Na Gaunisala E Rua (The Two Highways)

Serving for the 31st May, 2008

“O iko mo curu e na matamata qiqo, baleta e raba levu na matamata, ka galala levu na gaunisala e naulu i na rusa, ka lewe levu era na muria na sala oqori. 14 “Ia, e qiqo na matamata, ka dredre na sala e naulu i na bula; e na le lailai wale era na kunea.
--Maciu 7:13-14

“E sega ni o ira kece era kacivi Au, ‘Turaga, Turaga,’(Sovereign, Sovereign) era na curu i na matanitu vakalomalagi, ia o koya ga e vakayacora na lewa nei Tamaqu e tiko mai lomalagi. 22 E le levu era na kaya vei Au e na siga oya, 'Turaga, Turaga, (Sovereign, Sovereign) keimami a sega beka ni parofisai e na Yacamuni, cemuri jimoni e na Yacamuni, ka vakayacora e vuqa na veika veivakurabuitaki e na Yacamuni?’ 23 Au na qai kaya vakadodonu vei ira, ‘Au sega ni kilai iko; lako laivi mai vei Au, o iko o a dau talatalaidredre! 24 Oqori e dina kina ni o koya ga e rogoca na Noqu ivakamacala, qai vakayacora, Au na vakatautauvata­taki koya kei na dua na tamata vuku e a tara na nona vale e na dela ni vatu: 25 ia ni sa tau na uca, coka na dobui qai liwa kaukaua na cagi me cacarobaroba e na vale oqori; e a sega ga ni kasura baleta e sa vakayavutaki tu e na vatu. 26 Ia, o ira kece era rogoca na Noqu ivakamacala oqo, era qai sega ni vakayacora, era tautauvata kei na tamata lialia a tara na nona vale e na nuku: 27 ni sa tau na uca, coka na dobui, qai liwa na cagi me cacarobaroba e na vale oqori; e a qai kasura. E a vakatamera dina na kena kasura.” 28 A qai yaco ni sa tinia na Nona ivakamacala oqo o Jisu (Yahshua), ni ra a kidroa na tamata e na Nona ivakavuvuli, 29 baleta ni a vakatavulici ira o Koya me vaka e dua e tiko vua na lewa, ka sega kina ni tautauvata kei ira na vunivola.
-- Maciu 7: 21-29.

Also Read If Possible (Wilika talega Ke Rawa)
Proverbs 14:11-12; Luke 13:22-30; John 10:1-10;
Ephesians 2:13:22

Vakalelewa Kei Na Kerekere (Judgmental and Supplication)

Serving for the 30th May, 2008

Kakua ni vakalelewa, mo kakua ni vakalewai. 02 Na yavu ni nomu veivakalewai, o na vakalewai tale kina, na ivakarau ga o vakarautaka, e na vakarautaki tale vei iko. 03 Na cava mo via lai raica kina na malamala e na mata i tacimu, ni o sega ni vakasamataka na tolonikau e koto no e matamu o iko vakataki iko? 04 Se rawa vaka­cava mo kaya vei tacimu, Mai meu leuta laivi na malamala mai matamu’; ia raica mada ni dua na tolonikau e se koto no e matamu? 05 Dauniveivakaisini! Taumada, mo kauta laivi na tolonikau mai matamu, o na qai rai rawa vakamatata mo leuta laivi na malamala mai na mata i tacimu. 06 Kakua ni solia na ka e vakamareqeti vei ira na koli; kakua talega ni kolo na nomu mataniciva vei ira na vuaka, de ra na buturaka e yavadra, oti era qai vuki mai me ra basuraki kemuni moni kakaseresere vakamatailalai. 07 Kerekere, e na qai soli vei kemuni; vaqaqara, o na qai kunea; tukituki, e na qai dola mai vei iko. 08 Baleta o ira kece era kerekere era na ciqoma, o koya e vaqaqara e na kunea, ia o koya e tukituki, e na vukuna e na dola. 09 Se o cei beka na tamata e tiko oqo e na kemuni maliwa, ke kere madrai vua o luvena tagane, e na solia vua na vatu? 10 Ke mani kere kena ika o koya, e qai solia vua e dua na gata? 11 Ia kevaka, o iko o vakasinaiti tu e na ca, o kila vinaka na iwalewale ni solika vivinaka vei ira na luvemuni, sa na qai vakacava beka na ilevu ni veika vivinaka e na solia o Tamada, o koya e tiko mai lomalagi, vei ira era kerekere yani Vua? 12 O koya oqori; na cava ga oni vinakata me ra cakava vei iko na tamata, mo cakava tale ga vei ira, baleta oqori na Lawa, kei na Parofita.”
-Maciu 7:1-12




Also Read If Possble (Wilika Talega Ke Rawa)
Romans 14:1-13; John 16:24; 1 Corinthians 5;

James (Yakob) 4:1-3; 1 John 3:21-22

Kua Ni Lomaleqaleqa (Do Not Be Anxious).

Serving for the 29th May, 2008

“O koya oqori, Au kaya kina vei kemuni, moni kakua ni lomaocaocataka na nomuni bula, na cava moni na kania se cava moni na gunuva; se na veika me baleta na yagomuni, se cava moni na suluma. E sega beka ni bibi cake na bula mai na kakana se na yago mai na isulu? 26 “Dikeva mada na manumanu vuka ni maliwa lala; era sega ni teitei, se tatamusuki, se kumukumuni vuata i na lololo; ia o Tamamuni vakalomalagi e vakani ira. Oni sega beka ni vakamareqeti vakalevu cake mai vei ira oqori? 27 “O cei mada vei kemuni, mai na nona lomaocaoca, e na rawa ni tubu balavu cake kina e na vasagavulukalima na sedimita? 28 “Na cava moni qai lomaocaocataka kina na nomuni isulu? Vakasama­taka na senilili e veibuca, ni ra tubu tiko - era sega ni cakacaka se talitali; 29 “ia, Au kaya vei kemuni, ni sa ukucavu mai e na nona lagilagi taucoko o Solomoni, e na sega tiko ga ni tautauvata kei na dua vei ira oqo. 30 “Ia na Kalou (Elohim), ke dau vakasuluma vakaoqo na co ni veibuca, ni ra bula tiko edai me ra na visa e na lovo nimataka; e na sega beka vakacava ni vakasulumi kemuni, o kemuni e lailai na nomuni vakabauta? 31 “O koya oya moni kakua kina ni dau lomaocaoca e na nomuni vakataroga, “Na cava beka keimami na kania?’ se ‘Na cava beka keimami na gunuva?’se ‘Na cava beka keimami na daramaka?’ 32 “Na veika oqori era dau vakasaqara talega na kai veimatanitu tani. O Tamamuni vakalomalagi sa kila tu, ni yaga vei kemuni na veika oqori. 33 “Ia moni vakasaqara mada eliu na Nona matanitu kei na Nona yalododonu; e na qai vakaikuritaki na veika kece oqori vei kemuni. 34 O koya oya moni kakua kina ni lomaocaocataka na siga nimataka; baleta na siga nimataka e na qai qarava ga na veika e basika mai kina. Sa veiraurau vinaka tu ga e dua na siga vata kei na kena veileqa.
-- Maciu 6:25-34




Also Read If Possible (Wilika Talega Ke Rawa)
Proverbs 12:25; Mark 13:11; Luke 12:11-34;
Phillipians 4:6-7

Na Lolo (Fasting).

Serving for the 28th May, 2008

“Kena ikuri, ni oni sa lolo, kakua ni vakamurimuri ira na dauveivakaisini era dau vakamatavevekutaka na kedra irairai. O ira qori era dau vukica na kedra irairai me kilai raraba kina vei ira na tamata ni ra lolo tiko. Meu kaya vakadodonu vei kemuni, o ira qori era sa tauca dina tiko na nodra icovi. 17 “Ia o kemuni, ni oni sa lolo, moni lumuta na ulumuni, ka tavoi vinaka na matamuni; 18 “me kakua kina ni laurai votu vei ira na tamata ni oni lolo tiko, ia me raica duadua ga o Tamamuni, o Koya e tiko e na itikotiko vuni; ia o Tamamuni o Koya e raica na ka vuni, e na vakaicovitaki kemuni vakarairai.
- Maciu 6:16-18;

O ira na tisaipeli nei Joni, kei ira na nodra tisaipeli na Farisi, era a lolo tiko. Era qai lako mai, era qai kaya Vua, “Na cava beka era dau lolo kina o ira na tisaipeli nei Joni, vata kei ira na nodra tisaipeli na Farisi, ia o ira na Nomu tisaipeli era sega ni dau lolo?” 19 E mani sauma vei ira o Jisu (Yahshua), “E rawa beka vei ira na itau ni tagane vou, me ra lolo ni se tiko voli kei ira na tagane vou? E na dede ga ni nona tiko vata kei ira na tagane vou, era na sega ni lolo rawa. 20 “Ia, na siga e na yaco mai e sa na mai kau laivi kina mai vei ira, na tagane vou; era sa na qai lolo e na veisiga oqori. 21 “E sega ni dua, e na cula e dua ni tiki ni isulu e se bera ni saqoqo me botana kina na isulu makawa; de qai tadre na isulu vou mai na kena makawa, me sa qai levu cake tale na kabasu. 22 E sega talega ni dua e na tawana na waini vou e na loma ni tavaya-leca makawa, de qai botea na tavaya-leca makawa na waini vou, qai tasova na waini, ka vakacacana na tavaya-leca. Ia na waini vou e dodonu ga me tawa e na tavaya-leca vou.
-- Marika 2:18-22





