Na iYau Mai Lomalagi (The Treasure in Heaven)

Serving For the 31st October, 2008

Ia, e dua na iliuliu a qai tarogi Koya ni kaya, “Vakavuvuli vinaka, na cava beka meu cakava, meu rawata kina vakaitaukei na bula tawamudu?” 19 Kaya vua o Jisu (Yahshua), “Na cava o vakatokai Au kina Niu vinaka? E sega ni dua e vinaka, vakavo ga e Dua, oya na Kalou (Elohim)!” 20 O iko o sa kila na ivakaro; ‘Kakua ni laba’, ‘ Kakua ni veidauci’, ‘Kakua ni butako’, ‘Kakua ni veibeitaki vakailasu’, ‘Dokai rau o tamamu kei tinamu?’ 21 Kaya vua o koya, “Na ka kece oqori au a dau vakamuria, mai na gauna au se gone lailai kina.” 22 Ia o Jisu (Yahshua) ni rogoca qori, e qai kaya vua, “E se leqa tiko vei iko e dua na ka. Volitaka na ka kece e nomu, veivotayaka vei ira na dravu­dravua me tu na nomu iyau mai lomalagi; oti qai lako mai, mo mai muri i Au.
23 Ni rogoca qori o koya, e a yalorarawa kina vakalevu, baleta o koya e dua na tamata vutuniyau. 24 Ia ni raica o Jisu (Yahshua) ni sa bikai koya na rarawa, a qai kaya tale, “Sa dredre dina ga vei ira era vakaiyau, me ra curu i na matanitu ni Kalou (Elohim)! 25 “E na rawarawa cake me vakacurumi na dali vuti ni kameli i na mata ni icula, e na dredre vua e dua na tamata vutuniyau me curu i na matanitu ni Kalou (Elohim).” 26 O ira era rogoca qori era qai taroga, “O cei ga e na rawa ni vakabulai?” 27 Sauma o Jisu (Yahshua), “Na ka kece e sega ni rawa vua na tamata, e rawa vua na Kalou (Elohim).” 28 Kaya o Pita, “Raica, keitou sa biuta tu yani na ka kece, me keitou muri i Kemuni.” 29 Sauma vua Jisu (Yahshua), “Na ka dina, Au kaya vei kemudou, e sega ni dua e biuta tu yani na nona vale, se nona itubutubu, se tacina, se watina, se o ira na luvena e na vuku ni matanitu ni Kalou (Elohim), 30 “e na sega ni ciqoma vakalevu e na gauna oqo vata kei na itabagauna e sebera mai na bula tawamudu.”
Luke 18:18-30.




Also Read If Possible (Wilika Talega Ke Rawa)
Exodus 20:12-16; Deuteronomy 5:16-20; Matthew 19:16-30;
Mark 10:17-31; 1 Corinthians 13:3.

Na iVakavuvuli Nei Jisu Me Baleta Na Vakamau Kei Na Veibiu (Yahshua’s Teaching About Marriage)

Serving for the 30th October, 2008

O ira talega na Farisi era qai lako yani vua me ra lai vakatovolei Koya, era qai tarogi Koya, “E dodonu beka vakalawa vua e dua na tagane me biuti watina, e na dua ga na iulubale e rawa?” 04 Sauma qori o Koya ni kaya vei ira, “Oni se sega beka ni wilika ni o Koya e a buli i rau mai na ivakatekivu, ‘a buli rau me dua e tagane, ka dua e yalewa,’ 05 qai kaya, ‘Oqo na vuna, me biuti tamana kina kei tinana e dua na tagane me lai vakaduavatataki vei watina yalewa, me rau sa ledua ga vakayago’? 06 “Me tekivu mai na gauna oya, rau sa sega ni lerua tale tiko, rau sa duavata vakayago; ia na ka sa semata vata na Kalou (Elohim), na tamata me kakua ni tawasea” 07 Era baci tarogi Koya tale, “Ia na cava ga qai vakarota kina o Mosese, me solia ga e dua na ivolasui ni sere, oti qai biuti watina laivi?” 08 Sauma o koya vei ira, “O Mosese, ni nanuma na babamatua ni vuniyalomuni, a vakadonuya vei kemuni moni sere mai vei watimuni, ia mai na ivakatekivu, qori a sega ni dau vaka kina. 09 “Au kaya vei kemuni, ni o koya e biuti watina me rau sere, vakavo ke tiko na veibeitaki ni veidauci, me lai vakamau kei na dua tale e cala e na veidauci; ia o koya e vakamautaki koya e veibiu mai, e cala talega e na veidauci.” 10 O ratou na Nona tisaipeli e ratou qai kaya Vua, “Kevaka e vereverea tu vaqori na leqa e na kedra maliwa na tagane kei na yalewa, sa na vinaka ga me kua na vakamau!” 11 Kaya vei iratou o Koya, “Na vosa qo e sega ni kovuta na tamata kece, ia vei ira ga era coko tiko e loma. 12 “Era tu o ira era iunuku (eunuch) mai ketei tinadra; ka tu eso era iunuku baleta a caka vakatamata me ra iunuku, ka tiko eso era na sega ni vakamau, ka tu o ira na iunuku era nakita vakataki ira me ra iunuku e na vuku ni matanitu vakalomalagi. O koya e rawa ni ciqoma, qori sa rauta.”
Maciu 19:3-12.

Also Read If Possible (Wilika Talega Ke Rawa)
Genesis 1:27; 2:24; Deuteronomy 24:1-4; Malachi2:13-16;

Mark 10:2-12; Luke 16:18.

Veivakabulai E Na Siga Ni Vakacecegu O Jisu (Yahshua Heals During The Shabbat)

Serving For the 29th October, 2008

Ni veivakatavulici tiko o Jisu (Yahshua) e na dua na valenisoro e na siga ni vakacecegu; 11 raica, e dua na marama a tiko kina, sa tinikawalu na yabaki na kena tiko vua e dua na mate ni sui, ka sa kalobi tu vakaca na yagona, sa sega tu kina ni duri cake rawa vakadodonu. 12 Ia ni raici koya o Jisu (Yahshua), e a kacivi koya qai kaya vua, “Yalewa o sa vakabulai mai na kemu mate!” 13 E tabaki koya e na Ligana, qai duri cake vakadodonu e na gauna vata oya, ka vakavinavinaka vua na Kalou (Elohim). 14 Ia na ivakatawa ni valenisoro a leva­taka na ka a yaco qo, baleta ni a veivakabulai e na siga ni vakacecegu o Jisu (Yahshua); qai kaya vei ira na le vuqa, “E ono na siga e dodonu me cakacaka kina na tamata; e dodonu ga moni lako mai e na veisiga oqori moni mai vakabulai, ia me kakua ga e na siga ni vakacecegu.” 15 Sauma vua o Jisu (Yahshua) ni kaya, “Oilei na dauveivakaisini! O kemuni yadudua, oni sega beka ni dau sereka na nomuni bulumakau se asa mai na nodra vanua ni kana, e na siga ni vakacecegu, moni tuiyi ira me ra lai gunu? 16 “O koya oqo na luvei Eparayama yalewa, ia raica na dauniveisaqa sa vesuki koya tu me tinikawalu na yabaki; e sega beka ni dodonu ga me sereki mai na ivau oqo e na siga ni vakacecegu?” 17 Ia ni kaya oti na veika oqori, o ira kece era dau saqati Koya era qai tini madua; ia o ira na tamata era a marautaka vakalevu na veika lagilagi sa vakayacora tiko e ligana.
Luke 13:10-17.

Also Read If Posible (Wilika Talega Ke Rawa)
Exodus 20:8-11; Matthew 12:1-14; John 5:1-18 Luke 6:1-11; 14:1-6;

Mark 2: 23-3:3.

Taleitaki Ira na Lalai O Jisu (Yahshua Loves Little Children)

Serving for the 28th October, 2008

Oti, qai tubu e dua na veileti e na kedratou maliwa se o cei e cecere duadua e na kedratou maliwa. 47 Ia o Jisu (Yahshua) a siqema na vakasama ni vuniyalodratou qai kauta mai e dua na gone lailai, cakava me duri tu e Yasana, 48 qai kaya vei iratou, “O ira kece era ciqoma e dua na gone lailai vakaoqo e na vukuni Yacaqu, e ciqomi Au; ia o koya e ciqomi Au, e ciqomi Koya e a talai Au mai. Baleta o koya e lolovira duadua e na kemudou maliwa, e na yaco me cecere duadua.”
Luke 9:46-48.

Oti era qai kauti ira mai na gone lalai Vua, me mai tabaki ira o koya; ia o ratou na tisaipeli, ratou qai vosataki ira era kauti ira tiko mai. 14 Ni raica qori o Jisu (Yahshua), e a sega ni taleitaka, qai kaya vei ira, “Laivi ira na gone lalai me ra lako mai vei Au, kakua ni tarovi ira; baleta na matanitu ni Kalou (Elohim) e nodra o ira na mataqali vaka oqo. 15 Na ka dina Au kaya vei kemudou, o koya e sega ni ciqoma na matanitu ni Kalou (Elohim) me vaka e dua na gone lailai, e na sega ni curu kina.” 16 E qai keveti ira o Koya, tabaki ira e na Ligana, qai vakalougatataki ira.
Marika 10:13-16.


E na tikinigauna oqori, e a curumi Jisu (Yahshua) kina e dua na marau e na Yalo Tabu qai kaya, “Au vakavinavinaka vei Kemuni Tamaqu, Kalou (Sovereign) kei lomalagi kei vuravura, ni Oni vunitaka na veika oqo mai vei ira na vuku kei ira na qaseqase, Oni qai vakaraitaka ga vei ira na gone dramidrami; io, Tamaqu, baleta ni talei e Matamuni! 22 Oti qai vuki vei iratou na nona tisaipeli qai kaya, “Na ka kecekece sa nuitaki oti tu vei Au, maivei Tamaqu, ka sega ni dua e kila se o cei na Luvena, vakavo ga o Tamana; e sega talega ni dua e kilai Tamana vakavo ga o Luvena, vata kei koya e digitaka o Luvena me vakatakilai Koya vua.”
-Luke 10:21-22.

