O SAMUELA NA PAROFITA KEI NA TURAGANILEWA (Samuel the Prophet and Judge)

Serving For the 31st July, 2008

E rau tagane itovo ca vakaoti o rau na luve i Ilai; au sega ni wilika me dua na ka na TURAGA (Yahweh).
I Samuela 2: 12

Ia o Samuela a veiqaravi sara tiko ga e na mata ni TURAGA (Yahweh) – e dua na gone lailai dau dara tu na efoti lineni. 19 O tinana talega e dau cula vua e dua na nona kote lailai, qai dau kauta vua, e na gauna rau dau lako vata kina kei watina me lai vakacabora na isoro vakayabaki. 20 O Ilai a qai vosa vakalougatataki Elikana kei watina ni kaya, “Me solia vei iko, na TURAGA (Yahweh), mo va kawa mai vua na yalewa oqo, me sosomitaki koya e a masulaka, me isau ni dinau e a solia o koya vua na TURAGA (Yahweh). Oti rau qai dau lako i nodrau vale. 21 Na TURAGA (Yahweh) a qai yalovinaka vei Ana; a mani kunekune o koya ka vakasucuma e tolu na luvena tagane kei na rua na luvena yalewa. Ia na gonetagane o Samuela e a tubu cake e na mata ni TURAGA (Yahweh).
1 Samuela 2: 18-21

Na TURAGA (Yahweh) a tiko vata voli kei Samuela e na gauna e tubu cake tiko kina, qai sega vakadua ni laiva e dua na nona vosa me lutu i na qele. 20 E a kilai levu, e na vanua kece o Isireli, mai Tani vakadua i Biasiba, ni o Samuela a sa vakadeitaki ni nona parofita na TURAGA (Yahweh). 21 Na TURAGA (Yahweh) a dau rairai vei Samuela mai Sailo, ka dau vakatakilai vua na vosa ni TURAGA (Yahweh).
1 Samuela 3:19-21

O Samuela e a dau lewai ira na Isireli, e na veisiga kece ni nona bula. 16 Mai na dua na yabaki ki na dua tale na yabaki, a dau veisiko wavoki kina o koya, me tekivu mai Peceli kauta cake i Kilikali vata kei Misipa, me vakatulewa kina vei ira na Isireli e na veivanua oqori. 17 Oti qai dau lesu tale i Rama, ni tiko mai keya na nona vale, ka dau vakatulewa tale ga vei ira na Isireli mai keya o koya. E a tara tale ga mai keya e dua na icabocabo ni isoro vua na TURAGA (Yahweh).
1 Samuela 7:15-17





Also Read If Possible (Wilika Talega Ke Rawa)
Genesis 4: 25-26; Deuteronomy 18:15-19; Joshua 21:45;

Luke 1:13-17

O SAMUELA: NA ULUMATUA NEI ANA (Samuel: Hannah’s First Born)

Serving for the 30th July, 2008

E na mataka caca ni siga ka tarava, eratou a sou vakamataka, eratou lotu mada vua na TURAGA (Yahweh), ratou sa qai lesu, eratou qai yaco yani i nodratou vale mai Rama. Rau a qai veiyacovi o Elikana vata kei Ana na watina, a qai nanumi koya na TURAGA (Yahweh). 20 Oti a qai yaco, ni sa yaco mai na kena gauna, mai na gauna a kunekune kina o Ana, ni a vakasucuma e dua na gone tagane, qai vakatoka me yacana o Samuela, “Baleta” a kaya o koya, “ Au a kerei koya mai vua na TURAGA (Yahweh).” 21 Ia ni sa lako cake na tamata o Elikana vata kei ira na lewe ni nona matavuvale, me lai vakacabora na isoro vakayabaki vua na TURAGA (Yahweh) oti me qai vakayacora na nona yalayala, 22 ia a qai sega ni lako o Ana. “Baleta” a kaya vua na watina o koya, “Au na sega ni lako cake me yacova niu sa kalia na gonetagane, oti au na qai kauti koya yani me basika e na mata ni TURAGA (Yahweh), oti me qai vakaitikotiko mai keya vakadua.
1 Samuela 1: 19-22

Ia niu sa kali i koya oti o koya, sa qai kauti koya cake, ka kauta tiko yani e dua na bulumakau yabaki tolu, e dua na efa na falawa, kei na dua na tavayaleca na waini, qai kauti koya sara i na vale ni TURAGA (Yahweh) mai Sailo. 25 Era sa qai vakamatea e dua na bulumakau, ka kauta na gonetagane vei Ilai. 26 Sa qai kaya o koya, “Isa noqu Turaga (Master), me vaka ni o bula tiko noqu turaga, o au na yalewa au a duri tu e yasamu e na gauna au a masu tiko kina vua na TURAGA (Yahweh). 27 Au a kerea kina na gonetagane oqo; a qai vakadonuya vei au na TURAGA (Yahweh), ka solia mai kina vei au na ka au a kerea Vua. 28 Ia qo au sa soli i koya vua na TURAGA Yahweh); e na dede ga ni nona bula e sa soli tu o koya Vua na TURAGA (Yahweh).” E a qai dau sokalou Vua na TURAGA (Yahweh) e keya, o koya.
I Samuela 1: 24-28

Also Read If Possible (Wilika Talega Ke Rawa)
Genesis 8:1; 19:29; 30:22; Exodus 2:24; Luke 1:23-45;

Acts 10: 25-31; Revelation 16: 19; 18:5.

MASULAKA ME DUA NA LUVENA TAGANE O ANA (Hannah Prayed For a Son)

Serving for the 29th July, 2008

E a bula tiko e dua na turaga mai Ramaceimi, e dua na Sufaiti mai na vei delana mai Ifereimi, na yacana o Elikana na luve i Jiroame, na luve i Ilaihua, na luve i Tohu, na luve i Sufi, e dua na kai Ifereimi. 02 E rua tiko na watina; e dua e yacana o Ana, kei na kena ikarua e yacana o Penina. O Penina e vakaluveni ia o Ana a sega na luvena. 03 E na veiyabaki taucoko, e dau biuta kina na nona koro na tamata oqo, me lai sokalou ka vakacaboisoro vua na TURAGA Cecere (Yahweh of Host) e Sailo, na vanua rau bete levu tiko kina ni TURAGA (Yahweh) o rau o Ofinai kei Finiase, o rau na luvei Ilai. 04 Ni sa yaco mai na siga me vakacabo isoro kina o Elikana, e dau solia vei Penina na watina, vata kei ira kece na luvenatagane kei na luvenayalewa me ra vakaivotavota. 05 Ia vei Ana, e dau solia o koya, na ivotavota levu cake baleta ni lomani koya vakalevu cake; Ia na TURAGA (Yahweh) a sogota tu na nona katonigone. 06 O ira era kena meca, era dau vakalialiai koya vakalevu sara, me ra rawa ni vakararawataki koya, baleta na TURAGA (Yahweh) sa sogota tu na nona katonigone.
I Samuela 1: 1-6

E na mosimosi ni rarawa ni yalona, sa dau tagi ka masumasu tu ga kina vua na TURAGA (Yahweh) o koya. 11 A qai bubuluitaka e dua na vosa ni bubului o koya ni kaya, “Kemuni na TURAGA Cecere (Yahweh of hosts), kevaka moni raica na rarawa ni nomuni vada, moni nanumi au, moni kakua ni guilecava na nomuni vada, ka moni solia vua na nomuni vada me dua na luvena tagane, au na soli i koya vua na TURAGA (Yahweh) e na veisiga kece ni nona bula, ka na sega vakadua ni dua na itoro me tara na uluna.
I Samuela 1:10-11

Also Read If Possible (Wilika Talega Ke Rawa)
Genesis 16:1, 30:1-2, Job 24:21, Deuteronomy 12:5-7, 21:15-17,

O Au: Na Vuni Vaini Dina (I Am; The True Vine)

Serving for the 28th July, 2008

“O Au na vunivaini dina, o Tamaqu na kena ivakatawa. 02 “Na tabana kecekece e sema tu vei au era sega ni vua, e na taya laivi o Koya; ia na tabana e vua tiko, e na samaka o Koya, me rawa ni vuavuai vinaka cake. 03 “O kemudou, dou sa vakasavasavataki oti baleta na vosa Au dau kaya vei kemudou. 04 “Dou tiko vei Au, Au na tiko vei kemudou. Me vaka ga ni sega ni vua rawa na tabanivaini, vakavo ke sema tiko i na vunivaini, o kemudou talega dou na sega ni vua rawa, vakavo ke dou sema tu mai vei Au. 05 “O Au na vunivaini, o kemudou na tabanivaini. O koya e tiko vata kei Au, Kau tiko vata kei koya, e na levu sara na vuana; baleta ke sega o Au, dou na sega ni cakava rawa e dua na ka. 06 “Vakavo ke tiko ga vata kei au e dua na tamata, o koya e na ta laivi me vaka e dua na tabanivaini a vusa; era na mai tomika me ra kolo i na bukawaqa, me kama laivi.
07 “Kevaka o tiko vata kei Au, ka tiko vata kei iko na Noqu vosa; na veika kece o na kerea e na caka e na vukumu. 08 “E na ka oqo e vakalagilagitaki kina o Tamada, ni oni vuataka e levu na vuata; moni qai Noqu tisaipeli.
09 ¶ “Me vaka ga ni lomani Au o Tamaqu, o Au talega Au lomani kemudou; dou bula sara tiko e na Noqu loloma. 10 “Kevaka dou vakamuria na Noqu ivakaro, dou na bula tiko e na Noqu loloma, me vaka ga Niu dau vakamuria na ivakaro nei Tamaqu, Au qai bula tiko kina e na Nona loloma. 11 “Na veika oqo Au tukuna vei kemudou, me rawa ni tiko vei kemudou na Noqu marau, ka me qai vuabale kina na nomudou marau.
Joni 15:1-11



Also Read If Possible (Wilika Talega Ke Rawa)
Psalms 80:8-19; Isaiah 5:1-7; 27:2-6; Luke 6:43-45;

Galatians 5:22-23; Colossians 1: 3-12.

