Vua na Mesaia, kei na loloma cecekia kei na veitokani ni Yalo, vata kei na yalo ni veinanumi kei na yalololoma, 02 ni vakataucokotaka sara na noqu reki, e na nomuni lomavata e na dua na loloma, dua na bula kei dua na vakasama. 03 Kakua ni cakava e dua na ka e na yalokocokoco se na yaloveidabui; ia e na yalomalumalumu laivi kemuni yadudua moni raici ira na wekamuni ni ra cecere cake mai vei kemuni. 04 Laiva me kakua ni dua e kauwaitaka ga na veika baleti koya ga, ia laiva moni daukauwaitaka talega na veika me baleti ira na wekamuni vakaitikotiko. 05 Vakasamataka na ka oqo e lomamuni me vaka ni a dau vakasamataka tale ga o Jisu (Yahshua) na Mesaia: 06 ni o Koya, e dina ga ni tautauvata kei na Kalou (Yahweh), a sega ni nanuma ni butako, ke tautauvata kei na Kalou (Yahweh); 07 ia a sega ni vakadokadokataka oqori, qai taura na itutu vaka dauniveiqaravi, me qai tautauvata kina kei na tamata. 08 Ia, ni sa kune ni sa taura na bulibuli vakatamata, e a qai vakalolo­virataki Koya me talairawarawa tiko me yacova na Nona mate, oya na nona mate e na kauveilatai. 09 Qori, a qai vakacerecerei Koya kina na Kalou (Elohim), qai solia Vua na yaca e dokai vakalevu cake mai na veiyaca kece tale eso, 10 baleta e na yaca i Jisu (Yahshua), na duru kece era na tekiduru, o ira mai lomalagi, o ira e vuravura, vata kei ira e ruku ni vuravura; 11 ia na duivosavosa kece era na tusanaka ni o Jisu (Yahshua) na Mesaia e Turaga, (Sovereign) e na lagilagi ni Kalou (Yahweh) na Tamada.
Filipai 2:1-11




Also Read If Possible (Wilika Talega Ke Rawa)
Isaiah 45:22-25; John 13:1-15; Romans 14:11-12; 1 Corinthians 15:20-28;

Phillipians 2:19-21; 1 Peter 5:5-6

Taqomaki ki na Veivueti (Protected Until Salvation)

Me tiko kei kemuni na vakacegu kei na yalololoma ni Kalou (Yahweh) na Tamada kei na noda Turaga o Jisu (Master Yahshua) na Mesaia.
03 ¶ Me vakavinavinakataki na Kalou (Elohim) na tama ni Noda Turaga o Jisu (Master Yahshua) na Mesaia; o Koya e sa vakalougatataki keda oti e na veimataqali veivakalougataki mai lomalagi, e na vuku ni Mesaia; 04 ka ni a digitaki keda meda Nona, ni sebera ni vakotori na yavu kei vuravura, meda na yalosavasava ka tawacala e Matana. 05 E a qai digitaki keda e na Nona loloma meda Nona mai na ivakatekivu, ka susugi keda meda luvena mai vei Jisu (Yahshua) na Mesaia, me vaka ni a Nona lewa marautaki ga o Koya, 06 me qai vakavinavinakataki kina na lagilagi ni Nona loloma, sa sovaraka mai vei keda e na vuku ni Nona daulomani. 07 Vua, eda kunea na bula; ia e na Nona dra, na veibokoci ni ivalavala ca, oqori mai na titobu ni Nona loloma, 08 sa solia vakayauyau tiko vei keda, e na vuku kei na kilaka vakayalo, 09 ni sa vakaraitaka oti vei keda, na veika vuni a navuca mai na ivakatekivu me na cakacakataki; 10 oya na Nona lewa, e na yaco tiko e na kena gauna lokuci, me na vakavoutaki na veika kece e vuravura kei lomalagi e na vukuni Mesaia, 11 o Koya e vu ni noda digitaki, me vaka na nona ilesilesi mai na ivakatekivu, sa mai gadreva kina me vakayacora na veika vinaka kece sa lewa oti tu me vaka na nona inakinaki, 12 me rawa ni da imatai meda ravi Vua na Mesaia, me Nona na vakarokoroko kei na lagilagi . 13 E na Vukuna, oni sa rogoca kina na vosa ni dina, oya na itukutuku vinaka ni nomuni na vakabulai; e na Vukuna talega, oni sa vakabauta kina, moni sa kovu tu kina oqo e na Yalo Tabu yalataki, 14 me ivakadei ni noda ivota­vota, me ka ni nodra vakabulai o ira era sa vueti vata kei na vakarokorokotaki ni Nona lagilagi.
Efeso 1:2-14