Also Read If Possible (Wilika Talega Ke Rawa)
Psalms 127:3-5; Matthew 18:1-14; 19:13-15;
Mark 9:33-37; Luke 18:15-17.

Vakatavulica Na iWalewale Ni Masu O Jisu (Yahshua Teaches A Prayer Methodology

Serving for the 27th October, 2008.

A qai yaco ni a masu tiko o Koya e na dua na vanua, e na gauna me tinia kina na Nona masu, ni dua vei iratou na nona tisaipeli a qai mai kaya Vua, “Neitou Turaga (Master), vakatavulica vei keitou na masu, me vaka a cakava o Joni vei ira na nona tisaipeli.” 02 Kaya vei iratou o Jisu (Yahshua), ‘Ni dou sa masu, masu vaqo: Tamai keimami mai lomalagi, Me vakarokorokotaki na Yacamuni. Na nomuni matanitu me yaco mai. Na Nomuni lewa, me yaco e vuravura me vaka ni dau yaco mai lomalagi. 03 Solia mai na madrai e yaga vei keimami e na veiveisiga. 04 Vosoti keimami e na vuku ni neimami ivalavala ca, baleta keimami dau vosoti ira kecekece era caka ca vei keimami. Kakua ni laiva me keimami curu i na vere, ia vueti keimami ga mai na veika e tawadodonu. 05 Oti sa qai kaya vei ira, “O cei vei kemuni e dua tiko na nona itau, e rawa ni lako vua e na lomaloma ni bogi me lai kerea vua, ‘Noqu itau, solia mada mai vei au e tolu na ibuli, 06 ‘baleta e dua na noqu vulagi e se qai yaco ga mai oqo, mai na nona ilakolako, qai sega ni dua na ka e tu vei au meu vakarautaka vua’; 07 “e na sega beka ni sauma mai loma o koya, ‘Kakua ni vakaogai au; na katuba levu sa sogo, o ratou na luvequ eratou sa tiko qo vata kei au, me keitou moce. Au na sega ni duri rawa tale yani meu lai soli madrai vei iko.’ 08 “Au kaya vei kemudou, e dina ga ni na sega ni duri cake me lai solia vua e dua na ka baleta ni nona itau o koya, ia e na nona cikecike ga e na duri cake mai kina me lai solia na veika cava ga e gadreva. 09 “Au kaya vei kemudou, ‘Kerea e na soli vei iko; vaqara o na kunea, tukituki e na dola vei iko.’
Luke 11:1-9.







Also Read If Possible (Wilika Talega Ke Rawa)
Psalms 89:19-29; Isaiah 9:6-7; Mathew 6:6-13; 7:7-11; Revelation 3:14-22.

Na Vakabauta Lailai Kei Na Cakacaka Levu (Little Faith and Huge Work)

Serving for the 26th October, 2008

Ni ratou yaco yani vei ira na tamata, a qai toro mai Vua e dua na tagane, tekiduru Vua qai kaya,
15 “Noqu Turaga (Master), ni bau lomani au; na luvequ tagane e tauvi koya tiko na manu­manu soni ia sa qai cacalaivi tikoga; sa vakawasoma na nona dau lutu i loma ni buka­waqa ka vakawasoma talega i loma ni wai. 16 “Au mani kauti koya mai vei iratou na Nomu tisaipeli, ia eratou qai sega ni vakabulai koya rawa.” 17 Sauma o Jisu (Yahshua) ni kaya, “Oilei, na itabatamata vaka­bauta lalai, sakasakavakatani; e na vakacava soti na dede ni Noqu tiko vata kei kemuni; e na vakacava na dede ni Noqu vunau tiko vei kemuni? Kauti koya mai ke vei Au.” 18 A qai vosataka o Jisu (Yahshua), qai curu tani mai vua na jimoni; sa qai bula na gone mai na tikinigauna oya. 19 Oti eratou qai lako vei Jisu (Yahshua) ni toka duadua, o ratou na tisaipeli, ratou qai kaya, “Na cava beka keitou a sega ni vakabulai koya rawa kina?” 20 Kaya vei iratou o Jisu (Yahshua), “Baleta ni sega na nomudou vakabauta; na ka dina Au kaya vei kemudou, ke tautauvata kei na sore ni musita na nomudou vakabauta, dou na tukuna vua na ulunivanua oqo, ‘Toso laivi mai keri, e na qai toso; ka na sega ni dua na ka e na rawai kemudou. 21 “Ia na kena mataqali vakaoqo, e sega ni talaci rawa, vakavo ga e na masumasu kei na lolo.” 22 ¶ Ia, e na gauna eratou lesu tiko kina ni ratou takosovi Kaleli tiko, a qai kaya vei iratou o Jisu (Yahshua), “Na Luve ni Tamata sa vakarau volitaki i ligadra na tamata, 23 “era na qai vakamatei Koya, ia e na ikatolu ni siga e na qai vakaturi.” Eratou a rarawa dina kina vakalevu.
Maciu 17:14-23


“E dina e dina na ka Au kaya vei kemudou, o koya e vakabauti Au; na cakacaka Au cakava, e na cakava talega o koya; ia e na cakacaka lelevu cake sara mai na kena sa yaco tiko, baleta Au na lesu tale vei Tamaqu.13 “Na veika cava ga oni kerea e na Yacaqu, qori Au na cakava, me vakalagilagitaki kina o Tamada, e na vukuni Luvena tagane”.
Joni 14:12-13.

Also Read If Possible (Wilika Talega Ke Rawa)
1 Samuel 16:14-23; Mark 9:14-32; Luke 9:37-45; Romans 4:18-21;

Romans 11:1-23; Hebrews 3:16-19

Na Veivakamataliataki (The Transformation)

Serving for the 25th October, 2008

Ni oti e ono na siga, o Jisu (Yahshua) a qai kauti ratou o Pita, o Jemesa kei Joni i na dua na ulunivanua cere, me ratou lai tu vakatikitiki tu kina vakataki ratou; oti qai veisautaka na kena irairai e matadratou. 03 Na Nona isulu e caliva, ka vulavula me vaka na uca cevata, oya na vulavula e sega ni dua na tamata e vuravura e rawa ni cakava. 04 Oti rau qai rairai o Ilaiya vata kei Mosese, ni rau vosa tiko vei Jisu (Yahshua). 05 Kaya o Pita Vua, “Vakavuvuli, e vinaka dina vei keitou ni keitou tiko talega eke; laiva me keitou tara e tolu na vale tabatabanikau, me dua e Nomuni, me dua na nei Mosese, ka dua na nei Ilaiya.” 06 Qo a sega ni kila se cava a kaya tiko, e na ilevu ni nodratou domobula. 07 Oti, qai kovuti ratou e dua na o; qai rogo mai na o oya e dua na domo ni kaya, “Oqo na Luvequ daulomani. Rogoci Koya!” 08 E vakasauri, ni ratou qai veiraiyaki, eratou sa sega ni raica e dua tale, vakavo ga o Jisu (Yahshua), ni tu vata kei iratou. 09 Ia, ni ratou siro tiko mai na ulunivanua, a qai vakaroti ratou o Koya, me ratou kakua ni tukuna vua e dua, na veika ratou a raica, me yacova ni sa vakaturi mai na mate, na Luve ni tamata. 10 Eratou a mani dau vakamuria tiko vakataki ratou na vosa oqo, ia ratou a via kila ga se cava na ibalebale ni vakaturi mai na mate.
Marika 9:2-10

Ia na Vosa a qai yaco me yago, qai mai vakaitikotiko e na keda maliwa, (keitou qai raica na Nona lagilagi, na lagilagi e kune duadua ga Vua e vakatubura na Tamada), ka levu tu Vua na loloma kei na dina.
Joni 1:14



Also Read If Possible (Wilika Talega Ke Rawa)
Exodus 40:33-35; Matthew 17:1-9; Luke 9:28-36; Romans 16: 25-27;

1 Timothy 1:17; Jiuta 24:25

O Cei O Jisu? (Who Is Yahshua?)

Serving for the 24th October, 2008

Ia o Jisu (Yahshua) ni sa yaco i na yasayasa o Sisaria mai Filipai, a qai tarogi ratou na Nona tisaipeli ni kaya, “O cei beka o Au, na Luve ni Tamata, e na nodra nanuma na tamata.” 14 Eratou kaya, “Eso era kaya o Joni na dauveipapitaisotaki, eso o Ilaiya, kei na kena vo o Jeremaia se dua vei ira na parofita.” 15 E kaya tale vei iratou, “Ia vakacava o kemudou, o cei dou kaya ni o Au?” 16 Sauma qori o Saimoni Pita ni kaya, “O Kemuni saka na Mesaia, na Luve ni Kalou (Elohim) bula.” 17 Sauma o Jisu (Yahshua) ni kaya vua, “Me nomu na kalougata Saimoni Para-Jona; baleta na lewe kei na dra a sega ni vakatakila oqori vei iko, ia o Tamaqu ga e vakai­tikotiko mai lomalagi.” 18 “Au na kaya talega vei iko, ni o iko o dua na vatu, ia e na dela ni vatu oqo, Au na tara kina na Noqu lotu; na matamata mai Sheola (Sheol) e na sega ni kinoca rawa. 19 “Au sa na solia vei iko na idola ni matanitu vakalomalagi; na cava ga o vauca e vuravura, e na vauci mai lomalagi, kei na cava ga o sereka e vuravura e na sereki mai lomalagi. 20 Oti, qai vakaroti ratou na Nona tisaipeli, me ratou kakua ni tukuna vua e dua, ni o Koya na Mesaia. 21 Me tekivu mai na gauna oya, o Jisu (Yahshua) sa tekivu me vakaraitaka vei iratou na Nona tisaipeli, ni sa voleka ni lako i Jerusalemi, me lai vakararawataki vaka­levu e ligadra na qase, na bete levu, kei na vunivola, oti me qai vakamatei, ia me na tucake tale e na ikatolu ni siga.
Maciu 16:13-21





Also Read If Possible (Wilika Talega Ke Rawa)
Isaiah 52:14-15; Mark 8:27-33; Luke 9:18-22;
John 6:67-71.

