Vakacakacakataki o Pelami me Vakacacani ira na Isireli. (Ballam Paid to Curse Israel)

Serving for the 30th June, 2008

Sa qai toso na nodra ilakolako na Isireli me ra lai cegu toka e na bucabuca mai Moapi, e na bati ni Joritani, veibasai toka ga kei Jeriko. 02 Ia o Pelaki na luvei Sipora, a raica na ka kece era a cakava na Isireli vei ira na Amoraiti, 03 ka sa tuburi ira na Moapi e dua na rere vakaitamera baleta era bau lewe levu dina toka na tamata. E dinataki ni nodra domobula na Moapi a vu ga mai vei ira na Isireli.
- Lekutu 22:1-3

…… Ia o Pelaki na luvei Sipora, o koya e a tui Moapi tiko e na gauna oya, 05 a qai talai ira na italai me ra lai kacivi Pelami na luve i Peoa, mai Picori e na bati ni uciwai, e na nona vanua ga, qai kaya: “Eso na kawa tamata era sa biuti Ijipita mai; e robota na vanua na kedra ilevu, ka ra sa mai toka qo e na noqu yasayasa. 06 Mo lako mada mai, mo mai vosa vakaloucataki ira na tamata oqo, baleta era sa rui kaukaua vakalevu cake sara mai vei au. De dua au na qai rawa ni vakadrukai ira meu cemuri ira laivi mai na vanua oqo. Au sa kila tiko ni ra dau kalougata o ira o vosa vakalougatataki ira, ka ra kalouca o ira o vosa vakaloucataka.”
- Lekutu 22:4b-6

E tabu vei ira na Amonaiti kei ira na Moapi bau kina o ira na nona kawa me ra curu i na ivavakoso ni TURAGA (Yahweh), me yacova na ikatini ni tabatamata, me tawamudu. 04 Baleta, era a sega ni lai tavaki kemuni me ra sikovi kemuni ka kauta yani vei kemuni na madrai kei na wai, e na gauna ni a lako tani tiko kina mai Ijipita, oti era qai saumi Pelami na luve i Peoa na kai Picori mai Arema Naharaimi, me lai vosa vakaloucataki kemuni. 05 Ia na TURAGA (Yahweh) na Kalou (Elohim) a qai sega ni via rogoci Pelami, ia a vukica na vosa ni veivakaloucataki me nomuni kalougata, baleta na TURAGA (Yahweh) na nomuni Kalou (Elohim) e dau lomani kemuni.
- Vakarua 23:3-5





Also Read If Possible (Wilika Talega Ke Rawa)
Exodus 12:1-3; Numbers 22-23; Joshua 24:8-10;
2 Peter 2:15-16

Rai Cake Vua Na Kalou Mo Bula. (Look Up to Yahweh and Live)

Serving for the 29th June, 2008

Era a lako mai na ulunivanua o Hori, e na sala vaka ki na Wasa Damudamu, me ra lako voliti Itomi. Ia a tubu na nodra nuiqawaqawa na tamata ni toso tiko na ilakolako e gaunisala; 05 era sa mani vosavosa vakacacana na Kalou (Yahweh) vata kei Mosese ni ra kaya, “ Na cava sara mada drau kauti keimami tani kina mai Ijipita me keimami mai mate tu ena vanua dravuisiga qo? Sa sega na madrai. Sa sega na wai. Keimami sa sevaka tale ga na kakana qo. 06 Sa mani tala mai na gata batigaga na TURAGA (Yahweh) e na kedra maliwa; era qai katilaki ira na tamata, ka levu sara na kai Isireli era mate. 07 Era sa mani lako vei Mosese na tamata era qai kaya, “Keimami a valavala ca, e na gauna keimami a vosavosa vakacacana kina na Kalou (Yahweh) vata kei iko. Masuta mada na TURAGA (Yahweh) me kauta laivi na gata, mai vei keimami. Sa mani masulaki ira na tamata, o Mosese. 08 E kaya na TURAGA (Yahweh) vei Mosese, “Bulia e dua na gata qai ciqimaka e na mua ni dua na kau balavu, ia era na qai bula o ira kece e kati ira na gata, ni ra raica. 09 Sa mani bulia e dua na gata parasa o Mosese, qai ciqimaka toka e na dua na kau balavu. E na gauna e katia kina e dua vei ira na gata, qai raica na gata parasa, e a bula sara.
- Numbers 21:4-9

“Ia me vaka na nona a laveta cake na gata o Mosese, mai lekutu, e vinakati talega me laveti cake vakakina na Luve ni Tamata, 15 “me rawa kina vei koya e vakabauti Koya, me kakua ni rusa, ia me rawata ga na bula tawamudu. 16 “Baleta na Kalou (Yahweh) e na vakataimera ni Nona lomani vuravura, e a solia kina na Luvena duabau a vakatubura, me kakua ni rusa o ira yadua era vaka­bauti Koya, ia mera rawata ga na bula tawamudu. 17 “Baleta na Kalou (Yahweh) a sega ni talai Luvena mai i vuravura me mai vakarusa na vuravura, ia me mai vueta ga na vuravura e na vukuna.
-Joni 3:14-17





Also Read If Possible (Wilika Talega Ke Rawa)
Exodus 16:6-12; Numbers 14:26-37; 2 Kings 18:1-4;

Lamentation 3: 25-40, 1 Corinthians 10:1-11

Talaidredre Vua na Kalou o Mosese. (Moses’ Disobedience)

Serving for the 28th June, 2008

E na imatai ni vula, era a yaco kina i na vanua Dravuisiga o Sini, o ira na lewe ni yavusa taucoko kei Isireli, era a qai lai tiko mai Ketesi. E a mate ka bulu tu mai keya o Miriama. 02 E a sega na medra wai na lewe ni yavusa, mai keya era a mani sosoqoni vata na tamata me ra lai vosa kudrukudru vei rau o Mosese kei Eroni. 03 Era a veileti kei Mosese ka kaya vua, “E vinaka cake beka vua na Kalou (Elohim), ke keimami a mate ga vata kei ira na tuakai keimami era a mate e na mata ni TURAGA (Yahweh). 04 Na cava o kauta tu mai kina na ivavakoso ni TURAGA (Yahweh) i na vanua dravuisiga qo, me keimami mai mate tu eke vata kei ira na neimami manumanu yavaiva. 05 Na cava o kauti keimami tani kina mai Ijipita, i na vanua ca oqo. E sega tu e na vanua oqo na witi se na lolo, na vaini se na pomenikaraneti. Qai sega tale ga na wai me gunuvi. 06 Rau mani biuti ira tu yani na lewe ni yavusa o Mosese kei Eroni, me rau lako i na katuba ni Valelaca ni Bose, rau qai lai koto sobu ka cuva vakatoboicu, sa qai rairai mai vei rau na iserau ni TURAGA (Yahweh). 07 E kaya sara na TURAGA (Yahweh) vei Mosese, 08 “Kauta na ititoko, o iko kei tuakamu o Eroni, drau lai soqoni ira vata na lewe ni yavusa. Vosa i na uluvatu oya, e matadra e na qai sovaraka mai na wai. O na kauta mai na wai mai na uluvatu, me medra na lewe ni yavusa, me rawa ni ra gunu kina o ira vata kei ira na nodra manumanu yavaiva. 09 Sa kauta sara na ititoko e na mata ni TURAGA (Yahweh), me vaka e vakarota vua. 10 Rau sa qai vakasoqoni ira vata na lewe ni yavusa, o Mosese vata kei Eroni, me ra lai tu taudonuya na uluvatu, sa qai kaya vei ira o Mosese, “Ni vakatudaliga mada, ni yavu tamata talaidredre, oni vinakata beka me keirau sa na vakavurea na memuni wai mai na vatu oqo?” 11 Sa qai laveta na ligana o Mosese, qai samuta vakarua na uluvatu e na nona ititoko. Sa qai dave mai kina vakalevu sara na wai, era qai gunu kina o ira na lewe ni yavusa vata kei ira na nodra manumanu yavaiva. 12 Ia na TURAGA (Yahweh) a qai kaya vei Mosese vata kei Eroni “Baleta nomudrau a sega ni vakabauti au mo drau vakaraitaka nomudrau dokai au niu cecere, e matadra na Yavusa Isireli, drau sa na sega kina ni kauti ira na lewe ni yavusa i na vanua au sa solia vei ira.
- Lekutu 20:1-12

Also Read If Possible (Wilika Talega Ke Rawa)
Exodus 7:19-21; 8:16-17; 17:1-6 Deuteronomy 4:20-22; Act 5:1-11.