Also Read If Possible (Wilika Talega Ke Rawa)
Psalms 113; Romans 8:29-39; Ephesians 2:4-10; Revelations 3:5;

Revelations 13:8; Revelations 20:15.

Na iCovi Ni Gauna Se Tu Mai. (The Future Reward)

Serving For The 1st December, 2008

Keitou kila vinaka, kevaka me sa rusa na noda vale vakavuravura, e se tiko ga e dua na noda vale e bulia na Kalou (Yahweh), e dua na vale e sega ni tara e na liga, e tawamudu ka tiko mai lomalagi. 02 O keda talega eda vutugutaka tiko na vale vakavuravura oqo, e na noda gadreva tiko vagumatua meda lai vakayagataka na noda vale e tiko mai lomalagi, 03 kevaka e sega ni dina, ia e na gauna mada ga eda sa vakaisulu oti tu kina, eda se luvawale tu ga. 04 Ni da se tiko e na vale vakavuravura oqo, eda kudru tiko baleta ni sa rui bibi; ia eda sega ni via biuta laivi, eda qai via tataqavi tale yani, me rawa ni rawai na mate e na bula. 05 O koya e vakarautaki keda tiko e na veika oqo, na Kalou (Yahweh), o Koya talega sa yalataka oti vei keda na Yalo. 06 O koya oqori eda dau yalodei tu kina, e na noda kila ni gauna kece eda bula tiko kina e na yago oqo, eda tiko tani ga mai Vua na Turaga (Master), 07 Baleta eda toso tiko e na vaka­bauta, sega e na rai. 08 Qori na vuna eda yalodei tiko kina, ni da gadreva meda lako vakatikitiki mai na yago oqo, me da lai tiko kei na noda Turaga (Master). 09 O koya oqori eda dau tovolea tiko kina, veitalia kevaka eda tiko vata se tiko vakatikitiki mai vua, meda vakadonui Vua. 10 Baleta eda na rairai kece i na mata ni Nona idabedabe ni vakataulewa na Mesaia, me rawa vei keda yadua, meda ciqoma na icovi ni veika eda a dui vakayacora e na dui yagoda se vinaka se ca.
2 Korinica 5:1-10






Also Read If Possible (Wilika Talega Ke Rawa)
Ecclesiastes 12; John 11:20-27; Romans 14:1-13; Phillipians 1:20-26;

1 Corinthians 15: 35-54.

Na iLoloma Vakayalo.(Spiritual Gifts)

