Thought: Yahweh Blesses A Cheerful Giver Mainly For His Cause.
Serving For The 8th February, 2010
Era sa biubiu mai na mata i Moshe o ira kece sara na lewe ni isoqosoqo taucoko ni luve i Isireli. 21 Era lako mai, o ira kece era lomasoli mai vuniyalodra kei ira kece era vakauqeti mai vakayalo me ra yalosoli, era qai kauta mai na isolisoli vei Jiova (Yahweh) me baleta na cakacaka ni valetabu ni soqosoqo, na iyaya kece era vakayagataki kina kei na isulu tabu. 22 Era lako mai, ruarua na tagane kei na yalewa, o ira kece sara era yalosoli, me ra kauta mai na qato, na sau, na mama, kei na itaube, kei na veimataqali iyaya koula; o ira kece na tamata era biuta vakatikitiki na isolisoli koula era kauta mai oqo vei Jiova (Yahweh). 23 O ira kece na tamata e kune vei ira na isulu karakarawa, lokaloka kei na kulakula, kei na lineni matailalai, na vutinime, kei na kuli ni sipi tagane damudamu, kei na kuli karakarawa kata, qori era yauta mai. 24 O ira kece sara era biuta vakatikitiki tu e dua na isolisoli siliva kei na barasa era a kauta mai vakaisolisoli vei Jiova (Yahweh); o ira na tamata e tu vei ira na kau shitimi e na yaga e na cakacaka ni veiqaravi, era kauta tale ga mai. 25 O ira na yalewa era kenadau, era a talitali e ligadra, era qai kauta na veika era talia, ruarua na karakarawa kei na lokaloka, kei na i sulu kulakula, kei na lineni matailalai. 26 O ira na yalewa era kenadau ka nodra gagadre dina, era talia ma vakamaqosa na vuti ni me. 27 O ira na ravouvou, era kauta mai na vatu onikisa kei na vatutalei me vonoti e na efoti kei na iubi ni saresare; 28 vata kei na ivakaboi totoka, na waiwai ni icina, kei na waiwai ni veilumuti, kei na isaluaki ni kau boi vinaka me vakamai. 29 O ira na luve i Isireli era a kauta na isolisoli e na lomasoli vei Jiova (Yahweh) oya; o ira kece na tagane kei na yalewa era yalosoli era a kauta mai na iyaya me vakayagataki e na cakacaka kece sara, a vakarota o Jiova (Yahweh) me na cakava o Moshe.
Solia e na qai soli vei kemuni: vakayauyau, tabaki sobu, kureitaki, qai bini cake tale me vuabale, oti qai sovaraki i loma ni nomu kote. Na ivakarau o vakarautaka, e na vakarautaki lesu mai vei iko.
