Na Solevu I Yahuwe (The Feast Of YHWH)

Thought: The Weekly Shabbat Is The First of YHWH’s Feasts

............................. 

Serving For Yom R’vi’i, Adar 6, 5772

MAI NA TORAA (FROM THE TORAH)

Vosa vei Moshe o Yahuwe (YHWH), qai kaya, 2 Vosa vei ira na Isire’yili, mo kaya vei ira, E na veika me baleta na veisolevu nei Yahuwe (YHWH), o iko mo kacivaka vei ira na gauna ni sosoqoni tabu, Oqo na noqu veisolevu. 3 E ono na siga moni cakava kina na nomuni cakacaka; ia na ikavitu ni siga e Siga ni vakacecegu, me yaco kina na cegu vakaidina; qo e siga vakatabui vei Yahuwe (YHWH); moni kakua ni cakava kina e duabulu na cakacaka e na loma ni siga oya; ka ni Siga ni vakacecegu vei Yahuwe (YHWH) e na nomuni itikotiko kece sara.

4 ¶ Oqo na veisolevu i Yahuwe (YHWH), oya na vei sosoqoni tabu, mo na dau kacivaka e na kedra dui gauna. 5 E na ikatinikava ni imatai ni vula ni dromu ni siga, na nona Lakosivia o Yahuwe (YHWH).  6 E na ikatinikalima ni siga ni vula vata oya, e na yaco kina na solevu ni madrai sega ni vakaleveni (matzah) vei Yahuwe (YHWH); e na loma ni vitu na siga, o kemuni, moni dau kania tiko kina na madrai e sega ni vakaleveni. 7 E na imatai ni siga, moni vakayacora kina e dua na isoqosoqo tabu; mo ni kakua ni cakava e dua na cakacaka e na siga oya. 8 Ia moni na cabora na isoro e cabo e na bukawaqa vei Yahuwe (YHWH) e na vitu na siga; na ikavitu ni siga e siga tabu ni sosoqoni; moni kakua ni cakava kina e dua na cakacaka. 9 Vosa o Yahuwe (YHWH) vei Moshe ni  kaya, 10 Vosa vei ira na luve i Yisira'yili, mo kaya vei ira, Ni oni sa yaco yani i na loma ni vanua au sa solia qo vei kemuni,  moni tamusuka na vuata mai keya, moni na qai kauta mai e dua na omera na isevu ni nomuni tatamusuki vua na kohena. 11  O koya me na qai yalovaka na omera  e na mata i Yahuwe (YHWH), me  ciqomi e vukumuni; na kohena me na yalovaka e na siga e tarava na imatai ni siga ni solevu. 12 O kemuni moni na cabora e na siga oni yalovaka kina na omera, e dua na luve ni sipitagane yabaki dua e sega na kena leqa vakayago, me isorokama vei Yahuwe (YHWH). 13 Na kena isoro laukana me rua na ikatini na efa na falawa matailalai waki kei na waiwai, e dua na isoro e cabo e na bukawaqa vei Yahuwe (YHWH) me ka boi kamica; na kena isoro gunuvi me waini, e dua na ikava na hini (se rua veimama na paidi). 14 O kemuni moni kakua ni kana madrai, se witi tavu, se sola drokadroka, me yacova mai na siga vata oya, me yacova mai na siga oni na  kauta mai kina na nomuni isolisoli vua na nomuni Kalou (Mighty One); qo me na dua na ilesilesi e tawamudu, vei ira na nomuni kawa tamata kecekece, e na loma ni nomuni itikotiko kece sara.

Na Lawa Ni Soro (Wayikra) 23:1-14

NA IVAQA NI BULA (FOOD FOR THE SOUL)

Na yamedra na yalododonu e vaka na siliva digitaki, ia na vuniyalona na  tamata ca e sinai tu e na yaloca.

Vosa Vakaibalebale (Mishlei) 10:20

LOMANI YAHUWE NA NOMU KALOU (LOVE YHWH YOUR MIGHTY ONE)

Oni cakava me keimami vakadrukai; o ira na keimami meca, era sa yauta na itoki ni ivalu mai vei keimami. 12(11) Oni sa volitaki keimami me vaka na sipi era sa wase tani tu me na laukana; ka ceburaki keimami e na kedra maliwa na veimatanitu. 13(12) Oni sa volitaki ira na nomuni tamata e na isau rawarawa, ka sega ni rawata e dua na tubu mai na nomuni volivolitaki. 14(13) Oni cakava me keimami rogorogo ca e na kedra maliwa na weka i keimami vakaitikotiko, me keimami vakalialiai, ka veiwalitaki vei ira era tiko wavolivoliti keimami: 15(14) Oni cakava me keimami beci e na kedra maliwa na veimatanitu,  me ra dau kurea na uludra e na vuku i keimami e na kedra maliwa na veimatanitu, 16(15) E na loma ni siga taucoko, na neimami rogorogo ca sa no ga e mata i keimami, na madua e mataqu sa luvuci au vakadua, 17(16) Baleta na domona o koya e beci au ka dau vosavakacacataki au; baleta talega na kequ meca e mai veisausaumi tiko vei au.