Serving For The 30th November, 2008

Ia e na veika me baleta na loloma vakayalo, kemuni na veitacini, au via vakalesuya na nomuni vakasama moni nanuma, 02 ni oni a dau tawalotu tu e na dua na gauna, oni qai vakayarayarataki kece vakadua vei ira na matakau galu. 03 Ia qo, au vinakata moni kila vinaka tiko, ni na sega ni rawa vua e dua e vosa tiko e na Yalo ni Kalou (Elohim) me kacivi Jisu (Yahshua) ni kalouca; ka sega ni dua e rawa ni kaya ni Turaga (Sovereign) o Jisu, vakavo e na kaukaua ni Yalo Tabu. 04 E levu toka na veimataqali loloma, ia e dua ga na Yalo. 05 Era duidui na veimataqali veiqaravi, ia e dua tikoga na Turaga (Sovereign). 06 E levu na veimataqali kaukaua ia na Kalou (Elohim) e duabau e cakacakataka tiko na veika kece e loma ni tamata. 07 Ia na basika ni Yalo Tabu, e soli vei ira na tamata kece, me yaga vei ira kece na kena vinaka; 08 baleta vua e dua e solia na Yalo Tabu na vosa ni vuku, ia vua e dua tale, na Yalo Tabu vata ga e solia vua na vosa ni kilaka, 09 vua e dua tale na vakabauta, mai vua na Yalo Tabu vata ga, vua e dua tale na iloloma ni veivakabulai e na Yalo Tabu vata ga; 10 vua e dua tale, na cakacakataki ni mana, vua e dua tale na parofisai, vua e dua tale na kena kilai na veimataqali yalo, vua e dua tale na kilai ni dui vosavosa, vua e dua tale na kena vakadewataki na dui vosavosa. 11 E dua ga na Yalo e cakacakataka na veika kece oqo me veiwaseyaka tiko vei ira yadudua, me vaka ni Nona lewa.
12 ¶ Me vaka ni dua ga na yago, ia e levu na veitikina, na veitiki ni yago e duabau oya, e dina ga ni ra le levu, era dua tikoga na yago, oqori e tautauvata kei na Mesaia. 13 Baleta e na dua ga na Yalo, eda a papitaisotaki kece kina i na dua na yago se da Jiu, se da Arameani, se da bobula, se da tugalala, eda a caka kece meda gunu mai na dua na Yalo.
1 Korinica 12:1-13.




Also Read If Possible (Wilika Talega Ke Rawa)
Exodus 31:1-6; 35:30-36:2; Romans12:1-8; 1 Corinthians 13-14;

Ephesians 4:1-16; Hebrew 2:1-4; 1 Peter 4:7-11.

E Duavata E Na Vuku Ni Mesaia Na Jiu Kei Na Kaitani. (The Jews and the Gentiles unite in the Messiah)

Serving For The 29th November, 2008

Qo na vuna o au, o Paula, au sa kaivesu tu kina nei Jisu (Yahshua) na Mesaia, e vukumuni na kai Veimatanitu tani. 02 Oni sa bau rogoca oti beka na ilesilesi ni veiqaravi ni Nona loloma na Kalou (Elohim) a soli vei au e na vukumuni? 03 Na ka tawamacala oqo a vakatakilai vei au, me vaka au a vola vakalekaleka yani vei kemuni, 04 me rawa ni oni wilika moni qai kila na veika au sa kila toka me baleta na veika tawamacala ni Mesaia, 05 na veika a sega ni bau vakarai­taki vei ira na luve ni tamata e na veitaba­gauna tale eso me vaka sa vakaraitaki tiko qo vei ira na apositolo kei na parofita tabu, mai vua na Yalo: 06 ni o ira na kai Veimatanitu tani, era na vakaivotavota vakaitaukei e na Yagona, kei na yalayala a soli mai e na vuku ni Mesaia, e na itukutuku vinaka. 07 E na itukutuku vinaka oya, au sa kena italai, e isolisoli ni loloma ni Kalou (Elohim) e a soli vei au, e na cakacaka yaco ni Nona kaukaua. 08 Vei au, o au, au lolovira duadua vei ira na digitaki, na iloloma qo sa mai soli vei au, meu vunautaka e na kedra maliwa na kai Veimatanitu tani, na itukutuku me baleta na Nona iyau kunekune dredre na Mesaia, 09 meu rawa ni vakatakila vei ira na tamata kece me ra raica se cava na veiqaravi ni veika vuni, e a dau vunitaki tu Vua na Kalou (Elohim), o Koya e a bulia na veika kecekece; 10 ka kena inaki, me vakaraitaki cake mai na isoqosoqo, na vuku cecekia ni Kalou (Elohim) vei ira na agilosi kei ira na ira na kaukaua e na itikotiko eso vakalomalagi, 11 oya na vuku e a vakarautaka o Koya e na veitabagauna sa sivi, qai mai cakava vei Jisu (Yahshua) na Mesaia na Noda Turaga (Master); 12 o Koya e kune Vua na noda galala ni veitaratara e na tudei ni nona vakabauta.
Efeso 3:2-12.