Na Kalou e vakaotia na Vakadrecike (Yahweh Ends the Disobedience)

Serving for the 27th June, 2008

O Kora na luve i Isihari, na luve i Koaca, na luvei Livai vata kei na so na lewe ni mataqali i Rupeni, o Tecani kei Eapairami, rau luvei Iliapi kei Oni na luvei Peleci 02 a curumi ratou na viavialevu ratou mani tu me ratou saqati Mosese. E a muri ratou tiko mai e 250 na turaga ni Isireli, iliuliu rogo e na kedra maliwa na lewe ni yavusa, ka ra lewe talega ni matabose e cake. 03 Era a lako vata kece tiko mai, me ra mai saqati Mosese vata kei Eroni. Era kaya sara vei rau, “O kemudrau qo, sa sivia tale na nomudrau i vakarau! O ira na lewe ni Yavusa qo era yalosavasava kece sara vakadua, ka sa tiko vata kei ira na TURAGA (Yahweh). Na cava na vuna drau qai biubiuti kemudrau sara ga kina e deladra na ivavakoso ni TURAGA (Yahweh)?” 04 Ia ni rogoca qori o Mosese sa cuva sobu sara ga vakaitoboicu. 05 Oti sa qai kaya vei Kora vata kei ira kece na nona itokani, “Ni mataka na TURAGA (Yahweh) e na qai vakatakila se ocei e wili me Nona, ka na vakaraitaka talega se ocei e yalosavasava, ka na qai lewa mai o koya me toro yani vua na tamata oya. 06 Ia o iko Kora vata kei ira na nomu ilawalawa, qo na ka mo dou cakava, 07 “Dou kauta mai e dua na miqa, ia ni mataka dou biuta e loma na bukawaqa, vata kei na ka boi vinaka ena mata ni TURAGA (Yahweh). Na tamata ena digitaka na TURAGA (Yahweh), qori o koya e savasava. Sa toro cake sara ga na nomudou viavialevu na Livai!”
- Lekutu 16:1-7

Ni sa soqoni ira vata na nona ilala era saqati rau tiko, ena mata ni katuba ni Vale ni Soqo o Kora, sa qai rairai mai na iserau ni TURAGA (Yahweh) vei ira taucoko era soqoni tiko.
- Lekutu 16:9


Sa qai dalaga na gusu ni vuravura qai tilomi ira vata kece kei na nodra veivale, vata kei ira kece na tamata nei Kora kei na nodra iyau. 33 Era a bulu bulabula i na loma ni ibulubulu, vata kei na ka kece era taukena; sa qai tasogo tale na vuravura, era sa mani rusa yani, me ra sa yali vakadua mai na loma ni Yavusa.
-Lekutu 16:32-33



Also Read If Posible (Wilika Talega Ke Rawa)
Psalm 106: 16-17; Hebrews 10:26-31; 12:23-29;
2 Peter 1:16 – 2:22; Judah 1:11

Vakatudaliga I Na Vosa Ni Turaga (Be Attentive To the Words of Yahweh)

Serving for the 26th June, 2008

O koya oqo, e kaya kina na Yalo Tabu, “Nikua, ke lomamuni moni rogoca na Nona vosa, 08 Kakua ni vakayalokaukauataka na vuniyalomuni, me vaka na gauna ni vakavunene, e na siga ni veitemaki e loma ni lekutu, 09 e na vanua era a vakatovolei Au kina o ira na tamamuni, era qai vakadinadinataki Au, ni ra raica tiko na Noqu cakacaka me yabaki vasaga­vulu. 10 Qori Au a levaci ira kina na itabatamata oya, Au qai kaya, ‘Era dau lako sese e na uto ni nodra vakasama, Era qai sega kina ni kila na Noqu ivalavala.’ 11 Au mani bubului kina e na Noqu rarawa, ‘Era na sega ni curuma na Noqu vakacegu. 12 Moni qaqarauni kina, kemuni na veitacini, de qai kune e dua na tamata e na kemuni maliwa e tiko vua na yaloca ka sega ni vakabauta, oni qai musu laivi kina mai Vua na Kalou (Yahweh) bula; 13 ia, moni cakulea tiko ga na uto ni nomuni vakasama e veiveisiga me yacova na siga e vakatokai “Na Siga”, me qai kena itinitini ni na sega ni dua na tamata e na kemuni maliwa, me yalokaukaua tiko e na vukuni ni veivakacalai ni ivalavala ca. 14 Baleta eda sa yaco meda vakaiwasewase kei Karisito (Messiah), kevaka, mai na ivakatekivu ki na ivakataotioti, eda taura matua tiko na veiyalayalati oqo, 15 me vaka sa tukuni tiko, “Nikua, kevaka oni rogoca mada ga na voqa ni domona, kakua ni vakaukauataka na vuniyalomuni, moni vakacudrui koya.” 16 O cei sara mada, o ira era a rogoci Koya era qai vakacudrui Koya? E sega beka ni o ira era a lako mai Ijipita vata kei Mosese; e dina ga ni sega ni o ira kece? 17 Ia o cei mada era a vakatubu rarawa Vua me vasagavulu na yabaki? E sega beka ni o ira era a valavala ca, na suidra era qeqera tu mai loma ni lekutu? 18 Ia o cei tale e a qai bubuluitaka vei ira o Koya, ni ra na sega ni curuma na Nona vakacegu, ia o ira ga era a sega ni vakarorogo? 19 Eda raica rawa kina ni ra a sega ni curu rawa baleta ni ra sega ni vakabauta.
Iperiu 3:7-19



Also Read If Possible (Wilika Talega Ke Rawa)
Psalm 95; Matthew 17:1-5; John 14:15-24;
Acts 3:19-23, Hebrews 4.

Vasagavulu na Yabaki E na Vanua Dravuisiga. (Forty Years in the Wilderness)

Serving for the 25th June, 2008

Rau sa qai davo sobu vakatobuicu o Mosese kei Eroni e na matadra taucoko na lewe ni Yavusa Isireli era a soqo tiko mai keya. 06 O Josua na luvei Nuni vata kei Kelepi na luvei Jifune, e rua vei ira era a lai butu vanua, rau a qai dresulaka na nodrau i sulu, 07 rau qai kaya vei ira taucoko na Vanua o Isireli, “Na vanua keimami a butuka mai ka vakadikeva mai e vanua vinaka vakaoti. 08 Ke sa taleitaki keda na TURAGA (Yahweh), e na liutaki keda i na vanua oya o koya, na vanua e dave kina na wainisucu kei na oni, me lai solia vei keda. 09 Mo ni kakua ga ni talaidredre vua na TURAGA (Yahweh). Moni kakua talega ni rerevaki ira na tamata ni vanua oya, baleta eda na tilomi ira vakadua. Na nodra isasabai sa oti, na TURAGA (Yahweh) e tiko kei keda. Ni kakua ni rerevaki ira.
Lekutu 14:5-9


Sa qai vosa vei rau o Mosese kei Eroni na TURAGA (Yahweh), 27 “Me vakaevei na dede ni nodra vosa kudrukudru tiko baleti au o ira na lewe ni yavusa ca oqo? Io au sa mai rogoca na nodra kudru o ira na kai Isireli daukudru oqo. 28 Ia tukuna sara vei ira qo, ‘Me vaka ni dina niu bula tiko, e tusanaka na Turaga (Yahweh), au sa na cakava dina talega vei kemuni na ka au a rogoca ni oni kaya: 29 e na vanua dravuisiga a tu, e na bale matemate kina na yagomuni – oya o kemuni kece sara oni yabaki ruasagavulu se qase cake, oni a wili e na gauna ni wilivanua, oni a kudruvaki au. 30 E na sega ni duabulu vei kemuni e na butuka na vanua au a dusimaka e na ligaqu, ka bubuluitaka niu na cakava me nomuni vanua, vakavo ga o Kelepi na luvei Jifune kei Josua na luvei Nuni.
- Lekutu 14:26-30;

E na loma ni vasagavulu na yabaki – oya me dua na yabaki e na veisiga yadua ni vasagavulu na siga oni a butu vanua tiko kina -- oni na totogitaki tiko kina e na vuku ni nomuni ivalavala ca, moni na qai vakila kina na noqu duatani niu sa saqati kemuni.’”
Lekutu 14:34;

Na cava tale meda qai kaya e na veika oqo? Ke to vata kei keda na Kalou (Elohim), o cei e na rawa ni saqati keda?
Roma 8:31



Also Read If Possible (Wilika Talega Ke Rawa)
Joshua 5:1-6; John 6:48-51; 1 Corinthians 10:1-6;
Hebrews 3:7 – 4:7.

Cata na Vanua Yalataki o ira na Isireli. (Israel Did Not Like The Promised Land)

Serving for the 24th June, 2008

A qai vosa vei Mosese na TURAGA (Yahweh) ni kaya, 02 “Tala mada e so na tagane, me ra lai butuka mai na qele vaka Kenani, na qele au sa solia vei ira na Isireli. Mo tala e tau yadua na iliuliu mai na vei mataqali kecekece ni nodra qase sara mai liu.”
- Lekutu 13:1-2

Era a qai lesu mai vei rau o Mosese kei Eroni, kei ira kece na lewe ni vanua o Isireli, mai Ketesaka e na vanua dravuisiga o Perana. E keya era a qai tukutuku vei rau kei ira kece na lewe ni Vanua, era qai vakaraitaka tale ga na vuata ni vanua. 27 Era a solia vei Mosese na itukutuku oqo: “Keimami sa lako i na vanua o a talai keimami kina, e ka dina taucoko ni dave tu kina na wai ni sucu kei na oni. Qo na vuana. 28 Ia o ira na tamata era tawana tu na vanua era kaukaua, lelevu, ka vakabainivalu vakavakaitamera tu na nodra vei koro …”
- Lekutu 13: 26-28a


E vagalui ira sara o Kelepi e na mata i Mosese, qai kaya, “E dodonu meda lako cake ga meda lai taura ka taukena na qele, baleta eda rawa ni cakava” 31 Ia o ira na vo ni tagane era a lako vata cake kei koya era kaya, “Eda na sega ni valuti ira rawa na tamata oya; era kaukaua cake sara mai vei keda.”
- Lekutu 13:30-31