O Au: Na Sala, Na Dina Kei Na Bula (I Am: The Way, the Truth and the Life)

Serving for the 27th July, 2008

“Dou kakua ni lomaleqaleqa e vuniyalomudou; ia mo dou vakabauta ga na Kalou (Elohim), dou vaka­bauti Au talega. 02 “E na loma ni vale nei Tamaqu, e levu tu kina na itikotiko; baleta ke sega, Keu a sa tukuna oti vei kemudou. Au lako qo meu lai vakarautaka e dua na itikotiko me nomudou. 03 “Ia kevaka Au sa lako meu lai vakarau­taka e dua na itikotiko me nomudou, Au na lako tale mai, Meu mai ciqomi kemudou vei Au; me rawa ni dou na lai tiko vata kei Au, e na vanua Au tiko kina. 04 “Na vanua Au lako tiko kina dou kila, kei na kena gaunisala dou kila talega.” 05 Kaya o Tomasi Vua, “Turaga (Master), keitou sega ni kila na vanua Oni lako tiko kina, keitou na qai kila vakacava na kena gaunisala.” 06 Kaya o Jisu (Yahshua) vua, “O Au na sala, na dina, kei na bula. E sega ni dua e na lako Vua na Tamada, vakavo ke muri yani mai vei Au. 07 “Kevaka o kilai Au, o sa na kilai Tamaqu talega; ia me tekivu qo, dou sa kilai Koya, dou sa raici Koya talega.” 08 Kaya sara o Filipe Vua, “Turaga (Master), vakaraitaka vei keitou na Tamada, e sa na vo levu vei keitou. 09 Sauma o Jisu (Yahshua) vua, “Au sa tiko qo vakadede vata kei kemudou, ia o se sega tiko ga ni kilai Au, Filipe’? O koya sa raici Au, sa raica na Tamada; e qai rawa vakacava mo kaya, ‘Vakaraitaka vei keitou na Tamada’?
Joni 14: 1-9




Also Read If Possible (Wilika Talega Ke Rawa)
Psalms 96; John 1:1-18, 3:13-16; Act 4:12; Hebrews 10:19-22

O Au: Na Veivakaturi kei na Bula (I Am: The Resurrection and the Life)

Serving for the 26th July, 2008

E tiko e dua na tamata e a tauvimate tiko, na yacana o Lasa (Lazah), e dua na kai Pecani, na ganedrau o Meri (Miriam) vata kei Maca na tacina.
Joni 11: 1.


Ni rogoca qori o Jisu (Yahshua), e kaya sara, “Na mate qo a sega ni kena itinitini na mate, ia e na vuku ga ni lagilagi ni Kalou (Elohim), e na yaco kina, me vaka­rokorokotaki na Luve ni Kalou (Elohim).”
Joni 11:4.


Ia ni yaco yani i Pecani o Jisu (Yahshua), a qai kila ni o Lasa (Lazar) sa bogi va koto no e na ibulubulu.
Joni 11:17.

E kaya o Maca vei Jisu (Yahshua), “Turaga (Master), kevaka wale ga mo a tiko eke, na ganequ ke a sega ni mate. 22 “Ia e na gauna oqo, au kila ni ka ga Oni na kerea vua na Kalou (Elohim), e na solia vei Kemuni o Koya.” 23 Kaya o Jisu (Yahshua) vua, “O ganemu e na tucake tale.” 24 Kaya Vua o Maca, “Au kila ni na tucake tale o koya e na gauna ni veivakaturi, e na iotioti ni siga.” 25 Kaya o Jisu (Yahshua) vua, “O Au ga na veivakaturi mai na mate, vata kei na bula. O koya e vakabauti Au, e dina ga ni na mate, ia e na bula dina o koya. 26 “Ia o koya e bula ka vakabauti Au tikoga, e na sega ni mate. O vaka­bauta beka qori?” 27 Kaya Vua na yalewa, “Io, Turaga (Master), au vakabauta ni o kemuni na Mesaia, na Luve ni Kalou (Elohim), e a tadu tiko mai i vuravura.”

Joni 11:21-27.


Ia ni sa cavuta oti na veika oqori, sa qai kaila e na domo levu, “Lasa (Lazah), tucake mai!” 44 Oti qai curu mai i tuba o koya a sa mate oti, ia a se oro tu ga na ligana kei na yavana e na isole ni mate, qai ubi tu na matana e na dua na tikini isulu. E kaya o Jisu (Yahshua) vei ira, “Sereki koya, laivi koya me lako.”

Joni 11:43-44.

Also Read If Possible (Wilika Talega Ke Rawa.)
Deuteronomy 32:39; John 5: 19-26; Romans 5-6;

2 Timothy 1:8-10; 1 John 1:1-3

O Au: Na iVakatawa ni Sipi Vinaka (I Am: The Good Shepherd)

Serving for the 25th July, 2008

“O Au na ivakatawa ni sipi uasivi. Na ivakatawa ni sipi uasivi e solia na Nona bula e vukudra na sipi. 12 “Ia o koya e cakacakasaumi ka sega ni ivakatawa ni sipi, ka sega talega ni taukeni ira na sipi, ni raica ni lako tiko mai na wolifa, e na biuti ira tu na sipi qai dro; na wolifa e na qai mai vakatoboki ira na sipi ka vakaseuti ira. 13 “Na tamata cakacakasaumi e na dro, baleta ni cakacakasaumi, e sega ni lomani ira na sipi. 14 “O Au na ivakatawa ni sipi vinaka; Au kilai ira era Noqu, ia o ira era noqu era kilai au. 15 “Me vaka ni kilai Au o Tamaqu, o Au talega, Au kilai Tamaqu vaka kina; kau mai solia kina na Noqu bula e na vukudra na sipi. 16 “Eso tale na sipi era tiko vei Au, era sega ni wili vata kei na qelenisipi oqo; o ira oqori Au na lai kauti ira talega mai, baleta era na rogoca talega na Domoqu; me sa na qai duabulu ga na qelenisipi, ka duabulu na ivakatawa. 17 “Qori na vuna e lomani Au kina o Tamaqu, baleta niu sa mai solia na Noqu bula, me na qai rawa niu taura cake tale. 18 “E sega ni dua e rawa ni kauta laivi mai vei Au, ia o Au ga, Au a solia vakataki Au. E tiko vei Au na kaukaua meu solia, ka tiko talega vei Au na kaukaua meu taura tale. Na lewa oqo Au a ciqoma maivei Tamaqu.”
Joni 10:11-18

E kauta laivi na noda ivalavala ca kece o koya, qai laveta cake e Yagona e na kauveilatai, me rawa kina vei keda, ni da sa mate oti e na vuku ni noda ivalavala ca - meda bula e na vukuni Nona yalododonu - ia e na Nona mavoa, eda vakabulai kina. 25 Baleta o kemuni oni a lako sese me vaka na sipi, ia oni sa lesu tale vua na iVaka­tawa ni sipi, o koya e iVakatawa talega ni nomuni bula.
1 Pita 2:24-25




Also Read If Possible (Wilika Talega Ke Rawa)
Psalm 27:1; John 1:1-14; 3:19-22; 12:44-46; 1 John 1:1-7;

Revelation 21:2-27

O Au: Na Nodra Matamata na Sipi (I Am: The Door of the Sheep)

Serving for the 24th July, 2008

E dina, e dina, na ka dina Au kaya vei kemuni qo, o koya e sega ni curu i na lomanibai ni sipi mai na kena katuba, ia qai kaba yani e na so tale na sala, o koya oqori e daubutako ka daukovekove. 02 “Ia o koya e curu yani e na kena katuba, o koya e nodra ivakatawa na sipi. 03 “Vua, na ivakatawa ni katuba e na dolava na katuba, o ira na sipi era na rogoca na domona, ia o koya e na qai kacivi ira na nona sipi e na dui yacadra, qai kauti ira mai ituba. 04 “Ia ni sa kauti ira mai na nona sipi i tuba, e na qai liutaki ira tikoga o koya, ia o ira na sipi era na muri i koya baleta ni ra kila na domona. 05 “Na sipi era na sega vakadua ni muria e dua na vulagi, ia era na dro laivi mai vua, baleta era sega ni kila na domona na vulagi.” 06 O Jisu (Yahshua) a cavuta na vosa vakatautauvata oqo vei ira, ia era a sega ga ni vakasamataka rawa na ibalebale ni veika a kaya tiko vei ira. 07 Sa qai kaya tale vei ira o Jisu (Yahshua), “E dina, e dina, na ka dina Au kaya vei kemuni, ni o Au na katuba vei ira na sipi. 08 “O ira kece era lako mai era daubutako ka daukovekove, kevaka era a sega ni rogoci ira na sipi. 09 “O Au na katuba; Ke dua e curu mai vei Au, o koya e na vakabulai, ka na qai veicuruyaki tiko i loma se i tuba me kunea na loga ni veico. 10 “Na daubutako e sega ni lako mai, vakavo me mai butako, veivakamatei ka veivakarusai; ia o Au, Au lako mai me rawa ni yaco vei ira na bula, ka me yaco vei ira vaka­yauyau.
Joni 10: 1-10.