Same (Tehellim) 44:9-16

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
060 Blog No. 1520	February 29, 2012.
Reading	Hebrew Date
Tiko Mai Lekutu (B’midbar) 23-25	Adar 6, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

The Function Of The Kohen (Na itavi Ni Kohena)

Thought: YHWH Is Particular About How His Name Is Treated By His People

........................ 

Serving For Yom Shlishi, Adar 5, 5772

MAI NA TORAA (FROM THE TORA

VOSA o Yahuwe (YHWH) vei Moshe ni kaya. 2 Vosa vei Aharoni kei iratou na luvena, me ra dau qarauna vinaka na isoro tabu era dau vakatabuya mai vei au o ira na luve i Yisira'yili, me ra kakua kina ni vakarogocataka na yacaqu tabu, o au o Yahuwe (YHWH). 3 Kaya vei ira, Kevaka e dua vei ira na nodra kawa e na nomuni itabatamata kece sara e dukadukali tu e na gauna e lai cabora kina e dua na isoro tabu, era vakatabuya mai vei Yahuwe (YHWH) o ira na luve i Yisra'yili, na tamata oya e na muduki laivi mai mataqu; o au o  Yahuwe (YHWH).

4 Ke dua ga na tamata e na kawa i Aharoni, e tauvi vukavuka tu se turu tiko mai yagona na nanawaiwaia, o koya e tabu ni kania e dua na ka vakatabui, me yacova sara ni sa savasava tale. O koya e tara e dua na ka e sega ni savasava, baleta ni tara e dua na yagonimate, se dua na tagane e a kasabura na nona si, 5 Se o koya ga e tara e dua ga vei ira na manumanu dauqasi, e rawa ni vakavuna na nona sega ni savasava se tara e dua ga na tamata e rawa ni vakavuna na nona sega ni savasava, 6 O koya ga na tamata e tara e dua vei ira na ka oqori, sa na sega ni savasava me yacova na yakavi bogi, ka na tabu talega vua me kania e dua na ka vakatabui, vakavo ga ke vakasilima na yagona e na nona toni dromu e loma ni wai. 7 E na gauna sa dromu kina na matanisiga, o koya sa na qai savasava, sa na qai rawa kina ni kania na veika vakatabui, baleta qori era kena kakana ga. 8 Na veika era mate ga vakataki ira, se basuraka na manumanu kila, o koya e tabu ni kania de na vakadukadukalitaki kina; O au o Yahuwe (YHWH). 9 O koya oya me ra taqomaka kina na noqu ivakaro o ira na kohanimi de ra qai colata na kena ivalavala ca era qai mate kina, kevaka me ra vakadukari ira vakataki ira; o au o Yahuwe (YHWH), au dau vakasavasavataki ira.

Na Lawa Ni Soro (Wayikra) 22:1-20

NA IVAQA NI BULA (FOOD FOR THE SOUL)

O ira na vakasisila era na sega ni vueti rawa e na ilevu ni vosa, ia o koya e tarova tiko na tebenigusuna e vuku.

Vosa Vakaibalebale (Mishlei) 10:19

LOMANI YAHUWE NA NOMU KALOU (LOVE YHWH YOUR MIGHTY ONE)

ME baleta na iliuliu. Na kawa i Kora’aka. Na vucu ni veivakatavulici (Maskil). 2(1) Keimami sa rogoca e daliga i keimami, kemuni na Kalou (Mighty One); o ira na neimami qase era a vakamacalataka vei keimami na cakacaka oni a cakava, e na dela ni nodra veisiga, na gauna sa oti makawa. 3(2) Na nomuni a vakarusai ira na veimatanitu e na ligamuni, moni tauyavutaki ira na nomuni tamata; ni oni a vakamalumalumutaki ira na veimatanitu oni qai vakaukauataki ira na nomuni tamata 4(3) Baleta era a sega ni taukena na vanua e na nodra seleiwau, ka sega tale ga ni vueti ira rawa e na ligadra; ia na ligamuni imatau kei na gau ni ligamuni (arm) kei na rarama mai na kemuni iserau, (e a vueti ira) baleta ga ni ra talei vei kemuni. 5(4) O kemuni na noqu Tui, kemuni na Kalou (Mighty One): baleta oni a vakarota na vueti nei Ya’akove. 6(5) E na vukumuni keimami na cokai ira na keimami meca; e na yacamuni keimami na butuki ira sobu, o ira era cati keimami. 7(6) Baleta keimami sega ni vakanuinui e na neimami dakaititi, se na neimami iyaragi me vakabulai keimami. 8(7) Ia o kemuni oni sa vueti keimami mai vei ira era cati keimami, ka vakamaduataki ira na keimami meca. 9(8) Keimami na dau dokadokataka ga na neimami Kalou (Mighty One) e na loma ni siga taucoko me tawamudu.

Same (Tehellim) 44:1-8

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
059 Blog No. 1519	February 28, 2012.
Reading	Hebrew Date
Tiko Mai Lekutu (B’midbar) 21-22	Adar 5, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Mo Yalosavasava Vakataki Yahuwe (Be Qodesh Like YHWH)

Thought: YHWH Provides For The Needy and The Poor, Through His Devotees

.................. 