Vakania E Le Limanaudolu O Jisu (Yahshua Feeds Five Thousands)

Dedicated to Diana Whippy and Gabriel Naigulevu who are getting married today.

Serving for the 23rd October, 2008

Ia ni matacake o Jisu (Yahshua), a qai raica na ibinibini tamata levu era sa toso tiko mai Vua, qai kaya vei Filipe o Koya, “Evei beka tou na voli madrai kina me ra na kania o ira qo?” 06 Qo a kaya o Koya me vakatovolei koya kina, baleta o Koya vakataki Koya sa kila tu na ka me na cakava. 07 Sauma Vua o Filipe, “Ke tou volia mada ga ruanadrau na peni (NKJV $50.00) na ibuli madrai, e na sega tikoga ni rauta, ke vinakati me ra wase vakalalai sara o ira kece qo!” 08 E dua vei ratou na tisaipeli; o Adriu na taci i Saimoni Pita, a qai kaya Vua, 09 “E dua na gone tagane lailai e tiko qo, e tiko vua e lima na ibuli madrai-parile, kei na rua na ika lalai ia e na sega na betena e na kedra maliwa na le vuqa. 10 Kaya vei ira o Jisu (Yahshua), “Cakava me ra dabe kece e ra na tamata.” E veico vinaka tu na vanua oya. Era mani dabe kece na tamata, e rauta e limanaudolu na kedra iwiliwili. 11 Taura na ibuli madrai o Jisu (Yahshua), vakavinavinakataka, qai veivotayaka vei ira era sa dabe tu. E vaka kina na ika, e na kena ilevu ga era vinakata. 12 Ia ni ra sa mamau, a qai kaya o Koya vei iratou na Nona tisaipeli, “Soqona mai na meme ni kakana era sa vo tu, me kakua ni dua na tikina e yali.” 13 Eratou mani tomitomi, ratou qai vakasinaita e tinikarua na sova sisinai na vovo ni lima na ibuli madrai-parile, era a vo tu, maivei ira era a kana. 14 Ia o ira na tamata era raica na cakacaka mana a cakava qo o Jisu (Yahshua), era a kaya, “Oqo dina ga na Parofita e kainaki ni na lako mai i vuravura.
Joni 6: 5-14





Also Read If Possible (Wilika Talega Ke Rawa)
Deuteronomy 8:2-3; Matthew 14:13-21; Mark 6:32-44; Luke 9:10-17.

Na Tatawasewase Kei Na iValavala Ca Tabubokoci (Divisions And The Unpardonable Sin)

Serving for the 22nd October, 2008

Era baci sosoqoni tale yani na le vuqa, qai vakavuna qori na nodratou sa sega mada ga ni kana madrai rawa. 21 Ia o ratou na wekana eratou qai rogoca na veika oqo, ratou qai via lai vesuki Koya mai, baleta eratou kaya, ‘O Koya, sa rairai leqa na uluna!” 22 Ia o ira na vunivola era lako sobu mai Jerusalemi era qai kaya, “E tiko Vua o Pielisipapa”; era kuria “E na nodra ravouvou na jimoni, e cemuri ira tiko kina na jimoni o Koya.” 23 Sa mani kacivi ira vata mai Vua, qai vosa vei ira e na vosa vakatautauvata, “E rawa vakacava vei Setani me cemuri Setani?” 24 “Ke dua na matanitu sa tawase tiko vakataki koya, na matanitu oya e na sega ni tudei rawa. 25 “Ke dua na matavuvale e tawase vakataki koya, na matavuvale oya e na sega ni tudei rawa. 26 Ia kevaka e tu o Setani me valuti koya tale vakataki koya, me sa tawase, e na sega ga ni tudei rawa o koya, baleta sa yacova na nona itinitini. 27 “E sega ni dua e curuma rawa na nona vale e dua na tamata qaqa, me lai kovea na nona iyau, vakavo ke vesuka rawa mada na tamata qaqa oya; oti sa na qai rawa ni vakayayana e loma ni nona vale. 28 “Na ka dina Au kaya vei kemuni, na ivalavala ca kece e na vosoti vei ira na luve ni tamata, ka vaka kina na vosa ni veivakacacani cava ga era kaya; 29 ia o koya e vosa vakacacataka na Yalo Tabu, e na sega ni vosoti rawa, baleta sa coko tu e na itotogi e tawamudu o koya; ia qori a kaya o Koya, 30 qori baleta ni ra kaya Vua, “Sa curumi Koya tu e dua na yalo velavela.”
Marika 3:20-30



Also Read If Possible (Wilika Talega Ke Rawa)
Exodus 22:28; Psalms 106:1-37; Matthew 12:22-37; Matthew 13:53-58;

Mark 6:1-6; Luke 11:14-23; Luke 12:10.

Na Vakabauta Kei Na Veivakabulai (Faith and Healing)

Serving for the 21st October, 2008

Ia ni se vosa tiko e na veika oqori vei ira, raica ni a lako yani e dua na iliuliu ni valenisoro, tama vakarokoroko yani Vua qai kaya, “Na luvequ yalewa e se qai ciba wale toka ga qo, ia Moni lako ga mai, Moni mai tabaka na Ligamuni vua, e na qai bula o koya!” 19 E tu sara o Jisu (Yahshua) vata kei ratou na Nona tisaipeli, me ratou lako vata kei Koya. 20 Ia raica ni a lako mai dakuna e dua na yalewa, sa tinikarua na yabaki na nona tauvi turudra balavu tu, qai tara na bele ni Nona kote balavu; 21 baleta a dau kaya voli e lomana, “Kevaka au tara ga na Nona isulu, au na vakabulai vakadua.” 22 A vuki lesu o Jisu (Yahshua), raici koya, qai kaya vua, “Mo yaloqaqa tiko ga Luvequ yalewa; na nomu vakabauta sa vakabulai iko”; e a bula na yalewa oya mai na tikinigauna oqori. 23 Ia ni yaco yani i nona vale na iliuliu ni valenisoro, o Jisu (Yahshua), qai raici ira na matasere kei ira na tamata ni ra kosakosa tiko, 24 qai kaya vei ira o Koya, “Sa bau rauta mada, baleta na goneyalewa e sega ni mate, o koya e moce lutu no ga”; ia era qai dredrevaki Koya. 25 Ia ni sa vagalalataki ira na tamata me ra lako i tuba, sa qai curu i loma o Koya, taura na ligana, a qai tucake na goneyalewa lailai. 26 Na irogo ni ka oqo, a qai tete i na veivanua kece.
- Maciu 9: 18-26;

Ke dua e na kemuni maliwa e rarawa tiko, laivi koya me masu. Ke dua e mamarau tiko, laivi koya me laga same.14 Ke dua e tauvi mate tiko, laivi koya me kacivi ira na qase ni lotu, qai laivi ira me ra masulaki koya, ni ra lumuti koya tiko e na waiwai, e na yaca ni noda Turaga (Master). 15 Na masu ni vakabauta e na vakabulai ira na tauvi mate, ia na Turaga (Yahweh) e na qai vakaturi koya cake; ia ke a vakayacora na ivalavala ca o koya, qori era na vosoti vua. 16 Vakatusa na nomuni caka ca e na kemuni maliwa, ka dau veimasulaki vakataki kemuni, me rawa ni oni vakabulai. Na mana ni nona masu vagumatua na tamata yalododonu e vakaitamera.
- Jemesa 5: 13-16

Also Read If Possible (Wilika Talega Ke Rawa)
Habakuk 2:4; Matthew 9:27-30; Mark 5:21-43; Luke 7:1-10, 36-50, 40-56;

Luke 17:11-19; Luke 18:35-43.

Lewa Na Cagilaba Kei Na Yalo, O Jisu (Yahshua Commands The Winds and Spirits)

Serving for the 20th October, 2008

Ia ni sa lai vodo e na dua na waqa, o Jisu (Yahshua) e ratou qai muri i Koya yani na Nona tisaipeli. 24 Qai vakasauri na kena tubu e dua na cava kaukaua e wasawasa, a mani vodo na ua i loma ni waqa; ia o Jisu (Yahshua) a moce lutu no ga. 25 Eratou mani toro voleka Vua na Nona tisaipeli, ratou qai kaya, “Turaga (Master), vueti kedatou! Tou sa rusa tiko!” 26 Vosataki ratou o Jisu (Yahshua) ni kaya, “Na cava dou rui domobula kina; baleta beka ni rui lailai na nomudou vakabauta?” Oti, qai matacake me vosa­taka na cagi kei na wasawasa, qai mai maravu tu yani. 27 O ira na tamata era a kidacala era qai kaya “O cei na tamata qo; na cagi mada ga kei na biau era talairawarawa Vua?” 28 Ni yaco yani i na ikelekele ni waqa, mai tai kadua, e na vanua vaka Katarini, rau sa tavaki Koya tu mai e rua na tamata curumi jimoni, rau se qai lako ga mai na ibulubulu. Na nodrau vakadomobula, sa sega kina ni dua e via muria na gaunisala oya. 29 Oti rau qai kaila cake e na domo levu me rau kaya, “Na cava e neimami ka vei Kemuni Jisu (Yahshua) na Luve ni Kalou (Elohim)? Oni lako beka mai, Moni mai vakararawa­taki keimami ni sebera na kena gauna?” 30 Voleka ga e keya, era a kana tu kina e dua na qeleni vuaka vakaitamera. 31 Era kerekere tikoga Vua o ira na jimoni, ni ra kaya, “Kevaka Oni cemuri keimami, ia vakadonuya me keimami lako i na qele ni vuaka.” 32 E kaya o Jisu (Yahshua) vei ira, “Lako”. Ni ra curu laivi mai; e na gauna vata oya era a lakovi ira kina na qeleni vuaka; era qai ciciva na baba tonidromuca oya, na qeleni vuaka taucoko, lutu i loma ni drano, ka luvu vakadua e loma ni wai.