Also Read If Possible (Wilika Talega Ke Rawa)
Isaiah 49:1-6; Act 15; Galatian 3:25-29; Ephesian 2:11-22.

Laiva na Veika Kece Vakaicegu mera Vakavinavinakataka na Kalou (Let everything with breath Praise Yah)

Serving for the 28th November, 2008

Aleluya. Vakavinavinakataka na TURAGA (El) e na loma ni nona valetabu: vakavinavinakataki Koya e na loma ni Nona lomalagi vakaitamera. 02 Vakavinavinakataki Koya e na vuku ni nona cakacaka kaukaua; vakavinavinakataki Koya ni sa levu dina ga. 03 Vakavinavinakataki Koya e na kena uvu na Davui (trumpet); vakavinavinakataki Koya e na soliteri kei na api. 04 Vakavinavinakataki Koya e na tibereli kei na veimeketi; vakavinavinakataki Koya e na ivakatagi vakawa kei na bitunivakatagi. 04 Vakavinavinakataki Koya e na sibali rogo bi: 05 Vakavinavinakataki Koya e na sibali e tatamelamela. 06 Laiva na veika kecekece vakaicegu me vakavinavinakataka na TURAGA (Yah)
Aleluya.

Same 150: 1-6

Kakua ni yaco mo mateni e na waini, baleta e kune kina na itovo lialia; ia moni vakasinaiti ga e na Yalo, 19 ka me dau wewe ni nomuni vosa e vuniyalomuni na same, na sere ni lotu, kei na sere vakayalo, ka dau laga sere mai vuniyalomuni Vua na Turaga (Sovereign), 20 dau vakavinavinaka e veiveigauna kece e na vukudra na tamata Vua na Kalou (Elohim) na Tamada, e na yaca ni Turaga o Jisu (Master Yahshua) na Mesaia.
Efeso 5:18-20.

Also Read If Possible (Wilika Talega Ke Rawa)
Isaiah 49:1-6; Act 15; Galatian 3:25-29; Ephesian 2:11-22

Vakavinavinakataki na Kalou Mai Lomalagi. (Thanksgiving to Yahweh in Heaven)

I dedicate this to the American people and all others, who will be celebrating

Thanksgiving Day today.

Serving For The 27th November, 2008

E na gauna vata oqori, Au sa tiko tale e na yalo; au qai raica e dua na idabedabe vakatui ni toka mai lomalagi, qai Dua e dabe toka e na idabedabe-vakatui oqo. 03 O koya e dabe toka kina, e tautauvata kei na vatu Jasipa kei na Satiusa; qai rama vakavolivolita tu na idabedabe-vakatui e dua na drodrolagi e vaka na emarali. 04 Wavokita na idabedabe vakatui, e ruasagavulukava na idabedabe; ia e na idabedabe oqo au raica ni ra dabe toka kina e ruasagavulukava na qase, era vakaisulu tu e na kote vulavula, ka ra tokara kece tu e uludra na isalavakatui koula. 05 Ia mai na idabedabe-vakatui, e lidi tiko mai kina na yaseyase, e lutu tiko mai kina na kurukuru, vata kei na veirorogo; ia e vitu na icina bukawaqa era caudre tiko e na mata ni idabedabe-vakatui; oqori na Yalo ni Kalou (Elohim) e vitu. 06 E na mata ni idabedabe-vakatui e toka e dua na wasawasa iloilo me vaka na kirisitali; ia e na kedra maliwa na idabedabe-vakatui kei na veiyasana, eratou toka e va na ibulibuli bula, e robota tu na yalokanimata, mai matadra ka vaka kina mai dakudra. 07 Na imatai ni ibulibuli bula e vaka na laione, na ikarua ni ibulibuli bula e vaka na luveni bulumakau, na ikatolu ni ibulibuli bula e tiko na matana me vaka na tamata, kei na ikava ni ibulibuli bula e vaka na ikeli e vuka tiko. 08 Na ibulibuli bula le va oqo, e ratou tau ya ono na tabadratou ni vuka, ka roboti ratou tu e loma e vuqa vakavuqa na yalokanimata. E ratou sega ni cegu, e na siga kei na bogi, e na nodratou kaya tiko; “E cecere, e cecere, e cecere, na Turaga (Yahweh), na Kalou Kaukaua (El Shaddai), o Koya a bula mai liu, e bula tiko edai ka vakarau me lako mai.”
Vakatakila 4:2-8.