Also Read If Possible (Wilika Talega Ke Rawa)
Psalm 23; Isaiah 40:10-11; Zechariah 11:4-17; Matthew 25:31-46;

Luke 15:3-7; Hebrews 13:20-21.

O Au: Na Rarama kei Vuravura ( I Am: the Light of The World)

Serving for the 23rd July, 2008

Oti sa qai vosa tale vei ira o Jisu (Yahshua) ni kaya, “O Au na rarama kei vuravura. O koya e muri i Au e na sega ni lako e na butobuto, baleta sa tu vua na rarama ni bula.”
Joni 8:12.

Ia, ni tavali tiko yani o Jisu (Yahshua), a qai raica o Koya e dua na tamata a se mataboko tu mai ketei tinana. 02 Eratou tarogi Koya na Nona tisaipeli, “Vakavuvuli! O cei a valavala ca, na tamata qo se o rau na nona itubutubu, me vakavuna na nona sucu mataboko?” 03 Sauma o Jisu (Yahshua), “E sega ni tamata qo a valavala ca se o rau na nona itubutubu, ia e vinakati ga me vakaraitaki maivua na cakacaka ni Kalou (Elohim). 04 “E dodonu meu cakacakataka na Nona cakacaka o Koya e a talai Au mai, ni se siga toka; baleta sa roro mai na bogi, na gauna e sega ni dua e na rawa ni cakacaka kina. 05 “Na dede ga ni noqu tiko e vuravura, Au na ramase tiko e vuravura.” 06 Ni sa kaya oti na vosa oqori, e a qai kasivi e na dela ni qele, wakia e dua na ibuli soso e na nona weli, qai boroya na matana na tamata mataboko e na soso. 07 Oti qai kaya vua o Koya, “Lako lai tavoi e na tobu ni veipapitaisotaki mai Sailoha. E lako sara o koya, lai tavoi; qai lesu mai, sa rai tu mai.
Joni 9:1-7.

Na bula e tiko Vua; ia na bula a vu ni rarama vei ira na tamata. 05 ¶ Na rarama a qai rama tiko e na butobuto, ia na butobuto a sega ni kinoca rawa.
Joni 1:4-5.



Also Read If Possible (Wilika Talega Ke Rawa)
Psalms 27:1; John 1:1-14; 3:19-22; 12:44-46; 1 John 1:1-7;

Revelations 21:2-27

O Au: Na Madrai ni Bula (I Am: The Bread Of Life)

Serving for the 22nd July, 2008

Era taroga tale vua, “Na ivakatakilakila cava beka oni na cakava me keimami raica, me keimami qai vakabauti Kemuni. Na cakacaka cava Oni sa cakava?” 31 “O ira na tamai keimami era a kania na mana e loma ni lekutu; me vaka a volai tu; ‘E a solia vei ira o Koya na madrai mai lomalagi me ra kania.’” 32 Kaya o Jisu (Yahshua) vei ira, “E dina, e dina, na ka dina Au tukuna vei kemuni; o sega ni o Mosese e a solia vei kemuni na madrai mai lomalagi, ia o Tamaqu e solia vei kemuni na madrai dina mai lomalagi. 33 “Baleta e madrai dina ni Kalou (Elohim), o Koya e siro mai lomalagi, o Koya e solia na bula vei vuravura. 34 Era qai kaya Vua, “Turaga (Master), ni solia tawamudu tikoga vei keimami na madrai oqori.” 35 Sa qai kaya vei ira o Jisu (Yahshua), “O Au na madrai ni bula. O koya e lako mai vei Au, e na sega ni walokai, vata kei koya e vakabauti Au e na sega ni kara­maca. 36 “Ia me vaka Au sa kaya oti vei kemuni, oni sa raici Au tiko, ia oni sega ga ni vakabauti Au. 37 “O ira kece e soli i ira vei Au o Tamaqu, era na lako mai vei Au, ia o ira kece era lako mai vei Au, e sega ni dua na sala Meu na talaci ira laivi kina. 38 “Baleta Au a sega ni lako sobu mai lomalagi, Meu mai cakava na Noqu inaki o Au vakataki Au, ia Meu mai cakava ga na Nona inaki o Koya e a talai Au mai. 39 “Ia oqo na Nona inaki o Tamada, o Koya e talai Au mai; Meu kakua ni mai vakayalia e dua na ka, mai na veika kece e solia vei Au o Koya, ia Meu na qai vakaturi ira kece e na iotioti ni siga. 40 “Ia oqo na Nona inaki o Koya e a talai Au mai; ni o ira yadua era raica na Luvena era na vakabauti Koya, me na soli vei ira na bula tawamudu; ia o Au, Au na qai vakaturi koya e na iotioti ni siga.”
Joni 6:30-40.




Also Read If Possible (Wilika Talega Ke Rawa)
Deuteronomy 8: 2; Proverbs 30:7-9; John 6:25-59;

1 Corinthians 10:16-17; Revelation 2:17.

Vakamautaki Poasa o Ruci (Boaz Marries Ruth)

Serving for the 21st July, 2008

Sa qai kacivaka o Poasa vei ira na qase kei ira na tamata kece, “Nikua oni sa na vakadinadinataka niu sa volia mai vei Naomi, na iyau kece nei Elimeleki, Kilioni kei Maloni. 10 Kena I kuri, o Ruci na marama ni Moapi na yada nei Maloni, au sa volia me watiqu, me rawa ni vakatuburi na yacana o koya e sa mate, e na vuku ni nona iyau, ka me kakua ni yali na yacana mai vei ira na wekana, me kakua tale ga ni yali mai na matamata ni nona koro. Oni kena ivakadinadina e na siga nikua!” 11 O ira kece na tamata era a tiko e na matamata ni koro vata kei ira na qase era qai kaya, “Keimami sa kena ivakadinadina. Me qai cakava na TURAGA (Yahweh) na yalewa a lako mai i nomu vale, me tautauvata kei Rejieli kei Lia o rau na marama rau a tara na kawa i Isireli. Ia o iko mo qai rawata na itutu dokai e Efirata, ka mo dau rogo levu e Peceliema. 12 Laiva me vakavutuniyautaka na nomu vale me tautauvata kei na vale nei Veresa, e a vakasucuma vei Jiuta o Tamari, na luvemu e na solia vei iko na TURAGA (Yahweh) , mai vua na goneyalewa oqo, 13 Sa mani tauri Ruci o Poasa qai yaco me watina; ia ni rau veiyacovi, a qai solia vua na TURAGA (Yahweh) me kunekune, qai vakasucuma kina e dua na luvena tagane. 14 Era qai kaya na marama vei Naomi, “Me vakavinavinakataki na TURAGA (Yahweh), o koya e sega ni biuti iko tu e na siga edai, me sega na nomu kawa; me qai yaco mada ga me tamata rogo e Isireli raraba o koya! 15 O koya e na qai yaco me vakavoutaka na nomu bula, ka na qaravi iko e na gauna o sa na qase kina. Baleta o koya e luvei vugomu, o koya e lomani iko, o koya e vinaka cake vakaoti vei iko, mai na vitu na luvemu tagane.”
Ruci 4: 9-15.

Also Read If Possible (Wilika Talega Ke Rawa)
Revelation 29:31 – 30:4; Micah 5:2; Matthew 1:1-6

Vakaraitaka o Ruci ni Via Vakamautaki Poasa (Ruth Shows That She Wants To Marry Boaz)

Serving for the 20th July, 2008

E na dua na siga a kaya kina o Naomi vua na vugona o Ruci, “Luvequ, e sega beka ni noqu itavi meu vaqara e dua na vale me nomu, na vanua mo na lai tiko vinaka kina? 02 E sega beka ni wekadaru o Poasa, o koya e taukeni ira na goneyalewa dauveiqaravi o dau veilasamaki vata kei ira. E na bogi edai e na irivi parile tiko kina o koya e na rara ni buturaki sila. 03 Sisili, lumu e na waiwai boi vinaka, qai daramaka na nomu isulu totoka duadua. Oti mo qai lako sobu i na rara ni buturaki sila, ia mo kua ga ni vakatakilai iko vua, me yacova sara ni sa kana ka gunu oti. 04 Ni sa lai moce, mo qai vakaraica matua na vanua e na lai davo kina o koya. Oti mo qai lako, cega na itutuvi mai yavana, qai davo kina; e na qai tukuna vei iko o koya na ka mo cakava.”
Ruci 3:1-4.

Ia ni sa kana ka gunu oti o Poasa ka sa yalomamarau toka, sa qai lako me lai moce e na mua ni ibinibini parile. Oti sa qai lako yani vakamalua o Ruci, cega na itutuvi mai yavana qai davo sobu. 08 Ia e na bogi levu tutu, a qai yadra cecekala mai na tagane, vuki, qai raica yani vakasauri na yalewa ni davo koto mai yavana. 09 “O cei o iko?” e taro o koya. “O au o Ruci na nomuni vada,” e kaya o koya. “Dedeka mai na tutuni nomu i sulu, me ubi i au, baleta o kemuni na wekaqu, e rawa vei kemuni moni na vueti au.” 10 “Me vakalougatataki iko na TURAGA (Yahweh), luvequ,” e sauma o koya. “Na nomu yalololoma qo, e levu cake sara mai na kena o sa vakaraitaka oti: O sega mada ga ni bau muri ira era se cauravou, se ra vutuniyau se dravudravua. 11 Ia qo luvequ, mo kakua ni rere. Au na cakava vei iko na kece sara o kerea. O ira kece sara na kai noqu era kila ni o iko o dua na marama yalododonu.
Ruci 3:7-11.