(Also Read If Possible (Wilika Talega Ke Rawa)
Esther 3-4; Isaiah 58; Jonah 3; Zechariah 7-8;
Act 14:21-23

Na Masu (Praying)

Serving for the 27th May, 2008

“Ia ni oni sa masu, moni kakua ni tautauvata kei ira na dauveivakaisini. O ira era dau domona me ra masu ni ra duri tu e loma ni valenisoro kei na veisaqata ni sala, me rawa ni ra laurai kina mai vei ira na tamata. Na ka dina au kaya vei kemuni, o ira oqori era sa taura oti na nodra icovi. 06 “Ia o kemuni, ni oni sa masu, curu i na nomuni loqi, ia ni oni sa sogota na katuba, masu vei Tamamuni o Koya e tiko e na itikotiko vuni; ia o Tamamuni, o Koya e dau raica na ka vuni, e na vakaicovitaki kemuni vakarairai. 07 “la ni oni sa masu, kakua ni cavuqaqataka na vosa e sega ni yaga, me vakataki ira era daulotutaki matakau. O ira qori era nanuma ga ni ra na rogoci, e na ilevu ni nodra vosa. 08 “O koya oya moni kakua kina ni vakatotomuri ira. Baleta o Tamamuni e sa kila vinaka oti tu na veika e veiganiti kei kemuni ni oni se bera ni kerea yani Vua. 09 “E na kena ivalavala oqo moni dau masu kina: Tamai keimami mai lomalagi; Me vakarokorokotaki na Yacamuni. 10 Na Nomuni matanitu me yaco mai. Na Nomuni lewa me mai yaco E vuravura, me vaka e dau yaco mai Lomalagi. 11 Solia mai vei keimami e na siga oqo, na kakana me rauti keimami, 12 Ka vosota na neimami ivalavala ca, Baleta keimami sa dau vosoti ira era caka ca vei keimami. 13 Kakua ni vakayarayarataki keimami ki na veivakatovolei mosimosi; Ia taqomaki keimami ga mai vua na vunica; Baleta e Nomuni na matanitu kei na kaukaua kei na lagilagi e tawa mudu. Emeni.
14 “Baleta kevaka oni sa vosota na nodra ivalavala ca na tamata, e na qai vosoti kemuni talega o Tamamuni vakalomalagi. 15 Ia kevaka oni sega ni vosota na nodra ivalavala ca na tamata, e na sega talega ni vosota o Tamamuni na nomuni ivalavala ca.
-- Maciu 6:5-15





Also Read If Possible (Wilika Talega Ke Rawa)
Psalm 5; Mark 11:22-26; Luke 11:1-13; 18:1-14;
James (Jacob) 5:13-20.

Na iYau Mai Lomalagi (Wealth From Heaven).

Serving for the 26th May, 2008

“Qarauna moni kakua ni dau caka vinaka vakarairai vei ira na tamata, moni laurai kina vei ira. Baleta qori e na sega kina na nomuni icovi mai Vua na Tamada mai lomalagi. 02 “O koya oya, ni oni sa cakava e dua na cakacaka ni loloma, kakua ni uvuca wavoki na kena biukila me vaka era dau cakava o ira era dauveivakaisini, e loma ni valenisoro se e gaunisala, me rawa ni o vaqoroqoroi kina mai vei ira na tamata. Au kaya na ka dina vei kemuni, o ira qori era sa rawata tiko na nodra icovi. 03 “Ia ni oni sa cakava e dua na cakacaka ni loloma, laiva me kakua mada ga ni kila na ligamu imawi na ka e cakava tiko na ligamu imatau, 04 “me rawa kina ni caka vuni na nomu cakacaka ni loloma; ia o Tamada e dau raica na ka vuni, e na qai solia mai vakarairai o Koya na nomuni icovi.
- Maciu 6:1-4

“Kakua ni kumuna na nomuni iyau e na vuravura oqo, baleta eke, na ulo kei na veveka e rawa ni vakarusa; o ira talega na daubutako era na curu yani vakailowa, me ra butakoca; 20 “ia moni kumuna ga na nomuni iyau mai lomalagi, baleta e sega mai keya na ulo se na veveka me vakarusa, se na daubutako me curu yani vakailowa me butakoca. 21 “Na vanua ga e kumuni tiko kina na nomuni iyau, e keya talega e na tiko kina na vuniyalomu. 22 “Na icina ni yago, na mata. Kevaka me tu vinaka tu na matamuni, na yagomuni taucoko e na vakasinaiti e na rarama. 23 “Ia ke leqa tu na matamuni, na yagomuni taucoko e na vakasinaiti e na butobuto. Ia ke butobuto na rarama e tiko e lomamuni, sa na qai vakacava beka na vakaitamera ni butobuto oya? 24 “E sega ni dua e rawa ni qarava vata e rua na iliuliu; baleta e na rawa ni sevaka e dua, ka lomani koya kadua, se na yalodina vua e dua, qai cati koya kadua. Oni na sega ni rawa ni qarava na Kalou (Yahweh) kei na iyau vakavuravura.
- Maciu 6:19-24

Also Read If Possible (Wilika Talega Ke Rawa)
Proverbs 11:24-25; Mark 10:17-31; Luke 6:38;
Luke 12:32-34; Acts 20:32-35; 2 Corinthians 9:6-15.

Na Loloma, E Sega Kina Na Veisausaumi. (Love Does Not Pay Back)

Serving For The 24th May, 2008

“Oni sa na rogoca, ni a dau tukuni ‘Me saumi e dua na mata e na dua na mata, ka saumi e dua na bati e na dua na bati.’ 39 “Ia Au kaya vei kemuni, kakua ni veisaqasaqa sara ga kei na ca. Ke dua ga e sabaki iko e na babamu imatau, vukica talega yani vua na babamu kadua. 40 “Ke dua e veilewaitaki iko, qai kauta na nomu isulu, laiva vua me kauta talega na nomu kote. 41 “O koya e vakasaurarataki iko mo lakova e dua na kilomita, lakova vata kei koya e rua. 42 “Solia vua e kerekere vei iko, ia vua e gadreva me dinau vei iko, kakua ni vuki tani mai vua. 43 “O na rogoca ni tukuni, ‘Mo lomana na wekamu vakaitikotiko, ia mo sevaka na kemu meca!’ 44 “Ia o Au, Au kaya vei kemuni, “Lomana na kemu meca, vakalougatataki ira era rukaki iko, caka vinaka vei ira era sevaki iko, masulaki ira era vakayagataki iko vakalawaki ca se vakaucacataki iko, 45 “moni rawa kina ni wili moni luve i Tamada mai lomalagi; baleta o Koya, e dau vakavuna me cadra na Nona matanisiga vei ira era ca, vata kei ira era vinaka; ka vakatauca na uca vei ira era dodonu vata kei ira era tawadodonu. 46 “Kevaka mo ni lomani ira ga era lomani kemuni, na icovi cava beka oni sa rawata? E sega beka ni ra dau cakava talega qori o ira era dau kumuni ivakacavacava? 47 “Kevaka moni dau veikidavaki ga vakamataveitacini, na cava beka oni sa cakava tiko e wili me bibi cake mai vei ira na kena vo? Era sega beka ni ra dau cakava talega oqori, o ira era dau kumuni ivakacavacava? 48 “E dodonu ga moni uasivi sara vakaoti, me vaka ni uasivi vakaoti o Tamada e tiko mai lomalagi.
- Maciu 5:38-48

Kemuni na noqu daulomani, laiva meda dau veilomalomani o keda vakataki keda, baleta na loloma e vure mai Vua na Kalou (Elohim); o ira yadua era dau loloma, era sucu mai Vua na Kalou (Elohim), ka ra kila na Kalou (Elohim). 08 O koya e sega ni dauloloma, e sega ni kila na Kalou (Elohim), baleta na Kalou (Elohim) ga na loloma.
- I Joni 4:7-8




Also Read If Possible (Wilika Talega Ke Rawa)
Revelation 12:1-3; Leviticus 24:17-20; Luke 6:27-37; Romans 12:14-18

Na Veidauci (Adultery).