E na bogi ni siga oya, era a laveta cake kina na domodra o ira na lewe ni vanua, era qai tagi lagalaga ka qoqolou. 02 Era a sosovaki rau o Mosese kei Eroni o ira na lewe ni Vanua taucoko era qai kaya vei rau, “ E vinaka cake meda a mate ga mai Ijipita. Se, e na veivanua dravuisiga ka tu. 03 Na cava me kauti keda mai kina na TURAGA (Yahweh) i na vanua oqo, meda qai mai vakamatei wale tu e na iseleiwau. O ira na watida kei ira na luveda me ra qai mai kau vakabobula ni ivalu. E sega beka ni vinaka cake meda sa lesu tale i Ijipita?” 04 Oti era qai veivosaki vakataki ira, “E dodonu meda lesia e dua na iliuliu, meda sa lesu tale i Ijipita.”
Lekutu 14:1-4




Also Read If Possible (Wilika Talega Ke Rawa)
Deuteronomy 1:19-33; Psalm 106:24-27; Proverbs 29:25;

Philipians 2:12-16

Vakatovolea Na Kalou O Ira Na Isireli. (Israel Tempted El)

Serving of the 23rd June, 2008

O Isireli a qai nakita me vakatovolea na Kalou (El), e na nodra tagica na kakana era garova. 19 Io era vosa saqata na Kalou (Elohim) ni ra kaya, “E rawa beka vua na Kalou (El) me vakarautaka e dua na teveli e veikau? 20 E na gauna a samuta kina na vatu o koya a qai coka mai na wai qai drodro yani vakayauyau e uciwai, Ia, e rawa beka vua me soli keda madrai? E rawa beka ni vakarautaka talega na lewe ni manumanu me kedra na nona tamata?” 21 Ni rogoci ira na TURAGA (Yahweh), sa dua na ka na nona cudru; sa qai caudre na nona bukawaqa me baleti Jekope, ka tubu na nona leva baleti Isireli, 22 baleta era sega ni vakabauta na Kalou (Elohim), ka sega ni vakararavi i na nona veiqaravi. 23 Ni o koya ga e lewa na lomalagi e cake, ka dolava na katuba ni lomalagi.
24 E a tauca mai vei ira na mana me ra kania, e vakauta mai vei ira o Koya mai na sila ni lomalagi. 25 Na tamata era a kania na kedra kakana na agilosi, ka vakauta mai vakayauyau na kakana lewe ni manumanu. 26 E sereka mai na cagi ni tokalau mai lomalagi: ka vakauta mai na cagi ni ceva e na nona kaukaua. 27 E vakatauca na lewe ni manumanu vei ira me vaka na kuvu ni soso, na manumanu vuka me vaka na mataninuku e matasawa. 28 E cakava me ra tau sara ga e na nodra loma ni keba, e na veiyasa ni nodra valelaca. 29 Era mani kana me yacova ni ra sa mamau vinaka sara, baleta ni a solia vei ira o koya na kakana era vinakata. 30 Ia ni sebera ni ra vakanadakuya na kakana era garova e na gauna era se kubuta tu kina e gusudra, 31 sa tau mai vei ira na leva ni Kalou (Elohim), qai vakamatei o ira sara ga na momoqaqa vei ira, ka muduki ira laivi kina na cauravou ni Isireli. 32 Ia, e na dela ni veika a yaco qo, era a valavala ca tiko ga, e na dela ni nona cakacaka mana, era a sega tiko ga ni vakabauta.
- Same 78:18-32




Also Read If Possible (Wilika Talega Ke Rawa)
Numbers 11; Psalms 106:1-15; Luke 4:1-4; James 4:1-4

Na Veivakaroti ni Kalou vei ira na Isireli. (The Commands of Yahweh to Israel)

Serving for the 22nd June, 2008

E na siga sa vakaduri cake kina na Loqitabu, oya na Valelaca ni Veiyalayalati, e a ubia kece tu vakadua na O. Mai na yakavi me yacova na mataka na o e ubia toka na Loqitabu e rairai tu vaka e dua na bukawaqa. 16 Qori na kena ivakarau e veigauna, e ubia tu ga na o, ia e na bogi e rairai tu vaka na bukawaqa. 17 E na veigauna kece e talave cake kina na o mai na Valelaca, era sa cavutu sara na Isireli, ia ni kovuta sobu ga mai, era cegu talega na Isireli, me ra viria na nodra vale laca. 18 E na veivakaroti ga ni TURAGA (Yahweh) era na toso kina na Isireli, e na nona veivakaroti talega era na cegu kina, me ra e na nodra valelaca. 19 Ni toka na o e dela ni Loqitabu me vica vata na siga, o ira na luve i Isireli era na muria na lewa ni TURAGA (Yahweh), era na sega ni toso. 20 A qai yaco, ni mai toka na o e dela ni Loqitabu me vica vata na bogi, me vaka e vakarota na TURAGA (Yahweh); era a tiko voli ga loma ni nodra valelaca, ia era na qai toso tale e na nona veivakaroti na TURAGA (Yahweh). 21 E na so na gauna e na toka ga na o mai na yakavi me yacova na mataka, ia ni sa talave e na mataka kadua era sa na toso sara. 22 Ke toka na o me siga rua, vula dua se yabaki dua, o ira na Isireli era sa na cegu toka ga e na keba, ka sega ni toso. 23 E na veivakaroti ni TURAGA (Yahweh) era na cegu kina e na nodra valelaca, e na veivakaroti talega ni TURAGA (Yahweh) era na toso kina. Era dau muria ga na veivakaroti ni TURAGA (Yahweh) me vaka e vakasavui tiko vei ira mai vei Mosese.
Lekutu 9:15-23






Also Read If Possible (Wilika Talega Ke Rawa)
Exodus 13:22,33; 40:34-38; Numbers 14:11-14;
1 Corinthians 10:1-2

Tagane Vakawati, Lomani ira na Watimuni. (Married Men: Love Your Wife)

Serving for the 21st June 2008

Kemuni na tagane vakawati, lomani ira na dui wati­muni, me vaka ni lomana na isoqosoqo lotu o Karisito (Messiah), qai soli i Koya kina vakataki Koya vua; 26 me rawa kina ni vakatabuya ka vakasavasavataka e na wai kei na Nona vosa, 27 qai rawa kina ni bulia cake e dua na isoqosoqo lotu lagilagi, e sega ni tavutonotono, se salulu se dua na ka vaka oya, ka ni sa savasava vakaoti ka sega ni dukadukali. 28 Sa dodonu kina vei ira na tagane vakawati me ra lomana na dui watidra, me vaka ni ra lomana na dui yagodra; o koya o lomani watinayalewa, e lomani koya vakataki koya. 29 Ka ni se sega vakadua ni dua e sevaka na yagona o koya vakataki koya, e na dau vakania ka vakamareqeta, me vaka e dau vakayacora na Turaga (Messiah) i na isoqosoqo lotu. 30 Baleta o keda eda tiki ni yagona, eda lewe ni yagona ka tiki ni suina talega. 31 “Qori na vuna, e dodonu kina vua na tagane me biuti tamana kei tinana, me lai vakacoko vua na yalewa na watina, me rawa ni vakaduavatataki na dui yagodrau me sa dua ga.” 32 Oqori e dua na ka vuni vakaitamera, ia qo au vosa tiko me baleta na Karisito (Messiah) kei na isoqosoqo lotu. 33 Ia veitalia mada qori, laivi kemuni yadudua moni dau lomani ira na dui wati­muni, me vaka ga ni oni lomani kemuni vakataki kemuni, ka laiva na yalewa vakawati me dau vakarokorokotaki watina tagane.
-Efeso 5:25-33.

Me vaka kina vei kemuni na tagane vakawati, bula vata kei ira na watimuni e na yalomatua, dau dokai ira baleta era malumalumu sobu vakayago, baleta o ira talega era na wasea vata kei kemuni na nomuni ivotavota ni iloloma soliwale ni bula tawamudu; ni cakava oqori me kakua ni vakataotaki na nomuni masumasu.
- I Pita 3:7.





Also Read If Possible (Wilika Talega Ke Rawa)
Genesis 2:18-25; Hosea 3:1-3; Malachi 2: 13-16;

Colossians 3:19; Revelations 21:14

Na Sere ni Dodomo Vua na Tagane Vakawati (Song of Love for Married Men)

Serving for the 20th June, 2008

E vaka na vuni apolo e na kedra maliwa na vunikau e loma ni veikau, o koya na noqu dodomo e na kedra maliwa na cauravou, e talei vei au meu dabe e na ruku ni yaloyalona, ia na vuana e kamica na kena ikanakana e gusuqu.
04 Sa kauti au oti ki na vale ni soqo, o koya ia na kuila e vakarurugi au kina, na dodomo. 05 Vakaukauataki au e na vua ni vaini mamaca kamica, vakabulabulataki au e na vua ni apolo, baleta au sa malumalumu e na dodomo.
06 Na ligana imawi e no e ruku ni uluqu, qai kamokotaki au koto e ligana i matau.
-Sere i Solomoni 2: 3-6.

