Tara Vou Na Valenisoro O ira na Vo Ni Bobula (Temple Rebuilt by the Remnant).

Serving for the 30th September, 2008

Ni ra sa rogoca o ira na kedra meca na mataqali Jiuta kei ira na mataqali Penijamini, ni ra sa tara tiko na valenisoro ni TURAGA (Yahweh) na nodra Kalou (Elah) na kai Isireli, o ira na luvedra era vakabobulataki; 02 era qai lako vei Serupepeli, kei ira na iliuliu ni veimataqali, era qai kaya, “Vakadonuya vei keimami me keimami vukei kemuni e na cakacaka ni taravale, baleta, me vakataki kemuni ga, o keimami talega keimami sa dau qarava na nomuni Kalou (Elah), ka keimami dau vakacabo isoro talega Vua, mai na gauna sara nei Esarahatoni, na tui Asiria, o koya e a kauti keimami mai i ke.” 03 Ia eratou qai sauma vei ira o Serupepeli, o Josua, vata kei ira na iliuliu ni veimataqali ni Isireli, “E sega ni dua na nomuni itavi vata kei keimami e na kena tara na vale Vua na neimami Kalou (Elah); o keimami ga keimami na tara vakataki keimami e na vukuna na TURAGA (Yahweh) na Kalou (Elah) nei Isireli, me vaka a vakaroti keimami kina o Tui Sairusi, na tui Perisia. 04 Era sa qai nakita na tamata era tu volivoliti ira, me ra vakayalolailaitaki ira na kai Jiutia, oya me ra vakarerei ira me ra kua kina ni taravale. 05 Era qai saumi ira na dau ni veileti, me ra mai vakadredretaka na inakinaki kece sa navuci tu, e na gauna kece­ a veiliutaki tiko kina vakatui o Sairusi na tui Perisia, me yacova yani na gauna ni veiliutaki nei Taraiasi na tui Perisia tarava.
Esera 4:1-5.

O Tatinai, na kovana e na Tai ni Uferetisi, o Seta Bosenai, vata kei ira na nodrau itokani, era a qai vakayacora sara vakamatau na lewa a vakatauca ka vakauta yani vei iratou o Tui Taraiasi. 14 Sa mani toso tikoga na nodra taravale na nodra iliuliu na kai Jiutia, sa qai toso tiko ga kina na nodra vutuniyau, e na ruku ni nona veivunauci o Akeai na parofita vata kei Sakaraia na kawa nei Ito. Era a qai mani tara vakaoti na valenisoro, me vaka na ivakaro ni nodra Kalou (Elah) na Isi­reli, vata kei na lawa nei Sairusi, nei Taraiasi, kei Aratakisekisese, o ratou na tui Perisia. 15 E a qai tara oti vakadua na valenisoro oqo e na ikatolu ni siga ni vula o Eitara, e na ikao­no ni yabaki ni nona veiliutaki vakatui o Tui Taraiasi.
Esera 6:13-15.

Also Read If Possible (Wilika Talega Ke Rawa)
Ezra 3-6; Ezekiel 40-48; Haggai 1-2; John 2:13-21

Veivakayaloqaqataki O Sakaraia (Zechariah Encourages).

Serving for the 29th September, 2008

E na ikaruasagavulukava ni siga ni ikatinikadua ni vula, na vula o Sipati, e na ikarua ni yabaki nei Taraiasi, e a yaco mai kina na vosa ni TURAGA (Yahweh) vua na parofita o Sakaraia, na luve i Parakaia, na luve i Ito ni kaya; 08 E na loma ni bogi, au a raica e dua na raivotu – au raica e dua na tamata ni vodoka tiko e dua na ose damudamu! E a duri tu e na dua na loga ni veimateli e na yasa ni dua na baba. Mai dakuna eratou a tu mai kina e tolu tale na ose, roka damudamu, roka kuvui kei na roka vulavula.
Sakaraia 1:7-8.

E ratou a soli itukutuku tiko vua na agilosi ni TURAGA (Yahweh), e a duri talega tu ga e na loma ni veimateli, eratou a kaya tiko, “Keitou sa talevi vuravura taucoko oti mai, keitou qai raica rawa ni sa cegu vinaka sara tu ga o vuravura raraba.” 12 E kaya sara na agilosi ni TURAGA (Yahweh) , “Kemuni na Kalou ni lewe vuqa (Yahweh of Hosts), e na vakacava beka na dede ni nomuni tarova tiko na nomuni loloma vei Jerusalemi, kei na veiko­ro vaka Jiutia, o ira oni sa cudruvi ira tu qo e na loma ni vitusagavulu na yabaki? 13 Sa mani vosa na TURAGA (Yahweh) vua na agilosi keirau a veitalanoa tiko, e na vosa vinaka kei na vosa ni veivakacegui. 14 Sa qai kaya vei au na Agilosi a vosa tiko vei au, “Mo kacivaka na veivosa oqo: Oqo na ka e kaya na Kalou ni lewe vuqa (Yahweh of Hosts); ‘Au dau kauwaitaki Jerusalemi kei Saioni vakalevu e na yalovuvu vakaitamera; 15 ia au dau rarawataki ira sara vakalevu na tawatawalotu era sa dau bula tu vakaveitalia; Au a rarawataki ira ga vaka­lailai, ia o ira ga era qai vakabibi­taka na ca.’ 16 Qori a qai kaya tale kina na Kalou (Yahweh); ‘Au sa na lesu i Jerusalemi e na yalololoma: na Noqu vale e na tara vou tale mai keya e kaya na Kalou ni Lewe vuqa (Yahweh of Hosts), e na qai dodo na wa ni vakavakarau e delai Jerusa­lemi’. 17 “Mo qai kacivaka tale; Oqo na veika e kaya na Kalou ni lewe vuqa (Yahweh of Hosts); ‘Na noqu veikoro lelevu e na vuabale tale vei ira na iyau ka tete i veivanua; e na qai vakacegui Saioni tale na TURAGA (Yahweh), ka digitaki Jerusalemi talega.’”
Sakaraia 1:11-17.





Also Read If Possible (Wilika Talega Ke Rawa)
Isaiah 40:1-2; Zechariah 1- 6; 1 Corinthians 14:3;
2 Corinthians 1:1-3

Akeai: Tara Vou Na Valenisoro. (Haggai: Temple Rebuilt)

Serving For The 28th September, 2008

A qai vosa na Kalou ni lewe vuqa (Yahweh of Hosts) ni kaya, “Qo na ka era kaya tiko na tamata, ‘E sebera ni yaco mai na gauna, me tara kina na vale ni TURAGA (Yahweh).’” 03 Oti sa qai yaco mai na vosa ni TURAGA (Yahweh), ni mai vakasavuya na parofita o Akeai, ni kaya: 04 “Qo beka na gauna moni bula tiko kina e na nomuni veivalekau totoka, ni se rusa koto no na vale oqo?” 05 Ia oqo, na veika a qai kaya na Kalou ni lewe vuqa (Yahweh of Hosts): “Ni vakasamataka vakavinaka na nomuni ivalavala. 06 E ka vakaitamera na veika oni dau teivaka, ia e lailai wale na vuata oni dau tamusuka. Oni kana tiko, ia e sega ga ni rauti kemuni; oni gunu tiko, ia e sega ga ni vakasinaiti kemuni; oni vakaisulu tiko, ia oni sega ni katakata kina; oni sa taura tiko na isau ni nomuni cakacaka, ia oni qai maroroya e na loma ni taga ni ilavo cicila.” 07 Qori e kaya kina na Kalou ni lewe vuqa (Yahweh of Hosts); “Ni vakasamataka vakavinaka na nomuni ivalavala. 08 “Cabeta na veiulunivanua moni lai yauta mai na kauvaro me mai tara kina na vale, meu rawa ni marautaka au qai vakarokorokotaki talega kina,” e kaya na TURAGA (Yahweh). 09 Oni a nuitaka na ka me levu, ia a qai tini lailai wale ga. Na ka kece oni kauta mai i vale, au a uvuca laivi. Baleta na cava?” e taroga na na Kalou ni lewe vuqa (Yahweh of Hosts). “Baleta ga na noqu vale, ni se rusa koto no, ia o kemuni oni sa dui ogataka mada ga na nomuni dui veivale. 10 O koya oqori, e bale kina vei kemuni, na nona bureitaka na tegu na lomalagi, ka bureitaka na vuata na vuravura. 11 Au a kaciva talega e dua na lauqa me samuta na loga ni veiteitei kei na veiulu­nivanua, na veiloganisila, na waini vou, na waiwai, kei na veika kece sara e vuataka na vanua, na tamata, vata kei na manumanu, vata kei na cakacaka kece ni ligamuni.” 12 Ni oti oqori, o Serupepeli na luve i Salacieli, o Josua na luve i Josateki na bete levu, kei ira kece na vo ni tamata, era sa qai muria na vosa ni TURAGA (Yahweh) na nodra Kalou (Elohim), kei na itukutuku nei Akeai na parofita, baleta ni a talai koya mai na TURAGA (Yahweh) na nodra Kalou (Elohim). Era sa qai rerevaka na Kalou (Yahweh) o ira na tamata.
Akeai 1:2-12.





Also Read If Possible (Wilika Talega Ke Rawa)
Haggai 2; Zechariah 1-6; 1 Corinthians 3: 9-17;
2 Corinthians 6:14-16; Ephesians 2:11-22

Vakalesui Ira Na Kai Jiutia O Sairusi (King Cyrus resettles Judah).