Serving For The 24th May, 2008

"Oni sa rogoca ni dau tukuni vei ira mai liu, 'Mo kakua ni veidauci'. 28 Ia, Au kaya vei kemuni, o koya e raica e dua na yalewa qai garova, e sa dauca oti na yalewa oqori e vuniyalona.
29 Kevaka e vu ni nomu ivalavala ca na matamu imatau, leuta laivi, qai kolotaka vakayawa mai vei iko; baleta e na vinaka cake vei iko ni rusa ga e dua na tikini yagomu, e cacalaivi ga ke bala na yagomu taucoko i na drano bukawaqa mai Qehina . 30 Ia ke vu ni nomu ivalavala ca na ligamu imatau, taya laivi, qai kolotaka vakayawa mai vei iko, baleta e vinaka vakalevu cake vei iko ke rusa e dua ga na tikini yagomu, e cacalaivi ga ke bala na yagomu taucoko i na drano bukawaqa mai Qehina.
- Maciu 5:27-30

"Baleta qo na gagadre ni Kalou (Elohim), io na nomuni vakatatabutaki, oya moni kakua ni veiyacovi ni oni se bera ni vakamau. 04 me rawa kina vei kemuni kecekece moni maroroya na veika oni taukena e na yalosavasava kei na yalovakarokoroko, 05 sega e na yalo e garova na gagano vakasisila, me vakataki ira na kai Veimatanitu tani, era sega ni kila na Kalou (Elohim);
06 Ka me kakua ni dua na tamata e lawakitaka se butakoca e dua na tacina e na ka oqo, baleta na Turaga (Yahweh) e dau veitotogitaki e na tikina oqo, me vaka keitou dau vaka­macalataka ka vakadinadinataka vei kemuni. 07 Baleta na Kalou (Elohim) a sega ni kacivi kemuni i na dukadukali, ia i na yalosavasava ga. 08 O koya e vakayacora e dua na itovo tawadodonu e sega ni beca na tamata, ia e beca sara ga Kalou (Elohim), o Koya e sa solia vei kemuni na Nona Yalo Tabu.
- I Cesalonaika 4:3-8



Also Read If Possible (Wilika Talega Ke Rawa)
Deuteronomy 24:1-4; Proverbs 5; Malachi 2:10-16;
Matthew 19:3-12; I Corinthians 7.

Na Veisevaki kei na Laba (Hatred and Murder).

Serving for the 23rd May, 2008

“Dou sa rogoca ni tukuni vei ira mai liu, ‘Mo kakua ni laba,’ baleta o koya e laba e rawa ni leqa e na siga ni lewa! 22 Ia Au kaya vei kemudou, ni o koya e cudruva vakatawadodonu na tacina, e na rawa ni leqa e na siga ni lewa. Ia o koya e kaya vei tacina, 'au via kasiviti iko', e cala e mata ni vavakoso, ia o koya e kaya, taciqu 'o iko o tamata buli tu vakaca’, e na leqa e na drano bukawaqa mai qehina. 23 “O koya oya, kevaka o sa kauta mai na nomu ka ni loloma ki na icabocabo ni soro, ia e keya o qai nanuma ni veiletitaka tiko vei iko e dua na ka o tacimu, 24 “biuta tu ga na nomu ka ni loloma e na mata ni icabo­cabo ni soro, mo lesu tale. Taumada lai veivakameautaki mada kei tacimu, oti qai lesu mai mo mai vakacabora na nomu ka ni loloma. 25 “Dau veivakameautaki sara vakatotolo kei na kemu meca ni drau se qai lako tiko i vale ni veilewai, de lai beitaki iko vua na turaganilewa o kemu meca, qai soli i iko vei ira na ovisa o turaganilewa, mo bala i valeniveivesu. 26 “Meu kaya vakadodonu vei kemuni, e na sega tale ni dua na sala moni na sereki mai kina, me yacova ni oni sa sauma lesu kece vakadua na iotioti ni sede.
- Maciu 5:21-26


O koya e kaya ni sa tiko e na rarama, ia qai sevaki tacina, e se tiko ga e na butobuto me yacova mai oqo. 10 O koya o lomani tacina, e bula tiko e na rarama, ka sega ni dua na ka, me na sevaki kina e tiko vua. 11 Ia o koya e sevaka na tacina, e tiko e na butobuto, ka lako tiko e na butobuto, ka sega ni kila na vanua e lako tiko kina baleta na butobuto oya sa bokoca laivi tu na matana.
-1 Joni 2:9-11




Also Read If Possible (Wilika Talega Ke Rawa)
Exodus 20:13; Proverb8:12-13; Matthew5:38-48;

Luke 6:22-36

Na Vakayacori ni Lawa (Fulfillment of the Laws).

Serving For The 22nd May, 2008

“Kakua ni nanuma niu lako mai meu mai vakawabokotaka na lawa se na Parofita. Au sega ni lako mai Meu mai veivakawabokotaki, ia meu mai veivakavatukanataki ga. 18 “Na ka dina Au kaya vei kemuni, me yacova ni sa takali yani o vuravura kei loma­lagi, e sega ni duabulu na matanivola se itosi e na boko laivi mai na lawa, me yacova ni sa vakavatukanataki oti kece sara. 19 “O koya e voroka e dua na iwasewase lailai ni vei ivakaro oqo, qai vakatavulica vei ira na tamata me ra cakava vakakina, e na yaco me imurimuri duadua me kacivi ki na matanitu vakaloma­lagi; ia o koya e vakamuria vinaka, qai vakatavulica, o koya e na vakatokai me cecere e na matanitu vakalomalagi. 20 “Baleta Au kaya vei kemudou, vakavo ga ke siviti ira na vunivola kei ira na Farisi na ivakatagedegede ni nomudou yalododonu, e na sega ni dua na sala dou na curu rawa kina i na matanitu vakalomalagi.
- Maciu 5:17-20

Qo sa na sega kina ni vakarusai o ira e na vuku i Jisu Karisito (Yahshua Messiah), era sa sega ni muria na gagadre vakayago. 02 Baleta na lawa ni bula vakayalo vei Karisito Jisu (Messiah Yahshua), e sa sereki au oti mai na lawa ni ivalavala ca vata kei na mate. 03 Na veika e sega ni vakayacora rawa na lawa, baleta ni a mai tini guce e na leweniyago, a qai vakayacora na Kalou (Elohim) e na Nona tala mai na Luvena o Koya vakataki Koya, e na waqawaqa ni leweniyago dau valavala ca, me mai isoro ni valavala ca: E a vakarusa o Koya na vala­vala ca e na leweniyagona, 04 me qai rawa kina vei keda meda vakayacora na veika e dodonu vakalawa, oya o keda eda sa vakanadakuya me sa oti na noda muria na veika vakayago, ia meda sa muria ga na Yalo Tabu.
- Roma 8:1-4




Also Read If Possible (Wilika Talega Ke Rawa)
Psalms 119:161-176; Matthew 22:34-40; Romans 3:21-31; 7-8.

Na Masima Kei Na Rarama Kei Vuravura (The Salt and Light of the World).

Serving for the 21st May, 2008

“E nomudou na kalougata, ni ra vaka­lialiai kemudou ka vakacacani kemudou, era qai vakaucacataki kemudou vakailasu e na Vukuqu. 12 “Moni reki ga ka yalomamarau tiko vakalevu, baleta e ka levu na nomuni icovi mai lomalagi; ka ni ra a vakaucaca­taki ira talega na parofita era a liu mai vei kemudou. 13 “O kemudou na masima kei vuravura; ia ke seyavu na tuituina ni masima, e na qai vakatuituinataki tale beka vakacava? Sa na sega dina ga ni yaga e na dua na ka, vakavo me kolotaki i tuba, me ra butuka na tamata. 14 “O kemudou na rarama kei vura­vura. Na korolevu e toka e na dua na delana e na sega ni vunitaki rawa. 15 “Era na sega talega ni waqaca e dua na icina na tamata, me ra qai biuta e na ruku ni dua na vokete, ia e na kena itutu ga na kadrala, me rawa ni solia na rarama vei ira kece era tiko e loma ni vale. 16 Laiva na nomudou rarama me ramase tiko vaka kina e na kedra maliwa na tamata, me rawa ni ra raica na nomudou caka­caka vinaka era qai vakalagilagitaki Tamamudou mai lomalagi.
- Maciu 5:11-16


E na dua na gauna eliu, oni a dau lecaika tu, ia qo oni sa vakararamataki mai vua na Turaga (Yahweh), sa dodonu ga kina moni bula tiko me vaka na luve ni rarama: 09 Baleta na vua ni rarama, e kune e na veika e vinaka, na veika e dodonu kei na veika e dina, 10 sa dodonu kina moni kilakasamataka na veika e vakadonui e mata ni Turaga (Sovereign).
- Efeso 5:8-10




Also Read If Possible (Wilika Talega Ke Rawa)
Proverbs 13:9; Mark 9:50; Luke 14:34-35; 1 Peter 4:12-19

Na iVunau Mai Na Ulunivanua: Na iVunau Totoka. (The Sermon on the Mount)

Serving of the 20th May, 2008

Ia ni sa raici ira na ibinibini tamata, sa qai cabeta na ulunivanua, ia ni sa lai toka sobu, era qai lako yani Vua na Nona tisaipeli. 02 Sa qai dolava na Gusuna o Koya me vakatavulici ira ni kaya: 03 “Era kalougata na dravudravua vaka­yalo, Baleta e nodra na matanitu vakalomalagi. 04 Era kalougata na dauvakaloloku, Baleta era na vakacegui. 05 Era kalougata na yalomalumalumu Baleta e na nodra iwasewase me ra taukeni vura­vura. 06 Era kalougata o ira era gadreva me ra kania ka gunuva na yalo­dodonu, Baleta era na vakasinaiti. 07 Era kalougata na dau veivosoti Baleta era na rawata na veivosoti. 08 Era kalougata na yalo savasava Baleta era na raica Kalou (Elohim). 09 Era kalougata o ira era dau ni tiko veilomani, Baleta era na vakatokai ni ra luve ni Kalou (Yahweh). 10 Era kalougata o ira era vakacacani e na vuku ni yalododonu, Baleta e nodra na matanitu vakalomalagi.
- Maciu 5:1-10



Also Read If Possible (Wilika Talega Ke Rawa)
Genesis 12:1; Psalm 1:84; Luke 6:17-26; 11:27-28;
John 20:24-29

Na Lawa: E Sega ni Dredre (The Law is Not Difficult)