Rogoca! Na noqu dodomo! Raica! Sa lako mai qori o koya, e ladeva kosova mai na veiulunivanua, ka rikava mai na veidelana. 09 Na noqu dodomo e vaka na anitilope, se diatagane gone. Raica! Sa duri tu qori e daku ni nodatou bai, ka vakararai tiko mai e na nodatou katubaleka, e iro tiko mai e na isogo cicila.
10 Sa vosa na noqu dodomo, e kaya mai vei au, “Duri mai noqu daulomani, noqu matavinaka e duabau, daru mai lako, 11 Raica! sa sivi na vula ililiwa, sa mudu na uca, ka sa oti yani, 12 Na senikau, era sa babasika e delai vuravura; Sa yaco mai na gauna ni lagasere, na domo ni ruve sa rogo e loma ni noda vanua. 13 Na vunilolo sa tekivu vuataka na imatai ni vuana, Sa kubu na senivaini, ka kuvuraka mai na kedra iboi totoka. Duri mai, lako mai noqu daulomani, noqu matavinaka e duabau, daru mai lako.”
-Sere i Solomoni 2: 8-13 .



Also Read If Possible (Wilika Talega Ke Rawa)
Psalms 45, Song os Solomon 1-8, 2 Corinthians 11:2-3,
1 Peter 3:1-6

Na Tagane Vakawati Yalodina (The Married Man).

Serving for the 19th June, 2008

I luvequ-tagane, vakadikeva matua na noqu vuku, ka rogoca vinaka sara na noqu vosa ni yalomatua, 02 me rawa ni o kila vinaka na itovo ni digidigi, ka me toka e tebenigusumu na vosavosa vuku. 03 Mai na tebenigusuni yalewa dautagane, e dau titiri mai na oni, ia na nona vosa e dadara cake mai na waiwai; 04 ia e muri, e na qai gaga vaka na duva o koya, ka gagata vaka na iseleiwau batirua.
-Vakaibalebale 5:1-4.

Gunu wai ga mai na nomu tobu ni wai, na waidrodro mai na nomu toevu, 16 ia ke mani vuabale i gaunisalalevu na nomu ivurevure ni wai, me drodro na nomu veiuciwai i na veisaqata ni koro? 17 Ia laiva me nomu duadua tikoga, mo kua sara ga ni wasea vata kei ira na tani. 18 Me vakalougatataki mada ga na nomu toevu,
ka mo kune marau tikoga maivua na watimu ni cauravou. 19 Na meyalewa dauloloma, na diayalewa totoka vakaoti, me dau vakamamautaki iko mada ga e veigauna kece na sucuna, ka me dau vakamarautaki iko tiko me tawamudu na nona dodomo. 20 Na cava me vakamarautaki iko kina, i luvequ, na yalewa saqamua? Na cava mo lai mokota kina na watina e dua tale na tagane? 21 Na ivalavala ni tamata, e laurai votu tiko mai vua na TURAGA (Yahweh), ka dikeva vinaka tiko mai o Koya, na nona ilakolako kece. 22 Na ivalavala vakasisila ni tamata ca, e na tudaitaki koya, na ivau ni nona ivalavala ca e na vesuki koya matua. 23 E na mate ga o koya, baleta ni rui lailai na nona vakatavulici, Qai mani muri cala kina, e na vuku ni nona lialia.
-Vakaibalebale 5:15-23.

Also Read If Possible (Wilika Talega Ke Rawa)
Exodus 20:14, Deuteronomy 20:10,
Proverbs 2:16:22, 6:23-35, 7, Ephesians 5:1-3.

Na Veivakadodonutaki ni Tama (The Correction of a Father).

Serving for the 18th June, 2008

Oni se bera ni bau dra, e na nomuni veisaqasaqa tiko kei na ivalavala ca. 05 Oni sa guilecava na veivunauci a vakayacori vei kemuni, me vaka a caka vei ira na lalai: “I luvequ, kakua ni sevaka na veivunauci mai Vua na TURAGA (Yahweh), Mo kakua ni yalolailai ni o sa vosataki mai vei Koya; 06 Baleta o koya e lomana na TURAGA (Yahweh) o koya qori e na vunauca, e na vakadodonutaka na luvena e marautaka o Koya. 07 O koya oya moni vosota kina na veivakadodonutaki, baleta na Kalou (Elohim) e na yavalati kemuni me vaka ni oni luvena; se evei beka na gone, e na sega ni vakadodonutaki koya o tamana? 08 Ia kevaka oni se bera ni bau vakadodonutaki vakadua, e na mataqali veivakadodonutaki era dau vuli kina na tamata, ia oni sa na wili moni vulagi ka sega ni luvena, 09 Kena ikuri, ke ra vakadodonutaki keda o ira na tamada vakavuravura oti eda qai vakarokorokotaki ira, e sega beka ni bibi cake meda talatalairawarawa Vua na Tamada vakayalo meda bula? 10 O ira era na vakadodonutaki keda vakalekaleka ga, ke ra raica ni vinaka vei keda, ia na Kalou (Elohim) e vakadodonutaki keda, me rawa ni da wasea kei Koya na Nona lagilagi. 11 E sega ni dua na veivakadodonutaki e na talei vei keda e na gauna e yaco kina, baleta ni mosimosi, ia e muri e na qai vuataka mai na vuata talei ni yalododonu vei ira era vuli mai kina.
- Iperiu 12:4-11




Also Read If Possible (Wilika Talega Ke Rawa)
Deuteronomy 8:5, 1 Samuel 2:12-36, Proverbs 3:11-12, 15:5,

Revelations 3:14-20.

Na iVakasala ni Tama (A Father’s Advice)

Serving for the 17th June, 2008

Vakarorogo, kemudou na luvequ, i na ivakavuvuli ni dua na tama; vakatudaliga mo dou rawata na yalomatua, 02 Baleta Au solia vei kemudou na i vakavuvuli momona, dou kuakua sara ni vakanadakuya na noqu ivakavuvuli. 03 E na gauna au se lailai kina e na vale nei tamaqu, au se malumalumu sara, na luve i tinaqu e dua bulu, 04 E a vakavulici au o koya, ni kaya, “Taura matua na noqu vosa, e na lomamu taucoko; ka talai rawarawa i na noqu ivakaro mo bula. 05 Rawata mada na vuku, rawata talega na yalomatua, kua ni vakanadakuya na noqu vosa, kua talega ni vakatanitaka. 06 Kakua ni vakanadakuya na vuku, baleta e na taqomaki iko, lomana, e na qai vakatawani iko, 07 Na vuku e ka bibi sara; e dodonu kina mo rawata mai na vuku. E dina ni na sau levu vei iko, rawata talega mai na yalomatua. 08 Vakacerecerei koya, e na qai vakcerecerei iko, mokoti koya e na qai vu ni nomu dokai. 09 E na daramaka vei iko na salusalu ni loloma, Ka solia vei iko na isalavakatui vakaturaga. 10 Rogoca na luvequ, ciqoma na noqu vosa, e na qai levu na yabaki ni nomu bula. 11 Au vakaraitaka tiko ga vei iko na sala ni vuku, Meu tuberi iko e na sala dodonu. 12 Ni o sa lako, na nomu ikalawa e na sega ni vakataotaki, Ia ni o cici, o na sega ni tacaqe.
- Vakaibalebale 4: 1-12



Also Read If Possible (Wilika Talega Ke Rawa)
Exodus 21:15, Levitcus 19:3, Proverbs 10: 1, 23:22-25, Ephesians 6: 1-3.

Vakarokorokotaka na Tamamu (Honor your Father)

Serving for the 16th June, 2008

Mo vakarokorokotaka na tamamu kei na tinamu, me rawa ni o bula balavu e na vanua e solia tiko vei iko na TURAGA (Yahweh) na nomu Kalou (Kalou).
- Lako Yani 20:12.

E na kauta mai na rarawa, ke kune ni lialia na luvemutagane, e sega talega na nona marau, na tamani gone sesewa.
- Vakaibalebale 17:21.

I luvequtagane, ke yalomatua na vuniyalomu, e na marau vakalevu na yaloqu, io na yaloqu; Na yaloqu mai loma sara, e na mamarau ni vosa na gusumu, e na veika dodonu.
- Vakaibalebale 23:15-16.


Vakarorogo i luvequ, mo rawa ni yalomatua, me qai dau tubera na vuniyalomu ena sala dodonu.
Vakaibalebale 23:19.


Laiva na vosa na Nona vosa me vakaitikotiko e lomamuni, ka me kune ni oni cecekia e na kilaka, e na ivakavuvuli kei na veituberi e na kemuni maliwa, e na laga same, e na sere ni lotu, kei na sere ni bula vakayalo; ka moni dau lagalaga sere ni vuabale na vuniyalomuni e na loloma ni Kalou (Elohim). 17 E na veika cava ga oni vakayacora, se oni tukuna se cakava, vakayacora kece e na yaca ni Turaga (Master) o Jisu (Yahshua), ka dau vakavinavinakataka e na vukuna, Vua na Kalou (Elohim) na Tamada. 18 ¶ Kemuni na yalewa vakawati, yalorawarawa vei ira na dui watimuni, baleta ni rakorako Vua na Turaga (Messiah). 19 Kemuni na tagane vakawati, lomani ira vinaka na dui watimuni, kakua ni yaloca vei ira. 20 Kemuni ragone, talairawa­rawa vei ira na nomuni itubutubu e na veika kece, baleta qori e talei Vua na TURAGA (Yahweh). 21 Kemuni na itubutubu, kakua ni vaka­cudrui ira na luvemuni, me ra kakau ni vakayalolailaitaki.
Kolosa 3:16-21.