Also Read If Possible (Wilika Talega Ke Rawa)
Exodus 38:8-10; Deuteronomy 25:5-10; Hebrews 13:4.

Matthew 1: 5-16

Rau Sota O Poasa Kei Ruci (Boaz Meets Ruth)

Serving for the 19th July, 2008

O Naomi e dua tiko na wekana mai na tabana vei watina, oya mai na tokatoka nei Elimeleki, e dua na turaga rogo ka vutuniyau, na yacana o Poasa. 02 A qai kerekere o Ruci na yalewa ni Moapi vei Naomi, “Vakadonuya mada vei au meu lako i na were, meu lai vakamuri ira na daunitatamusuki, ka meu tomika mai na vovo ni parile era lulutu mai vei vua e yalololoma vei au. E kaya sara vua o Naomi, “Lako ga, luvequ”. 03 Sa mani lako o koya qai lai vakatotomi voli e na were, e na vanua era sa cakacaka oti kina na daunitatamusuki. A qai yaco ni a lai cakacaka voli o koya e na were nei Poasa, na turaga e lewe ni tokatoka nei Elimeleki.
Ruci 2: 1-3.


E kaya sara o Poasa vei Ruci, “Luvequ yalewa, o na rogoci au beka. Mo kakua ni lai tomi vovo ni parile e na dua tale na were, mo kua sara ga ni biuta na were qo. Mo tiko ga vata kei ira na noqu goneyalewa dauveiqaravi.”
Ruci 2: 8.

Ni rogoca ga qori, sa cuva sobu sara e na vakarokoroko, me tara sara ga na qele na matana. E kaya sara “Na cava beka oni sa rui yalololoma kina vaka levu vei au – e dua na kai tani? 11 Sauma o Poasa “Sa mai tukuni vei au, na veika kece o a vakayacora vua na vugomu, e na gauna sa mate oti kina o watimu – vata kei na nomu sa biuti rau mai o tamamu vata kei tinamu vata kei na nomu koro dina, mo sa mai bula vata kei na dua na kawa tamata o sebera vakadua ni kilai ira. 12 Me qai sauma mada ga vei iko na TURAGA (Yahweh) na veika kece o sa cakava. Me qai vakalougatataki iko mada ga vakayauyau na TURAGA (Yahweh) na Kalou (Elohim) ni Isireli, o koya o sa mai vakararavi e na ruku ni tabana.
Ruci 2:10-12.



Also Read If Possible (Wilika Talega Ke Rawa)
Leviticus, 25:25-27, 49-50; Psalms 91;
Jeremiah 32; 6-14

Naomi kei Ruci: Loloma kei na Yalodina. (Ruth and Naomi – Love and Commitment)

Serving for the 18th July, 2008

A qai yaco e na gauna era veiliutaki tiko kina o ira na Dauveilewai, a qai yaco kina e dua na dausiga e na vanua, qai mani lako kina e dua na ni turaga ni Peceliema e Jiutia, a lai bula tu e na vanua o Moapi, o koya o watina kei rau na luvena tagane. 02 Na yaca ni turaga oqo o Elimeleki, na yaca i watina o Naomi, ka yacadrau na luvenatagane o Maloni kei Kilioni...
Ruci 1:1-2a,

Ia o Elimeleki, na wati i Naomi, a qai mate, ratou sa qai tu ga mai o koya vata kei rau na luvenatagane e rua. 04 Rau a qai vakamautaka e rua na goneyalewa ni Moapi, na yacana e dua o Oripa, kei na kena ikarua o Ruci. Ratou a bula tiko mai keya me tini na yabaki. 05 Rau a qai mate ruarua talega o Maloni kei Kilioni, sa qai vo tu ga mai o koya, ni ratou sa takali o watina kei rau na luvena.
Ruci 1:3-5

Sa mani kaya o Naomi vei rau na vugona, “Drau dui lesu, o kemudrau ruarua, i na vale nei tinamudrau. Me qai yalovinaka tiko vei kemudrau na TURAGA (Yahweh), me vaka na nomudrau dau yalovinaka vei rau na nomudrau dui mate, ka vakakina vei au. 09 Me vakadonuya mada ga vei kemudrau na TURAGA (Yahweh) mo drau kune vakacegu e na nona vale na dui watimudrau vou ….”
Ruci 1: 8-9 a)

Ia qai sauma qori o Ruci ni kaya, “Kakua ni cikevi au meu biuti iko, se meu vakanadakui iko. Na vanua o na lako kina au na lako kina, na vanua o lai tiko kina au na lai tiko talega kina. O ira na kai nomu era na kai noqu, na nomu Kalou (Elohim) e na noqu Kalou (Elohim). 17 Na vanua o na mate kina, au na mate kina, au na bulu talega e keya. Me qai lewa ga na TURAGA (Yahweh) na ka e cakava vei au, veitalia na kena bibi, ke dua tale na ka, na mate ga me qai tawasei iko maivei au.”
Ruci 1:16-17

Sa qai lesu o Naomi, vata kei Ruci na vugona me ra sa biuti Moapi: rau mani yaco i Peceliema taudonuya na gauna e tekivu kina na tamusuki ni parile.
- Ruci 1:22

Also Read If Possible (Wilika Talega Ke Rawa)
2 Samuel 3:14-16; Proverbs 20:6; Song of Solomon 8:6-7,

1 Corinthians 13.

Sausaumi Lesu O Samisoni. (Samson’s Payback)

Serving for the 17th July, 2008

Era a soqo vata na daunivakavulewa e Filisitia me ra vakacabora e dua na imadrali levu vei Teikona (Dagon) na nodra kalou (elohim), ka me ra solevu tale ga me vaka era kaya “Na noda kalou (elohim) sa solia na keda meca o Samisoni i ligada.”
Dauveilewai 16: 23


A qai yaco ni sa tubu sara tu ga na nodra mamarau, ni ra kailavaka, “Kauti Samisoni mai, me mai vakamarautaki keda!” Sa lai kacivi sara mai o Samisoni mai valeniveivesu, sa qai mai vakalasalasa vei ira o koya. Era qai vakaduri i koya e na maliwa ni rua na duru lelevu ni vale. 26 E kaya sara o Samisoni vua na gone a tubera tiko mai na ligana, “Kauti au mada meu lai vakayamoca na duru e tabeya tiko na vale qo, meu lai ravita tu mada.” 27 Era a osodrigi tu e na vale oqo o ira na tagane kei na yalewa; o ira kece na daunivakavulewa e Filisitia era a tiko kina; ka ra tu mai doka ni vale e rauta e le tolunaudolu na tagane kei na yalewa, era qai saravi Samisoni ni vakalasalasa tiko. 28 Sa kaciva na TURAGA (Yahweh) o Samisoni, “Kemuni na TURAGA (Yahweh) na Kalou Cecere (Sovereign), ni nanumi au mai au masuti kemuni, ni vakaukauataki au vakadua tale kemuni na Kalou (Elohim), meu sauma vei ira na kai Filisitia na yali ni mataqu ruarua. 29 E yamoca sara o Samisoni me tara na duru ruarua e loma, ka dabe toka kina na vale me tabeya cake tu, me dua e na ligana i matau, ka tara na kena kadua e na ligana imawi. 30 Oti qai kaya o Samisoni, “Vakatara meu mate vata kei ira na kai Filisitia.” A qai kalairoro me sa bili o koya e na nona igu taucoko, oti qai ovaci ira na daunivakavulewa kei ira na tamata kecekece era tiko e keya na vale. O ira e vakamatei ira o koya e na gauna sa mai mate kina qo, e a levu cake mai na kedra iwiliwili a vakamatei ira o koya e na dela ni nona bula taucoko.
Dauveilewai 16:25-30



Also Read If Possible (Wilika Talega Ke Rawa)
Psalm 3: Isaiah 1:24; Jeremiah 5:7-9, 29; 9:9;
Hebrews 11:32-34

Biuti Samisoni Na TURAGA (Yahweh Departs from Samson).