Serving for the 19th May, 2008

Na ivakaro au sa vakarota vei kemuni edai e sega ni vunitaki tu mai vei kemuni, ka sega tale ga ni yawa maivei kemuni. 12 E sega ni tiko mai lomalagi, me tukuni kina, “O cei me na cabe i lomalagi, me lai kauta mai, meda rawa ni mai rogoca meda qai vakayacora. 13 E sega talega ni tiko mai tai kadua ni wa­sawasa, me tukuni kina, “O cei me na lele i tai kadua me lai kauta mai, meda mai rogoca meda qai vakayacora. 14 Na vosa e tu vakavoleka ga vei kemuni: e toka sara ga qori e gusumuni vata kei na vuniyalomuni, moni rawa ni cakava kina. 15 Raica, au sa vakatura no e matamuni edaidai na bula kei na vinaka, vata kei na rusa kei na ca. 16 Au sa vakaroti kemuni edaidai moni lomana na TURAGA (Yahweh) na nomuni Kalou (Elohim), moni muria na nona sala, vakayacora na nona ivakaro, na nona ilesilesi vata kei na nona lewa; moni na qai bula kina ka me tubu na kemuni iwiliwili, e na qai vakalougatataki kemuni na TURAGA (Yahweh) na nomuni Kalou (Elohim) e na vanua oni la­ko tiko kina moni lai taukena. 17 Ia kevaka e vuki tani na vuniyalomuni, oni qai sega ni via vakarorogo, ia moni qai vakayarayarataki tani moni lai cuva vei ira na vei kalou (elohim) tani moni sokalou vei ira; 18 ia au sa tukuna qo vei kemuni edai, oni sa na vakarusai dina ga. Oni na sega ni bula dede e na vanua oni sa qalo kosova tiko kina qo na Joritani, moni lai butuka ka taukena. 19 Au sa kacivi lomalagi kei vuravura me rau ivakadinadina niu sa vakatura vei kemuni na bula kei na mate kei na kalougata kei na kalouca e na siga oqo, o koya oya moni qai digitaka kina na bula, moni rawata na bula o kemuni kei ira na luvemuni; 20 Moni qai lomana na TURAGA (Yahweh) na nomuni Kalou (Elohim), moni talairawarawa i na domona, ka moni kabiti koya matua tiko, baleta o Koya na nomuni bula kei na balavu ni nomuni veisiga, moni qai rawa ni vakaitikotiko kina e na vanua a yalataka na TURAGA (Yahweh) vei iratou na tamamuni, o Eparaya­ma, o Aisake, vata kei Jekope me na solia vei iratou.
- Vakarua 30:11-20

Also Read If Possible (Wilika Talega Ke Rawa)
Deuteronomy 7:9-15; 10:12-13; Micah 6:6-8; John 14:15;

Romans 10:5-13; 1 John 5:3.

Na Lawa: Nodra Cemuri na Veimatanitu (The Removal of Other Kingdoms)

Serving for the 18th May, 2008

E na gauna sa kauti kemuni kina na TURAGA (Yahweh) na nomuni Kalou (Elohim), i na qele oni sa curuma tiko moni lai taukena, qai cemuri ira tani mai matamuni na matanitu e vuqa, -- na Hitai­ti, na Kakesaiti, na Amoraiti, na Kenanaiti, na Perisaiti, na Haivaiti, kei na Jepusaiti e vitu na matanitu lelevu cake ka kaukaua cake sara mai vei kemuni 02 e na gauna sa soli i ira kina vei kemuni na TURAGA (Yahweh) na nomuni Kalou (Elohim), ni oni sa rawai ira, mo ni qai vakawabokotaki ira vakadua. Moni kakua ni vakaduria e dua na veiyalayalati vata kei ira, moni kakua talega ni vakaraitaka vei ira na yalololoma. 03 Moni kakua ni vakavakawati vata kei ira. Moni kakua ni musuka na luvemuni yalewa vei ira na luvedra tagane, se taura na luvedra yalewa, me ra mai vakawati kei ira na luvemuni tagane, 04 baleta era na mai vagolei ira tani na luvemuni mai na nodra muri Au tiko, mera lai qarava na veikalou tani, qai vakavuna na kena waqa na Nona cudruvi kemuni na TURAGA (Yahweh), ka vakawa­bokotaki kemuni vakasauri. 05 Oqo na ka moni cakava vei ira; moni vakacaca­na na nodra icabocabo ni isoro, basuraka na nodra matakau, tatalaka sobu na nodra duru ni veikalou yalewa, ka vakama e na buka waqa na nodra mata­kau ceuceu. 06 O kemuni oni tamata tabu ni TURAGA (Yahweh) na nomuni Kalou (Elohim). Na TURAGA (Yahweh) na nomuni Kalou (Elohim) e a digitaki kemuni mai na veimatatamata kece e delai vuravura, moni nona iyau talei. 07 Na TURAGA (Yahweh) a sega ni lomani kemuni qai digitaki kemuni, baleta oni lewe levu cake mai vei ira na veimatatamata tani tale eso. O kemuni oni lewe lailai duadua mai vei ira na veimatatamata kece. 08 Ia baleta ga na nona lomani kemuni na TURAGA (Yahweh), vata kei na nona nanuma tiko na yalayala a bubuluitaka o vei ira na nomuni qase, e a kauti kemuni tani mai kina ena liga kaukaua, qai vakabulai kemuni mai na vanua ni veiva­kabobulataki, mai na kaukaua nei Fero na Tui kei Ijipita.
- Vakarua 7:1-8


Also Read If Possible (Wilika Talega Ke Rawa)
Deuteronomy 8:18-9:5; Judges 2:10-23; 2 Corinthians 6:14-7:1;

Colossians 4:4-6; 1 Peter 2:1-12.

Na Lawa: Na iTutu Vakabete (The Priesthood).

Serving for the 17th May, 2008

A qai vosa na TURAGA (Yahweh) vei Eroni, “O iko, o ratou na luvemu vata kei ira na lewe ni matavuvale nei tamamu, oni na colata na icolacola ni cala kece e yaco baleta na vale tabu, ia o iko ga vata kei iratou na luvemu, dou na colata na icolacola ni cala kece e yaco baleta na itutu vakabete. 02 Vakasoqoni ira mai na lewe ni mataqali Livai, mai vei ira na nomudou kawa, me ra mai tomani iko ka vukei kemudou (oya o iko vata kei ratou na luvemu) e na veigauna kece dou dau cakava kina na nomudou cakacaka ni veiqaravi e na loma ni Valelaca ni Veiyalayalati.
--Lekutu 18:1-2.


E na nomudou itavi mo dou qarava na cakacaka e na loma ni loqi tabu, vata kei na cakacaka ni icabocabo ni soro, me kakua ni tau tale na leqa lelevu vei ira na yavusa Isireli. 06 O au vakataki au, raica, au sa digitaki ira era kawa Livai vata kei iko, mai na kedra maliwa na Yavusa Isireli, me ra iloloma soliwale vei iko, mai vua na TURAGA (Yahweh) me ra mai cakava na cakacaka e na loma ni Valelaca ni Veitavaki. 07 Ia o iko ga kei iratou na luvemu, dou vakatarai mo dou cakacaka vakabete e na veika kece me baleta na qaravi ni icabocabo ni isoro, vata kei na cakacaka e na daku ni ilatilati. Au sa solia tiko oqo vei kemudou, vakailoloma soliwale, na cakacaka vakabete. Ke dua na tamata tani e toro volekata na vale tabu e na vinakati me vakamatei.
--Lekutu 18:5-7.

Na cava ga e sa biu vakatikitiki mai na isolisoli tabu era vakacabora Vua na TURAGA (Yahweh) o ira na Isireli, au sa solia vei iko kei ira na luvemu tagane vata kei na luvemu yalewa, me dau nomudou iwasewase e veiveigauna kece. Oqo na veiyalayalati tawamudu ni masima e na mata ni TURAGA (Yahweh), vei iko kei ira talega na luvemu. 20 E kaya na TURAGA (Yahweh) vei Eroni, “E na sega na nomu ivotavota e na nodra vanua, e na sega talega na kemu ivotavota e na kedra maliwa; O Au ga, au nomu iwasewase ka nomu ivotavota e na kedra maliwa na yavusa Isireli.”
--Lekutu 18:19-20.


Also Read If Possible (Wilika Talega Ke Rawa)
Leviticus 1-7; 21-22; Numbers 3; Hebrews 7-9;
I Peter 2:4-10

Na Lawa: Na Vale Tabu Tabatabanikau. (The Tabernacles)

Serving for the 16th May, 2008

E dina ni imatai ni veiyalayalati, e vakaroti kina na iwalewale ni veiqaravi vakalou kei na dua na valenisoro vakavuravura, 02 baleta ni tara na kena vale tabu: na imatai ni iwasewase, e kune kina na itutu ni kadrala, na teveli kei na madrai-dikevi, qori e vakatokai na tikina tabu; 03 ia na tkina tabu e loma sara, e na daku ni ikarua ni ilatilati, e vakatokai na loqi tabu-dredre; 04 ka na kune e loma na miqa koula ni vakama imadrali boi, na kato ni veiyalayalati e boro vakadua na yasana kecekece e na iboro koula, ka tiko e loma na kuro koula e maroroi tu kina na mana, na ititoko nei Eroni e a kadre kei na papa vatu ni veiyalayalati; 05 e delana, e rau duri tu kina na agilosi-liu ka rau vakaruruga tu na idabe­dabe ni veilomani. Sa sega ni kena gauna oqo me vakamacalataki kina na veika a yaco e na kena a tara na veika oqo. 06 Na bete e na curu ga i na imatai ni iwasewase ni Vale Tabu e tuba, me ra lai vakayacora kina na nodra itavi ni sokalou. 07 Ia e na ikarua ni iwasewase e loma, na bete levu e na curuma duadua, vakadua e na dua na yabaki, vata kei na dra e na lai vakacabora e na vukuna o koya vakataki koya vata kei na vuku ni nodra cala na tamata.
--Iperiu 9:1-7.