Service for the 27th September, 2008

E na imatai ni yabaki nei Sairusi na tui Perisia, e na kena vinakati me vakayacori na vosa ni TURAGA (Yahweh) me vaka a mai vakadewataka o Jeremaia, e a vakauqeta na yalo i Sairusi na tui Perisia na TURAGA (Yahweh), me vakatauca na nona lewa e na loma ni nona matanitu raraba, a qai vola kina vakaivola: 02 “Oqo na veika a kaya o Sairusi na Tui Perisia: ‘Na TURAGA (Yahweh) na Kalou (Elohim) i Lomalagi sa solia vei au na veimatanitu kecekece e vuravura, ka sa lesi i au meu tara Vua e dua na valenisoro mai Jerusalemi, e na yasayasa vaka Jiutia. 03 O koya e nona tamata e na kemuni maliwa, me tiko mada ga kei koya na nona Kalou, laivi koya me lako cake i Jerusalemi mai Jiutia, me lai tara kina na valenisoro ni TURAGA (Yahweh), na Kalou (Elohim) i Isireli, e vakaitikotiko mai Jerusalemi. 04 Ia na tamata kece, e na veiyasa­na taucoko era se bula tiko kina o ira na vo ni bobula, me ra qai vakarautaka mai na siliva, na koula, na iyau eso kei na manumanu susu, kei na isolisoli eso me ka ni valenisoro me kena ikuri ni ka sa yalo­dra me ra solia e na vuku ni vale ni Kalou mai Jerusalemi.’” 05 Qori e a qai vakarau kina o ira na nodra qase ni nodra veimatavuvale nei Jiuta kei Penijamini, o ira na bete, kei ira na Livai, o ira kece e a vakauqeta na yalodra mai Vua na Kalou, me ra sa toso cake me ra lai tara na vale ni TURAGA (Yahweh) mai Jerusalemi. 06 O ira kece na wekadra vakaitikotiko, era a vukei ira e na iyaya siliva, kei na koula, kei na iyau, kei na manumanu, kei na iyau talei, ia oqo era ikuri ga ni veika kece era a dui solia e na nodra dui gagadre. 07 Qai kena ikuri ga ni a vakasuka kece tale mai o Tui Sairusi, na iyaya ga ni valenisoro ni TURAGA (Yahweh), a colata laivi mai Jerusalemi o Nepukanesa, qai binia tu e na loma ni burekalou ni nona kalou (elohim).
Esera 1:1-7.






Also Read If Possible (Wilika Talega Ke Rawa)
2 Chronicles 36:22-23; Jeremiah 25:11-12;
Jeremiah 29:10-14

Vakamacalataka Na Volavola E Lalaga O Taniela (Daniel Explains the Writing on The Wall).

Serving for the 26th September, 2008

Sa qai lai kau sara mai me mai raica na Tui, o Taniela. Sa qai vosa na Tui ka kaya vei Taniela, “O iko beka o Taniela, e dua vei ira na luvedra e dua vei ira a kauti ira mai vakabobula mai Jiuta, o Tamaqu na Tui?
Taniela 5:13.

Au sa mai rogoca na kemu irogorogo ni o rawa ni vakadewataka ka tasereka na ibalebale ni veika vuni se veika tawamacala ka dredre. Kevaka o rawa ni wilika na ka sa volai tu oqo, oti mo qai vakamacalataka vei au na kena ibalebale, o sa na vakaisulutaki dina e na isulu lokaloka, o na vakaitaubetaki e na senicodo koula, oti o na qai lesi mo ikatolu ni dauveiliutaki cecere duadua e na loma ni matanitu. 17 Sa qai vosa cake o Taniela me sauma na Tui, “Moni maroroya tiko ga na nomuni i loloma soliwale, ka solia na nomu icovi vua e dua tale. Ia au na wilika na ka sa volai tu, e na vukumuni, kemuni na Tui, ka vakamacalataka talega na kena ibalebale.
Taniela 5:16-17.

…. “Oni sa vakacaucautaka tiko na kalou (elah) siliva, koula, para­sa, kaukamea, kau kei na kalou vatu, na veika era sega ni rai, rogo, se vakasama rawa. Ia oni sega ni vakarokorokotaka na Kalou (Elah), e taura toka qori e Ligana na nomuni icegu, kei na nomuni ivalavala kecekece. 24 Qori a qai tala mai kina na liga e a vola na itukutuku. 25 Oqo na itukutuku sa volai tu: MENE, MENE, TEKEL, UPHARSIN. 26 Oqo na i balebale ni vosa yadudua: MENE: Na Kalou (Elah) sa Yalana na nomu matanitu ka tinia. 27 TEKEL: O sa vakatovo­lei oti e na ivakarau ni bibi, ka sa kune na nomu malumalumu. 28 PERES; Na Matanitu sa na wasewasei, ka sa soli vei ira na kai Mitia kei ira na kai Perisia.”
Taniela 5: 23b-28.

E na bogi oya e a vakamatei kina o Pelisasari na nodra tui na Kolotiyani, 31 qai taura vaka iliuliu ni matanitu o Taraiasi na kai Mitia, e na gauna sa yabaki onosagavulukarua kina na nona bula.
Taniela 5: 30-31.

Also Read If Possible (Wilika Talega Ke Rawa)
Isaiah 47, Daniel 4; Matthew 24: 14-22;
1 Corinthians 12

Na Volavola E Na Lalaga Simede. (The Writing on the Plastered Wall)

Serving for the 25th September, 2008

E a vakayacora e dua na kana magiti vakaitamera of Tui Pelisasari, e na vukudra na udolu vakacaca na nona veituraga bale, a qai gunu waini vata kei ira. 02 Ni sa gunu waini tiko o Pelisasari e a qai vakarota me lai kau mai na bilo koula kei na bilo siliva a kauta taumada mai na vale tabu mai Jerusalemi o Nepukanesa na tamana; me mai gunu kina na tui, vata kei ira na nona veituraga bale, o ira na watina, vata kei na watina lalai.
Taniela 5:1-2.

Ni ra sa gunu waini tiko, era a vakacaucautaki ira tiko na kalou (elah) koula, siliva, parasa, kaukamea, kau, kei na vatu. 05 A qai vakasauri na kena basika mai na iqaqalo ni ligani dua na tamata, qai lai volavola sara e na lalaga simede, taudonuya na itutu ni icina e na vale ni tui. Sa mani wanonova tu mada ga na liga oya na Tui, ni sa volavola tiko. 06 E a tavuki me sa vulaci na mata ni Tui, sa veilecayaki na nona vakasama, na isema ni sui e tolona era luluqa, na duruna rau a sautaninini ka veidiri e na levu ni nona domobula.
Taniela 5:4-6.

Ia na ranadi, ni rogoca mai na domo ni Tui vata kei na domodra na veituraga bale, a qai curu yani e lomaniloqi ni soqo, “Kemuni na Tui, moni bula tawamudu” e kaya o koya, “Kakua ni lomaleqaleqa. Kakua ni vakavulacitaka na irairai ni matamu. 11 E dua na tamata e bula tiko e loma ni nomuni matanitu, e tiko vua na Yalo ni Kalou (Elah) tabu. E na gauna nei tamamuni, e a kune ni tu vua na raiyawa, na yalomatua kei na vuku e tautauvata kei na nodra vuku na Kalou (Elah); O Tui Nepukanesa, oya na tamamuni na Tui, e a lesi i koya me nodra turaga na daucakamana, na daurairai, na dauvakaraimata ni lomalagi, kei ira na dauparofisai. 12 Na tamata oqo o Taniela, e a vakatokai koya na Tui me yacana o Pelitisasari, e a kune vua na yalo ni vakasama kaukaua dina, e levu na nona kilaka, kei na nona yalomatua, ka rawa talega vua me vakamacalataka vakadodonu na tadra, na vakamacalataki ni veika dredre me kilai, ka tasereka na veikatawamacala. Kacivi Taniela mai baleta o koya e na rawa ni vakamacalataka na ibalebale ni veika sa volai tu oqori.”
Taniela 5:10-12.

Also Read If Possible (Wilika Talega Ke Rawa)
Genesis 41; Daniel 1-4; Joeli 2:28-32;
Act 2:1-21.

Raica Na Vakacokotaki Nei Isireli O Isikeli. (Ezekiel sees the Resettlement of Israel)

Serving for the 24th September, 2008

E a tarai au na liga ni TURAGA (Yahweh), qai kauti au yani o koya e na Yalo ni TURAGA (Yahweh), qai biuti au e lomadonu ni dua na buca; e a sinai vutuvutu tu e keya na sui.
Isikeli 37:1.

Sa qai kaya vei au, “Parofisai vei ira na sui oqo, mo kaya vei ira, ‘Kemuni na sui mamaca, rogoca mada na vosa ni TURAGA (Yahweh). 05 Oqo na ka e kaya na TURAGA (Yahweh) na Kalou (Sovereign) vei ira na sui oqo; Raica, au na vakacuruma na icegu vei kemuni, oni na qai bula tale: 06 Au na solia vei kemuni na ua, ka vakatubura tale na lewemuni, Au qai ubi i kemuni e na kulimuni, au na biuta na icegu e lomamuni, oni na qai bula tale. Oni sa na qai kila ni o au na TURAGA (Yahweh).’” 07 Au sa mani parofisai me vaka e vakaroti vei au. Ia niu parofisai tiko au qai rogoca e dua na rorogo, na rorogo ni tatadiridiri, era sa veicoqacoqa tiko na sui, na sui vata kei na sui.
Isikeli 37:4-7.

E kaya vei au o Koya, “Parofisai vua na icegu; parofisai, luve ni tamata, kaya vua na icegu, ‘Oqo na ka e kaya na TURAGA (Yahweh): Lako mai na matanicagi va va o iko na icegu, mai ceguvi ira era sa mokumate tu oqo, me ra bula.’” 10 Au sa mani parofisai me vaka e vakaroti vei au, qai curumi ira na icegu, era qai bula tale, era qai tucake e yavadra, e dua na mataivalu vakaitamera. 11 Oti qai baci kaya tale vei au o koya, “Luve ni tamata, o ira kece na sui qo era lewe kece ni Yavusa Isireli. Era kaya, ‘Na neimami sui sa mamaca, ka sa takali na neimami inuinui: keimami sa musuki laivi.’ 12 Qori mo parofisai tale kina mo kaya vei ira, “Oqo na ka e kaya na TURAGA (Yahweh) na Kalou (Sovereign); Kemuni na noqu tamata, au na dolava na nomuni ibulubulu, meu kauti kemuni tani mai kina; au na kauti kemuni lesu tale i na qele o Isireli.
Isikeli 37:9-12.