Also Read If Possible (Wilika Talega Ke Rawa)
Exodus 21:15, Leviticus 19:3, Proverbs 10: 1, 23:22-25,

Ephesians 6: 1-3.

Na Tamada Vakalomalagi (Our Heavenly Father)

Serving for the 15th June, 2008

Baleta o kemuni kece oni luve ni Kalou (Yahweh) e na vuku ni nona vakabauti o Karisito Jisu (Messiah Yahshua). 27 O ira kece era sa papitaiso oti e na yaca i Karisito, era sa daramaki Karisito (Messiah) tu. 28 Sa sega kina na Jiu se na kai Aramaika, sa sega na bobula se tugalala, sa sega na tagane se na yalewa; baleta oni sa duavata kece vei Jisu Karisito (Yahshua Messiah). 29 Ia kevaka oni sa nei Karisito (Messiah), oni sa na wili talega moni kawa i Eparayama, ka vakaivotavota vaka itaukei, e na veiyalayalati.
- Kalatia 3:26-29

Ia qo au kaya, ni o koya e itaukei vakaivotavota, e na gauna kece e se gone lailai tiko kina, e na sega ni vakaduiduitaki maivei ira na dauniveiqaravi, e dina ga ni o koya na turaga vei ira kece. 02 Ia o koya e na tiko e rukudra na nona ivakavuvuli kei ira na dauniveiqaravi, me yacova na gauna sa lokuca tu o tamana. 03 E vakakina o keda, e na gauna eda se gone lalai kina, eda na tiko e na vei lewa ni vuravura oqo. 04 Ia ni sa yaco mai na gauna lokuci, na Kalou (Elohim) a qai tala mai na Luvenatagane, me sucu mai vua e dua na yalewa, me lewai e na ruku ni lawa, 05 me mai vueti ira era bula tu e na ruku ni lawa, me rawa ni da ciqoma na noda susugi vakaluvena. 06 Ia baleta ni oni luvena, na Kalou (Elohim) a qai tala mai na Yalo i Luvena-tagane i vuniyalomuni, me rawa ni oni kacivi Koya vakamenemene, “I Tamaqu!” 07 Me tekivu oqo, oni sa sega ni dauniveiqaravi baleta oni luvena, ia kevaka oni luvena, oni sa itaukei vakaivotavota vua na Kalou (Yahweh), e na vuku i Karisito (Messiah).
Kalatia 4:1-7

Raica mada na vakaitamera ni loloma e vakaraitaka vei keda o Tamada , baleta e vakatokai keda ni da luvena, ka buli i keda; qori qai sega kina ni kilai keda o vuravura, baleta ni a sega ga ni kilai Koya. 02 Kemuni na noqu daulomani, e na gauna oqo, o keda eda sa luve ni Kalou (Yahweh); ia e se bera ga ni vakatakilai mai na cava e na yaco vei keda; ia eda sa kila ga, ni gauna e na basika mai kina o Koya, o keda eda na veiucui kei Koya baleta eda na raici Koya, e na kena irairai dina ga o Koya.
I Joni 3:1-2



Read Also If Possible (Wilika Talega Ke Rawa)
Deuteronomy 32:6, Psalms 2, Isaiah 9:1-7, John 1:12-13,

Romans 8, Hebrews 12:1-14

Na Kalou e Yalododonu (Yahweh Elohim is Righteous)

Serving for the 13th June, 2008

Mata cake, TURAGA (Yahweh), e na leva, mata cake moni saqata na nodra leva na kequ meca, Yadra mai, noqu Kalou; vakatauca na nomuni lewa dodonu. 07 Laivi ira na tamata era soqo tiko, me ra toso vakavolivoliti kemuni. Liutaki ira mai na nomuni itikotiko cecere. 08 Laiva na TURAGA (Yahweh) me vakatulewa vei ira na tamata. Lewai au, TURAGA (Yahweh), e na noqu yalododonu, vata kei na noqu lomadina, kemuni oni cecere sara. 09 O kemuni na Kalou (Elohm) Yalododonu, o kemuni oni dau dikeva na vakasama kei na vuniyalo, tinia mada na nodra i valavala vakarerevaki na tamata ca ka vakataudeitaki ira era yalododonu. 10 E noqu ivakaruru na Kalou (Elohim) sa Cecere sara, o koya e dau vakabulai ira e dodonu na vuniyalodra, 11 na Kalou (Elohim) e dauniveilewai yalododonu, na Kalou (El) e dau vakaraitaka na nona leva e veiveisiga.
- Same 7:6-11

“E na yaco mai na siga” e tusanaka na TURAGA (Yahweh), “au na vakatubura kina vei Tevita e dua na Coke yalododonu, e dua na Tui, dau vakavulewa ena vuku, ka vakayacora na veika dodonu ka dina ena loma ni vanua. 06 E na dela ni nona gauna, o Jiuta e na vakabulai, o Isireli e na bula sautu. Oqo na yaca e na vakatokai kina: Na TURAGA (Yahweh), e NODA YALODODONU.
- Jeremaia 23:5-6

Kemuni na Luvequ lomani, au vola yani oqo vei kemuni, moni kua ni dau vakayacora na i valavala ca. Ia ke dua e mani vakayacora na i valavala ca, sa tiko e dua me vosa ena vukuda Vua na Kalou – oya o Jisu Karisito (Yahshua Messiah) na Yalododonu. 02 O koya na imadrali ni noda veivakaduavatataki, ena vuku ni noda ivalavala ca, ia e sega ni baleti keda ga, e baleta talega na ivalavala ca ni vuravura raraba.
- I Joni 2:1-2


Also Read If Possible (Wilika Talega Ke Rawa)
Ezra 9, Psalms 36:5-10, 71, Daniel 9:1-19, Matthew 6:28-33,

Acts 3:12-16

E Dua Ga Na Kalou (Yahweh Elohim Is One)

Serving for the 13th June, 2008

Rogoca Isireli: Na TURAGA (Yahweh) na noda Kalou (Elohim), na TURAGA (Yahweh) e dua ga.
-- Na iVakarua 6:4



Na TURAGA (Yahweh) e na tui e vuravura raraba. E na siga oya, e na dua ga na TURAGA (Yahweh), kei na yacana e na dua ga.
-- Sakaraia 14:9



O Koya beka e nodra Kalou (Elohim) ga na Jiu? E sega beka ni nodra talega o ira na kai Veimatanitu tani? Io, e nodra talega na kai Veimatanitu tani: 30 Ni da raica ni duabulu ga na Kalou (Elohim) o Koya e na vaka­donui ira era sa teve e na vuku ni vakabauta, ka vakadonui ira talega era se sega ni teve e na vukuni vakabauta.
-- Roma 3:29-30


E dina ga ni ra tu na veika era vakatokai me ra kalou (elohim), e vuravura se mai lomalagi, me vaka ga ni levu toka na kalou (elohim) vata kei na turaga (master), 06 ia vei keda, e dua ga na Kalou (Elohim), oya o Tamada, o Koya e vu mai Vua na veika kece, ka da bula kece tiko e na vukuna; ka dua ga na Turaga (Master) o Jisu Karisito (Yahshua Messiah), o Koya e ivakarawa ni veika kece, o Koya talega e ivakarawa ni noda bula.
-- I Korinica 8:5-6



Moni yaco moni dua ga na yago, ka dua na Yalo, me vaka ni oni a kacivi i na dua ga na inuinui; 05 ka ni dua ga na Turaga (Yahweh), dua ga na vakabauta, ka dua ga na papitaiso; 06 e dua ga na Kalou (Elohim), na Tamada kecekece, o Koya e cecere vei keda kece sara, e tiko maliwai keda kece sara, ka tiko e lomada kece sara.
-- Efeso 4:4-6



(Also Read If Possible (Wilika Talega Ke Rawa)
Isaiah 44:6-8, Malachi 2:10, Matthew 19:16-17, 23:1-10,
Mark 12:28-34.