Ia o Karisito (Messiah) e a lako mai a qai yaco me bete levu ni veika vivinaka e a cakacakataka; e a curuma e dua na valetabu e cecere ka daumaka vakaoti e sega ni bulia na liga ka sega ni ka vakavuravura. 12 A sega talega ni curu kina vata kei na dra ni me se na dra ni luveni bulumakau, ia e na Nona dra sara ga o Koya vakataki Koya; e a curuma vakadua ga na Loqi Tabu qai rawata mai kina e na vukuda kecekece, na veivueti e tawamudu.
--Iperiu 9:11-12.





Also Read If Possible (Wilika Talega Ke Rawa)
Exodus 25-27; 35-40; Mark 15:37-38;
Hebrews 9:13-28; 10:19-23

Na Lawa: Na Dodonu ni Yalewa. (Women’s Right)

Serving for the 15th May, 2008

Ia kevaka sa volitaka na luvena yalewa, e dua na tagane, me lai cakacaka vaka dauveiqaravi, e na sega ni sere o koya me vaka ni sere e dua na tagane bobula. Kevaka e sega ni vakamarautaki koya na nona turaga, o koya e a digitaki koya me mai nona, ia me laivi koya me volitaki lesu. E sega na nona dodonu me volitaka na yalewa oqori vua e duatani tale na vanua, baleta sa voroka oti o koya na nodrau veidinadinati vata kei na yalewa. Ia kevaka sa musuki vua na luvena tagane, ia me solia vua na dodonu vakaluvena yalewa. Ia ke vakawatitaka e dua tale na yalewa, e na tabu dredre vua me tarova vua na imatai ni yalewa na kena kakana, na nona isulu kei na nona dodonu vakawatina. Kevaka e sega ni solia vua na ka tolutolu oqori, ia me solia vua na nona galala, ka na sega ni sauma vakailavo.
- Lako Yani 21:7-11

Mo kakua ni vakalolovirataka na luvemu yalewa e na nomu vakavuna na nona vuki me yalewa dautagane, de qai tavuki na vanua i na veidauci, qai vakasinaiti kina e na ivalavala vakasisila.
- Vunau ni Soro 19:29;


Kevaka era bula vata tiko na veitacini, qai mani mate e dua vei ira, ni sebera ni dua na luvena tagane, sa na vakatabui vua na nona yada me vakawati i taudaku ni matavuvale oya. Me na tauri koya ga e dua na taci i watina, me vakamautaki koya, qai vakayacora vua na itavi nei tuakana se tacina sa mate oti. Na imatai ni luvena tagane e vakasucuma, me na volai vua sa mate oti, me kakua kina ni boko laivi na yacana mai vei ira na yavusa Isireli
- Vakarua 25:5-6.



Also Read If Possible (Wilika Talega Ke Rawa)
I Timothy 3:2,12; Exodus 22:16-17; Numbers 27; 30; 36;
Deuteronomy 21:10-17; 22:13-30; 25:7-10; Ruth 3-4.

Na Nomu Dauniveibuli E Watimu. (Your Creator Your Husband)

Serving for the 14th May, 2008

“Lagasere, o iko na yalewa yava, o iko o sebera ni vakasucuma e dua na gone; kacabote mai e na seresere, kaikaila e na reki, o iko o se sega vakadua ni taratara; baleta e levu cake na luvena o koya e lala tu, mai vua na yalewa e tiko na watina, e kaya na TURAGA (Yahweh). 02 Vakalevutaka na vanua e toka kina na nomu vale laca, vakadreta na ilati ni nomu valelaca me rabailevu yani; kakua ni maninitaka; vakabalavutaka na nomu dali, vakaukauataka na nomu iteki.
- Aisea 54:1- 2.

Kakua ni rere; baleta o na sega ni sotava na madua. Kakua ni taqayataka na irogorogo ca, o na sega ni vakamadualaki. O na guilecava na madua mai na nomu gauna ni goneyalewa O na sega ni nanuma na irogorogo ni nomu itutu vakayada. 05 Baleta o koya e a buli iko e watimu tagane – Na TURAGA (Yahweh) Cecere na yacana – O koya na Yalosavasava ni Isireli e nomu iVakabula; e vakatokai o koya me Kalou (Elohim) ni vuravura raraba. 06 Baleta na TURAGA (Yahweh) e na kacivi iko lesu mai me vaka e dua na yalewa sa biu laivi tu, ka sa rarawa tu vakayalo – e dua na yalewa vakawati, o a se vakamau gone, oti o qai biu laivi tu,” e kaya na Kalou. 07 “E na dua na gauna lekaleka au a vakanadakui iko, ia e na loloma cecekia au na kauti iko lesu mai kina. 08 E na dua na noqu cudru lailai au a tabonaka kina vakalekaleka na mataqu mai vei iko, ia e na yalovinaka e sega ni mudu Au na vakaraitaka na yalololoma vei iko,” E kaya na TURAGA (Yahweh) na nomu iVakabula (Redeemer).

- Aisea 54: 4-8.

Read Also If Possible (Wilika Talega Ke Rawa)
Psalms 45; Songs of Solomon 4; Isaiah 62:1-7;
Revelation 19:5-9; 21:1-4

Na Yalewa Vakawati iVakarau Vinaka Vakaoti: (The Perfect Mother).

Serving for the 13th May, 2008

O cei e na kunea rawa na yalewa vakawati ivakarau vinaka vakaoti? Baleta na kena isau o koya e levu cake sara mai na rupi.
-- Vakaibalebale 31:10.


Ni tau na uca cevata, e sega ni tuburi koya me nuiqawaqawataki iratou na lewe ni nona matavuvale: baleta eratou sa vakasulumi vinaka tu e na isulu damudamu. 22 E talia vakamaqosa na iubi ni nona i mocemoce; Ia o koya vakataki koya e daramaka ga na isulu silika kei na lokaloka. 23 O watina tagane e dokai e na matamata ni koro, ni sa dabeca na nona i dabedabe e na kedra maliwa na matua ni vanua 24 E dau cula na isulu lineni qai volitaka; ka dau volitaka vei ira na dauveivoli, na ioro tali vakamaqosa. 25 Na kaukaua kei na itovo rakorako e nona isulu o koya, e na marautaki dina o koya na veisiga era se roro tiko mai. 26 E dolava na gusuna e na yalomatua, ia e yamena, e toka kina na yalololoma. 27 E dau vakadikeva vinaka na itosotoso ni nodratou matavuvale ka sega ni dau kania na madrai ni vucesa. 28 O ratou na luvena ni ratou mata cake, eratou na kacivi koya ni kalougata; e vaka kina o watina, e na nona dau vakacaucautaki koya, 29 E levu sara na goneyalewa era dau cakava na veika vivinaka vakaoti ia o iko, o uasiviti ira kecekece, 30 Na itovo veirawai e veivakacalai, na rairai totoka e sega wale na betena, Ia na yalewa e rerevaka na TURAGA (Yahweh) e na vakacaucautaki. 31 Solia vua na icovi ni cakacaka ni ligana, qai laiva na we ni nona cakacaka o koya vakataki koya me kauta mai vua na veivakacaucautaki e na matamata ni koro.
-- Vakaibalebale 31: 21-31.


O koya e kunea e dua na yalewa me watina, e kunea e dua na ka vinaka ka sa ciqoma na yalololoma ni TURAGA (Yahweh).
-- Vakaibalebale 18:22.




Also Read If Possible (Wilika Talega Ke Rawa)
Revelation 24; Acts 18:23-26; Romans 16:1-6

Na Yalewa Vakawati iVakarau Vinaka Vakaoti (The Perfect Mother).

Serving for the 12th May, 2008

Na yalewa vakawati ivakarau vinaka vakaoti, e isalavakatui vua na watina, Ia na yalewa vakawati dauveivakamaduataki, e tautauvata kei na ka vuca e suina.
-Vakaibalebale12:4.

O cei e na kunea rawa na yalewa vakawati ivakarau vinaka vakaoti? Baleta na kena isau o koya e levu cake sara mai na rupi. 11 Na vuniyalo i watina e vakararavi vakatabakidua vua, ka na sega ni dua na iyau me sega vua. 12 E kauta ga mai vua na vinaka o koya, ka sega na ca, e na veisiga kece ni nona bula. 13 E digitaka vinaka na vuti ni sipi kei na lineni, qai dau cakacakataka e na liga mamakutu. 14 E tautauvata kei na nodra waqa ni usa kako na dauveivoli o koya; E lai kauta sara mai vakayawa na kedratou kakana. 15 E dau sou vakamataka, ni se butobuto na vanua; me vakarautaka na kedratou kakana na nona lewenimatavuvale, ka wasea na nodra dui cakacaka na nona vada. 16 E vakasamataka e dua na tikini qele, oti qai volia; mai nona iyau ga o koya vakataki koya, oti qai teivaka kina e dua na loga ni vaini. 17 E dau cakava na nona cakacaka e na kena igu, E kaukaua vinaka na ligana me veiraurau kei na nona itavi. 18 E raica o koya na nona veivoli ni tubu vinaka tiko: sa qai sega ni boko na nona na icina e veibogi. 19 E taura toka e ligana na misini ni wa ni isulu, qai qumia toka na kena ivakawiri e na iqaqalo ni ligana 20 E dodoliga vei ira era dravudravua; io, ka dodoka na ligana vei ira era gadreva na nona veivuke.
-Vakaibalebale 31:10-20.