Au na biuta na Yaloqu e lomamuni, oni na qai bula, au na qai vakatikori kemuni e na nomuni qele ga oni taukena. Oni na qai kila kina niu sa vosa o au na TURAGA (Yahweh), kau sa vakayacora sara na ka au kaya,” e kaya na TURAGA (Yahweh).
Isikeli 37:14.

Also Read If Possible (Wilika Talega Ke Rawa)
Deuteronomy 30: 1-10; Psalms 80; Isaiah 40; Exekiel 36;

Act 17: 24-25; 2 Thessalonian 2: 7-8.

Opetaia: Na Siga Ni TURAGA. (Obadiah: The Day Of Yahweh)

Serving for the 23rd September, 2008

“E na siga oya,” e vakatusa na TURAGA (Yahweh) “Au na sega beka ni vakarusai ira na tamata vuku mai Itomi, kei na yalomatua mai na ulunivanua nei Isoa?
Opetaia 1:8.

Baleta na ivalavala kaukaua a vakayacori vei tacimu o Jekope, o na luvuci e na madua, o na vakarusai vakadua. 11 E na siga o a vakatalatala kina, ni ra sa butakoca tiko kina na nona iyau o ira na vulagi, ka ra curu botea na matamata ni nona korolevu o ira na Kaitani me ra vakawirimadigitaki Jerusalemi, o iko o mada ga o a tautauvata kei ira. 12 E sega ni dodonu mo raici tacimu sobu e na veisiga sa yacovi koya kina na tu leqaleqa; se mo marautaka na veika a yaco vei Jiuta e na siga era a vakarusai kina; se mo vosa tu vakavia­vialevu e na siga ni nodra rarawa.
Opetaia 1:10-12.

“Na siga ni TURAGA (Yahweh) sa voleka sara vei ira kece na veimatanitu; na veika o a cakava, qori e na caka tale vei iko, na nomu ivalavala e na lesu mai me mai sauta na ulumu. 16 Me vaka ni o a gunu mai na noqu ulu­nivanua tabu, era na gunu tiko ga vakakina o ira mai na veimatanitu; io, era na gunu, era na qai tiloma sobu era na qai yaco me ra vaka era a sega ni yaco dina. 17 Ia e na ulunivanua o Saioni e na tiko na idrodro dina, e na lagilagi, kei na mataqali i Jekope e na qai taukena na nodra ivotavota.
Opetaia 1:15-17.






Also Read If Possible (Wilika Talega Ke Rawa)
Isaiah 13; Joel 3; 2 Peter 3

Yalataka Na TURAGA Ni Na Saumi Lesu Vei Papiloni. (Yahweh Payback Promises Against Babylon)

Serving For The 22nd September, 2008

Raica, na nona viavialevu; na veika e gadreva era sega ni dodonu, ia o koya e yalododonu e na bula e na nona vakabauta, 05 e dina ga, ni waini e vakaisini koya, e sa viavialevu dina ga o koya, ka sega ni cegu. Baleta sa sinai tu vua na kocokoco me vaka na ibulubulu ka vaka na mate, ni sa sega ni mamau rawa. E vakasoqoni ira vata yani vua me nona na veimatanitu kecega, ka vesuki ira na veimataqali tamata kecega. 06 “Era na sega beka ni vakalialiai koya e na vosa ni veivakacacani kei na vosa ni veibeci ni ra kaya; ‘E na leqa o koya e binia vata na iyau e sega ni nona me vakavutuniyautaki koya vakataki koya e na ivakarau lawaki ca! E na vakacava na kena dede? Ka vaka kina o koya e colata tu vakataki koya na qele vavaku (bubului)’”
Apakuki 2:4-6

Niu sa rogoca a qai vadugu na ketequ; qai sautaninini na tebenigusuqu e na kena rorogo: ka curuma cake na suiqu na vuca, e a sautaninini e lomaqu. Ia au na waraka e na yalovosota na siga ni rarawa, ni sa yaco mai me mai ravuta na matanitu e na kabata mai. 17 E dina ga ni na sega ni seraka tale na sena na vunilolo, ka na sega talega ni kune na vuanivaini e na veivaini; e dina ga ni na maumau wale na vuata mai ni veiolive, ka sega ni rawa e dua na kakana mai na veiwere; ke mani sega sara na sipi e lomanibai ni sipi, ka sega na bulumakau ena kena lomanibai: 18 ia au na yalomarau tiko ga ena vuku ni TURAGA (Yahweh), Kau na rekitaki koya ga na Kalou (Elohim), na noqu ivakabula. Na TURAGA Sau (Sovereign Yahweh) e vu ni noqu kaukaua, e cakava na yavaqu me vaka na yava ni dia, e vakarawarawataka vei au meu kabata rawa na veivanua cecere ….
Apakuki 3:16-19 a).

Also Read If Possible (Wilika Talega Ke Rawa)
Genesis 9:5-6; 12:1-3; Romans 1:16-17; Galatia 3: 8-14;

Hebrews 10: 32-39

Tagilagalagataki O Jerusalemi (Jerusalem Weeps).

Serving for the 21st September, 2008

Sa qai davo lala dina tu na korolevu, a dau oso drigi tu kina na tamata! Sa qai vaka tu edua na yada, o koya a dau vakaitamera tu e na kedra maliwa na veimatanitu! O koya e a ranadi e na kedra maliwa na veiyasana, sa mai yaco tu oqo me dua na bobula. 02 E vakaciriloloma na nona tagi ena vei bogi, ni drodrova sobu tiko na baluna, na wai ni matana. E na kedra maliwa o ira era a dau domoni koya, sa sega ni dua me mai vakacegui koya. O ira kece na nona itokani era sa cakitaki koya; era sa yaco me ra kena meca.
Lele i Jeremaia 1:1-2.

Au sa mani kaya, “Sa takali na kequ idivi, kei na veika kece au a nuitaka maivua na TURAGA (Yahweh).” 19 Au nanuma lesu na noqu rarawa kei na noqu a lako sese tu, na duva gaga kei na wai gaga. 20 Au se nanuma ira vinaka tiko, ka sa lomabibi na yaloqu mai loma. 21 Ia na ka oqo au a qai vakasamataka mai, qori na vuna e se tiko ga kina na noqu inuinui 22 Baleta na ilevu ni Nona loloma na TURAGA (Yahweh), eda sega ni vaqeavutaki kina, baleta na nona veikaroni ena sega ni yalani rawa. 23 Era dau vakavoutaki e na veimataka; sa ka levu na nomuni yalodina. 24 Au kaya vei au vakataki au, “E noqu ivotavota na TURAGA (Yahweh); o koya oya au na waraki koya ga kina.” 25 Na TURAGA (Yahweh) e dau yalovinaka vei ira e tiko na nodra inuinui Vua, vei koya e vaqarai koya; 26 E kilikili me waraki tu ga e na vakanomodi, baleta na veivakabulai e na kune ga vua na TURAGA (Yahweh).
Lele i Jeremaia 3:18-26.




Wilika Talega Ke Rawa
Psalms 137; Ezekiel 19; 24; Matthew 23:18-26

Kau Vakabobula O Ira Na Yavusa Jiutia. (The Tribe of Judah Taken Captive)

Serving for the 20th September, 2008

E a yabaki ruasagavulukadua tiko o Setekaia e na gauna a buli kina me Tui, a qai veiliutaki tiko vakatui mai Jerusalemi me yabaki tinikadua. 12 E a caka ca o koya e na mata ni TURAGA (Yahweh) na nona Kalou (Elohim) qai sega ni vakamalu­malumutaki koya e na mata i Jeremaia na parofita, o koya e mai cavuta tiko na vosa ni TURAGA (Yahweh).
2 Veigauna 36:11-12.

Na TURAGA (Yahweh), na nodra Kalou (Elohim) na nodra qase, a dau talai ira yani vakawasoma na nona italai, me ra kauta na nona itukutuku, baleta na nona dau lomani ira na nona tamata kei na nona kauwaitaka na nona itikotiko. 16 Ia era dau vaka­lialiai ira na italatala ni Kalou (Elohim), ni ra beca na nona vosa, era qai dau vakacacani ira na nona parofita, me yacova ni sa tubu na Nona katakatataki ira na Nona tamata na TURAGA (Yahweh) ka sa sega tale ni dua na kena iwali. 17 Sa mani lai kauta mai na Tui Papiloni me mai mokuti ira, a qai mai vakamatei ira e na iseleiwau na nodra cauravou e na nodra vale tabu, ka sega ni vakavotaka me ra bula tale tiko na cauravou se goneyalewa, na turaga se o ira era sa matua sara. E a solia na ka kece vua na nodra Tui na Kolotiani. 18 E colata lesu i Papiloni na iyaya kece ni vale ni Kalou (Elohim), lelevu se lalai, kei na iyau ni vale ni TURAGA (Yahweh), vaka kina na nodra iyau na tui, kei ira na nona ivakailesilesi. 19 Era a qai vakama na vale ni Kalou (Elohim), ka basuraka na lalaga baivatu kei Jerusalemi; era a vakama na itikotiko vakaturaga kece, era qai vakarusa vakadua na veika yaga kece mai keya. 20 O ira kece na kena vo era drobula mai na iselei­wau, era a qai kau vakabobula lesu i Papiloni; era a lai dauveiqaravi tiko vua, vaka talega kina vei ira na luvena, me yacova na gauna a mai tekivu veiliutaki kina mai keya na matanitu vaka Perisia: 21 E a marautaka na vakacegu oya na vanua, me yacova ni sa qai cava na vitusagavulu na yabaki me yaco­ kina na vosa ni TURAGA (Yahweh) a mai vakasavuya o Jeremaia.
2 Veigauna 36:15-21.