Serving For Yom Sheini, Adar 4, 5772

MAI NA TORAA (FROM THE TORA

Vosa tale o Yahuwe (YHWH) vei Moshe ni kaya, 2 Vosa vei ira kece na nodra isoqosoqo na luve i Yisira'yili, mo kaya vei ira, O kemuni moni dau yalosavasava; baleta o au o Yahuwe (YHWH) na nomuni Kalou (Mighty One) au yalosavasava. 3 O kemuni kece moni vakarokorokotaki tamamuni kei tinamuni, ka dau bula muria na noqu ivakaro; baleta o au o Yahuwe (YHWH), au nomuni Kalou (Mighty One). 4 Moni kakua ni vuki vei ira se bulia o kemuni vakataki kemuni na kalou (elohim) buli waicala; o au o Yahuwe (YHWH) au nomuni Kalou (Mighty One). 5 Kevaka moni vakacabora e dua na isoro ni tiko veisaututaki (peace offering) vei Yahuwe (YHWH), ia moni vakacabora ga na kena e na vakadonui. 6 Me na laukana e na siga vata ga e cabo kina, vata kei na siga tarava; ia na ka e vo tiko e na ikatolu ni siga, me na vakamai e na bukawaqa; ka me kakua  ni laukana. 7 Kevaka e mani laukana e na ikatolu ni siga, qori e vakasisila; qori e sega ni vakadonui. 8 Qori na vuna era na vakararataki kina e na nodra cala, o ira kece era kania, baleta ni ra vakawaletaka na veika e tabu vei Yahuwe (YHWH); na tamata oya e na muduki laivi maivei ira na nona tamata.

9 ¶ E na gauna oni sa tamusuka kina na vuata ni nomuni vanua, moni kakua ni  tamusuka me yaco sara e na tutu ni nomuni iteitei; ka moni kakua talega ni vakatomika (gleaning) na kena era lulutu mai na nomuni tatamusuki. 10 Moni kakua ni vakatomika na vo vo ni tatamusuki mai na nomuni loga ni veivaini, se soqona na vua ni olive era qeqera mai na nomuni vuniolive, oqori moni biuti ira tu ga vei ira era dravudravua kei ira na tavuki (proselyte); baleta o au o Yahuwe (YHWH) na nomuni Kalou (Mighty  One).

11 ¶ Moni kakua ni butako; moni kakua ni veiyalayalati vakailasu; ka moni kakua talega ni veilasutaki o kemuni vakataki kemuni. 12 Moni kakua ni bubului lasu e na yacaqu; moni vakadukadukalitaka kina na yaca ni nomuni Kalou (Mighty One); o au o Yahuwe (YHWH). 13 Moni kakua ni vakasaurarataka na wekamuni vakaitikotiko se kauti koya vakaukaua; na kedra isau o ira oni vakacakacakataki ira me kakua ni tiko vei iko e na bogi taucoko me yacova na mataka lailai. 14 Moni kakua ni rukaki koya e didivara, se biuta e dua na itatacaqe e na nona sala na mataboko, ia mo rerevaki koya ga na nomu Kalou (Mighty One); o au o Yahuwe (YHWH). 15 Mo kakua ni vakataulewa vakailasu ni oni veivakatulewataki; moni kakua ni tovaki koya e dravudravua, se tovaka na matadra o ira era rogo levu; e na yalododonu ga moni vakatulewa kina vei ira na wekamuni vakaitikotiko. 16 Moni kakua ni vakateteya na veivakacacani e kedra maliwa na nomu tamata, ia moni kakua talega ni duri vakawelewele tu ga, ke sa vovoleka ni vakaleqai na nona bula na wekamu vakaitikotiko; o au o Yahuwe (YHWH). 17 Kakua ni cata lo tiko na wekamu e vuniyalomu, ia mo dau vosataka vakadodonu na wekamu vakatikotiko, de o na qai tini valavala ca e na vukuna o koya. 18 Moni kakua ni sausaumi lesu se katona e dua na lomaca me baleti ira na luvedra o ira na nomu tamata, ia mo lomana ga na wekamu vakaitikotiko me vaka ni o lomani iko vakataki iko; O au o Yahuwe (YHWH).

Na Lawa Ni Soro (Wayikra) 20:1-20

NA IVAQA NI BULA (FOOD FOR THE SOUL)

Na tebenigusuna na vakasisila e sinai tu kina na veivakacalai; ia o koya e cavuta e dua na vosa ni veivakacacani e lialia.

Vosa Vakaibalebale (Mishlei) 10:18

LOMANI YAHUWE NA NOMU KALOU (LOVE YHWH YOUR MIGHTY ONE)

Vakalewai au noqu Kalou (Mighty One), veisausaumitaka na noqu ile vei ira na tamata era sega ni dau yalololoma; vueti au mai vua na tamata dau veidabui ka tawadodonu. 2 Baleta o kemuni na Kalou (Mighty One) ni noqu kaukaua; na cava oni lecavi au tiko kina? Na cava meu lai vakaloloku kina baleta na nodra veivakasaurarataki na meca? 3 Isa, vakauta wavoki na nomuni rarama kei na nomuni dina; laivi ira me ra vakacegui au, laivi ira me ra kauti au yani  i na nomuni ulunivanua tabu kei na nomuni vale. 4 Au na qai lako i na mata ni nona  icabocabo ni soro na Kalou (Mighty One), vua na Kalou (Mighty One) e dau cakava meu reki e na reki ni itabagone; io, e na hapi, au na vakamuduotaki kemuni, kemuni na Kalou (Mighty One) na noqu Kalou (Mighty One). 5 Na cava o yaloca tiko kina o iko na noqu bula (soul)? Na cava o nuiqawaqawa tiko kina e lomaqu? Vakanuinui ga vua na Kalou (Mighty One) yaloqu, baleta au na vakavinavinaka tiko vua, o koya na  iVakabula ni noqu dokai ka noqu Kalou (Mighty One).