Also Read If Possible (Wilika Talega Ke Rawa)
Revelation 24; Act 18:23-26; Romans 16:1-6

Na iVakavuvuli ni Tina (Mother’s Teachings)

Serving for the 11th May, 2008

Luvequ tagane, rogoca na ivakavuvuli nei tamamu, ia kakua ni vakanadakuya na lawa nei tinamu, 09 Baleta era na yaco me ra iukuuku ni loloma e ulumu, ka itaube me i salusalu ni domomu
-- Vakaibalebale 1:8-9

Na veivosa i Lemueli na tui -- na parofisai a vakatavulica vua o tinana: 02 Isa na luvequ tagane, isa na luvequ tagane mai ketequ, Isa na luvequ tagane ni noqu bubului, 03 Kakua ni vakayagataka na nomu kaukaua vei ira na yalewa, se na nomu igu e na veika e vakacacani ira na tui. 04 E sega ni kilikili vei ira na tui, i Lemueli – me ra gunu waini se vei ira na daunivakavulewa, me ra gunnuva na gunu kaukaua, 05 de ra qai gunu, era qai guilecava na lawa, era qai bureitaka na vakatulewa dodonu vei ira era vakararawataki tu 06 Solia na gunu kaukaua vei ira era sa vakarau rusa, kei na waini vei ira era sa lomabibi tu; 07 Laiva me gunu, me guilecava na nona dravudravua, ka me kakua ni nanuma tale tiko na nona bula leqaleqa. 08 Dolava na gusumu e na vukudra o ira era sega ni vosa rawa kei na vuku ni nodra dodonu o ira era sa tu sese tu, 09 Dolava na gusumu ka dau vakatauca na lewa dodonu, ka mo taqomaka na nodra dodonu o ira na dravudravua kei ira era gadreva na veivuke.”
-Vakaibalebale 31:1-9.





Also Read If You Can (Wilika Talega Ke Rawa)
Exodus 2:1-9; Proverbs 6:20-24; 2 Timothy 1:5; 3:14-17

Na Tina Dau Mamarau (The Happy Mother)

Serving For The 10th May, 2008

Haleluya. Vakavinavinaka, o kemuni na dauniveiqaravi ni TURAGA (Yahweh), Vakavinavinakataka na yaca ni TURAGA (Yahweh). 02 Me vakarokorokotaki na yaca ni TURAGA (Yahweh), Me tekivu mai na gauna oqo me tawamudu. 03 Mai na cadra ni siga, me yacova ni dromu yani, Na yaca ni TURAGA (Yahweh) me vakavinavinakataki. 04 Na TURAGA (Yahweh) e cecere vei ira na veimatanitu kece sara, Kei na nona lagilagi e cecere cake mai na lomalagi. 05 O cei e tautauvata kei na TURAGA (Yahweh) na noda Kalou (Elohim), o Koya e vakaitikotiko mai cake sara 06 o koya e vakayalomalumalumutaki koya me raica na veika era tu mai lomalagi kei vura­vura! 07 O koya e vueti ira na dravu­dravua mai na dravusa, ka laveti ira era gadreva na veivuke, mai na isovasova ni benu; 08 Me vakatikori ira e na kedra maliwa na turaga, Io, vata kei ira na nodra turaga na Nona tamata. 09 Sa vakatikora na yalewa yava, o koya, me marama ni nona vale me tina mamarau vei ira na luvena. Haleluya!
- Same 113.




Also Read If Possible (Wilika Talega Ke Rawa)
I Samuel 2:1-10; Job 42:12-16; Psalms 127:3-5; Proverb 17:6;

Isaiah 54:1-8; Luke 1.

Me Vaka Na Tina, Na Kalou e Dau Yalololoma (Like a Mother Elohim is Loving)

Serving for the 9th May, 2008

Lagalaga sere e na mamarau, i lomalagi; ka mamarau, o iko vuravura; kacabote mai e na lagalaga sere o iko ulunivanua! Baleta na TURAGA (Yahweh) sa vakacegui ira na nona tamata ka na yalololoma vei ira na Nona era sa lomabibi. 14 Ia o Saioni e kaya, “Na TURAGA (Yahweh) sa vakanadakui au, na TURAGA (Yahweh) sa guilecavi au.” 15 E rawa beka vua e dua na yalewa me guilecava na luvena dramidrami me sa sega kina ni lomana na gone lailai a vakasucuma mai ketena? Io e na rawa beka vua me guilecava, ia o au, au na sega ni guilecavi iko! 16 Raica, au a ceuti iko e na qeteqete ni ligaqu; na nomu lalaga e dau votu tu ga e mataqu: 17 O ira na luvemu era sa vakusa­kusa lesu tiko mai; ia o ira era a vakacacani iko ka vakalalai iko era sa biuti iko. 18 Mata cake mada mo vakararai wavoki; era sa sosoqoni na luvemu me ra lako mai vei iko. “Me vaka niu bula tiko,” e tusanaka na TURAGA (Yahweh), “o iko o na vakasulumi iko vata kei ira, e na iukuuku mo daramaka, me vaka na yalewa vou sa vakarau vaka­mau. 19 E dina ga ni o a vakacacani o qai biu laladidi tu, ka vakamaumautaki tu na nomu vanua, Ia qo o sa na rui qiqo tale vei ira na nomu tamata, ia o ira era a tilomi iko era sa na tu sara mai vakayawa.”
- Aisea 49:13-19.



Also Read If Possible (Wilika Talega Ke Rawa)
Psalms 51:1-9; 77:1-8; Isaiah 66:12-14; Lamentations 3:22-23;

Colossians3:12-14

Na iVakaro: Vakarokorokotaka na Tinamu (Honor Your Mother)

Serving for the 8th May, 2008

O iko mo vakarokorokotaki tamamu vata kei tinamu, me vaka sa vakaroti iko kina na TURAGA (Yahweh) na nomu Kalou (Elohim); me rawa ni vakabalavutaki na nomu bula, ka me toso vinaka na nomu bula e na vanua sa solia vei iko o Jiova (Yahweh) na nomu Kalou (Elohim).
- Vakarua 5:16.

Oti era qai lako mai vei Jisu (Yahshua) o ira na Vunivola kei ira na Farisi mai Jerusalemi, era qai taroga, 02 “Na cava mada era beca tiko kina o ira na Nomu tisaipeli, na nodra ivakarau vakavanua na noda qase? Qo e sega ni bau vuluvulu na ligadra, e na gauna era kana madrai kina.” 03 Sauma o Koya, ni kaya vei ira, “Ia na cava oni dau voroka kina na ivakaro ni Kalou (Elohim), e na nomuni ivalavala vakavanua? 04 “Baleta na Kalou (Elohim) a vakarota ni kaya, ‘Vakarokorokotaki rau o tamamu kei tinamu’ oti qai kaya tale ‘O koya e vosacataki tamana se tinana, laivi koya me vakamatei.’ 05 “Ia o kemuni, oni kaya, ‘O koya e tukuna vei tamana kei tinana, “Na tubu cava ga drau a rawa ni taura mai vei au, sa vakatabui oti me ka ni valenisoro” - 06 ‘oya, oni sa sereki koya mai na nona itavi me vakarokorokotaki tamana se tinana.’ Qori oni sa cakava kina me vakawaletaki na ivakaro ni Kalou (Elohim), e na nomuni ivakarau vakavanua. 07 “Ni yavu dauveivakaisini! Sa donu vinaka ga na parofisai nei Aisea me baleti kemuni ni a kaya; 08“O ira na tamata qo era volekati Au ga e na vosa ni gusudra. Era vakarokorokotaki Au e na tebe ni gusudra, Ia na vuniyalodra e yawa kalia mai vei Au. 09 E maumau wale na nodra qaravi Au, Ni ra vakatavulica tiko me yavu ni ivakavuvuli na ivakaro vakatamata.”
- Maciu 15:1-9.




Also Read If Possible (Wilika Talega Ke Rawa)
Exodus 20:12; 21:15, Leviticus 20:9; Ephesians 6:1-6

Na iVakaro: Na Solevu (The Holy Feasts)

Serving for the 7th May, 2008

Vosa vei ira na luvei Isireli, qai vakamacalataka vei ira na veika me baleta na solevu digitaki ni TURAGA (Yahweh), e vinakati moni kacivaka ni ra gauna ni sosoqoni tabu, baleta oqo na Noqu solevu. 03 E ono na siga me caka kina na cakacaka, ia na ikavitu ni siga e siga ni vakacecegu, ka siga ni sosoqoni tabu, o iko mo kakua ni cakava kina e dua na cakacaka, baleta qori na siga ni vakacecegu ni TURAGA (Yahweh) e na veivanua kece oni vakaitikotiko kina. 04 Oqo na vei Solevu digitaki ni TURAGA (Yahweh), na gauna ni sosoqoni tabu moni kaciva e na kedra dui gauna e na kena dui vula.
- Vunau ni Soro 23:2-4.