Na Kalou e Kila na Veika Kecekece (Yahweh Elohim is Omnipotent)

(Dedicated to my sister, Rev Mrs Tepola Cavu in Melbourne, Victoria, Australia)

Serving for the 12th June, 2008

TURAGA (Yahweh), oni sa dikevi au, oni sa kilai au. 02 Oni kila na noqu dabe kei na noqu tucake, oni siqema na noqu vakasama ni oni se tu yawa mai. 03 Oni kila vinaka na noqu veitosoyaki kei na noqu davo sobu; oni sa kila deivaki tu na noqu ivalavala kece sara. 04 Ni sebera ni sere mai yamequ e dua na vosa oni sa na kila oti kece tu, TURAGA (Yahweh) 05 Oni sa vakalati au – mai dakuqu, mai mataqu talega oni qai tabaka na ligamuni vei au. 06 Na kilaka vakaoqori, sa ka ga meu qoroqoro tu kina, sa rui cecere vei au meu rawata.
- Same 139:1-6


Ie! na titobu kei na maucokona, ruarua ni vuku kei na yalomatua e kune vua na Kalou (Yahweh)! E sega ni vaqarai rawa na Nona lewa kei na Nona sala eda na sega ni kila rawa. 34 “O cei e bau kila na uto ni Nona vakasama na TURAGA (Yahweh)? Se o cei e sa bau yaco me Nona daunivakasala? 35 Se o cei e a soli ka sara ga e liu Vua, Ka na saumi lesu kece kina vua?” 36 Na veika kece e vu mai Vua, e rawa mai Vua ka na tini tale Vua, ka ni Nona na lagilagi e tawa mudu, Emeni.
- Roma 11:33-36

Baleta na vosa ni Kalou (Elohim), e ka bula ka kaukaua, e gagata cake mai na isele­iwau batirua, ia na titobu ni vanua e rawa ni suaka, e tiko sara e na tikina e tawase kina na bula mai na yalo, vata kei isema, na uto ni sui kei na sui, ka dau vakatakila na vakasama kei na inakinaki ni vuni­yaloda. 13 E sega ni dua na kabuli e na rawa ni vuni mai na Nona rai, baleta na ka kece e luvawale ka tadola tu me dikeva na Matana, o Koya e vinakati meda na lai saumi taro Vua.
- Iperiu 4:12-13

Also Read If Possible (Wilika Talega Ke Rawa)
Psalms 94:1-11, Proverbs 5:21, 2 Chroncles 16:9,

1 Corinthians 1:18-25, John 3:19-20.

Na Kalou e Tiko e Veivanua Kece (Yahweh Is Omnipresence)

Serving For the 11th June, 2008

Evei beka au rawa ni lako kina mai na Yalomuni? Evei beka au rawa ni dro kina mai vei kemuni? 08 Keu cabe cake i lomalagi, Oni tiko mai keya; keu tevuka na noqu idavodavo mai bulu, oni na tiko mai keya. 09 Keu vuka cake e na tabani mataka lailai, meu lai vakaitikotiko sara e na sauka ni wasawasa, 10 e keya mada ga na ligamuni e na lai tuberi au, kei na ligamuni imatau, e na lai tauri au matua. 11 Kevaka au kaya, “Na butobuto e na rawa ni vunitaki au, kei na rarama era yavolivoliti au tu, e rawa ni vuki me bogi,” ia na butobuto e sega ni butobuto vei kemuni na bogi ena ramase me vaka na siga, baleta na butobuto e tautauvata ga kei na rarama vei kemuni.
- Same 139: 7-12


“O Au beka e dua ga na Kalou (Elohim) tu voleka,” e tusanaka na TURAGA (Yahweh), “kau sega ni Kalou (Elohim) tu yawa?. 24 E rawa beka ni dua e vunitaki koya e na nona ivunivuni meu kakua ni raici koya?” e tusanaka na TURAGA (Yahweh). “Au sega beka ni tawani lomalagi kei vuravura? e tusanaka na TURAGA (Yahweh).
- Jeremaia 23:23-24


Sa qai torovi ratou o Jisu (Yahshua) qai kaya, “Na kaukaua kece sa soli oti vei Au mai lomalagi vata kei vuravura. 19 “Dou lako, dou lai cakava me ra tisaipeli, na veivanua kece sara, ni dou papitaisotaki ira e na yaca ni Tamada kei na Luvena kei na Yalo Tabu, 20 “ka vakatavulici ira me ra muria na veika kece Au sa vakarota oti vei kemudou; ia kila tiko, ni o Au, Au na tiko vata kei kemudou e na veivei­gauna kece, me yacova na ivaka­taotioti kei vuravura.” Emeni.
- Maciu 28:18-20


Also Read If Possible (Wilika Talega Ke Rawa)
Deuteronomy 4:7-12, 1 Kings 8:27, John 1:45-49,
John 14:16-17.

Na Kalou e Kaukaua (Yahweh is Mighty)

Serving for the 10th June, 2008

Sa qai sauma o Jope vua na TURAGA (Yahweh): “Au kila ni oni rawa ni cakava na ka kecekece; e sega ni dua na nomuni vakananavu, me na tarovi rawa.
- Jope 42:1-2

Kacivaka na kaukaua ni Kalou (Elohim), na nodra turaga levu na Isireli, na nona kaukaua e tu mai lomalagi. 35 Oni vakaitamera, kemuni na Kalou, e na loma ni nomuni Loqi Tabu, Na Kalou (El) i Isireli e dau solia na kaukaua kei na qaqa vei ira na nona tamata. Me vakacaucautaki ga na Kalou (Elohim)!
- Same 68:34-35


Kemuni na TURAGA Daulewa (Sovereign Yahweh), oni a bulia na lomalagi kei na vuravura e na nomuni kaukaua levu, vata kei na ligamuni ni veidodoyaki. E sega ni dua na ka, e dredre vei kemuni. 18 Oni vakaraitaka na loloma vei ira na udolu, ia oni kauta mai na itotogi ni nodra ivalavala ca na qase, me mai bikai ira na luvedra era muri ira mai. Kemuni na Kalou (El) levu ka kaukaua, o kemuni na TURAGA (Yahweh) Cecere, 19 e uasivi na nomuni vakanananu, ka vakaitamera na nomuni cakacaka. Na matamuni e tadola tiko i na nodra ivalavala kecega na tamata; oni dau saumi ira kece, ia me veiraurau ga kei na nodra dui ivalavala yadudua, ka veiganiti kei na nodra itovo.
- Jeremaia 32:17-19

“E kilikili dina ga, Kemuni na Turaga (Sovereign), na neimami Kalou (Elohim) Moni ciqoma na lagilagi, na vakarokoroko kei na kaukaua; Baleta Oni a bulia na veika kece, E na Nomuni lewa era tu kina, era a buli talega kina.
- Vakatakila 4:11





Also Read If Possible (Wilika Talega Ke Rawa)
Revelation 18:14, Exodus 15:1-18, Psalm 29, Mark 4:35-41

Na Kalou e Dauveivosoti (Yahweh Elohim is Loving and Forgiving)

Serving for the 9th June, 2008 (Pentecost)

Vei Kemuni Au laveta cake na mataqu, vei kemuni e tiko na nomuni idabedabe vakatui mai lomalagi. 02 Me vaka na mata ni bobula, ni dau rai i na liga ni nona turaga, kei na mata ni vada, ni dau rai i na liga ni nona marama, sa rai tiko vakakina na mata i keimami vua na TURAGA (Yahweh) na neimami Kalou (Elohim), me yacova ni vakaraitaka mai vei keimami na Nona loloma. 03 Ni lomani keimami, TURAGA (Yahweh), ni lomani keimami, baleta keimami sa vosota vakadede mai na neimami daubeci, 04 Keimami sa vosota tiko na nodra dauveivakalialiai na dokadoka, kei na nodra dauveibeci na viavialevu.
-Same 123: 1-4


E sa vakabulai kemuni talega o Koya, oya o kemuni oni sa mate oti, e na vuku ni ivalavala ca kei na talatalaidredre, 02 oni a dau muria tu eliu, moni vakamuria na sala ni vuravura oqo, kei na nona inakinaki na ravouvou levu ni kaukaua ni macawa lala, na yalo e dau vakayarayarataki ira tiko na luve ni dautalatalaidredre; 03 e na ivalavala a dau vakacacani keda mai na ivakatekivu, e na gagano ni leweniyago, qai rawa kina ni yaco na inakinaki ni leweniyago kei na vakasama; eda qai wili kina meda luve ni kawa cudruvi, me vakataki ira na kena vo. 04 Ia na Kalou (Elohim), o Koya e vutuniyau e na loloma, baleta na vakaitamera ni Nona loloma e dau lomani keda kina, 05 e na gauna mada ga eda mate tu kina e na noda ivalavala ca, a qai vakavuna meda bula tiko vata kei Karisito (Messiah); o Koya e nona na loloma eda vakabulai kina:
- Efeso 2:1-5



Also Read If Possible (Wilika Talega Ke Rawa)
Exodus 33:19, Deuteronomy 4:31, Nehemiah 9:29-31,

Micah 7:18-20, Romans 9:11-18

Na Kalou e Yalosavasava (Yahweh is Holy)

Serving for the 8th June, 2008

O Au na TURAGA (Yahweh, o Koya e a kauti kemuni laivi mai Ijipita, meu mai nomuni Kalou (Elohim); o koya oya moni Yalosavasava kina, baleta Au Yalosavasava.
-Vunau ni Soro 11:45


E na yabaki a mate kina o Tui Usaia, au a raica na Turaga (Yahweh) ni dabe toka e na i Dabedabe Vakatui, cecere ka levu, qai robota kece tu na Valenisoro na nona kote tiyara. 02 Era toka mai cake vua o ira na serafimi, era tauya ono na tabadra: E rua na tabadra era tabonaka kina na matadra, e rua tale era tabonaka kina na yavadra, kei na rua tale era vuka tu kina. 03 Era a qai veikacivi tiko, E savasava, e savasava, e savasava na TURAGA (Yahweh) na Kalou (Elohim) Cecere, na vuravura taucoko sa vakasinaiti tu e na Nona lagilagi”
- Aisea 6:1-3.

Oqo na veika e kaya o koya sa cecere ka levu, o koya e bula tawamudu, ka yacana o yalosavasava, “Au bula tiko ena vanua cecere ka tabu, ia au bula talega kei koya e yalo ramusu ka yalomalumalumu, meu vakabula tale kina na yalodra era lolovira ka vakabula talega na yalodra era bibivoro. 16 Au na sega ni veibeitaki tiko me tawamudu, kau na sega talega ni dau cudrucudru tu ga, baleta qori ena vakavuna me cegu oca na yalo ni tamata e mataqu – na i cegu ni tamata au a bulia.”
- Aisea 57:15-16.