Same (Tehellim) 43:1-5

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
058 Blog No. 1518	February 27, 2012.
Reading	Hebrew Date
Tiko Mai Lekutu (B’midbar) 18-20	Adar 4, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Na Lawa Ni Veiyacovi (Laws Of Sexual Relationship)

Thought: Sexual Relationship Defines Married Couples

 .......................

Serving For Yom Rishon, Adar 3, 5772

MAI NA TORAA (FROM THE TORA

VOSA o Yahuwe (YHWH) vei Moshe ni kaya vua, 2 Vosa vei ira na luve i Yisira'yili, mo kaya vei ira, O au o Yahuwe (YHWH) na nomuni Kalou (Mighty One). 3 Mo ni kakua ni vakayacora na veika a dau vakayacori mai na vanua o Ijipita, na vanua oni a dau vakaitikotiko tu kina, moni kakua talega ni vakayacora na veika a dau vakayacori e na vanua o Kena’ani na vanua au kauti kemuni tiko kina; moni kakua talega ni bula muria na nodra ilesilesi (ordinance). 4 Ia moni vakayacora ga na noqu lewa ka taqomaka na noqu ivakaro moni dau bula muria; o au o Yahuwe (YHWH) na nomuni Kalou (Mighty  One): 5 O koya oya moni taqomaka kina na ivakaro, kei na noqu lewa; baleta ke cakava oqori na tamata, o koya e na bula muria tiko; o au o Yahuwe (YHWH).

6 ¶ Me kakua ni dua vei kemuni e vosaka me veiyacovi vata kei na dua na yalewa e wekana voleka (vakalewe, vakadra); o au o Yahuwe (YHWH). 7 O iko mo kakua ni vakamadualaki tamamu, e na nomu vosaka na tinamu; o koya e tinamu, mo kakua ni veiyacovi vata kei koya. 8 Mo kakua ni vosaka mo veiyacovi kei na wati i tamamu; qori o na vakaluvawaletaki tamamu kina. 9 Mo kakua ni vosaka mo veiyacovi kei na ganemu, na luveyalewa i tamamu se luveyalewa i tinamu; veitalia ga se a vakatuburi koya o tamamu se dua tale na tagane. 10 Mo kakua ni vosaka mo veiyacovi kei na makubumu, na luveyalewa i luvemu tagane se na luveyalewa i luvemu yalewa, baleta o koya e wekamu voleka. 11 Mo kakua ni vosaka mo veiyacovi kei na luveyalewa i wati i tamamu, baleta ni a vakatuburi koya o tamamu, o koya e ganemu; mo kakua ni vakaluvawaletaki koya. 12 Mo kakua ni vosaka mo veiyacovi kei na ganei tamamu, o koya e weka i tamamu voleka 13 Mo kakua ni vosaka mo veiyacovi kei na taci i tinamu, baleta o koya e weka i tinamu voleka. 14 Mo kakua ni vakamaduataka na taci i tamamu; kakua ni vosaka mo veiyacovi kei watina, baleta o koya na nomu nei, mo kakua ni vakaluvawaletaki koya. 15 Mo kakua ni vosaka mo veiyacovi kei na vugomu yalewa; baleta o koya na wati i luvemu tagane; o iko mo kakua ni vakaluvawaletaki koya. 16 O iko mo kakua ni vosaka mo veiyacovi kei na wati i tacimu, qori e na vakaluvawaletaki (kina) o tacimu. 17 O iko mo kakua ni vosaka mo veiyacovi vata kei na dua na yalewa vata kei luvena yalewa; mo kakua talega ni veiyacovi vata kei luveyalewa i luvena tagane, se na luveyalewa i luvena yalewa mo veivakaluvawaletaki ira baleta o ira era veiwekani voleka; qori e ivalavala vakasisila. 18 O iko mo kakua ni taura me watimu na taci i watimu, baleta o na sota dredre, ni o vakaluvawaletaki koya, e na dela ni nona bula.

19 ¶ O iko mo kakua ni veiyacovi kei na dua na yalewa e na gauna ni nona matenivula, baleta e na sega tu kina ni savasava o koya. 20 Kena i kuri, o iko talega mo kakua ni veiyacovi kei na wati i wekamu vakaitikotiko; o na vakadukadukalitaki koya kina (ka sa na vakatabui o koya me lesu tale vei watina).

Na Lawa Ni Soro (Wayikra) 18:1-20

NA IVAQA NI BULA (FOOD FOR THE SOUL)

Na sala dina ni bula e kauta mai na lewa matau, ia o koya e cata na veivakadodonutaki e lialia.