Maciu 8:23-32








Also Read If Possible (Wilika Talega Ke Rawa)
Deuteronomy 14:8; Isaiah 65:1-4; Mark 4:35-5:20;
Luke 8: 22-39.

Vakabulai na Tauvimate; Vosoti Na iValavala Ca (The Sick Are Healed and Sins Forgiven)

Serving For The 19th October, 2008.

A qai yaco e na dua vei ira na siga, ni veivaka­tavulici tiko o Jisu (Yahshua), ni ra a dabe tale toka ga e na kedra maliwa eso na Farisi kei na so na qasenivuli ni lawa, era a lako mai na vei korolevu tale eso mai Kaleli, mai Jiutia vata kei Jerusalemi. Ia na kaukaua ni Kalou (Yahweh) a tiko vua me vakabulai ira kina. 18 Ia eso na tamata era a kauta mai e dua na paralasi e na dua na idavodavo; eratou a segata me ratou lai vako­tori koya sara e matana. 19 Ia ni ratou raica ni sega ni dua na sala me ratou kauti koya kina i loma, baleta na osodrigi ni tamata, ratou qai kaba cake i delanivale, ratou qai lai tukuci koya sobu mai na delavuvu, e na nona idavodavo, me vaka­dodonu sobu e na kedra maliwa, donui Jisu (Yahshua). 20 Ni raica o Jisu (Yahshua) na nodratou vaka­bauta e qai kaya vua na paralasi, “Tagane, na nomu ivalavala ca sa vosoti.” 21 O ira na vunivola kei ira na Farisi era qai tekivu veiba ni ra kaya, “O cei qo e vosa veivakacacani tiko! O cei e rawa ni vosota na ivalavala ca, vakavo na Kalou (Elohim) duadua ga?” 22 E siqema na nodra vakasama o Jisu (Yahshua), qai sauma ni kaya vei ira, “Na cava moni yalotarotaro tiko kina e vuniyalomuni? 23 “Na cava e rawa­rawa me tukuni, ‘Na nomu ivalavala ca sa vosoti,’ se me tukuni ga, ‘Duri cake, lako?’ 24 Ia baleta ni vinakati moni kila ni tu Vua na Luve ni tamata na kaukaua e vuravura me vosota na ivalavala ca” E kaya sara vua na tamata tauvi paralasi, “Au kaya vei iko, tucake, taura na nomu loga, lako i nomu vale.” 25 E na gauna vata qori e tucake kina e matadra o koya, taura na nona loga, qai lesu i nona vale, ni vakavinavinaka tiko Vua na Kalou (Elohim). 26 Na tamata kece era a bikai e na qoroqoro; era qai vakalagilagitaka na Kalou (Elohim), ka vakasinaiti e na rere, ni ra kaya, “Nikua eda sa qai raica eso na ka veivakurabuitaki dina.”
Luke 5:17-26






Also Read If Possible (Wilika Talega Ke Rawa)
Psalms 25:1-11; Micah 7:18; Matthew 9:1-8;
Mark 2:1-12.

Kaciva Ira Na iMatai Ni Tisaipeli O Jisu (Yahshua Calls the First Disciples)

Serving for the 18th October, 2008

A qai yaco e na dua na gauna, ni duri tu e na matasawa ni Drano o Seni­saireti, ni ra a veidrigidrigi wavokiti koya tiko na le vuqa me ra rogoca na vosa ni Kalou (Elohim), 02 a mani raica e rua na waqanisiwa ni rau kele tu e na matasawa ni drano; ia era sa sobu oti na gonedau ka ra sa savuya tiko na nodra lawa ni qoli. 03 E dua vei rau e nei Saimoni Pita; a mani lako kina o Jisu (Yahshua), lai vodo toka kina, qai kerei koya me vocetaka i wai, me lai ciri toka mai wai. Oti qai vakata­vulici ira na le vuqa ni dabe toka mai waqa. 04 Ni sa vosa oti, sa qai kaya vei Saimoni, “Tou toso mada i wai titobu, mo lai kolo na nomu lawa, mo rawata e dua na ka.” 05 Ia o Saimoni qai sauma ni kaya Vua, “Vakavuvuli, keitou a cakacaka tiko e na bogi taucoko, ia keitou sega ga ni qoliva e dua na ka; ia e na vuku ni Nomuni vosa, au sa na kolo tale kina na lawa.” 06 Ia ni ratou vakayacora qori, ratou qai qoliva e vuqa na ika; ka sa tekivu botea na nodratou lawa. 07 E ratou mani yalovi ratou na nodra­tou icaba e na waqa kadua, me ratou mai vukei iratou. Ni ratou sa toso mai, eratou qai vakasinaita na waqa ruarua, me yacova ni rau sa tekivu viavia dromu tale. 08 Ia ni raica qori o Saimoni Pita, a qai tekiduru i na yava i Jisu (Yahshua) qai kaya, “Au vakamasuti kemuni Turaga (Master), biuti au tu ga, baleta o au, au tamata ivalavala ca!” 09 Qori, baleta ga ni a vakidacalataki koya vata kei iratou na nona icaba, na ilevu ni ika eratou qoliva qo; 10 ka vakatalega kina vei rau o Jemesa (Jacob) kei Joni, o rau na luvei Sepati, o rau na icaba nei Saimoni. Ia a qai kaya o Jisu (Yahshua) vei Saimoni, “Kakua ni rere. Me tekivu qo lako yani, o sa na qolivi ira na tamata mo vakabulai ira.” 11 Eratou qai sokotaka lesu mai na nodratou waqa me mai kabi i vanua, ratou qai biuta tu na veika kece me ratou sa muri i Koya.
Luke 5: 1-11






Also Read If Possible (Wilika Talega Ke Rawa)
Psalms 51:1-13; Matthew 4:18-22; Mark 1:16-20; John 1: 35-51.

E Dodonu Mo Na Sucu Tale (It Is Necessary To Be Born Again)

Serving for the 17th October, 2008

A bula voli e keya e dua na tamata, e dua vei ira na Farisi, na yacana o Nikotimo, ka iliuliu e na kedra maliwa na Jiu. 02 O koya a qai lako mai vei Jisu (Yahshua) e na dua na bogi, qai kaya Vua, “Vakavuvuli, kei­mami kila ni o Kemuni Oni ivakavuvuli Oni a lako mai vua na Kalou (Yahweh); baleta e sega ni dua na tamata e rawa ni cakava na cakacaka mana Oni cakava tiko, vakavo ga ke tiko kei koya na Kalou (Elohim).” 03 Sauma o Jisu (Yahshua) ni kaya vua, “Na ka dina Au kaya vei iko, ke dua na tamata e sega ni sucu tale, o koya e na sega ni raica na matanitu ni Kalou (Elohim)!” 04 Kaya o Nikotimo Vua, “E na rawa vakacava vua e dua na tamata me sucu tale ni sa qase tu? E rawa beka vua me curu lesu i ketei tinana, me qai sucu tale?” 05 Sauma o Jisu (Yahshua), ni kaya vua “Na ka dina, Au kaya vei iko, vakavo ke sucu e na wai kei na Yalo e dua na tamata, e na sega ni rawa vua me curu i na matanitu ni Kalou (Elohim).
Joni 3:1-5

Sauma o Nikotimo ni kaya Vua, “E na rawa vakacava na ka qo.” 10 Sauma o Jisu (Yahshua), ni kaya vua, “O iko o qasenivuli vei ira na Isireli, ia o qai sega ni kila na veika oqo?
Joni 3:9-10

“Kevaka Au tukuna vei iko na veika vakavuravura o qai sega ni vakabauta, o na qai vakabauta rawa vakacava kevaka Au tukuna vei iko na veika vakalomalagi? 13 “E sega ni dua e se bau cabe cake i lomalagi vakavo ga o Koya e a siro mai lomalagi, oya na Luve ni Tamata, o koya e tiko mai lomalagi. 14 “Ia me vaka na nona a laveta cake na gata mai lekutu o Mosese, na Luve ni Tamata talega e vinakati me laveti cake vaka kina, 15 “me rawa kina vei ira na tamata yadudua era vakabauti Koya, me ra kakua ni rusa, ia me ra rawata ga na bula tawamudu. 16 “Baleta na Kalou (Yahweh) e na vakataimera ni Nona lomani vuravura, e a solia kina na Luvena duabau a vakatubura, me kakua ni rusa o ira yadua era vaka­bauti Koya, ia me ra rawata ga na bula tawamudu.
Joni 3:12-16



Also Read If Possible (Wilika Talega Ke Rawa)
Numbers 21:1-9; John 1:1-13; 1 Peter 1;
1 John 2:28-29; 3:1-10; 4:7-8; 5.