Ia me vaka na gone talairawarawa, ni kakua tale ni vakamuria na gagadre ca a dau kune vei kemuni mai liu, e na gauna ni nomuni lecaika; 15 ia moni yalosavasava e na nomuni ivalavala kece, me vaka ni yalosavasava o Koya e kacivi kemuni, 16 Baleta sa volai tu, “Moni yalosavasava, me vaka ga Niu yalosavasava.”
- I Pita 1:14-16.



Also Read If Possible (Wilika Talega Ke Rawa)
Exodus 15:11, Leviticus 22:31-33, Psalms 99, Revelation 4, 15:2-4.

Na Kalou e Dau Yalovinaka (Yahweh is Longsuffering)

Serving For The 7th June, 2008

Na TURAGA (Yahweh) e dau yalovinaka ka yalododonu; Io na noda Kalou (Elohim) e sinai vua na yalololoma. 06 Na TURAGA (Yahweh) e dau taqomaki ira na yalorawarawa, Baleta e na gauna au a gadreva kina na veivuke, e a qai vakabulai au o Koya. 07 Mo vakacegu tale mada, i yaloqu, Baleta na TURAGA (Yahweh) sa bau vinaka sara ga vei iko.
Same 116:5-7


Ia na Vosa a qai yaco me yago, qai mai vakaitikotiko e na keda maliwa, (keitou qai raica na Nona lagilagi, na lagilagi e kune duadua ga Vua e vakatubura na Tamada, ka sinai tu Vua na loloma kei na dina.
- Joni 1:14


Mai na veika e sinai vutuvutu tu Vua, eda sa mai ciqociqo tiko kina na veika kece, na loloma e na dela ni loloma. 17 “Baleta na lawa a kauta mai o Mosese, ia na loloma kei na dina e a kauta mai o Jisu na Karisito (Yahshua the Messiah).
Joni 1:16-17


Moni yaco moni dua ga na yago, ka dua na Yalo, me vaka ni oni a kacivi i na dua ga na inuinui; 05 ka ni dua ga na Turaga (Yahweh), dua ga na vakabauta, ka dua ga na papitaiso; 06 e dua ga na Kalou (Elohim), na Tamada kecekece, o Koya e cecere vei keda kece sara, e tiko maliwai keda kece sara, ka tiko e lomada kece sara. 07 Ia vei keda kece sara, e sa soli vei keda na loloma, e vakarautaki vei keda e na iloloma nei Karisito (Messiah). 08 Qori a qai tukuna kina o Koya, “Ni cabe lesu cake o Koya, Me tauri lomalagi, Qai soli iloloma vinaka vei ira na tamata.” 09 Ia oqo ni sa, “cabe lesu o Koya”, na cava beka na kena ibalebale vakavo ke a siro taumada mai i na veivanua lolovira e vuravura?
- Efeso 2:4-9




Also Read If Possible (Wilika Talega Ke Rawa)
Numbers: 24-26, Proverbs 3:33-35, Romans 5:12-21

Na Kalou e Dau Veivosoti (Yahweh Is A Forgiving El)

Serving for the 6th June, 2008

O cei e Kalou (El) me tautauvata kei kemuni, o kemuni oni bokoca na ivalavala ca, ka vosota na nodra talaidredre o ira na vo ni Nomuni ivotavota? Oni sega ni dau cudru tu me tawamudu, ia oni dau marautaka moni vakaraitaka na nomuni yalololoma. 19 Oni na baci lomani keimami tale; oni na butuqaqia na neimami ivalavala ca ka kolo laivi na neimami ivalavala ca kece i na boto ni wasaliwa. 20 Oni na vakayacora na dina vei Jekope, ka vakaraitaka na yalololoma vei Eparayama, me vaka na nomuni bubului vei ira na neimami qase mai liu, e na veigauna makawa.
- Maika 7:18-20

O koya oqo na itukutuku vinaka keitou a rogoca mai Vua, keitou qai tusanaka yani vei kemuni, ni rarama na Kalou (Elohim), ka sega Vua na butobuto. 06 Kevaka eda kaya ni da duavata tiko kei Koya, eda qai bula tiko ga e na butobuto, ia eda lasulasu, eda sega ni muria tiko na dina. 07 Ia kevaka eda bula tiko e na rarama, ka ni tiko e na rarama o Koya, eda sa na duavata o keda yadudua, ia na dra i Jisu (Yahshua) na Luvenatagane o Koya, sa vakasavasavataki keda mai na noda ivalavala taucoko. 08 Kevaka eda kaya ni sega na noda ivalavala ca, eda vakaisini keda tikoga vakataki keda, baleta na dina e sega vei keda. 09 Kevaka eda vakatusa na noda ivala­vala ca, o Koya e yalodina ka yalododonu, ka na vosoti keda mai na noda ivalavala ca, ka vakasavasavataki keda mai na noda dukadukali kecekece. 10 Kevaka eda kaya ni da sega ni valavala ca, eda sa vakalasui Koya tiko, baleta na nona vosa e sega ni tiko vei keda.
- 1 Joni 1:5-10


Also Read If Possible (Wilika Talega Ke Rawa)
Numbers 14:1-35, 1 King 8:27-53, Psalms 32:1-5,

Daniel 9:1-19, Matthew 6:14-15, 18:21-35.

Na Kalou E Dau Veivakacegui (Yahweh of Rest)

Serving For The 5th June, 2008

Ni kakua ni tautauvata kei ira na tamamuni vata kei ira na tuakamuni, o ira era a sega ni yalodina Vua na TURAGA (Yahweh), na nodra Kalou (Elohim) na nodra qase, qai cakava kina me ra i vakaraitaki ni veika vakadomobula, me vaka oni sa raica e matamuni. 08 Kakua ni babamatua me vakataki ira na tamamuni; ia soli kemuni yani Vua na TURAGA (Yahweh). Lako mai i na nona Loqi tabu, ka ni sa vakatabuya oti tu me tawamudu. Qarava na TURAGA (Yahweh) na nomuni Kalou (Elohim), me rawa ni vukica laivi mai vei kemuni na nona leva bibi. Io, kevaka oni lesu Vua na TURAGA (Yahweh), era na qai vakarautaka na yalololoma vei ira na tacimuni kei ira na luvemuni, o ira era vakabobulataki ira tiko, era na qai lesu mai ki na vanua oqo; baleta na TURAGA (Yahweh) na nomuni Kalou (Elohim) e dauyalovinaka ka dauyalololoma. E na sega ni vukica tani na matana mai vei kemuni, kevaka oni lesu Vua.
2 Veigauna 30:7-9

Na TURAGA (Yahweh) e daulomasoli ka dauyalololoma, e berabera sara na nona vakacudrui, ia qai vuable e na loloma. 09 Na TURAGA (Yahweh) e vinaka vei keda kecekece, E dau kauwaitaka vakalevu na ka kece e a bulia.
- Same 145:8-9,

Me vakavinavinakataki na Kalou (Elohim), na Tama ni noda Turaga (Master) o Jisu Karisito (Yahshua Messiah), ka tama ni yalololoma ka Kalou ni tiko vinaka kece, 04 o koya e dau vakacegui keda e na noda veileqa kece, me rawa kina vei keda meda vakacegui ira era bikai tu e na dau ga leqa, e na veivakacegui sara ga e sa vakacegui keda tiko kina na Kalou (Elohim). 05 Baleta na vakararawataki nei Karisito (Messiah), e sa tiko vakayauyau vei keda, na noda vakamaravutaki e na kune vakalevu ga vei Karisito (Messiah).
- 2 Korinica 1:3-5




Also Read If Possible (Wilika Talega Ke Rawa)
Exodus 33, 19, Nehemiah: 16-19, Psalms 103,

Lamentation 3:19-23, Colossians 3:12-14

Na Kalou e Vosoti ira Era Veivutuni (Repentant Will Be Forgiven)

Serving For The 4th June 2008

E kaya vei Mosese na TURAGA (Yahweh), “Taya mai e rua tale na vatu raraba me vaka na kena eliu; Au na qai vola kina na vosa kece era a volai tu e na imatai ni vatu raraba e rua, o a voroka.
- Lako Yani 34:1