Vosa Vakaibalebale (Mishlei) 10:17

LOMANI YAHUWE NA NOMU KALOU (LOVE YHWH YOUR MIGHTY ONE)

ME baleta na iliuliu. Na nodra vucu ni veivakatavulici (maskil) na kawa i Kora’aka 2(1) Me vaka na mekila ni guta me gunu wai mai na waidrodro, e vaka kina na noqu bula (soul) ni guti kemuni i Yahuwe (YHWH). 3(2) Na noqu bula (soul) e guti kemuni na Kalou bula (living Mighty One); e na gauna cava beka au na lako yani kina meu lai raica na matamuni? 4(3) Na wainimata sa kequ madrai tiko e na siga kei na bogi, e na gauna vata era tarogi au tiko kina, Evei na nomu Kalou (Mighty One)? 5(4) E na gauna au nanuma kina na veika oqo, na noqu bula e dau tiko yavavala; qori au dau curuma kina na nomuni valevatu (citadel) vakaitamera, e na domo ni reki kei na vakamuduo, vata kei ira na tamata e le vuqa era mamarau tiko. 6(5) Na cava beka o loma leqaleqa tiko kina, o iko noqu bula (soul)? Na cava beka o veilecayaki tiko kina? Vakabauti Yahuwe (YHWH); baleta au na vakamuduo vua, e ivakabula ni noqu dokai, ka noqu Kalou (Mighty One).

7(6) ¶ Na noqu bula (soul) e nuiqawaqawa tiko e lomaqu; o koya oya au na nanumi kemuni kina mai na qele mai na Yaradani, mai na ulunivanua o Heremoni, ka vakakina mai na delana o Misari. 8(7) Na titobu e kaciva tiko na titobu, e na vakadomobula ni rorogo bi ni nomuni baranisavu, na nomuni waidrodro voravora (surging rapids), kei na nomuni vei biau era sa tubu me ra lomoci au vakadua. 9(8) Ia o Yahuwe (YHWH) e na vakarota na nona yalololoma e na loma ni siga, e na bogi na nona sere e na tiko vata kei au, vata kei na noqu masu vua na Kalou bula (living Mighty One). 10(9) Au na kaya vei Yahuwe (YHWH), Na cava oni lecavi au tiko kina? Na cava meu vakaloloku tiko kina me baleta na itovo kaukaua era vakasaurarataka tiko vei au o ira na kequ meca? 11(10) Ni ra sa raramusumusu na noqu sui, o ira na kequ meca era vakasewasewani au; era qai kaya tiko vei au e veiveisiga, Evei na nomu Kalou (Mighty One)? 12(11) Na cava mo veituyaki kina, isa noqu bula (soul)? Na cava mo nuiqawaqawa kina? Vakanuinui ga vei Yahuwe (YHWH); baleta au vakamuduo tiko vua na ivakabula ni noqu dokai kei na noqu Kalou (Mighty One).

Same (Tehellim) 42:0(1)-12(11

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
057 Blog No. 1517	February 26, 2012.
Reading	Hebrew Date
Tiko Mai Lekutu (B’midbar) 16-17	Adar 3, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Ni Tauva na Yalewa Na Matenivula (Discharges From Women)

Thought: Always Respect Physical Weanesses In Our Relationship

........................ 

Serving For Shabbat, Adar 2, 5772

MAI NA TORAA (FROM THE TORA

Ke dua na tagane e bura na nona si (semen), o koya me na sili vakadua na yagona taucoko e na wai, ia e na sega tiko ga ni savasava me yacova na yakavi bogi. 17 Ke dua na isulu se leca e tauva na si, me na sava e na wai, ia e na sega tiko ga ni savasava me yacova na yakavi bogi. 18 Ke dua na yalewa e veiyacovi kei na dua na tagane, qai bura vua na nona si, o rau ruarua me rau na sili e na wai, ia rau na sega tiko ga ni savasava me yacova na yakavi bogi.

19 ¶ Kevaka e dua na yalewa e tuturu mai yagona na dra, ia e turu sara tiko ga mai na nona katonigone, o koya me na tu vakatikitiki me vitu na siga, ni yaco tiko na nona matenivula; o koya e tarai koya e na sega ni savasava me yacova na yakavi bogi. 20 Na ka kece e davoca o koya e na gauna e turuvidra tiko kina, sa na sega ni savasava; na ka kece talega e dabeca era sa na sega ni savasava. 21 O koya ga e tara na nona idavodavo me na savata na nona isulu ka vakasilimi koya vakataki koya e na  wai; ia e na sega tiko ga ni savasava me yacova na yakavi bogi. 22 O koya ga e tara e dua ga na ka a dabeca o koya, me na savata na nona isulu, ka vakasilimi koya vakataki koya e na wai, ia e na sega tiko ga ni savasava me yacova na yakavi bogi; 23 Kevaka e no koto e na nona idavodavo se dua ga na ka e a dabeca tiko, ni tara ga, o koya sa na sega ni savasava me yacova na yakavi bogi. 24 Kevaka e dua na tagane e davo vata kei koya, qai tauvi koya mai eso na dra ni nona matenivula, o koya me na sega tu ni savasava me vitu na siga; na idavodavo kece e davo kina o koya sa na sega ni savasava. 25 Kevaka e turuvi dra e dua na yalewa e na gauna e sega ni dodonu me yaco kina vua na nona matenivula, se turuvi dra tale tiko ni se qai oti ga na nona gauna ni matenivula, o koya e na sega ni savasava e na gauna kece e yaco tiko kina vua, me vaka ga na  gauna e dau yaco kina vua na nona matenivula.