Also Read If Possible (Wilika Talega Ke Rawa)
Leviticus 26:1-43; 2 King 20:12-18; 25; Isaiah 39;

Jeremiah 25:38; 52; Matthew 1:1-17.

Vakabulai Jeremaia Na Parofisai Nei Maika. (The Prophet Micah save Jeremiah)

Serving for the 19th September, 2008

E na ivakatekivu ni veiliutaki vakatui nei Jioakimi na luve i Josaia na Tui Jiutia, e a yaco mai Vua na TURAGA (Yahweh) na vosa oqo;
Jeremaia 26: 1

“Kaya vei ira, ‘Oqo na ka e kaya na TURAGA (Yahweh); Kevaka oni sega ni via vakarorogo vei Au, moni muria na Noqu lawa, au sa vakarota tiko vei kemu­ni, 05 kevaka oni sega ni via vakarogoca na vosa era mai cavuta o ira na noqu italatala na parofita, o ira au talai ira tiko yani vakawasoma veikemuni (ia oni qai sega tiko ga ni vakarorogo), 06 au sa na cakava na vale oqo me vakataki Sailo, kei na korolevu oqo me dau vosavosacati mai vei ira na veimatanitu e vuravura.’”
Jeremaia 26:4-6

Ia ni tinia ga o Jeremaia na vosa kece a vakarota vua na TURAGA (Yahweh) me tukuna vei ira na tamata kecekece, era qai vesuki koya o ira na bete, kei ira na parofita, kei ira na tamata, era qai kaya, “E dodonu mo vakamatei. 09 Na cava mo mai parofisaitaka kina e na yaca ni TURAGA (Yahweh) ni na vakataki Sailo na vale oqo, ka na lala talega vakadua na korolevu?” Era sa qai soqoni vakavolivoliti Jere­maia e na vale ni TURAGA (Yahweh), o ira na tamata.
Jeremaia 26:8-9

Eso vei ira na turaga bale ni vanua, era qai tucake, era qai kaya vei ira na tamata era sa soqoni tiko, 18 “O Maika na kai Moreseci, a parofisai e na gauna ni veiliutaki vakatui nei Esekaia na tui Jiuta. E a kaya kina vei ira na kai Jiutia “Oqo na ka a kaya na TURAGA (Yahweh) na Kalou ni lewe vuqa; O Saioni, e na siviyarataki me vaka e dua na loga ni veiwere, kei Jerusalemi e na yaco me dua ga na ibinibini vatu, na delana ni vale tabu e na vaka e dua na delana tubua e na veimataqali veikau.” 19 E a vaka­matei koya beka o Esekaia na Tui Jiuta kei ira na kena vo mai Jiutia? A sega beka ni rerevaka na TURAGA (Yahweh) e Esekaia qai masuta me vakayalovinakataki koya? A sega beka ni qai vakabiuta na TURAGA (Yahweh), a qai sega kina ni vakayacora na leqa levu a navuca me kedra itotogi ena vukuni ca era dau cakava? Qo eda sa na kauta mai vei keda vakataki keda na leqa vakaitamera!”
Jeremaia 26:17-19



Also Read If Possible (Wilika Talega Ke Rawa)
Jeremiah 18:1-11; 19:1-20:2; 38:1-13; Lamentation of Jeremiah 3:52-57;

Micah 3:9-12; Matthew 16:13-14.

Na iKarua Ni Veikacivi Nei Jeremaia (Jeremiah’s Second Calling).

Serving for the 18th September, 2008

A yaco tale mai vei au na vosa ni TURAGA (Yahweh) e na ikarua ni gauna; “Na cava beka o raica?” Au kaya, “Au raica tiko na cawa mai na dua na kuro wai buebue, ni sa bale vakatatiki vaka i na vualiku (North),” 14 E kaya sara mai vei au na TURAGA (Yahweh), “Mai na vualiku e na tasova mai kina na leqa vakavakaitamera vei ira kece era bula tiko e na vanua. 15 Baleta raica, Au sa vakarau kacivi ira kece na tamata mai na vei­matanitu e na vualiku” e kaya na TURAGA (Yahweh). “Era na lako mai na nodra Tui, mera tauyavutaka na nodra idabedabe vakatui, e na matamata ni koro mai Jerusalemi; era na kabata mai na bai lalaga e vakavolivolita, kei na veikoro kece sara vaka Jiuta.16 Au na tauca na noqu lewa vei ira na noqu tamata baleta na nodra ivalavala ca, ena nodra sa biuti au, vata kei na nodra vakama imadrali boi vei ira na kalou tani, kei na nodra sokaloutaka na veika e bulia na ligadra. 17 “Vakarautaki iko, vauca vinaka na tolomu! Tucake mo tukuna vei ira na cava ga au na vakarota vei iko. Kakua ni rerevaka ira, deu qai vakataqayataki iko e matadra. 18 Baleta raica nikua au sa lesi mo dua na koro kaukaua, e dua na duru kaukamea, kei na bailalaga parasa mo tu saqati ira na lewe ni vanua taucoko, mo veisaqasaqa kei ira na tui Jiuta, o ira na kena vakailesilesi, o ira na kena bete, kei ira na lewe ni vanua. 19 Era na valuti iko, ia era na sega ni rawati iko, baleta au na tiko vata kei iko, kau na vakabulai iko tiko,” e tusanaka na TURAGA (Yahweh).
Jeremaia 1:13-19







Also Read If Possible (Wilika Talega Ke Rawa)
Deuteronomy 28: Joshua 1: Ezekiel 1; 24; 33:1-20;
1 John 5:3-4

Na Veikacivi Nei Jeremaia (Jeremiah’s Calling).

Serving For The 17th September, 2008

Na vosa nei Jeremaia na luve i Hilikaia, e dua vei ira na bete era tiko mai Anacoci ena vanua vaka Penijamini. 02 A yaco mai vua na vosa ni TURAGA (Yahweh) e na ikatinikatolu ni yabaki ni nona veiliutaki vakatui o Josaia na luve i Emoni na Tui Jiuta. 03 A yaco talega e na gauna ni veiliutaki vakatui nei Jioakimi na luve i Josaia na Tui Jiuta, me yacova na ikalima ni vula e na ikatinikadua ni yabaki nei Setekaia na luve i Josaia na tui Jiuta, oya na siga era a kau kina na kai Jerusalemi me ra sa vakabobulataki. 04 Na vosa ni TURAGA (Yahweh) a yaco mai vei au e kaya, 05 “Niu sebera ni buli iko e na bolanigone, au a sa kilai iko; ia ni o sebera ni sucu, Au a sa vakatabui iko, Au a lesi i iko mo parofita ki na veimatanitu. 06 Au a kaya “Isa, noqu TURAGA (Sovereign) na Kalou (Yahweh)!” au kaya, “Au sega ni kila na vosa: au se gone lailai wale.” 07 Ia qai kaya vei au na TURAGA (Yahweh), “Mo kakua ni kaya, ‘Au se gone lailai wale.’ Mo na lako vei ira kece Au talai iko vei ira, mo qai lai kaya na veika kece Au vakarota vei iko mo lai kaya. 08 Mo kakua ni rerevaki ira: baleta au na tiko vata kei iko, kau na dau vueti iko,” e vakatusa na TURAGA (Yahweh). 09 Sa qai dodoka mai na ligana na TURAGA (Yahweh), tara na gusuqu qai kaya vei au, “Qo au sa biuta na noqu vosa e gusumu. 10 Raica nikua au sa lesi iko i na veivanua kei na veimatanitu, mo na cavuraka cake, basuraka sobu, vakarusa, talaraka, tara cake, oti mo qai tea.”
Jeremaia 1:1-10







Also Read If Possible (Wilika Talega Ke Rawa)
Psalms 136; Isaiah 6; Luke 1:13-16; 1 Timothy 4:12

Sefanaia: Vakadodonutaki O Jerusalemi (Zephaniah: Straighten Jerusalem)

Serving For the 16th September, 2008

E na leqa levu dina o koya, e dau talatalai dredre ka dukadukali! Vua na korolevu dau ivalavala kaukaua 02 E sega ni rogoca na Domona o koya, ka sega ni via ciqoma na veivakadodonutaki. E sega ni via vakararavi vua na TURAGA (Yahweh), ka sega ni toro volekata na nona Kalou (Elohim). 03 O ira na nona ravouvou e na kena maliwa na laione daukudru, era nona daunivakatulewa na wolifa ni yakavi; era sega ni bau vakavotaka mada ga e dua na sui me yacova na mataka. 04 O ira na nona parofita era viavialevu, era tamata dauveivakaisini. O ira na nona bete era vakadukadukalitaka ga na tikina tabu, era qai dau vakatanitaka na dina ni lawa. 05 Na TURAGA (Yahweh) e yalododonu, e tiko o koya e na kedra maliwa; E na sega ni vakayacora o Koya e dua na ka e sega ni dodonu. Mai na mataka ki na mataka e vakaraitaka tikoga na lewadodonu, e na veisiga vou kece e na sega ni cala ia era sega ga ni bau madua o ira era sega ni yalododo­nu.
Sefanaia 3:1-5

Laga sere kemuni na luvei Saioni goneyalewa; kaila e na domolevu o iko Isireli! Mo reki ka marau mai na vuniyalomu o iko na luvei Jerusalemi yalewa! 15 Sa kauta tani na kemu itotogi na TURAGA (Yahweh), ka sa vakasukai ira na kemu meca. Na Tui Isireli, oya na TURAGA (Yahweh) sa tiko vata kei iko: o sa na sega vakadua ni rerevaka na ka rarawa. E na siga oya era na kaya vei Jerusalemi, “Kakua ni rere, o iko Saioni; kakua ni vakatara na ligamu me vakasavuliga. Na TURAGA (Yahweh) na nomu Kalou (Elohim) e tiko vata kei iko, o Koya e kaukaua e na veivakabulai. E na rekitaki iko dina o Koya, e na vakacegui iko e na Nona loloma, e na marautaki iko o Koya e na lagalaga sere.”
Sefanaia 3:14-17