Na iMatai ni Cakacaka Mana Nei Jisu (Yahshua's First Miracle)

Serving for the 16th October, 2008

E na ikatolu ni siga e a yaco kina e dua na solevu ni vakamau mai Kana e dua na korolevu mai Kaleli; o tinai Jisu (Yahshua) a tiko mai keya. 02 O Jisu (Yahshua) vata kei iratou na Nona tisaipeli eratou a sureti talega i na solevu ni vakamau. 03 E na gauna sa vo lailai kina na waini, a qai mai kaya vei Jisu (Yahshua) o Tinana, “Sa sega vei iratou na waini!” 04 Kaya vua o Jisu (Yahshua), “Na cava e noqu se nomu e na ka qo, Yalewa? Na noqu gauna e sebera ni yaco mai.” 05 Kaya o Tinana vei ira na veiqaravi tiko, “Na ka ga e kaya vei Kemudou o Koya, dou cakava.”
Joni 2:1-5

Kaya vei ira o Jisu (Yahshua), “Tawana na saqavatu e na wai.” Eratou tawani ira sara me ra sisinai. 08 Oti qai kaya o Koya vei ira, “Takiva yani eso ka kauta vua na vulagi dokai ni solevu ni vakamau”. Era kauta sara. 09 Ia na vulagi dokai ni solevu ni vakamau, ni sa tovolea na wai sa vuki tu qo me waini, qai sega tale ni kila se kau mai vei, ia o ira ga na veiqaravi era a lai taki wai mai era kila. Sa qai kaciva na taganevou, o koya na vulagi dokai, 10 qai kaya vua, “Na tamata kece era dau vakarautaka e liu na waini vinaka; ia ni ra sa gunu tiko sa qai vakarau mai na kena e malumalumu sobu; ia o iko, o maroroya tu na waini vinaka me yacova mai oqo.” 11 Oqo na imatai ni cakacaka mana me cakava o Jisu (Yahshua), oya mai Kana e Kaleli, me vakaraitaka kina o Koya na Nona lagilagi; eratou qai vakabauti Koya na Nona tisaipeli.
Joni 2:7-11

E levu sara na ka a vakayacora o Jisu (Yahshua), ia kevaka me ra a volai yadudua kece, au vakabauta ni na lailai mada ga na vuravura oqo, ke via maroroi kina na ivola tuku­tuku taucoko sara era na volai. Emeni.
Joni 21:25

Also Read If Possible (Wilika Talega Ke Rawa)
Isaiah 55; Joel 3:16-18; Amos9:11-15;
John 20:30-31

Vakatovolei Jisu Na Tevoro (The Calumniator Tries Yahshua)

Serving for the 15th October, 2008

Oti qai vakauti Jisu (Yahshua) i vei­kauloa na Yalo Tabu me lai vakatovolei Koya kina na daunivere (Calumniator). 02 Ia ni lolo tiko o Koya, me vasagavulu na siga ka vasagavulu na bogi, a qai yaco Vua na walokai. 03 Qai toro yani Vua na daunivere, qai kaya Vua, “Kevaka o iko o Luve ni Kalou (Elohim), vakarota na vatu oqo me vuki me madrai!” 04 Sauma o Koya ni kaya, “E volai tu ‘Na tamata e na sega ni bula mai na madrai duadua ga, ia mai na veimala ni vosa e rogo mai na gusu ni Kalou (Yahweh).’” 05 Oti qai kauti Koya cake, na daunivere, i na korolevu tabu, vakatokari Koya e na doka ni valenisoro, 06 qai kaya Vua, “Kevaka o iko o Luve ni Kalou (Elohim), kolotaki iko sobu baleta e volai tu ni na vakaroti ira na Nona agilosi e na vukumu, era na qai tabei iko cake e ligadra, me kakua ni tavutu na yavamu e na dua na vatu.’” 07 Sauma vua o Jisu (Yahshua), “E volai tale tu ga, ‘Kakua ni vakatovolea na TURAGA (Yahweh) na nomu Kalou (Elohim).’” 08 Oti qai kauti Koya tale na daunivere i na dua na ulunivanua cere, qai lai vaka­raitaka Vua mai keya, na veimatanitu kecekece e vuravura, vata kei na kedra dui lagilagi; 09 Qai kaya Vua o koya, “Na veika kece qori, au na solia vei iko kevaka mo lutu sobu mo vakarokoroko vei au.” 10 Kaya vua o Jisu (Yahshua), “Lako tani Setani! Baleta e volai tu, ‘Dau vaka­rokorokotaka ga na TURAGA (Yahweh) na nomu Kalou (Elohim), io o Koya duadua ga mo qarava.’” 11 A qai biuti Koya na daunivere (Calumniator), ia raica, ni ra qai lako mai na agilosi, era qai mai qaravi Koya.
Maciu 4:1-11






Also Read If Possible (Wilika Talega Ke Rawa)
Deuteronomy 6:13, 16; 8:3; Psalm 91:11-12;
Mark 1:12-13; Luke 4:1-3

Papitaiso O Jisu (Yahshua Baptized)

Today is the First Day of the Feast of Tabernacles, which in Israel is called Festival of Sukkot. It is when they live in Permanent/Temporary Shelter. Vayikra (Leviticus) 23:42 “And you shall dwell in sukkot for seven days, every person in Israel (the people) shall dwell in sukkot; in order to ensure that your generations will know that I placed the children of Israel in sukkot when I took them out of Egypt, I am Yahweh your Elohim.”

Serving For the 14th October, 2008

Na ivakatekivu ni Nona itukutuku vinaka o Jisu (Yahshua) na Mesaia, na Luve ni Kalou (Elohim). 02 Me vaka e volai tu e na Aisea na Parofita; “Raica, Au sa tala yani na Noqu agilosi me liu yani e Matamu, o Koya me na caramaka na nomu sala; 03 “Na domo e kacikaci tiko e veikauloa; ‘Vakarautaka na sala ni Kalou (Yahweh), ka vakadodonutaka na kena salatu’” 04 O Joni a veipapitaisotaki voli e loma ni lekutu, ka vunautaka voli na veipapitaisotaki ni veivutuni, me rawa na veibokoci ni ivalavala ca. 05 O ira kece e na vanua o Jiutia taucoko kei ira na lewe i Jerusalemi, era a lako vua, era qai papitaisotaki e na uciwai na Joritani, ni ra sa vakatusa na nodra ivalavala ca. 06 O Joni, a dau vakaisulu e na isulu vutinikameli, ka dau vau na tolona e na beleti leca, ka kena kakana na vodre kei na oni ni veikau. 07 A dau vunau voli o koya, ni kaya, “Raica e muri i au tiko mai e dua e cecere cake vei au; na ivesu ni Nona ivava, e sega ni kilikili vei au meu roso sobu meu sereka. 08 “Au papitaisotaki kemuni e na wai, ia o Koya e na papitaisotaki kemuni e na Yalo Tabu.” 09 A qai yaco e na veisiga oya, ni a lako mai Nasareci e Kaleli o Jisu (Yahshua), qai mai papitaiso e na Joritani vei Joni. 10 E na gauna e lamata cake kina i dela ni wai, e a qai raica na lomalagi o Koya ni tawase rua, qai sobuti Koya na Yalo Tabu, e na ibulibuli ni dua na ruve. 11 A qai rogo mai lomalagi e dua na domo, “O iko na Luvequ Daulomani, Au dau marau vakalevu e na Vukumu!”
Marika 1:1-11




Also Read If Possible (Wilika Talega Ke Rawa)
Isaiah 40:3; Malachi 3:1; Matthew 3; John 1:19-34; Luke 3.

Na Gonetagane O Jisu E Loma Ni Valenisoro (Young Yahshua In The Temple)

The Feast of Tabernacles begins at sunset today according to the Hebrew Calendar, the fifteenth day of the seventh month, Tishrei. I dedicate this post and wish those who keep the Feast according to Leviticus 23: 33-39 a blessed Feast.

Serving For The 13th October, 2008

O ira na wekana, era dau lako i Jerusalemi e veiyabaki e na solevu ni lakosivia. 42 E na gauna a yabaki tinikarua kina o Koya, eratou a qai lako cake i na solevu me vaka na ivalavala vei ira. 43 Ni sa oti na veisiga ni solevu, ni ratou sa lesu; na Gonetagane lailai o Jisu (Yahshua) e a tiko voli ga mai Jerusalemi; ia o Josefa kei Tinana rau a sega ni kila oqori. 44 A nodrau nanuma ni tiko o Koya vata kei ira na gonelalai e na nodratou ilakolako; ni sa oti e dua na siga na nodra itosotoso, rau qai vaqarai Koya vei ira na wekadrau vata kei ira era kilai koya. 45 Ia ni rau sa sega ni kunei Koya, rau qai lesu i Jerusalemi, me rau lai vaqarai Koya. 46 ni sa lai oti e tolu na siga, rau qai kunei Koya e loma ni valenisoro, ni dabe tiko e na kedra maliwa na qasenivuli, me vakarogoci ira ka vakatarogi ira. 47 Ia o ira kece era rogoci Koya era a kurabui e na titobu ni veika e kila kei na Nona isau ni taro. 48 Ia ni rau sa raici Koya, rau a kurabui; qai kaya Vua o Tinana, “Luvequ, na cava Mo cakava kina na ka oqo vei keirau? Raica, o tamamu vata kei au, keirau a lomaleqa vakalevu e na neirau vaqarai iko tiko!” 49 Kaya vei rau o Koya, “Na cava drau vaqarai Au tiko kina? Drau sega beka ni kila Niu na tiko e na vale nei Tamaqu? 50 Ia rau a sega ni kila na ibalebale ni vosa e kaya qo vei rau o Koya. 51 Sa qai lako mai vata kei rau o Koya, me ratou lako i Nasareci; a dau talatalairawarawa tikoga vei rau, ia o Tinana a dau vakamareqeta voli ga na veivosa oqo e vuniyalona. 52 O Jisu (Yahshua) a tubu bulabula tikoga e na Nona kilaka vata kei na kena ilevu, ka dau taleitaki vua na Kalou (Yahweh) vata kei ira na tamata.
Luke 2:41-52






Also Read If Possible (Wilika Talega Ke Rawa)
I Samuel 2: 21, 26; Psalms 26: 8; 27: 4; 65;
Matthew 2:13-23; John 2:13-17; 1 Corinthians 4:18-5:4

Sucu O Jisu Karisito (Yahshua Messiah is Born)