Na Lawa Ni Soro (Wayikra) 15:16-25

NA IVAQA NI BULA (FOOD FOR THE SOUL)

Na nodra iyau na tamata vutuniyau e nodra koro kaukaua; ia na nodra vakacacani na malumalumu oya na nodra dravudravua. 16 ¶ Na nona cakacaka na yalododonu e kauta mai na bula; ia na nodra tatamusuki na vakasisila e kauta mai na ivalavala ca.

Vosa Vakaibalebale (Mishlei) 10:15-16

LOMANI YAHUWE NA NOMU KALOU (LOVE YHWH YOUR MIGHTY ONE)

E na vukuna na iliuliu. E dua na Same i Davide. 2(1) E kalougata o koya e dau qaravi ira na dravudravua; I Yahuwe (YHWH) vueti koya e na gauna ni leqaleqa. 3(2) O Yahuwe (YHWH) e na taqomaki koya me vakabulai koya tiko, e na qai vakalougatataki koya e vuravura; e na sega ni soli i koya vei ira na kena meca. 4(3) O Yahuwe (YHWH) e na vakaukauataki koya e na nona idavodavo ni tauvimate. 5(4) Au sa tukuna oti, Kemuni na noqu Kalou (Mighty One), ni yalololoma mai vei au ka vueta na noqu bula (soul); baleta au a cakaca dina vei kemuni. 6(5) Na kequ meca e vakaucaca tiko me baleti au; e na gauna cava e na mate kina o koya, me tababokoci laivi na yacana? 7(6) Ni ra mai sikovi au, era mai kaya ga na ka lasutaki; e vuniyalodra era navuca ga na ca, era qai lako yani i gaunisala levu me ra lai kakasetaki au. 8(7) O ira kece era cati au, era qai vakasolokakana vata me baleti au, me ra sa nakicataki au. 9(8) Era vakavurea na veibeitaki lasutaki me baleti au, era qai kaya, Qo ni sa koto no e na nona loga ni tauvimate, o koya e sa na sega tale ni matacake. 10(9) Io, na tamata mada ga e mai sikovi au, o koya e noqu icaba au dau nuitaka, o koya e dau kania na kequ madrai, o koya au nuitaka, sa liumuritaki au. 11(10) Ia o kemuni i Yahuwe (YHWH), ni lomani au ka vakabulai au, meu rawa ni na lai sausaumi lesu vei ira. 12(11) E na ka oqo au na kila kina ni oni taleitaki au, baleta na kequ meca sa na oti na nona vakacudrui au.  13(12) Ia o au vakataki au, ni vakataudeitaki au e na noqu itovo dodonu; vakatikori au e matamuni me tawamudu. 14(13) Me vakavinavinakataki ga o Yahuwe (YHWH) na Kalou (Mighty One) i Yisira’yili, me tawamudu ka sega ni mudu, Omaini ka Omaini.

Same (Tehellim) 41:0(1)-14(13)

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
056 Blog No. 1516	February 25, 2012.
Reading	Hebrew Date
Tiko Mai Lekutu (B’midbar) 14-15	Adar 2, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Na Nanawaiwaia Mai Na Tagane (Discharges from A Male )

Thought: Cleanliness Is The Important Key To Clean Living

 .......................

Serving For Yom HaShishi, Adar 1, 5772

MAI NA TORAA (FROM THE TORA

VOSA o Yahuwe (YHWH) vei Moshe kei Aharoni qai kaya, 2 Vosa vei ira na Luve i Yisira'yili, drau tukuna vei ira, Ke dua na tagane e kasabura tiko mai na nona iyaya vakatagane na nanawaiwaia (discharge); na nanawaiwaia e kasabura tiko mai vua e sega ni savasava. 3 O koya e na wili me sega ni savasava, ke sa drodro tiko ga mai vua na nanawaiwaia; se, kevaka e sa cevata me tao tiko e na nona iyaya vakatagane eso na nanawaiwaia e kasabura tiko mai yagona, qo e vu ni nona sega ni savasava. 4 Na idavodavo kece a mocera o koya, e kasabura tiko mai vua na nanawaiwaia, e sega ni savasava ka vaka kina na idabedabe kece sa dabeca oti mai o koya. 5 Na tamata e tara na nona idavodavo me na savata na nona isulu, ka lai vakasilimi koya vakataki koya e na wai, ia e na sega ni savasava tiko ga o koya me yacova na yakavi bogi. 6 O koya e dabeca e dua ga na ka a dabeca o koya e kasabura tiko mai vua na nanawaiwaia (discharge),  me na savata na nona isulu, ka vakasilimi koya vakataki koya e na wai, ia e na sega tiko ga ni savasava me yacova na yakavi bogi. 7 O koya e tara na yagona o koya e kasabura tiko mai vua na nanawaiwaia, me na savata na nona isulu, ka vakasilimi koya vakataki koya e na wai ia me na sega tiko ga ni savasava me yacova na yakavi bogi. 8 Kevaka e kasivita e dua na tamata  savasava, o koya e kasabura tiko mai vua na nanawaiwaia, o koya oqori me na savata na nona isulu, qai vakasilimi koya vakataki koya e na wai, ia e na sega ni savasava tale me yacova na yakavi bogi. 9 Na cava ga e vodo kina o koya e bura tiko mai vua na nanawaiwaia sa na sega ni savasava.10 O koya ga e tara e dua na ka e tiko e rukuna o koya, sa na sega ni savasava me yacova na yakavi bogi; kei koya e  colata e dua ga vei ira na ka oqori, me na savata na nona isulu, ka vakasilimi koya vakataki koya e na wai, ia e na sega tiko mada ni savasava me yacova na yakavi bogi. 11 O cei ga e tara i koya e kasabura tiko mai vua na nanawaiwaia, ia e se bera ni savuya na ligana e na wai; o koya me na savata na nona isulu, ka vakasilimi koya vakataki koya  e na wai, ia e na sega tiko mada ni savasava me yacova na yakavi bogi. 12 Na iyaya qele e tara o koya e kasabura tiko mai vua na nanawaiwaia me na vorolaki; ia na iyaya kau se barasa me ra na karilaki e loma ni wai. 13 Ia ni sa mamaca na nanawaiwai mai vua na tamata e kasabura tiko maivua, o koya me na qai wilika e vitu na siga me vakasavasavataki tiko kina, me savata na nona isulu qai vakasilima na yagona e na wai drodro, sa na qai savasava. 14 Ia e na ikawalu ni siga me na qai kauta mai e rua na soqe, se rua na ruve gone, me kauta i mata i Yahuwe (YHWH), i na katuba ni valelaca ni veitavaki, me qai solia vua na kohena, 15 Na kohena me na qai cabori rau ruarua, e dua me isoro ni ivalavala ca, ia na kena kadua me isorokama; oti, na kohena me qai cabora e dua na bulubulu e na vukuna, e na mata i Yahuwe (YHWH), e na vukuni nona nanawaiwaia.