E ratou sega ni cegu, e na siga kei na bogi, e na nodratou kaya tiko; “E cecere, e cecere, e cecere, na Turaga (Yahweh), na Kalou Kaukaua (El Shaddai), o Koya a bula mai liu, e bula tiko edai ka vakarau me lako mai.” 09 Ni ratou solia na ibulibuli bula oya, na lagilagi, na vakarokoroko kei na vakavinavinaka vei Koya e dabe toka e na idabedabe-vakatui, o Koya e bula tawamudu ka sega ni mudu; 10 o ratou na qase le ruasagavulukava, eratou na lutu sobu i rukuna o koya e dabe toka e na idabedabe vakatui me ratou vakarokoroko Vua e bula tawamudu ka sega ni mudu, me ratou vakacabora na nodratou dui isalavakatui e na mata ni idabedabe-vakatui ratou qai kaya; 11 “E kilikili dina ga, kemuni na Turaga (Sovereign), na neimami Kalou (Elohim) Moni ciqoma na lagilagi, na vakarokoroko kei na kaukaua; baleta Oni a bulia na veika kece, e na Nomuni lewa era tu kina, era a buli talega kina.
Vakatakila 4: 8b-11.

Also Read If Possible (Wilika Talega Ke Rawa)
Exodus 24:1-11; Isaiah 6; Psalm 103:20-22; Psalm 148; Mark 10:17-18

Ciqoma na iLoloma Soliwale Ni Kalou E Na Vakavinavinaka. (Receive the Gifts of Yahweh With Thanksgiving)

Serving For The 26th November, 2008

Na Yalo sa kaya oti vakamatata, ni na yaco e na dua na gauna mai muri, ni so era na lutu laivi mai na vaka­bauta, me ra vakamuria na yalo dauveivakacalai kei na nodra ivakavuvuli na jimoni, 02 e na kedra irairai lasutaki e na veivakacalai ni ra cavuta na vosa lasutaki, ka kakaseisei tu na nodra lewa e loma, 03 ni ra vakatabuya na vakawati, ka vakarota me kakua ni laukana na kakana a bulia na Kalou (Elohim) me vakayaga­taki e na vakavinavinaka, vei ira era vakabauta ka kila na dina. 04 Baleta na ka kece e bulia na Kalou (Yahweh) e vinaka, ka sega ni dua na ka e na besetaki ke ciqomi e na vakavinavinaka, 05 baleta era sa vakatabui oti e na vosa ni Kalou (Yahweh), kei na masumasu.
06 ¶ Kevaka o vakatavulica na veika oqo vei ira na mataveitacini, o sa na wili mo italatala vinaka nei Jisu (Yahshua) na Mesaia; tuberi ira cake e na vosa ni vakabauta kei na ivakavuvuli vivinaka o a vakatavulici kina. 07 Biliga tani na nodra itukuni lialia na buinigone, ka vakaukauataki iko cake e na itovo vakalou (Kr: eusebeian: qaravi ni siga ni vakacecegu). 08 Na vakaukaua yago e yaga ga vakalekaleka; ia na itovo vakalou (Kr: eusebeia: qaravi ni siga ni vakacecegu) e yaga e na veitabana kece, ka ni kune votu kina na bula yalataki e na gauna oqo, kei na kena e na basika mai muri. 09 Qo e dua na vosa dina, e dodonu me ciqomi. 10 Qo na vuna, eda mai cakacaka ka vosota tu kina na veivakalialiai, baleta eda vakabauta na Kalou bula (living Yahweh), o Koya e iVakabula (Saviour) vei ira na tamata kecekece, vakabibi vei ira era vakabauta. 11 Na veika oqo mo vakarota ka vakatavulica
1 Timoci 4:1-11.