Serving For The 12th October, 2008

Na Nona sucu o Jisu (Yahshua), a vaka oqo na kena ituvatuva. E na gauna a musuki kina e na dua na uma ilavo o Meri (Miriam) na tinana, me wati i Josefa, ni rau sebera ni tiko vata, a qai kune, ni sa buketetaka tiko na gone ni Yalo Tabu. 19 Ia o Josefa na watina, baleta ni turaga yalododonu, a sega ni via vakamadualaki koya e matadra na tamata; a qai nakita me rau na sere vakavuni. 20 Ia ni se vakasamataka tiko na veika oqo, raica, e dua na agilosi ni Kalou (Yahweh), a qai rairai vua e na dua na tadra qai kaya, “ I Josefa luvei Tevita, kakua ni ririkotaka mo tauri Meri (Miriam) me watimu baleta o koya e kunekunetaki tiko vua, e vakatuburi mai na Yalo Tabu. 21 “E na qai vakasucuma o koya e dua na Gonetagane, mo na vakatoka me yacana o Jisu (Yahshua), baleta o Koya e na vueti ira na Nona tamata, mai na nodra ivalavala ca.” 22 Na veika kece oqo a yaco, me rawa ni vakayacori kina na veika a tukuna na Kalou (Yahweh) e na gusudra na Parofita ni kaya: 23 “Raica, e dua na yalewa tabutagane e na kunekune qai vakasucuma e dua na Luvena tagane, era na qai vakatoka me Yacana o Imanueli,” kena ibalebale “na noda Kalou (El) sa tiko kei keda.” 24 Ni yadra mai na nona moce o Josefa, a vakayacora na veika kece a mai vaka­rota vua na agilosi ni Kalou (Yahweh), me tauri koya me watina, 25 Ia o koya a sega ni veiyacovi kei koya, me yacova ni sa vakasucuma oti na Luvena tagane ulumatua. A qai vakatoka me Yacana o Jisu (Yahshua).
Maciu 1:18-25







Also Read If Possible (Wilika Talega Ke Rawa)
Isaiah 7:14; Matthew 2; Luke 1-2; John 4:1-42

Jisu: Na Luve Ni Kalou, Na Luve Ni Tamata (Yahshua: Son of Elohim, Son of Man)

Serving For The 11th October, 2008

Au a qai raica e na raivotu e na bogi, niu a raica e dua e vaka na luve ni tamata, ni a lako mai e na o kei lomalagi, ka lako vua na Qase ni Veigauna (Ancient of Days), era qai kauti koya vakavoleka sara vua. 14 Sa qai soli vua na lewa, na vakarokoroko, kei na matanitu: me ra qaravi koya na tamata kece, na matanitu kece kei na duivosavosa. Na nona kaukaua ni vakavulewa e na vakavulewa tawamudu, ka na sega ni takali rawa, kei na Nona matanitu e na sega ni vakarusai rawa.
Taniela 7:13-14

Mai na veitabagaua makawa, na Kalou (Elohim), a dau vakayagataki ira na parofita e na veimataqali ivakarau kei na sala, me vosa kina vei ira na tukada, ia e na ivakataotioti ni gauna e daidai, e sa mai vosa vei keda e na domo i Luvena, 02 o Koya e a lesia me itaukei ni veika kece, o Koya talega e a bulia kina na veitabagauna: 03 Baleta o Koya e rarama ni Nona lagilagi ka veiucui vakaoti kei Koya na kena irairai, qai taura vata tu na veika kece e na kaukaua ni Nona vosa; e na gauna sa vaka­savasavataka kina vakataki Koya na noda ivalavala ca, sa qai lai dabe e na liga imatau i Koya sa Cecere (Majesty) mai cake; 04 baleta ni cecere cake mai vei ira na agilosi, kei na yaca e nona iwasewase e cecere cake mai na yacadra. 05 O cei beka vei ira na agilosi e a bau kaya vua na Kalou (Elohim): “O iko na Luvequ-tagane, nikua Au sa vakatuburi Iko”? oti qai kaya tale, “Au na wili Vua meu Tamana, o Koya e na wili vei Au ni Luvequ”?
Iperiu 1:1-5






Also Read If Possible (Wilika Talega Ke Rawa)
2 Samuel 7:14; 1 Chronicles 17:13; Psalms 2:7; Matthew 23: 63-63;

Marik 14: 61-62; John1: 32-34; Luke 22: 67-70.

Na Yalayala Ni Na Lako Mai Na Mesaia (The Promise that the Messiah Will Come)

Happy Fiji Day To One and All.

Serving for the 10th October, 2008

Ia oqo, sa qai kaya na TURAGA (Yahweh), o koya e a lesi i au mai na bolanigone meu nona italai, meu kauti Jekope lesu mai Vua, ka vaka­soqoni Isireli tale mai vua, baleta au sa dokai e na mata ni TURAGA (Yahweh), ka sa noqu kaukaua tiko na noqu Kalou (Elohim), 06 Ia e kaya o koya, “E ka lailai wale vei iko mo noqu italai, mo vueta cake na veimataqali nei Jekope, qai vakalesui ira mai na Isireli Au a maroroi ira tiko. Au na cakavi iko talega mo nodra rarama na kai Veimatanitu tani, mo rawa ni kauta talega mai na noqu veivueti i na iyalayala kei vuravura.”
Aisea 49:5-6

“Ia o iko, Peciliema-Efirata, e dina ga ni o lailai wale vei ira na udolu e Jiutia, maivei iko e na lako mai e na vukuqu e dua e na mai vakavulewa e Isireli; na nona veitosoyaki e se vure sara mai na gauna eliu mai na veitabagauna tawamudu.” 03 O koya oya e na guileca tu mada kina, me yacova na gauna sa na vakasucu kina o koya e taratara tiko: kei na nodra lesu mai na vo ni tacina me ra mai duavata kei ira vaka kai Isireli. 04 E na qai tu o koya, me qaravi ira na nona solosolo, e na kaukaua ni TURAGA (Yahweh), e na lagilagi ni yaca vakaturaga ni TURAGA (Yahweh) na nona Kalou (Elohim). Era sa na qai bula vakacegu, baleta na nona cecere e na tete i na iyalayala kei vuravura. 05 E na qai yaco o koya me vu nodra bula sautu ….”
Maika 5:2-5a).

Also Read If Possible (Wilika Talega Ke Rawa)
Revelation 35:14-19; Ruth 4:10-17; Matthew 2:1-6
I Samuel 17:12.

Malakai: Na iTalai Ni Veiyalayalati. (Malachi – Messenger of the Covenant)

Serving for the 9th Ocober, 2008

“Raica, au na tala yani na noqu italai, me lai caramaka na sala, ni sebera niu yaco yani. Oti e na qai vakasauri ga na nona lako yani i na nona valenisoro, na Turaga (Sovereign) oni vakasaqara tiko; io, na italatala ni veiyalayalati oni gadreva tiko e na lako yani,” e kaya na TURAGA cecere (Yahweh of Hosts). 02 Ia o cei e na vorata rawa na siga e na yaco yani kina? O cei me na tudei rawa tu e na gauna e basika yani kina o koya? Baleta o koya e na vaka na nona bukawaqa na dausava koula, ka vaka na nodra sovu na dausava isulu: 03 e na dabe o koya me vakataki koya e dauvakawaicalataka ka vakasavasavataka na siliva. E na vakasavasavataki ira na Livai, qai savai ira me vaka na koula kei na siliva. 04 Oti e na qai ciqomi ira na tamata era na kauta yani na imadrali ni yalododonu vata kei na imadrali nei Jiuta kei Jerusalemi e na ciqoma na TURAGA (Yahweh), me vaka e na gauna eliu, ka vaka na veitabayabaki sa sivi.
Malakai 3:1-4.

“E ka dina ni sa lako tiko mai na siga oya; e na kama me vaka na lovo ni vakawaicalataki kaukamea; o ira kece na viavialevu, kei ira kece era dau caka ca, era na vaka na vunisila ta vakavo: era na qai vakamai e na siga oya sa tadu tiko mai,” e kaya na TURAGA ni lewe vuqa (Yahweh of Hosts). “E na sega ni dua na wakana se tabana e na vo vei ira. 02 Ia vei kemuni oni rerevaka na Yacaqu, na matanisiga ni yalododonu e na cadra mai, ka kauta tiko mai tabana na veivakabulai. Oni na lako yani, oni qai ladelade me vaka na luve ni bulumakau era sa sere mai na lomanibai. 03 Oni na qai butuqaqi i ira na tamata ca; era sa na dra­vusa tu e na ruku ni qeteqete ni yavamuni, e na siga au na cakava kina na veika oqo”, e kaya na TURAGA ni lewe vuqa (Yahweh of Hosts).
Malakai 4:1-3.

“Raica, au na tala yani vei kemudou na parofita o Ilaiya, ni sebera ni yaco yani na siga levu, vakadomobula ni TURAGA (Yahweh). 06 O koya e na lai vagolea na yalodra na tama vei ira na luvedra, kei na yalodra na gone vei ira na nodra qase; deu qai lako yani meu lai mokuta na vanua e na vosa ni veivakaloucataki.”
Malakai 4:5-6.

Read Also If Possible (Wilika Talega Ke Rawa)
Deuteronomy 23:3-5; Esther 8-10; Joel 3:1-8; Obadiah 15;

Revelation 19:11-20; 10.

Na Lutu Nei Amani. (The Fall Of Haman)

From sunset today to sunset tomorrow (the 10th day of the seventh month) is the Day of Atonement (Yom Kippur) as outlined in Leviticus 23:27-32. If you are fasting beginning this evening as instructed by Yahweh to his people, here is my wish that your efforts will be blessed by the creator and sustainer of life.

Serving for the 8th October, 2008

Rau sa mani lako na Tui vata kei Amani me rau lai kana magiti vata kei Ranadi Esiteri, 02 ia ni ratou sa gunu waini tiko e na ikarua ni siga, sa taro sara na Tui, “Ranadi Esiteri, na cava beka na nomu gagadre? E na soli dina ga vei iko. Na cava beka o kerea? Kevaka mada ga me sa na veimamataki na matanitu, e na vakadonui ga.” 03 Sauma o Ranadi Esiteri, “Kevaka o sa yalovinaka e na vukuqu, kemuni na Tui, kevaka oni gadreva me vaka kina, kemuni na Tui, au masuti kemuni moni solia ga vei au na noqu bula, qo ga na noqu vakamamasu. Me ra bula talega o ira na kai noqu – qo na noqu kerekere. 04 Baleta o au vata kei ira na kai noqu, keimami sa volitaki oti me keimami vakacacani, me keimami na vakamatei, me keimami qeyavu vakadua. Kevaka beka me keimami a volitaki ga vaka bobula tagane se yalewa, keu a vagaluya voli ga na ka oqo, baleta qori e sega ni ka me mai vakaogai sara kina na Tui.” 05 E tarogi Ranadi Esiteri sara o Tui Easuerosi, “O cei o koya? E tiko evei na tamata viavialevu e bolea me cakava na ka oqo?” 06 E kaya sara o Esiteri, “Na tamata ca kei na meca oya o Amani na tamata yaloca.”
Esiteri 7: 1-6a).