Serving for the 16th July, 2008

E kaya sara o Dilaila vei Samisoni, “E rawa vakacava mo kaya,‘ Au domoni iko’ ni sega mada ga ni tiko vata kei au na utomu? Qo sa ikatolu ni gauna mo vakalialiai kina, ia e sebera tiko ga ni o tukuna vei au se tiko evei nomu kaukaua.” 16 A qai yaco e na ilevu ni nona vakasosataki koya tiko o koya (Dilaila) e na nona vosa e veiveisiga, ni a oca i mate sara ga o koya. 17 Sa mani tukuna taucoko vua o koya na nona veika vuni, “E sebera ni bau toro vakadua na uluqu, baleta au Nasaraiti, kau se wasei tani tu meu nona na Kalou (Elohim) mai ketei tinaqu. Kevaka me toro laivi na drauniuluqu, e na biuti au na noqu kaukaua, au sa na qai malumalumu meu vakataki ira na vo ni tagane.” 18 Ia ni sa raica o Dilaila ni sa tukuna kece vua o koya na veika kece, sa talatala sara vei ira na dauvakavulewa ni Filisitia, “Ni lako mai vakatotolo; sa tukuna vei au na ka kece, o koya.” Era sa mani lako mai vua na Kai Filisitia, ka ra kauta tiko na siliva e ligadra. 19 Sa qai vakamoceri koya ni tava toka na uluna e duruna, qai kaciva e dua na tagane me mai toroya laivi na tobe vituvitu ni drauniuluna, ka tekivu me vakamalumalumutaki koya. E keri sa qai biuti koya kina na nona kaukaua. 20 Oti e kacivi koya sara o Dilaila, “Samisoni, o ira na kai Filisitia era sa tu qo me ra mai vesuki iko.” E yadra mai na nona moce o koya, qai vakasamataka, “Au na curu i tuba me vaka ga au dau cakava, au na kureitaki au ga me kasere na kequ i vesu. Ia a sega ni kila o koya ni sa biuti koya oti na TURAGA (Yahweh). 21 Era qai vesuki koya na kai Filisitia, era leuta laivi na yaloka ni matana, era qai kauti koya sobu i Qasa. Ni vesu tu e na ivesu parasa, era a vakayagataki koya me cakacakataka na iqaqi e loma ni vale ni veivesu.
- Dauveilewai 16: 15-21





Also Read If Possible (Wilika Talega Ke Rawa)
Numbers 6:2-21; 30:1-2; Ecclesiastes 5:4-6
Proverb 11:13; 20:19; Luke 12:47-48

O Samisoni kei Dilaila (Samson and Delilah).

Serving for the 15th July, 2008

E na dua na siga e a lako i Qasa o Samisoni, qai raica kina e dua na yalewa saqamua, qai curu me lai tiko vata kei koya. 02 A qai tukuni vei ira na kai Qasa, “O Samisoni e tiko qo!” Era mani mai wawa wavolivoliti koya e na vanua oya, ka yadrava na matamata ni koro e na bogi taucoko oya. Era a sega ni cakava e dua na ka e na bogi oya, baleta era kaya, “Ni kida na mataka eda na qai vakamatei koya.” 03 Ia o Samisoni e a koto no mai keya me yacova na bogilevu tutu, sa qai mata cake e na bogilevu tutu, taura na isogo ni matamata ni koro, na kena duru ruarua, qai kauta laivi, na ka kece bau kina na kena isamugakagaka. E a laveta kece oqori i tabana, qai colata cake i na dela ni ulunivanua e vakanamata tu mai i Eparona. 04 A qai yaco e muri, ni a domona o Samisoni, e dua yalewa e na bucabuca o Soreka, na yacana o Dilaila. 05 Era mani lako vua o ira na dauvakavulewa mai Filisitia, era qai kaya, “Veretaki koya me vakaraitaka vei iko se vu tiko mai vei na nona kaukaua vakaitamera, vata kei na sala eda na rawa ni rawai koya kina, me keimami vesulaki koya, keimami qai vakamalumalumutaki koya. Keimami na qai solia vei iko, o keimami kece e tau yadua na udolu, dua na drau na tikitiki ni siliva. 06 E mani kaya o Dilaila vei Samisoni, “Tukuna mada vei au, au vakamasuti iko, na vu ni nomu kaukaua levu, ka vakamacalataka na sala o na vesu rawa kina mo vakamalumalumutaki.” 07 Sauma vua o Samisoni, “Kevaka era vesuki au e na vitu na dali vaudrokadroka e sebera ni sigani, au sa na malumalumu meu vakataki ira na tamata kece.” 08 O ira na daunivakavulewa ni Filisitia, era qai kauta mai vua e vitu na dali vaudrokadroka, e sebera ni sigani, sa qai vakayagataki ira o koya me vesuki koya kina. 09 Ia era a wawa tiko e loma ni vale vata kei koya o ira na tamata. Sa kacivi koya sara o koya, “Era sa mai vesuki iko o ira na kai Filisitia, Samisoni!.” E qai drutia na dali vau o koya, me vaka ni druti e dua na wavulovulo ni sa coroga na bukawaqa. Era mani sega ni kila na vu ni nona kaukaua.
- Dauveilewai 16:1-9


Also Read If Possible (Wilika Talega Ke Rawa)
Judges 14-15; 1 Timothy 2:20-23;
Proverbs 5; 6:20 – 7:27; 31:1-3.

Sucu o Samisoni na Qaqa (Samson The Strong Man is Born)

Serving for the 14th July, 2008

Era baci caka ca tale na kawa Isireli e na mata ni TURAGA (Yahweh), sa mani soli i ira na TURAGA (Yahweh) i ligadra na kai Filisitia me vasagavulu na yabaki. 02 E dua na tagane ni Sora, e na mataqali i Tani, na yacana o Manoa e a yava tu na watina ka se sega tu kina ni vakaluveni. 03 A mani rairai vua na agilosi ni TURAGA (Yahweh), qai kaya vua, “Raica o iko o yava tu, o sega tu kina ni luveni; ia o na kunekune o qai vakasucuma e dua na gonetagane. 04 Ia vakamasuti iko mo kakua ni gunuva na waini se na gunu kaukaua, mo kakua talega ni kania na ka e dukadukali: 05 baleta raica o na kunekunetaka ka vakasucuma e dua na gonetagane. Me kakua ni tara na uluna na itoro, baleta na gonetagane e na yaco me dua na Nasaraiti, vua na Kalou (Elohim) na ketei tinana me yacova na nona mate, ia o koya e na qai tekivuna na nodra vueti na kawa Isireli mai ligadra na kai Filisitia.”
Dauveilewai 13:1-5


A qai vakasucuma e dua na gonetagane na yalewa qai vakatoka me yacana o Samisoni. E a qai tubu na gone, qai vakalougatataki koya na TURAGA (Yahweh). 25 Ia na Yalo ni TURAGA (Yahweh) a dau vakauqeti koya e na so na gauna e tiko voli kina na keba nei Tani, e na kedrau tadrua o Sora kei Esetaola.
Dauveilewai 13:24-25



E a vakatulewa tiko mai Isireli o koya, e na nodra gauna na kai Filisitia, me ruasagavulu na yabaki.
Dauveilewai 15:20





Also Read If Possible (Wilika Talega Ke Rawa)
Genesis 25:21; Numbers 61:1-21;
Judges 14-15; Luke 1.

Vakamatei Sisaro o Yaela (Jael kills Sisera).

Serving for the 13th July, 2008

Oti qai kaya o Tepora vei Peraki, “Lako! Qo sara ga na siga, e na soli i Sisara kina i ligamu, na TURAGA (Yahweh). E sega beka ni liu tiko vei iko na TURAGA (Yahweh)?” Sa mani siro sobu mai na ulunivanua o Taboa, o Peraki era qai muri i koya sobu e tininaudolu na tagane. 15 E na gauna sa toso mai kina o Peraki, sa qai vakubutaki Sisaro, kei na nona qiqi-ni-valu kecekece, kei ira na nona mataivalu e na iseleiwau, na TURAGA (Yahweh), a mani sobu mai na nona qiqi-ni-valu o Sisaro, me dro bula e yavana. 16 Ia o Peraki a qai cemuri ira tiko na qiqi-ni-valu kei na mataivalu me yaco sara i Haroseci Hakoyeimi. Era a vakamatei kece vakadua e na seleiwau o ira na lewe ni mataivalu i Sisara; e a sega ni dua tale na tagane e vo. 17 Ia o Sisara e a cici vakadua i na valelaca nei Yaela, na wati i Eperi na Kenanaiti baleta e a veimaliwai vinaka tiko o Yapini na Tui Asori vata kei ira na lewe ni mataqali nei Eperi na Kenanaiti. 18 O Yaela a curu mai ituba, me tavaki Sisara qai kaya vua, “Lako mai, noqu turaga, curu sara mai. Kakua ni rere.” A curu sara i loma ni nona valelaca o koya, qai ubi i koya e na dua na itutuvi. 19 “Au sa karamaca” e kaya o koya, “Au kerea mo solia mada vei au e dua na wai.” E dolava sara e dua na tavaya sucu, qai vagunuvi koya kina, oti qai vakaitutuvitaki koya tale. 20 “Vakatawa toka e na katuba ni valelaca,” e kaya vua o koya, “ ke dua e lako mai qai tarogi iko, ‘ E dua beka na tagane e tiko eke?” Mo qai kaya ga, “E sega.”’ 21 Ia o Yaela na wati i Eperi, a qai tomika mai e dua na ivako ivakadei ni vale laca, vata kei na dua na ituki, qai lako lo vua ni moce lutu no, e na ilevu ni oca. A qai vakota na ivako ivakadei ni valelaca, me suaka na nona kanalavalava (temple), me basika sara i na dela ni qele, a mani qai mate kina o koya.
Dauveilewai 4:14-21




Also Read If Possible (Wilika Talega Ke Rawa)
Judges 3:12-30; 5:13-31; I Samuel 12:8-11; Hebrews 11:32-34

O Tepora: Na Parofita (Deborah The Prophet).