Also Read If Possible (Wilika Talega Ke Rawa)
1 Chronicles 16:4-14; Romans 8:18-28; 14;
1 Corinthians 10

Vakavinavinakataka Na Kalou, Na Nona Loloma E Tawayalani. (Give Thanks To Yahweh, For His Mercy Endures For Ever.)

Serving For the 25th November, 2008

Vakavinavinaka Vua na TURAGA (Yahweh), baleta ni yalovinaka o Koya: ka tawa yalani na Nona loloma. 02 Vakavinavinaka Vua na nodra Kalou (Elohim) na veikalou (elohims); ka ni tawa yalani na Nona loloma 03 Vakavinavinaka vua na nodra Turaga (Sovereign) na veituraga (rulers); ka ni tawa yalani na Nona loloma.
Same 136:1-3.

E veigauna kece, keirau dau vakavinavinaka Vua na Kalou (Elohim), na tama i Jisu (Yahshua) na Mesaia; keirau dau masulaki kemuni e veigauna kece, 04 mai na gauna keirau rogoca kina na nomuni vakabauti Jisu (Yahshua) na Mesaia kei na nomuni yalololoma vei ira na digitaki; 05 e na vuku ni inuinui sa maroroi tu mai lomalagi me na nomuni, me vaka oni sa rogoca oti mai liu e na vosa dina ni itukutuku vinaka, 06 e a vunautaki vei kemuni, me vaka a vunautaki i vuravura raraba, ka sa vuavuai vinaka tiko e na kemuni maliwa, mai na siga oni a rogoca ka kila kina na kena dina na yalololoma ni Kalou (Elohim),
Kolosa 1: 3-6.

Au dau vakavinavinakataka na noqu Kalou (Elohim) e veigauna kece, kau dau nanumi iko e na noqu masu, 05 mai na gauna au a rogoca kina na nomu vakabauta kei na nomu lomana na Turaga o Jisu (Master Yahshua) vata kei ira kece na digitaki, 06 me rawa ni vakavatukana na nomu vakabauta e na kena cakacakataki, me qai kilai raraba na veika vinaka e tiko vei iko e na vuku i Jisu (Yahshua) na Mesaia. 07 Sa mai vuable na neimami reki kei na vakacegu e na vukuni nomu loloma, kei na vuniyalodra na digitaki sa vakavoutaki.
Filimoni 1:4-7.

Also Read If Possible (Wilika Talega Ke Rawa)
1 Chronicles 16:34-36; 2 Chronicles 5-7;
Psalms 118:1-4; 136:4-26; 2 Corinthians 9:10-15.

Vakavinavinakataka Na Kalou (Give Thanks to Yahweh).

Serving For The 24th November, 2008

E Dua Na Same: Me Ka Ni Veivakavinavinakataki
Kaila e na mamarau Vua na TURAGA (Yahweh), i vuravura raraba. 02 Qarava na TURAGA (Yahweh) e na yalomamarau; toro mai Vua e na lagalaga sere. 03 Kila ni Kalou (Elohim) o koya na TURAGA (Yahweh); ni o koya a buli i keda, o keda eda sega ni buli I keda: o keda eda nona tamata, na sipi ni nona ba ni veiqaravi. 04 Curu i na nona matamata e na vakamolimoli, kei na nona lomanibai e na vakavina­vinaka: vakamolimoli vua, ka vakacaucautaka na yacana. 05 Baleta e yalovinaka na TURAGA (Yahweh); ka tawamudu na nona yalololoma; Na Nona yalodina e na yacova na itabatamata kecega.
Same 100:1-5