Na Lawa Ni Soro (Wayikra) 15:1-15

NA IVAQA NI BULA (FOOD FOR THE SOUL)

E na tebenigusudra na yalomatua e kune kina na vuku; ia na kau sa vakarautaki tu me tau i dakuna o koya e lialia.14 ¶ Na tamata vuku e na vunitaka matua na kilaka; ia na vosa na gusu wacece, na rusa ga e voleka sara.

Vosa Vakaibalebale (Mishlei) 10:13-14

LOMANI YAHUWE NA NOMU KALOU (LOVE YHWH YOUR MIGHTY ONE)

Kakua ni bureitaka na nomuni yalovinaka tau malumu mai vei au i Yahuwe (YHWH); laiva na nomuni yalovinaka tau malumu kei na nomuni dina me maroroi tikotikoga. 13(12) Baleta na ca e sega ni wili rawa era sa vakavolivoliti au; na noqu ivalavala ca sa toboki au, qori au sa sega ni raicake rawa kina; era sa levu cake mai na drauniulu e uluqu, na utoqu sa sega ni tabei au rawa. 14(13) Ni yalovinaka i Yahuwe (YHWH) ni vueti au; i Yahuwe (YHWH) ni vukei au tiko e veiveigauna. 15(14) Laivi ira me ra madua ka veilecayaki, o ira era vaqara na noqu bula (soul) me ra vakarusa; laiva me ra biligi vakasukasuka ka sotava na leqa o ira era gadreva meu sotava na ca. 16(15) Laiva me ra vakadrukai baleta na nodra itovo tawadodonu, o ira era kaya vei au, A tu, a tu! 17(16) Laivi ira kece era vaqarai kemuni, me ra reki ka mamarau e na vukumuni; laivi ira era taleitaka na nomuni veivueti me ra dau kaya vakawasoma, Me  vakacerecerei tikoga o Yahuwe (YHWH). 18(17) Ia o au, au dravudravua ka luveniyali (needy); i Yahuwe (YHWH) era sa bukiveretaki au tiko, vukei au ka vueti au; kakua tale ni vakaberabera, isa noqu Kalou (Mighty One).

Same (Tehellim) 40:12(11)-18(17)

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
055 Blog No. 1515	February 24, 2012.
Reading	Hebrew Date
Tiko Mai Lekutu (B’midbar) 11-13	Adar 1, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.

Na Vukavuka Ni Veivale (Leprosy In Houses)

Thought: You Must Remove Sins When Small, Before It Gets Worse

 ......................

Serving For Yom Chamishi, Sh’vat 30, 5772 (Last Day)