Serving for the 12th July, 2008

Ni mate oti o Eute, era baci cakava tale na ivalavala ca e na mata ni TURAGA (Yahweh), o ira na kai Isireli. 02 Sa mani volitaki ira na TURAGA (Yahweh), i na liga i Yapini na Tui Kenani, o koya e vakavulewa voli mai Haso. E veiliutaki tiko vei ira na nona mataivalu o Sisaro, ka vakaitikotiko mai Haroseci e na kedra maliwa na kai Veimatanitu tani. 03 Era mani tagi vua na TURAGA (Yahweh) o ira na kawa Isireli: Baleta ni ciwanadrau na nona qiqi-ni-ivalu kaukaumea, ka sa ruasagavulu na yabaki na dede ni nona vakararawataki ira tiko vakaca na kawa Isireli. 04 O Tepora e dua na parofita marama, na wati i Lapitoci, e a daunilewa tiko mai Isireli e na gauna oya. 05 A dau vakayaco veilewai tiko o koya mai na vunibalabala i Tepora, e toka e na kedrau tadrua o Rama kei Peceli, e na ulunivanua o Ifereimi; o ira na kawa Isireli era dau lako cake vua me ra lai rogoca na nona lewa. 06 A qai talatala o koya me lai kacivi mai o Paraki na luvei Epinaomi mai Ketesa e na yasayasa vaka Nafitalai, qai kaya vua, “Na TURAGA (Yahweh) na Kalou (Elohim) i Isireli, e vakaroti iko, ‘Lako, kauta e tini na udolu na tamata mai na mataqali Nafitalai kei na mataqali Sepuloni, ka liutaki ira i na ulunivanua o Taboa. 07 Au na qai vakayarayarataki Sisaro, na iliuliu ni mataivalu nei Japini, me lako yani vei iko e na uciwai na Kisoni, vata kei na nona qiqi ni ivalu kei ira na nona mataivalu, au na qai lai soli i koya i ligamu.’” 08 Sa kaya sara vua o Paraki, “Kevaka o lako vata kei au, au na lako; ia kevaka o sega ni lako vata kei au, au na sega ni lako.” 09 “Sa vinaka,” e kaya o Tepora, “Au na lako vata kei iko. Ia e na vuku ni nomu ivukivuki baleta na ka oqo, sa na sega ni nomu na kena lagilagi, baleta na TURAGA (Yahweh) e na soli Sisaro i na ligana e dua na yalewa. ….”
Dauveilewai 4:1-9(a)




Also Read If Possible (Wilika Talega Ke Rawa)
Exodus 15:19-21; Judges 5:1-12; 2 Kings 22:11-20;

2 Chronicles 34:19-28; Luke 2:21-38

Na Nodra Siga na Dauveilewai (The Rule of the Judges).

(Dedicated to Ms April-Lisa Naigulevu who is off to Sydney on Flight FJ 911 to attend the Catholic World Youth Meeting)

Serving for the 11th July, 2008

Era a qarava na TURAGA (Yahweh), o ira na tamata, e na dela ni gauna nei Josua, ka vaka kina o ira na qase era a bula siviti koya, o ira era a raica na cakacaka lelevu kece a vakayacora na TURAGA (Yahweh) e na vukudra na Isireli
Dauveilewai 2:7

Ia ni ra sa takali yani me ra toki vei ira na tamadra na itabatamata oya, era sa qai tubu cake mai e dua tale na itabatamata, era a sega ni kila na TURAGA (Yahweh) ka sega talega ni kila na cakacaka a cakava o koya e na vukudra na Isireli. 11 E na gauna qori era qai cakava kina na ivalavala tawakilikili e mata ni TURAGA (Yahweh) o ira na Isireli, ni ra a qaravi ira na Pieli.
Dauveilewai 2:10-11

E na levu ni nona katakatataki ira na Isireli, a qai soli ira kina na TURAGA (Yahweh) i ligadra na daubutako, me ra vakacacani ira. E a volitaki ira o koya, vei ira na kedra meca era tu vakavolivoliti ira, baleta era sa sega mada ga ni sabai ira rawa. E na veigauna kece era dau lako kina me ra lai vala, na liga ni TURAGA (Yahweh) e na saqati ira tiko me vakadrukai ira, me vaka a sa vakamacalataka oti vei ira o koya. Era sa qai dau lomaleqaleqa vakalevu. Ia na TURAGA (Yahweh), a qai tauyavutaki ira na dauniveilewai e na kedra maliwa, me ra dau vueti ira mai na ligadra o ira era dauvakacacani ira.
Dauveilewai 2:14-16

Ni sa vakatikora e dua na dauniveilewai na TURAGA (Yahweh) e na kedra maliwa, e na dau tiko vata kei na dauniveilewai oya na TURAGA (Yahweh), ka na vueti ira tiko mai na ligadra na kedra meca e na gauna ga e se bula tiko kina na dauniveilewai oya; baleta na TURAGA (Yahweh) e dau lomani ira vakalevu, ni ra sa vutugu toka e na bibi ni veivakacacani era dau sotava mai vei ira na dauniveivakacacani. 19 Ia e na qai yaco, ni sa mate na dauniveilewai, era na vuki tale me ra cakava na ivalavala ca, e vakasisila cake sara mai na kena era dau vakayacora na nodra qase, e na nodra muria ka qarava na vei kalou (elohim) tani. Era sa sega sara ga ni bau via biuta na nodra ivalavala, kei na nodra itovo babamatua.
Dauveilewai 2: 18-19

Also Read If Possible (Wilika Talega Ke Rawa)
Deuteronomy 4:1-10; 11:18-25; Judges 2:19-3:31;

Psalms 78: 1-6; Ephesians 2:1-10

Na Vosa ni Veitalatala nei Josua (Joshua’s Speech Of Farewell).

Serving for the 10th July, 2008

“Ia oqo, moni rerevaka na TURAGA (Yahweh), ka qaravi Koya e na yalodina kei na dina, biuta laivi na kalou (elohim) eso era a dau qarava na nomuni qase mai na tai kadua ni uciwai, vakatalega kina mai Ijipita, moni qarava na TURAGA (Yahweh). 15 Ia kevaka oni nanuma ni ca vei kemuni kevaka oni qarava na TURAGA (Yahweh), ia digitaka e na siga edai o cei oni via qarava, o ira na kalou (elohm) era a dau qarava o ira na nomuni qase mai na tai kadua ni ualuvu, se na nodra kalou (elohim) na Amoraiti o ira na itaukei ni vanua oni sa mai vakaitikotiko kina qo; ia o au vata kei iratou na lewe ni noqu matavuvale keitou sa na qarava na TURAGA (Yahweh).” 16 Era qai sauma na tamata ka kaya, “E yawa sara mai vei keimami na vakasama me keimami vakanadakuya na TURAGA (Yahweh) me keimami qarava na vei kalou (elohim) tale eso! 17 Baleta o koya ga na TURAGA (Yahweh) na noda Kalou (Elohim) vakataki koya e a kauti keda vata mai kei ira na noda qase, mai Ijipita, na vale ni veivakabobulataki, ka cakava na ivakatakilakila lelevu oya e matada. E a taqomaki keda voli mai e na noda ilakolako, ka vaka kina e na kedra maliwa na veivanua eda a kosova mai. 18 Oti qai vakasavi ira na veimatatamata kecega na TURAGA (Yahweh), e na vukuda, bau kina o ira na Amoraiti era a dau vakaitikotiko voli e na vanua oqo. O keimami talega, keimami na qarava na TURAGA (Yahweh), baleta o Koya e neimami Kalou (Elohim).” 19 E kaya o Josua vei ira na tamata, “Oni na sega ni qarava rawa na TURAGA (Yahweh). O koya na Kalou (Elohim) yalosavasava; o koya e Kalou (El) dauvuvu. E na sega ni vosota na nomuni talatalaidredre kei na nomuni ivalavala ca. 20 Kevaka oni vakanadakuya na TURAGA (Yahweh) moni qarava na vei kalou (elohim) tani, e na saumaki o koya, me kauta mai na leqa lelevu vei kemuni ka vakarusai kemuni, baleta ni a dau caka vinaka vei kemuni.
21 Ia era qai kaya na tamata vei Josua, “Sega! Keimami sa na qarava na TURAGA (Yahweh).
Josua 24:14-21.





Also Read If Possible (Wilika Talega Ke Rawa)
Exodus 24:3-8; Levitcus 24: 3-8;
Romans 6; Hebrews 3-4

Rawai Jeriko o Isireli (Israel Overcomes Jericho).

Serving for the 8th July, 2008.

O Jeriko a sa sogo tu vakadua, baleti ira ga na kawa i Isireli; e sega ni dua a curu i tuba, se curu mai i loma. 02 Sa qai na TURAGA (Yahweh) vei Josua, “Raica, au sa soli i Jeriko i ligamu, bau kina na tui, vata kei ira na kena mataivalu. 03 Me ra tayabe wavokita na korolevu, vakadua ga, o ira na tamata vakaiyaragi. Qo me ra cakava tiko me ono na siga. 04 Me ra tayabe tiko e mata ni kato ni veiyalayalati, e vitu na bete, ka me ra tauyadua tiko na davui ileu ni metagane. E na ikavitu ni siga, me ra qai tayabe vakavitu wavokita na korolevu, ia o ira na bete me ra uvuca tiko na nodra biukila. 05 E na qai yaco ni ra sa uvuca vakadede na davui ileu ni metagane, oni qai rogoca na domo ni biukila, laivi ira na tamata me ra kaila, me ra kaila e na domo levu; e na qai karusa na lalaga ni korolevu ka caqera, ia ira na tamata me ra qai lako cake sara vakadua i loma.
Josua 6:1-5.