E kaya cake sara o Apona, e dua vei iratou na tagane ni veiqaravi eratou dau veiqaravi tiko vua na Tui, “E dua na itutu ni veikuna, e vitusagavulu ka lima (75) na fiti na kena cere sa duri tu qori e na yasa ni vale nei Amani. Qori a tara o koya me na vakamatei kina o Moatekai, o koya e a vosa cake me vukea na Tui.” E kaya sara na tui, “Kunati koya kina!” 10 Era mani kunati Amani e na itutu ni veikuna e a tara o koya me na kuna kina o Moatekai. Oti sa qai malumu sobu na nona yalokatakata na Tui.
Esiteri 7: 9-10.







Also Read If Possible (Wilika Talega Ke Rawa)
Deuteronomy 23:3-5; Esther8-10; Joel 3:1-8; Obadiah 15;

Revelation 19:11-20; 10.

Bukivere O Amani Me Ra Vakamatei Na Jiu. (Haman Plots To Annihilate The Jews)

Serving for the 7th October, 2008

Ia ni sa oti na veika oqo, e a qai vakaicocovitaki Amani na luve i Hamataca tagane, na kai Aqaqaiti, o Easuerosi na Tui, oya ni a vakatoroicaketaka na nona ilesilesi, me sa lai dabeca na idabedabe ni veiliutaki e cecere duadua mai vei ira na vei turaga bale kece tale eso. 02 O ira kece sara na vakailesilesi e na matamata ni koro ni Tui, era dau cuva e na vakarokoroko vei Amani, me vaka na ivakaro ni Tui e na vukuna. Ia o Moatekai a sega ni via cuva vua se vakarokoroko vua.
Esiteri 3:1-2.

Ni sa raica o Ama­ni ni sega ni dau via cuva vua se vakarokorokotaki koya o Moatekai, sa dua na ka na nona yalokatakata. Ia ni sa qai kilai ira na kawa nei Moatekai o koya, sa qai tuburi koya tale na vakasama ni na maumau wale ke vakamatei Moatekai duadua ga. 06 Qori a qai vaqara kina o Amani e dua na sala me na vakamatei ira kece kina vakadua na kawa nei Moatekai – oya o ira na Jiu – e na loma ni matanitu taucoko nei i Easuerosi.
Esiteri 3: 5-6.

A mani kaya kina o Amani vua na Tui o Easuerosi, “E dua na kawa tamata era bula tiko e na loma ni nomuni matanitu, era duitutu tu, ia era na kune e na veiyasana kece sara e na loma ni nomuni matanitu raraba; na nodra itovo o ira qo, e dua tani sara mai na nodra itovo o ira na vo ni nomuni tamata kece, era qai dau sega sara ga ni via muria na lawa ni Tui; sa sega sara ga ni dua na betena vua na Tui me vosoti ira tiko. 09 Kevaka e gadreva na Tui, vakatara me buli mada e dua na lewa me ra vakawabokotaki kina: Au na biuta vakatikitiki e tini na udolu na taledi na siliva, e na vale ni yau ni Tui, me ra na saumi kina o ira me ra na cakava na cakacaka oqo.” 10 Sa mani ucuna mai na nona iqaqalo na nona mama ni vakatulewa, na Tui, qai solia vei Amani na luve i Hamataca, na Aqaqaiti, na kedra meca na Jiu. 11 “Taura na ilavo,” e kaya na Tui vei Emani, “qai vakayagataki ira talega na tamata mo vakayacora kina na ka ga e gadreva na lomamu.”
Esiteri 3:8-11.

Also Read If Possible (Wilika Talega Ke Rawa)
Genesis 12:1-3; Deuteronomy 30:1-7; Esther 4-6; Psalms 44:1-8;

Daniel 3: 6; Romans 9-11.

Yaco Me Ranadi ni Perisia O Esiteri (Esther became Queen of Persia).

Serving For the 6th October, 2008

E a tiko voli mai na itikotiko vakatui mai Susani e dua na Jiu mai na Yavusa Penijamini, na yacana o Moatekai, na luve i Jaea tagane, na luve i Simei tagane, na luve i Kiso taga­ne 06 e dua vei ira era a kau vakabobula mai Jerusalemi vata kei Jekonaia na Tui Jiutia e na gauna i Nepukanesa na Tui Papiloni. 07 A qai susuga voli mai na tavalena, o Hadasa, baleta rau sa yali ruarua o tamana kei tinana. Na goneyalewa oqo, e dau yacana talega o Esiteri, e goneyalewa bulicaki vinaka sara ka rairai totoka vakaoti. Ia baleta ni rau a sa mate o tamana kei tinana, e a susugi koya mai vakaluvena o Moatekai. 08 A qai yaco, ni sa rogo na ivakaro vaka Tui, ni levu sara na goneyalewa era a kau i na itikotiko vakatui mai Susani, era qai lai biu tu yani me qaravi ira tu vakadua o Ekai. O Esiteri talega e a kau i na itikotiko ni Tui me lai qaravi koya o Ekai, o koya e dau qaravi ira na goneyalewa musuki. 09 E a vakayalovinakataki koya na goneyalewa oqo, qai vakavuna na nona dau taleitaki koya. Qori a totolo sara kina na nona dau solia vakarawarawa vua na iyaya ni sasauni me vakarairaivinakataki koya kina, qai dau solia talega vua na kakana uasivi. E a lesia vua e levitu na goneyalewa dauveiqaravi digitaki mai na vale ni tui: qai lai vakatikori koya vata kei ira na nona goneyalewa dauveiqaravi, e na vanua vinaka duadua e loma ni nodra vale na goneyalewa musuki. 10 Ia o Esiteri a sega ni vakatakila na nona koro, vata kei ira na wekana: baleta a vakaroti koya o Moate­kai me kakua sara ni vakatakila.
Esiteri 2:5-10.

Ia na Tui a domoni Esiteri vakalevu cake sara mai vei ira na vo ni yalewa, ka vinakati koya qai lomani koya vakalevu cake talega mai vei ira na vo ni goneyalewa tabutagane. A mani vakaisalataki koya na Tui, e na isala vaka Ranadi, ka buli i koya me Ranadi me isosomi kei Vasiti.
Esiteri 2: 17.







Also Read If Possible (Wilika Talega Ke Rawa)
Genesis 39; 41; Nehemiah 1:1-11; 1 Peter 3:1-6

Gadrevi Me Dua Na Ranadi Vou Mai Perisia (A New Queen of Persia Needed).

Serving for the 5th October, 2008

A qai yaco e na gauna nei Easuerosi, oya o Ea­suerosi e iliuliu ni duanadrau ruasagavulukavitu (127) na yasana, me tekivu mai Idia ka tete yani vaka I Iciopia. 02 E na gauna oya, e a veiliutaki tiko ga o Easue­rosi mai na nona itikotiko vakaturaga mai Susani, 03 ia e na ikatolu ni yabaki ni nona veiliutaki, e qai vakayacora e dua na kana magiti levu o koya, e na vukudra na nona turaga kei ira na nona ivakailesilesi.
Esiteri 1:1-3a).

E na ikavitu ni siga, ni sa tubu sara tu ga e cake, mai na gunu waini, na nona marau o Easuerosi, sa qai vakaroti iratou na levitu eratou dauveiqaravi vua na Tui, o Memukani, o Bisita, O Araboni, o Biqica, kei Apakata, o Seta kei Karakasi, 11 me ratou lai kauti Vasiti na Ranadi maivua, ka me dara tiko mai na nona isala vaka Ranadi, me mai vakaraitaka mada na nona totoka vei ira na tamata kei ira na vei turaga bale; baleta sa bau totoka dina ga o koya ni raici. 12 Ia ni ra sa lai vakasavuya na ivakaro ni Tui o ira na dauniveiqaravi, e a qai sega ni via lako mai o Vasiti na Ranadi: E a qai curuma na Tui e dua na yalokatakata vakaitamera qai tubu kaukaua na nona cudru.
Esiteri 1:10-12.

Oti sa qai mai kaya o Memukani vua na tui kei ira na veituraga bale, “Sa vakayacora qo e dua na cala levu o Vasiti na Ranadi, sega walega vua na Tui, vei ira kece talega na vei tura­ga bale, kei ira na tamata na lewenivanua e na veiya­sana kece e nodra iliuliu vakadua tu o Easuerosi na Tui.
Esiteri 1:16.

O koya oya ke vinakata na Tui, me sa na veikauyaki e dua na ivakaro vakatui, ni sa volai e na nodra ivola ni lawa na kai Perisia kei ira na kai Mitia, ka me kakua ni veisautaki rawa, ni sa na sega ni vakatarai vakadua tale vei Vasiti na Ranadi me lai raica ka tiko e na mata i Easuerosi na Tui. Sa na vakatarai talega vua na Tui me solia laivi na itutu vaka Ranadi vua e dua tale e na vinaka cake mai vua. 20 Ni sa na veikauyaki na nona ivakaro oqo na tui, e na loma ni nona matanitu taucoko, era sa na qai dau doka na dui watidra o ira kece na yalewa, maivei ira era lolovira ka vaka kina vei ira era cecere sara.”
Esiteri 1:19-20.