Also Read If Possible (Wilika Talega Ke Rawa)
Psalms 25; 34:1-5; Isaiah 40; Romans 10:9-11

NEUMI: Samuti Asiria na Kalou. (Nahum: Yahweh Punishes Assyria)

Serving for the 15th September, 2008

Na TURAGA (El) e dau vuvu, ka Kalou (Yahweh) e dau veisausaumi; na Kalou (Yahweh) e na veisausaumi, ka sinai vua na yalo ni veitotogitaki. Na TURAGA (Yahweh) e na veisausaumi vei ira era saqati Koya ka na binia vata tiko na kedra itotogi na kena meca. 03 Na TURAGA (Yahweh) e dau dede na nona vakacudrui, ka vakaitamera na nona kaukaua, ia e na sega ga ni vakalaiva na kedra itotogi o ira dau cakaca. Na Nona sala ena kune ena covulaca kei na cagilaba, kei na o, era kuvunisoso mai yavana.
Neumi 1:2-3

O cei e veisaqasaqa rawa kei na Nona cudru? O cei ena vosota rawa na waromisa ni nona leva? Na nona cudru e dau sovaraki yani me vaka na bukawaqa, era kakavuruvuru na vatu lelevu e matana. 07 Na TURAGA (Yahweh) e yalovinaka, na ivunivuni e na gauna ni leqaleqa. E dau kauwaitaki ira era vakararavi yani Vua, 08 ia e na dua na dobui vakaivalavala e na qai vakarusai kina; e na cemuri ira tiko na kena meca i na butobuto. 09 Na vere cava ga era na bukia me baleta na TURAGA (Yahweh) e na tasereka laivi o Koya me tinia, na leqa e na sega ni basika tale mai vakarua.
Neumi 1: 6-9

O iko Tui Asiria, era sa moce lutu tu na nomu ivakatawa, o ira na nomu turaga bale era sa dadavo me ra vakacegu. O ira na nomu tamata era sa duitutu e na ulunivanua, qai sega ni dua me vakasoqoni ira. 19 E sega ni dua na ka e na vakamaca rawa na nomu mavoa; na nomu mavoa e rawa ni yaco kina na mate. O ira kece era rogoca na kemu itukutuku era vakasausau baleta o sa qai lutu, baleta o cei tale me a sega ni vakila na nomu ivalavala kaukaua sega ni vakaiyalayala?
Neumi 3:18-19

Also Read If Possible (Wilika Talega Ke Rawa)
Exodus 34:1-7; Jonah; John 3:31-36; Romans 1:18-19;

Ephesians 5:5-6

Vueti Jiutia mai Asiria na TURAGA (Yahweh saves Judah from Assyria).

Serving for the 14th September, 2008

Ia e na ikatinikava ni yabaki ni nona veiliutaki o Tui Esekaia, a qai lako cake mai kina o Senakaripa na tui Asiria, qai mai valuta na veikoro vakabaivatu kecekece e Jiutia, qai rawai ira.
2 Tui 18:13

A qai masu o Esekaia vua na TURAGA (Yahweh): “Kemuni na TURAGA (Yahweh), na Kalou (Elohim) i Isireli, o Kemuni oni dabe tiko vakatui e na kedrau tadrua na Kerupimi, o kemuni duadua ga oni Kalou (Elohim) ni veimatanitu kecekece e vuravura. O kemuni oni a bulia na lomalagi kei na vuravura. 16 Vakatudaliga mai TURAGA (Yahweh) moni rogoca; dolava na matamuni TURAGA (Yahweh) moni raica; ni rogoca mada na vosa e vakauta mai o Senakaripa, me vosavakacacataka kina na Kalou (Elohim) bula. 17 “E dina, Kemuni na TURAGA (Yahweh), ni sa vakarusa na lewe ni veivanua kei na nodra vanua na Tui Asiria. 18 Era sa kolo i na bukawaqa na nodra kalou (elohim) ka vakarusai ira; baleta era sega ga ni kalou (elohim), ka ni ra kau ga kei na vatu, era bulia na liga ni tamata. 19 Ia e na gauna oqo, kemuni na TURAGA (Yahweh) na neimami Kalou (Elohim), ni vakabulai keimami mai na ligana, me kila kina na veimatanitu kecekece e vuravura ni o kemuni duadua ga, TURAGA (Yahweh) oni Kalou (Elohim).” 20 Oti, sa qai vakauta e dua na itukutuku o Aisea na luvei Emosi vei Esekaia: “Oqo na ka e kaya na TURAGA (Yahweh) na nodra Kalou (Elohim) na Isireli: Au sa rogoca na nomu masu maivei au me baleti Senakaripa na tui Asiria.”
2 Tui 19:15-20


A qai yaco e na bogi oya, era a lako yani kina na agilosi ni TURAGA (Yahweh), era qai vakamatea kina e duanadrau walusagavulu na udolu na tagane e na loma ni nodra keba na kai Asiria. Ia ni ra qai yadra na tamata e na mataka kadua – era sa raica ga na yago ni mate! 36 Sa mani uru tale na keba nei Sena­karipa na tui Asiria me ra sa vakasuka. E a lesu tale i Ninive o koya, ka lai tiko yani vakadua mai keya.
2 Tui 19:35-36




Also Read If Possible (Wilika Talega Ke Rawa)
2 Kings 19-20; 2 Chronicles 32: Isaiah 36-39; Acts 12.

Na Tui Vinaka o Esekaia (Hezekiah The Good King).

Serving For The 13th September, 2008

A qai yaco e na ikatolu ni yabaki nei Osea na luve i Ela na tui Isireli, a qai tekivu me veiliutaki vakatui o Esekaia na luve i Easi na tui Jiuta. 02 A sa yabaki ruasagavulukalima tiko o koya e na gauna sa buli kina me tui, ka veiliutaki tiko vakatui mai Jerusalemi me ruasagavulukaciwa na yabaki. Na yaca i tinana o Apaia, na luve i Sakaraia. 03 A dau cakava o koya na veika e dodo­nu e na mata ni TURAGA (Yahweh), me vaka ga a dau vakayacora o Tevita na tamana. 04 E a vaqeavutaka laivi na veitikina cecere o koya, vorovorolaka na veivatu tabu, ka tatalaka sobu na duru ni kalouyalewa o Asera. E a vuruvurulaka na gata parasa a bulia o Mosese: baleta e na gauna oya era sa dau vakama isoro boi tiko kina vua o ira. (E a vakatokai tiko e na yaca Nihusitani.) 05 O Esekaia e a dau vakararavi ga vua na TURAGA (Yahweh) na nodra Kalou (Elohim) na Isireli. E a sega sara ga ni dua me tautauvata kei koya e na kedra maliwa kece sara na Tui mai Jiutia, oya me bau kina o ira era a liu vua vata kei ira era a qai muri vua. 06 E a kabita matua tiko na TURAGA (Yahweh) o koya, ka sega vakadua ni tinia na nona muri i Koya voli; ka dau talairawarawa i na ivakaro a solia na TURAGA (Yahweh) vei Mosese. 07 Ia na TURAGA a dau tiko vata voli ga kei koya; qai dau rawata vinaka kina na veika kece e dau cakava. E a vakanadakuya na Tui Asiria o koya, ka sega ni qaravi koya. 08 Mai na nodra qarava na dauyadra ki na nodra koro vakabaivatu lelevu, e a kabai ira na kai Filisitia o koya, me yaco sara i Qasa kei na kena veiyasana. 09 A qai yaco e na ikava ni yabaki nei Ese­kaia na tui, oya na ikavitu ni yabaki nei Osea na tui Isireli, na luve i Ela, e a lako cake mai kina o Salamanisa na Tui Asiria, me mai buku na druadrua ni koro o Samaria. 10 Ni qai cava na ikatolu ni yabaki, era sa rawata na kai Asiria. A qai mani rawai o Samaria e na ikaono ni yabaki ni veiliutaki vakatui nei Esekaia, oya me ikaciwa tiko ni yabaki ni veiliutaki nei Osea na Tui Isireli.
2 Tui 18:1-10







Also Read If Possible (Wilika Talega Ke Rawa)
Numbers 21:1-9, Deuteronomy 28:1-14; 2 Chronicles 29-31;

Proverbs 25:1, Matthew 1:1-10

Kau Vakavesu o Isireli (Israel Taken into Bondage).

Serving for the 12th September, 2008.