O ira na tamata era qai kaikaila, ni ra sa uvuca na biukila o ira na bete, a qai yaco, ni ra sa rogoca na rorogo ni biukila, era qai kaikaila na tamata e na domo levu, ni a qai karusa na lalaga ka caqera; era qai toso vakadua kece kina i loma ni korolevu, o ira na tamata yadudua, vakadodonu vua ka vesuka na korolevu
21 Era qai vakarusa vakadua na ka kece era tu e loma ni korolevu, ruarua na tagane kei na yalewa, na gone kei na qase, na bulumakau, na sipi kei na asa e na bati ni seleiwau.
Josua 6: 20-21

O Josua a qai taqomaki Reapi na saqamua me bula, bau kina o iratou na lewe ni matavuvale nei tamana, vata kei na veika kece e taukena o koya, ka se bula tiko qo o koya e na kedra maliwa na kai Isireli me yacova mai na siga nikua; baleta ni a vunitaki rau na dau kauitukutuku, a talai rau vaka yamata vuni o Josua i Jeriko.
Josua 6:25.



Also Read If Possible (Wilika Talega Ke Rawa)
Numbers 10:1-10; Judges 7:1-22, Matthew 1:1-6

Vunitaki ira na Yamata Vuni o Reapi (Rahab Hid The Spies)

Serving for the 7th July, 2008

Ia o Josua na luve i Nuni, a qai tala vakavuni mai Sitimi e rua na yamata, “Drau lako, drau lai raica mada mai na vanua” e kaya o koya, “Vakabibi ga o Jeriko.” 02 Rau sa mani lako, rau qai lai curu e na nona vale e dua na yalewa saqamua, na yacana o Reapi, rau qai vakaicili tiko mai keya. 03 Ia a qai tukuni vua na Tui Jeriko, “Raica! Eso na kai Isireli era a lako mai e na bogi, me rau mai vakadikeva na vanua” Sa mani vakau itukutuku sara vei Reapi na Tui Jeriko, “Kauti rau mai na tagane rau a lako mai vei iko, ka rau tiko e na nomu vale, baleta o rau qori, e rau mai vakadikeva tiko na ituvaki ni noda vanua taucoko.” 04 Ia na yalewa a qai kauti rau na tagane rua, qai lai vunitaki rau. E qai kaya o koya, “Io, rau a mai raici au o rau na tagane, ia au sega ga ni kila se rau sa lako i vei. 05 A qai yaco, e na gauna vata e dau sogo kina na matamata ni koro, ni sa butobuto ni rau a sa lako tale kina na tagane. Totolo, muri i rau. E na rawa tiko ga ni oni toboki rau.” 06 Ia o koya e a kauti rau ga, i dela ni vale, qai lai vunitaki rau e na ruku ni ivivivi tidolo ni lineni, a sa tuvana oti tu o koya e dela ni vale.
- Josua 2: 1-6;

Rau qai lako, rau cabeta na veiulunivanua, rau qai lai tiko voli mai keya me bogi tolu, me yacova ni ra sa lesu tale o ira era a mai vaqarai rau. O ira na mai vaqarai rau, era a vaqaqara e na vei tolonisala, ia era a sega ga ni kunei rau.
23 Rau sa qai lesu tale na tagane. Rau a siro sobu mai na ulunivanua, rau taubale kosova na uciwai, rau qai yaco yani vei Josua na luve i Nuni, rau qai tukuna vua na ka kece a yaco vei rau. 24 Rau qai kaya vei Josua, “Na TURAGA (Yahweh) sa solia dina na vanua kece oqo, i ligada; o ira kecekece na tamata era sa waicala tu e na domobula baleta na nodra ravataki keda.”

Josua 2: 22-24



Also Read If Possible (Wilika Talega Ke Rawa)
Matthew 1: 1-6; Hebrews 11:31; James 2:25

Mo Kaukaua ka Yaloqaqa (Be Strong and Courageous).

Serving for the 6th July, 2008

Ni sa mate oti o Mosese na italai ni TURAGA (Yahweh), sa qai vosa na TURAGA (Yahweh) vei Josua na luve i Nuni, na ivukevuke dauveiqaravi nei Mosese. 02 “O Mosese na noqu italai sa mate. Ia qo, moni sa vakavakarau, o iko vata kei ira na tamata qo moni sa takosova na Joritani, i na qele au sa na solia vei ira -- vei ira na kai Isireli. 03 Au na solia vei kemuni na vanua kece e butuka na yavamuni, me vaka au a bubuluitaka vei Mosese. 04 Na kemuni qele me na tekivu mai na vanua dravuisiga me yaco sara i Lepanoni, ka vaka kina mai na uciwai levu na Uferetisi – bau kina na qele vakaHitaiti, me yala sara i na wasawasa levu e na idromudromu ni siga, me sa na nomu matavura. 05 E sega ni dua na tamata e rawa ni tu me saqati iko e na veisiga kece ni nomu bula: Me vaka ga niu a tiko vata kei Mosese, au na tiko tale ga vata kei iko; au na sega ni biuti iko, au na sega ni drovaki iko. 06 Mo tu kau­kaua ka mo yaloqaqa, baleta vei ira na tamata oqo, o iko o na wasea na vanua me kedra dui i ivotavota, me vaka au a bubuluitaka vei ira na nodra qase, niu na solia vei ira. 07 Mo tu kaukaua ka mo yaloqaqa vakalevu sara. Qarauna mo talairawarawa i na ivakaro kece e a vakarota vei iko o Mosese na noqu italai: kakua ni gole tani mai kina, i na imatau se i na imawi, me rawa ni o tamata daurawaka e na vanua kece o lako kina. 08 Kakua sara ni laiva me yali mai gusumu na iVola ni Lawa oqo; dau vakasamataka e na siga kei na bogi, me rawa kina ni o dau qaqarauni mo cakava na ka kece e volai tu kina. Qori ga o na qai tiko vinaka kina, ka daurawaka. 09 E sega beka ni o Au, au vakaroti iko tiko? Mo tu kaukaua ka mo yaloqaqa. Kakua ni domobula; kakua ni yalolailai, baleta na TURAGA (Yahweh) na nomu Kalou (Elohim) e na dau tiko vata kei iko e na vanua cava ga o lako kina.”

Josua 1:1-9




Also Read If Possible (Wilika Talega Ke Rawa)
Deuteronomy 11:22-25, Psalms 1; 19; 119;
1 Corinthians 16:13-14; Hebrews 3:1-6.

Sosomitaki Mosese o Josua (Joshua Takes Over From Moses)

Sa qai lako o Mosese qai lai tukuna na vosa oqo vei ira na Isireli: 02 Sa qai kaya vei ira, “Au sa yabaki duanadrau ruasagavulu e na siga oqo; Au sa sega ni rawa ni toso yani ka toso mai. Na TURAGA (Yahweh) talega sa tukuna oti vei au, ‘O sa na sega ni takosova na Joritani.’ 03 Na TURAGA (Yahweh) na nomuni Kalou (Elohim) e na liu vei kemuni i yasana kadua. O Koya e na lai vakarusai ira na veimatanitu e matamuni, oni sa na qai lai taura na nodra vanua. “O Josua talega e na takoso eliu vei kemuni, me vaka sa kaya na TURAGA (Yahweh). 04 Na TURAGA (Yahweh) e na cakava vei ira na ka vata a cakava vei Saihoni kei Oki, na nodra tui na Amoraiti, ni a vakarusai rau vata kei na nodrau vanua. 05 E na soli i ira vei kemuni na TURAGA (Yahweh), moni qai cakava vei ira na veika kece au sa vakarota oti vei kemuni. 06 Mo ni kaukaua ka yaloqaqa tiko. Kakua ni domobula se lamutaki ira, baleta na TURAGA (Yahweh) na nomuni Kalou (Elohim) e na lako tiko vata kei kemuni; e na sega vakadua ni biuti kemuni se drovaki kemuni. 07 Oti sa qai kacivi Josua o Mosese, qai kaya vua ni ra tiko kece na Isireli, “Mo kaukaua ka yaloqaqa tiko, baleta o sa na lako tiko vata kei ira na tamata oqo i na vanua a bubuluitaka na TURAGA (Yahweh) vei ira na noda qase ni na solia vei ira, mo na qai lai wasea vinaka vei ira me nodra i ivotavota. 08 Na TURAGA (Yahweh); o koya e na liu tiko vei iko, ka na tiko vata kei iko; e na sega ni biuti iko se drovaki iko. Kakua ni domobula; kakua ni yalolailai. 09 A vola sara na lawa oqo o Mosese qai solia vei ira na bete, o ira na luvei Livai, o ira era a colata na kato ni veiyalayalati ni TURAGA (Yahweh), vei ira talega na qase kecekece ni kawa Isireli.
Vakarua 31:1-9




Also Read If Possible (Wilika Talega Ke Rawa)
Lekutu 21:21-35; Vakarua 2: 24-3:17;
I Tui 8:54-57; Iperiu 13: 5-6.

Lomana Na TURAGA Na Nomu Kalou. (Love Yahweh Your Elohim)

I dedicate today's Scriptural Reading to the People of the United of America whereever they maybe living on this planet.