Sa mani taya e rua na vatu raraba me vaka ga na kena eliu o Mosese, oti sa qai cabe cake tale i na ulunivanua o Saineai, e na mataka lailai sara me vaka e vakarota vua na TURAGA (Yahweh), ka kauta tiko yani e ligana na vatu raraba e rua. 05 Sa qai sobu mai na TURAGA (Yahweh), qai mai duri tu vata kei koya, qai kaya vua ni yacana na TURAGA (Yahweh). 06 Sa qai toso e mata i Mosese qai kaya, “Na TURAGA (Yahweh), na TURAGA (Yahweh) na Kalou (El) dauyalololoma, daulomasoli, dauvosovosota vakadede, vuabale e na loloma kei na dina, 07 dauyalololoma vei ira na udolu, ka dauvosoti ira era daucakaca, dautalaidredre se dau ivalavala ca. Ia e na sega ga ni tarova na kedra itotogi, o ira e sa vakadinadinataki na nodra ivalavala ca; e dau totogitaki ira na itabagone kei ira na dui luvedra, e na vuku ni nodra ivalavala ca na tamadra, me yacova yani na ikatolu kei na ikava ni tabatamata. 08 Sa cuva sobu sara vakatotolo i na dela ni qele o Mosese, 09 me vakamamasu, “Kemuni na Turaga (Yahweh), kevaka au sa kunea na veivakadonui e matamuni” e kaya o koya, “ia vakadonuya mo ni mai lako vata kei keimami. E dina, ni oqo eso na tamata babamatua, ia ni bau vosota na neimami caka ca, kei na neimami ivalavala ca, ka tauri keimami me keimami nomuni. 10 E vosa sara na TURAGA (Yahweh), “Au sa na tauyavutaka e dua na veiyalayalati vata kei iko. Ena matadra kece na nomu tamata, au na vakayacora e so na cakacaka mana lelevu, e sebera vakadua ni bau caka ena dua na matanitu e vuravura raraba. O ira kece na tamata, o bula tiko e na kedra maliwa, era na raica na cecekia ni cakacaka Au, o Au na TURAGA (Yahweh), au na cakava e na vukumu.”
- Lako Yani 34: 4 -10



Also Read If Possible (Wilika talega Ke Rawa)
Same 86:15, 103:8, Joni 3: 16-21, I Joni 1:9

Na iTukutuku Kei Isireli me ka ni vuli (The History of Israel is for Learning)

Serving of the 3rd June, 2008

E dua tale na ka, kemuni na mataveitacini, au sega ni vinakata moni lecava tiko, ni o ira kece na noda qase era a toso tiko e na ruku ni o, me ra takosova na waitui; 02 era a papitaisotaki kece vei Mosese, e na o kei na waitui, 03 era a kania vata kece na kakana vakayalo, 04 era a gunuva vata kece na wai vakayalo. Era a gunu kece mai na Vatu vakayalo e a vakamuri i ira tiko, ia na vatu oqori na Karisito (Messiah). 05 Ia e levu ga vei ira e a sega ni taleitaki ira na Kalou (Elohim), qai vakavuna na nodra mate laivi tu yani mai na veikauloa. 06 Na veika oqori era a yaco me ka ni vuli vei keda, meda kakua ni garova na veika vakasisila me vakataki ira. 07 Meda kakua talega ni lotutaki matakau, me vaka era a cakava eso vei ira. Me vaka e volai tu; “Na tamata era a dabe me ra kana ka gunu, oti era qai tu me ra veivakalasai” 08 Meda kakua talega ni vakayacora na veidauci, me vaka era a cakava eso vei ira, qai yaco kina e na loma ga ni dua na siga, ni ruasagavulukatolu na udolu vei ira era a bale.
- I Korinica 10:1-8

Na veika kece oqo, a yaco vei ira me idusidusi, era qai volai vakaivola, me mai ka ni vuli vei ira e na donui ira na ivakataotioti ni gauna. 12 Laivi ira era nanuma ni ra sa tudei tu, me ra qaqa­rauni tiko, de ra qai bale. 13 E se bera ni dua na ka ni veivakatovolei me tarai kemuni, vakavo ga na kena sa yaco tiko vakawasoma vua na tamata; baleta na Kalou (Elohim) e yalodina, ka na sega ni vakatara o Koya, moni vaka­tovolei e na kena mataqali oni na sega ni vorata rawa; ia e na vakacokovatataka tiko mai o Koya, na ka ni veivakatovolei vata kei na sala oni na drovaka rawa kina, moni rawa kina ni colata vinaka.
1 Korinica 10: 11-13




Also Read If Possible (Wilika Talega Ke Rawa)
Exodus 14, 17:1-7, John 6, Hebrews 2:9-18,

James (Yakob) 1:12-15

Vakamamasu o Mosese (Moses’ Appeal)

Serving For The 2nd June, 2008

Ia a vakamasuta na TURAGA na nona Kalou o Mosese, “TURAGA (Yahweh)” e kaya o koya, “na cava me waqawaqa kina na nomuni rarawa cecekia vei ira na nomuni tamata, o ira Oni a kauti ira tani mai Ijipita ena liga kaukaua ka vakaitamera? 12 Na cava beka me soli kina vei ira na kai Ijipita me ra kaya, ‘E a kauti ira tani mai ke o koya ena inaki ca, me rawa ga ni lai vakamatei ira ena veiulunivanua, ka vakawabokotaki ira mai na dela i vuravura?’ Ni vakanadakuya na nomuni rarawa cecekia, vakamalumutaka ga, ka moni kakua ni cudruvi ira na nomuni tamata. 13 Nanumi ratou na nomu dau veiqaravi o Eparayama, o Aisake, vata kei Isireli, ni Oni a bubului vei iratou ena nomuni kaukaua vakataki kemuni ena nomuni a kaya, “Au na vakalewevuqataka na nomudou kawa mera vaka na iwiliwili ni kalokalo mai lomalagi, kau qai solia vei ira na nomudou kawa na vanua taucoko oqo au a yalataka vei ira, me ra taukena ka sega ni mudu.’” 14 Sa qai vakamalumu tale na TURAGA (Yahweh) ka mani sega ni vakayacora vei ira na nona tamata na veika a nakita me vakayacora vei ira. 15 Sa vuki sara o Mosese, ka siro sobu mai na ulunivanua, qai kauta voli mai ligana na vatu raraba ruarua ni veiyalayalati. Na vatu raraba e rua sa volavolai tu na yasana ruarua, e matana kei na dakuna. 16 Na vatu raraba e rua a bulia sara ga na TURAGA (Elohim), na veika e volai tu kina e vola sara ga na TURAGA (Elohim), me vaka sa ceuti tu e na vatu raraba.
- Lako Yani 32:11-16

A qai yaco ni sa toro volekata yani na keba o Mosese, sa qai raica yani na luveni bulumakau, kei na veimekemeketi: qai curumi koya e dua na leva vakaitamera, qai kolotaka mai ligana na vatu raraba ruarua i na buto ni ulunivanua. 20 Oti qai taura o koya na luveni bulumakau era a bulia, qai vakama e na bukawaqa, ka vakavurumemeataka, oti qai wakia e na wai, ka vagunuvi ira kina na Isireli.

Lako Yani 32:19-20




Also Read If Possible (Wilika talega Ke Rawa)
Genesis 15:1-5, 22:15-8, 26:2-4, Deuteronomy 9:16-21, Psalms 106:23.

Jonah 3; Acts 7:40-42.

Na Luve ni Bulumakau Koula (The Golden Calf).

Serving for the 1st June, 2008

Ia ni ra raica na tamata ni sa dede na nona lesu tale mai ulunivanua o Mosese, era a mani toro wavolivoliti Eroni, na tamata, era qai kaya vua, “Mai, bulia e dua na noda Kalou me mai liutaki keda. Na tamata qo o Mosese, o koya e a kauti keda tani mai Ijipita, eda sa sega ni kila se cava sa yaco vua”. 02 Sa kaya sara vei ira o Eroni, “Ni luvata tani na sau koula era dui dara tu e daligadra na watimuni, kei ira na luve­muni tagane, kei ira talega na luvemuni yalewa, qai yauta kece mai vei au. 03 Era sa mani luvata na sau koula mai na dui daligadra o ira na tamata, era qai kauta kece vei Eroni. 04 E taura sara o koya na ka era solia mai vua, qai bulia kina, e na nona iyaya ni cakacaka, e dua na matakau e na ibulibuli ni luve ni bulumakau. Era sa qai kaya, “I Isireli, oqo na nomuni kalou (elohim), o Koya e a kauti kemuni tani mai na vanua vaka Ijipita.” 05 Ia ni sa raica qori o Eroni, a tara qai e dua na icabocabo ni soro e na matani luve ni bulumakau, qai kacivaka vei ira, “Ni mataka sa na yaco kina e dua na solevu vua na TURAGA (Yahweh). 06 Era mani sou vakamataka e na siga tarava, ka vakacabo isoro kama, kei na imadrali ni veitokani. Oti oya era qai tiko sobu me ra kana ka gunu, ka ra tu cake me ra veimeketi. 07 E kaya sara vei Mosese na TURAGA (Yahweh), “Lako sobu, baleta o ira na nomu tamata, o ira o a kauti ira tani mai Ijipita, sa curumi ira na ivalavala vakasisila. 08 Sa totolo na nodra riba tani mai na ivakaro Au a vakarota vei ira: era sa bulia e dua na matakau e na ibulibuli ni luve ni bulumakau, era qai sokalou ka qarava, ka vakacabo isoro kina, ka ra kaya, “Oqo na nomuni kalou (elohim), I Isireli, o koya e a kauti kemuni mai Ijipita.” 09 “Au sa raici ira na tamata oqo,” e kaya tale na TURAGA (Yahweh) vei Mosese “era sa tamata babamatua dina. 10 Mo biuti Au duadua tiko mada, me waqawaqa mada vei ira na noqu rarawa, meu vakarusai ira. Oti au na qai buli iko cake mo dua na matanitu vakaitamera.
Lako Yani 32:1-10


Also Read If Possible (Wilika Talega Ke Rawa)
Deuteronomy 9:7-15, Nehemiah 9:16-19, Psalms 106:19-22,

Act 7:37-41