MAI NA TORAA (FROM THE TORA

Vosa o Yahuwe (YHWH) vei Moshe kei Aharoni, qai kaya, 34 Vosa vei ira na luve i Isra'yili mo drau kaya vei ira, Ni oni sa yaco i na vanua o Kena'ani, au sa solia vei kemuni moni taukena, ia au qai biuta na mate na vukavuka e na loma ni vale, e na loma ni vanua oni lai taukena, 35 Na itaukei ni vale me na lako mai vua na kohena, me qai mai kaya, E vaka vei au ni tiko e loma ni vale, na mate na vukavuka. 36 Na kohena me na qai vakarota me vakalalai mada na vale, ni se bera ni lai curuma me vakadikeva na mate e dua na kohena, qori me kakua kina ni wili na ka kece era tu e loma ni vale ni ra sega ni savasava; oti qori, na kohena me sa na qai lai curuma na vale. 37 O koya me na lai vakadikeva na mate; kevaka sa tauva tu na lalaga ni vale, na mate, ka ni sa vakavarina roka drokadroka se damudamu, qai kena  rairai ni rairai titobu sobu e loma ni lalaga. 38 Na kohena me na qai curu i tuba, oti me qai vakadikeva tiko na vale ni duri tu ga mai na kena katuba me siga vitu. 39 Na kohena me na lesu tale mai e na ikavitu ni siga, me mai dikeva se sa teteva na lalaga ni vale na mate; 40 Oti me qai vakarota na kohena me ra kau laivi na veivatu e tiko kina na  mate na vukavuka, me ra lai biu laivi sara e na dua na vanua dukadukali e na  taudaku ni korolevu. 41 Oti me ra qai karia na lalaga ni vale e loma ka wavolivolita, oti me ra qai lai kolo laivi na duka era karia laivi, e na taudaku ni korolevu, e na dua na tikina dukadukali. 42 Oti me ra qai kauta mai na veivatu tale eso, me ra mai sosomitaka na veivatu oya; oti me ra ulia tale na mota vou me ra vakabita e na vale. 43 Ia kevaka e se tete ga na mate, qai  kune votu tale e loma ni vale, ni ra kau laivi ka sosomitaki oti na veivatu, sa kari ka sa kabi vou na kena mota; 44 Na kohena me na lesu tale i loma, me lai dikeva; kevaka sa tete tale tu e loma ni vale na mate; qori na vukavuka bula (malignant) sa tiko e loma ni vale, qori e sega ni savasava. 45 O ira me ra basuka vakadua na vale; na kena vatu, na kena kauvaro, kei na mota kece ni vale; me ra na yauta  vakadua i na taudaku ni tauni, i na dua na tikina dukadukali me ra lai vakamai ira kina e na bulawaqa.

Na Lawa Ni Soro (Wayikra) 14:33-45

NA IVAQA NI BULA (FOOD FOR THE SOUL)

Na gusuna na tamata yalododonu e ivurevure ni bula; ia na gusuna na ca e kovuta tu na ivalavala ca. 12 ¶ Na veisevaki e vakatubura na veileti; na madua e na ubi i ira kece era valacala ca.

Vosa Vakaibalebale (Mishlei) 10:11-12

LOMANI YAHUWE NA NOMU KALOU (LOVE YHWH YOUR MIGHTY ONE)

E na vukuna na iliuliu, E dua na Same i Dawide. 2(1) Au vosota niu waraki Yahuwe (YHWH) tiko; qai vuki maivei au o koya ka rogoca na noqu kerekere. 3(2) A vueti au cake talega mai na ikeli vakadomobula, mai na veidabibi ni rusa, qai vakaduria na yavaqu e na dela ni uluvatu, me vakataudeitaka na noqu ilakolako. 4(3) E a biuta o koya e dua na serevou e gusuqu, na vakavinavinaka vua na noda Kalou (Mighty One), me le levu era raica era qai marautaka ka vakabauti Yahuwe (YHWH). 5(4) E kalougata na tamata e tiko na nona vakanuinui e na yaca i Yahuwe (YHWH), ka sega ni saumaki lesu i na qaciqacia; se na veitalanoataki ni veika lasulasu. 6(5) E levu na cakacaka oni sa vakayacora vei keimami i Yahuwe (YHWH) na neimami Kalou (Mighty One) kei na nomuni veikaroni talei vei keimami; au  tusanaka ni sa rui levu sara vakaoti me wiliki rawa, e sega ni dua e tautauvata kei kemuni. 7(6) ¶ Na isoro kei na imadrali oni sega ni vinakata; ia o au vakataki au, qo au sa qai yalomatuataka; na isoro kama kei na imadrali ni valavala ca oni sega ni vinakata. 8(7) Oti au qai kaya, Raica, au lako mai; e na ivakatekivu ni ivola, e volai tu me baleti au, 9(8) E ka ni marau meu vakayacora na nomuni inaki o kemuni na noqu Kalou (Mighty One); io, na nomuni lawa sa tiko e vuniyaloqu:10(9) Au vunautaka tiko na nomuni yalododonu vei ira na isoqosoqo levu; au a sega ni tarova na tebenigusuqu i Yahuwe (YHWH) oni kila. 11(10) Au sega ni vunitaka na nomuni yalododonu e vuniyaloqu; au tusanaka na nomuni yalodina kei na nomuni veivakabulai; Au sega ni tabonaka na nomuni yalololoma kei na nomuni dina mai vei ira na isoqosoqo levu.

Same (Tehellim) 40:1(0)-11(10)

Read The Tanakh in a Year (Wilika Na iVola Tabu E Na Dua na Yabaki).
Siga (Day)/Blog	Tikinisiga (Date)
054 Blog No. 1514	February 23, 2012.
Reading	Hebrew Date
Tiko Mai Lekutu (B’midbar) 8-10	Sh’vat 30, 5772
Click The Bible Text To Read It In Gateway In Another Language Or Version

YHWH bless you and keep you; 25 YHWH make his face shine upon you and give you life; 26 YHWH lift up his countenance upon you and give you peace. B’midbar 6:24-26 May the Name of Yahweh, Mighty One of Avraham, Yitz'chak and Ya'akov be freely published in the world today, so people can know him and find blessings.