Dau vakananuma na vula o Abibi, moni dau marautaka kina na Lakosivia Vua TURAGA (Yahweh) na nomuni Kalou (Elohim), baleta e na vula o Abibi, e a kauti kemuni tani kina mai Ijipita o Koya, e na dua na bogi. 02 Vakacabora e dua na isoro ni lakosivia vua na TURAGA (Yahweh) na nomuni Kalou (Elohim), oya me dua na manumanu mai na nomuni qele ni sipi se ba ni bulumakau, e na vanua e na digitaka na TURAGA (Yahweh) me lai vakatikora kina na Yacana.
Vakarua 16:1-2


Me ono na siga na nomuni kania tiko na madrai sega ni vakaleveni: ia na ikavitu ni siga me siga ni sosoqoni tabu Vua na TURAGA (Yahweh) na nomuni Kalou (Elohim), moni kakua talega ni cakava e dua na cakacaka e na siga oya. 09 Mo ni wilika e vitu na macawa, mai na siga e tekivu kina na nomuni tatamusuki ni sila. 10 Ekeri moni qai marautaka kina na Solevu ni Macawa Vua na TURAGA (Yahweh) na nomuni Kalou (Elohim), e na nomuni solia e dua na nomuni iloloma soliwale, me veiraurau kei na veivakalougatataki, sa solia tiko vei kemuni na TURAGA (Yahweh) na nomuni Kalou (Elohim):
- Vakarua 16:8-10


O iko mo qarava na Solevu ni Valetabatabanikau me siga vitu, ni sa oti na nomuni yauta vata na vua ni nomuni buturara ni sila kei na nomuni iqaqi ni caka waini.
-Vakarua 16:13.


Me vitu na siga na nomuni marautaka tiko na Solevu vua na TURAGA (Yahweh) na nomuni Kalou (Elohim) e na vanua e digitaka na TURAGA (Yahweh). Baleta na TURAGA (Yahweh) na nomuni Kalou (Elohim) e na vakalougatataka na nomuni tatamusuki kece sara, kei na cakacaka ni ligamuni kece sara, e na qai vuabale vakaoti kina na nomuni reki. 16 Vakatolu e na dua na yabaki, e vinakati kina vei ira kece na nomuni tagane me ra rairai yani Vua na TURAGA (Yahweh) na nomuni Ka­lou (Elohim) e na vanua e na digitaka mai o Koya; oya e na Solevu ni Madrai Sega ni Vakale­veni, na Solevu ni Macawa, kei na Solevu ni Valetabatabanikau. Me ka­kua ni dua na tagane e basika ligalala yani vua na TURAGA (Yahweh): 17 Na tagane kece e vinakati me ra solia na ka era rawata, me veiraurau kei na veivakalougatataki sa solia tiko vei ira na TURAGA (Yahweh) na nomuni Kalou (Elohim).
-Vakarua 16: 15-17.


Also Read If Possible (Wilika Talega Ke Rawa)
Exodus 12; 23:14-17, Leviticus 23; Colossians 2:16-23

Na iVakaro: Na Savasava kei na Dukadukali (Clean and Unclean Meat)

Serving For the 6th May, 2008

E kaya na TURAGA (Yahweh) vei Mosese vata kei Eroni, 02 “Vosa vei ira na kai Isireli mo drau kaya: ‘Oqo na manumanu (beasts) moni dau kania, e na kedra maliwa era kune e vuravura. 03 O koya ga e wase rua ka ququ na yavana, ka dau mama vakarua na kena kakana, e na kedra maliwa na manumanu, qori moni dau kania.
-Vunau Ni Soro 11:1-3.


Oqo moni kania vei ira kece na kabula ni wasawasa vata kei na uciwai, na kena e vakasena ka vakavarina, e wasawasa, e waitui, kei na uciwai, moni dau kania.
10 Ia o ira kece era sega ni vakasena se vakavarina e waitui se e uciwai, e na kedra maliwa era toso tu e loma ni wai – se na kabula cava tale era bula tu e loma ni wai -- e dodonu moni vakasisilataki ira. 11 Baleta ni oni vakasisilataki ira, moni kuakua sara kina ni kania na lewedra, ka moni vakasisilataka tale ga na ya­godra mate.
-Vunau Ni Soro 11:9-11.


Na manumanu vuka era dau­qasi talega e na va na yavana, me ra ka vakasisila vei kemuni. 21 Ia e tiko e vica na kabula vakatabana era dauqasi e na va na yavana e tara moni kania, oya na kena era vaka yava codocodo babalavu, me rawa kina ni ra dau lade e na dela ni vanua.
-Vunau Ni Soro 11:20-21.


Baleta ni o Au na TURAGA (Yahweh) na nomuni Kalou (Elohim); vakatabui kemuni vakataki kemuni moni savasava (holy), baleta o Au, Au savasava (holy). Me kakua ni vu ni nomuni dukadukali e dua na kabula era dau veiqasiyaki tu e dela i vuravura. 45 O au na TURAGA (Yahweh), au a kauti kemuni laivi mai Ijipita meu mai nomuni Kalou (Elohim); oqori e vinakati kina moni savasava (holy), baleta o Au, Au savasava (holy).
-Vunau Ni Soro 11:44-45.




Also Read If Possible (Wilika Talega Ke Rawa)
Genesis 7:1-4; Matthew 15:1-20; Mark 7:1-23; Acts 10; Romans 14.

Na iVakaro: Na iTotogi Mate (The Death Penalty)

Serving for the 5th May, 2008

O koya e mokuta e dua na tamata, qai vakamatei koya, me vakamatei.
-Lako Yani 21:12

O koya e mokuti tamana se tinana me na vakamatei. 16 O koya e butakoca e dua tale na tamata, qai volitaki koya se kune ni se tikoga kei koya e na gauna e tobo kina, me na vakamatei.
-Lako Yani 21:15-16.


Kakua ni vosota me bula tiko e dua na yalewa daucaka isausau. 19 O koya e veiyacovi kei na dua na manumanu me vakamatei. 20 O koya e vakacabo isoro vua e dua ga na kalou (elohim), vakavo ga vua na TURAGA (Yahweh), e vinakati me vakarusai vakadua.
-Lako Yani 22:18-20.


O iko mo vakatatabutaka na siga ni Vakacecegu, baleta e siga tabu vei kemuni. O koya e vakadukadukalitaka na siga ni vakacecegu, me na vakamatei; baleta o ira era cakava e dua na cakacaka e na siga oya, e vinakati me ra muduki laivi vakadua mai vei ira na kai nona.
-Lako Yani 31:14

O ira yadua era rukaki tamadra se tinadra, e dodonu me ra vakamatei. Ke a rukaki tamana kei tinana; sa na baleti koya ga vakataki koya na dave ni nona dra. 10 Ke dua na tagane e dauca na watina e dua tale na tagane – se na wati i wekana vakaitikotiko -- o rau ruarua, o tagane kei yalewa rau a veidauci, me rau vakamatei. 11 Na tagane e veiyacovi kei na wati i tamana, o koya oqori e vakayacora na ka beci vei tamana. O rau ruarua, me rau vakamatei; sa na baleti rau ga vakataki rau na dave ni nodrau dra. 12 Ke dua na tagane e veiyacovi kei vugona (daughter-in-law), o rau ruarua me rau na vakamatei. Na ka rau cakava e ka vakatani, sa na bale ga vei rau vakataki rau na dave ni nodrau dra. 13 Na tagane e veiyacovi kei na dua tale na tagane, me tautauvata na ka e dau cakava e dua tagane vata kei na dua yalewa, o rau ruarua rau sa cakava na ka vakasisila. E vinakati me rau vakamatei; ia na dave ni nodrau dra e bale ga vei rau
-Vunau Ni Soro 20:9-13.

