Thought: The Moral Code That Will Guarantee A Good Disciplined Life
Serving For The 1st February, 2010
Oti qai vosa o Jiova (Yahweh) me tukuna na vosa kece oqo, ni kaya, 02 O au o Jiova (Yahweh) na nomuni Kalou (Elohim), o Koya e a kauti kemuni laivi mai na vanua o Ijipita, mai na vale ni veivakabobulataki. 03 Me kakua ni dua tale na nomuni Kalou (elohim) vakavo o yau duadua ga. 04 Moni kakua ni bulia moni taukena e dua na matakau ceuceu; se dua na ivakatakarakara ni ka e tu mai lomalagi e cake se tu e vuravura e ra, se tu e na wasawasa e ruku ni vuravura. 05 Moni kakua ni sokalou vei ira, se qaravi ira: baleta o au o Jiova (Yahweh) au Kalou (Elohim) gugumatua, au na sikova na nodra cakaca na tama, mai vei ira na luvedra, me yacova na ikatolu se ikava ni tabatamata vei ira era dau cati au; 06 ia au na vakaraitaka na yalololoma vei ira na udolu na itabatamata o ira era dau lomani au, ka muria na noqu ivakaro. 07 Mo kakua ni taura e dua na bubului lasu e na yaca i Jiova (Yahweh) na nomu Kalou (Elohim); baleta na Kalou (Elohim) e na sega ni wilika ni tawacala o koya e bubului lasu e na Yacana. 08 Nanuma tiko na siga ni vakacecegu, mo vakatatabutaka. 09 E ono na siga mo cakacaka kina, oya mo cakava kina na nomu cakacaka kece sara; 10 Ia na ikavitu ni siga e Nona siga ni vakacecegu o Jiova (Yahweh) na nomu Kaiou (Elohim); e na siga oqo mo kakua ni cakava kina e dua na cakacaka, o iko, se o luvemutagane se o luvemuyalewa, o ira na nomu dauniveqaravi tagane se o ira na nomu vada, se na nomu manumanu se na vulagi e tiko e loma ni nomuni bai; 11 baleta e na loma ni ono na Siga, o Jiova (Yahweh) e a bulia kina na lomalagi kei na vuravura kei na waitui, kei na ka kece sara e tu kina, oti qai vakacegu e na ikavitu ni siga; qori a qai vakalougatataka kina o Jiova (Yahweh) na siga ni vakacecegu ka vakatatabutaki.
12 ¶ Vakarokorokotaki rau o tamamu kei tinamu; me rawa ni dede kina na nomu veisiga e na vanua sa solia oqo vei iko o Jiova na nomu Kalou (Yahweh your Elohim).13 O iko mo kakua ni laba. 14 O iko mo kakua ni veidauci .15 O iko mo kakua ni butako. 16 O iko mo kakua ni beitaka lasu na wekamu vakaitikotiko. 17 O iko mo kakua ni kocova na nona vale na wekamu vakaitikotiko; mo kakua ni kocova na watinayalewa na wekamu vakaitikotiko, se na nona dauniveiqaravi tagane, se na nona vada, se na nona bulumakau, se na nona asa, se dua ga na ka e nona na wekamu vakaitikotiko.
Oqo na veiyalayalati Au na cakava vata kei ira ni oti na gauna oya, e kaya na TURAGA (Yahweh): Au na biuta na Noqu lawa e vuniyalodra, ka vola e na uto ni nodra vakasama.