Kakua ni yaco mo mateni e na waini, baleta e kune kina na itovo lialia; ia moni vakasinaiti ga e na Yalo, 19 ka me dau wewe ni nomuni vosa e vuniyalomuni na same, na sere ni lotu, kei na sere vakayalo, ka dau laga sere mai vuniyalomuni Vua na Turaga (Sovereign), 20 dau vakavinavinaka e veiveigauna kece e na vukudra na tamata Vua na Kalou (Elohim) na Tamada, e na yaca ni Turaga o Jisu (Master Yahshua) na Mesaia.
Efeso 5:18-20









Read Also If Possible (Wilika Talega Ke Rawa)
2 Chronicles 6:41; Psalms 65; 84; 96; 3 John 11.

Vakavinavinakataka Na Veika E Solia Tiko Na Kalou. (Give Thanks For Things That Yahweh Gives)

Serving For The 23rd November, 2008

Vakavinavinakataka na TURAGA (Yahweh), baleta ni yalovinaka o koya: ka sega ni yalani na nona loloma me tawamudu 02 Laiva me ra kaya vakakina, o ira era sa vaka­bulai oti maivua na TURAGA (Yahweh), o ira e vakabulai ira o koya mai na liga ni meca; 03 O ira era e a soqoni ira vata mai na veivanua, mai na Vuaicake, kei na Vuaira, mai na Tokalau, kei na Ceva talega. 04 Era a lako sese voli e na lekutu kei na veivanua dravuisiga; era a sega ni kunea e dua na sala ki korolevu me ra lai tauyavu kina. 05 Era a viakana ka viagunu, ka sa takali tiko yani vakamalua na nodra bula. 06 Era qai tagi yani Vua na TURAGA (Yahweh), e na dela ni nodra leqa, a qai vakabulai ira o Koya mai na nodra rarawa. 07 E a liutaki ira e na sala dodonu i na dua na korolevu, e na vanua era rawa ni tauyavu kina. 08 Laivi ira me ra vakavinavinaka Vua na TURAGA (Yahweh) baleta na Nona loloma tawacala rawa kei na nona cakacaka mana e na vukudra na tamata! 09 Ka ni vakacegui ira era karamaca ka vakasinaiti ira era viakana e na veika vivinaka.
Same 107: 1-9

Laivi ira me ra vakavinavinakataka na TURAGA (Yahweh) e na vuku ni nona loloma, kei na nona cakacaka mana e vukudra na tamata! 22 Laiva me ra vakacabora na imadrali ni vakamolimoli, ka tusanaka na nona cakacaka e na sere ni marau.
Same 107:21-22








Also Read If Possible (Wilika Talega Ke Rawa )
2 Chronicles 20:14-26; Psalms 104; 118; 145;
Matthew 6:25-34

E Na Veika Kece Dau Vakavinavinaka (In Everything Always Give Thanks).

Serving for the 22nd November, 2008

Vakavinavinakataka na TURAGA (Yahweh), kaciva na Yacana; Tusanaka na veika sa cakava e na maliwa ni veimatatamata 09 Lagasere Vua, seretaka na Same ni veivakacaucautaki, O iko mo tukuna wavoki na nona cakacaka mana kece sara.
1 Veigauna 16: 8-9

Ni lako mai, meda mai lagasere ni marau Vua na TURAGA (Yahweh); meda mai kaila e na domo ni marau Vua na Uluvatu ni bula. 02 Laiva meda mai lako Vua e na vakavina­vinaka, ka vakacaucautaka e na ivakatagi kei na seresere. 03 Baleta na TURAGA (Yahweh) o Koya na Kalou (El) levu, na Tui cecere vei ira na kalou (elohim) kecekece. 04 E toka e ligana na vanua titobu kei vuravura ka taukena na delavuvu ni veiulunivanua 05 Na wasawasa e Nona, baleta ni a bulia o koya: Na ligana a bulia na vanua mamaca. 06 Lako mai, mai cuva e na sokalou: laiva meda tekiduru e na mata ni TURAGA (Yahweh), o koya e a buli i keda; 07 baleta ni noda Kalou (Elohim) o koya, o keda eda tamata ni nona ba ni veiqaravi, eda qelenisipi ni Nona veikaroni.....
Same 95:1-7(a);