Read Also If Possible (Wilika Talega Ke Rawa)
Genesis 9:6; Leviticus 24:17-22;
Deuteronomy 24:16; Matthew 21: 33-44

Na iVakaro: Saumi Lesu Na Mata E Na Mata (Eye for An Eye)

Serving for the 4th May, 2008

Kevaka era veivala tiko na tagane era qai cumuta e dua na yalewa bukete, qai vakavuna na nona vakalutu, ia a qai sega ni mani dua na veivakamavoataki vakaca sara, e vinakati ga me totogitaki o koya e a cala, ia na kena itotogi me qai lewa ga o wati i yalewa, e na veivakadonui ni mataveilewai. 23 Ia kevaka e tiko na veivakamavoataki vakaca, e na vinakati mo raica me isau ni mate na mate, 24 me isau ni bati na bati, me isau ni liga na liga, me isau ni yava na yava, 25 me isau ni kama na kama, me isau ni mavoa na mavoa, ka isau ni drakusi na drakusi.
-Lako Yani 21:22-25

Ke dua e taura na nona bula e dua tale na tamata, sa na vinakati me vakamatei o koya. 18 O koya e vakamatea e dua na bulumakau, sa na vinakati me veisausaumi lesu – dua na bulumakau me isau ni dua na bulumakau. 19 Ke dua e vakamavoataka na wekana vakaitikotiko, na ka sara ga a cakava, me caka tale vua; 20 me saumi ga na ramusu e na ramusu, na mata e na mata, na bati e na bati. Me vaka ga ni vakamavoataka na tani, me vakamavoataki talega vakakina o koya. 21 O koya e vakamatea e dua na bulumakau, me na sauma lesu, ia o koya e vakamatea na tamata, o koya sara ga me vakamatei. 22 Mo raica me dua ga na lawa, me vauca vata na vulagi kei ira na itaukei. O Au na TURAGA (Yahweh) na nomuni Kalou (Elohim).
- Vunau ni Soro 24:17-22


“Oni sa na rogoca, ni a dau tukuni ‘Me saumi e dua na mata e na dua na mata, ka saumi e dua na bati e na dua na bati.’ 39 “Ia Au kaya vei kemuni, kakua ni veisaqasaqa sara ga kei na ca. Ke dua ga e sabaki iko e na babamu imatau, vukica talega yani vua na babamu kadua.
-Maciu 5:38-39

Also Read If Possible (Wilika Talega Ke Rawa)
Genesis 21:12; 15-16; 22:18-20; 31:14; Deuteronomy 19:16-21; Psalms 103:8-12; Matthew 5:38-42

Na iVakaro: Na Sausaumi Lesu (Repaying Debts)

Serving for the 3rd May, 2008

Kevaka e dua na tamata e butakoca e dua na bulumakau se dua na sipi, oti qai vakamatea se volitaka; sa na dodonu vua me sauma lesu e lima na bulumakau me isau ni dua na bulumakau a butakoca vata kei na va na sipi me isau ni dua na sipi a butakoca. 02 Ke dua na daubutako e tobo ni butako tiko, qai mani mate ni laumoku, o koya veimoku ni sasabai tiko, e na sega ni wili me cala e na vakadave dra; 03 ia ke a yaco oqori ni sa cadra oti na siga, ia sa na wili me cala e na vakadave dra o koya. E na vinakati tikoga vua na daubutako me sausaumi lesu, ia ke mani sega ni tu vua na ka, sa na vinakati me volitaki sara ga o koya vakataki koya, me saumi lesu kina na nona a buta­ko. 04 Kevaka e mani kune e ligana ni se bula tiko na manumanu a butakoca – na bulumakau na asa, se na sipi – sa na vakaruataki na ka me sauma lesu. 05 Ke dua na tamata, ni vagani ira tiko na nona manumanu e na nona vanua se veivaini, oti qai vakatarai ira me ra lai kana e na nona vanua e dua tale na tamata, e na vinakati vua me sauma lesu na veika vivinaka kece era tu e na nona vanua se nona veivaini, me sauma lesu kina na vakacaca sa yaco. 06 Ke mani tubu sivia e dua na yameyame ni buka, qai tete yani i veico, qai lai kama sara kina na ivesuvesu sila tamusuki se sila era se bula tu, se na vanua taucoko; o koya e a tekivuna na vakawaqa buka, e vinakati me na sausaumi lesu. 07 Ke dua na tamata e solia vua na wekana vakaitikotiko na nona ilavo se na nona iyaya me ma­roroya, oti era qai butakoci mai na loma ni nona vale na tamata oya; na daubutako ke sa kune, me na sausaumi lesu, ia me vakaruataki na ka e sauma. 08 Kevaka e sega ni kune na daubutako, ia me lai vakatarogi vei ira na turaganilewa na itaukei ni vale oya, de o koya ga a taura na nona iyau ni tamata kadua. 09 E na veikisi kece ni kena tauri vakailowa na bulumakau se na asa se na sipi se na isulu, se dua ga na ka e yali qai tukuna kina e dua, “Na ka qo e noqu,” sa na vinakati vei rau ruarua me rau dui kauta mai na nodrau dui kisi vua na turaganilewa. O koya vei rau e kaya na turaganilewa ni cala, e na vinakati me sausaumi lesu vua na wekana, ia me vakaruataki na ka e sauma.
-Lako Yani 22:1-9





Also Read If Possible (Wilika Talega Ke Rawa)
Numbers 5:5-8; Matthew 5:23-24; Luke 19:1-10;

I Corinthians 6:1-11.

Na Ivakaro: Na Yada, Na Luveniyali Kei Na Kaitani (The Widow, Orphan And Stranger

Serving for the 2nd May, 2008

Mo kakua ni vakararawataka e dua na yada se dua na gone luveniyali. 23 Kevaka oni vakararawataki ira e na dua ga na sala, era qai mani tagici au mai, au na rogoca dina na nodra tagi; 24 e na qai tubu na noqu rarawa, oti au qai vakamatei iko e na iseleiwau, era sa na qai yada o ira na watimuni, ka ra luveniyali o ira na luvemuni.
- Lako Yani 22:22-24;


O iko mo kakua ni vakadredretaka na lewa dodonu vei ira na vulagi se vei ira era luveniyali se kauta na nona isulu na yada me ka ni ivakadinadina. 18 Ia mo nanuma tiko ni oni a bobula tu mai Ijipita, ia na TURAGA (Yahweh) na nomuni Kalou (Elohim) a qai vueti kemuni mai keya, qori na vuna au vakaroti kemuni tiko kina moni kitaka na ka oqo. 19 Ni oni sa tamusuka na nomuni were, oni qai guilecava tu yani e dua na ivau sila, kakua ni lesuva. Biuta tu ga yani me kedra o ira na vulagi, na luveniyali se na yada, me qai rawa kina vua na TURAGA (Yahweh) na nomuni Kalou (Elohim) me vakalougatataka na cakacaka ni ligamuni. 20 Ni oni sa kurea na vuni olive, kakua ni vaqaqara tale vakarua e na veitabana. Laiva na kena vo vei ira na vulagi, na luveniyali kei ira na yada. 21 Ni oni sa tamusuka na vuani vaini e na nomuni loga ni veivaini, kakua ni taleva vakarua na loga ni vaini. Laiva na kena vo me kedra o ira na vulagi kei ira na luveniyali, vata kei ira na vada. 22 Nanuma tiko ni oni a dau bobula tu mai Ijipita. Oqori na vuna au vakaroti kemuni tiko kina mo ni kitaka na ka oqo.
- Vakarua 24:17-22


Baleta e dua na lotu dina ka savasava e na mata ni Kalou (Yahweh) na Tamada; oya na veisiko vei ira na luveniyali kei ira na yada e na nodra i tutu ni leqa, kei na nona taqomaki koya tiko me kakua ni vakadukadukalitaki mai vura­vura.
Jemesa (Sekove) 1:27



Also Read If Possible (Wilika Talega Ke Rawa)
Deuteronomy 10: 17-20; Psalm 68:5; 146: 9;
I Timothy 5: 3-16.

Na iVakaro Levu Duadua (The Greatest Commandment)

Serving for the 1st May, 2008

Rogoca Isireli: Na TURAGA (Yahweh) na noda Kalou (Elohim), na TURAGA (Yahweh) e duabau ga. 05 O iko mo lomana na TURAGA (Yahweh) na nomuni Kalou (Elohim) e na vuniyalomuni taucoko kei na nomuni bula taucoko kei na nomuni kaukaua taucoko. 06 Na ivakaro au sa solia vei kemuni edai me dau tikotoko ga e lomamuni. 07 Moni dau vakatavulica vakayalomatua vei ira na luvemuni, moni veivosakitaka ni oni dadabe toka mai vale, se oni taubale tiko e gaunisala, se oni davo sobu ka vaka kina ni oni mata cake. 08 Moni vauca toka me ivakatakilakila e ligamuni, ka vesuka toka e yadremuni. 09 Vola talega e na duru ni katuba levu ni nomuni vale, kei na isogo ni nomuni matamata.
- Vakarua 6:4-9


Kakua ni qara mo veisausaumitaka na ca, se mo cata edua vei ira na nomuni tamata, ia mo lomana ga na kai nomu me vaka o dau lomani iko vakataki iko. O au na TURAGA (Yahweh).
- Vunau ni Soro 19:18


Ke mai tiko e dua na vulagi e na nomuni vanua, kakua ni vakarautaka na ivakarau ca vua. 34 Na vulagi e bula tiko vata kei iko, e dodonu me laurai ni tautauvata ga kei na dua na itaukei. Lomani koya me vaka ga ni o lomani iko vakataki iko, baleta o kemuni talega oni a bula tu vakavulagi mai Ijipita. O au na TURAGA (Yahweh) na nomuni Kalou (Elohim).
- Vunau ni Soro 19 33-34


“Vakavuvuli, na ivakaro cava beka, e cecere duadua e na lawa?” 37 Sauma vua o Jisu (Yahshua), “‘Mo lomana na TURAGA (Yahweh) na nomu Kalou (Elohim), e vuniyalomu taucoko, kei na nomu bula taucoko, kei na nomu kaukaua taucoko.’ 38 “Qori na imatai ka ivakaro cecere dua­dua. 39 “Na kena ikarua e tautauvata ga oqori; ‘Mo lomana na wekamu vakaitiko­tiko, me vaka ni o lomani iko ga vakataki iko.’ 40 E na ivakaro ruarua oqori, era lili kece toka kina na lawa kei na parofita.”
- Maciu 22: 36-40


Also Read If Possible (Wilika Talega Ke Rawa)
Micah 6: 8; Mark 12:28-31; Luke 10:25-37; Acts 4:32-35;
Romans 13:8-10; 2 Corinthians 8:13-15.