Also Read If Possible (Wilika Talega Ke Rawa)
Ezra 4:1-6; Proverbs 31:1-9; Daniel 9:1-2; 1 Corinthians 6:9-10

Wilika Na Lawa Vei Ira Na Yasa, O Esera. (Ezra Reads the Law to the Remnants)

Serving for the 4th October, 2008

E na imatai ni siga ni ikavitu ni vula, e kauta mai kina na ivola ni lawa, o Esera na bete, ki na isoqosoqo, vei ira na tagane kei ira na yalewa, era sa yalomatua me ra rogoca ka vakasamataka. 03 E wilika vei ira e na domolevu mai na mataka me yacova na sigalevu, ni duri tu e na mata ni salatu, donuya na matamata ni wai, e na matadra na tagane kei na yalewa, kei ira era sa vakasama rawa. O ira kece na tamata era a vakadirorogo ni wiliki tiko na ivola ni lawa.
Niemaia 8:2-3

E dolava na ivola o Esera. Na tamata kece era rawa ni raici koya baleta e duri tu mai cake; ia ni sa dolava tiko era a qai tucake kece na tamata. 06 E a qai vakacaucautaka na TURAGA (Yahweh) na Kalou (Elohim) levu o Esera; era qai laveta na ligadra o ira kece na tamata era qai kaya, “Emeni! Emeni!” Era qai vakacuva na uludra me tara na dela ni qele, me ra vakarokoroko vua na TURAGA (Yahweh).
Niemaia 8: 5-6

O ira na Livai …. 08 era vakamacalataka na lawa ni ra se duri tu e keya na tamata. Era wilika vakamalua na ivola ni lawa ni Kalou me rawa ni matata na kena ibalebale, me rawa ni ra kila vinaka na veika e wilika tiko o ira na tamata. 09 Oti oya era sa qai vosa vei ira na tamata, o Niemaia na kovana, o Esera na bete, kei na vunivola, kei ira na Livai, o ira era a veivakatavulici tiko vei ira na tamata, e na nodra ka­ya, “Na siga oqo e sa vakatabui e na vukuni TURAGA (Yahweh) na nomuni Kalou (Elohim); ni kakua ni lomabibi, se tagitagi”. O ira na tamata era a tagi tiko, ni ra sa rogoca tiko na vei mala ni vosa ni lawa.” 10 Sa qai kaya vei ira o koya, “Ni lako, ni lai kania na kakana digitaki ka gunuva na wai ni gunu kamikami­ca, qai vakauta tale ga eso vei ira era sega tu ni vakavakarau. Na siga oqo e siga tabu Vua na TURAGA (Sovereign): Moni kakua ni yalobibi, baleta na marau ni TURAGA (Yahweh) e vu ni nomuni kaukaua.
Niemaia 8: 7b -10.




Also Read If Possible (Wilika Talega Ke Rawa)
Deuteronomy 16:13-15; Ezra 6:19-22; Isaiah 58;
Matthew 13:18-23; Acts 17:10-11

Masulaka Na Bula Sautu Mai Jerusalemi (Pray For peace in Jerusalem)

Serving for the 3rd October, 2008

Na Same ni cabecabe me baleti Tevita
Au a marau ni ra kaya vei au, “Mai meda mai lako i na vale ni TURAGA (Yahweh).”
02 Na yava i keimami sa na lai duri e na loma ni nomu matamata, mai Jerusalemi.
03 O Jerusalemi e tara me vaka na korolevu, me dau vaqaqacotaki kina na veitaratara vakaveiwekani;
04 Oya na vanua era dau lako cake kina na lewe ni veimata­qali, na veimataqali ni TURAGA (Yah), me ra lai vakavinavinakataka kina na Yaca ni TURAGA (Yahweh),
05 Me vaka sa vakaroti tu e na ilesilesi a soli vei Isireli. E keya e toka kina na idabedabe vakatui ni dodonu, na nodra idabedabe vakatui ni vale i Tevita.
06 Masulaka na bula sautu nei Jerusalemi: “Me ra na vutuniyau o ira era lomani iko.
07 Me tiko mada ga na bula sautu e na nomu lomanibai, Ka me vutuniyau na nomu veivale vakaturaga.”
08 E na vukudra na taciqu kei ira na noqu icaba, Au na kaya kina, “Me tiko e lomamu na bula vakacegu.”
09 E na vukuni Nona vale na TURAGA (Yahweh), na nei­mami Kalou (Elohim), Au na vaqara ga me nomu na veika vivinaka.
Same 122: 1-9





Also Read If Possible (Wilika Talega Ke Rawa)
Same 85; Sakaraia 9:9-17; Luke 13:34-35;
Efeso 2:11-22.

Tara Na Lalagabai Mai Jerusalemi (The Walls of Jerusalem Rebuilt).

Serving for the 2nd October, 2008

Keimami sa mani tara vou tale na lalagabai, ka keimami sa lai yacova sara na veimama ni kena cere makawa, baleta era a gumatuataka dina na kena cakacaka o ira na tamata. 07 Ia ni ra lai rogoca o Sanivalati, o Topaia, o ira na kai Arapea, kei ira na Amonaiti, kei ira na tagane mai Asitoti, ni sa tekivu na kena tara vou na lalagabai mai Jerusalemi, ka sa te­kivu me bonati na veitikina kabasu; era a qai cudru vakalevu. 08 Era mani bukivere vata o ira kece, me ra lai valuti Jeru­salemi, me ra qai vakavuna na kena tao na cakacaka. 09 Ia keimami qai masu vua na Kalou (Elohim), ka lesia na ivakatawa me ra yadra tiko e na siga kei na bogi, me iwali ni leqa oqo.
Niemaia 4:6-9

A qai yaco mai na siga oya, e veimama ga na noqu tamata era cakava na cakacaka, na veimama kadua, era a tauri moto, isasabai, dakai titi, kei na iyaragi. O ira na daunivakavulewa era a qai mai duri tu e dakudra na kai Jiutia era tara vou tiko na lalaga. 17 O ira na cola iyaya tiko, era cakava tiko na nodra cakacaka e na dua ga na ligadra, baleta na kena ikarua e sa tara tiko na iyaragi, 18 ia o ira na matai, era vauca toka e dibidra na nodra iseleiwau, ni ra cakacaka tiko…...
Niemaia 4:16-18a).

Sa qai tara oti vakadua na lalagabai e na ikaruasagavulukalima ni siga ni vula o Ilulu, oya ni tara oti vakadua e na loma ga ni limasagavulukarua ni siga. 16 Ni ra sa rogoca vata oqori o ira na neimami meca, e a tuburi ira kece na veimatanitu era tiko volivoliti keimami, na rere kei na yalolailai, baleta era sa qai kilakasamataka mai ni a rawa ga na caka­caka oqo e na veivuke ni neimami Kalou (Elohim).
Niemaia 6:15-16



Also Read If Possible (Wilika Talega Ke Rawa)
Nehemiah 2-6; Psalms 27; 51:18-19; 127:1;
John 16:33; 1 Join 4:4

Masulaki Ira Na Isireli Tu Yasa O Niemaia.(Nehemiah Prays For The Israelites Living Abroad)

This is dedicated to the Hebrew New Year, the year 5769, which dawned at sunset 29th September, 2008. So Shanah Tovah to one and all.

Serving for the 1st October, 2008

Na vosa nei Niemaia na luve i Akalaia tagane. A qai yaco e na vula o Kisilevi, e na ikaruasagavulu ni yabaki, niu a se tiko mai Susani e na vale ni tui, 02 ni a lako yani mai Jiutia o Hanani, e dua vei ira na taciqu, vata kei na so tale na tagane; au a mani vakatarogi ira me baleti ira na vo ni kai Jiutia era a dro bula mai na veivakabobulataki, kau vakatarogi ira talega me baleti Jerusale­mi. 03 Era qai kaya vei au, “O ira era a dro bula mai na veivakabobulataki era sa lesu tale mai, era sa leqa sara vakalevu, ka ra sa vakamaduataki talega. Na lalagabai vatu mai Jerusalemi sa kabasu, ka sa kama yavu e na bukawaqa na kena matamata.” 04 A qai yaco niu rogoca oqori, au qai dabe sobu au qai tagi. E a vica vata na siga na noqu vakaloloku tiko, kau lolo tiko, ka masumasu talega vua na Kalou (Elohim) ni lomalagi. 05 Oti au sa qai kaya: “Au masuti Kemuni TURAGA (Yahweh), na Kalou (Elohim) ni Lomalagi, o kemuni na Kalou (El) vakaitamera ka vakadomobula, o Kemuni oni dau taqomaka matua na nomuni vosa yalayala ka dau yalololoma vei ira era lomani kemuni ka dau talai rawarawa e na nomuni ivunau: 06 laiva me vakatudaliga na daligamuni, kei na matamuni me dola mai, moni rogoca na qaqani masu au cabora tiko e matamuni na nomuni dauniveiqaravi, e na veisiga kei na veibogi, e na vukudra na nomuni tamata, o ira na Isireli, ka vakatusa yani na ivala­vala, keimami dau vakayacora vei kemuni, o keimami na kawa Isireli bau kina o au vakataki au kei na vale nei tamaqu. 07 Keimami a dau vakayacora na ivakarau vakasisila e matamuni. Keimami a sega ni bau talai rawarawa i na nomuni ivaka­ro se na nomuni ilesilesi, kei na nomuni lawa oni a solia vua na nomuni dauniveiqaravi o Mosese. 08 Ni nanuma mada na nomuni vosa oni a vakarota vei Mosese na nomuni dauniveiqaravi, ni oni a kaya kina, “Kevaka oni talaidredre, Au na tawasei kemuni e na kedra maliwa na vei matanitu, 09 ia kevaka oni lesu mai vei au, moni mai talairawarawa tale i na noqu ivakaro; o ira mada ga era sa wasei tani tu i na iyalayala kei vuravura kadua, au na lai vakasoqoni ira lesu mai­ keya, meu kauti ira lesu mai i na yasana au sa digitaka me vakatikori kina na Yacaqu.”
Niemaia 1:1-9




Also Read If Possible (Wilika Talega Ke Rawa)
Ezekiel 34:7-16; Mark 2:14-17; Luke 7:36-47