Serving for the 4th July, 2008

Oqo na ivakaro, na lewa kei na lawa, e vakarota vei au na TURAGA (Yahweh) na Kalou (Elohim), meu vakatavulica vei kemuni mo ni dau vakayacora e na vanua, oni sa lako tiko kina moni lai taukena, 02 me rawa kina vei kemuni, vata kei ira na luvemuni, kei ira na luvedra era na muri i ira mai, moni rerevaka na TURAGA (Yahweh) na nomuni Kalou (Elohim), e na veigauna oni bula tiko kina e na nona lewa kei na nona ivakaro au na solia vei kemuni, moni na rawa kina ni bula dede. 03 Rogoca vinaka i Isireli, qai qarauna moni talai rawarawa me rawa ni lako vinaka na veika kece vei kemuni, ka me levu na nomuni tubu e na vanua e dave kina na wainisucu kei na oni, me vaka a yalataka na TURAGA (Yahweh) na nodra Kalou (Elohim) na nomuni qase. 04 Rogoca Isireli: Na TURAGA (Yahweh) na noda Kalou (Elohim), na TURAGA (Yahweh) e dua ga. 05 Lomana na TURAGA (Yahweh) na nomuni Kalou (Elohim) e na lomamuni taucoko, kei na yalomuni taucoko, kei na nomuni kaukaua taucoko. 06 Na ivakaro au sa solia vei kemuni edai, me dei tiko e lomamuni. 07 Vakabibitaka vei ira na luvemuni. Veitalanoataka e na gauna o dabe tiko kina mai vale, kei na gauna o taubale tiko kina e gaunisala, e na gauna davo sobu kina kei na gauna o matacake mai kina. 08 Vesuka me ivakatakilakila e na ligamuni, ka vauca e na yadremuni. 09 Vola e na duru ni isogo ni nomuni veivale ka vola talega e na nomuni matamata.
Vakarua 6:1-9


Oilei, au dau taleitaka na nomuni lawa! Au dau vakasamataka e na loma-ni-siga taucoko.
Same 119: 97




Also Read If Possible (Wilika Talega Kevaka E Rawa
Deuteronomy 10:12-16; 11:18-21; Psalms 1:119; Proverbs 22:6;
Mark 12:28-34;
Luke 10:25-28; I Joni 5:1-4

Veisausaumi vei ira na kai Mitiani. (Revenge upon the Midianites)

Serving for the 3rd July, 2008

E vosa vei Mosese na TURAGA (Yahweh) ni kaya, 02 “Sauma lesu mada vei ira na Mitiani na ca era a cakava vei Isireli. Oti oya o na qai lesu tale vei ira na kai nomu.” 03 Sa mani vosa vei ira na tamata o Mosese, “Vakayaragitaki ira eso nomuni tamata me ra lai valuti ira na Mitiani, me ra vakayacora na veisausaumi ni TURAGA (Yahweh) vei ira na kai Mitiani; 04 vakauta ki na ivalu e tauya dua na udolu na tagane mai na veimataqali yadudua ni Isireli.” 05 E a le tinikarua na udolu na tagane era a vakayaragitaki ki na ivalu, oya era a tauya dua na udolu mai na veimataqali kece i Isireli.
- Lekutu 31:1-5

Era a qai valuti ira na Mitiani, me vaka na ivakaro ni TURAGA (Yahweh) vei Mosese, era qai vaqeyavu ira vakadua na tagane. 08 Era a vakamatei ira kece na tui mai Mitiani, bau kina o Evai, o Rekemi, o Sura, o Hura vata kei Repa o ratou na tui limalima ni Mitiani. O Pelami talega na luvei Peoa, era a vakamatea e na iseleiwau. 09 Ia, era a kau vakabobula o ira na yalewa kei na lalai ni Mitiani, o ira na Isireli, ka tokitaka talega na nodra bulumakau, na nodra sipi kei na nodra iyau tale eso na kai Mitiani, me nodra icovi ni ivalu. 10 Era qai vakama na nodra veikoro era vakaitikotiko kina na kai Mitiani, vata kei na nodra valecere talega.
- Lekutu 31:7-10

O Mosese, o Iliesa na bete vata kei ira na vei turaga ni yavusa era a lai tavaki ira na lesu mai na ivalu e na i bili ni keba. 14 A qai cudruvi ira na turaganivalu, O Mosese, oya o ira na era turaganivalu ni yaudolu, kei na turaganivalu ni yadrau, era a lesu tiko mai na ivalu. 15 “Oni vakatara beka me ra bula o ira na yalewa kecekece?” e taroga o koya. 16 “O ira sara ga qo era a vakamuria na ivakasala nei Pelami, era qai vakavuna na nodra tavuki tani mai vua na TURAGA (Yahweh) o ira na Isireli, qai lai vakavuna sara na tubu ni matedewa vakaitamera a veitauvi vei ira na tamata ni TURAGA (Yahweh).”
- Lekutu 31:13-16

Also Read If Possible (Wilika Talega Ke Rawa)
Numbers 25; Deuteronomy 21:10-14; Joshua 13:16-22;

Judges 6-8; Romans 12:16-21.

Veilewai Baleta na iValavala Ca. (Judge due to Sins)

Serving for the 2nd July, 2008

E na gauna era a tiko voli kina mai Sitimi o ira na Isireli, era a qai tekivu me ra dau veidauci kei ira na goneyalewa ni Moapi, 02 o ira na nodra tagane, era mani sureti talega me ra lai vakacabo isoro vei ira na nodra kalou (elohim). Era mani kana na tamata ka cuva vei ira na nodra kalou (elohim) na goneyalewa. 03 Era a mani sokalou talega vua na Pieli nei Peoa, o ira na kai Isireli. Qo a qai udreva na nona levaci ira na TURAGA (Yahweh). 04 E kaya sara na TURAGA (Yahweh) vei Mosese, “Kauti ira na nodra iliuliu na tamata oqo, qai vakaliligi ira cake e na mata ni Kalou (Yahweh), e na matanisiga, me vukica laivi na nona cudruvi ira na Isireli na TURAGA (Yahweh). 05 Sa mani vosa o Mosese vei ira na turaga ni lewa ni Isireli, “Vakamatei ira kece na nomuni tamata era sokalou tiko vei Pieli nei Peoa. 06 Ia raica e dua vei ira na luvei Isireli, a lako mai qai kauta tiko mai vei ira na wekana e dua na goneyalewa ni Mitiani, ni ra rai sara tu ga, ka tagilagalaga tiko e na mata ni Valelaca ni Veitavaki, o Mosese vata kei ira na lewe ni yavusa Isireli. 07 Ia ni raica qori o Finiasi na luve i Iliesa, na luve i Eroni na bete, sa biuti ira sara ga mai na soqo, taura mai ligana e dua na moto, 08 qai muria na kai Isireli i na nona valelaca, qai cokai rau ruarua e na moto – na kai Isireli kei na gone yalewa, me curu basikata na ketedrau. Qori sa qai tarova na matedewa mai vei ira na kawa i Isireli. 09 Ia o ira era a mate e na matedewa e ruasagavulu ka va na udolu (24,000) na kedra iwiliwili.
Lekutu 25:1-9

Dro yawa mai na veiyacovi e taudaku ni vakawati. Na ivalavala ca kece e vakayacora na tamata, e caka e taudaku ni yagona; ia o koya e veidauci e valavala ca sara ga e loma ni yagona o koya vakataki koya. 19 De o sega ni kila ni yagomuni e nona valenisoro na Yalo Tabu e tiko e lomamuni ni a soli vei kemuni maivua na Kalou (Yahweh); o kemuni oni sega ni taukeni kemuni vakataki kemuni? 20 Oni sa voli oti e na dua na isau; ka sa dodonu ga moni vakarokorokotaka na Kalou (Elohim) e yagomuni kei na yalomuni baleta e rau nona na Kalou (Elohim).
- I Korinica 6:18-20



Also Read If Possible (Wilika Talega Ke Rawa)
Deuteronomy 4:1-4, Josuha 22:16-20; Psalms 106:28-31;

Hosea 9:10; 1 Corinthians 10:1-8

Vakalougatataki Isireli o Pelami (The Blessing of Israel by Ballam)

Serving for the 1st July, 2008

Ni qai rai cake yani o Pelami, a qai raici ira na Isireli ni ra sa keba tu mai vakavakamataqali, ia ni qai curumi koya na YaIo ni Ka­lou (Elohim), 03 sa qai cavuta na nona itukutuku ni kaya; “Na itukutuku nei Pelami, na luve i Peoa, na nona itukutuku e dua, e matata tu na rai ni matana, 04 na nona itukutuku e dua e rogoca na vosa ni Kalou(El), o koya e raica na raivotu mai vua sa Cecere (Almighty) sara o koya e a lutu sobu ni rebo, qai dolavi na matana: 05 “Sa totoka dina na nomu veivale laca, i Jekope, na nomu loqi tabu, i Isireli! 06 “E vaka na veibucabuca na vanua e teteva yani, era vaka na iteitei e bati ni uciwai, e vaka na yasiyasi e tea na TURAGA (Yahweh), era vaka na sitari e bati ni wai. 07 Na wai era na drodro mai na kena vokete: na soredra e na levu na kena wai. Na nodra tui e na cecere cake vei Ekaki, na nodra matanitu e na vakacerecerei. 08 Na Kalou (El) a kauti ira laivi mai Ijipita; e tiko vei ira na kaukaua ni bulumakau kila: Era tilomi ira na veimatanitu era veimecaki, ka vorolaka na suidra me vurumemea, e na gasau ni dakaititi era sualaki ira. 09 Me vaka na laione era roso, era qai davo sobu, me vaka na laione yalewa -- o cei e na bole me lai vakasagai ira? “O ira era vosa vakalougatataki iko, me ra na kalougata o ira era vosa vakaloucataki iko, me ra na kalouca!”
- Lekutu 24:2-9




Also Read If Possible (Wilika Talega Ke Rawa)
Genesis 12:1-3; 22:15-18; 27:26-29; Deuteronomy 23:3-5;

Joshua 13:22; 24:8-10; Revelation 2:12-14