E na ikaciwa ni yabaki nei Osea, e a rawai Samaria kina na Tui Asiria, qai kauti ira laivi na kai Isireli i Asiria. A lai vakatikori ira mai Halaa vata kei Hapoo e na bati ni Uciwai o Qosani, ka vaka kina e na nodra veikoro na kai Mitia. 07 Na veika kece oqo a yaco baleta na nodra ivalavala ca o ira na Isireli vua na TURAGA (Yahweh) na nodra Kalou (Elohim), o koya e a kauti ira laivi mai Ijipita, mai na kaukaua nei Fero na Tui Ijipita, ni ra a sa tekivu rerevaki ira tiko na vei kalou (elohim) tani. 08 Era a vakatotomuria tiko na nodra ivalavala na kai veimatanitu tani, o ira e a cemuri ira tani mai matadra na TURAGA (Yahweh), vata kei ira na Tui Isireli, era a bulia 09 Era a kitaka vuni tiko o ira na Isireli, na veika e sega ni dodonu vua na TURAGA (Yahweh) na nodra Kalou (Elohim), ni ra a tara e na vukudra na veivanua cecere e na nodra vei korolelevu, mai na valecere ni ivakatawa i na baivatu ni nodra koro. 10 Era a vakaduria na nodra veivatu tabu kei na duru ni sokalou, e na veidelana kece kei na ruku ni veikau drokadroka. 11 E keya era a qai vakama isoro boivinaka tiko kina me vaka era dau cakava o ira na kai veimatanitu, a se qai cemuri ira oti ga mai matadra na TURAGA (Yahweh). Era a cakava tiko na veika ca, era qai vakacudruya kina na TURAGA (Yahweh) me curumi koya na leva. 12 Era a qaravi matakau tiko, e dina ga ni a se qai tukuna ga vei ira na TURAGA (Yahweh), “Ni kakua ni cakava na ka oqo.” 13 Na TURAGA (Yahweh) a sa vakaroti Isireli kei Jiuta matua, ni ra a mai gusuna vei ira, o ira na nona parofita vata kei ira na dauraivotu kece ni a kaya: “Ni saumaki laivi mai na nomuni ivalavala ca. Vakamuria na noqu ivunau, vata kei na noqu ilesilesi, me vaka au a vakarota vei ira na tamamuni me ra muria, niu a vakasavuya yani vei kemuni, era qai lai gusuqu yani kina vei kemuni o ira na noqu italai na Parofita.” 14 Ia era sega ga ni via vakatudaliga, era qai vakadomoqataki ira vakataki ira, me vakataka na nodra domoqa o ira na tamadra, ni ra a sega ga ni vakabauta na TURAGA (Yahweh) na nodra Kalou (Elohim).
2 Tui 17:6-14




Also Read If Possible (Wilika Talega Ke Rawa)
Deuteronomy 28:14-68; 2 Kings 15:16-20; Acts 7:51-53

Maika: Na iValavala Ca Nei Isireli. (Micah: The Sins of Israel)

Serving for the 11th September, 2008

Na vosa ni TURAGA (Yahweh) a yaco vei Maika na kai Moaseci e na gauna ni veiliutaki nei Jocame kei Easi, vata kei Esekaia, o ratou na tui Jiutia – na veika a raica o koya baleti Samaria vata kei Jerusa­lemi. 02 Ni rogoca, o kemuni kecekece na tamata, ni vakadirorogo; o iko vuravura kei kemuni kece oni vakaitikotiko kina, laiva na Daulewa (Sovereign) na TURAGA (Yahweh) me vakadinadinataka na nomuni cakaca, na Turaga (Yahweh) mai na nona vale tabu. 03 Raica! Na TURAGA (Yahweh) sa lako tiko mai na nona itikotiko; e na lako sobu mai o koya, me mai butuka na veiyasana cecere kei vuravura. 04 E na waicala e rukuna na veiulunivanua, ka kasei rua na veibucabuca, me vaka na drega ni ivola (wax) e na bukawaqa, ka vaka na wai e drodro sobu mai na veidelana. 05 Qo e baleta ga na talatalai­dredre nei Jekope, baleta talega na ivalavala ca ni vale nei Isireli. Na cava beka na talatalaidredre nei Jekope? e sega beka ni o Samaria? Na cava beka na yasana cecere nei Jiuta? E sega beka ni o Jerusalemi? 06 “Qori au sa na cakava kina me dua na ibinibini qele o Samaria me vaka e dua na vanua ni tei vaini Au na sovaraka na kena veivatu i na veibucabuca, meu vakavotuya na kena yavu. 07 Na kena veimatakau era na vurulaki me matailalai, na isolisoli kece ni valenisoro era na vakamai e na bukawaqa, au na vakarusa na kena veimatakau kece. Baleta a kumuna na nona isolisoli mai na kedra isau na saqamua, era na lesuva tale na kedra isau na saqamua.”

Maika 1:1-7

Also Read If Possible (Wilika Talega Ke Rawa)
Deuteronomy 5:6-10; Judges 10:11-16; Psalms 68:1-3; 97;

Jeremiah 26; Act 1:1-8.

E Raica na TURAGA O Aisea (Isaiah Saw Yahweh)

Serving for the 10th September, 2008

E na yabaki a mate kina o Tui Usaia, au a raica kina na TURAGA (Yahweh) ni dabe toka e na nona idabedabe vakatui, cecere ka vakaitamera, ka robota vakadua tu na valenisoro taucoko na nona isulu tiyara. 02 Era toka e cake maivua o ira na serafimi, era tauyaono na tabadra ni vuka­: E rua na tabadra ni vuka era tabonaka kina na matadra, e rua era tabonaka kina na yavadra, ka rua era vuka tiko kina. 03 Era qai kacivaka tiko vakataki ira, “E savasava (holy), e savasava, e savasava, na TURAGA Cecere (Yahweh of Hosts); o vura­vura taucoko sa vakasinaiti tu e na nona lagilagi.” 04 E na rorogo ni domodra, na duru ni katuba kei na kena ilago era yavavala, kei na valenisoro e vakasinaiti e na kubou. 05 “Sa na noqu na leqa!” au tagilagalaga, “Au sa na rusa! Baleta au tamata tebenigusu qeleqelewa, kau bula tiko e na kedra maliwa na tamata tebenigusu qeleqelewa, ia na mataqu sa raica oti na Tui, na TURAGA Cecere (Yahweh of Hosts).” 06 Oti sa qai vuka mai vei au e dua vei ira na Serafimi ka tiko mai ligana na qilaiso e se waqawaqa tu, e a tomika mai na icabocabo ni isoro, e na kena iqaso. 07 Qo a mai vakatara e tebenigusuqu qai kaya, “Raica, na ka oqo sa tara na tebenigusumu; sa kau laivi kina na nomu cakacala kece ka sa boko na nomu ivalavala ca.” 08 Oti au qai rogoca na domo ni TURAGA (Yahweh) ni kaya, “O cei beka meu tala? O cei beka e na via talai e na vuku i keitou?” Au mani kaya, “O au qo. Talai au!” 09 E kaya sara o koya, “Lako, lai tukuna vei ira na tamata qo; “Oni dau vakarorogo dina tiko, ia oni sega ni vakasamataka rawa; “Oni dau vakaraica tiko, ia oni sega ga ni kilakasamataka rawa;” 10 Cakava na vuniyalodra na tamata qo me kaukaua, cakava na daligadra me didivara ka sogota na matadra. De lakolako era qai rai e matadra, vakarorogo e daligadra ka kila e vuniyalodra, era qai saumaki me ra vakabulai.”
Aisea 6:1-10






Also Read If Possible (Wilika Talega Ke Rawa)
Exodus 3: 1-6; 33:15-23; Job 19:25-27; Matthew 5:8; 13:10-17;

John12:37-41; Revelation 4.

Osea: Lomani Isireli ga na Kalou (Hosea: Yahweh Continues To Love Israel)

Serving For the 9th September, 2008

“Ni se lailai o Isireli, au a daulomani koya, au a qai kaciva tani kina na luvequ tagane mai Ijipita. 02 Ia na ilevu ga ni noqu kacivi ira, na kena yawa na nodra toso laivi mai vei au. Era vakacabo isoro vei Peali, ka vakama isoro boi kamica vei ira na matakau ceuceu. 03 O au sara ga, au a vakavulici ira na Ifereimi me ra lako, ka tuberi ira e ligadra; ia era sega ga ni kilakasamataka ni o au, au a vakabu­lai ira. 04 Au a liutaki ira e na dali ni yalololoma vakatamata, kei na ivau ni loloma; Au a laveta laivi na icolacola mai na usouso ni domodra Au qai cuva sobu meu vakani ira. 05 “Era na sega ni lesu tale i Ijipita ia o ira na kai Asiria era na mai nona tui baleta ni ra sega ni via veivutuni?
Osea 11: 1-5

“E na rawa vakacava vei au meu soli i iko laivi Ifereimi? E na rawa vakacava meu soli iko laivi Isireli? E na rawa vakacava meu cakava vei iko na ka a caka vei Atima? E na rawa vakacava meu vakaduri i iko me vakataki Sepoimi? Na vuniyaloqu sa veisau e lomaqu, sa vakayavalati na noqu yalololoma. 09 Au na sega ga ni vakayacora na noqu cudru katakata, au na sega ni vuki lesu mai meu vakarusai Iferei­mi. Baleta o au na Kalou (El), au sega ni tamata, na Yalosavasava e duabau e na kemuni maliwa. Au na sega ni lako meu lai curuma na korolevu. 10 Era na muria na TURAGA (Yahweh); e na kudru vaka na laione o koya. Ni sa kudru o koya, o ira na luvena era na sautaninini mai na Vuaira. 11 Era na lako sautaninini me vaka na manumanu vuka mai Ijipita ka vaka na ruve mai Asiria. Au na qai vakataudeitaki ira e na nodra veivale,” e kaya na TURAGA (Yahweh).
Osea 11:8-11


Also Read If Possible (Wilika Talega Ke Rawa)
Genesis 19:1-29; Deuteronomy 29:18-23; Zachariah 10:6-12; 2 Peter 3:8-15.