Dau mamarau e veigauna kece. 17 Dau masumasu tabucegu. 18 E na veika kece, dau vakavinavinaka; baleta oqori na gagadre ni Kalou (Yahweh) e na vuku i Jisu (Yahshua) na Mesaia, me baleti kemuni.
1 Cesalonaika 5:16-18

Also Read If Possible (Wilika Talega Ke Rawa)
Nehemiah 12:27-43; Psalms 77; 135:1-7; 148;
Luke 22:14-19

O Paula Kei Panapasa E Na Kedra Maliwa na Kaitani (Paul and Barnabbas among the Gentiles)

Serving for the 21st November, 2008

E tiko mai Lisitira, e dua na lokiloki e a sucu lokiloki mai ketei tinana ka sebera vakadua ni taubale. 09 E a rogoci Paula ni vosa o koya; ia ni raici koya o Paula qai kilakasamataka ni tiko vua na vakabauta me vakabulai, 10 a mani kaya e na domo levu o koya, “Au kaya vei iko, e na yaca ni noda Turaga (Master) o Jisu (Yahshua) na Mesaia tucake vakadodonu e yavamu!” E lade cake sara o koya qai taubale.
Cakacaka 14: 8-10

Ia era qai lako yani i keya o ira na Jiu mai Aikoniema kei Anitioki-i-Pisidia; era qai mai vakayarayarataki ira rawa na tamata me ra saqati rau, era qai virilaki Paula e na vatu, ka yarataki koya laivi i na taudaku ni korolevu baleta era nanuma ni sa mate o koya. 20 Ia, ni ra sa toso wavokiti koya na tisaipeli, a qai tucake tale o koya ka curu lesu i loma ni korolevu. E na siga tarava, rau qai biubiu vata kei Panapasa, me rau lako i Derebe. 21 Ia ni rau sa vunautaka oti na ituku­tuku vinaka e na korolevu oya, ka rau sa rawata e levu tale na tisaipeli, rau qai lesu i Lisitira, i Aikoniema kei Anitioki-i-Pisidia, 22 me rau lai vakayaloqaqataki ira na tisaipeli, ka vakauqeti ira me ra tudei tikoga e na vakabauta, e na nodrau kaya, “E na veivakatovolei ga e na qai rawa kina vei keda meda curu i na matanitu ni Kalou (Elohim).” 23 Ia ni rau sa lesi i ira na qasenilotu e na veisoqosoqo kece, ka rau masumasu ka lolo vata kei ira, rau sa qai vakatabui ira Vua na Turaga (Master), o koya era vakabauta.
Cakacaka 14:19-23

Mai keya rau qai soko i Anitioki-i­-Siria, na vanua rau a vakatabui kina e na loloma ni Kalou (Elohim), e na vukuni cakacaka rau se qai vakaotia ga mai. 27 Ni rau sa soqoni ira vata na lewenilotu, rau qai soli itukutuku me baleta na veika sa vakayagataki rau kina na Kalou (Elohim), bau kina na Nona sa dolava na katuba ni vakabauta vei ira na kai Veimatanitu tani. 28 E keya rau a tiko tale vakabalavu vata kei ira na tisaipeli.
Cakacaka 14: 26-28

Also Read If Possible (Wilika Talega Ke Rawa)
Exodus 17:1-4; Numbers 14:1-10; Romans 1:1-17;
1 Samuel 30:6; John 8:31-59; Ephessians 2:11-22; Act 7:52-60; 14:1-7.