Emosi: Na Dauveilewai kei na iNuinui. (Amos: Judge and Hope)

Serving for the 8th September, 2008

“Raica, na mata ni TURAGA (Yahweh) Cecere (Sovereign) e wanonova tiko na vei matanitu era dau caka ca, Au na vakarusai ira mai na dela i vuravura; vakavo niu na sega ni vakarusa vakadua na vale nei Jekope,” e vakatusa na TURAGA (Yahweh).
Emosi 9:8

“O ira kece era valavala ca e na kedra maliwa na noqu tamata era na mate e na iseleiwau, oya o ira kece era kaya, ‘Na vunica e na sega ni rawai keda se sotavi keda.’ 11 “E na siga oya au na vakaduria tale na vale i Tevita era a bale, Kau na vakavinakataka na vanua kece era sa kabasu, au na vakaduria, na tikina era a rusa ka tara cake me tautauvata tale na kena ituvaki eliu, 12 me rawa ni ra taukena na vovo kei Itomi, kei na veimatanitu kecega, e cavuti kina na yacaqu,” e kaya na TURAGA (Yahweh), o koya e cakava na veika oqo. 13 “Raica na siga sa tadu mai” e kaya na TURAGA (Yahweh) “e na toso sivita kina na daucukicuki o koya e dautatamusuki kei koya e dauteitei, o koya e dau qaqia na vuanivaini. Na waini kamica e na titiri mai na veiulunivanua Ka waicala na veidelana taucoko. 14 Au na kauti ira lesu mai na noqu tamata cemuri na Isireli; era na tara vou na veikoro era sa ca tu, era qai mai bula tiko kina. Era na tea na vei loga ni­ vaini, era qai gunu mai na kena waini; era na teitei, era qai kania talega na vuana. 15 Au na vakadeitaki ira e na nodra vanua, me ra kua tale vakadua ni talaraki mai kina; mai na vanua au a solia vei ira,” e kaya na TURAGA (Yahweh) na nomuni Kalou (Elohim).
Emosi 9:10-15

Also Read If Possible (Wilika Talega Ke Rawa)
2 Samuel 7; Isaiah 55; Acts 15:1-21; Romans 9-11

Kaci O Joeli Me Veivutuni O Isireli. (Joel Calls Israel To Repentance)

Serving for the 7th September, 2008

“E na gauna mada ga oqo,” e tusanaka na TURAGA (Yahweh) “lesu mai vei au e na vuniyalomu­ni taucoko, e na lolo, e na tagitagi kei na vakaloloku.” 13 Dresulaka na yalomuni, sega ni nomuni isulu. Lesu vua na TURAGA (Yahweh) na nomuni Kalou (Elohim), baleta o koya e dau ya­lovinaka ka dau yalololoma, e berabera na nona vakacudrui, ka vuabale e na loloma, e rawa vua me tarova na nona vakauta na leqa e tala. 14 O cei e kila? E na rawa ni vuki o koya qai tuburi koya na yalololoma oti qai biuta tu mai e dua na veivakalougatataki, na imadrali laukana kei na imadrali gunuvi vua na TURAGA (Yahweh) na nomuni Kalou (Elohim). 15 Uvuca na davui e Saioni, vakatura e dua na lolo tabu, kaciva e dua na soqoni tabu, 16 vakasoqoni ira na tamata, vaka­savasavataka na isoqosoqo, vakasoqo­ni ira na qase, vakasoqoni ira na gone, o ira era se kana tiko mai na matanisucu i tinadra. Laiva na taganevou me biuta na nona loqi kei na yalewavou na nona idavodavo. 17 Laivi ira na bete, era dau veiqaravi e na mata ni TURAGA (Yahweh), me ra mai tagi e na maliwa ni katuba ni valenisoro vata kei na icabocabo ni soro. Laiva me ra kaya, “Lomani ira na nomuni Tamata, TURAGA (Yahweh) kakua ni cakava na nomuni ivotavota me vakarogorogocataki, me vosacataki e na kedra maliwa na veimatanitu. Na cava mera vakatataro kina ena kedra maliwa na tamata, Evei beka na nodra Kalou (Elohim)? 18 Qori e na qai yalovuvu kina na TURAGA (Yahweh) e na vuku ni nona qele, qai tubu na nona lomani ira na nona tamata.
Joeli 2:12-18



Also Read If Possible (Wilika Talega Ke Rawa)
Exodus 34:1-7; Deoteronomy10:16; Jonah 3; James 4:6-8

Tarova na Leqa na TURAGA. (Yahweh Averted his Anger)

Serving for the 6th September, 2008

A qai yaco mai na vosa ni TURAGA (Yahweh) vei Jona e na ikarua ni gauna ni kaya; 02 “Tu mo lako i na korolevu o Ninive, lai vakasavuya vei ira na itukutuku au a solia vei iko.” 03 E a muria na vosa ni TURAGA (Yahweh) o Jona, qai lako i Ninive. Na koro o Ninive e koro levu – ka ni siga tolu vakadua na kena dede kevaka meda takosova. 04 E na imatai ni siga, e a curuma kina na korolevu e a tusanaka o koya: “Sa vo ga e vasagavulu na siga me vakarusai o Ninive.” 05 Era mani vakabauta na Kalou (Elohim) o ira na kai Ninive. Era qai kacivaka me vakayacori e dua na lolo, era qai vakaisulutaga kece, oya mai vua e cecere duadua kauta sobu vua e lolovira duadua. 06 Ni sa rogo na itukutuku vua na Tui Ninive, e a duri cake o koya mai na nona i dabedabe vakatui, luvata na nona isulu vakatui, qai ubi i koya e na isulutaga, qai lai dabe e na dela ni dravusa. Oti qai kacivaka e dua na ivakaro e Ninive raraba; 07 “E na veivakaroti ni Tui vata kei ira na nona Turaga bale: Laiva me kakua ni dua na tamata se na manumanu, na bulumakau se na sipi, me kania e dua na ka; kakua ni vakatarai ira me ra kana se gunu. Ia laiva ga na tamata kei na manumanu me ra ubi e na isulutaga. 08 Laiva na tamata kecekece me ra kaci vakabibi vua na Kalou (Elohim). Laivi ira me ra dui tarova na nodra dui itovo ca, kei na nodra ivalavala kaukaua.09 O cei e kila? De dua e na qai vakamalumu na Kalou (Elohim), qai vuki tani, e na yalololoma, mai na nona leva cecekia, meda sa kua ni vakarusai.” 10 Ni sa raica na Kalou, na veika era sa cakava vata kei na nodra sa vuki laivi mai na nodra itovo ca, sa yaco vua na yalololoma, sa mani sega ni vakarusai ira me vaka a vakatusa vei ira o koya.
Jona 3:1-10






Also Read If Possible (Wilika Talega Ke Rawa)
Exodus 32:1-14; Jeremiah 18:1-11; Joel 2:12-14; Luke 11:29-32

Masumasu Mai Na Kete Ni Ika O Jona. (Praying from the Belly of the Fish)

Serving For The 5th September, 2008

Sa qai masu o Jona vua na TURAGA (Yahweh) na nona Kalou (Elohim) mai na kete ni ika, 02 E a kaya: “E na vukuni noqu leqa, au kaci kina vua na TURAGA (Yahweh), e qai rogoci au mai o Koya; mai na buto ni ibulubulu, au kaciva na veivuke, oni qai vakatudaliga i na noqu tagi. 03 Oni kolotaki au i na loma ni wasaliwa, i na uto sara ga ni wasawasa qai kui vakavolivoliti au na ua; na biau kei na vusoniau era kuitaki au. 04 Au qai kaya, ‘Au sa cemuri vakadua mai na matamuni; ia au na rai tale vaka i na nomuni vale tabu.’ 05 Na wai seuseua sa tu vakavolivoliti au, bau kina na noqu bula, sa kui wavoliti au na wai titobu, na lumi era sa viviraka na uluqu. 06 Ki na buto ni ulunivanua au sa dromu sobu; na qele e rukuqu sa vakalati au me sega ni mudu: Ia oni qai vueta na noqu bula mai na rusa, O kemuni TURAGA (Yahweh) na noqu Kalou (Elohim). 07 “Ni sa takali tiko yani na noqu bula e lomaqu, au qai nanumi kemuni, TURAGA (Yahweh); qai talave yani vei kemuni na noqu masu, i loma ni nomuni vale tabu. 08 O ira era qarava matua na matakau tawayaga, sa na sega ni soli vei ira na loloma, e rawa ni nodra 09 Ia o au, vata kei na sere ni vakavinavinaka, au na cabora na imadrali vei kemuni. Na ka au sa bubuluitaka, au na vakayacora dina,na veivakabulai e lako ga mai vua na TURAGA (Yahweh).” 10 Ia na TURAGA (Yahweh) a qai vosa vua na ika, me luaraki Jona i na vanua mamaca.
Jona 2:1-10

Also Read If Possible (Wilika Talega Ke Rawa)
2 Kings 17:13-15; Psalms 42; 69; Isaiah 44:9-20;
Acts 27.

Talaidredre Vua Na TURAGA O Jona (Jonah Disobeys Yahweh).

Serving for the 4th September, 2008

A qai yaco mai na vosa ni TURAGA (Yahweh) vei Jona na luve i Emitai: 02 “Tu, lako i na korolevu o Ninive, lai vunauci ira baleta na nodra ivalavala ca sa lamata cake mai vei au.” 03 Ia o Jona a qai dro i Tasisi me drotaka na TURAGA (Yahweh). E a lako taumada i Jopa qai lai kunea e keya e dua na waqa ni soko tiko i Tasisi. Ni sa sauma oti na nona ivodovodo, a vodo sara me soko yawa i Tasisi me drovaka kina na TURAGA (Yahweh). 04 Ia na TURAGA (Yahweh) a qai tala mai e dua na cagi kaukaua i wasawasa, qai tubu e dua na cagilaba waromisa ka voleka ni kavoro kina na waqa. 05 Era a domobula na kaiwaqa, era qai dui tagica yadudua na nodra dui kalou.
Jona 1:1-5a

Era mani veitalanoa vakataki ira na kaiwaqa, “Mai meda mai vakawirimadigitaka mada me rawa ni kilai se o cei e vakavuna tiko na leqa sa yacovi keda tiko qo. Era vakawirimadigi sara qai mani lutu vei Jona na madigi.
Jona 1:7

Era tarogi koya sara, “Na cava beka me keimami cakava vei iko, me rawa ni maravu tale kina vei keda na wasawasa? 12 Sauma o koya vei ira, “Ni keveti au cake, ni qai kolotaki au i loma ni wasaliwa, e na qai maravu tale. Au kila ni bale vei au na kena labati kemuni tiko na cagi qo.”
Jona 1:11-12

Era mani keveti Jona, era qai kolotaki koya mai waqa, ka mai maravu tu yani na wasawasa seuseua. 16 Ekeri sa qai curumi ira na tamata na nodra rerevaka na TURAGA (Yahweh), era mani vakacabora na nodra isoro vua na TURAGA (Yahweh) ka ra vosa bubului Vua. 17 Ia na TURAGA (Yahweh) e a vakarautaka e dua na ika vakaitamera, me na tilomi Jona qaqa, sa qai tiko voli e na kete ni ika o Jona, me siga tolu, bogi tolu.
Jona 1:15-17


Also Read If Possible (Wilika Talega Ke Rawa)
2 Kings 14:25; Matthew 12:38-41; 16:1-4;
Luke 11:29-32

Vakadrukai Peali na TURAGA (Yahweh defeats Baal).

Serving for the 3rd September, 2008.

E kaya sara o Ilaiya vei ira na paro­fita nei Peali, “Ni digitaka e dua na nomuni bulumakau, ni qai vakarautaka sara baleta oni lewe levu. Moni qai kaciva na yaca ni nomuni kalou (elohim), ia moni kakua ga ni waqaca na buka e rukuna. 26 Era sa kauta sara na bulumakau a soli vei ira, era qai vakaraitaka. Oti era sa qai kaciva na yaca i Peali mai na mataka me yacova na sigalevu tutu. “I Peali, rogoci keimami mai”. Ia a sega ni dua mai na kena isau; ka sega ni dua e sauma mai. Era sa qai vakarikava na i icabocabo ni isoro era a tara.
I Tui 18:25-26

Ni sa sivi na sigalevu, era se ia ga na parofi­sai vagumatua me lai yacova sara na gauna ni vaka­cabo isoro e na yakavi. E a sega tiko ga ni dua mai na kena isau, a sega ni dua a sauma mai, ka sega ni dua me galele mai.
I Tui 18: 29


A qai yaco e na gauna ni vakacabo isoro e na yakavi, sa qai toro mai i liu o Ilaiya na parofita, qai masu, “Kemuni na TURAGA (Yahweh), na Kalou (Elohim) nei Eparayama, Aisake kei Isireli, laiva me kilai mada edaidai ni o kemuni oni Kalou (Elohim) e Isireli, ia o au, au nomuni italai, kau cakava tiko na veika kece oqo baleta oni vakaroti au meu cakava. 37 Rogoci au mai, TURAGA (Yahweh), rogoci au mai; me rawa ni ra kila o ira na tamata qo ni o kemuni, TURAGA (Yahweh), oni Kalou (Elohim), ia oni sa vukica lesu tale tiko mai na yalodra.” 38 Sa qai lutu mai na bukawaqa ni TURAGA (Yahweh), qai vakama yavu na isoro, na buka, na vatu, kei na qele, ka dramica me mamaca na wai e na loma ni ikeli. 39 Ni ra sa raica na veika oqo o ira na tamata, era sa cuva sobu vakatoboicu era qai kaya, “Na TURAGA (Yahweh) – o koya e Kalou (Elohim)! Na TURAGA (Yahweh) – o koya e Kalou (Elohim)!” 40 Sa qai vakaroti ira o Ilaiya, “Vesuki ira kece na parofita nei Peali. Kakua ni biuta me dro bula e dua vei ira. Era qai vesuki ira, qai kauti ira sobu i na Buca o Kisoni o Ilaiya, qai lai vakamatei ira e keya.
I Tui 18:36-40

Also Read If Possible (Wilika Talega Ke Rawa)
Deuteronomy 13; 17:2-5; 18:18-22; 1 Kings 21-22; 2 Kings 9:30-10:28;

Philipians 2:5-11.

Bolei ira na Parofita nei Peali o Ilaiya (Eliyah Challenged the Prophet of Baal).

Serving for the 2nd of September, 2008

A qai yaco, ni oti e vica vata na siga, ni a yaco mai na vosa ni TURAGA (Yahweh) vei Ilaiya e na ikatolu ni yabaki ni kaya, “Lako, lai rairai mada vei Eapi, au na qai vakatauca tale na uca e na vanua.
I Tui 18:1

Ni sa raici Ilaiya o Eapi, e kaya sara o koya, “O iko dina beka qori, o koya e dau vakatubu leqa vei lsireli?” 18 E sauma o koya, “Au sebera ni b au vakatubu leqa vakadua e Isireli, ia o iko ga kei ira na matavuvale nei tamamu; baleta oni sa vakanadakuya na ivakaro ni TURAGA (Yahweh), moni muri i Peali. 19 Kacivi ira vata na tamata kece mai Isireli, me ra soqoni yani me ra lai sotavi au e na Ulunivanua o Kamela. Mo kauti ira talega yani na parofita nei Peali, le vanadrau limasagavulu, kei ira na parofita ni kalouyale­wa o Asera, le vanadrau, o ira era sa dau kana tiko e na teveli nei Jesipeli. 20 A mani vakau itukutuku i Isireli raraba o Eapi, ka vakasoqoni ira vata na parofita i na Ulunivanua o Kamela. 21 E a duri o Ilaiya, e matadra na tamata qai kaya, “E na vakaevei beka na dede ni nomuni lomalomarua tiko e nomuni vakasama? Kevaka e Kalou (Elohim) na TURAGA (Yahweh), ia muri i Koya: ia kevaka o Peali, ia muri i koya’. Era sega ni bau kaya e dua na vosa o ira na tamata. 22 E kaya tale o Ilaiya vei ira, “O au duadua ga au sa vo tiko vei ira na parofita ni TURAGA (Yahweh), ia o ira na parofita nei Peali, e vanadrau limasagavulu vakadua na kedra iwiliwili. 23 Me ra kauta sara mada mai vei keda e rua na bulumakau tagane. Laiva me ra digitaka e dua, qai laiva me ra cebecebeta vakalalai, me ra qai tuvana e na dela ni buka, ia me ra kua ni waqaca na kena buka. 24 O au talega au na vakarautaka na ikarua ni bulumakau, au qai tuvana e na dela ni buka, ia au na sega talega ni waqaca. Oti moni qai kaciva na yaca ni nomuni Kalou (elohim), ia o au talega au na kaciva na TURAGA (Yahweh). Na Kalou (Elohim) ga e sauma mai e na yameyame ni buka – laivi koya me Kalou (Elohim).” Era qai kaya kece na tamata, “E daumaka na nomu vakatutu.”
I Tui 18:17-24



Also Read If Possible (Wilika Talega Ke Rawa)
Vakarua 12:28-3; 32:36-39; Marika 8:27-29;
Luke 9:28-36; Jemesa 5:14-18 .

Vosa Vei Tui Eapi o Ilaija. (Eliyah speaks to King Ahab)

Serving for the 1st September, 2008

Ia e na ikatolusagavulukawalu ni yabaki nei Yasa na tui Jiuta, e a buli kina o Eapi na luve i Omirai me tui Isireli e a qai veiliutaki tiko vakatui mai Samaria, e Isireli raraba me ruasagavulu ka rua na yabaki. 30 O Eapi na luve i Omirai e a cacalaivi vakaoti na veika ca a dau cakava e na mata ni TURAGA (Yahweh), mai vei ira kece era a eliu mai vua. 31 E a qai yaco, me vaka beka ni ka lailai wale na ivalavala ca nei Jeropoama na luve i Nipati, ni a vakamautaki Jesipeli na luve i Ecipeali, na nodra tui na kai Saitoni, qai tekivu me qaravi Peali ka sokalou vua. 32 E a vakaduria e dua na icabocabo ni isoro vei Peali e na burekalou i Peali, e a tara mai Samaria o koya. 33 E a vakaduria talega o Eapi, ka vakayacora e levu ma ka o Eapi, me vakacudruya kina na TURAGA (Yahweh) na Kalou (Elohim) nei Isireli, ni vakatauvatani kei na veika era cakava o ira kece na tui Isireli era a bula eliu vua.
I Tui 16:29-33

O Ilaija na Tisibaiti, e dua e vakaitikotiko mai Kiliati e a vosa vei Eapi, “Me vaka ni bula dina tiko na TURAGA (Yahweh) nodra Kalou (Elohim) na kai Isireli, o koya au dau qarava, sa na sega ni lutu na tegu se tau na uca e na vica na yabaki mai oqo, vakavo ga keu kaya me yaco.” 02 Oti sa qai yaco mai vei Ilaija na vosa ni TURAGA (Yahweh) ni kaya: 03 “Biuta na vanua oqo, lako vaka i Natuicake, mo lai vuni tiko e na Buca o Keriti vaka ki na tokalau kei Joritani. 04 O na dau gunu tiko mai na waidrodro, Kau sa vakaroti ira talega na reveni me ra na vakani iko tiko e keya.” 05 Sa mani muria o koya na vosa a tukuna vua na TURAGA (Yahweh). E a lako o koya i na Buca o Keriti, e na tokalau kei Joritani qai lai tiko voli mai keya. 06 O ira na reveni era qai dau kauta vua na kena madrai kei na kena lewe ni manumanu e na veimataka kei na kena madrai kei na kena lewe ni manumanu e na veiyakavi, ia a gunu tiko ga o koya mai na waidrodro.
I Tui 17:1-6.

Niu sa sogota na lomalagi me kua ni tau na uca, niu sa vakaroti ira na vodre me ra tiloma na vanua, niu sa tala me veitauvi e dua na mate levu e na kedra maliwa na noqu tamata, 14 Ia o ira ga na noqu tamata, o ira era kacivi e na Yacaqu, kevaka era vakayalomalumutaki ira, era masumasu, era vaqara na mataqu, era qai vuki laivi mai na nodra ivalavala ca, au sa na qai rogoca ira mai lomalagi, au na qai bokoca laivi na nodra ivalavala ca, au na qai vakabula talega na nodra vanua.
II Veigauna 7:13-14.

Also Read If Possible (Wilika Talega Ke Rawa)
Deuteronomy 11:16-17; Mark 6:14-15; Luke 1:11-17; 9:7-8;

James (Jacob) 5:17-18.